5

Ako Fakataha ʻi ʻApi

Ngaahi Fehuʻi ke Talanoaʻí

1. Vakai ki he ngaahi fakatātā ko ʻení. Ko e hā ʻokú ke sio ki aí?

2. ʻOku ako fēfē ʻa e fānaú ʻi heʻenau ngāue mo vaʻinga fakatahá?

3. Ko e hā ʻokú ke fai mo hoʻo fānaú makehe mei he akó ʻoku tokoniʻi ai kinautolu ke nau akó?

Ako

ʻE lava ke ngaohi ʻe he ngaahi fāmilí ʻa ʻapi ke hoko ko ha feituʻu ʻe lava ke tokoniʻi ai kinautolu ʻe he Laumālie Māʻoniʻoní ke nau ako. Te nau lava ʻo talanoa fekauʻaki mo Sīsū Kalaisi pea feinga ke hangē ange ko Iá. Te ke lava ʻo fai ha ngaahi meʻa lahi ke fakaafeʻi ʻa e Laumālie Māʻoniʻoní ki homou ʻapí pea ke fakamālohia ho fāmilí. Te ke lava ʻo lotu mo lau fakafāmili ʻa e folofolá ʻi he ʻaho kotoa pē, moʻui ʻaki e ongoongoleleí, mo tokoniʻi e niʻihi kehé.

ʻI he taimi ʻoku ʻi homou ʻapí ai ʻa e Laumālie Māʻoniʻoní, ʻe feangaleleiʻaki mo feʻofaʻaki homou fāmilí. ʻI he taimi ʻoku ongoʻi ai ʻe hoʻo fānaú ʻoku ʻofaʻi kinautolú, te nau ongoʻi ʻa e poupou ʻoku nau fie maʻu ke nau lavameʻa aí.

ʻE tokoni e ngaahi meʻá ni ki homou ʻapí ke hoko ko ha feituʻu ʻo e ʻofa mo e ako:

• Faʻa kātaki.

• Feinga ke ʻoua naʻá ke ʻita.

• Mou feohi fakataha.

• Fiefia ai.

• Fakafanongo lelei.

• Fakahīkihikiʻi hoʻo fānaú ʻi heʻenau feinga ke akó.

• Fakaʻaongaʻi e ngaahi lea angaʻofa.

Fakakaukau mo Lotu

Fakakaukau ki he meʻa kuó ke akó. Hiki ha faʻahinga fakakaukau pē ʻokú ke maʻu pe fakakaukau ʻoku haʻu mei he Laumālie Māʻoniʻoní. ʻOkú ke pehē ko e hā ʻoku finangalo ʻe he ʻEikí ke ke fakahokó? Ko e hā ha ngaahi meʻa te ke lava ʻo fai ke maʻu pe fakahaaʻi ai ha ʻofa lahi ange ʻi homou ʻapí?

ʻEkitivitī

Fakakaukau ki he ngaahi meʻa ʻe tokoni ki ho ʻapí ke fonu ʻi he ʻofá. Hiki ha fakakaukau ʻe ua pe tolu ʻo e ngaahi meʻa ʻoku tau mamata, fanongo, mo ongoʻi kapau ʻoku fonu hotau ngaahi ʻapí ʻi he ʻofá.

Ko e hā ʻokú ke sio ki ai ʻi hoʻo vakai holo ʻi ho ʻapí?

• Sīpinga: Kakai ʻoku nau fetokoniʻaki.

Ko e hā ʻokú ke fanongo ʻoku feleaʻaki ʻe he kau mēmipa ʻo e fāmilí?

• Sīpinga: Ngaahi lea angaʻofá.

Ko e hā ʻoku ongoʻi ʻe he kau mēmipa ʻo e fāmilí ʻi heʻenau ʻi ʻapí?

• Sīpinga: ʻOku nau ongoʻi ʻoku ʻofaʻi kinautolu.

Tokoniʻi hoʻo fānaú ʻi he taimi ʻoku nau faingataʻaʻia aí. Ko ha sīpinga ʻeni ʻo e founga te ke lava ai ʻo fakahaaʻi ʻa e ʻofá kapau naʻe faingataʻaʻia hoʻo ʻofefiné:

Naʻe fakahoko ʻe hoʻo ʻofefiné ʻene sivi lahí. Naʻá ne ngāue mālohi ʻaupito. Ka naʻá ne maʻu ha maaka maʻulalo pea ʻoku loto-mamahi. Kuo pau ʻeni ke ne toe fai e siví ʻi ha māhina ʻe ono. Kuo pau foki ke ke toe totongi ʻa e totongi siví.

Ko ha meʻa faingataʻa ʻeni. ʻOkú ke ongoʻi loto-mamahi mo ho ʻofefiné fakatouʻosi. Ko ha ngaahi meʻa ʻeni te ke lava ʻo lea ʻaki kiate ia ke fakahaaʻi ʻa e ʻofá:

• ʻOku ou ʻofa atu. ʻOku ou ʻilo naʻá ke ngāue mālohi ʻaupito. ʻOku ou ʻi heni ke tokoniʻi koe.

• ʻOku ou loto-mamahi ʻi he ʻikai ke ke maʻu ha maaka māʻolunga ʻi he siví. ʻOku ou ʻiloʻi ʻokú ke ongoʻi taʻe-fiemālie foki. Ko e hā te u lava ʻo fai ke tokoni atú?

Talanoa mo Ho Fāmilí

Talanoa mo ho fāmilí fekauʻaki mo e meʻa kuó ke akó. Aleaʻi ʻa e ngaahi fehuʻi ʻi laló. Kole ki he kau mēmipa ʻo e fāmilí ke vahevahe ʻenau ngaahi fakakaukaú pea fefanongoʻaki.

• Ko e hā te tau lava ʻo fai fakafāmili ke maʻu lahi ange ai ʻa e Laumālie Māʻoniʻoní ʻi hotau ʻapí?

• Te tau fakahaaʻi fēfē ha feʻofaʻaki mo ha fefakaʻapaʻapaʻaki lahi angé?

• ʻE tokoniʻi fēfē kitautolu ʻe he ʻofá ʻi hotau ʻapí ke tau ako kotoa?