10

Fakahaaʻi ʻa e Angatonú

Fakakaukauʻi:ʻOkú ke pehē ko e hā ʻoku ʻofa ai ʻa e ʻEikí ʻiate kinautolu ʻoku “angatonu honau lotó”? (Vakai, Tokāteline mo e Ngaahi Fuakava 124:15.)

Mamata:“Ko e hā ʻe Foaki ʻe ha Taha ke Fetongi ki Hono Laumālié?” (ʻIkai ha foʻi vitiō? Lau ʻa e peesi hono hokó.)

Aleaʻi:ʻOku ʻuhinga ki he hā ke angatonu? Ko e hā ha fanga kiʻi founga ʻoku foaki ai ʻe he kakaí honau laumālié ke maʻu ʻa e ngaahi meʻa ʻi he moʻui ko ʻení?

Lau ʻa e:Ngaahi Tefito ʻo e Tui 1:13; Mōsaia 4:28; Siope 27:5 (ʻi he toʻomataʻú)

“ʻOku mau tui ʻoku totonu ke faitotonu.”

Ngaahi Tefito ʻo e Tui 1:13

“Pea ʻoku ou loto ke mou manatu, ʻilonga ia ʻiate kimoutolu ʻoku kole mei hono kaungāʻapí ʻoku totonu ke ne fakafoki ʻa e meʻa ʻokú ne kolé, ʻo fakatatau mo e alea naʻá ne faí, ka ʻikai, te ke fai angahala ai; pea mahalo te ke fakatupu foki ha fai angahala ai ʻa ho kaungāʻapí.”

Mōsaia 4:28

“Te u mate pē ka ʻe ʻikai te u tukuange ʻeku angatonú meiate au.”

Siope 27:5

Akoako Fakahoko:Fakamaaka pē ʻe koe ʻa koe ʻi he ngaahi meʻa ko ʻení.

Fokotuʻu ha mataʻi fika ʻi muʻa ʻi he meʻá takitaha ke fakahaaʻi e tuʻo lahi hoʻo fai ʻení. 1 = hala ʻatā, 2 = taimi ʻe niʻihi, 3 = tuʻo lahi, 4 = meimei ʻi he taimi kotoa pē, 5 = maʻu pē

1. ʻOku ou tauhi ʻeku ngaahi palōmesí, ngaahi tukupaá, mo e ngaahi fuakavá kotoa.

2. ʻOku ou lea moʻoni kakato ʻi he ngaahi meʻa ʻoku ou lea ʻakí pea ʻi he ngaahi lekooti ʻoku ou tauhí.

3. ʻOku ʻikai ke u fakalahi ke ngali lelei ange ʻa e ngaahi meʻá ʻi honau tuʻunga totonú.

4. ʻOku ou fakafoki ʻa e meʻa kotoa pē ʻoku ou kolé pea ʻoku ʻikai ʻave ʻa e ngaahi meʻa ʻoku ʻikai ʻaʻakú.

5. ʻOku ou tauhi faivelenga kakato ki hoku malí ʻi heʻeku ngaahi leá mo e tōʻongá.

6. ʻOku ʻikai ke u teitei kākā, ʻo aʻu ai pē ki he taimi ʻoku ou ʻiloʻi ai he ʻikai ke maʻu aú.

7. Ko e taimi ʻoku ou ʻilo ai ha meʻa ʻoku ʻikai ʻaʻaku, ʻoku ou fakafoki ia ki he taha ʻoku ʻaʻaná.

8. ʻOku ou totongi fakafoki maʻu pē ʻa e paʻanga ʻoku ou kolé, kau ai ʻa e nō PTFT mei he Siasí.

Tukupā:Tukupā ke fakahoko ʻa e ngaahi ngāue ko ʻení he lolotonga ʻo e uiké. Fakaʻilongaʻi ʻa e fanga kiʻi puhá ʻi he taimi kuó ke fakakakato ai e ngāué takitaha:

• Akoako ke fakahaaʻi ʻa e angatonú ʻi he ʻaho kotoa pē.

• Akoʻi ʻa e tefitoʻi moʻoni ko ʻení ki ho fāmilí.

• Hokohoko atu hono akoako fakahoko e tefitoʻi moʻoni fakavaʻe kimuʻá.

“ʻOku ʻuhinga ʻa e angatonú ke fakahoko maʻu pē ʻa e meʻa ʻoku totonu mo leleí, tatau ai pē pe ko e hā hono ngaahi nunuʻá. ʻOku ʻuhinga ia ke anga māʻoniʻoni ʻo kamata mei he takele ʻo hotau lotó, ʻo ʻikai ngata pē ʻi heʻetau ngaahi ngāué kae mahuʻinga tahá, ʻi heʻetau ngaahi fakakaukaú pea ʻi hotau lotó. … Ko e kiʻi loí, kiʻi kākaá, pe kiʻi talanoa taʻetotonu ke tau ngali leleí ʻoku ʻikai tali ia ʻe he ʻEikí. … Ko e pale taupotu taha ʻo e angatonú ko e hoko ʻa e Laumālie Māʻoniʻoní ko e takaua maʻu peé, … [ʻa ia te ne] tataki kitautolu ʻi he meʻa kotoa ʻoku tau faí.”

Joseph B. Wirthlin, “Personal Integrity,” Ensign, May 1990, 30–33

Tokoni ʻa e Taki e Kulupú

Tokoniʻi ʻa e tokotaha kotoa ke nau tokanga ki he ngāué—kae ʻikai ko e leá pē.

Ko e Hā ʻe Foaki ʻe ha Tangata ke Fetongi ʻaki Hono Laumālié?

Kapau ʻoku ʻikai ke mou lava ʻo mamata ʻi he foʻi vitioó, pea lau ʻa e fakamatala ko ʻení.

ʻELETĀ LOPETI C. KEI: Naʻe fai ange ʻe he Fakamoʻuí ki Heʻene kau ākongá ʻa e fehuʻi ko ʻení: “Ko e hā ʻe foaki ʻe ha tangata ke fetongiʻaki hono laumālié?”

Ko ha fehuʻi ʻeni naʻe akoʻi mai heʻeku tamaí ke u fakakaukauʻi fakalelei ʻi he ngaahi taʻu lahi kuo hilí. ʻI heʻeku tupu haké, ne tuku mai heʻeku ongomātuʻá ha fanga kiʻi ngāue ʻi ʻapi pea totongi e ngāue ko iá. Naʻá ku faʻa ngāue ʻaki e paʻanga ko iá, ne laka siʻi hake pē he seniti ʻe 50 he uike, ke ʻalu ki he heleʻuhilá. Ko e taimi ko iá naʻe sēniti pē ʻe 25 ha taha taʻu 11. Naʻe toe heni haʻaku sēniti ʻe 25 ke fakatau ʻaki ha lole, he naʻe sēniti ʻe 5 ki he taha. Heleʻuhila mo e foʻi lole [ʻe nima]! He ʻikai lava ʻo toe lelei ange ai.

Naʻe lelei ʻa e meʻa kotoa kae tālunga e hoko hoku taʻu 12. Lolotonga ʻeku tuʻu laine ʻi ha efiafi ʻe taha, kuó u fakatokangaʻi ko e totongi ʻo e tikite ki he taʻu 12 kuo seniti ʻe 35, ʻa ia ʻe siʻi ʻaki heni ha foʻi lole ʻe ua. ʻI he ʻikai ke u mateuteu ke fai e feilaulau ko ʻení, ne u kumi ʻuhinga ai, “ʻOkú ke ʻasi tatau pē ʻo hangē ko e uike kuo ʻosí.” Naʻá ku laka atu leva ʻo kole haʻaku tikite sēniti ʻe 25. Naʻe ʻikai toe fehuʻia ʻe he tokotaha tali totongí, pea ne u kumi leva ʻeku foʻi lole angamaheni ʻe nimá kae ʻikai ko e tolu pē.

ʻI heʻeku fiefia he meʻa ne u lavá, ne u fakavavevave kimui ange ai ki ʻapi ke tala ki heʻeku tangataʻeikí ʻa e meʻa lahi ne u lavaʻí. Naʻe ʻikai lea ia ʻi heʻeku fakamatala atu hono fakaikiikí. Pea ʻi heʻeku ʻosí, ne sio mai pē ia pea pehē mai, “Foha, te ke fakatau ho laumālié ʻaki ha sēniti ʻe nima?” Ne ongo ʻaupito ʻene leá ki hoku loto taʻu 12. Ko ha lēsoni ia kuo ʻikai toe ngalo ʻiate au.

(Robert C. Gay, “Ko e hā ʻe Foaki ʻe ha Tangata ke Fetongi ʻaki Hono Laumālié? Ensign pe Liahona, Nōvema 2012, 34.)