1

ʻOku Mahuʻinga ʻa e Akó

Ngaahi Fehuʻi ke Talanoaʻí

1. Vakai ki he ngaahi fakatātā ko ʻení. Ko e hā ʻokú ke sio ki aí?

2. ʻOku anga fēfē e ako fakataha ʻa e ongo fāmilí?

3. Ko e hā ʻoku mahuʻinga ai ʻa e akó?

Ako

Ko e akó ko e konga ia ʻo e palani ʻa e ʻOtuá. ʻOku pehē ʻi he folofolá, “Mou fekumi mei he ngaahi tohi lelei tahá ʻa e ngaahi lea ʻo e potó; mou fekumi ki he ʻiló, ʻio, ʻi he ako pea ʻi he tui foki” (Tokāteline mo e Ngaahi Fuakava 88:118). ʻI heʻetau ako mo tupulakí, te tau ako lahi ange ai ki he palani ʻa e ʻOtuá maʻatautolú.

Ko ha sīpinga ʻo ha tokotaha ako maʻongoʻongá, ko Sīsū Kalaisi. ʻOku akoʻi mai ʻe he folofolá naʻe “tupulaki ʻa e potó” ʻia Sīsū (Luke 2:52). ʻE tāpuekina mo tokoniʻi koe ʻe he Tamai Hēvaní ke ke ako. Te Ne tāpuakiʻi hoʻo fānaú ʻi heʻenau ako mo muimui ki he sīpinga ʻa Sīsuú.

Naʻe akoʻi ʻe Palesiteni Kōtoni B. Hingikelī ko e “akó ʻa e kī te ne fakaava ʻa e matapā ʻo e faingamālié” (“Let Virtue Garnish Thy Thoughts Unceasingly,” Liahona, May 2007, 116). ʻOku ʻuhinga ʻeni ʻe lava ke tokoniʻi koe mo hoʻo fānaú ʻe he akó, ke mou ako ha ngaahi pōtoʻi ngāue foʻou. ʻE lava ʻo tokoni atu ke ke akoʻi e niʻihi kehé mo tokangaʻi ho fāmilí.

Fakakaukau mo Lotu

Fakakaukauʻi mo lotua e meʻa kuó ke akó. Hiki ha faʻahinga fakakaukau pē ʻokú ke maʻu pe fakakaukau ʻoku haʻu mei he Laumālie Māʻoniʻoní. ʻOkú ke pehē ko e hā ʻoku finangalo ʻe he ʻEikí ke ke fakahokó?

ʻEkitivitī

Vakai ki he ngaahi fakatātā ʻi laló. Fakakaukau pea talanoa ki he meʻa ʻoku fai ʻe he kakaí ʻi he fakatātā takitaha. ʻOkú ke pehē ʻoku tokoni fēfē ʻa e akó ki he kakai ʻi he ngaahi fakatātā ko ʻení?

Talanoa mo Ho Fāmilí

Talanoa mo ho fāmilí fekauʻaki mo e meʻa kuó ke akó. Aleaʻi ʻa e ngaahi fehuʻi ʻi laló. Kole ki he kau mēmipa ho fāmilí ke nau fevahevaheʻaki ʻenau ngaahi fakakaukaú pea nau fefanongoʻaki.

• ʻE tokoniʻi fēfē koe ʻi he akó, ʻe he muimui ki he sīpinga ʻa Sīsuú?

• ʻE tokoniʻi fēfē koe ʻe he akó ʻi hoʻo moʻuí?

• Ko e hā te tau lava ʻo fai fakafāmili ke fetokoniʻaki ai ke tau ako mo tupulaki?