វាយតម្លៃការរៀនសូត្ររបស់អ្នក ៧

កិច្ចការ ១–២៨

មេរៀននេះមានគោលបំណងជួយអ្នកឲ្យវាយតម្លៃគោលដៅទាំងឡាយដែលអ្នកបានដាក់ ព្រមទាំងការរៀនសូត្រ និងការរីកចម្រើនដែលអ្នកបានដកពិសោធន៍ អំឡុងការសិក្សាព្រះគម្ពីរសញ្ញាថ្មី ។

ការរៀបចំរបស់សិស្ស ៖ សូមអញ្ជើញសិស្សឲ្យមករៀនដោយបានត្រៀមខ្លួនដើម្បីចែកចាយគំរូពីគម្ពីរកិច្ចការ នៃមនុស្សដែលបានប្រែចិត្តជឿលើព្រះយេស៊ូវគ្រីស្ទ ។

សកម្មភាពរៀនសូត្រដែលអាចមាន

មេរៀននេះមានគោលបំណងជួយសិស្សឲ្យវាយតម្លៃគោលដៅដែលពួកគេបានកំណត់ សមត្ថភាពរបស់ពួកគេក្នុងការពន្យល់អំពីការបង្រៀននៅក្នុងព្រះគម្ពីរសញ្ញាថ្មី ឬរបៀបដែលឥរិយាបថបំណងប្រាថ្នា និងសមត្ថភាពដើម្បីរស់នៅតាមដំណឹងល្អរបស់ពួកគេកំពុងផ្លាស់ប្តូរ ។ ការសិក្សាគម្ពីរ កិច្ចការ ១–២៨ របស់សិស្សក្នុងថ្នាក់ប្រហែលជាបានគូសបញ្ជាក់អំពីសេចក្ដីពិតផ្សេងទៀតក្រៅពីសកម្មភាពខាងក្រោមនេះ ។ បើដូច្នេះមែន សកម្មភាពអាចត្រូវបានកែសម្រួលដើម្បីរួមបញ្ចូលសេចក្ដីពិតទាំងនោះ ។

ប្រធានបទនៃការវាយតម្លៃបន្ថែមមាននៅក្នុងផ្នែក « សកម្មភាពរៀនសូត្របន្ថែម » ។

តើមនុស្សអាចផ្លាស់ប្តូរបានដែរឬទេ ?

សូមស្រមៃថា មិត្តរបស់អ្នកប្រាប់អ្នកថា មានរឿងដែលគាត់ចង់ផ្លាស់ប្តូរអំពីខ្លួនគាត់ ប៉ុន្តែគាត់គិតថា គាត់មិនអាចធ្វើការផ្លាស់ប្តូរទាំងនោះបានទេ ។

• តើអ្នកនឹងឆ្លើយយ៉ាងដូចម្ដេច ?

• តើវាមានឥទ្ធិពលយ៉ាងណាទៅលើជីវិតរបស់អ្នក ដើម្បីដឹងថា អ្នកអាចផ្លាស់ប្តូរបានតាមរយៈដង្វាយធួននៃព្រះយេស៊ូវគ្រីស្ទ ?

សូមរំឭកសិស្សអំពីការរៀបចំរបស់ពួកគេសម្រាប់ថ្នាក់ ។

សូមសញ្ជឹងគិតលើរឿងនានាចេញពីគម្ពីរកិច្ចការ ដែលបង្ហាញពីរបៀបដែលមនុស្សអាចផ្លាស់ប្តូរបានកាន់តែប្រសើរឡើង នៅពេលពួកគេមករកព្រះគ្រីស្ទ ហើយក្លាយជាសិស្សរបស់ទ្រង់ ។

បើចាំបាច់ សូមពិចារណាពិនិត្យមើលឧទាហរណ៍មួយ ឬច្រើននៅខាងក្រោមនេះ ។

1. មនុស្សដែលបានចូលរួមក្នុងសាសនាចក្រ ៖ កិច្ចការ ២:១៤, ៣៦–៤៧

2. មនុស្សកំរៀវសាសន៍អេធីយ៉ូពី ៖ កិច្ចការ ៨:២៦–៤០

3. សុល ( ដែលបានក្លាយជាប៉ុល ) ៖ កិច្ចការ ៩:១–២២

4. កូនេលាស ៖ កិច្ចការ ១០:១–៨, ២៤–២៥, ៤៤–៤៨

5. អ្នកយាមគុកដែលយាមប៉ុល និងស៊ីឡាស ៖ កិច្ចការ ១៦:២៥–៣៦

ដោយប្រើឧទាហរណ៍មួយក្នុងចំណោមឧទាហរណ៍ទាំងនេះ ឬឧទាហរណ៍មួយផ្សេងទៀតចេញពីគម្ពីរកិច្ចការ សូមរៀបចំចម្លើយមួយដើម្បីប្រាប់មិត្តភក្ដិរបស់អ្នកដែលមិនជឿថាគាត់អាចផ្លាស់ប្ដូរបាន ។ សូមបញ្ចូលអ្វីដូចខាងក្រោមនេះ ៖

• ភស្ដុតាងនៃមនុស្សម្នាក់ ឬមនុស្សជាច្រើននាក់ដែលបានផ្លាស់ប្តូរដោយមានជំនួយរបស់ព្រះអង្គសង្គ្រោះ ។

• របៀបដែលព្រះអង្គសង្គ្រោះ និងអ្នកបម្រើដែលទ្រង់បានចាត់មក បានជួយក្នុងការប្រែចិត្តជឿ ។

• អ្វីដែលមនុស្សម្នាក់ ឬមនុស្សជាច្រើនបានធ្វើដើម្បីទុកចិត្តលើព្រះអម្ចាស់ និងអ្នកបម្រើរបស់ទ្រង់ ។

សូមស្ដាប់នៅពេលដែលសិស្សចែកចាយការឆ្លើយតបរបស់ពួកគេជាដៃគូ ឬជាក្រុមតូចៗ ។ ប្រសិនបើពួកគេត្រូវការការណែនាំបន្ថែមអំពីការប្រែចិត្តជឿលើព្រះយេស៊ូវគ្រីស្ទ សូមពិចារណាអានផ្នែកនៃ កិច្ចការ ៩:៣–២០ ជាមួយគ្នា ហើយអញ្ជើញសិស្សឲ្យស្វែងរកព័ត៌មានលម្អិត ដែលជួយពួកគេឲ្យយល់ពីរបៀបដែលមនុស្សអាចផ្លាស់ប្តូរដោយមានជំនួយរបស់ព្រះអង្គសង្គ្រោះ ។

សូមសញ្ជឹងគិតពីការប្រែចិត្តជឿរបស់អ្នកផ្ទាល់ទៅលើព្រះយេស៊ូវគ្រីស្ទ ។ សូមគិតអំពីការអញ្ជើញឲ្យផ្លាស់ប្តូរ ឬកែលម្អដែលអ្នកបានទទួលអារម្មណ៍ពីព្រះអម្ចាស់ នៅពេលអ្នកបានសិក្សាគម្ពីរកិច្ចការ ។ សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សារបស់អ្នក ។

សូមដាក់បង្ហាញសំណួរខាងក្រោមនេះដើម្បីឲ្យសិស្សមើលឃើញ កាលដែលពួកគេសរសេរនៅក្នុងសៀវភៅកំណត់ហេតុការសិក្សារបស់ពួកគេ ។

• តើអ្នកដឹងអ្វីខ្លះអំពីព្រះយេស៊ូវគ្រីស្ទ ដែលជំរុញអ្នកឲ្យស្រឡាញ់ និងធ្វើតាមទ្រង់កាន់តែពេញលេញ ?

• ក្នុងរយៈពេលមួយខែចុងក្រោយនេះ តើមានការផ្លាស់ប្តូរអ្វីខ្លះ ដែលអ្នកមានអារម្មណ៍ថាស្ងើចសរសើរចំពោះអ្វីដែលព្រះវិញ្ញាណបរិសុទ្ធបានធ្វើ ? តើអ្នកឆ្លើយតបយ៉ាងដូចម្ដេច ?

• តើព្រះវរបិតាសួគ៌បានប្រទានពរដល់អ្នកចំពោះការខិតខំរបស់អ្នកយ៉ាងដូចម្តេចខ្លះ ? តើអ្នកបានធ្វើអ្វីខ្លះ ដែលនាំឲ្យមានភាពខុសគ្នាដ៏ធំបំផុត ?

• តើមានអ្វីខ្លះដែលធ្វើឲ្យពិបាកក្នុងការទទួលយកការអញ្ជើញឲ្យផ្លាស់ប្តូរ និងកែលម្អ ? តើអ្នកអាចស្វែងរកជំនួយបន្ថែមពីព្រះវរបិតាសួគ៌ដោយរបៀបណា ?

សូមបន្តស្វែងរកការបំផុសគំនិតពីព្រះវរបិតាសួគ៌តាមរយៈព្រះវិញ្ញាណបរិសុទ្ធ នៅពេលអ្នកសិក្សាមេរៀននេះ ។ សូមព្យាយាមកំណត់នូវអ្វីដែលទ្រង់ចង់ឲ្យអ្នកធ្វើដើម្បីផ្លាស់ប្តូរ ហើយប្រែចិត្តជឿលើព្រះយេស៊ូវគ្រីស្ទកាន់តែខ្លាំងឡើង ។សូមជ្រើសរើសសកម្មភាពមួយក្នុងចំណោមសកម្មភាពខាងក្រោមនេះដើម្បីយកមកបំពេញ ពេលអ្នកសញ្ជឹងគិតអំពីរបៀបដើម្បីខិតទៅកាន់តែជិតព្រះគ្រីស្ទ ។

សកម្មភាព ក ៖ គោលការណ៍ និងពិធីបរិសុទ្ធដំបូងទាំងឡាយនៃដំណឹងល្អនៃព្រះយេស៊ូវគ្រីស្ទ

នៅក្នុងគម្ពីរកិច្ចការ មនុស្សជាច្រើនបានទទួលជំនួយពីស្ថានសួគ៌ ដើម្បីផ្លាស់ប្តូរ ហើយប្រែចិត្តជឿលើព្រះយេស៊ូវគ្រីស្ទកាន់តែខ្លាំង តាមរយៈការទទួលយកគោលការណ៍ និងពិធីបរិសុទ្ធដំបូងទាំងឡាយនៃដំណឹងល្អ ។

សេចក្ដីណែនាំដល់បទគម្ពីរទាំងឡាយពន្យល់ពីរបៀបដែលគោលការណ៍ និងពិធីបរិសុទ្ធទាំងនេះជួយយើងឲ្យប្រែចិត្តជឿលើព្រះយេស៊ូវគ្រីស្ទ ។

ការប្រែចិត្ត ពិធីបុណ្យជ្រមុជទឹកសម្រាប់ការផ្ដាច់បាប ពិធីដាក់ដៃលើសម្រាប់អំណោយទានជាព្រះវិញ្ញាណបរិសុទ្ធ និងការបន្តមានសេចក្ដីជំនឿទៅលើព្រះអម្ចាស់ព្រះយេស៊ូវគ្រីស្ទ ដែលធ្វើឲ្យការប្រែចិត្តជឿមានភាពពេញលេញ ។ មនុស្សខាងសាច់ឈាមម្នាក់នឹងត្រូវផ្លាស់ប្តូរទៅជាមនុស្សថ្មីដែលបានញែកជាបរិសុទ្ធ ហើយបរិសុទ្ធ កើតជាថ្មីក្នុងព្រះយេស៊ូវគ្រីស្ទ ( កូរិនថូស ទី២ ៥:១៧ ; ម៉ូសាយ ៣:១៩ ) ។

( សេចក្ដីណែនាំដល់បទគម្ពីរទាំងឡាយ « ការប្រែចិត្តជឿ ប្រែចិត្តជឿ » scriptures.ChurchofJesusChrist.org )

សូមសញ្ជឹងគិតពីដំណើររឿងដែលអ្នកបានជ្រើសរើសដែលបង្ហាញពីការផ្លាស់ប្តូររបស់នរណាម្នាក់ដោយមានជំនួយរបស់ព្រះអម្ចាស់ ។

• តើគោលការណ៍ និងពិធីបរិសុទ្ធដំបូងនៃដំណឹងល្អមានតួនាទីអ្វីនៅក្នុងការប្រែចិត្តជឿរបស់ពួកគេ ?

• តើគោលការណ៍ និងពិធីបរិសុទ្ធដំបូងនៃដំណឹងល្អបានជួយអ្នក ឬអ្នកដទៃឲ្យប្រែចិត្តជឿលើព្រះអង្គសង្គ្រោះកាន់តែខ្លាំងឡើងយ៉ាងដូចម្ដេច ?

សូមស្រមៃថា ពួកអ្នកផ្សព្វផ្សាយសាសនាក្នុងមូលដ្ឋានសុំជំនួយពីអ្នក ដើម្បីជួយដល់នរណាម្នាក់ដែលពួកគេកំពុងបង្រៀន ។ ពួកគេចង់ឲ្យអ្នកចែកចាយពីរបៀបដែលគោលការណ៍ និងពិធីបរិសុទ្ធដំបូងនៃដំណឹងល្អអាចជួយពង្រឹងការប្រែចិត្តជឿលើព្រះយេស៊ូវគ្រីស្ទ ហើយអញ្ជើញជំនួយរបស់ទ្រង់ឲ្យធ្វើការផ្លាស់ប្តូរចាំបាច់នានានៅក្នុងជីវិតរបស់យើង ។ សូមសរសេរការពន្យល់មួយទៅកាន់បុគ្គលនេះ ដូចជាអ្នកកំពុងនិយាយដោយផ្ទាល់ជាមួយពួកគេដូច្នោះដែរ ។ សូមប្រើឧទាហរណ៍យ៉ាងហោចណាស់មួយចេញពីគម្ពីរកិច្ចការ និងបទពិសោធន៍ផ្ទាល់ខ្លួនណាមួយដែលអ្នកយល់ថាមានប្រយោជន៍ ។

សូមឲ្យសិស្សមានពេលសរសេរគំនិតរបស់ពួកគេ ។ បន្ទាប់មក សូមអញ្ជើញពួកគេឲ្យពន្យល់ដៃគូរបស់ខ្លួន ។ សូមដើរជុំវិញ ហើយស្តាប់ការពន្យល់របស់ពួកគេ ។ ប្រសិនបើសិស្សត្រូវការការបង្រៀនបន្ថែមទៀតអំពីគោលការណ៍ និងពិធីបរិសុទ្ធដំបូងនៃដំណឹងល្អ សូមពិចារណាប្រើវគ្គបទគម្ពីរទាំងនេះ ៖ កិច្ចការ ១៩:១–៧ ; នីហ្វៃ ទី២ ៣១:១៣–២១ ; នីហ្វៃ ទី៣ ២៧:១៣–២២ ។

សកម្មភាព ខ ៖ ការសិក្សាព្រះគម្ពីរ និងការប្រែចិត្តជឿ

សកម្មភាពដ៏សំខាន់មួយដែលយើងអាចធ្វើបាន ដើម្បីពង្រឹងការប្រែចិត្តជឿរបស់យើងលើព្រះយេស៊ូវគ្រីស្ទ គឺការសិក្សាព្រះគម្ពីរឲ្យបានជាប់លាប់ ។ សូមគិតអំពីរបៀបដែលដំណើររឿងខាងក្រោមចេញពីគម្ពីរកិច្ចការ បង្ហាញពីសារៈសំខាន់នៃការសិក្សាព្រះគម្ពីរក្នុងការប្រែចិត្តជឿ ។

ភីលីព និងបុរសសាសន៍អេធីយ៉ូពី ៖ កិច្ចការ ៨:២៦–៤០

ប៉ុល និងពួកបរិសុទ្ធនៅក្រុងថែស្សាឡូនីច និងបេរា ៖ កិច្ចការ ១៧:១–១៤

សូមសញ្ជឹងគិតពីរបៀបដែលការសិក្សាព្រះគម្ពីរបានជួយក្នុងការប្រែចិត្តជឿរបស់អ្នកទៅលើព្រះអង្គសង្គ្រោះ ។

សូមស្រមៃថា អ្នកដឹកនាំយុវជន ឬអ្នកដឹកនាំយុវនារីរបស់អ្នកបានសូមឲ្យអ្នកជួយយុវជននៅក្នុងវួដ ឬសាខារបស់អ្នកឲ្យសិក្សាព្រះគម្ពីរ ហើយពង្រឹងការប្រែចិត្តជឿរបស់ពួកគេលើព្រះយេស៊ូវគ្រីស្ទ ។ តើអ្នកអាចបង្កើតធនធានអ្វីខ្លះ ដើម្បីលើកទឹកចិត្តពួកគេ ? សូមចំណាយពេលពីរបីនាទីដើម្បីគូសបញ្ជាក់ធនធានរបស់អ្នកនៅក្នុងសៀវភៅកំណត់ហេតុការសិក្សារបស់អ្នក ។ វាអាចជាវីដេអូ អត្ថបទ សុន្ទរកថា គេហទំព័រ ឬធនធានផ្សេងទៀត ។

ធនធានរបស់អ្នកអាចរួមមានឧទាហរណ៍ណាមួយខាងក្រោម ៖

• ឧទាហរណ៍មួយមកពីគម្ពីរកិច្ចការ ឬបទគម្ពីរមួយចេញពីគម្ពីរផ្សេងទៀត ដែលបង្ហាញពីសារៈសំខាន់នៃការសិក្សាព្រះគម្ពីរ ។

• ឧទាហរណ៍ ឬគំរូនៃជំនាញក្នុងការសិក្សាព្រះគម្ពីរដែលអ្នកប្រើដែលជួយដល់អ្នក ឬការពិពណ៌នាអំពីរបៀបដែលអ្នកសិក្សា ។

• ការពិពណ៌នាអំពីបទពិសោធន៍មួយដែលការសិក្សាព្រះគម្ពីរបានជួយអ្នក ឬនរណាម្នាក់ដែលអ្នកស្គាល់ឲ្យកាន់តែប្រែចិត្តជឿលើព្រះអង្គសង្គ្រោះ ។

• ទីបន្ទាល់ផ្ទាល់ខ្លួនរបស់អ្នកអំពីអំណាចនៃការសិក្សាព្រះគម្ពីរ ។

សូមអញ្ជើញសិស្សឲ្យធ្វើដូចខាងក្រោមនេះនៅក្នុងសៀវភៅកំណត់ហេតុការសិក្សារបស់ពួកគេ ។

សូមស្វែងរកជំនួយពីព្រះវរបិតាសួគ៌តាមរយៈព្រះវិញ្ញាណបរិសុទ្ធ នៅពេលអ្នកសរសេរសកម្មភាពទាំងឡាយណាដែលអ្នកមានអារម្មណ៍ថា អ្នកត្រូវតែធ្វើ ដើម្បីប្រែចិត្តជឿលើព្រះយេស៊ូវគ្រីស្ទកាន់តែខ្លាំងឡើង ។ ព្រះអង្គសង្គ្រោះនឹងជួយដល់អ្នក នៅពេលអ្នកខិតខំធ្វើតាមចំណាប់អារម្មណ៍ទាំងនេះ ។ សូមពិចារណាចែកចាយចំណាប់អារម្មណ៍របស់អ្នកជាមួយឪពុក ឬម្តាយ ឬអ្នកដឹកនាំសាសនាចក្រដែលគួរឲ្យទុកចិត្តម្នាក់ ។ សូមឲ្យពួកគេជួយអ្នកតាមដានចំណាប់អារម្មណ៍ទាំងនេះ ។

សូមលើកទឹកចិត្តសិស្សឲ្យធ្វើសកម្មភាពលើចំណាប់អារម្មណ៍ដែលពួកគេបានទទួលពីព្រះវរបិតាសួគ៌ តាមរយៈព្រះវិញ្ញាណបរិសុទ្ធ ។ សូមថ្លែងទីបន្ទាល់ថា ព្រះនឹងជួយពួកគេ នៅពេលពួកគេព្យាយាមធ្វើតាមចំណាប់អារម្មណ៍ទាំងនោះ ។

សកម្មភាពរៀនសូត្របន្ថែម

កិច្ចការ ១០ – ១១ ; កិច្ចការ ១៥ ; កិច្ចការ ២៧ ។ វិវរណៈ

សូមពិចារណាវាយតម្លៃនូវអ្វីដែលសិស្សដឹងអំពីរបៀបដែលវិវរណៈកើតមានដល់ថ្នាក់ដឹកនាំសាសនាចក្រ ។ សូមអញ្ជើញពួកគេឲ្យពិនិត្យមើលកំណត់ចំណាំដែលពួកគេបានកត់ត្រាមកពីមេរៀនគ្របដណ្តាប់ក្នុង កិច្ចការ ១០ ; ១១ ; ១៥ និង ២៧ ។ សូមផ្តល់ឱកាសឲ្យសិស្សរៀបចំ និងបង្ហាញគំនិតរបស់ពួកគេ ។ វិធីមួយអាចជាការឲ្យសិស្សសរសេរអត្ថបទខ្លីមួយសម្រាប់ទស្សនាវដ្ដី ដើម្បីកម្លាំងនៃយុវជន ដែលពន្យល់ពីរបៀបទទួលបានវិវរណៈសម្រាប់សាសនាចក្រទាំងមូល ហើយហេតុអ្វីបានជាសេចក្តីពិតទាំងនេះសំខាន់ដើម្បីស្វែងយល់ ។

ការស្វែងរកសេចក្ដីសុខសាន្តនៅក្នុងព្រះគ្រីស្ទដែលស្ថិតនៅក្នុងសេចក្តីទុក្ខលំបាក

សូមអញ្ជើញសិស្សឲ្យរំឭកអំពីបុគ្គលម្នាក់មកពីគម្ពីរកិច្ចការដែលអាចរកឃើញសេចក្ដីសុខសាន្តនៅក្នុងព្រះគ្រីស្ទ ទោះជាមានសេចក្តីទុក្ខលំបាកក្ដី ដូចជា ពេត្រុស និងយ៉ូហាននៅក្នុង កិច្ចការ ៥:៤០–៤២ , ស្ទេផាននៅក្នុង កិច្ចការ ៦ – ៧ , ពេត្រុស និងសមាជិកសាសនាចក្រផ្សេងទៀតនៅក្នុង កិច្ចការ ១២:១–១៩ ឬ ប៉ុល នៅក្នុង កិច្ចការ ២២ – ២៨ ។ សូមអញ្ជើញសិស្សឲ្យចែកចាយបទពិសោធន៍អំពីរបៀបដែលពួកគេបានរកឃើញសេចក្តីសុខសាន្តនៅក្នុងព្រះគ្រីស្ទ នៅពេលមានសេចក្តីទុក្ខលំបាក ។ ពួកគេអាចកំណត់ពីសកម្មភាពនានាចេញពីដំណើររឿងនៅក្នុងគម្ពីរកិច្ចការ និងបទពិសោធន៍ផ្ទាល់ខ្លួន ដែលអាចជួយពួកគេឲ្យប្រឈមមុខនឹងការសាកល្បងនាពេលអនាគតបាន ។ សូមអញ្ជើញពួកគេឲ្យស្វែងរកការបំផុសគំនិតពីព្រះវរបិតាសួគ៌ តាមរយៈព្រះវិញ្ញាណបរិសុទ្ធ ហើយដាក់ផែនការសម្រាប់អ្វីដែលពួកគេនឹងធ្វើក្នុងការសាកល្បងនាពេលអនាគត ដើម្បីស្វែងរកសេចក្ដីសុខសាន្តនៅក្នុងព្រះគ្រីស្ទ ។