“Daniel im Ettōņak eo an Kiin̄ eo,” Bwebwenato ko jān Kalim̧m̧ur M̧okta (2022)
“Daniel im Ettōņak eo an Kiin̄ eo,” Bwebwenato ko jān Kallim̧ur M̧okta
Daniel 2
Daniel im Ettōņak eo an Kiin̄ eo
Ennaan eo an Anij n̄an juon kiin̄
Kiin̄ eo an Babylon eaar wōr juon an ettōņak me eaar kainepataik e. Eaar jiron̄ aolep pris im rimāletlet ro an bwe ren kwaļo̧k n̄an e ta meļeļein ettōņak eo.
Kiin̄ eo eaar jab kwaļo̧k n̄an er ettōņak eo. Eaar ba eļan̄n̄e pris im rimālelet ro elōn̄ aer kajoor, ren kwaļo̧k n̄an e ta ettōņak eo im ta meļeļein.
Pris im rimāletlet ro raar ba n̄an kiin̄ eo rejjab maron̄ ukōt ettōņak eo an eļan̄n̄e eban kwaļo̧k n̄an er kar ta eo. Raar ba ejjeļo̧k em̧m̧aan emaron̄ kōm̧m̧ane men eo. Kiin̄ eo eaar illu im ba emaron̄ m̧an aolep rimāletlet ro ilo aelōn̄ eo an, ekoba Daniel im ro m̧ōttan.
Ke riwaj eo an kiin̄ eo eaar itok im bōk Daniel im ro m̧ōttan, Daniel eaar kajjitōk eļapļo̧k iien bwe en maron̄ kwaļo̧k n̄an kiin̄ eo meļeļein ettōņak eo an. Daniel eaar jeļā bwe Anij ejeļā im ej lo men otemjeļo̧k, em̧ool bar ettōņak ko. Daniel eaar kajjitōk ippān ro m̧ōttan bwe ren jar ippān.
Anij eaar kwaļo̧k n̄an Daniel ettōņak eo an kiin̄ eo ilo juon visōn im kar kwaļo̧k n̄an Daniel ta meļeļein. Daniel eaar kam̧m̧oolol Anij kōn an uwaaki jar ko an im ro m̧ōttan im n̄an oņake mour ko aer. Innām eaar ilo̧k im jiron̄ kiin̄ eo meļeļein ettōņak eo an.
Daniel eaar ba n̄an kiin̄ eo ettōņak eo ekar kōn juon ekjab kileplep me ejorrāān jen juon dōkā ej dābwilļo̧kļ jen to̧l eo. Ekjab eo ej pinej jenkwan aelōn̄ ko ioon laļin. Dōkā eo ej dābwilļo̧k jen to̧l eo ej pinej jenkwan aelōn̄ in kiin̄ eo an Anij me enaaj kobrak laļin. Kiin̄ eo eaar jeļā bwe Daniel eaar kōnono m̧ool.