“Ebream im Serai,” Bwebwenato ko jān Kallim̧ur M̧okta (2021)
“Ebream im Serai,” Bwebwenato ko jān Kallim̧ur M̧okta
Jenesis 11–15; 17; Ebream 1–2
Ebream im Serai
Juon kallim̧ur n̄an kōjeraam̧m̧an baam̧le ko ilo lal in
Ebream eaar jokwe ilo bukwōn in Ur. Pris ro renana ijo raar kōņaan bwe ren katok kake n̄an ekjab ko aer. Ebream eaar jar, im Irooj eaar lo̧mo̧o̧ren e.
Innām Irooj eaar kakien Ebream im kōrā eo ippān Serai n̄an em̧m̧akūt jān Ur im etal n̄an juon āne ettoļo̧k. Eaar kallim̧ur n̄an kōjeraam̧m̧an er ilo iaļ eo aer.
Ebream im Serai raar lōke Irooj im kar em̧m̧akūt jān Ur. Ak raar en̄jake būrom̧ōj kōnke ejjab maron̄ wōr nejiero ajri. Ak Irooj eaar kaenōm̧m̧an er. E eaar kallim̧ur bwe enaaj wōr juon nejiero ajri.
Jenesis 11:30–31; 15:1–6; 17:2–16; Ebream 2:6–9
Ebream eaar jar n̄an Irooj bwe en jeļā eļapļo̧k kōn E. Irooj eaar loļo̧k Ebream im kar kwaļo̧k ke E ej Jeova. Jeova eaar kōm̧m̧ane juon bujen ippān Ebream. E eaar kallim̧ur bwe Priesthood eo enaaj pād ippān Ebream. E eaar barāinwōt kallim̧ur bwe kōn baam̧le eo an Ebream, aolep baam̧le ko ioon laļ in renaaj jeraam̧m̧an.
Ke Ebream im Serai raar ito tak, raar aikuj kappok m̧ōn̄ā. Raar kajjieon̄ in jokwe ilo āne eo etan Kenan. Ekar ejjeļo̧k m̧ōn̄ā ijo, kōn menin raar aikuj etal n̄an Ijipt. Ak jokwe ilo Ijipt ekar kauwōtata n̄an er.
Jenesis 12:10–20; Ebream 2:21–25
Ebream im Serai raar etal jān Ijipt im bar jepļaak im jokwe ilo Kenan. Raar bōktok ippāer tok m̧ōn̄ā im mennin mour ko jān Ijipt. Kenan eaar m̧ōttan āne eo Irooj ekar kallim̧uri er kake.
Jenesis 13:1–4, 12; Ebream 2:19
Irooj eaar dāpij kallim̧ur eo An ke Ebream enaaj bōk priesthood eo. Juon raan Ebream im Serai raar ioon juon kiin̄ ewānōk etan in Melkisedek. Ebream eaar kōļļā juon m̧ōttan jon̄oul n̄an e.
Ebream eaar bōk priesthoood jān Melkisedek. Ejja priesthood eo in im rikanaan ro Adam im Noa raar bōke.
Josep Smith Ukook, Jenesis 14:36–40; Ebream 1:2–4; Katak im Bujen Ko 84:14
Ebream im Serai raar m̧ōņōņō ilo Kenan, ak raar baj wōt būrom̧ōj bwe ejjab maron̄ wōr nejiero ajri. Raar lōke wōt kallim̧ur eo an Irooj bwe juon raan baam̧le eo aer enaaj lōn̄ļo̧k im kōjeraam̧m̧an aolepān laļ in.