“Mataupu 3: Lesona 2—O Le Ata o le Faaolataga a le Tama Faalelagi,” Tala’i La’u Talalelei: O Se Taiala i le Faasoaina Atu o le Talalelei a Iesu Keriso (2023)

“Mataupu 3: Lesona 2,” Tala’i La’u Talalelei

Mataupu 3: Lesona 2

O Le Ata o le Faaolataga a le Tama Faalelagi

E Ono Manatu Tagata

O le a le faamoemoega o le olaga?
O fea na ou sau ai?
O i ai ea se Atua e popole ia te a’u? E mafai faapefea ona ou lagonaina e popole mai o Ia?
E mafai faapefea ona ou talitonu i le Atua pe a tutupu le tele naua o mea leaga?
Aisea e matua faigata tele ai le olaga i nisi o taimi? E mafai faapefea ona ou maua le malosi i nei taimi?
E mafai faapefea ona ou avea ma se tagata lelei sili atu?
O le a le mea e tupu pe a ou oti?

O le talalelei toefuataiina a Iesu Keriso e fesoasoani ia i tatou e tali ai fesili taua o le agaga. E ala i le talalelei, tatou te aoao ai e uiga i lo tatou faasinomaga paia ma lo tatou gafatia e faavavau o ni fanau a le Atua. O le talalelei e aumaia ia i tatou le faamoemoe ma fesoasoani ina ia tatou maua ai le filemu, olioli, ma le uiga. O le ola ai i le talalelei e fesoasoani tatou te tuputupu a’e ai ma maua le malosi a o tatou feagai ma luitau o le olaga.

E finagalo le Atua i le mea sili mo Ana fanau ma finagalo e tuuina mai ia i tatou Ana faamanuiaga silisili, o le tino ola pea ma le ola e faavavau (tagai i le Mose 1:39; Mataupu Faavae ma Feagaiga 14:7). Ona e alofa o Ia ia i tatou, ua Ia saunia ai se fuafuaga mo i tatou ia maua nei faamanuiaga. I tusitusiga paia, o lenei fuafuaga ua ta’ua o le ata o le faaolataga, o le fuafuaga sili o le fiafia, ma le fuafuaga o le togiolaina (tagai i le Alema 42:5, 8, 11, 13, 15, 16, 31).

I le fuafuaga a le Atua, ua faia ai e i tatou taitoatasi se malaga i le muai olaga, fanau mai, olaga faitino, oti, ma le olaga pe a mavae le oti. Ua saunia e le Atua mea tatou te manaomia i lenei faigamalaga ina ia iai se tulaga a mavae lo tatou oti, o le a iu lava ina mafai ona tatou toe foi atu i Lona afioaga ma maua se atoatoaga o le olioli.

O Iesu Keriso e totonugalemu i le fuafuaga a le Atua. E ala i Lana Togiola ma le Toetu, na mafai ai e Iesu mo i tatou taitoatasi ona maua le tino ola pea ma le ola e faavavau.

I le taimi o lo tatou olaga i le lalolagi, tatou te le manatuaina lo tatou muai olaga. Tatou te le malamalama atoatoa foi i le olaga pe a mavae le oti. Peitai, ua faaalia mai e le Atua le tele o upumoni e uiga i nei vaega o la tatou malaga e faavavau. O nei upumoni ua lava ai le malamalama mo i tatou e malamalama ai i le faamoemoega o le olaga, ia lagona ai le olioli, ma maua ai le faamoemoe o mea lelei o le a oo mai. O lenei malamalama o se oa paia e taiala ai i tatou a o tatou i ai i le lalolagi.

Fautuaga mo le Aoao Atu

O lenei vaega o loo tuuina atu ai se otootoga faataitai e fesoasoani ia te oe e saunia ai e aoao atu. E aofia ai foi faataitaiga o fesili ma valaaulia e mafai ona e faaaogaina.

A o e sauni e aoao atu, ia mafaufau ma le agaga tatalo i tulaga o tagata taitoatasi ma manaoga faaleagaga. Filifili po o le a se mea o le a sili ona fesoasoani ia i latou. Sauni e faamatala ia faaupuga atonu e le malamalama ai tagata. Fuafua e tusa ai ma le tele o le taimi o le a e maua, ia manatua e faapuupuu lesona.

Filifili mau e faaaoga a o e aoao atu. O le vaega o le “Faavae o Aoaoga Faavae” o le lesona o loo aofia ai le tele o mau aoga.

Mafaufau po o le fea fesili e fai atu a o e aoao atu. Fuafua ni valaaulia e tuuina atu lea o le a uunaia ai tagata taitoatasi e faatino.

Faamamafa atu faamanuiaga folafolaina a le Atua, ma faasoa atu lau molimau i mea e te aoaoina atu.

O Mea e Mafai ona e Aoao Atu i Tagata i le 15–25 Minute

Filifili se tasi pe sili atu o mataupu faavae nei e uiga i le ata o le faaolataga e aoao atu. O le faavae faaleaoaoga faavae mo mataupu faavae taitasi ua saunia pe a uma lenei otootoga.

Muai Olaga: O Le Faamoemoega ma le Fuafuaga a le Atua mo i Tatou

O i tatou uma lava o fanau agaga a le Atua. Na foafoa e le Atua i tatou i Lona lava faatusa.
Sa tatou ola faatasi ma le Atua ae tatou te le’i fananau mai i le lalolagi. O i tatou o tagata o Lona aiga. Na te silafia ma alofa ia te i tatou taitoatasi uma.
Ua saunia e le Atua se fuafuaga mo lo tatou fiafia ma le alualu i luma i lenei olaga ma i le faavavau.
I lo tatou muai olaga, sa tatou filifili e mulimuli i le fuafuaga a le Atua. O lona uiga o le o mai i le lalolagi ina ia mafai ona tatou uia le isi laasaga i lo tatou alualu i luma e faavavau.
O Iesu Keriso e totonugalemu i le fuafuaga a le Atua. Ua Ia faia ia mafai e i tatou ona maua le tino ola pea ma le ola e faavavau.

O Le Foafoaga

I lalo o le taitaiga a le Atua, na foafoaina ai e Iesu Keriso le lalolagi.

O Le Pa’ū o Atamu ma Eva

O Atamu ma Eva o uluai fanau agaga ia a le Atua na o mai i le lalolagi. Na faia e le Atua o la tino ma tuu i la’ua i le Faatoaga o Etena.
Sa solitulafono Atamu ma Eva, sa tutuli ese i fafo o le faatoaga, ma sa vavaeeseina mai luma o le Atua. E ta’ua lenei mea na tupu o le Pa’ū.
Ina ua mavae le Pa’ū, na avea Atamu ma Eva ma tagata faaletino. I le avea ai ma tagata faaletino, sa mafai ona latou aoao, alualu i luma, ma maua fanau. Sa latou oo foi i le faanoanoa, agasala, ma le oti.
O le Pa’ū o se laasaga agai i luma mo tagata. O le Pa’ū ua mafai ai ona tatou fananau mai i le lalolagi ma alualu i luma i le fuafuaga a le Tama Faalelagi.

O lo Tatou Olaga i le Lalolagi

I le fuafuaga a le Atua, sa manaomia ona tatou o mai i le lalolagi ia maua ni tino faaletino, aoao, ma tuputupu a’e.
I le lalolagi, tatou te aoao ai e savavali i le faatuatua. Peitai, e le’i tuua na o i tatou e le Tama Faalelagi. Ua Ia saunia le tele o meaalofa ma taiala e fesoasoani ia i tatou e toe foi atu ai i Lona afioaga.

O Le Togiola a Iesu Keriso

O i tatou taitoatasi e agasala, ma o le a feoti uma i tatou taitoatasi. Ona e alofa le Atua ia i tatou, na Ia auina mai ai Lona Alo, o Iesu Keriso, i le lalolagi e togiola i tatou mai le agasala ma le oti.
Ona o le taulaga togiola a Iesu, ua mafai ai ona faamagaloina ma faamamaina i tatou mai a tatou agasala. E mafai ona suia o tatou loto mo le lelei sili atu pe a tatou salamo. O lenei mea ua mafai ai ona tatou toe foi atu i le afioaga o le Atua ma maua ai se atoatoaga o le olioli.
Ona o le Toetu o Iesu, o le a tatou toetutu uma ai pe a mavae le oti. O lona uiga o le a toe faatasia le agaga ma le tino o tagata taitoatasi, ma o le a tatou ola e faavavau i se tino toetu atoatoa.
Ua ofo mai e Iesu Keriso le faamafanafanaga, faamoemoe, ma le faamalologa. O Lana taulaga togiola o le faailoaga silisili lea o Lona alofa. O mea uma e le talafeagai i le olaga e mafai ona faasa’oina e ala i le Togiola a Iesu Keriso.’

O Le Lalolagi o Agaga

Pe a oti o tatou tino faaletino, e faaauau pea ona ola o tatou agaga i le lalolagi o agaga. O se tulaga le tumau lenei o le aoaoina ma sauniuniga a o le’i oo i le Toetu.
O le talalelei a Iesu Keriso e aoaoina i le lalolagi o agaga, ma e mafai ona faaauau pea ona tatou tuputupu a’e ma alualu i luma.

O Le Togiola, Faaolataga, ma le Faaeaga

A mavae lo tatou taimi i le lalolagi o agaga, o le Toetu o le laasaga lea e sosoo ai i la tatou malaga e faavavau.
O le Toetu o le toe faatasia lea o o tatou agaga ma tino. O i tatou taitoatasi o le a toetutu ma maua se tino faaletino atoatoa. O Le a tatou ola e faavavau. Ua mafai lenei mea ona o le Togiola ma le Toetu o le Faaola.

Faamasinoga ma Malo o le Mamalu

Pe a tatou toetutu, o le a avea Iesu Keriso ma o tatou faamasino. E vagana ai nai vaega laiti, o le a maua ai e fanau uma a le Atua se nofoaga i se malo o le mamalu.
E ui o le a tatou toetutu uma, ae o le a tatou le maua uma le mamalu e faavavau e tasi. O le a faamasinoina i tatou e Iesu e tusa ai ma lo tatou faatuatua, galuega, ma le salamo i le olaga nei ma i le lalolagi o agaga. E mafai ona tatou toe foi atu e nonofo i le afioaga o le Atua pe afai tatou te faamaoni.

O Fesili e te Ono Fesili ai i Tagata

O fesili nei o ni faataitaiga o mea e mafai ona e fesili atu ai i tagata. O nei fesili e mafai ona fesoasoani ia te oe e faia ai ni talanoaga anoa ma malamalama ai i manaoga ma le vaaiga a se tagata.

O le a sou manatu o le a le faamoemoega o le olaga?
O le a se mea na te aumaia ia te oe le fiafia?
O a luitau e te manaomia ai le Atua e fesoasoani ia te oe?
O le a se mea ua e aoaoina mai le faatoilaloina o luitau sa e faafeagai ai?
O a mea ua e iloa e uiga ia Iesu Keriso? Na faapefea ona aafia lou olaga i Lona soifuaga ma lana misiona?

O Valaaulia E te Ono Tuuina Atu

Pe e te ole atu ea i le Atua i le tatalo e fesoasoani ia te oe ia e iloa e moni mea ua matou aoaoina atu? (Tagai i le “Malamalamaaga Faafaiaoga: Tatalo” i le vaega mulimuli o le lesona 1.)
Pe o le a e auai i le lotu faatasi ma i matou i lenei Aso Sa e aoao atili ai e uiga i mea sa matou aoaoina atu?
Pe o le a e faitauina le Tusi a Mamona ma ole atu i le Atua i le tatalo ina ia iloa o le afioga ia a le Atua? (E mafai ona e fautuaina atu ni mataupu po o ni fuaiupu patino.)
Pe o le a e mulimuli ea i le faataitaiga a Iesu ma papatisoina? (Tagai i le “O Le Valaaulia ina ia Papatisoina ma Faamauina,” lea e muamua atu i le lesona 1.)
E mafai ona seti se taimi tatou te toe feiloai ai?

Faavae Faale-Aoaoga Faavae

O lenei vaega ua tuuina atu ai aoaoga faavae ma mau mo oe e suesue ai e faamalosia ai lou malamalama ma le molimau o le talalelei ma fesoasoani ai ia te oe e aoao atu.

Muai Olaga: O Le Faamoemoega ma le Fuafuaga a le Atua mo i Tatou

O i Tatou o Fanau a le Atua, ma sa Tatou Nonofo faatasi ma Ia a o le’i Fananau Mai i Tatou

O le Atua o le Tama o o tatou agaga. O i tatou moni lava o Lana fanau, na faia i Lona faatusa. E tofu i tatou ma se natura paia o se atalii po o se afafine o le Atua. O lenei malamalama e mafai ona fesoasoani ia i tatou i taimi faigata ma e mafai ona musuia ai i tatou ia avea ma o tatou tagata silisili.

Sa tatou nonofo faatasi ma le Atua o Ana fanau agaga ae tatou te le’i fananau mai i le lalolagi. O i tatou o tagata o Lona aiga.

“E i ai se faasinomaga taua se tasi tatou te faasoa atu i le taimi nei ma le faavavau, o se tasi e le tatau lava ona aveesea i la tatou vaai ma e tatau ona tatou faafetai ai. E faapea o oe lava ma o loo avea pea oe o se atalii po o se afafine o le Atua ma ni aa faaleagaga i le faavavau.

“… O le malamalama ai i lenei upumoni—malamalama moni i ai ma taliaina—e suia ai olaga. E tuuina atu ai ia te oe se faasinomaga tulaga ese e leai se tasi e mafai ona aveesea mai ia te oe. Ae e sili atu nai lo lena, e tatau ona e maua ai se lagona maoae o le taua ma se lagona o lou aoga e le gata. Ma le mea mulimuli, e tuuina atu ia te oe se faamoemoega paia, mamalu, ma agavaa i le olaga” (M. Russell Ballard, “Children of Heavenly Father” [Brigham Young University devotional, Mar. 3, 2020], 2, speeches.byu.edu).

Sa Tatou Filifili e o Mai Iinei i le Lalolagi.

E alofa lo tatou Tama Faalelagi ia i tatou ma e finagalo ia avea i tatou e faapei o Ia. O Ia o se tagata faaeaina ma se tino faaletino faamamaluina.

I lo tatou muai olaga, sa tatou aoao ai e i ai se fuafuaga a le Atua mo i tatou ia avea faapei o Ia. O se tasi vaega o Lana fuafuaga o le tatou tuua lea o lo tatou aiga faalelagi ma o mai i le lalolagi ia maua ni tino faaletino. Sa manaomia foi ona tatou maua le poto masani ma atiina a’e le faatuatua i se taimi e mamao ese ai mai le afioaga o le Atua. O le a tatou le manatua le ola faatasi ma le Atua. Peitai, o le a Ia saunia mea tatou te manaomia ina ia mafai ai ona tatou toe foi atu e mau faatasi ma Ia.

O le faitalia, po o le saolotoga ma le tomai e filifili ai, o se vaega taua o le fuafuaga a le Atua mo i tatou. I lo tatou muai olaga, sa filifili ai i tatou taitoatasi e mulimuli i le fuafuaga a le Atua ma o mai i le lalolagi ina ia mafai ona tatou uia le isi laasaga i lo tatou alualu i luma e faavavau. Sa tatou malamalama a o tatou i ai iinei, o le a tatou maua le tele o avanoa fou e tuputupu a’e ai ma lagonaina le olioli. Sa tatou malamalama foi o le a tatou faafesaga’i ma mea faafeagai. O le a tatou oo i faaosoosoga, tofotofoga, faanoanoaga, ma le oti.

I le filifili ai e o mai i le lalolagi, sa tatou faatuatuaina le alofa ma le fesoasoani a le Atua. Sa tatou faalagolago i Lana fuafuaga mo lo tatou faaolataga.

Na Filifili e le Tama Faalelagi ia Iesu Keriso e Laveai Tatou.

O Iesu Keriso e totonugalemu i le fuafuaga a le Atua. Ae tatou te le’i o mai i le lalolagi, sa tatou iloa e le mafai ona tatou toe foi atu i le afioaga o le Atua na o i tatou lava. Na filifilia e le Tama Faalelagi Iesu Keriso, Lona Alo ulumatua, ina ia mafai ai e i tatou ona toe foi atu ia te Ia ma maua le ola e faavavau.

Sa talia ma le loto i ai e Iesu. Sa Ia malie e afio mai i le lalolagi ma togiola i tatou e ala i Lana taulaga togiola. O Lana Togiola ma le Toetu o le a mafai ai ona faataunuuina faamoemoega o le Atua mo i tatou.

Suesuega o Tusitusiga Paia

Fanau a le Atua

Faamoemoega a le Atua

Muai Olaga

Aoao Atili e uiga i Lenei Mataupu Faavae

Taiala i Tusitusiga Paia, “Muai Olaga,” “Fuafuaga o le Togiolaina”
Tusitaulima Aoao, 1.1: “Fuafuaga o le Fiafia a le Atua”
Autu o le Talalelei: “Muai olaga,” “Ata o le Faaolataga”

O Le Foafoaga

O le fuafuaga a le Tama Faalelagi ua saunia mo le foafoaga o le lalolagi, lea o le a maua ai e Ana fanau agaga ni tino faaletino ma maua ai le poto masani. E manaomia lo tatou olaga i le lalolagi mo i tatou e alualu ai i luma ma avea e faapei o le Atua.

I lalo o le taitaiga a le Tama Faalelagi, na foafoaina ai e Iesu Keriso le lalolagi ma mea uma o i ai. Na foafoaina lea e le Atua le tane ma le fafine i Lona lava faatusa. O le Foafoaga o se faailoaga o le alofa o le Atua ma Lona finagalo mo i tatou ia maua le avanoa e tuputupu a’e ai.

Suesuega o Tusitusiga Paia

Aoao Atili e uiga i Lenei Mataupu Faavae

Taiala i Tusitusiga Paia, “Foafoa, Foafoaga”
Autu o le Talalelei: “Foafoaga”

O Le Pa’ū o Atamu ma Eva

A o le’i oo i le Pa’ū

O Atamu ma Eva o uluai fanau agaga a le Tama Faalelagi na o mai i lenei lalolagi. Na foafoaina e le Atua o laua tino faaletino i Lona lava faatusa ma tuu i laua i le Faatoaga o Etena. I le faatoaga sa ta’umamaina i laua, ma sa saunia e le Atua mea la te manaomia.

A o i ai Atamu ma Eva i le faatoaga, sa poloaiina i laua e le Atua e aua nei aai i le fua o le laau e iloa ai le lelei ma le leaga. Afai laua te usiusitai i lenei poloaiga, e mafai ona la nonofo ai pea i le faatoaga. Peitai, o le a le mafai ona laua alualu i luma e ala i le aoao mai mea faafeagai ma luitau o le olaga faaletino. Semanu la te le mafai ona iloa le olioli aua la te le mafai ona oo i le faanoanoa ma le tiga.

Sa faaosoosoina e Satani ia Atamu ma Eva ina ia aai i le fua ua faasaina, ma sa la filifili ai e ‘ai. Talu ai ona o lenei filifiliga, na tuliese ai i la’ua mai le faatoaga ma o ese ai mai le afioaga o le Atua. E ta’ua lenei mea na tupu o le Pa’ū.

Ina ua maea le Pa’ū

Ina ua mavae le Pa’ū, na avea Atamu ma Eva ma tagata faaletino. I lo la lē toe i ai i se tulaga o le ta’umamaina, sa laua malamalama ma oo ai i le lelei ma le leaga. Sa mafai ona la faaaogaina lo la faitalia e filifili ai i lo latou va. Ona sa feagai Atamu ma Eva ma mea faafeagai ma luitau, sa mafai ai ona la aoao ma alualu i luma. Ona sa latou oo i le faanoanoa, sa mafai ai foi ona latou lagonaina le olioli. (Tagai i le 2 Nifae 18:22–25.)

E ui lava i o laua faigata, sa lagona e Atamu ma Eva o le avea ma se tagata ola o se faamanuiaga sili. O se tasi o faamanuiaga o le mafai lea ona maua ni a la fanau. O lenei mea na saunia ai le ala mo isi fanau agaga a le Atua e o mai ai i le lalolagi ma maua ni tino faaletino.

E faatatau i faamanuiaga o le Pa’ū, sa olioli uma Atamu ma Eva. Sa faapea mai Eva, “Ana le seanoa la ta solitulafono po ua lē maua e i taua ni [fanau], ma po ua lē mafai ona ta iloa le lelei ma le leaga, ma le olioli o le togiolaina o i taʼua, ma le ola e faavavau ua tuu mai e le Atua ia i latou uma o e e usiusitai” (Mose 5:11; tagai foi i le mataupu 10).

Malamalamaaga Faaleaoaoga Faavae: O Le Pa’ū

O le Pa’ū o se vaega tatau o le Ata o le Faaolataga. O le Pa’ū ua mafai ai e i tatou ona omai i le lalolagi ma alualu i luma i le avea e faapei o le Atua (tagai i le 2 Nifae 2:25).

O le faaiuga a Eva ma Atamu e aai i le fua ma tuua ai le Faatoaga o Etena o se filifiliga maaleale faaleagaga. I se tulaga lautele, e vaai atu tusitusiga paia ma perofeta i lenei filifiliga o se solitulafono, ae le o se agasala (tagai i le Mataupu Faavae o le Faatuatua 1:2; 2 Nifae 9:6).

O nisi tagata e talitonu sese faapea o i tatou uma lava e mautofi i le tausalaina o le solitulafono a Atamu ma Eva (e faasino i ai nisi o le “uluai agasala”). Peitai, sa faaali mai e le Alii e faapea sa Ia “togiola mo le uluai sala, lea e le mafai ai ona tali o agasala a matua i luga o ulu o fanau” (Mose 6:54).

A oo i le taimi muamua e aoao atu ai e uiga i le Pa’ū, ia faigofie le faamatalaina.

Suesuega o Tusitusiga Paia

I le Faatoaga

O Le Pa’ū

Aoao Atili e uiga i Lenei Mataupu Faavae

Taiala i Tusitusiga Paia, “Pa’ū o Atamu ma Eva,” “Faitalia”
Autu o le Talalelei: “Pau o Atamu ma Eva,” “Faitalia ma le Tali Atu mo Oe Lava Ia”

O lo Tatou Olaga i le Lalolagi

E toatele tagata e mafaufau, “Aisea ua ou i ai iinei i le lalolagi?” O lo tatou olaga i le lalolagi o se vaega taua o le fuafuaga a le Atua mo lo tatou alualu i luma e faavavau. O lo tatou faamoemoega tupito o le saunia lea e toe foi atu i le afioaga o le Atua ma maua se atoaga o le olioli. O loo otooto atu i lalo nisi o auala e saunia ai i tatou e le olaga i le lalolagi mo lenei mea.

Maua se Tino Faaletino.

O se tasi o faamoemoega o le o mai i le lalolagi o le mauaina lea o se tino faaletino lea e mafai ona nofo ai o tatou agaga. O o tatou tino o foafoaga paia faavavega a le Atua. Faatasi ai ma tino faaletino, e mafai ona tatou faia, aoao, ma oo i le tele o mea e le mafai e o tatou agaga. E mafai ona tatou alualu i luma i auala e le mafai ona tatou faia o ni agaga.

Ona o o tatou tino e faaletino, tatou te oo ai i tiga, faama’i, ma isi tofotofoga. O nei aafiaga e mafai ona fesoasoani ia i tatou e aoao ai le onosai, agaalofa, ma isi uiga auaumama paia. E mafai ona avea i latou ma se vaega o lo tatou ala i le olioli. O le filifilia o le mea sa’o pe a faigata ona fai e masani lava ona avea ai le faatuatua, faamoemoe, ma le alofa mama ma vaega o o tatou uiga faaletagata.

Aoao e Faaaoga ma le Poto le Faitalia

O le isi faamoemoega o le olaga faaletino o le aoao lea e faaaoga ma le atamai lo tatou faitalia—ia filifili le mea sa’o. O le aoao e faaaoga ma le poto lo tatou faitalia e taua i le avea e faapei o le Atua.

Ua aoao mai e le Tama Faalelagi ma Iesu Keriso ia i tatou le mea sa’o ma tuuina mai poloaiga e taiala ai i tatou i le fiafia. E faaosoosoina i tatou e Satani e fai le mea sese, ma manao ia tatou faanoanoa e pei o ia. Tatou te feagai ma mea faafeagai i le va o le lelei ma le leaga, lea e tatau ai i le aoaoina e faaaoga lo tatou faitalia (tagai i le 2 Nifae 2:11).

A o tatou usiusitai i le Atua, tatou te tuputupu a’e ma maua Ana faamanuiaga folafolaina. A tatou lē usitai, ua tatou taumamao ese mai ia te Ia ma maua taunuuga o le agasala. E ui lava o nisi taimi e foliga mai ai o le faafeagai, ae o le agasala e tau atu lava pea i le lē fiafia. E masani lava o faamanuiaga o le usiusitai—ma aafiaga o le agasala—e lē vave ona iloa pe vaaia i fafo. Ae ua mautinoa lava, auā e amiotonu le Atua.

E tusa lava pe tatou te faia le mea sili tatou te mafaia, tatou te agasala uma lava ma “ua le oo i le viiga mai le Atua” (Roma 3:23). O le iloaina o lenei mea, na saunia ai e le Tama Faalelagi se ala mo i tatou e salamo ai ina ia mafai ona tatou toe foi atu ia te Ia.

O le salamo e aumaia ai le mana o lo tatou Togiola, o Iesu Keriso, i o tatou olaga (tagai Helamana 5:11). A tatou salamo, o le a faamamaina i tatou mai agasala e ala i le taulaga togiola a Iesu Keriso ma le meaalofa o le Agaga Paia (tagai i le 3 Nifae 27:16–20). E ala i le salamo, tatou te lagona ai le olioli. O le ala e toe foi atu ai i lo tatou Tama Faalelagi e tatala mai ia i tatou, aua e alofa mutimutivale o Ia. (Tagai i le “Salamo” le lesona 3.)

Aoao e Savavali i le Faatuatua

O le isi faamoemoega o lenei olaga o le mauaina lea o le poto masani lea e na o le vavaeese mai le Tama Faalelagi e mafai ona oo mai ai. Ona tatou te le vaai ia te Ia, e manaomia ona tatou aoao e savavali i le faatuatua (tagai i le 2 Koronito 5:6–7).

E le’i tuua lava na o i tatou e le Atua i lenei malaga. Na te auina mai le Agaga Paia e taiala, faamalosiau, ma faapaia i tatou. Ua ia saunia foi tusitusiga paia, perofeta, tatalo, ma le talalelei a Iesu Keriso.

O vaega uma o lo tatou aafiaga faaletino—o oliolisaga ma faanoanoaga, o manuia ma mea faalavefau—e mafai ona fesoasoani ia i tatou e tuputupu a’e ai a o tatou saunia e toe foi atu i le Atua.

Suesuega o Tusitusiga Paia

O Se Taimi e Tuputupu A’e ai ma Alualu i Luma

Filifiliga

Lelei ma le Leaga

Moronae 7:12–19

Agasala

E Tatau Ona Tatou Mamā e Faatasi ma le Atua

Aoao Atili e uiga i Lenei Mataupu Faavae

Taiala i Tusitusiga Paia, “Faaletino, Olaga Faitino,” “Puapuaga”
Autu o le Talalelei: “Olaga Faitino,” “Puapuaga”

O Le Togiola a Iesu Keriso

Ona o le Pa’ū o Atamu ma Eva, ua tatou feagai ai uma i le agasala ma le oti. E lē mafai ona tatou faatoilaloina aafiaga o le agasala ma le oti na o i tatou lava. I le ata o le faaolataga a lo tatou Tama Faalelagi, sa Ia saunia ai se ala e faatoilalo ai aafiaga o le Pa’ū ina ia mafai ai ona tatou toe foi atu ia te Ia. A o le’i faavaeina le lalolagi, na Ia filifilia ai Iesu Keriso e avea ma o tatou Faaola ma Togiola.

Ua na o Iesu Keriso lava e mafai ona togiolaina i tatou mai le agasala ma le oti. O Ia o le Alo moni o le Atua. Sa Ia soifua i se olaga e leai se agasala ma sa matuai usiusitai atoatoa i Lona Tama. Sa saunia o Ia ma naunau e faia le finagalo o le Tama Faalelagi.

O le Togiola a le Faaola ua aofia ai Lona puapuagatia i Ketesemane, Lona puapuagatia ma le maliu i luga o le satauro, ma Lona Toetu. Sa puapuagatia o Ia i se tulaga e le mafai ona malamalama i ai—sa matua tafe toto o Ia mai pu afu ninii uma (tagai i le Mataupu Faavae ma Feagaiga 19:18).

O le Togiola a Iesu Keriso o le mea silisili ona maoa’e lea ua tupu i le talafaasolopito o tagata. E ala i Lana taulaga togiola, na faagaoioia ai e Iesu le fuafuaga a le Tama. O le a leai so tatou fesoasoani pe a aunoa ma le Togiola a Iesu Keriso auā e lē mafai ona tatou laveaiina i tatou lava mai le agasala ma le oti (tagai i le Alema 22:12–15).

O le taulaga a lo tatou Faaola o se faailoaga silisili lea o le alofa mo Lona Tama ma mo i tatou. “O le lautele, ma le umi, ma le loloto, ma le maualuga” o le alofa o Keriso e sili atu i lo tatou malamalama (Efeso 3:18; tagai foi i le fuaiupu 19).

Ua Faatoilalo e Iesu Keriso le Oti mo i Tagata Uma

Ina ua maliu Iesu Keriso i luga o le satauro, na tuueseeseina Lona agaga mai Lona tino. O le aso tolu, na toetuufaatasia ai Lona agaga ma Lona tino e le toe tuueseeseina lava. Sa Ia faaali atu i le toatele o tagata, ma faaali atu ai ia i latou ua iai Sona tino e ola pea o aano ma ivi. O lenei toe faatasia o le agaga ma le tino ua ta’ua o le Toetu.

I le avea ai ma tagata soifua, o le a feoti i tatou taitoatasi. Peitai, ona sa manumalo Iesu i le oti, o le a toetutu ai tagata uma e fananau mai i le lalolagi. O le Toetu o se meaalofa paia mo tagata uma, e tuuina mai e ala i le alofa mutimutivale ma le alofa togiola o le Faaola. O le a toe faatasia agaga ma tino o tagata taitoatasi, ma o le a taitasi i tatou ma ola e faavavau i se tino toetu atoatoa. Pe ana leai Iesu Keriso, semanu e faamutaina e le oti le faamoemoe atoa mo se olaga i le lumanai faatasi ma le Tama Faalelagi (tagai i le 2 Nifae 9:8–12).

Ua Faia e Iesu Ia Mafai ona Faamamaina i Tatou mai a Tatou Agasala

Ina ia malamalama i le faamoemoe e mafai ona tatou maua e ala ia Keriso, e manaomia ona tatou malamalama i le tulafono o le faamasinotonu. O le tulafono lē masuia lenei e aumaia ai taunuuga mo a tatou amioga. O le usiusitai i le Atua e aumaia ai taunuuga lelei, ma o le lē usiusitai e aumaia ai ni taunuuga lē lelei. (Tagai i le Alema 32:14–21.) A tatou agasala, tatou te le mama faaleagaga, ma e leai se mea le mama e mafai ona ola i le afioaga o le Atua (tagai i le 3 Nifae 27:19).

Keriso o loo Tatalo i Ketesemane, saunia e Harry Anderson

I le taimi o le taulaga togiola a Iesu Keriso, sa Ia tu ai i lo tatou tulaga, puapuagatia, ma totogi le sala mo a tatou agasala (tagai i le 3 Nifae 27:16–20). O le fuafuaga a le Atua ua tuuina mai ai ia Iesu Keriso le mana e fai ai le puluvaga mo i tatou—e tutu i le va o i tatou ma le faamasinotonu (tagai i le Mosaea 15:9). Ona o le taulaga togiola a Iesu, ua mafai ai e Ia ona maua Ana aia tatau o le alofa mutimutivale mo i tatou a o tatou faatinoina le faatuatua e salamo ai (tagai i le Moronae 7:27; Mataupu Faavae ma Feagaiga 45:3–5). “O lea e mafai ai e le alofa mutimutivale ona faamalie manaoga o le faamasinotonu, ma siomia ai [i tatou] i lima o le saogalemu” (Alema 34:16).

Ua na o le meaalofa o le Togiola a le Faaola ma lo tatou salamo e mafai ai ona tatou toe foi atu e mau faatasi ma le Atua. A tatou salamo, e faamagaloina i tatou ma faamamaina faaleagaga. O le a aveese mai ma i tatou le avega o le ta’usalaina ona o a tatou agasala. O ō tatou agaga manunu’a o le a faamaloloina. Ua faatumulia i tatou i le olioli (tagai i le Alema 36:24).

E ui tatou te lē atoatoa ma e ono toe toilalo foi, ae e telē atu le alofa tunoa, alofa, ma le alofa mutimutivale ua ia Iesu Keriso nai lo le toilalo, po o le agasala i totonu o i tatou. E saunia pea lava pea ma naunau le Atua e talia i tatou pe a tatou liliu atu ia te Ia ma salamo (tagai i le Luka 15:11–32). E leai se mea po o se tasi “e mafai ona faate’aeseina i tatou mai le alofa o le Atua, o loo ia Keriso Iesu lo tatou Alii” (Roma 8:39).

Sa tauaveina e Iesu Keriso i Ona lava luga a tatou Agasala, Tiga, ma Vaivaiga.

I Lana taulaga togiola, na tauave ai e Iesu Keriso i Ona lava luga o tatou tiga, puapuaga, ma vaivaiga. Ona o lenei mea, ua Ia silafia “e tusa ai ma la le tino le ala e fesoasoani ai i ona tagata e tusa ma o latou vaivaiga” (Alema 7:12; tagai foi i le fuaiupu 11). Ua Ia valaaulia, “O mai ia te au,” ma a o tatou faia, Na te tuuina mai ia i tatou le malologa, faamoemoe, malosi, vaaiga, ma le faamalologa (Mataio 11:28; tagai foi i le fuaiupu 29–30).

A o tatou faalagolago atu ia Iesu Keriso ma LanaTogiola , e mafai ona Ia fesoasoani ia i tatou ina ia tatou onosa’ia o tatou faigata, ma’i, ma tiga. E mafai ona faatumulia i tatou i le olioli, filemu, ma le mafanafana. O mea uma e le talafeagai e uiga i le olaga e mafai ona faasa’oina e ala i le Togiola a Iesu Keriso.

Suesuega o Tusitusiga Paia

O Le Togiola a le Faaola

Toetu

Aoao Atili e uiga i Lenei Mataupu Faavae

Taiala i Tusitusiga Paia: “Iesu Keriso,” “Togiola, Togiola,” “Alofa Tunoa”
Autu o le Talalelei: “Iesu Keriso,” “Togiola a Iesu Keriso,” “Alofa Tunoa”

O Le Lalolagi o Agaga

E toatele tagata e taumanatunatu, “O le a le mea e tupu pe a ou oti?” O le ata o le faaolataga o loo aumaia ai ni tali taua i lenei fesili.

O le oti o se vaega “o le fuafuaga alofa mutimutivale” a le Atua mo i tatou (2 Nifae 9:6). Nai lo le iuga o lo tatou i ai, o le oti o le isi laasaga lea i lo tatou alualu i luma e faavavau. Ina ia mafai ona avea faapei o le Atua, e tatau ona tatou oo i le oti ma mulimuli ane maua ni tino toetutu, atoatoa.

Pe a oti o tatou tino faaletino, e faaauau pea ona ola o tatou agaga i le lalolagi o agaga. O se tulaga le tumau lenei o le aoaoina ma sauniuniga a o le’i oo i le Toetu ma le Faamasinoga Mulimuli. O lo tatou malamalama mai le olaga faitino e tumau pea ia i tatou.

I le lalolagi o agaga, o tagata o e taliaina ma ola i le talalelei a Iesu Keriso “e talia i se nofoaga o le fiafia, lea ua taua o le parataiso” (Alema 40:12). E talia foʻi tamaiti laiti i le parataiso pe a feoti.

O agaga i parataiso o le a maua le filemu mai o latou faafitauli ma faanoanoaga. O le a faaauau pea lo latou tuputupu a’e faaleagaga, faia o le galuega ma le auaunaga a le Atua i isi. O le a latou aoao atu le talalelei ia i latou o e e le’i mauaina i le taimi o lo latou olaga faitino (tagai i le Mataupu Faavae ma Feagaiga 138:32–37, 57–59).

I le lalolagi o agaga, o tagata o e sa le mafai ona talia le talalelei i le lalolagi, po o e na filifili e le mulimuli i poloaiga, o le a oo i ni tapulaa (tagai i le Mataupu Faavae ma Feagaiga 138:6–37; Alema 40:6–14). Peitai, ona o le Atua e tonu ma alofa mutimutivale, o le a latou maua ai se avanoa e aoao atu ai i le talalelei a Iesu Keriso. Afai latou te taliaina ma salamo, o le a togiolaina i latou mai ia latou agasala (tagai i le Mataupu Faavae ma Feagaiga 138:58; tagai foi i le 138:31–35; 128:22). O le a taliaina i latou i le filemu o le parataiso. O le a i’u ina latou maua se nofoaga i se malo o le mamalu e faavae i filifiliga na latou faia i le olaga nei ma i le lalolagi o agaga.

Tatou te tumau ai pea i le lalolagi o agaga seia oo ina tatou toetutu.

Suesuega o Tusitusiga Paia

Aoao Atili e uiga i Lenei Mataupu Faavae

Taiala i Tusitusiga Paia, “Parataiso”

O Le Togiola, Faaolataga, ma le Faaeaga

Toetu

O le fuafuaga a le Atua ua mafai ai e i tatou ona tuputupu a’e ma maua le ola e faavavau. A mavae lo tatou taimi i le lalolagi o agaga, o le Toetu o le isi lea laasaga i lena tuputupu a’e.

O le Toetu o le toe faatasia lea o o tatou tino ma agaga. O le a toetutu i tatou uma taitoatasi. Ua mafai lenei mea ona o le Togiola ma le Toetu o le Faaola. (Tagai i le Alema 11:42–44.)

Pe a tatou toetutu, o le a tofu i tatou ma se tino faaletino atoatoa, e leai se tiga ma se ma’i. O le a tatou ola pea, ola e faavavau.

Faaolataga

Ona o le a tatou toetutu uma, o le a faasaoina i tatou uma—pe maua le faaolataga—mai le oti faaletino. O lenei meaalofa e ala mai i le alofa tunoa o Iesu Keriso.

E mafai foi ona faaolaina i tatou—pe maua le faaolataga—mai taunuuga e manaomia e le tulafono o le faamasinotonu mo a tatou agasala. O lenei meaalofa ua mafai foi ona maua e ala i galuega ma le alofa mutimutivale o Iesu Keriso pe a tatou salamo. (Tagai i le Alema 42:13–15, 21–25.)

Faaeaga

O le faaeaga, po o le ola e faavavau, o le tulaga aupito maualuga lea o le fiafia ma le mamalu i le malo selesitila. O le faaeaga o se meaalofa e i ai tuutuuga. Na aoao mai Peresitene Russell M. Nelson, “O na tulaga agavaa e aofia ai le faatuatua i le Alii, salamo, papatisoga, mauaina o le Agaga Paia, ma tumau faamaoni i sauniga ma feagaiga o le malumalu” (“Faaolataga ma le Faaeaga,” Liahona, Me 2008, 9).

O le faaeaina o lona uiga o le mau faatasi e faavavau ma le Atua o ni aiga e faavavau. O le iloaina lea o le Atua ma Iesu Keriso, avea faapei o i Laua, ma oo i le olaga o loo La olioli ai.

Suesuega o Tusitusiga Paia

Aoao Atili e uiga i Lenei Mataupu Faavae

Taiala i Tusitusiga Paia, “Toetu”
Autu o le Talalelei: “Toetu,” “Faaolataga”

Faamasinoga ma Malo o le Mamalu

Manatua: Pe a aoao muamua atu e uiga i malo o le mamalu, aoao atu i se tulaga autu e tusa ai ma manaoga ma le malamalama o se tagata.

A tatou toetutu, o le a avea Iesu Keriso ma o tatou faamasino amiotonu ma le alofa mutimutivale. Se’i vagana ai nai vaega laiti, o le a tofu maua e i tatou taitoatasi se nofoaga i se malo o le mamalu. E ui o le a tatou toetutu uma, ae o le a tatou le maua uma le mamalu e faavavau e tasi (tagai i le Mataupu Faavae ma Feagaiga 88:22–24, 29–34; 130:20–21; 132:5).

O tagata taitoatasi e le’i maua le avanoa e malamalama atoatoa ai ma usitai i tulafono a le Atua i le taimi o lo latou olaga faitino, o le a tuuina atu i ai lena avanoa i le lalolagi o agaga. O le a faamasinoina e Iesu tagata taitoatasi e tusa ai ma lona faatuatua, galuega, manaoga, ma le salamo i le olaga nei ma i le lalolagi o agaga (tagai i le Mataupu Faavae ma Feagaiga 138:32–34, 57–59).

Ua aoao mai tusitusiga paia e uiga i malo o le mamalu o selesitila, terasitila, ma le telesitila. O i latou taitoatasi o se faaaliga o le alofa, faamasinotonu, ma le alofa mutimutivale o le Atua.

O i latou o e faatinoina le faatuatua ia Keriso, salamo i a latou agasala, maua sauniga o le talalelei, tausia a latou feagaiga, maua le Agaga Paia, ma tumau e oo i le iuga o le a faaolaina i le malo selesitila. O lenei malo o le a aofia ai foi tagata o e sa le’i maua le avanoa e talia ai le talalelei i le taimi o lo latou olaga faaletino ae “semanu e taliaina ma o latou loto atoa” ma faia i le lalolagi o agaga (Mataupu Faavae ma Feagaiga 137:8; tagai foi i le fuaiupu 7). O fanau na maliliu a o le’i oo i tausaga e tali atu ai mo i latou lava (valu tausaga le matutua) o le a faasaoina foi i le malo selesitila (tagai i le Mataupu Faavae ma Feagaiga 137:10).

I tusitusiga paia, o le malo selesitila e faatusa i le mamalu po o le pupula o le la. (Tagai i le Mataupu Faavae ma Feagaiga 76:50–70.)

O tagata sa ola i ni olaga faamamaluina “o e sa le’i mauaina le molimau ia Iesu i la le tino, ae mulimuli ane taliaina” o le a maua se nofoaga i le malo terasitila (Mataupu Faavae ma Feagaiga 76:74). E faapena foi ona moni mo i latou o e sa le’i totoa i a latou molimau ia Iesu. O lenei malo ua faatusaina lea i le mamalu o le masina. (Tagai i le Mataupu Faavae ma Feagaiga 76:71–80.)

O i latou o e faaauau pea i a latou agasala ma e le’i salamo i lenei olaga pe talia le talalelei a Iesu Keriso i le lalolagi o agaga o le a mauaina lo latou taui i le malo telesitila. O lenei malo ua faatusaina lea i le mamalu o fetu. (Tagai i le Mataupu Faavae ma Feagaiga 76:40–43.)

Suesuega o Tusitusiga Paia

Aoao Atili e uiga i Lenei Mataupu Faavae

Taiala i Tusitusiga Paia, “Faamasino, Faamasinoga,” “Malo o le Mamalu”

Otootoga o Lesona Pupuu ma Feololo

O le otootoga o i lalo o se faataitaiga o mea e mafai ona e aoao atu i se tasi pe afai e na o sina taimi puupuu e te maua ai. Pe a faaaogaina lenei otootoga, filifili se mataupu faavae se tasi pe sili atu e aoao atu. O le faavae faaleaoaoga faavae mo mataupu faavae taitasi o loo tuuina atu i le amataga o le lesona.

A o e aoao atu, fai atu fesili ma faalogo. Tuuina atu valaaulia lea o le a fesoasoani i tagata e aoao ai pe faapefea ona ola latalata atili i le Atua. O se tasi o valaaulia taua e mo le tagata e toe feiloai ai ma oe. O le umi o le lesona o le a faalagolago i fesili e te fesili ai ma le faalogo o loo e faia.

O Mea e Mafai Ona E Aoao Atu i Tagata i le 3–10 Minute

O i tatou uma lava o fanau agaga a le Atua. O i tatou o tagata o Lona aiga. Na te silafia ma alofa ia te i tatou taitoatasi.
Ua saunia e le Atua se fuafuaga mo lo tatou fiafia ma le alualu i luma i lenei olaga ma i le faavavau.
I le fuafuaga a le Atua, sa manaomia ona tatou o mai i le lalolagi ia maua ni tino faaletino, aoao, ma tuputupu a’e.
O Iesu Keriso e totonugalemu i le fuafuaga a le Atua. Ua Ia faia ia mafai e i tatou ona maua le ola e faavavau.
I lalo o le taitaiga a le Atua, na foafoaina ai e Iesu le lalolagi.
O o tatou aafiaga i le lalolagi ua faamoemoe e fesoasoani ia i tatou e saunia ai e toe foi atu i le afioaga o le Atua.
O i tatou taitoatasi e agasala, ma o le a feoti uma i tatou taitoatasi. Ona e alofa le Atua ia i tatou, na Ia auina mai ai Lona Alo, o Iesu Keriso, i le lalolagi e togiola i tatou mai le agasala ma le oti.
O mea uma e le talafeagai e uiga i le olaga e mafai ona faasa’oina e ala i le Togiola a Iesu Keriso.
Pe a oti o tatou tino faaletino, e faaauau pea ona ola o tatou agaga. Mulimuli ane o le a tatou toetutu uma. O lona uiga o le a toe faatasia le agaga ma le tino o tagata taitoatasi, ma o le a tatou ola e faavavau i se tino toetu atoatoa.
Pe a tatou toetutu, o le a avea Iesu Keriso ma o tatou faamasino. Vagana ai nai vaega laiti lava, o le a maua e fanau uma a le Atua se nofoaga i se malo o le mamalu. E mafai ona tatou toe foi atu e nonofo i le afioaga o le Atua pe afai tatou te faamaoni.