Fakaʻaongaʻi Fakapotopoto ʻa e Taimí

Fakakaukauloto ki he:Ko e hā ʻoku hoko ai ʻa e taimí ko e taha ʻo e ngaahi meʻaʻofa maʻongoʻonga taha ʻa e ʻOtuá?

Mamata:“The Gift of Time” (No video? Lau ʻa e peesi hono hokó.)

Aleaʻi:Ko e hā ʻa e meʻa naʻá ke ako meia Sisitā Penikasí?

Akoako Fakahoko:Ko ha sitepu ʻeni ʻe nima te ke lava ʻo fakahoko ʻi he ʻaho takitaha ke fakaʻaongaʻi lelei ho taimí. Lau kotoa. Naʻe fakahoko nai ʻe Sisitā Penikasi ʻa e ngaahi meʻa ko ʻení?

❶

Lisi ʻo e Ngaahi Meʻa ke Faí

ʻAi ha lisi ʻi he pongipongi kotoa pē ʻo e ngaahi meʻa ke faí. Tānaki atu mo e hingoa ʻo e kakai ke tokoniʻí.

❷

Lotu

Lotua ha fakahinohino. Fakafanongo. Tukupā ke fai hoʻo lelei tahá.

❸

Fokotuʻu ʻa e Ngaahi Meʻa Ke Fakamuʻomuʻá

Fakafika hoʻo ngaahi meʻa ke fakamuʻomuʻá. Fokotuʻu ha “1” he tafaʻaki ʻo e meʻa mahuʻinga tahá, fokotuʻu ha “2” ʻi he hoko haké, pea pehē atu ai pē.

❹

Fokotuʻu ha ngaahi Taumuʻa, Ngāue

Fakafanongo ki he Laumālié. Fokotuʻu ha ngaahi taumuʻa. Ngāue Mālohi. Kamata ʻaki e ngāue mahuʻinga tahá pea toki hokohoko hifo ai ʻi he lisí.

❺

Lipooti

Lipooti ki he Tamai Hēvaní ʻi he lotu ʻi he pō kotoa pē. Fai ha ngaahi fehuʻi. Fakafanongo. Ongoʻi ʻa ʻEne ʻofá. Fakatomala.

Kamata leva he taimí ni. Tohi ʻi he pepa ngāue ko ʻení pe ʻi ha laʻi pepa mavahe. Fakahoko ʻa e sitepu 1: Hiki hoʻo ngaahi ngāue ki ʻapongipongí. ʻOku totonu ko ha ngaahi meʻa mahuʻinga ʻeni ki hoʻo ngāué, akó, pe ki he lotú pe fāmilí—ʻoku ʻikai ko ha ngaahi ngāue fakaʻaho angamaheni pē.

Fakahoko ʻa e sitepu 2 mo e 3.

Fakahoko ʻa e sitepu 4 mo e 5 ʻapongipongi.

Tukupā:Tukupā ke fakahoko ʻa e ngaahi ngāue ko ʻení he lolotonga ʻo e uiké. Fakaʻilongaʻi ʻa e fanga kiʻi puhá ʻi he taimi kuó ke fakakakato ai e ngāué takitaha:

Akoako fakahoko ʻa e ngaahi sitepu ko ʻení ʻi he ʻaho kotoa pē ke fakaʻaongaʻi fakapotopoto ange ho taimí.
Akoʻi ʻa e tefitoʻi moʻoni ko ʻení ki ho fāmilí.
Hokohoko atu ʻi hono akoako fakahoko ʻo e tefitoʻi moʻoni ʻi muʻá.

Tokoni ʻa e Taki e Kulupú

Ko e taimi ʻoku ʻi ai ai ha ngaahi fehuʻi ʻa e kau mēmipa ʻo e kulupú, tokoni ke nau maʻu ʻa e talí ʻiate kinautolu pē.

The Gift of Time

Kapau ʻoku ʻikai ke mou lava ʻo mamata ʻi he foʻi vitioó, pea vahe ʻa e ngaahi kongá pea lau ʻa e fakamatala ko ʻení.

KOFI: Mālō e lelei, Sisitā Penikasi. ʻOkú ke fēfē hake?

SISITĀ PENIKASI: Kofi, ʻokú ke sai pē?

KOFI: Siʻi, Sisitā Penikasi. ʻOku ou femoʻuekina lahi. Kuo pau ke u ngāue mo tokoni pea mo tokoniʻi hoku fāmilí … pea mo ʻeku soká, foki. ʻOku ʻikai maʻu haku taimi!

SISITĀ B.: Kofi, ʻokú ke maʻu e taimi lahi.

KOFI: Ko e hā?

SISITĀ B.: Tamani, kuo ʻosi foaki mai ʻe he ʻOtuá ha meʻaʻofa maʻongoʻonga--ko hotau taimí. Kuo pau ke tau fakaʻaongaʻi ia ki he ngaahi mea ʻoku mahuʻinga tahá.

KOFI: ʻO founga fēfē, Sisitā Penikasi? Kuo lahi maʻu pē e meʻa ʻokú ke faí Kuó ke lavameʻa ʻi ho fāmilí, ʻi hoʻo pisinisí. Kuó ke tokoniʻi mo tāpuakiʻi ha tokolahi, hangē ko aú. ʻIkai ke u ʻilo pe ʻokú ke fakahoko fēfē ia.

SISITĀ B.: ʻOkú ke fie ʻiloʻi moʻoni? Kapau te ke tangutu ʻo fanongo, te u tala atu ʻeku fakapulipulí.

ʻOku ou ʻā ʻi he pongipongi kotoa pē ʻoku teʻeki hopo ʻa e laʻaá. ʻOku ou teuteu, tafitafi hoku matá mo fanofano.

ʻOku ou lau e folofolá. Peá u ʻai leva ha lisi ʻo e ngaahi meʻa ʻoku totonu ke u fai ʻi he ʻaho ko iá.

ʻOku ou fakakaukau ki ha taha te u lava ʻo tokoniʻi. ʻOku ou lotu ke ʻiloʻi e finangalo ʻo e ʻOtuá. Peá u fakafanongo leva.

ʻOku haʻu ki heʻeku fakakaukaú he taimi ʻe niʻihi ʻa e hingoa pe fofonga ʻo e kakaí. ʻOku ou tānaki atu kinautolu ki heʻeku lisí.

KOFI: Ko e founga ia ʻokú ke ʻiloʻi maʻu ai pē ʻa e kakai ʻoku nau fie maʻu hoʻo tokoní?

SISITĀ B.: ʻIo, Kofi. Pea ʻoku ou lotua ha ivi mo ha poto. ʻOku ou lotua ke hanga ʻe he ʻOtuá ʻo “fakatapui [ʻeku] ngāué.” ʻOku lau ki ai e 2 Nīfai 32.

ʻOku ou fakafetaʻi kiate Ia. ʻOku ou palōmesi ke fai hoku lelei tahá. ʻOku ou kole ke Ne fakahoko ʻa e meʻa ʻoku ʻikai ke u lavá.

Peá u sio leva ki heʻeku lisí. ʻOku ou fokotuʻu ha “1” he tafaʻaki ʻo e meʻa ʻoku mahuʻinga tahá, pea hoko ai ha “2.”

KOFI: ʻOkú ke ʻiloʻi fēfē ʻa e ngaahi meʻa ke fakamuʻomuʻá?

SISITĀ B.: ʻOku ou fakafanongo ʻi he taimi ʻoku ou lotu aí! Hili ia peá u kamata ngāue leva. ʻOku ou vakai ki he fika 1, peá u feinga ke ʻuluaki fai ia, pea hoko ki he fika 2.

ʻOku feliliuaki ʻi he taimi ʻe niʻihi. ʻOku talamai ʻe he Laumālie Māʻoniʻoní ke fai ha meʻa ʻe taha. ʻOku lelei ia.

ʻOku ou ngāue mālohi, ka ʻoku ou maʻu ha nonga. ʻOku ou ʻiloʻi ʻe tokoniʻi au ʻe he ʻOtuá.

Ko ia, ʻi he maʻu ʻeku lisí mo e Laumālié, Kofi, ʻoku ou fai leva ʻa e meʻa ʻoku mahuʻinga tahá.

KOFI: ʻOku ongo faingofua pea mo toe faingataʻa pē.

SISITĀ B.: ʻOkú ke moʻoni! Ko e taimi ʻoku ou teuteu ai ke mohé, ʻoku ou lotu. ʻOku ou lipooti ki he Tamai Hēvaní. ʻOku ou fakamatala kiate Ia ʻa e meʻa ne hoko ʻi he ʻahó. ʻOku ou fai ha ngaahi fehuʻi. ʻOku ou ʻeke pe ko e hā te u lava ʻo fakahoko lelei angé. ʻOku ou fakafanongo. ʻOku ou faʻa ongoʻi maʻu pē ʻEne ʻofá. ʻOku ou ʻiloʻi ʻokú Ne faitokonia ʻa e meʻa ʻoku ou feinga ke faí. Kofi, ʻoku ou maʻu leva ha nonga, peá u mohe.

KOFI: Meʻa lelei ia, Sisitā Penikasi. ʻOku ou fie maʻu ʻa e nonga ko ʻení. ʻOku ou fie fakaʻaongaʻi hoku taimí. ʻOku ou fie ngāue mo tokoni lelei ange.

SISITĀ B.: Kofi, kuo pau ke ke tukuange ʻa e ngaahi meʻa ʻoku ʻikai mahuʻingá. Te ke fakaʻaongaʻi ho taimí ke fai ʻa e meʻa ʻoku mahuʻingá. Pea ʻe ʻiate koe ʻa e ʻOtuá kapau ʻe totonu ho lotó.

KOFI: Mālō

SISITĀ B.: ʻAlu ā, siʻi tamasiʻi. ʻOku lahi ʻa e meʻa ke ke faí!