8

Tokoniʻi e Fānaú ʻi he Ngāue Fakaako ʻi ʻApí

Ngaahi Fehuʻi ke Talanoaʻí

1. Vakai ki he ngaahi fakatātā ko ʻení. Ko e hā ʻokú ke sio ki aí?

2. ʻOkú ke tokoniʻi fēfē hoʻo fānaú ʻi heʻenau ngāue fakaako ʻi ʻapí?

3. Ko hai ʻe lava ʻo tokoni kapau ʻoku fuʻu faingataʻa e ngāue fakaako hoʻo fānaú kiate koe ke ke tokoní?

Ako

ʻI he taimi ʻe niʻihi ʻoku fuʻu faingataʻa ke mahino kiate koe mo ke fakahoko ha tokoni ʻi he meʻa ʻoku ako ʻe hoʻo fānaú ʻi he akó. ʻOku sai pē ia kapau ʻoku ʻikai ke ke ʻiloʻi ʻa e meʻa kotoa pē. ʻOku kei lahi pē ngaahi meʻa te ke lava ʻo fai ke tokoniʻi hoʻo fānaú ʻi he akó.

Ngāue Fakaakó

Akoʻi hoʻo fānaú ke nau ngāue ʻi heʻenau ngāue fakaakó ʻi he ʻaho kotoa pē. Kapau ʻoku ʻi ai ha ngāue fakaako hoʻo fānaú ʻoku fie maʻu ke nau fakaʻosi ʻi ʻapi, tokoniʻi kinautolu ke nau ngāueʻi ki ai. Te ke lava ʻo tokoniʻi hoʻo fānaú ke nau faʻu ha palani ke fakaʻosi taimi totonu ʻenau ngāue fakaakó. ʻE lava ke tokoni kapau ʻe maʻu ʻe he fānaú ha taimi mo ha feituʻu lōngonoa ke nau ako ai ʻi ʻapi. Te ke lava ʻo tokoni ki hoʻo fānaú ke nau kole tokoni ki ha faiako, kaungāmeʻa, pe ha tokotaha lahi kehe kapau ʻoku fuʻu faingataʻa ʻenau ngāue fakaakó.

Sivi

Fehuʻi ki hoʻo fānaú pe ʻoku mahino kiate kinautolu ʻa e meʻa ʻoku nau akó. Fehuʻi ange pe ko e hā ʻoku fie maʻu ke nau ʻilo ki he siví. Kapau ʻoku nau fie maʻu tokoni, te ke lava ʻo talanoa ki heʻenau kau faiakó pe tala kia kinautolu ke nau kole tokoni ki heʻenau kau faiakó.

Te ke lava ʻo tokoni ki hoʻo fānaú ke nau ako ki he siví ʻaki hono ʻai ke nau tali e ngaahi fehuʻi ʻi he sivi he kuohilí. Te mou lava foki ʻo lotu fakataha ke maʻu ha tokoni. Feinga ke ʻoange ki hoʻo fānaú ha meʻakai mo ha vai kimuʻa pea fai ʻenau siví koeʻuhí ke nau lava ʻo fakakaukau lelei pea ʻoua te nau fiekaia. Talaange ki hoʻo fānaú ʻokú ke falala kiate kinautolu pea ʻokú ke ʻofa ʻiate kinautolu neongo kapau ʻoku ʻikai ke lelei ʻenau siví.

Fakakaukau mo Lotu

Fakakaukau ki he meʻa kuó ke akó. Hiki ha faʻahinga fakakaukau pē ʻokú ke maʻu pe fakakaukau ʻoku haʻu mei he Laumālie Māʻoniʻoní. Te ke tokoniʻi fēfē hoʻo fānaú ke fai ʻenau ngāue fakaakó mo ako ki he ngaahi siví?

ʻEkitivitī

Vakai ki he ongo lisi ʻi laló. Tā ha fakaʻilonga tonu (✓) ʻi he puha he tafaʻaki ʻo e ngaahi meʻa ʻokú ke fie fai mo hoʻo fānaú.

Ngāue Fakaako ʻi ʻApí

• Fehuʻi ki hoʻo fānaú pe ko e hā e meʻa ʻoku nau akó.

• Tokoni ki he ngāue fakaako hoʻo fānaú.

• Feinga ke kumi ha taimi mo ha feituʻu ke ako ai hoʻo fānaú.

• Fehuʻi ki hoʻo fānaú pe ko e fē taimi kuo pau ke ʻoange ai ʻenau ngāue fakaakó ki heʻenau kau faiakó.

• Kapau ʻoku nau fie maʻu tokoni, ʻai hoʻo fānaú ke nau kole tokoni ki ha kaungāmeʻa pe faiako.

• Lotu ke ke ‘iloʻi e founga ke ke tokoniʻi ai hoʻo fānaú.

Teuteu ki he Siví

• Fehuʻi ki hoʻo fānaú pe ʻoku mahino kiate kinautolu ʻa e meʻa ʻoku nau akó.

• Fehuʻi ki hoʻo fānaú pe ko e hā ʻoku fie maʻu ke nau ʻilo ki heʻenau siví.

• ʻAi ke ako ʻe hoʻo fānaú ʻa e ngaahi fehuʻi sivi ʻo e kuohilí.

• ʻOange ki hoʻo fānaú ha meʻakai mo ha vai kimuʻa pea nau toki fai ha sivi.

• Talaange ki hoʻo fānaú ʻokú ke ʻofa ʻiate kinautolu neongo kapau ʻoku ʻikai lelei ʻenau siví.

Talanoa mo Ho Fāmilí

Talanoa mo ho fāmilí fekauʻaki mo e meʻa kuó ke akó. Aleaʻi ʻa e ngaahi fehuʻi ʻi laló. Kole ki he kau mēmipa ho fāmilí ke nau fevahevaheʻaki ʻenau ngaahi fakakaukaú pea nau fefanongoʻaki.

• Te tau tokoniʻi fēfē e kau mēmipa ʻo e fāmilí ʻi heʻenau ngāue fakaakó?

• Ko e hā te tau lava ʻo fai ke tokoni ki he kau mēmipa ʻo e fāmilí ke nau ako ki heʻenau ngaahi siví?

• Ko e fē ha feituʻu ʻi ʻapi ʻe lava ke ako ai e kau mēmipa ʻo e fāmilí?