4

Fokotuʻu ha Ngaahi Taumuʻa ke Tokoniʻi Hoʻo Fānaú ke Nau Lavameʻa

Ngaahi Fehuʻi ke Talanoaʻí

1. Vakai ki he ngaahi fakatātā ko ʻení. Ko e hā ʻokú ke sio ki aí?

2. Ko e hā ʻoku mahuʻinga ai ke ʻi ai ha ngaahi taumuʻá?

3. Ko e hā ʻokú ke ongoʻi ʻi hoʻo fakakakato ha taumuʻa kuó ke fokotuʻú?

Ako

Kapau ʻokú ke fie maʻu ke fakaleleiʻi ha palopalema pe fai ha meʻa, ʻoku fie maʻu ke ke fili pe te ke fakahoko fēfē ia. ʻOku ui ʻeni ko e fokotuʻu ha taumuʻá. ʻE tokoni hono tokoniʻi hoʻo fānaú ke nau ako ke fokotuʻu ha ngaahi taumuʻá ke nau lavameʻa.

Te ke lava mo hoʻo fānaú ʻo fokotuʻu ha taumuʻa ʻi ha ngaahi sitepu faingofua ʻe fā:

1. ʻIloʻi

2. Palani

3. Ngāue

4. Fakakaukauloto

Vakai ki he sīpinga ʻi laló ke ʻiloʻi e founga ʻe lava ke tokoniʻi ai koe mo hoʻo fānaú ʻe he ngaahi sitepú ke fokotuʻu ha ngaahi taumuʻá.

1. ʻIloʻi:

   Ko e hā ʻoku fie maʻu ke ke fakatupulaki pe liliú?

   ʻOku faingataʻaʻia hoku ʻofefiné ʻi he fiká. Naʻá ne kole tokoni mai, ka ʻoku ʻikai ke u sai ʻi he fiká.

2. Palani:

   Ko e hā e ngaahi sitepu ʻoku fie maʻu ke ke fakahokó?

   Te u talanoa ki heʻene faiakó mo e ngaahi mātuʻa kehé fekauʻaki mo ha ngaahi founga ke tokoniʻi ai hoku ʻofefiné ʻi he fiká.

3. Ngāue:

   ʻOkú ke fie maʻu ha tokoni lahi ange?

   Naʻá ku lotu ki ha tokoni. Ne u ongoʻi hangē ʻoku totonu ke u talanoa mo ha mēmipa ʻi hoku uōtí ʻoku faiako. Naʻá ne pehē te ne akoʻi hoku ʻofefiné. ʻOku mau fokotuʻu ha taimi ke na fakataha ai he uike takitaha.

4. Fakakaukauloto:

   Ko e hā e meʻa naʻá ke akó? ʻOku fie maʻu nai ke ke fokotuʻu ha taumuʻa foʻou pe hokohoko atu he taumuʻa ko ʻení?

   ʻOku fie maʻu ke u vakaiʻi fakaʻaho mo hoku ʻofefiné ʻa e tuʻunga ʻokú ne ʻi ai ʻi heʻene ngaahi ngāue fakafiká mo toe vakaiʻi ʻene ngaahi noutí.

Fakakaukau mo Lotu

Fakakaukau ki he meʻa kuó ke akó. Hiki ha faʻahinga fakakaukau pē ʻokú ke maʻu pe fakakaukau ʻoku haʻu mei he Laumālie Māʻoniʻoní. ʻOkú ke pehē ko e hā ʻoku finangalo ʻe he ʻEikí ke ke fakahokó? Te ke lava fēfē ʻo tā ha sīpinga maʻa hoʻo fānaú ʻaki hono fokotuʻu mo fakakakato ha ngaahi taumuʻá?

ʻEkitivitī

Fakakaukau ki ha meʻa ʻokú ke loto ke fakatupulaki pe liliu. Fakaʻaongaʻi e ongo ʻuluaki sitepu ke fokotuʻu ha taumuʻá.

Hili hoʻo fai hoʻo palaní, foki mai ki he ʻekitivitī ko ʻení pea fakakakato ʻa e sitepu ʻe ua hono hokó:

1. ʻIloʻi:

   Ko e hā ʻoku fie maʻu ke ke fakatupulaki pe liliú?

2. Palani:

   Te ke fakatupulaki fēfē pe fakahoko ʻa e liliú? Ko e hā e ngaahi sitepu ʻoku fie maʻu ke ke fakahokó?

3. Ngāue:

   Kuo tokoniʻi fēfē koe ʻe he tui kia Sīsū Kalaisí ke ke aʻusia hoʻo taumuʻá? ʻOkú ke fie maʻu ha tokoni lahi ange?

4. Fakakaukauloto:

   Ko e hā e meʻa naʻá ke akó? ʻOku fie maʻu nai ke ke fokotuʻu ha taumuʻa foʻou pe hokohoko atu he taumuʻa ko ʻení?

Talanoa mo Ho Fāmilí

Talanoa mo ho fāmilí fekauʻaki mo e meʻa kuó ke akó. Kole ki he kau mēmipa ho fāmilí ke nau fevahevaheʻaki ʻenau ngaahi fakakaukaú pea nau fefanongoʻaki.

• Tokoniʻi hoʻo fānaú ke nau fokotuʻu ha ngaahi taumuʻa. Lotu fakataha ke ʻiloʻi e meʻa ʻoku totonu ke nau faí.

• Hiki ʻa e taumuʻa ʻo e fānau takitaha ʻi lalo. Talanoa fekauʻaki mo e founga te ke tokoniʻi ai e fānau takitaha ke aʻusia ʻene taumuʻá.