3

Ko e Fānau Kitautolu ʻa e ʻOtuá

Ngaahi Fehuʻi ke Talanoaʻí

1. Vakai ki he ngaahi fakatātā ko ʻení. Ko e hā ʻokú ke sio ki aí?

2. Ko e hā te ke lava ʻo fai ke tokoniʻi ai hoʻo fānaú ke nau ʻilo ko e fānau kinautolu ʻa e ʻOtuá?

3. ʻE tokoniʻi fēfē ʻenau ʻiloʻi ko e fānau kinautolu ʻa e ʻOtuá ke nau lavameʻa ʻi he akó?

Ako

Akoʻi hoʻo fānaú ko e fānau kitautolu ʻa e ʻOtuá. Te tau lava kotoa pē ʻo hoko ʻo hangē ko Iá ʻi heʻetau ako mo tupulakí. Tokoni ke mahino ki hoʻo fānaú te nau lava ʻo lavameʻa ʻi he akó koeʻuhí ko e fānau kinautolu ʻa e ʻOtuá. ʻE tokoni e ngaahi fakakaukau ʻi laló ke lavameʻa hoʻo fānaú ʻi he akó:

Tukutaha e Tokangá ʻi he Akó

Tokoniʻi hoʻo fānaú ke nau ō ki he akó mo maʻu ʻa e taimí. ʻOku totonu ke nau feinga ke ʻalu ki he akó he ʻaho kotoa pē mo teuteu ki ha ngaahi sivi mahuʻinga.

Feinga ʻAki Ho Lelei Tahá

Akoʻi hoʻo fānaú ke nau feinga ʻaki honau lelei tahá pea ʻoua ʻe foʻi ʻi he taimi ʻoku faingataʻa aí.

Talangofua

Akoʻi hoʻo fānaú ke nau talangofua ki he ngaahi fekaú, ʻenau mātuʻá, pea mo e ngaahi tuʻutuʻuni fakaakó. ʻE tāpuekina kinautolu koeʻuhí he ʻoku nau talangofua.

Kole ha Tokoni.

Akoʻi hoʻo fānaú ke nau kole tokoni mo ako mei he niʻihi kehé. Lotu mo kinautolu ʻi he taimi ʻoku ʻikai mahino ai kiate kinautolu ʻa e founga ke fai ai ha meʻá.

Talanoa Fakataha

Talanoa mo hoʻo fānaú, pea ʻai ke nau ʻilo te nau lava ʻo haʻu kiate koe ke maʻu ha tokoni. Fehuʻi ange fekauʻaki mo e ngaahi meʻa ʻoku faingataʻa kiate kinautolú. Ngāue fakataha ke fakaleleiʻi e ngaahi palopalemá.

Tui kiate Koe

Tokoniʻi hoʻo fānaú ke nau tui kiate kinautolu mo fakakaukau lelei. ʻI he taimi ʻoku fakakaukau lelei ai e fānaú fekauʻaki mo kinautolú, ʻoku nau ongoʻi hangē te nau lava ʻo ikuná.

Fakakaukau mo Lotu

Fakakaukau ki he meʻa kuó ke akó. Hiki ha faʻahinga fakakaukau pē ʻokú ke maʻu pe fakakaukau ʻoku haʻu mei he Laumālie Māʻoniʻoní. ʻOkú ke pehē ko e hā ʻoku finangalo ʻe he ʻEikí ke ke fakahokó? Ko e hā te ke lava ʻo fai ke tokoniʻi hoʻo fānaú ke nau lavameʻa ʻi he akó?

ʻEkitivitī

Ko e fānau kitautolu ʻa e ʻOtuá, pea ʻokú Ne ʻofa ʻiate kitautolu. ʻOkú Ne ʻofa ʻiate koe mo ho fāmilí. Fakakaukau ki he founga ʻoku ʻafio ai e ʻOtuá ki he mēmipa kotoa ho fāmilí. ʻI he konga ʻoku fakaʻatā atu ʻi laló, hiki ha ngaahi foʻi lea pe tā ha fakatātā ke fakaʻaliʻali ha meʻa lelei ʻe taha pe ua fekauʻaki mo e tokotaha takitaha ʻi ho fāmilí. Vahevahe ʻa e ngaahi meʻá ni mo ho fāmilí.

Ngaahi Sīpingá

Kofi:

ʻOku angaʻofa ʻa Pīsila.

ʻOku fiefia ʻa Fehi.

Ko ha tokotaha ngāue mālohi ʻa Sione.

Tā hoʻo ngaahi fakatātaá pea hiki hoʻo ngaahi leá ʻi he feituʻu ʻoku fakaʻatā atu ʻi laló:

Talanoa mo Ho Fāmilí

Talanoa mo ho fāmilí fekauʻaki mo e meʻa kuó ke akó. Aleaʻi ʻa e ngaahi fehuʻi ʻi laló. Kole ki he kau mēmipa ho fāmilí ke nau fevahevaheʻaki ʻenau ngaahi fakakaukaú pea nau fefanongoʻaki.

• ʻOku tokoniʻi fēfē kitautolu ʻi heʻetau moʻuí ʻi heʻetau ʻiloʻi e founga ʻoku ʻafioʻi mo ʻofa ai ʻa e ʻOtuá ʻi Heʻene fānaú?

• ʻOku tokoniʻi fēfē koe ʻi hoʻo ʻiloʻi ko e fānau koe ʻa e ʻOtuá ke ke lavameʻa ʻi he akó?