4

LEVAʻI lelei ʻo e Paʻangá

Fakalaulauloto:Ko e hā ʻoku fuʻu faingataʻa ai hono levaʻi lelei ʻo e paʻangá—pea fuʻu mahuʻingá?

Mamata:“Fakamuʻomuʻa ʻa e Meʻa ʻOku Muʻomuʻá!” (ʻIkai ha foʻi vitiō? Lau ʻa e peesi hono hokó.)

Aleaʻi:Ko e hā naʻá ke ako mei he fānau ko ʻení? Ko e hā ʻoku totonu ai ke tau tokangaʻi ʻetau paʻangá? Ko e hā ʻoku totonu ai ke tau fakahaofi ha paʻangá?

Lau:Fakamatala mei he Teuteu ʻa e Meʻa ʻAonga Kotoa Pē; Tokāteline mo e Ngaahi Fuakava 104:78 (ʻi he toʻomataʻú)

[“Totongi ʻa e vahe hongofulú mo e ngaahi foakí, … fakaʻehiʻehi mei he fakamoʻuá, … ngāue ʻaki ha patiseti, … fakapapauʻi ʻa e founga ke holoki ai hoʻo fakamole ki he ngaahi meʻa ʻoku ʻikai fuʻu fie maʻú … [pea] mapuleʻi koe ke moʻui fakatatau mo hoʻo palani patisetí.]”

Teuteu ʻa e Meʻa ʻAonga Kotoa Pē: Tuʻunga Fakapaʻanga ʻa e Fāmilí (kiʻi tohi, 2007), 3.

“Pea ko e tahá, ko e moʻoni ʻoku ou pehē kiate kimoutolu ʻo kau ki homou ngaahi moʻuá—vakai ko hoku lotó ke mou totongi ʻa homou ngaahi moʻua kotoa pē.”

Tokāteline mo e Ngaahi Fuakava 104:78

Akoako Fakahoko:Ko ha sitepu ʻeni ʻe fā te ke lava ʻo fakahoko ke tokangaʻi lelei ʻaki hoʻo paʻangá ke ke lava ai ʻo tokoniʻi lelei ange ha niʻihi kehe. Lau ʻa e ngaahi sitepu ko ʻení. Aleaʻi fakakulupu ʻa e founga ʻe lava ai ke mou ʻulungaaanga ʻaki ʻeni.

❶

Ngāue Mālohi mo Fakapotopoto

Fakamoʻoniʻi ki ho pule ngāué ʻokú ke ngāue mālohi ʻi he ʻaho kotoa pē. Fakamoʻoniʻi ʻokú ke mahuʻinga. Faitotonu.

❷

Totongi vahehongofulu mo e Ngaahi Foakí

Ko e taimi ʻokú ke maʻu ai ha paʻanga fakatāutahá, ʻuluaki totongi e vahehongofulú. ʻE toki lava leva ʻe he ʻOtuá ke tāpuakiʻi koe.

❸

Fakamole ʻo Siʻi Ange ʻi he Meʻa ʻOkú ke Maʻu Maí

Fokotuʻu ha patiseti. Lekooti ʻa e paʻanga ʻokú ke maʻu maí mo hoʻo fakamolé. Fakaʻehiʻehi mei he fakamoʻuá. Ngāueʻi ha paʻanga lahi ange. Fakamole ʻo siʻi ange ʻi he meʻa ʻokú ke maʻu maí.

❹

Fakalahi hoʻo Fakahū Paʻanga Fakaʻahó

Fakahū ha paʻanga ʻi he ʻaho kotoa pē ke maʻu ha nonga mo ha tauʻatāina lahi ange.

Tukupā:Tukupā ke fakahoko ʻa e ngaahi ngāue ko ʻení he lolotonga ʻo e uiké. Fakaʻilongaʻi ʻa e fanga kiʻi puhá ʻi he taimi kuó ke fakakakato ai e ngāué takitaha:

• Akoako tokangaʻi hoʻo paʻangá ʻi he ʻaho kotoa pē.

• Akoʻi ʻa e tefitoʻi moʻoni ko ʻení ki ho fāmilí.

• Hokohoko atu ʻi hono ako fakahoko ʻo e ʻuluaki tefitoʻi moʻoni kimuʻá.

“Hangē ʻoku ʻi ai ha ongo ʻoku ʻi ai haʻatau totonu ki ha meʻa ʻi he anga fakafonua ʻo e ngaahi ʻahó ni. … Ko e taimi ʻoku tau mafasia ai ʻi he lahi ʻo e moʻuá, ʻoku tau … fokotuʻu kitautolu ʻi ha tuʻunga pōpula kakato, ʻo fakamoleki hotau taimí kotoa, iví kotoa, mo e meʻa kotoa ʻoku tau maʻú ke totongi hotau moʻuá. … ʻOku mahuʻinga ke tau … fakatupulaki ha palani fakamole mo fakahū paʻanga—ha patiseti—pea fakafaikehekeheʻi ʻa e holí mei he fie maʻú.”

Robert D. Hales, “Seek and Attain the Spiritual High Ground in Life” (Church Educational System fireside, Mar. 2009), 6--7); speeches.byu.edu

Tokoni ʻa e Taki e Kulupú

Kole ki ha taha ke ne vahevahe ʻa e founga ʻoku faitāpuekina ai ia mo hono fāmilí ʻe he ngaahi tefitoʻi moʻoni ko ʻení.

Fakamuʻomuʻa ʻa e Meʻa ʻOku Muʻomuʻá!

Kapau ʻoku ʻikai ke mou lava ʻo mamata ʻi he foʻi vitioó, pea vahe ʻa e ngaahi kongá pea lau ʻa e fakamatala ko ʻení.

ʻĀTAKAÍ: Ko ha kiʻi tamasiʻi mo ha kiʻi taʻahine, ʻokú na tui ha vala ʻo e kakai lalahí, ʻo na faʻifaʻitaki ʻena ongomātuʻá.

TAMASIʻÍ: ʻOfaʻanga, ko ʻeni kuó u foki mai.

TAʻAHINÉ: ʻOku talitali lelei koe. Masiʻi, ʻokú ke ngali helaʻia.

TAMASIʻÍ: Mo koe pē. ʻOkú ke ngāue mālohi, ʻikai ko iá?

TAʻAHINÉ: ʻIo, ʻikai ʻoku totonu ke ta ngāue, ko ia?

TAMASIʻÍ: Naʻá ku maʻu ha 10 he ʻahó ni.

TAʻAHINÉ: Mani, ko ha tāpuaki ia. Ko ia, ke fakamuʻomuʻa ʻa e meʻa ʻoku muʻomuʻá! Ta totongi ʻeta vahehongofulú, ko ia?

TAMASIʻÍ: Fēfē kapau ʻoku ʻikai ke ta maʻu ha meʻa feʻunga?

TAʻAHINÉ: Ko e taimi ia ke tui aí!

TAMASIʻÍ: Sai. Ko e hā e meʻa hokó?

TAʻAHINÉ: ʻIo, ʻoku fie maʻu ke ta fakatau ha meʻakai pea ʻi ai mo ha totongi pasi, mo totongi ʻa e falé. Pea, ʻe lelei kapau te ta toki fakatau ha sea. …

TAMASIʻÍ: Ka he ʻikai ke ta lava. Sio? ʻOku ʻikai ke ta maʻu ha paʻanga feʻunga.

TAʻAHINÉ: ʻE lava ke ta nō ha paʻanga?

TAMASIʻÍ: ʻOku nau pehē ʻoku fakatuʻutāmaki e fakamoʻuá. ʻOku ʻikai te ta loto ke faingataʻaʻiá.

TAMASIʻÍ: Sai. ʻOkú ke tonu. Ko e hā leva ʻa e meʻa te ta fai ʻaki ʻení?

TAMASIʻÍ: Ta fakahū ia! ʻOku ʻikai haʻo misi ki he meʻa ʻe hokó.

TAʻAHINÉ: ʻOku ongo tonu ia. Ka ʻoku ʻikai toe ha meʻa ia ki ha fakafiefia.

TAMASIʻÍ: Ko kitaua ʻeni! Pea te u feinga ke maʻu ha paʻanga lahi ange.

TAʻAHINÉ: Te u feinga ke siʻisiʻi ange ʻeku fakamolé!

TAMASIʻÍ: Te ta fiefia ai—pea fakafalala pē kiate kitaua!

TAʻAHINÉ: Tonu ia! Naʻe ʻikai fuʻu faingataʻa ia. Ko e hā ʻoku ʻai ai ʻe he kakai lalahí ke faingataʻá?

TAMASIʻÍ: ʻOi, ʻokú ke ʻilo pē. Ko e anga pē ia ʻo e kakai lalahí!