Welkam

Gaedbuk ia bae i helpem yu blong lanem olsem wanem blong yu helpem ol pikinini blong yu blong lanem samting long skul mo long haos.

Ol pikinini oli stap lan aot long ol papa mo mama, mo ol tija. Oli stap lanem samting tu tru long wok, pleiplei mo ol kwestin we oli askem. Ol famli oli impoten tumas, mo oli save helpem ol pikinini blong stap lanem samting. Taem ol famli oli sapotem ol pikinini blong stap lanem samting, bae ol pikinini oli filim hapi mo harem gud abaot olgetawan. Ol pikinini oli wantem tu, blong lanem moa samting.

Toktok wetem famli blong yu abaot ol samting we yu lanem taem yu stap ridim gaedbuk ia. Prea blong gat help long Papa long Heven. I nomata sapos yu no gat plante edukesen, yu save helpem pikinini blong yu yet blong stap lanem samting. Lod bae i helpem yu mo ol pikinini blong yu blong lanem samting tugeta taem yufala i mekem wok, pleiplei, toktok wetem wanwan long yufala mo rid.

Olsem Wanem blong Yusum Gaedbuk Ia

Ol papa mo mama oli save stadi long gaed buk ia tugeta, wetem ol pikinini blong olgeta,o wetem ol narafala papa mo mama. Ol lida blong Jos oli save invaetem ol papa mo mama blong mit tugeta, mo toktok raon long ol topik insaed long gaedbuk ia. Ol givhan brata mo sista oli save toktok tu, abaot ol topik insaed long gaedbuk ia wetem ol famli we oli stap givhan long olgeta.

Olsem Wanem blong Stadi long Wanwan Topik

Folem ol step ia taem yu stap stadi long wanwan topik insaed long gaed buk ia:

1. Invaetem ol narafalawan blong stadi long topik wetem yu, o stadi long topik yuwan.

2. Tingting long ol kwestin mo tokbaot olgeta.

3. Ridim mo mekem ol aktiviti.

4. Tingting mo prea abaot wanem we yu bin lanem.

5. Tokbaot wanem yu bin lanem wetem famli blong yu.