9

Vilitaki

Fakalaulauloto:Te tau ako fēfē ke tau kei ngāue ʻi ha fatongia kae ʻoua kuo ʻosi?

Mamata:“Only a Stonecutter” (ʻIkai ha foʻi vitiō? Lau ʻa e peesi hono hokó.)

Aleaʻi:Te tau ako fēfē ke kei hoko atu ʻi he taimi ʻoku faingataʻa aí? ʻOku tokoniʻi fēfē ʻe he falala ki he ʻEikí ʻa ʻetau malava ke vilitakí?

Lau ʻa e:Fakamatala naʻe fai ʻe Palesiteni Fausí; Hepelū 12:1; Tokāteline mo e Ngaahi Fuakava 58:4 (ʻi he tafaʻaki toʻomataʻú)

“ʻOku hā ʻa e vilitakí meiate kinautolu ʻoku … ʻikai ke nau foʻi ʻi he taimi ʻoku pehē ai e niʻihi kehé, “He ʻikai malava iá.”

James E. Faust, “Perseverance,” Ensign pe Liahona, May 2005, 51

“Tau felele‘i ‘i he fakakukafi ‘a e fakapuepue kuo tofi ‘i hotau ‘aó.”

Hepelū 12:1

“He ʻe hoko mai ʻa e ngaahi tāpuakí hili ʻa e ngaahi faingataʻa lahi.”

Tokāteline mo e Ngaahi Fuakava 58:4

Akoako Fakahoko:Ngāue fakataha ke ako ʻa e sīpinga ko ʻení ke vilitaki mo ikunaʻi ʻa e ngaahi faingataʻá:

• Lau fakakulupu ʻa e sitepu takitaha ʻi he sīpinga ʻi laló.

• Hanga ki ha taha ʻi he kulupú. Mou fefehuʻiʻaki pe ʻoku ʻi ai ha faʻahinga fatongia pe ngafa ʻoku nau fehangahangai mo ia ʻoku mātuʻaki faingataʻa.

• Mou fetokoniʻaki ke mou lavaʻi ʻa e ngaahi sitepu ʻe fā ʻi laló, ʻo talanoa ki he fatongia pe ngafa ʻoku faingataʻá.

• Mou fetukupāʻaki te mou vilitaki—te ke kei hoko atu pē kae ʻoua kuo lavaʻi lelei ʻa e fatongiá pe ngafá.

➊

Faka-tuʻamelie Maʻu Pē

Hiki ho ngaahi tāpuakí.

➋

Manatuʻi ke Ngāue Fakataha

Kole tokoni ki ho ngaahi kaungāmeʻá, toʻú, kau mēmipa ʻo e kulupú, pea mo ha niʻihi kehe.

➌

Fakafetongi ʻa e Ilifiá ʻaki ʻa e Tuí

Fakaʻehiʻehi mei he veiveiuá. Manatuʻi ʻoku maʻu ʻe he ʻEikí ʻa e mālohi kotoa pē. Tangi kiate Ia pea tali Hono finangaló.

➍

Laka atu ki Muʻa ʻi he Faʻakātaki mo e Lototoʻa

ʻOua, naʻa teitei foʻi; kātaki ʻi he tui.

“ʻOua ʻe moʻulaloa ki he ʻahiʻahi naʻá ne tauheleʻi Leimana mo Lemiuelá. Ko e taimi naʻá na maʻu ai ʻa e fekau ke ʻomai ʻa e ngaahi lauʻi peleti palasa ʻa Lēpaní, ʻoku pehē ʻe he lekōtí naʻá na lāunga, ʻo pehē ko ha meʻa faingataʻa naʻe talaange ke na faí. Pea mole ai hona faingamālié mo hona palé. Kae, tuku ho lotó ke hangē ko ia ko hona tokoua ko Nīfaí: ʻTe u ʻalu ʻo fai ʻa e ngaahi meʻa kuo fekau ʻe he ʻEikíʻ (vakai, 1 Nīfai 3:5--7).”

Thomas S. Monson, Teachings of Thomas S. Monson (2011), 54

Akoako Fakahoko:Fili ha palopalema ʻoku fehangahangai mo ho fāmilí. Fakaʻaongaʻi ʻa e sīpinga ʻi ʻolungá pea fili ha founga ʻe ua pe tolu te mou lava ai ʻo laka atu kimuʻa ʻi he tuí, ʻo falala ʻe tokonaki ia ʻe he ʻOtuá:

Tukupā:Tukupā ke ke fakahoko ʻa e ngaahi ngāue ko ʻení he lolotonga ʻo e uiké. Fakaʻilongaʻi ʻa e fanga kiʻi puhá ʻi he taimi kuó ke fakakakato ai e ngāué takitaha:

• Akoako ke vilitaki ʻi he ngaahi founga kuó ke ʻomi ʻi ʻolungá.

• Akoʻi ʻa e tefitoʻi moʻoni ko ʻení ki ho fāmilí.

• Hokohoko atu hono akoako fakahoko ʻo e tefitoʻi moʻoni kimuʻá.

“Ko hotau fatongiá ke hiki hake mei he tuʻunga sai peé ki he lelei angé, mei he taʻemalavá ki he lavameʻá. Ko hotau ngafá ke aʻusia hotau tuʻunga lelei tahá. Ko e taha ʻo e ngaahi meʻaʻofa maʻongoʻonga taha ʻa e ʻOtuá kiate kitautolú ko e fiefia ke toe feinga peé, he ʻoku ʻikai fie maʻu ke hoko ha taʻemalava ko e aofangatukú.”

Thomas S. Monson, “The Will Within,” Ensign, May 1987, 68.

Only a Stonecutter

Kapau ʻoku ʻikai ke mou lava ʻo mamata ʻi he foʻi vitioó, pea lau ʻa e fakamatala ko ʻení.

ʻELETĀ HOLANI: Ko Sione R. Moilí ko ha paionia mei ʻIngilani naʻe kolosi ʻi he ʻIunaiteti Siteití ʻokú ne toho saliote. Naʻe nofo ʻi ʻAlapaini ʻi ʻIutā, ko e maile nai ia ʻe 22 (kilomita ʻe 35) mei he Temipale Sōlekí.

Naʻe ui ʻe Pilikihami ʻIongi ʻa Misa Moili ke hoko ko e pule lahi ʻo hono tā-tongitongi e maká lolotonga hono langa e Temipale Sōlekí.

Naʻe kamata luelue ʻa Misa Moili he Mōnite kotoa pē ʻi he maile ʻe 22 ko ʻení ʻi he 2:00 hengihengi nai, ke fakapapauʻi ʻoku ʻi he ngāué maʻu pē ʻi he 8:00 pongipongí. ʻE ʻosi ʻene ngāue he uiké ʻi he 5:00 efiafi he Falaité pea kamata leva ʻene lue lalo ki ʻapí, ʻo aʻu ki ʻapi kimuʻa siʻi pē he tuʻuapoó. Naʻá ne toe fakahoko ʻa e taimitēpile tatau ʻi he uike kotoa pē ʻi ha meimei taʻu ʻe 20 lolotonga hono langa ʻo e temipalé.

ʻI haʻane ʻi ʻapi ʻi ha fakaʻosinga ʻo e uike ʻe taha, ne fute ai ha taha ʻo ʻene fanga pulú lolotonga hono tataú ʻo ʻakahi ʻa e vaʻe ʻo Misa Moilí, ʻo momo ʻa e huí ʻi lalo ʻi hono tuí.

Naʻe ʻikai ke nau maʻu ha tokoni fakafaitoʻo lelei he fāmá, pea toʻo ai ʻe hono fāmilí ha matapā mei hono hinisí ʻo haʻi ia ki ai ko ha tēpile tafa fakataimi. Naʻa nau toʻo leva ʻa e kili ʻakau naʻa nau fakaʻaongaʻi ki hono tuʻusi ʻo e ngaahi vaʻá mei ha fuʻu ʻakau ofi mai, ʻo tuʻusi hono vaʻé ʻo lau ʻinisi ki lalo mei hono tuí.

Ko e taimi naʻe faifai pea kamata moʻui ai hono vaʻé, naʻe toʻo ʻe Misa Moili ha konga ʻakau ʻo tongitongi mei ai hano vaʻe loi. Naʻe ʻuluaki lue takai ʻi he loto falé. Pea hoko atu ʻo lue takai ʻi he loto ʻataʻataá. Faifai pea hoko atu ki hono ʻapí.

ʻI heʻene ongoʻi pē kuó ne lava ʻo makātakiʻi ʻa e mamahí, naʻá ne haʻi leva hono veʻe ʻakaú, pea lue ʻi he maile ʻe 22 ki he Temipale Sōlekí, ʻo kaka ʻi he ngaahi tuʻunga ngāué, peá ne tongitongi ʻaki ha tutuʻu mo ha hāmala ʻa e kupuʻi lea “Māʻoniʻoni ki he ʻEikí.”

(Vakai foki, Jeffery R. Holland, “As Doves to Our Windows,” Ensign, May 2000, 76--77.)