6

Fakaʻaongaʻi Fakapotopoto ʻa e Taimí

Ngaahi Fehuʻi ke Talanoaʻí

1. Vakai ki he ngaahi fakatātā ko ʻení. Ko e hā ʻokú ke sio ki aí?

2. Ko e hā ha ngaahi meʻa ʻoku mahuʻinga taha ʻi hoʻo moʻuí?

3. Te ke fakaʻaongaʻi fēfē ha taimi lahi ange ke fakahoko ha ngaahi meʻa ʻoku mahuʻinga kiate koe mo ho fāmilí?

Ako

Ko e taimí ko ha meʻaʻofa ia mei he Tamai Hēvaní. ʻOku totonu ke tau fakakaukauʻi fakalelei ʻa e founga ʻoku tau fakaʻaongaʻi ai hotau taimí. ʻOku lahi ha ngaahi founga ke fakaʻaongaʻi ai e taimí he ʻaho takitaha. ʻOku tau ngāue, vaʻinga, feimeʻatokoni, lotu, fai ha ngaahi ngāue fakaʻapi, ako, mo fai ha ngaahi meʻa lahi kehe. Kuo pau ke tau fili ʻa e ngaahi founga lelei taha ke fakaʻaongaʻi ai hotau taimí.

Faʻu ha palani ke tokoni atu ke ke fakaʻaongaʻi lelei ho taimí. Fakakaukau ki he meʻa kuo pau ke ke fai ʻi he ʻaho takitaha. Ko e hā e ngaahi meʻa ʻoku mahuʻinga tahá? Ko e hā ha ngaahi meʻa ʻoku ʻikai fuʻu mahuʻingá? Palani ke ʻuluaki fakahoko ʻa e ngaahi meʻa mahuʻinga tahá. Fakaʻaongaʻi ha taimi siʻisiʻi ange ʻi he ngaahi meʻa ʻoku ʻikai mahuʻingá pea ʻoku ʻikai ke ne tokoniʻi koe mo ho fāmilí ke aʻusia hoʻomou ngaahi taumuʻá.

Te ke lava ʻo faʻa talanoa fakataha mo ho fāmilí fekauʻaki mo e meʻa ʻoku mahuʻingá. Te ke lava ʻo faʻu ha palani ke mou fetokoniʻaki ʻi hono fakaʻaongaʻi fakapotopoto ho taimí.

Fakakaukau mo Lotu

Fakakaukau ki he me’a kuó ke akó. Hiki ha faʻahinga fakakaukau pē ʻokú ke maʻu pe fakakaukau ʻoku haʻu mei he Laumālie Māʻoniʻoní. Ko e hā e meʻa ʻoku mahuʻinga taha ʻi hoʻo moʻuí? Ko e hā ha founga ʻe taha te ke lava ai ʻo fakaʻaongaʻi ha taimi lahi ange ke fakahoko ʻa e ngaahi meʻa ʻoku mahuʻinga taha ʻi hoʻo moʻuí?

ʻEkitivitī

ʻOku lahi e ngaahi founga ʻoku tau fakaʻaongaʻi ai hotau taimí. Ko ha ngaahi meʻa ʻeni te ke ala fakahoko he ʻaho takitaha.

• Lau folofola

• Mamataʻi e TV

• ʻAlu ki he māketí

• Fakahoko ho uiuiʻi faka-Siasí.

• Lotu

• Ngāue ʻaki hoʻo telefoní

• Fakamaʻa ʻa e falé

• Vaʻinga

• Tokoniʻi hoʻo fānaú ke nau ako

• Feimeʻatokoni

• Ngāue

• Ako

ʻOku mou fakahoko foki mo ha ngaahi meʻa kehe ʻi he ʻaho takitaha. Fakakaukau ki he meʻa kotoa pē ʻokú ke faí.

Ko e hā ha meʻa ʻe ua pe tolu ʻokú ke fie fakaʻaongaʻi ki ai ha taimi lahi ange?

Ko e hā ha meʻa ʻe ua pe tolu ʻokú ke fie fakaʻaongaʻi ki ai ha taimi siʻisiʻi ange?

Talanoa mo Ho Fāmilí

Talanoa mo ho fāmilí fekauʻaki mo e meʻa kuó ke akó. Aleaʻi ʻa e ngaahi fehuʻi ʻi laló. Kole ki he kau mēmipa ho fāmilí ke nau fevahevaheʻaki ʻenau ngaahi fakakaukaú pea nau fefanongoʻaki.

• Ko e hā e ngaahi meʻa ʻoku mahuʻinga taha ki hotau fāmilí?

• Ko e hā te tau lava ʻo fakahoko fakafāmili ke fakaʻaongaʻi lelei ange ai hotau taimí ʻi hono fakahoko e ngaahi meʻa ʻoku mahuʻinga kiate kitautolú?

• Te tau fetokoniʻaki fēfē nai ʻi hono fakaʻaongaʻi fakapotopoto hotau taimí?