ʻOku Talitali Lelei Koe

ʻE tokoniʻi koe ʻe he fakahinohino ko ʻení ke ke ʻilo e founga ke tokoniʻi ai hoʻo fānaú ke nau ako ʻi ʻapiako pea mo ʻi ʻapi.

ʻOku ako ʻa e fānaú mei he ngaahi mātuʻá mo e kau faiakó. ʻOku nau ako foki ʻi he ngāué, vaʻingá, mo e ngaahi fehuʻi ʻoku nau ʻeké. ʻOku mahuʻinga ʻaupito ʻa e ngaahi fāmilí pea ʻoku nau tokoniʻi ʻa e fānaú ke nau ako. ʻI he taimi ʻoku poupouʻi ai ʻe he ngaahi fāmilí ʻa e fānaú ʻi he akó, ʻoku ongoʻi fiefia mo leleiʻia ʻa e fānaú ʻiate kinautolu pē. ʻOku nau fie ako lahi ange foki.

Talanoa mo ho fāmilí fekauʻaki mo e ngaahi meʻa ʻokú ke ako ʻi hoʻo lau ʻa e fakahinohino ko ʻení. Lotua ha tokoni mei he Tamai Hēvaní. Tatau ai pē kapau ʻoku ʻikai ke lahi e ako ʻokú ke maʻu, te ke kei lava pē ʻo tokoniʻi hoʻo fānaú ke nau ako. ʻE tokoniʻi koe mo hoʻo fānaú ʻe he ʻEikí ke mou ako fakataha ʻi hoʻomou ngāué, vaʻingá, fetalanoaʻakí, mo e laukongá.

Founga ki Hono Fakaʻaongaʻi ʻo e Fakahinohino Ko ʻEní

ʻE lava ke ako fakataha ʻe he ngaahi mātuʻá ʻa e tohi fakahinohino ko ʻení, mo ʻenau fānaú, pe fakataha mo e ngaahi mātuʻa kehé. ʻE lava ke fakaafeʻi ʻe he kau taki ʻo e Siasí ʻa e ngaahi mātuʻá ke nau fakataha mo aleaʻi ʻa e ngaahi tefito ʻi he tohi fakahinohino ko ʻení. ʻE lava foki ke talanoa e kau tangata mo e kau fafine ngāue fakaetauhí fekauʻaki mo e ngaahi tefito ʻi he fakahinohino ko ʻení ki he ngaahi fāmili ʻoku nau tokoniʻí.

Founga ki hono Ako ʻo e Tefito Takitaha

Muimui ʻi he ngaahi sitepu ko ʻení ʻi hoʻo ako ʻa e tefito takitaha ʻi he fakahinohino ko ʻení:

1. Fakaafeʻi ʻa e niʻihi kehé ke nau ako fakataha mo koe ʻa e tefitó, pe te ke ako toko taha pē ʻe koe ʻa e tefitó.

2. Fakakaukau mo talanoa ki he ngaahi fehuʻí.

3. Lau pea fakahoko ʻa e ʻekitivitií.

4. Fakakaukau mo lotua e meʻa kuó ke akó.

5. Talanoa fekauʻaki mo e meʻa kuó ke akó mo ho fāmilí.