Mataupu Faavae mo le Auaunaga

Auala e Sili Ona Faigofie e Faasoa Atu ai le Molimau

O le Auaunaga o le molimau atu lea. O le fesuisuiai o le auaunaga e mafai ona faateleina a tatou avanoa e faasoa atu ai le molimau i auala aloaia ma le aloaia.

Liahona, Mati 2019

Ua tatou osi feagaiga e “tutu o ni molimau a le Atua i taimi uma ma i mea uma, ma i nofoaga uma” (Mosaea 18:9). O le faasoa atu o a tatou molimau o se vaega o le tu atu o se molimau ma o se ala mamana e valaaulia ai le Agaga Paia ia pai atu i le loto o se tasi ma suia o latou olaga.

“O le molimau—molimau moni lava, e tuuina mai i le Agaga ma faamaonia e le Agaga Paia—e suia ai olaga,” na saunoa ai Peresitene M. Russell Ballad, Sui Peresitene o le Korama a Aposetolo e Toasefululua.¹

Ae o le faasoaina atu o a tatou molimau e mafai ona taufaafefe ma le manaia mo nisi o i tatou. Atonu ona tatou te manatu o le faasoaina atu o la tatou molimau o se mea tatou te faia i sauniga anapogi ma molimau po o se taimi foi e aoao atu ai se lesona. I na tulaga aloaia e masani ona tatou faaaogaina ni upu faapitoa ma fuaitau na e foliga mai e le fetaui i talanoaga masani.

O le faasoaina atu o a tatou molimau e mafai ona avea o se faamanuiaga e sili atu ona oo soo mai i o tatou olaga ma olaga o isi pe a tatou malamalama i le faigofie tele ona mafai ona faasoa atu mea tatou te talitonu i ai i tulaga o aso uma. O nai faataitaiga nei e te amata ai.

Ia Faafaigofie

O se molimau e le manaomia ona amata i se fuaitau, “Ou te fia tuuina atu lau molimau,” ma e le manaomia ona faaiu i le, “i le suafa o Iesu Keriso, amene.” O se molimau o se faailoaga o mea tatou te talitonu i ai ma iloa e moni. O lea la o se talanoaga ma sou tuaoi i le auala e uiga i se faafitauli o loo ia te ia ma faapea atu, “Ou te iloa e tali mai le Atua i tatalo,” e mafai lava ona mamana e pei o se isi lava molimau e faasoa mai le pulelaa i le lotu. E le oo mai le mana mai gagana e tauteuteu; e oo mai le Agaga Paia e faamautuina le upumoni (tagai Mataupu Faavae ma Feagaiga 100:7–8).

Faafetaui le Gasologa o le Talanoaga Masani

Afai tatou te naunau e faasoa atu, e tele avanoa o loo siomia ai i tatou e faafetaui ai le molimau i talanoaga o aso uma. Mo se faataitaiga:

Ua fesili atu se uo ia te oe e uiga i lou faaiuga o le vaiaso. “Sa maoae,” e te tali atu ai. “O le lotu o le mea tonu lava lea na ou manaomia.”
Ua faaleo mai e se tasi le alofa ina ua faalogo i se luitau o lou olaga: “Ua ou faanoanoa lava.” E te tali atu: “Faafetai lava mo lou manatu mai. Ua ou iloa e fesoasoani mai le Atua ia te au. Na i ai o Ia iina mo au muamua.”
Ua faapea mai se tasi: “Ou te faamoemoe o le a vave ona suia lea tau leaga tele,” po o “E mautinoa lava ua tuai le pasi,” po o “Vaai ia i lenei laina o taavale.” E mafai ona e tali atu: “Ou te mautinoa o le a fesoasoani mai le Atua ina ia lelei mea uma.”

Faasoa Ou Aafiaga

E masani ona tatou talanoa e uiga i o tatou luitau. Pe a tau atu e se tasi e uiga i mea o loo latou feagai, e mafai ona e faasoa atu se taimi na fesoasoani ai le Atua i ou faigata ma molimau atu e te iloa e mafai ona fesoasoani foi le Atua ia i latou. Na fetalai mai le Alii Na te faamalosia i tatou i o tatou faigata “ina ia mafai ona outou tutu e avea o ni molimau mo aʼu i le lumanai, ma ina ia mafai ona outou iloa ma le mautinoa o Aʼu, o le Alii le Atua, e asiasi atu i oʼu tagata i o latou puapuaga.” (Mosaea 24:14). E mafai ona tatou tutu o ni molimau ia te Ia pe a tatou molimau atu i le ala na ia fesoasoani ai ia i tatou i o tatou faigata.

Ia Saunia

Mo nisi o i tatou, o le faasoa atu o le molimau i se taimi e faafuasei e mafai ona avea o se taufaafefe. E i ai auala e mafai ona tatou fuafua mamao atu ai ma “saunia pea lava e tali atu ma le agamalu ma le mata’u ia i latou uma o e fesili mai ia te i [tatou] i le uiga o le faamoemoe o loo ia te i [tatou]” (1 Peteru 3:15).

Muamua, o le saunia e mafai ona faauigaina o le vaai atu i le ala o loo tatou ola ai. Pe o tatou valaaulia ea le Agaga Paia i o tatou olaga ma faamalolosia a tatou lava molimau i aso uma e ala i le ola amiotonu? Pe o tatou tuuina atu ea avanoa e fetalai mai ai ia i tatou ma tuuina mai ia i tatou upu tatou te manaomia e ala i le tatalo ma le suesue i tusitusiga paia? E pei ona fautuaina ai Ailama Samita e le Alii, “Aua le saili e talai atu la’u upu, a e muai saili ia maua la’u upu, ona matala ai lea o lou laulaufaiva” (Mataupu Faavae ma Feagaiga 11:21).

Lona lua, o le saunia e mafai ona faauigaina o le vaai atu i luma ma mafaufau i avanoa e mafai ona e maua i lena aso po o lena vaiaso e faasoa atu ai lau molimau. E mafai ona e saunia mo na avanoa e ala i le mafaufau e uiga i le ala latou te tuuina atu ai ia te oe se avanoa e faasoa atu ai mea e te talitonu i ai.

Ia Tumau le Faatotonugalemuina i le Faaola ma Lana Aoaoga Faavae

Na aoao mai Peresitene Ballard, “E ui ina mafai ona tele mea e mafai ona tatou molimau ai, o ni tagata o le Ekalesia, ae e i ai lava upumoni faavae e tatau ona aoao atu ai e le tasi le isi ma fetufaai ma i latou.” O ni faataitaiga, na ia lisiina: “O le Atua o lo tatou Tama Faavavau, ma o Iesu o le Keriso. O le ata o le faaolataga e totonugalemu i le Togiola a le Faaola. Na toefuatai mai e Iosefa Samita le atoaga o le talalelei faavavau a Iesu Keriso, ma o le Tusi a Mamona o le faamaoniga lea e moni la tatou molimau.” Ao tatou faaleo atu na upumoni loloto, tatou te valaaulia le Agaga e molimau atu o mea na tatou tau atu e moni. Na faamamafa mai e Peresitene Ballard faapea “e le mafai ona taofia le Agaga pe a tuuina atu le molimau mama atoatoa e uiga ia Keriso.”²

O Le Faataitaiga a le Faaola

Na vaivai mai se malaga e ala atu i Samaria, na koma ai le Faaola e malolo i se vaieli ma feiloai ai ma se fafine iina. Na ia amataina se talanoaga e uiga i le asuina o le vai mai le vaieli. I le faaaogaina o lenei galuega o aso uma na faia e le fafine na tuuina atu ai ia Iesu le avanoa e molimau atu ai i le vai ola ma le ola e faavavau o loo avanoa ia i latou e talitonu ia te Ia (tagai Ioane 4:13–15, 25–26).

E Mafai E Se Molimau Faigofie Ona Suia Olaga

Na faamatala e Peresitene Russell M. Nelson se tamaitai tausi soifua lea na fesili atu ia Dr. Nelson-i le taimi lea, se fesili i le mavae ai o se taotoga faigata. “Aisea e te le pei ai o isi fomai tipitipi?” O nisi fomai tipitipi na te iloaina e mafai ona itaita gofie ma palauvale ao latou faatinoina na ituaiga o galuega faigata.

Na mafai ona tali atu Dr. Nelson i le tele lava o auala. Ae na ia tali faigofie atu lava, “Aua ua ou iloa e moni le Tusi a Mamona.”

O lana tali na uunaia ai le tamaitai tausi soifua ma lona toalua e suesue le Tusi a Mamona. Na papatiso e Peresitene Nelson mulimuli ane le tamaitai tausi soifua. I le fiasefulu tausaga mulimuli ane, ao pulefaamalumalu i se konafesi a se siteki i Tenesi, ISA, o se Aposetolo faatoa faauuina, na olioli Peresitene Nelson i se faatasiga faafuasei ma le tamaitai tausi soifua lava lea. Na ia faamatalaina lona liliu mai, na oo mai i lana molimau faigofie lava ma le faatosinaga o le Tusi a Mamona, na fesoasoani e taitai atu i le liua o le isi 80 tagata.³

Valaaulia e Faatino

Aua le fefe e faasoa atu lau molimau. E mafai ona faamanuiaina ai i latou e te auauna atu i ai. E faapefea ona e faaaogaina nei manatu po o ou lava manatu e faasoa atu ai lau molimau i le aso?