9

Hoko ko ha Konga ʻo e Ako Hoʻo Fānaú

Ngaahi Fehuʻi ke Talanoaʻí

1. Vakai ki he ngaahi fakatātā ko ʻení. Ko e hā ʻokú ke sio ki aí?

2. Te ke lava fēfē ʻo hoko ko ha konga ʻo e ako hoʻo fānaú?

3. ʻE lava fēfē ke kole tokoni hoʻo fānaú ki heʻenau kau faiakó kapau ʻoku ʻikai mahino kiate kinautolu?

Ako

Te ke lava ʻo talanoa mo hoʻo fānaú, ngāue fakataha mo kinautolu, vaʻinga mo kinautolu, laukonga mo kinautolu, pea fakafanongo kiate kinautolu. ʻE tokoni ʻeni ki hoʻo fānaú ke nau ongoʻi ʻoku ʻofaʻi kinautolu. Te ke lava foki ʻo fehuʻi ange pe ko e hā ʻoku nau ako ʻi ʻapiakó. Fehuʻi ange pe ko e hā e meʻa ʻoku faingofua kiate kinautolú. Fehuʻi ange pe ko e hā e meʻa ʻoku faingataʻá. Fehuʻi ange pe ko e hā e ongo ʻoku nau maʻu ki heʻenau kau faiakó. Kapau ʻokú ke pehē ʻe lava ʻo tokoni ki hoʻo fānaú, ʻeke ki heʻenau kau faiakó pe te ke lava ʻo talanoa mo kinautolu.

ʻOku faʻa saiʻia e kau faiakó he taimi ʻoku talanoa ange ai e ngaahi mātuʻá mo fehuʻi ange pe te nau lava fēfē ʻo tokoniʻi ʻenau fānaú ke lelei ʻenau akó.

Kimuʻa peá ke feʻiloaki mo e kau faiako hoʻo fānaú, hiki e ngaahi fehuʻi ʻokú ke fie ʻeke kiate kinautolú. Ko ha ngaahi meʻa ʻeni te ke lava ʻo fakahokó:

1. Fakamālō ki he kau faiakó ʻi hono akoʻi hoʻo fānaú.

2. Fehuʻi ki he kau faiakó pe ʻoku fēfē hoʻo fānaú ʻi heʻenau ngaahi kalasí.

3. Fehuʻi ki he kau faiakó pe te ke tokoniʻi fēfē hoʻo fānaú ke nau toe lelei ange ʻi he akó.

4. ʻEke ki he kau faiakó pe ʻoku ʻi ai ha ngaahi ʻaho mahuʻinga ʻoku totonu ke ke ʻiloʻi.

Kapau ʻoku ʻikai ke ke lava ʻo fakataha mo e kau faiakó, te ke lava ʻo fetuʻutaki mo kinautolu ʻi ha founga ʻe taha pe lahi ange ko ʻení:

• ʻAve ha pōpoaki text.

• ʻAve ha ʻīmeili.

• Fepōtalanoaʻaki ʻi he telefoní.

• Fai ha tohi.

ʻOku tokolahi ha kakai ʻoku nau tokoniʻi hoʻo fānaú ke nau ako ʻi he ʻaho kotoa pē. Fakakaukau ki ha kakai kehe te ke lava ʻo talanoa ki ai fekauʻaki mo e ako hoʻo fānaú.

Fakakaukau mo Lotu

Fakakaukau ki he meʻa kuó ke akó. Hiki ha faʻahinga fakakaukau pē ʻokú ke maʻu pe fakakaukau ʻoku haʻu mei he Laumālie Māʻoniʻoní. ʻE tokoni fēfē hoʻo talanoa mo e kakai kehe fekauʻaki mo e ako hoʻo fānaú ki hoʻo fānaú ʻi he akó?

ʻEkitivitī

Hiki ha meʻa ʻe tolu ʻokú ke fie fehuʻi pe talanoa ki ai mo e kau faiako hoʻo fānaú pe kakai kehe ʻoku nau tokoniʻi hoʻo fānaú ke nau ako.

Talanoa mo Ho Fāmilí

Talanoa mo ho fāmilí fekauʻaki mo e meʻa kuó ke akó. Aleaʻi ʻa e ngaahi fehuʻi ʻi laló. Kole ki he kau mēmipa ʻo e fāmilí ke vahevahe ʻenau ngaahi ongó pea fefanongoʻaki.

• Ko hai ʻa e kakai ʻi heʻetau moʻuí ʻoku nau tokoniʻi kitautolu ke tau akó?

• ʻE tokoniʻi fēfē ʻe he niʻihi kehé ʻa e mēmipa takitaha ʻo e fāmilí ʻi he akó?