6

Vakayagataki Vakavuku ni Gauna

Taro me Veitalanoataki

1. Raici ira mada na vei itaba oqo. Na cava o raica kina?

2. Na veika cava soti ena nomu bula e bibi duadua?

3. Ena rawa vakacava mo vakalevutaka na vakayagataki ni gauna ena veika e bibi kivei iko kei na nomu matavuvale?

e rau teitei tiko o tama kei na nona cauravou

masu vata na matavuvale

Vulica

Na Gauna e sa iSolisoli mai na Tamada Vakalomalagi Sa dodonu meda liaca vakavinaka sara na noda vakayagataka na noda gauna. E vuqa tu na sala me vakayagataki kina na gauna e veisiga. Eda cakacaka, qito, vakarautaki kakana, masu, qaravi itavi, vuli, kei na vakayacori ni vuqa tale na ka. E dodonu meda digitaka na sala vinaka duadua eda vakayagataka kina na noda gauna.

Biuta vata e dua na ituvatuva me vukei iko mo vakayagataka vakavinaka kina na nomu gauna. Vakasamataka na veika mo na vakayacora e veisiga. Na cava soti e bibi duadua? Na cava era sega soti ni bibi? Tuvanaka mo cakava taumada na veika bibi duadua. Vakalailaitaka na gauna e vakayagataki ena veika e sega ni bibi ka sega ni vukei iko kei na nomu matavuvale mo dou yacova kina na nomudou takete.

E rawa ni dou veitalanoataka vakawasoma vaka matavuvale na veika e bibi. E rawa ni o biuta vata e dua na ituvatuva mo dou veivukei kina ena vakayagataki vakavuku ni nomudou gauna.

Vakasamataka ka Masulaka

Vakasamataka na veika o sa vulica. Vola na nomu vakanananu se na vakasama eso e vu mai vua na Yalo Tabu. Na cava e bibi duadua ena nomu bula? Na sala cava beka e rawa ni o vakalevutaka na vakayagataki ni gauna mo qarava kina na veika e bibi duadua ena nomu bula?

tama kei nona goneyalewa e rau cakacaka vata tiko

iTaviqaravi

E vuqa sara na sala eda vakayagataka kina na noda gauna. Oqo eso na ka o rawa ni cakava e veisiga:

• Wilika na ivolanikalou.

• Sarava na TV

• Lako ki na makete

• Cakava na nomu cakacaka ni veikacivi ni lotu

• Masu

• Vakayagataka na nomu talevoni

• Samaka na vale.

• Qito

• Vukei ira na luvemu ena vuli-ka

• Vakarautaki kakana

• Cakacaka

• Vuli Lesoni

O qarava e vuqa tale na ka ena veisiga. Vakasamataka na veika kece o qarava.

Na cava e rua se tolu na ka o via vakayagataka vakalevu cake na gauna kina?

Na cava e rua se tolu na ka o via vakayagataka vakalailai na gauna kina?

Talanoa kei na Nomu Matavuvale

Veitalanoataka kei na nomu matavuvale na veika o sa vulica. Veivosakitaka na vei taro ka toka e ra. Kerea na lewe ni nomu matavuvale mera wasea na nodra vakasama ka mera veirogoci.

• Na veika cava soti e bibi duadua ki na noda matavuvale?

• Na cava e rawa ni da cakava vakamatavuvale me vakayagataki vakavinaka cake kina na noda gauna ena kena qaravi na veika e bibi vei keda?

• Ena rawa ni da veivukei vakacava ena vakayagataki vinaka ni gauna?

wiliwili tiko o tama kei ira na gone