7

Helpem Ol Pikinini blong Praktis blong Rid, Raet, mo Mekem Matematik

Ol Kwestin blong Tokbaot

1. Lukluk ol pikja ia. ?Wanem nao yu luk?

2. ?Olsem wanem nao yu ting se ol pikinini oli filim blong stap lanem samting?

3. ?Olsem wanem nao yu helpem ol pikinini blong yu blong lan evri dei?

Lanem Samting

Ol pikinini oli lanem plante samting long skul. Oli save praktis long hom blong helpem olgeta blong tingabaot wanem oli bin lanem. Hemia sam wei blong helpem ol pikinini blong yu blong praktis blong stap rid, stap raet, mo mekem matematik evri dei:

Stap rid

Blong stap rid hem i wan impoten wei blong ol pikinini oli lanem samting. Ol papa mo mama oli save helpem ol pikinini blong olgeta blong andastanem olsem wanem nao fasin blong stap rid bae i helpem olgeta long skul mo long laef blong olgeta. Ol pikinini oli save lan blong rid moa gud taem oli stap rid long olgetawan o rid laod long ol nara man evri dei. Yu save askem long ol pikinini blong yu blong rid long yu taem yu stap mekem kaekae o wok long hom blong yu. Yu save askem tu blong oli ridim ol toktok o ol ves long ol skripja. Ol bigbigfala pikinini oli save rid long ol smolsmol brata mo sista blong olgeta.

Stap Raet

Blong stap raet i save helpem ol pikinini blong tingting mo lan. Taem oli raet, ol pikinini oli save serem ol tingting blong olgeta mo yusum ol niu toktok. Yu save askem ol pikinini blong yu blong raet smolsmol evri dei. Sam pikinini oli laekem blong raetem ol stori. Ol narawan oli laekem blong stap raet abaot ol samting we i hapen long olgeta. Askem ol pikinini blong yu blong ridim wanem oli raetem long yu.

Matematik

Blong stap lanem ol skil blong matematik hem i impoten tumas. Ol skil ia oli yusum long ol bilding, blong stap kuk, mo ol nara pat blong laef evri dei. Plante pikinini oli ting se matematik hem i had. Be i no sapos blong i olsem. Yu save helpem ol pikinini blong yu blong lanem matematik evri dei. Askem olgeta blong kaontem mane o pem ol samting long maket. Askem olgeta blong kaontem ol samting long hom o taem yu kukum kaekae. Hemia bae i helpem olgeta blong tingabaot ol namba, mo olsem wanem oli yusum matematik evri dei.

Tingting mo Prea.

Tingting long wanem yu bin lanem. Raetemdaon eni tingting we yu gat o ol aedia we oli kam long Tabu Spirit. ?Olsem wanem yu stap helpem ol pikinini blong yu blong praktis blong stap rid, stap raet, mo mekem matematik evri dei?

Aktiviti

Lukluk long ol lis ia andanit. Droem wan tik (✓) long bokis narasaed long ol samting we yu wantem mekem wetem ol pikinini blong yu.

Stap Rid long Hom

Wetem ol pikinini blong yu:

• Ridim wan buk laod.

• Ridim ol raeting we oli stap long ol samting.

• Tekem taem blong stap ridim ol skripja.

• Ridim ol saen long rod.

• Talem ol nem blong ol leta we oli luk.

Stap Raet long Hom

Askem ol pikinini blong yu blong:

• Dro ol pikja mo tokabaot ol pikja ia long yu.

• Raetem ol leta.

• Raetem ol stori.

• Raetem ol nem blong ol famli memba.

• Raet long wan jenol.

Matematik long Hom

Wetem ol pikinini blong yu:

• Kaontem ol samting long maket.

• Skelem ol kaekae blong kuk taem oli stap kuk.

• Ademap mo karemaot ol namba.

• Praktisim wan problem blong matematik tugeta.

• Ridim taem long wan klok.

Toktok wetem Famli blong Yu

Toktok wetem famli blong yu abaot wanem yu bin lanem. Toktok raon long ol kwestin andanit ia. Askem ol memba blong famli blong yu, blong oli serem ol aedia blong olgeta mo lisin long wanwan long olgeta.

• ?Wanem ol samting yu bin lanem long skul?

• ?Olsem wanem nao yumi save help wanwan long yumi blong rid mo raet evri dei?

• ?Olsem wanem yumi save helpem wanwan long yumi blong mekem matematik evri dei?