8

Helpem Ol Pikinini Wetem Skulwok long Hom

Ol Kwestin blong Tokbaot

1. Lukluk ol pikja ia. ?Wanem nao yu luk?

2. ?Olsem wanem nao yu stap helpem ol pikinini blong yu wetem ol skulwok blong olgeta long hom?

3. ?Huia bae i help sapos skulwok blong ol pikinini blong yu, oli had tumas long yu blong yu helpem olgeta long hem?

mama mo boe i stap bildim pleiplei

papa mo boe i stap raet

Lanem Samting

Samtaem wanem we ol pikinini blong yu oli lanem long skul i had tumas long yu blong yu andastanem mo helpem olgeta wetem. Hem i oraet sapos yu no save evri samting. I gat plante samting yet we yu save mekem blong helpem ol pikinini blong yu long skul.

Skulwok

bubuwoman mo apugel i stap stadi

Tijim ol pikinini blong yu blong wok long skulwok blong olgeta evri dei. Sapos ol pikinini blong yu oli gat skulwok we oli nid blong finisim long hom, helpem olgeta blong wok long hem. Yu save helpem ol pikinini blong yu blong mekem wan plan blong finisim skulwok blong olgeta long taem. I save help bigwan, sapos ol pikinini oli gat wan kwaet taem mo ples blong stadi long hom. Yu save helpem ol pikinini blong yu blong oli askem wan tija, fren, o wan nara adalt blong help sapos skulwok blong olgeta i had tumas.

Ol Eksam

pikinini i stap rid

Askem ol pikinini blong yu sapos oli andastanem wanem oli stap lanem. Askem olgeta wanem oli nidim blong save blong ol eksam. Sapos oli nidim help, yu save toktok long ol tija blong olgeta o letem olgeta i askem ol tija blong olgeta blong help.

Yu save helpem ol pikinini blong yu blong stadi from ol eksam, taem yu mekem olgeta i ansarem ol kwestin blong ol eksam blong bifo. Yu save prea tugeta tu from help. Traem blong givim kaekae mo wota long ol pikinini blong yu bifo oli tekem eksam blong mekem se oli save tingting gud mo no stap hanggri. Talem long ol pikinini blong yu se yu biliv long olgeta mo we yu lavem olgeta nomata sapos oli no mekem gud long eksam blong olgeta.

Tingting mo Prea

Tingting long wanem yu bin lanem. Raetemdaon eni tingting yu gat o ol aedia we i kam tru long Tabu Spirit. ?Olsem wanem nao yu save helpem ol pikinini blong yu blong oli mekem skulwok blong olgeta mo stadi from ol eksam?

Aktiviti

Lukluk long lis ia andanit. Droem wan tik (✓) long bokis narasaed long ol samting we yu wantem blong mekem wetem ol pikinini blong yu.

hom aekon

Skulwok long Hom

• Askem ol pikinini blong yu wanem oli stap lanem.

• Helpem ol pikinini blong yu wetem skulwok.

• Traem blong faenem wan taem mo wan ples blong ol pikinini blong stadi.

• Askem ol pikinini blong yu wetaem oli mas givim skulwok blong olgeta long tija blong olgeta.

• Sapos oli nidim help, letem ol pikinini blong oli askem wan fren o wan tija blong i help.

• Prea blong save olsem wanem blong helpem ol pikinini blong yu.

tes aekon

Rere long Eksam

• Askem ol pikinini blong yu sapos oli andastanem wanem oli stap lanem.

• Askem ol pikinini blong yu wanem oli nid blong save blong eksam blong olgeta.

• Mekem ol pikinini blong yu blong oli stadi long ol kwestin blong eksam we i pas finis.

• Givim kaekae mo wota long ol pikinini blong yu bifo oli mekem wan eksam.

• Talem long ol pikinini blong yu se yu lavem olgeta nomata sapos oli no mekem gud long ol eksam blong olgeta.

Toktok wetem Famli blong Yu

Toktok wetem famli blong yu abaot wanem yu bin lanem. Toktok raon long ol kwestin we oli stap andanit ia. Askem ol memba blong famli blong yu, blong oli serem ol tingting blong olgeta mo lisin long wanwan long olgeta.

• ?Olsem wanem yumi save helpem ol memba blong famli wetem skulwok blong olgeta?

• ?Wanem yumi save mekem blong helpem ol memba blong famli blong oli stadi from ol eksam blong olgeta?

• ?Weaples nao ol famli memba oli save stadi long hom?

ol pikinini oli stap stadi