Wase 3: Lesoni 4

Yaco Mo Tisaipeli i Jisu Karisito ena Nomu Bula Taucoko

Na Vakatavulici ni Lesoni Oqo

Na papitaiso e dua na cakacaka vakalotu rekitaki ni inuinui. Ni keda papitaiso, eda vakaraitaka kina na noda gadreva me muria na Kalou ka lakova na salatu ka tuberi keda ki na bula tawamudu. Eda vakaraitaka tale ga kina na noda yalayala meda yaco me tisaipeli i Jisu Karisito ena noda bula taucoko.

Na lesoni oqo e tuvai me salavata kei na veiyalayalati eda a cakava ena papitaiso. E okati kina na veiwase lelevu ka koto e ra, ka tiko e na kedra iwasewase lalai yadua:

• Na Noda Veiyalayalati Me Lomasoli me Taura vei Keda na Yaca i Jisu Karisito

• Na Noda Veiyalayalati meda Muria na iVakaro ni Kalou

• Noda Veiyalayalati meda Qarava na Kalou kei Ira na Tani

• Noda Veiyalayalati meda Vosota ki na iVakataotioti

Vukei ira na tamata me matata vei ira ni ivakavuvuli kei na ivakaro o vakavulica era tiki ni veiyalayalati era na vakayacora ena papitaiso. Vakaraitaka vei ira na sala ena vukei ira kina na lesoni oqo mera “lako mai vei Karisito … ka vakaivotavota ena nona veivakabulai” (Omanai 1:26; raica tale ga na 1 Nifai 15:14).

Ona vinakata mo vakatavulica na lesoni oqo ena loma ni vica vata na veisiko. E dodonu me dau vakavudua sara na kena sivia na 30 na miniti na veisiko ni veivakatavulici. Ena vinaka cake sara na veisiko leleka, ka vakawasoma ka kovuta na iwasewase lalai ni veika me vulici.

Tuvana na ka ko na vakatavulica, na gauna ko na vakavulica kina, kei na balavu ni gauna ko na taura. Vakasamataka na nodra gagadre o ira o vakavulici ira tiko, ka qara na veidusimaki ni Yalo. Sa tiko vei iko na galala mo veivakavulici ena sala vinaka duadua me vukei ira na tamata mera vakavakarau ki na nodra papitaiso kei na vakadeitaki.

Eso na iwase ena lesoni oqo e tiko kina eso na veisureti vakatabakidua. Vaqara na veivakayarayarataki ni ko vakatulewataka na sala kei na gauna mo vakatetea kina na veisureti. Mo dau nanuma na ivakatagedegede ni kila-ka ni tamata yadua. Vukei koya me bulataka na kosipeli vakalalai ena dua na gauna.

Na Noda Veiyalayalati Me Lomasoli me Taura vei Keda na Yaca i Jisu Karisito

Ni keda papitaiso, eda veiyalayalati meda muri Jisu Karisito “ena lomada taucoko.” Eda vakadinadinataka tale ga “ ni eda sa lomasoli meda taura vei [keda] na yaca i Karisito” (2 Nifai 31:13; raica tale ga na Vunau kei na Veiyalayalati 20:37).

Na noda taura vei keda na yacai Jisu Karisito e kena ibalebale ni keda dau nanumi Koya ka tovolea me bula vaka Nona tisaipeli tudei. Eda vakatara na Nona rarama me cila yani vei ira na tani mai vei keda. Eda okati keda meda Nona ka vakaliuci Koya taumada ena noda bula.

Na veiwasewase ka koto e ra e vakamacalataka e rua na sala eda dau nanumi Jisu Karisito ka muri Koya kina.

Masu Wasoma

Na masu e rawa ni dua na veitalanoa rawarawa kei Tamada Vakalomalagi ka vakaraitaka kina na veika eda vakila dina. Ena masu, eda vosa ena noda dolavi keda vei Koya ena yalodina. Eda vakaraitaka na noda loloma vei Koya kei na vakavinavinaka ena noda vakalougatataki. Eda dau kerea talega na veivuke, veitaqomaki, kei na veidusimaki. Ni keda tinia noda masu, e dodonu meda taura na gauna me wawa ka vakarorogo.

E vakavuvulitaka ko Jisu, “O koya moni dau masu tikoga vua na Tamada ena yacaqu” (3 Nifai 18:19, vakabibitaki na ikuri; raica tale ga na Mosese 5:8). Ni keda masu ena yaca i Jisu Karisito, eda nanumi Koya kina kei na Tamada Vakalomalagi.

O Jisu sa vakarautaka na ivakaraitaki vei keda meda muria ni keda masu. Eda na rawa ni kila e levu na ka me baleta na masu ni keda vulica na nona masu na iVakabula ena ivolanikalou (raica na Maciu 6:9–13; Joni 17).

Na noda masu e rawa ni okati kina na veitikina oqo:

• Tekivu ena nomu vosa vua na Tamada Vakalomalagi.

• Eda vakaraitaka na veika eda vakila e lomada, me vaka na vakavinavinakataki ni veivakalougatataki eda sa ciqoma.

• Vakatataro, qara na veidusimaki, ka kerea na veivakalougatataki.

• Tinia ena nomu cavuta, “Ena yaca i Jisu Karisito, emeni.”

Na ivolanikalou e vakadreti keda meda masu ena mataka vakakina ena yakavi. Ia, e rawa ni ko masu ena gauna cava ga kei na ituvaki cava ga. Ena noda masu vakataki keda se vakamatavuvale ena vakaibalebale cake meda tekiduru ka masu. E dodonu meda na dau masu tiko ga e lomada. (Raica na Alama 34:27; 37:36–37; 3 Nifai 17:13; 19:16.)

E dodonu meda dau veinanumi ni keda masu ka cavuta na veika eda vakila dina. Ni keda masu, e dodonu meda levea noda tokaruataka tiko edua tiko ga na ka.

Eda masu ena vakabauta, yalodina, kei na gagadre dina meda cakacakataka na isau ni masu eda ciqoma. Ni keda kitaka vakakina, na Kalou ena dusimaki keda ka vukei keda meda vakayacora na digidigi vinaka. Eda na vakila ni da voleka vei Koya. Ena solia vei keda o Koya na kila-ka kei na dina. Ena vakalougatataki keda o Koya ena veivakacegui, vakacegu kei na kaukauwa.

Vuli iVolanikalou

• 2 Nifai 32:8–9

• Inosi 1:1–12

• Alama 6:6; 13:28; 34:17–28; 37:36–37

• 3 Nifai 18:20

• Moronai 10:3–5

• Vunau kei na Veiyalayalati 6:22–23; 8:2–3; 9:7–9; 10:5; 19:28; 42:14

Vulica Vakalevu baleta na iVakavuvuli Oqo

• iDusidusi ki na iVolanikalou, “Masu.”

• Bible Dictionary: “Prayer”

• Gospel Topics: “Prayer”

Veisureti

Ona dau masu beka e veisiga vua na Tamada Vakalomalagi?

Vulica na iVolanikalou

A vakavulica o Nifai, “Mo dou kana magiti ena vosa i Karisito; ia raica, na vosa i Karisito [ena] tukuna vei kemudou na veika kece mo dou kitaka” (2 Nephi 32:3; raica tale ga na 31:20).

Na vulici ni ivolanikalou e dua na sala bibi ni nanumi ka muri ko Jisu Karisito. Ena ivolanikalou eda vulica kina na veika me baleta na Nona bula, ilesilesi, kei na ivakavuvuli. Eda vulica tale ga kina na Nona yalayala. Ni keda wilika na ivolanikalou, eda vakila na Nona loloma. E tubu na yaloda, e vakalevutaki na noda vakabauti Koya, ka vakararamataki na noda vakasama. E vaqaqacotaki na noda ivakadinadina me baleta na Nona ilesilesi vakalou.

Eda nanumi Jisu ka muri Koya ena gauna eda bulataka kina na Nona vosa. E dodonu meda vulica na ivolanikalou e veisiga, vakabibi na iVola i Momani.

Na ivolanikalou Ni Lotu i Jisu Karisito ni Yalododonu Edaidai sai ira na iVola Tabu, iVola i Momani, Vunau kei na Veiyalayalati, kei na Mataniciva Talei. Na ivola oqo era vakatokai me “ivolayavu ni cakacaka.”

Vuli iVolanikalou

• 1 Nifai 19:22–23

• 2 Nifai 9:50–51; 25:26; 29:1–13; 31:19–20; 32:3

• Alama 32:28–30

• Vunau kei na Veiyalayalati 1:37–38; 18:34–36

• Joni 20:31

• 2 Timoci 3:14–17

• 2 Pita 1:20–21

Vulica Vakalevu baleta na iVakavuvuli Oqo

• iDusidusi ki na iVolanikalou, “iVolanikalou”

• Gospel Topics: “Scriptures”

Veisureti

Ona dau wilika beka na ivolanikalou e veisiga? (Vakasamataka mo sureta na tamata mera wilika eso na iwase digitaki.)

Na Noda Veiyalayalati meda Muria na iVakaro ni Kalou

Me kilai: E tiko e vuqa na sala me vakavulici kina na ivakaro ena iwase oqo. Me ivakaraitaki, ena rawa nio vakatavulici ira ena vica ga na veisiko. Se rawa ni ko vakavulica eso vei ira me tiki ni imatai ni tolu na lesoni. Ni vakavulici na ivakaro, mo nanuma mo semati ira ki na veiyalayalati ni papitaiso kei na yavu ni veivakabulai.

Ni keda papitaiso, eda veiyalayalati kei na Kalou ni keda na “muria na nona ivakaro” (Mosaia 18:10; Alama 7:15).

Na Kalou sa solia vei keda na ivakaro baleta o Koya e lomani keda. E vinakata o Koya me noda na veika uasivi duadua, ena gauna oqo kei na veigauna tawamudu. Me vaka ni Tamada Vakalomalagi, o Koya e kila vinaka na ka eda gadreva me baleta na noda tiko vinaka vakayalo ka vakayago tale ga. E kila tale ga o Koya na ka ena kauta mai vei keda na marau cecere duadua. Na ivakaro yadua e isolisoli vakalou, ka soli mai me dusimaka na noda vakatulewa, taqomaki keda, ka vukei keda meda tubu cake.

E dua na vu ni noda mai bula e vuravura sai koya meda vuli ka tubu ena vakayagataki vakavuku ni noda galala ni digidigi (raica na Eparaama 3:25). Noda digitaka me muria na ivakaro ni Kalou—ka veivutuni ni keda yaco koso—ena vukei keda meda sokota rawa na ilakolako dredre ni bula vakayago oqo.

Na ivakaro ni Kalou era sa ivurevure ni kaukauwa kei na veivakalougatataki (raica na Vunau kei na Veiyalayalati 82:8–9). Ena noda maroroya na ivakaro, eda vulica kina ni sega ni icolacola bibi ka yalana na noda galala. Na galala dina e yaco mai ni keda talairawarawa ki na ivakaro. Na talairawarawa e ivurevure ni kaukauwa ka kauta mai vei keda na rarama kei na kila-ka mai vua na Yalo Tabu. E vakalevutaki cake na noda marau ka vukei keda meda yacova na noda itutu vakalou sai koya ni keda luve ni Kalou.

Na Kalou e yalataka me vakalougatataki keda ni keda muria na Nona ivakaro. Eso na veivakalougatataki e vakatabakidua ga ki na so na ivakaro. Na ulu ni Nona veivakalougatataki sai koya na sautu ena bula oqo kei na bula tawamudu ena vuravura se bera mai. (Raica na Mosaia 2:41; Alama 7:16; Vunau kei na Veiyalayalati 14:7; 59:23; 93:28; 130:20–21.)

Na veivakalougatataki ni Kalou e vakayalo ka vakayago tale ga. So na gauna, ena gadrevi meda vosota ni keda waraki ira, ka nuitaka ni ira na yaco mai me vaka na Nona lewa kei na Nona gauna (raica na Mosaia 7:33; Vunau kei na Veiyalayalati 88:68). Me kilai eso na veivakalougatataki, ena gadrevi meda yadra tiko vakayalo ka yadrava vinaka na veika e yaco tiko. Oqo e dina sara me baleta na veivakalougatataki era yaco mai ena vei sala rawarawa ka vaka me dau matau tu ga.

Eso na veivakalougatataki e dau qai kilai ga ni sa yaco oti. Eso ena sega beka ni yaco me yacova ni sa oti na bula oqo. Se mani vakacava na gauna kei na ituvaki ni veivakalougatataki ni Kalou, eda rawa ni vakadeitaka ni ira na yaco mai ni keda sasaga me bulataka na kosipeli i Jisu Karisito (raica na Vunau kei na Veiyalayalati 82:10).

Na Kalou e lomani ira vakataucoko na Luvena. Edau vosoti keda vakadede ena noda malumalumu, ka dau vosoti keda ni keda veivutuni.

Na iVakaro Levu e Rua

Ni a tarogi o Jisu, se “Cava na ivakaro levu duadua?” Ea sauma “Mo lomani Jiova na nomu Kalou ena lomamu taucoko, ena yalomu taucoko, kei na nomu nanuma kecega.”

A qai kaya o Jisu na kena ikarua sa vaka na kena imatai: “Mo lomana na kai nomu me vaka ko lomani iko” (Maciu 22:36–39). “Sa sega edua na ivakaro sa uasivi ena ivakaro ruarua oqo” (Marika 12:31).

Ni keda luve ni Kalou vakayalo, sa rawa kina vei keda meda dauloloma vakalevu sara. E tiki ni noda ivotavota vakayalo. Na bulataki ni ivunau levu e rua—me lomani taumada na Kalou ka lomani ira na wekada—e itovo era kilai tani kina o ira na tisaipeli i Jisu Karisito.

Na loloma ni Kalou

E tu e vuqa na sala eda rawa ni vakaraitaka kina na noda loloma vua na Kalou. E rawa ni keda muria na Nona ivakaro (raica na Joni 14:15, 21). E rawa ni keda vakaliuci Koya ena noda bula, ka vakamalumalumutaka na yaloda Vua. E rawa ni keda yavutaka na noda gagadre, vakanananu kei na lomada vei Koya (raica na Alama 37:36). E rawa ni keda bula ena vakavinavinaka ena vuku ni veivakalougatataki e solia vei keda—ka lomasoli ni wasea na veivakalougatataki oqori (raica na Mosaia 2:21–24; 4:16–21). Ena masu kei na veiqaravi vei ira na tani, eda rawa ni vakaraitaka ka vakatitobutaka kina na noda loloma vei Koya.

Me vakataki ira na ivakaro tale eso, na ivakaro meda lomana na Kalou ena yaga ga vei keda. Na ka eda lomana ena vakatulewataka na ka eda vakasaqara. Na ka eda vakasaqara ena vakatulewataka na ka eda vakananuma ka vakayacora. Kei na ka eda nanuma ka cakava ena vakatulewataka se o cei o keda—ka o cei eda na yaco me vakataka.

Na Lomani Ira na Tani

Na lomani ira na tani edua na isema ni noda loloma vua na Kalou. Na iVakabula e vakavulica vei keda e vuqa na sala meda lomani ira kina na tani (raica, me ivakaraitaki na Luke 10:25–37 kei na Maciu 25:31–46). Eda dolele yani ka ciqomi ira ki yaloda kei na noda bula. Eda loloma ni keda veiqaravi—ena noda soli keda yani ena veisala lalai eso. Eda lomani ira na tani ena noda vakalougatataki ira ena isolisoli e solia vei keda na Kalou.

Na lomani ira na tani e okati kina na dauvosota, yalololoma, kei na yalodina. E okati kina na veivosoti sega ni yalani. E kena ibalebale na noda rokovi ira na tamata kecega.

Ni keda lomana e dua, o keda kei na tamata oya e na vakalougatataki ruarua. Ena tubu na lomada, ena vakaibalebale cake na noda bula, ka na vakalevutaki cake na noda reki.

Veivakalougatataki

Na ivakaro levu erua—meda lomana na Kalou ka lomani ira na wekada—erau yavu ni ivakaro kece ni Kalou (raica na Maciu 22:40). Ni keda lomana taumada na Kalou, ka lomani ira tale ga na tani, na veika kece e noda bula ena toso ki na kena vanua donu. Na loloma oqo ena vakayaco ka ki na noda rai, na vakayagataki ni noda gauna, na vakasaqarai ni veika eda taleitaka, kei nai tuvatuva ni veika meda vakaliuca.

Vulici ni iVolanikalou

• 2 Nifai 31:20

• Mosaia 2–5

• Moronai 7:45–48; 10:32

• Maciu 22:36–40; 25:31–46

• Marika 12:28–33

• Luke 10:25–37

• Joni 13:34–35; 14:15, 21

• 1 Joni 4:7–8, 20–21; 5:3

• Josua 22:5

Vulica Vakalevu baleta na iVakavuvuli Oqo

• iDusidusi ki na iVolanikalou: “Loloma Uasivi,” “Loloma”

• Gospel Topics: “Charity,” “Love”

Muria na Parofita

Na Kalou edau kacivi ira na parofita mera matataki Koya e vuravura. Na Kalou e vakatakila na dina ka solia na veidusimaki kei na ivakasala, mai vei ira na Nona parofita.

Na Kalou a kacivi Josefa Simici me imatai ni parofita ena iotioti ni gauna oqo (raica na lesoni 1). O ira na taravi Josefa Simici mai era a kacivi vakakina mai vua na Kalou me liutaka na Nona Lotu, ka oka kina na parofita ka veiliutaki tiko nikua. E dodonu meda rawata e dua na ivakadinadina ni nodra kacivi vakalou na parofita bula ka muria na nodra ivakavuvuli.

Na nodra ivakavuvuli na parofita bula kei na iApositolo e vakarautaka e dua na ivakadei ni dina tawamudu ena dua na vuravura e veiveisau na kena yavunibula. Ni keda muri ira na parofita ni Kalou, ena sega ni rawai keda na veilecayaki kei na duiyaloyalo ka tu e vuravura. Eda na kunea na reki e vakaikuritaki ena bula oqo ka ciqoma na veidusimaki me baleta na tiki ni noda ilakolako tawamudu oqo.

Vuli iVolanikalou

• Mosaia 15:11–12

• 3 Nifai 12:1–2

• Vunau kei na Veiyalayalati 1:4, 37–38; 21:1–7; 136:37–38

• Cakacaka 10:34–43

• Efeso 2:19–20; 4:11–14

• Emosi 3:7

Vulica Vakalevu baleta na iVakavuvuli Oqo

• iDusidusi ki na iVolanikalou: “Parofita,” “Parofita Yalewa,” “Daurairai, Parofisai”

• Gospel Topics: “Prophets,” “Prophecy”

Veisureti

O na muria beka na nona ivakasala na noda parofita bula?

Taro ni Veivakatarogi ni Papitaiso E Veiganiti

O vakabauta li ni [o Peresitedi ni Lotu oqo] e dua na parofita ni Kalou? Na cava na kena ibalebale oqo vei iko?

Muria na iVakaro e Tini

Na Kalou a vakatakila vua e dua na parofita ni gauna makawa ka yacana o Mosese na iVakaro e Tini mera dusimaki kina na Nona tamata. Na vei ivakaro oqo era se yaga tale tiko ga vei keda nikua. Era vakavulici keda meda sokalou ka vakaraitaka noda rokova na Kalou. Era vakavulica talega vei keda na itovo meda vakarautaka vei keda vakai keda.

• “Me kakua vei iko na kalou tani” (Na Lako Yani 20:3). Na “kalou” tani e rawa ni okati kina e vuqa na ka, me vaka na ka eda taukena, kaukauwa, se nai rogorogo.

• “Mo kakua ni cakava vei iko e dua na matakau ceuceu” (Na Lako Yani 20:4).

• “Mo kakua ni cavuta wale na yaca i Jiova na nomu Kalou” (Na Lako Yani 20:7).

• “Mo nanuma na siga ni vakacecegu mo vakatabuya” (Na Lako Yani 20:8).

• “Mo vakarokorokotaki rau na tamamu kei na tinamu” (Na Lako Yani 20:12).

• “Mo kakua ni laba” (Na Lako Yani 20:13).

• “Mo kakua ni ia na veibutakoci” (Na Lako Yani 20:14).

• “Mo kakua ni butako” (Na Lako Yani 20:15).

• “Mo kakua ni beitaka vakailasu na kai nomu” (Lako Yani 20:16).

• “Mo kakua ni dau kocokoco” (Na Lako Yani 20:17).

Veivakararamataki ni Veivakavulici; E Sega Tale na Kalou Koi Au Ga

Na tamata ena vuqa na vanua era qarava na veika eso ka vakananumi ira me baleta na Kalou se o ira nodra qase eliu. So na gauna na veika oqori, me vaka na matakau, ivakatakilakila vakalotu, se valenisokalou lalai, e rawa talega ni vanua e vakanamata kina na nodra sokalou. Vukei ira o vakavulica me vakanamata na nodra vakabauta kei na sokalou vua na Tamada Vakalomalagi kei Jisu Karisito.

Vulici ni iVolanikalou

• Mosaia 13:11–24

• Vunau kei na Veiyalayalati 35:24; 59:5–6

• Na Lako Yani 20:1–17

• Vakarua 5:6–21

Vulica Vakalevu baleta na iVakavuvuli Oqo

• iDusidusi ki na iVolanikalou, “iVakaro e Tini, Na”

• Gospel Topics: “Ten Commandments”

Veisureti

O na muria beka na iVakaro e Tini?

Bulataka na Lawa ni Tiko Savasava

Na lawa ni tiko savasava e tiki bibi ni ituvatuva ni Kalou me baleta na noda vakabulai kei na bula vakacerecerei. Na nodrau veiyacovi e dua na veiwatini sa ilesilesi mai vua na Kalou mera vakatuburi kina na gone ka ivakaraitaki ni veilomani ena loma ni vakawati. Na yalo ni veidomoni oqo kei na kaukauwa ni vakatubu kawa erau sa nakiti me ka totoka ka tabu.

Na lawa ni tiko savasava ni Kalou sai koya na vakuwai ni veiyacovi ena taudaku ni nodrau vakamau vakalawa edua na tagane kei na dua na yalewa. Na lawa oqo e kena ibalebale tale ga na yalodina kei na veidinadinati ki vua na watina ni oti na vakamau.

Me vukei keda meda muria na lawa ni tiko savasava, o ira na parofita era sa vakasalataki keda me savasava na noda vakanananu kei na noda vosa. E dodonu meda levea na sara iyaloyalo vakasisila ena kena ituvaki cava ga. Ni muri na lawa ni tiko savasava, e dodonu me rakorako na noda itovo kei na keda irairai.

O ira era vakarau papitaiso mera na bulataka na lawa ni tiko savasava.

Veivutuni kei na Veivosoti

E mata ni Kalou, na voroki ni lawa ni tiko savasava e rui bibi sara (raica Na Lako Yani 20:14; Efeso 5:3). E vakayagataki cala kina na kaukauwa tabu ni vakatubu kawa e solia o Koya. Ia e lomani keda tikoga kevaka mada ga eda sa voroka na lawa oqo. E sureti keda o Koya meda veivutuni ka vakasavasavataki ena isoro ni veivakaduavataki i Jisu Karisito. Na mosi ni ivalavala ca ena rawa ni vakaisosomitaki ena vakacegu kamikamica ni veivosoti ni Kalou (raica na Vunau kei na Veiyalayalati 58:42–43).

Veivakalougatataki

E solia vei keda na Kalou na lawa ni tiko savasava me vakalougatataki keda kina kei ira na luvena vakayalo e talai ira mai ki vuravura. Na muri ni lawa oqo e gadrevi me na rawati kina na vakacegu vua na tamata yadua ka me tiko na loloma, veivakabauti kei na duavata ena noda veiwekani vakavuvale.

Ni keda bulataka na lawa ni tiko savasava, eda na taqomaki mai na mavoa vakayalo ka dau yaco ena vuku ni veiyacovi e vakayacori e taudaku ni vakawati. Eda na levea na leqa vakayalo ka vakayago tale ga ka ra dau salavata mai kei na veiwekani vakaoqo. Eda na tubu na noda yalodei e mata ni Kalou (raica na Vunau kei na Veiyalayalati 121:45). Ena tadola vakalevu cake na yaloda ki na veivakayarayarataki ni Yalo Tabu. Eda na vakavakarau vakavinaka cake meda caka veiyalayalati tabu e valetabu ka na cokota vata na noda matavuvale ki na tawamudu.

Veisa Erau Tiko Vata Tiko

Erua ka rau tiko vata e taudaku ni vakamau vakalawa ni dua na tagane kei na yalewa me rau na kua ni papitaisotaki me yacova ni rau sa bulataka na lawa ni tiko savasava. Oqo e kena ibalebale me rau sa kakua ni tiko vata—se rau tagane se yalewa vata—se vei rau edua na tagane kei na dua na yalewa, e kena ibalebale me rau na vakamau. Oqo e oka kina na cakacakataki ni vakabauta ki na veivutuni me vaka e vakamacalataki ena Vunau kei na Veiyalayalati 20:37. Na nodrau vakamau edua na tagane kei na dua na yalewa sa tiki bibi ni Nona ituvatuva na Kalou.

Na veisureti me bulataki na lawa ni tiko savasava e rawa ni solia eso na bolebole dredre sara vei ira eso na tamata ko vakavulica tiko. Ena yalo ni masumasu, dau kauwai ki na ituvaki ni tamata vakayadua. Mo muria na veivakauqeti ni Yalotabu ni ko veivakavulici. Dau qaqarauni ka kua ni veitalanoataka eso na veika matailalai. Ke gadrevi, taro ivakasala vua na nomu peresitedi ni kaulotu me baleta eso na ituvaki matalia.

Vulici ni iVolanikalou

• 3 Nifai 12:27–30

• Vunau kei na Veiyalayalati 42:22; 59:6; 63:16

• Maciu 5:27–28

• Efeso 5:3-5

Vulica Vakalevu baleta na iVakavuvuli Oqo

• iDusidusi ki na iVolanikalou, “Bula savasava”

• Gospel Topics: “Chastity”

Veisureti

Ona saga beka mo savasava vakayalo ena nomu vakasama kei na itovo? O na bulataka beka na lawa ni tiko savasava?

Taro ni Veivakatarogi ni Papitaiso e Veiganiti

• Na cava o kila me baleta na lawa ni tiko savasava, ka sega ni vakatara na veiyacovi ena taudaku ni ivau ni vakamau vakalawa ni dua na tagane kei na dua na yalewa? Ko sa vakadonuya mo talairawarawa ki na lawa oqo ni bera kei na oti ni nomu papitaiso?

• O sa bau vakaitavi beka ena dua na vakalutu? [Me Kilai: E dua na tamata e vaka-io ki na taro oqo e dodonu me na vakatarogi mai vei peresitedi ni kaulotu se dua na daunivakasala e lesi ni bera ni papitaiso.]

Maroroya na Lawa ni iKatini

E dua na veivakalougatataki ni lewena na Lotu sai koya na madigi ni soli ikatini. Ni keda soli ikatini, eda veivuke ena vakatetei ni cakacaka ni Kalou ka vakalougatataki ira na Luvena.

Na lawa ni ikatini a tekivu mai na gauna ni Veiyalayalati Makawa. Me ivakaraitaki, na parofita o Eparaama a sauma na ikatini ni ka kecega e a taukena (raica na Alama 13:15; Vakatekivu 14:18–20).

Na vosa na ikatini e kena ibalebale na dua-na-ikatini. Ni keda soli ikatini, eda solia edua na ikatini ni ka eda rawata ki na Lotu (raica na Vunau kei na Veiyalayalati 119:3–4; na ka eda rawata e kena ibalebale na keda isau). Na veika kece eda taukena e isolisoli maivua na Kalou. Ni keda soli ikatini, eda vakaraitaka na noda vakavinavinaka vei Koya ena noda solia lesu edua na tiki ni ivotavota ka solia mai o Koya vei keda.

Na soli ikatini sa ivakaraitaki ni vakabauta. Edua tale ga na sala me rokovi kina na Kalou. Ko Jisu a vakavulica ni dodonu meda “vakasaqara … taumada na matanitu ni Kalou” (Maciu 6:33), kei na soli ikatini edua na sala ni kena vakayacori oya.

Vakayagataki ni iLavo ni iKatini

Na ilavo ni ikatini era sa ka tabu. Eda solia na noda ikatini vua e dua na lewe ni matabisopi, se ena vuqa na vanua eda rawa ni solia ena mona livaliva. Ni ciqoma na matabisopi na ikatini, eratou na vakauta sara ki na valenivolavola liu ni Lotu.

E dua na matabose ka ra lewena na Mataveiliutaki Taumada, na Kuoramu ni iApositolo Le Tinikarua, kei na Matabisopi Vakatulewa era vakatulewataka na sala e vakayagataki kina na ilavo ni ikatini ena cakacaka ni Kalou (raica na Vunau kei na Veiyalayalati 120:1). Na kena vakayagataki era oka kina na:

• Tara kei na maroroi ni valetabu kei na veivalenisoqoni.

• Vakadewataki kei na tabaki ni ivolanikalou.

• Tokona na itaviqaravi kei na cakacaka ni ivavakoso ni Lotu e veivanua.

• Tokona na cakacaka ni kaulotu e vuravura raraba.

• Tokona na cakacaka ni tuva kawa.

• Vakailavotaki ni koronivuli kei na vuli.

Na ikatini e sega ni vakayagataki mera saumi kina na veiliutaki ena Lotu e veivanua. Era soli ira mera veiqaravi ka sega ni saumi kina.

Veivakalougatataki

Ni keda soli ikatini, na Kalou e yalataka na veivakalougatataki ka uasivita sara na ka eda solia. Ena “dolava … na katuba ni lomalagi, ka sovaraka … na veivakalougatataki [meda] sautu dina sara” (Malakai 3:10; raica na tikina e 7–12). Na veivakalougatataki oqo e rawa ni vakayalo ka vakayago tale ga.

Vulici ni iVolanikalou

• Vunau kei na Veiyalayalati 119; 120

• Maciu 6:33

• Iperiu 7:1–2

• Nai Vakatekivu 14:18–20

• Na Vunau ni Soro 27:30–33

• Malakai 3:7–12

Vulica Vakalevu baleta na iVakavuvuli Oqo

• iDusidusi ki na iVolanikalou: “iKatini, Soli iKatini”

• Gospel Topics: “Tithing”

Veisureti

O na rawa beka ni talairawarawa ki na lawa ni ikatini ni oti nomu papitaiso?

Taro ni Veivakatarogi ni Papitaiso E Veiganiti

Na cava o kila me baleta na lawa ni ikatini? O sa lomasoli mo talairawarawa ki na lawa oqo?

Soli iKatini kei na iSolisoli Tale Eso

Vakaraitaka vei ira na lewenilotu vou na ivakarau ni soli ikatini kei na isolisoli eso kivua edua na lewe ni matabisopi (vakayagataki ni fomu ni cau) se ena mona livaliva (raica na donations.ChurchofJesusChrist.org).

Vakamacalataka ni matabisopi kei na dua na vunivola eratou maroroya vinaka na ivolatukutuku ni ikatini kei na isolisoli tale eso. Na itukutuku vakailavo taucoko e dau taqomaki vinaka sara.

Era dau tiko ena veivakatarogi ni ikatini na lewenilotu vata kei bisopi ni voleka ni cava edua na yabaki. Ena bose oqo, era na vakaraitaka na nodra yalodina ki na soli ikatini ka rawa ni ira ciqoma kina edua na ripote ni nodra cau.

Talairawarawa ki na Vosa ni Vuku

Nona Lawa ni Tikobulabula na Turaga

Na yagoda era isolisoli tabu mai vua na Kalou. Eda gadreva vakayadua e dua na yago meda yaco meda vakataki Koya vakalevu cake kina. Na yagoda e rui bibi ka vakatautauvatataki ira kina na ivolanikalou kei na valetabu (raica 1 Korinica 6:19–20).

Na Turaga e vinakata vei keda meda rokova na yagoda. Me vukei keda me cakava oqo, a vakatakila o Koya edua na lawa ni tiko bulabula ka vakatokai na Vosa ni Vuku. Nai vakatakila oqo e vakavulica vei keda na kena laukana na kakana bulabula ka vakuai keda mai na veika ka vakaleqa na yagoda—vakabibi na alakaolo, tavako, kei na gunu katakata (na ti kei na kofi).

Me baleta tiko ga na Vosa ni Vuku, o ira na parofita ni gauna oqo era sa veivakasalataki me kua ni vakayagataki na veika tale eso e veivakaleqai, vakatabui vakalawa, se veivakatotogani. Era sa veivakasalataki tale ga na parofita me kua ni vakasabusabutaki na wainimate ka soli mai vei vuniwai. (Na nomu peresitedi ni kaulotu ena sauma na taro baleta na veika tale eso ena nomu vanua me kua ni vakayagataki.)

Veivakalougatataki

Na Turaga sa vakarautaka na Vosa ni Vuku me baleta na noda tiko vinaka vakayago ka vakayalo tale ga. Sa yalataka o Koya na veivakalougatataki cecere ni keda muria na ivakaro oqo. Na veivakalougatataki oqo e oka kina na bulabula ni yago, vuku, vakalevutaki na kila-ka, kei na veitaqomaki (raica na Vunau kei na Veiyalayalati 89:18–21).

Na talairawarawa ki Na Vosa ni Vuku ena vukei keda meda kila vakavinaka cake na veiuqeti ni Yalo Tabu. E dina ga ni keda vakila kece na bolebole ni bulabula vakayago, na muri ni lawa oqo ena vukei keda me bulabula cake na yagoda, noda vakasama, kei na yaloda.

O ira na vakarau papitaiso mera na muria na Vosa ni Vuku.

Me baleta na veidusimaki mera vukei kina o ira era sotava tiko na veivakatotogani, raica na wase e 10.

Vulici ni iVolanikalou

• Vunau kei na Veiyalayalati 59:15–20; 88:124; 89

• 1 Korinica 6:19–20

Vulica Vakalevu baleta na iVakavuvuli Oqo

• iDusidusi ki na iVolanikalou, “Vosa ni Vuku”

• Gospel Topics: “Health,” “Word of Wisdom”

• Veivuke ni Bula: “Bula Vesuki”

Veisureti

O na muria beka na Vosa ni Vuku?

Taro ni Veivakatarogi ni Papitaiso E Veiganiti

Na cava o kila me baleta na Vosa ni Vuku? O sa vakadonuya mo talairawarawa ki na Vosa ni Vuku ni bera kei na oti ni nomu papitaiso?

Vakatabuya na Siga ni Vakacecegu

Na Siga ni Vakacegu kei na Sokalou

Na Siga ni Vakacecegu e siga vakatabui ka sa biuta vakatikitiki na Kalou vei keda e veimacawa meda cegu mai na noda cakacaka ni veisiga ka sokalou vei Koya. Edua vei ira na iVakaro e Tini ka soli vei Mosese sai koya mo “nanuma na siga ni vakacecegu, mo vakatabuya” (Lako Yani 20:8; raica tale ga na tikina e 9–11).

Ena ivakatakila ni gauna oqo, e vakadeitaka tale na Turaga ni Siga ni Vakacecegu e “siga sa lesi vei iko mo vakacegu kina mai na nomu cakacaka, io mo qaravi koya ga sa Cecere Sara ena gumatua” (Vunau kei na Veiyalayalati 59:10). A tukuna tale ga o Koya ni Siga ni Vakacecegu e dodonu me siga ni reki, masumasu, kei na vakavinavinaka (raica tale ga na tikina e 14–15).

Me tiki ni noda sokalou ena Siga ni Vakacecegu, eda na tiko ena soqoni ni sakaramede e veimacawa. Ena soqoni oqo, eda sokalou kina vua na Kalou ka vakayagataka na sakaramede me vakananumi Jisu Karisito kei na Nona Veisorovaki. Ni keda vakayagataka na sakaramede, eda vakavouya kina na noda veiyalayalati kei na Kalou ka vakaraitaka ni sa lomada meda veivutunitaka na noda ivalavala ca. Na cakacaka vakalotu ni sakaramede sa iusutu ni kena rokovi na Siga ni Vakacecegu.

Ena lotu eda tiko ena veikalasi eso ka da vulica kina e levu tale na ka me baleta na kosipeli i Jisu Karisito. E tubu na noda vakabauta ni keda vulica vata na ivolanikalou. E tubu na noda loloma ni keda veiqaravi ka veivaqaqacotaki vakaikeda.

Me ikuri ni noda vakacegu mai na noda cakacaka ena Siga ni Vakacecegu, e dodonu meda tarovi keda mai na volivoli kei na veika tale eso ka na vakawaletaki kina na siga oya. Eda biuta vakatikitiki na itaviqaravi vakavuravura ka vakanamata na noda vakanananu kei na ivalavala ki na veika vakayalo.

Na Siga ni Caka Vinaka

Na caka vinaka ena siga ni vakacecegu e via tautauvata na kena bibi kei na ka eda sega ni cakava me vakatabui tiko kina. Eda vulica na kosipeli, vaqaqacotaki na vakabauta, tarai cake na veimaliwai, veiqaravi, ka vakaitavi vata kei na matavuvale kei ira na itokani ena itaviqaravi e veilaveti.

Veivakalougatataki

Na vakatabui ni Siga ni Vakacecegu e ivakaraitaki ni yalodina vua na Tamada Vakalomalagi kei Jisu Karisito. Ni keda cakava na noda itavi me salavata kei na nona inaki na Kalou me baleta na siga oya, eda na vakila na reki kei na vakacegu. Eda na vakamamautaki vakayalo ka vakabulabulataki vakayago. Eda na vakila tale ga ni keda voleka vua na Kalou ka vakatitobutaki na noda veiwekani kei na noda iVakabula. Ka eda na qarauni keda vakavinaka cake me “kua ni tauvi keda na duka ni ka vakavuravura” (Vunau kei na Veiyalayalati 59:9). Na Siga ni Vakacecegu ena yaco me “ka e rekitaki” (Aisea 58:13; raica tale ga na tikina e 14).

Vulici ni iVolanikalou

• 3 Nifai 18:1–12

• Vunau kei na Veiyalayalati 59:9–19

• Mosese 3:1–3

• Maciu 12:10–13

• Lako Yani 20:8–11; 31:12–13, 16–17

• Aisea 58:13–14

Vulica Vakalevu baleta na iVakavuvuli Oqo

• Gospel Topics: “Sabbath Day”

• iDusidusi ki na iVolanikalou: “Siga ni Vakacecegu”

Veisureti

• O na rawa beka ni vakatabuya na Siga ni Vakacecegu ka dau tiko ena Lotu e veimacawa?

• O na rawa beka ni segata mo vakayagataka na sakaramede ena yalodina ni oti nomu papitaiso?

• O na rawa beka ni lako vata kei keirau me sota kei na bisopi (se peresitedi ni tabana) ni nodatou ivavakoso ni lotu?

Taro ni Veivakatarogi ni Papitaiso E Veiganiti

Na cava o kila me baleta na vakatabui ni Siga ni Vakacecegu, ka okati kina na vakaivotavota ena sakaramede ena veimacawa kei na nodra qaravi na tani? Ko sa yalorawarawa beka mo talairawarawa ki na vei ivakatagedegede oqo ni bera kei na oti ni nomu papitaiso?

Cakacaka ena Siga ni Vakacecegu

Ena so na gauna era na dau gadrevi na lewenilotu, maivei ira na itaukei ni cakacaka mera cakacaka ena Siga ni Vakacecegu, me sotavi kina na nodra gagadre se na gagadre vakaitikotiko. Ena veituvaki vakaoqo, mera na dau maroroya na lewenilotu na yalo ni rokovi ni Siga ni Vakacecegu ena sala kece e rawa. Era rawa ni taro ivakasala na lewenilotu mai vei ira na nodra iliuliu me baleta na nodra ituvaki.

Muria ka Rokova na Lawa

O ira na Yalo Dodonu Edaidai era vakabauta na talairawarawa ki na lawa ka mera dua na lewenivanua vinaka (raica na Vunau kei na Veiyalayalati 134; Yavu ni Vakabauta 1:12). Era vakauqeti na lewe ni Lotu me ra solia na veiqaravi me vakatorocaketaki kina na nodra itikotiko kei na matanitu. Era sa vakauqeti tale ga mera tutaka na yavunibula savasava ena dua na mata tamata kei na veiliutaki vakamatanitu.

Era sa sureti na lewenilotu mera vakaitavi ena veiliutaki vakamatanitu kei na veika vakapolitiki ka salavata kei na lawa. O ira na lewenilotu era vakaitutu vakamatanitu mera na cakacaka me vaka edua na lewenivanua kauwai, ka sega ni vaka e matataka na Lotu.

Vulici ni iVolanikalou

• Vunau kei na Veiyalayalati 58:21; 134

• Yavu ni Vakabauta 1:12

Vulica Vakalevu baleta na iVakavuvuli Oqo

• “Vakaitavi Vakapolitiki kei na Veika Vakaitikotiko” wase e 38.8 ena iVoladusidusi Raraba

• Gospel Topics: “Citizenship”

Veisureti

O na muria beka na lawa ni matanitu ko tiko kina?

Taro ni Veivakatarogi ni Papitaiso E Veiganiti

O sa cakava oti beka e dua na cala bibi? Kevaka e vakakina, o vakatovolei tiko oqo se o cakacakataka tiko e tuba na kemu itotogi? [Me Kilai: E dua na tamata e vaka-io ki na taro oqo e dodonu me na vakatarogi mai vei peresitedi ni kaulotu se dua na daunivakasala e lesi ni bera ni papitaiso.]

Noda Veiyalayalati meda Qarava na Kalou kei Ira na Tani

Veiqaravi

Ni keda papitaiso, eda veiyalayalati meda qarava na Kalou ka qaravi ira na tani. Nodra qaravi na tani edua vei ira na sala bibi eda qarava kina na Kalou (raica na Mosaia 2:17). Na parofita o Alama a vakavulica vei ira era a via papitaiso ni dodonu mera “lomasoli me colata vata na nodra icolacola, … rarawa vata kei ira sa rarawa … , ka vakacegui ira era sa gadreva na veivakacegui” (Mosaia 18:8–9).

Ni oti toka ga na papitaiso, sa na rawa vei ira na lewenilotu vou mera ciqoma edua na veikacivi mera veiqaravi ena Lotu. Na veikacivi oqo e vakatau ki na tamata yadua ka sega ni saumi. Ni keda ciqomi ira ka veiqaravi vagumatua, eda na tubu ena vakabauta, vakatorocaketaki na taledi, ka vakalougatataki ira na tani.

Edua tale ga na tiki ni noda veiqaravi ena Lotu sai koya meda dua na “turaga veiqaravi” se dua na “marama veiqaravi.” Ena ilesilesi oqo, eda veiqaravi kina vei ira na tamata yadua se matavuvale e lesi vei keda.

Me vaka ni keda tisaipeli i Jisu Karisito, eda na vakaraica na madigi eso meda veiqaravi kina e veisiga. Me vakataki Koya, eda na lako voli “ka daucaka vinaka” (Cakacaka 10:38). Eda veiqaravi vei ira era tiko volekati keda kei ira tale eso ena noda itikotiko raraba. E rawa tale ga ni keda vakaitavi ena madigi ni veiqaravi eso ena JustServe ena vanua e tiko kina. Eda rawa ni tokona na veivuke raraba ni Lotu ki na kawatamata e vuravura.

Vulici ni iVolanikalou

• Mosaia 2:17; 4:15–16, 26; 18:8–10; 23:18

• Vunau kei na Veiyalayalati 42:38

• Maciu 25:31–46

• Luke 10:25–37

• Jemesa 1:27; 2:17

Vulica Vakalevu baleta na iVakavuvuli Oqo

• iDusidusi ki na iVolanikalou, “Qarava, Veiqaravi”

• Gospel Topics: “Service”

Veisureti

O na ciqoma beka e dua na veikacivi se dua na ilesilesi ke sa soli vei iko (oka kina e dua na ilesilesi mo turaga dauveiqaravi se marama dauveiqaravi)?

Wasei ni Kosipeli

Me tiki ni noda veiyalayalati ni papitaiso, eda yalataka meda “tu ka vakadinadinataka na Kalou” (Mosaia 18:9). Edua na sala eda tu ka ivakadinadina kina sai koya na noda wasea na kosipeli i Jisu Karisito. Na vukei ira na tamata mera ciqoma na kosipeli edua vei ira na mataqali veiqaravi marautaki duadua eda rawa ni solia (raica na Vunau kei na Veiyalayalati 18:15–16). Edua dina na ivakaraitaki kaukauwa ni noda loloma.

Ni keda vakila na veivakalougatataki ni bulataki ni kosipeli, eda vinakata sara ga meda wasea na veivakalougatataki oqori. Era dau malele mai na lewe ni matavuvale, itokani kei ira noda ilawalawa ni keda biuta edua na ivakaraitaki ni yalodina ka ira raica na veivakalougatataki ni kosipeli ena noda bula. E rawa ni keda wasea na kosipeli ena sala e matau ka rawarawa (raica na iVoladusidusi Raraba, wase e 23).

Eda sureti ira na tani me vakaitavi vata kei keda ena itaviqaravi ni veiqaravi ena itikotiko raraba, veivakamarautaki, kei na itaviqaravi ni Lotu. Eda rawa ni sureti ira ki na dua na soqoni ni Lotu se lotu ni papitaiso. Eda rawa ni sureti ira me sarava edua na vidio ena mona livaliva ka vakamacalataki kina na kosipeli i Jisu Karisito, wilika na iVola i Momani, se gole ki na dolavi raraba ni dua na valetabu. E drau vaka drau na veisureti eda rawa ni vakatetea yani. E vakavuqa, na veisureti sa kena ibalebale nodra okati na noda matavuvale, itokani, kei ira na tiko tikivi keda ena veika eda sa cakava rawa tiko.

Kevaka eda kerea, na Kalou ena vukei keda meda raica rawa na madigi eso me wasea kina na kosipeli ka tukuna vei ira na tani na sala e vakalougatataka kina na noda bula na kosipeli.

Me baleta na ikuri ni ivakamacala ni kena vakayacori na ivakavuvuli ni loloma, wasea, sureta, raica na “Duavata kei ira na Lewenilotu” ena wase e 9.

Vulici ni iVolanikalou

• Vunau kei na Veiyalayalati 88:81

• Maciu 28:19–20

Vulica Vakalevu baleta na iVakavuvuli Oqo

• iDusidusi ki na iVolanikalou: “Cakacaka ni Kaulotu”

• Gospel Topics: “Missionary Work”

Veisureti

• O na masulaki ira beka na daukaulotu kei na madigi eso mera wasea kina na kosipeli?

• O na tovolea beka mo vakatovotovotaka na ivakavuvuli ni loloma, wasea, kei na veisureta vei ira nomu itokani, wekamu kei ira tale eso?

Lolo kei na iSolisoli ni Lolo

Na Kalou a tauyavutaka na lawa ni lolo me dua na sala meda tara cake kina na igu vakayalo ka vukei ira era gadreva tu na veivuke.

Na lolo e kena ibalebale mo kua ni kana se gunu me dua na iwase ni gauna. Na Lotu sa dau vakarautaka tu na imatai ni Sigatabu e veivula me siga ni lolo. Na siga ni lolo e dau kena ivakarau me kua ni laukana se gunuvi edua na ka me 24 na auwa kevaka eda bulabula tu vakayago. Na veitiki bibi tale ni Sigatabu ni Lolo e okati kina na masu kei na soli ivakadinadina. Eda sa vakauqeti talega meda lolo ena veigauna tale eso kevaka eda gadreva.

Tarai Cake ni Igu Vakayalo

Na lolo e rawa ni vukei keda me da yalomalumalumu, toro voleka vua na Kalou, ka vakila ni da vakavoui vakayalo. O Jisu Karisito e a lolo, ni bera ni tekivutaka na Nona veiqaravi (raica na Maciu 4:1–2). Na ivolanikalou e volai kina e levu na itukutuku baleti ira na parofita kei na so tale era lolo me rawa ni vakalevutaki na nodra igu vakayalo ka qara na veivakalougatataki digitaki me baleti ira kei na so tale.

Na lolo kei na masu erau dau lako vata. Ni keda lolo ka masu ena vakabauta, edau rawarawa na ciqomi ivakatakila ni tamata yadua. E rawarawa tale ga na noda raica na dina ka kila na lewa ni Kalou.

Vukei Ira era Leqa Tu

Ni keda lolo, eda soli ilavo ki na Lotu me veivuke ena nodra qaravi na tamata era leqa tu. Oqo e vakatokai me isolisoli ni lolo. Eda sureti me solia edua na isolisoli me tautauvata kei na isau ni kakana ka sega ni laukana. Eda sa uqeti meda lomasoli ka solia vakalevu cake mai na isau ni kakana oqo kevaka eda rawata. Noda soli isolisoli ni lolo edua na sala eda rawa ni qaravi ira kina na tani.

Na isolisoli ni lolo e vakayagataki me vakarautaki kina na kakana kei na veika e gadrevi tale eso vei ira na tamata era vakaleqai tu, e veivanua kei na vuravura raraba. Ena ivakamacala me baleta na ivakarau ni soli isolisoli ni lolo, raica na “Soli iKatini kei na iSolisoli Tale Eso” ena lesoni oqo.

Vuli iVolanikalou

Lolo

• Alama 5:45–46; 6:6; 17:2–3

• Moronai 6:5

• Vunau kei na Veiyalayalati 59:12–16; 88:76

• Aisea 58:6–11

Nodra Vukei na Vakaleqai Tu

• Mosaia 4:16–27

• Alama 4:12–13

• Maciu 25:31–46

Vulica Vakalevu baleta na iVakavuvuli Oqo

• iDusidusi ki na ivolanikalou: “Lolo”

• iVoladusidusi Raraba: 22.2.2

• iDusidusiki na iVolanikalou: “Lolo”

Veisureti

• O na lolo ka masu beka ena Sigatabu ni lolo ka tarava me baleta e dua na gagadre bibi?

• O na solia beka e dua na isolisoli ni lolo (ni oti na nomu papitaiso)?

Noda Veiyalayalati meda Vosota ki na iVakataotioti

Ni keda papitaiso, eda veiyalayalati kei na Kalou meda “vosota me yacova nai vakataotioti” ena bulataki ni kosipeli i Jisu Karisito (2 Nifai 31:20; raica tale ga na Mosaia 18:13). Eda sasaga meda tisaipeli i Jisu Karisito ena noda bula taucoko.

O Nifai na parofita ni iVola i Momani e vakamacalataka na papitaiso me matamata eda curuma ki na salatu ni kosipeli (raica na 2 Nifai 31:17). Ni oti na papitaiso, eda tomana meda “toso ki liu ka tudei vei Karisito” (2 Nifai 31:20).

Ni keda “toso ki liu” ena salatu ni bula vakatisaipeli, eda vakavakarau me gole ki na valetabu. E kea eda na vakayacora kina na veiyalayalati kei na Kalou ni keda ciqoma na cakacaka vakalotu ni valetabu. Ena valetabu, ena soli vei keda na kaukauwa ka na rawa ni vauci vaka mavuvale me tawamudu. Na maroroi ni veiyalayalati eda cakava ena valetabu ena dolava na katuba ki na veimadigi vakayalo kei na veivakalougatataki sa vakarautaka tu vei keda na Kalou.

Ni keda yalodina tiko ena salatu ni kosipeli, eda na qai ciqoma na isolisoli cecere duadua ni Kalou—na isolisoli ni bula tawamudu (raica na 2 Nifai 31:20; Vunau kei na Veiyalayalati 14:7).

Na veiwase ka tarava e vakamacalataka eso na ituvaki, ka sa vakarautaka tu na Kalou me vukei keda meda vosota ki na ivakataotioti ni noda bula vakayago—ka kune reki kina.

Matabete kei na Mataisoqosoqo ni Lotu

Na matabete sa ikoya na lewa kei na kaukauwa ni Kalou. Mai na matabete, sa vakayacora kina na Tamada Vakalomalagi na Nona cakacaka me “vakavuna na tawa mate rawa kei na bula tawamudu ni tamata” (Mosese 1:39). Sa solia na Kalou na lewa kei na kaukauwa vei ira na Luvena tagane kei na yalewa e vuravura me veivuke ena vakayacori ni cakacaka oqo.

Na matabete e vakalougatataki keda kece sara. Na cakacaka vakalotu me vaka na papitaiso kei na sakaramede era ciqomi maivei ira era taura tu na itutu ni matabete. Eda ciqoma tale ga na veivakalougatataki ni veivakabulai, veivakacegui, kei na veivakasalataki.

Matabete kei na Veiliutaki ena Lotu kei na Veikacivi

Na Lotu e liutaki maivei Jisu Karisito vei ira na parofita kei na iapositolo. O ira na iliuliu oqo era sa kacivi mai vua na Kalou, tabaki, ka soli vei ira na lewa ni matabete mera cakacaka ena yaca ni iVakabula.

Ena gauna makawa, a solia o Karisito na lewa ni matabete vata oqo vei ira na Nona iApositolo, ka vakatara kina mera liutaka na Nona Lotu ni oti Nona lako cake ki lomalagi. A mai yali na lewa oya ena gauna era cakitaka kina na tamata na kosipeli ka ra mai mate na iApositolo.

O ira na italai vakalomalagi era a vakalesuya mai a matabete ena 1829 maivua na parofita o Josefa Simici, ka tauyavutaka tale na Turaga na Nona Lotu vata kei ira na iapositolo kei na parofita. (Raica na lesoni 1.)

Ena veivanua, o ira na bisopi kei na peresitedi ni iteki e tiko vei ira na lewa ni matabete mera liutaka na ivavakoso ni Lotu.

Ni ra kacivi ka vakatikori na tagane kei na yalewa mera veiqaravi ena Lotu, e soli vei ira na lewa maivua na Kalou mera cakacaka ena veikacivi oya. Na lewa oqo e soli vei ira na daukaulotu, iliuliu, qasenivuli, kei ira eso tale me yacova ni ira sa vagalalataki mai na nodra veikacivi. E lesi ena ruku ni nodra veidusimaki o ira era taura tu na idola ni matabete.

Na lewa ni matabete e rawa ni vakayagataki ena ivakavuvuli duadua ga ni buladodonu (raica na Vunau kei na Veiyalayalati 121:34–46). Na lewa oqo e sa dua na veinuitaki tabu meda matataka na iVakabula ka cakacaka ena Yacana. E sa dau kena inaki tu ga me vakalougatataki ira na tani ka veiqaravi vei ira.

Matabete i Eroni kei na Matabete i Melikiseteki

Ena Lotu, na matabete e oka tiko kina na Matabete i Eroni kei na Matabete i Melikiseteki. Ena ruku ni nodra veidusimaki na taura tu na idola ni matabete, na Matabete i Eroni kei na Matabete i Melikiseteki e vakatikori vei ira na tagane lewe ni Lotu bula kilikili. Ni sa soli na matabete vakadonui, sa na tabaki na tamata ki na dua na itutu ena matabete oya, me vaka na dikoni se italatala qase. Sa dodonu me na tabaki maivua edua ka tiko vua na lewa e veiganiti.

Ni dua na turaga se cauravou e ciqoma na matabete, e cakava o koya edua na veiyalayalati kei na Kalou me vakayacora na itavi tabu, qaravi ira na tani, ka veivuke me tarai cake na Lotu.

E rawa ni ra ciqoma na cauravou na Matabete i Eroni, ka tabaki me dikoni me tekivu ena Janueri ni yabaki mera na yabaki 12 kina. E rawa mera na tabaki me qasenivuli ena yabaki mera na yabaki 14 kina kei na bete ena yabaki mera na yabaki 16 kina. O ira na tagane uabula e rawa mera na ciqoma na Matabete i Eroni ni oti ga na nodra papitaiso kei na vakadeitaki. O ira era taura tu na itutu ni Matabete i Eroni e rawa ni ira vakaitavi ena cakacaka vakalotu eso me vaka na sakaramede kei na papitaiso.

Ni oti edua na gauna ena nodra veiqaravi vaka bete ena Matabete i Eroni, sa na rawa vua edua na tagane bula kilikili, ke lailai sara, me sa yabaki 18 me ciqoma na Matabete i Melikiseteki ka tabaki me italatala qase. O ira na turaga ka ciqoma na Matabete i Melikiseteki e rawa ni ra vakayacora na cakacaka vakalotu ni matabete me vaka na soli ni veivakalougatataki ni veivakabulai kei na veivakacegui vei ira na lewe ni matavuvale kei ira na tani.

Raica na iVoladusidusi Raraba, 38.2.9.1, ena ivakamacala me baleta nodra ciqoma na lewenilotu vou na matabete.

Kuoramu kei na Mataisoqosoqo ni Lotu

Kuoramu ni Matabete. Na kuoramu e dua na ilawalawa tauyavutaki ni matabete. Na veitabanalevu yadua ena tiko na kena kuoramu ni italatala qase me baleti ira na turaga uabula. Na kuoramu ni dikoni, qasenivuli kei na bete e sa baleti ira na cauravou.

iSoqosoqo ni Veivukei. Na iSoqosoqo ni Veivukei era okati kina na yalewa era yabaki 18 ka lako cake. O ira na lewenilotu ena iSoqosoqo ni Veivukei era vaqaqacotaki ira na matavuvale, tamata yadua, kei na itikotiko raraba.

Goneyalewa. Era na curu na goneyalewa ki na isoqosoqo ni Goneyalewa me tekivu ena Janueri ni yabaki era na yabaki 12 kina.

Lalai. O ira kece na gone yabaki 3 ki na 11 era sa lewe ni isoqosoqo ni Lalai.

Matawilivola ni Sigatabu. O ira kece na itabaqase kei na itabagone era na tiko ena Matawilivola ni Sigatabu, mera sota ka vulica vata kina na ivolanikalou.

Ena ikuri ni vakamacala me baleta na matabete, raica na iVoladusidusi Raraba, wase e 3.

Ena ikuri ni vakamacala me baleta na kuoramu ni matabete kei na mataisoqosoqo ni Lotu, raica na iVoladusidusi Raraba, wase e 8–13.

Vulici ni iVolanikalou

• Mosaia 18:17

• Alama 13:1–19

• Vunau kei na Veiyalayalati 20:38–65; 84:19–20; 107; 121:34–46

• Yavu ni Vakabauta 1:5

• Luke 9:1–6

• Joni 15:16

• Jemesa 5:14–15

Vulica Vakalevu baleta na iVakavuvuli Oqo

• iVoladusidusi Raraba, wase e 3: “iVakavuvuli ni Matabete”

• iDusidusi ki na iVolanikalou: “Matabete i Eroni,” “Matabete i Melikiseteki,” “Matabete”

Veisureti

• O na vakavakarau beka mo ciqoma na Matabete i Eroni? (Me baleti ira na tagane yabaki 11 ka lako cake)

• O na vakavakarau beka mo ciqoma na Matabete i Melikiseteki? (Me baleti ira na tagane itabaqase)

• O na qacoya beka na vakaitavi ena mataisoqosoqo ni Lotu o na lewena?

Na Vakawati kei na Matavuvale

Vakawati

Na nodrau vakawati e dua na tagane kei na yalewa esa ilesilesi ni Kalou. E uto ni Nona ituvatuva me baleta na nodra vakatorocaketaki tawamudu na Luvena.

Nodrau vauci edua na veiwatini ena vakamau e dodonu me veiwekani vakamareqeti duadua vei rau ena vuravura oqo. E tiko na nodrau ilesilesi tabu me rau veidinadinati vakairau ka yalodina ki na nodrau veiyalayalati ni vakawati.

E rau sa tautauvata ena mata ni Kalou e dua na tagane kei na yalewa vakawati. Me kakua ni liu-taka e dua na kena kadua. Me vakatauci na nodrau lewa ena duavata kei na veilomani, ka rau vakaitavi ruarua kina.

Ni rau veilomani edua na veiwatini ka cakacaka vata, na nodrau vakawati e rawa ni ivurevure levu ni nodrau tiko marau. Erau rawa ni veivukei vakairau ka vakakina o ira na luvedrau mera torova yani na bula tawamudu.

Na Matavuvale

Me vaka na vakawati, na matavuvale e ilesilesi ni Kalou ka sa uto ni Nona ituvatuva me baleta na noda marau tawamudu. Na noda matavuvale ena rawa ni ira kune marau nida bulataka na ivakavuvuli i Jisu Karisito. Me rau vakatavulici ira na luvedrau o ira na itubutubu ena kosipeli i Jisu Karisito ka vakaraitaka edua na ivakaraitaki ni kena bulataki. Na matavuvale e vakarautaka na madigi eso vei keda meda veilomani ka veiqaravi vakaikeda.

E dodonu vei ira na itubutubu mera vakaliuca sara vakabibi na nodra matavuvale. Sa dua na itavi kei na ilesilesi tabu vei ira na itubutubu mera maroroi na gone era rawa ni vakatubura mai se susuga.

Na veimatavuvale kece era sotava na veibolebole eso. Ni da kerea na veivuke ni Kalou ka muria na Nona ivakaro, na bolebole eso ni matavuvale ena vukei keda meda vuli ka tubu kina. So na gauna, o ira na veibolebole oqo era na vukei keda meda vulica me veivutuni ka veivosoti.

O ira na iliuliu ni Lotu era sa vakauqeti ira na lewenilotu mera dau vakayacora na lotu vakamatavuvale ena veimacawa. Era na vakayagataka na gauna oqo na itubutubu mera vakavulici ira na luvedra ena kosipeli, vaqaqacotaka na veiwekani vakamatavuvale, ka marau vata. Era sa solia oti tale ga na iliuliu ni Lotu edua na ivakaro ka vakavulica na veidina bibi me baleta na matavuvale (raica “Na Matavuvale: iVakaro iVuravura Raraba,” ChurchofJesusChrist.org).

Na veisala tale eso me vaqaqacotaki kina na matavuvale e okati kina na masu vakamatavuvale, vuli ivolanikalou, kei na sokalou vata e valenilotu. E rawa tale ga meda vakadidike ena tuva kawa, sokumuni na italanoa ni matavuvale, ka veiqaravi vei ira na tani.

E vuqa na tamata e vakaiyalayala ga na nodra madigi ni vakawati se ni bula veilomani vakamatavuvale. E levu era sa sotava oti na veisere kei na veituvaki dredre tale eso vakamatavuvale. Ia, na kosipeli e vakalougatataki keda vakayadudua se mani vakaevei tu na ituvaki ni noda matavuvale. Ka kevaka eda yalodina, na Kalou ena vakarautaka edua na sala vei keda me noda na veivakalougatataki ni matavuvale e veilomani, se ena bula oqo se ena bula sa bera mai.

Vulici ni iVolanikalou

Vakamau

• Vunau kei na Veiyalayalati 42:22; 49:15

• Efeso 5:25

• Na iVakatekivu 2:18, 24

Matavuvale

• Mosaia 4:14–15

• Alama 56:47; 57:21

• 3 Nifai 18:21

• Vunau kei na Veiyalayalati 68:25–28

• Efeso 6:4

• Vosa Vakaibalebale 22:6

• “Na Matavuvale: iVakaro iVuravura Raraba”

Vulica Vakalevu baleta na iVakavuvuli Oqo

• iDusidusi ki na iVolanikalou: “Matavuvale,” “Vakamau, Vakamautaka”

• iVoladusidusi Raraba, wase e 2: “Veitokoni Vei ira na Tamata Yadua kei na Matavuvale ena Cakacaka ni Veivakabulai kei na Bula Vakacerecerei”

• iDusidusi ki na iVolanikalou: “Vakamau,” “Matavuvale” “Vakaitubutubu”

Veisureti

Moica na veisureti ka koto e ra me veiganiti kei na ituvaki ni tamata yadua.

• Ona rawa beka ni vakayacora na lotu vakamatavuvale e veimacawa, masu vakamatavuvale e veisiga, ka vuli ivolanikalou vakamatavuvale e veisiga?

• O na rawa beka ni sokalou vakamatavuvale ena Siga ni Vakacecegu?

Cakacaka ni Valetabu kei na Tuva Kawa vei Ira na Qase e Liu sa Mate

Na Tamada Vakalomalagi e lomani ira kece na Luvena ka gadreva mera vakabulai ka bula vakacerecerei. Ia e bilioni na tamata era sa mate ka sega ni rogoca na kosipeli i Jisu Karisito se ciqoma na cakacaka vakalotu ni veivakabulai ni kosipeli. Na veicakacaka vakalotu oqo era oka kina na papitaiso, veivakadeitaki, veitabaki ni Matabete i Melikiseteki vei ira na tagane, na edaumeni ni valetabu, kei na vakamau tawamudu.

Ena Nona loloma soliwale kei na yalololoma, sa vakarautaka kina na Turaga edua tale na sala vei ira na tamata oqo mera ciqoma na kosipeli kei na kena cakacaka vakalotu. Ena vuravura ni yalo, na kosipeli e vunautaki vei ira a mate ka sega ni ciqoma na kosipeli (raica na Vunau kei na Veiyalayalati 138). Ena valetabu, eda na rawa ni vakayacora kina na cakacaka vakalotu ena vukudra na nodra qase e liu kei ira eso tale era sa mate. O ira na tamata era sa mate oqo ena vuravura ni yalo era na qai rawa ni ciqoma se biliga na kosipeli kei na cakacaka vakalotu sa vakayacori ena vukudra.

Ni bera ni da vakayacora na veicakacaka vakalotu oqo, ena gadrevi me da vakaraici ira na noda qase e liu ka ra se bera ni ciqoma. Na noda vakaraici ira na lewe ni matavuvale me rawa nira ciqoma na cakacaka vakalotu e uto tiko ni inaki ni noda cakacaka ni tuva kawa. Nida kunea na itukutuku me baleti ira, eda na vakacurumi ira ki na itukutuku tudei ni Lotu ena FamilySearch.org. Sa na qai rawa vei keda (se so tale) me vakayacora na cakacaka vakalotu veisosomitaki ena vukudra e valetabu.

Nida kilai ira na noda qase e liu ka vakayacora na cakacaka vakalotu ena vukudra, na noda matavuvale ena rawa ni duavata me tawamudu.

Cakacaka ni Tuva Kawa kei na Dau Tiko e Valetabu

Vakaveikilaitaki ira na lewenilotu vou kei ira o vakavulica tiko ki vua na iliuliu ni cakacaka ni tuva kawa ena valetabu ni tabanalevu (se ki na dua tale na lewenilotu e kila vinaka na cakacaka ni valetabu kei na tuva kawa). Na iliuliu oqo ena rawa ni vukei ira na tamata mera vakasaqarai ira na wekadra era sa mate ka ra gadreva tu na cakacaka vakalotu ni valetabu. Vakayagataka na bose ni veivakacokotaki vakamacawa me tuvai kina na sala me vukei ira na lewenilotu vou mera tekivutaka na cakacaka ni valetabu kei na tuva kawa.

Ena rawa vei ira na lewenilotu vou kei ira na lewenilotu tale eso mera ciqoma mai vei bisopi edua na ivolatara ni valetabu me vakayacori kina na papitaiso kei na veivakadeitaki vakaveisosomitaki vei ira na nodra qase e liu era sa mate kei na so tale. E rawa ni ciqoma edua na lewenilotu na ivolatara oqo ena i tekivu ni Janueri ena yabaki sa na yabaki 12 kina. O ira tale ga na tagane ena gadrevi mera taura tu na Matabete i Eroni mera vakabau kina. Vakauqeti ira na lewenilotu vou me dua nodra ivolatara ena gauna totolo e veiganiti.

Ke tiko voleka edua na valetabu, gole vata kei ira na lewenilotu vou kevaka e rawa. Vakaitavi vata kei ira ena cakacaka vakalotu ni valetabu.

Vulici ni iVolanikalou

• Vunau kei na Veiyalayalati 128; 138

• 1 Korinica 15:29

• 1 Pita 3:18–21; 4:6

Vulica Vakalevu baleta na iVakavuvuli Oqo

• iVoladusidusi Raraba, wase e 28: “Cakacaka Vakalotu ni Valetabu baleti Ira na Mate”

• iDusidusi ki na iVolanikalou: “Papitaiso vei ira sa Takali,” “iVola ni Kawa”

Veisureti

• Ona vakavakarau beka mo ciqoma na cakacaka vakalotu ni valetabu ena vukudra na nomu qase e liu?

• O na rawa beka ni vakaitavi ena cakacaka ni tuva kawa ka vakarautaka na yacadra na nomu qase e liu sa mate mera ciqoma na cakacaka vakalotu ni valetabu?

Valetabu, na Edaumeni, Vakamau Tawamudu, kei na Matavuvale Tawamudu

Valetabu

Na valetabu e vale ni Turaga. E vanua tabu ka da rawa ni cakava e kea na veiyalayalati kei na Kalou nida ciqoma na Nona cakacaka vakalotu tabu. Nida maroroya na veiyalayalati oqo, ena qai vakatakilai mai na kaukauwa ni bula vakalou ki na noda bula (raica na Vunau kei na Veiyalayalati 84:19–22; 109:22–23).

Na Edaumeni

E dua vei ira na cakacaka vakalotu eda ciqoma e loma ni valetabu e vakatokai na edaumeni. Na vosa na edaumeni e kena ibalebale “e dua na isolisoli.” Na isolisoli ni kila-ka kei na kaukauwa e lako mai vua na Kalou. Ena gauna ni edaumeni, eda na cakava na veiyalayalati kei na Kalou ka vauci keda vei Koya kei na Luvena, o Jisu Karisito (raica na wase e 1).

E rawa vei ira na itabaqase mera ciqoma na nodra edaumeni ni valetabu vakai ira ni oti, ke lailai sara, edua na yabaki ni nodra lewena na Lotu. Ena ikuri ni vakamacala me baleta na edaumeni, raica na iVoladusidusi Raraba, 27.2.

Vakamau Tawamudu kei na Matavuvale Tawamudu

Na ituvatuva ni marau ni Kalou sa rawa kina ki na noda veiwekani vakamatavuvale me gumatua yani ki na taudaku ni ibulubulu. E valetabu, e rawa vei keda meda vakamau me baleta na gauna oqo kei na tawamudu. Oqo sa na rawa kina vei ira na matavuvale mera bula vata ka tawamudu.

Nira ciqoma oti na nodra edaumeni ni valetabu na veiwatini qai vakamau, sa na rawa mera vauci se vakamau ki na bula tawamudu. Sa na rawa nira vauci vei rau o ira na luvedrau.

Na veiwatini ka sa vauci oti e valetabu, e dodonu me rau maroroya na veiyalayalati erau sa cakava me rau ciqoma kina na veivakalougatataki ni vakamau tawamudu.

Veinanumi Ni Vakatavulici na Matavuvale Tawamudu

Eso na tamata ena tiko beka eso na ituvaki ni matavuvale ka na sega kina ni taleitaki vei ira mera lai bula vata ka tawamudu. Eso era na sega beka ni vakawati se vakaluveni ena bula oqo.

Vakananumi ira o vakavulici ira tiko ni ituvatuva ni Kalou e ituvatuva ni marau. Vukei ira mera raica ni kena bulataki na kosipeli ena gauna oqo ena rawa ni vakarautaki ira ki na dua na matavuvale tawamudu mai muri, kevaka mada ga ena qai yaco oqo ena bula ka tarava.

Se mani vakacava na ituvaki ni nona matavuvale se vakawati edua na tamata, e dodonu vei ira na itabaqase mera vakavakarau me ciqoma na nodra edaumeni ni valetabu vakai ira. Nodra ciqoma nodra edaumeni ena vaqaqacotaki ira vakalevu sara. Vukei ira tale ga mera raica ni tiko edua na nodra madigi mera vakaduavatataki ira na nodra qase e liu sa mate ena cakacaka ni valetabu.

Vulici ni iVolanikalou

• Vunau kei na Veiyalayalati 43:16; 95:8–9; 97:10–16; 109; 131:1–4

Vulica Vakalevu baleta na iVakavuvuli Oqo

• iVoladusidusi Raraba, wase e 27: “Cakacaka Vakalotu ni Valetabu baleti Ira na Bula”

• iDusidusi ki na iVolanikalou: “Valetabu,” “Edaumeni,” “Vakamau”

• temples.ChurchofJesusChrist.org

Veisureti

O na vakavakarau beka mo tiko e valetabu ka ciqoma na veicakacaka vakalotu ni valetabu?