“ບົດທີ 7: ຮຽນພາສາການເຜີຍແຜ່ຂອງທ່ານ,” ຈົ່ງສັ່ງສອນພຣະກິດຕິຄຸນຂອງເຮົາ: ຄູ່ມືຕໍ່ການແບ່ງປັນພຣະກິດຕິຄຸນຂອງພຣະເຢຊູຄຣິດ (2023)

“ບົດທີ 7,” ຈົ່ງສັ່ງສອນພຣະກິດຕິຄຸນຂອງເຮົາ

ບົດທີ 7

ຮຽນພາສາການເຜີຍແຜ່ຂອງທ່ານ

ໃຫ້ພິຈາລະນາສິ່ງນີ້

ເຮົາຈະສາມາດເພີ່ມຄວາມເຂັ້ມແຂງໃຫ້ແກ່ສັດທາຂອງເຮົາໃນພຣະຜູ້ເປັນເຈົ້າ ເພື່ອຊ່ວຍໃຫ້ເຮົາຮຽນພາສາໃໝ່ໄດ້ແນວໃດ?
ເປັນຫຍັງເຮົາຈຶ່ງຄວນສືບຕໍ່ພັດທະນາຄວາມສາມາດທາງພາສາຢ່າງຕໍ່ເນື່ອງ?
ເຮົາຈະປັບປຸງຄວາມສາມາດຂອງເຮົາໃນການເວົ້າ ແລະ ສິດສອນໃນພາສາການເຜີຍແຜ່ຂອງເຮົາໄດ້ແນວໃດ?
ເຮົາຈະສາມາດໄດ້ຮັບຂອງປະທານແຫ່ງການເວົ້າພາສາແນວໃດ?

ກະກຽມຕົວທ່ານເອງທາງວິນຍານ

ພຣະຜູ້ເປັນເຈົ້າໄດ້ປະກາດວ່າ, “ທຸກຄົນຈະໄດ້ຍິນຄວາມສົມບູນຂອງພຣະກິດຕິຄຸນໃນຄຳວາຈາຂອງເຂົາເອງ, ໃນພາສາຂອງເຂົາເອງ, ຜ່ານຜູ້ຄົນເຫລົ່ານັ້ນທີ່ໄດ້ຖືກແຕ່ງຕັ້ງສູ່ອຳນາດນີ້” (ຄຳສອນ ແລະ ພັນທະສັນຍາ 90:11).

ລາຍການຢູ່ຂ້າງລຸ່ມຄືວິທີທີ່ທ່ານສາມາດເພີ່ມຄວາມເຂັ້ມແຂງໃຫ້ແກ່ສັດທາຂອງທ່ານ ວ່າພຣະຜູ້ເປັນເຈົ້າຈະຊ່ວຍທ່ານສິດສອນ ແລະ ເປັນພະຍານໃນພາສາການເຜີຍແຜ່ຂອງທ່ານ:

ເຊື່ອວ່າທ່ານໄດ້ຖືກເອີ້ນຈາກພຣະເຈົ້າໂດຍສາດສະດາ.
ຂໍຄວາມຊ່ວຍເຫລືອຈາກພຣະເຈົ້າຜ່ານທາງການອະທິຖານທີ່ຈິງໃຈ.
ເຮັດວຽກຢ່າງພາກພຽນໂດຍການສຶກສາ, ການຝຶກຫັດ, ແລະ ການໃຊ້ພາສາການເຜີຍແຜ່ຂອງທ່ານໃນແຕ່ລະວັນ.
ມີຄ່າຄວນພໍທີ່ຈະມີພຣະວິນຍານບໍລິສຸດເປັນເພື່ອນ ໂດຍການຮັກສາພຣະບັນຍັດ ແລະ ດຳລົງຊີວິດຕາມມາດຕະຖານຂອງຜູ້ສອນສາດສະໜາ.
ຊຳລະແຮງຈູງໃຈໂດຍການຮັກພຣະເຈົ້າ ແລະ ໂດຍການຮັກລູກໆຂອງພຣະອົງ ແລະ ປາດຖະໜາທີ່ຈະອວຍພອນເຂົາເຈົ້າ.

ອຸທິດຕົນ ແລະ ພາກພຽນ

ການຮຽນຮູ້ທີ່ຈະສິດສອນໃນພາສາການເຜີຍແຜ່ຂອງທ່ານຢ່າງມີປະສິດທິພາບ ຮຽກຮ້ອງຄວາມພະຍາຍາມຢ່າງພາກພຽນ ແລະ ຂອງປະທານແຫ່ງພຣະວິນຍານ. ຢ່າແປກໃຈຖ້າຫາກເບິ່ງຄືວ່າຍາກ. ມັນຕ້ອງໃຊ້ເວລາ ມີຄວາມອົດທົນກັບຕົວທ່ານເອງ. ເມື່ອທ່ານອຸທິດຕົວທ່ານເອງໃນການຮຽນພາສາ, ທ່ານຈະໄດ້ຮັບທັກສະທີ່ຈຳເປັນເພື່ອໃຫ້ບັນລຸຈຸດປະສົງຂອງທ່ານ ໃນຖານະຜູ້ສອນສາດສະໜາ.

ທ່ານບໍ່ໄດ້ຢູ່ຄົນດຽວໃນການຮຽນພາສາການເຜີຍແຜ່ຂອງທ່ານ. ພຣະບິດາເທິງສະຫວັນ ແລະ ພຣະເຢຊູຄຣິດຈະຊ່ວຍທ່ານຂະນະທີ່ທ່ານສະແຫວງຫາຄວາມຊ່ວຍເຫລືອຈາກພວກພຣະອົງ. ສະແຫວງຫາ ແລະ ເປີດຮັບຄວາມຊ່ວຍເຫລືອຈາກຄູ່ສອນຂອງທ່ານ, ສະມາຊິກ, ຜູ້ທີ່ທ່ານສິດສອນ, ຜູ້ສອນສາດສະໜາຄົນອື່ນໆ, ແລະ ຜູ້ຄົນອື່ນໆ.

ຕັ້ງໃຈຟັງ ແລະ ເວົ້າພາສາໃນທຸກໂອກາດ. ຢ່າຢ້ານທີ່ຈະເຮັດຄວາມຜິດ. ທຸກຄົນທີ່ຮຽນພາສາໃໝ່ຈະເຮັດຄວາມຜິດ. ຜູ້ຄົນຈະເຂົ້າໃຈ, ແລະ ເຂົາເຈົ້າຈະຊື່ນຊົມກັບຄວາມພະຍາຍາມຂອງທ່ານ ທີ່ຈະຮຽນພາສາຂອງເຂົາເຈົ້າ.

ພັດທະນາພາສາຂອງທ່ານຕໍ່ໄປ ຈົນກວ່າຈະສິ້ນສຸດການເຜີຍແຜ່ຂອງທ່ານ. ເມື່ອຄວາມສາມາດໃນການເວົ້າພາສາຂອງທ່ານເຕີບໂຕຂຶ້ນ, ຜູ້ຄົນຈະຟັງສິ່ງທີ່ທ່ານເວົ້າຫລາຍກວ່າຟັງວ່າທ່ານຈະເວົ້າແນວໃດ. ທ່ານຈະກັງວົນໜ້ອຍລົງກ່ຽວກັບວິທີສື່ສານ ແລະ ສາມາດຕອບສະໜອງຄວາມຕ້ອງການຂອງຄົນອື່ນໄດ້ດີຂຶ້ນ.

“ພວກເຮົາ … ຫວັງວ່າຜູ້ສອນສາດສະໜາທຸກຄົນທີ່ຮຽນຮູ້ … ພາສາໃໝ່ຈະຊ່ຽວຊານໃນທຸກວິທີທາງທີ່ເປັນໄປໄດ້. … ແລະ ເມື່ອທ່ານເຮັດເຊັ່ນນັ້ນ, ທັກສະ [ການສິດສອນ] ແລະ ການເປັນພະຍານຂອງທ່ານຈະດີຂຶ້ນ. ທ່ານຈະໄດ້ຮັບການຕ້ອນຮັບທີ່ດີຂຶ້ນ ແລະ ປະທັບໃຈທາງວິນຍານຫລາຍຂຶ້ນສຳລັບ [ຜູ້ຄົນທີ່ທ່ານສິດສອນ]. …

“ຢ່າພໍໃຈກັບສິ່ງທີ່ເຮົາເອີ້ນວ່າຄຳສັບຂອງຜູ້ສອນສາດສະໜາເທົ່ານັ້ນ. ຍືດຂະຫຍາຍຕົວເອງໃນເລື່ອງພາສາ, ແລ້ວທ່ານຈະເຂົ້າເຖິງໃຈຜູ້ຄົນໄດ້ຫລາຍຂຶ້ນ” (Jeffrey R. Holland, missionary satellite broadcast, Aug. 1998).

ສືບຕໍ່ທີ່ຈະໃຊ້ພາສາການເຜີຍແຜ່ຂອງທ່ານ ຫລັງຈາກທ່ານກັບບ້ານ. ພຣະຜູ້ເປັນເຈົ້າໄດ້ລົງທຶນໃນຕົວທ່ານຫລາຍ, ແລະ ພຣະອົງອາດໃຊ້ຄວາມສາມາດຂອງທ່ານໃນພາຍຫລັງໃນຊີວິດຂອງທ່ານ.

ຮຽນພາສາອັງກິດ

ຖ້າຫາກທ່ານບໍ່ເວົ້າພາສາອັງກິດ, ທ່ານຄວນສຶກສາມັນ ໃນຖານະຜູ້ສອນສາດສະໜາ. ສິ່ງນີ້ຈະເປັນພອນໃຫ້ແກ່ທ່ານລະຫວ່າງການເຜີຍແຜ່ຂອງທ່ານ ແລະ ຕະຫລອດຊີວິດຂອງທ່ານ. ການຮຽນພາສາອັງກິດຈະເປັນພອນໃຫ້ແກ່ຄອບຄົວຂອງທ່ານເຊັ່ນກັນ.

ສຳລັບຄວາມຊ່ວຍເຫລືອເພີ່ມເຕີມໃນການຮຽນພາສາອັງກິດ, ໃຫ້ເບິ່ງ EnglishConnect for Missionaries.

ຫລັກທຳຂອງການຮຽນພາສາ

ຮັບເອົາໜ້າທີ່ຮັບຜິດຊອບ

ຕັ້ງເປົ້າໝາຍເພື່ອປັບປຸງຄວາມສາມາດທາງພາສາຂອງທ່ານ, ແລະ ປັບປ່ຽນມັນເປັນປະຈຳ. ສ້າງແຜນສຶກສາພາສາ. ໃຊ້ພາສາໃນທຸກໂອກາດ.

ເຮັດໃຫ້ການສຶກສາຂອງທ່ານມີຄວາມໝາຍ

ນຳໃຊ້ສິ່ງທີ່ທ່ານສຶກສາກັບສະຖານະການໃນຊີວິດຈິງ ແລະ ໃນກິດຈະກຳປະຈຳວັນຂອງທ່ານ. ສຸມໃສ່ພາສາທີ່ຈະຊ່ວຍໃຫ້ທ່ານເວົ້າສິ່ງທີ່ທ່ານຢາກເວົ້າ.

ສະແຫວງຫາທີ່ຈະສື່ສານ

ເວົ້າພາສາກັບຄູ່ສອນຂອງທ່ານໃຫ້ຫລາຍເທົ່າທີ່ເປັນໄປໄດ້. ໃຊ້ທຸກໂອກາດໃຫ້ເປັນປະໂຫຍດເພື່ອຮຽນຮູ້ ແລະ ຝຶກຫັດ. ຍົກຕົວຢ່າງ, ທ່ານອາດຂໍໃຫ້ສະມາຊິກທີ່ກັບຄືນມາ ຫລື ຄົນໃດຄົນໜຶ່ງທີ່ທ່ານກຳລັງສິດສອນ ເພື່ອຊ່ວຍທ່ານໃນເລື່ອງພາສາ. ບໍ່ມີການທົດແທນສຳລັບການເວົ້າພາສາກັບເຈົ້າຂອງພາສາຂອງເຂົາເຈົ້າ.

ຢ່າປຽບທຽບ

ຢ່າປຽບທຽບທັກສະການເວົ້າພາສາຂອງທ່ານກັບຜູ້ສອນສາດສະໜາຄົນອື່ນໆ. ການປຽບທຽບກໍ່ໃຫ້ເກີດຄວາມທະນົງໃຈ ຫລື ຄວາມທໍ້ແທ້.

ຮຽນຮູ້ແນວຄິດໃໝ່ຢ່າງລະອຽດ

ທົບທວນສິ່ງທີ່ທ່ານໄດ້ສຶກສາເປັນປະຈຳ, ແລະ ຝຶກມັນໃນສະຖານະການໃໝ່. ສິ່ງນີ້ຈະຊ່ວຍໃຫ້ທ່ານຈື່ຈຳ ແລະ ນຳໃຊ້ສິ່ງທີ່ທ່ານກຳລັງຮຽນຮູ້.

ສ້າງແຜນການສຶກສາພາສາ

ແຜນການສຶກສາພາສາຊ່ວຍທັງຜູ້ສອນສາດສະໜາໃໝ່ ແລະ ຜູ້ສອນສາດສະໜາທີ່ມີປະສົບການແລ້ວ ໃຫ້ສຸມໃສ່ສິ່ງທີ່ເຂົາເຈົ້າສາມາດເຮັດໃນແຕ່ລະວັນ ເພື່ອປັບປຸງຄວາມສາມາດຂອງເຂົາເຈົ້າໃນການເວົ້າພາສາການເຜີຍແຜ່ຂອງເຂົາເຈົ້າ. ແຜນຂອງທ່ານຈະລວມທັງສິ່ງທີ່ທ່ານຈະເຮັດລະຫວ່າງເວລາການສຶກສາພາສາຂອງທ່ານ ແລະ ຕະຫລອດທັງວັນ.

ຂັ້ນຕອນດັ່ງຕໍ່ໄປນີ້ສະແດງໃຫ້ເຫັນວິທີທີ່ທ່ານສາມາດສ້າງແຜນການສຶກສາພາສາຂອງທ່ານ ໂດຍໃຊ້ຂັ້ນຕອນການຕັ້ງເປົ້າໝາຍຈາກ ບົດທີ 8. ປັບຂັ້ນຕອນເຫລົ່ານີ້ຕາມຄວາມຕ້ອງການ.

ຕັ້ງເປົ້າໝາຍ ແລະ ວາງແຜນດ້ວຍການອະທິຖານ. ຕັ້ງເປົ້າໝາຍປະຈຳອາທິດ ແລະ ປະຈຳວັນເພື່ອປັບປຸງຄວາມສາມາດທົ່ວໄປຂອງທ່ານ ໃນການສື່ສານ ແລະ ສິດສອນພຣະກິດຕິຄຸນ. ລວມສິ່ງທີ່ທ່ານຕ້ອງການຈົດຈຳ, ດັ່ງເຊັ່ນຄຳສັບ, ວະລີ, ພຣະຄຳພີ, ແລະ ຂໍ້ຄວາມຕ່າງໆ.
ບັນທຶກ ແລະ ກຳນົດເວລາ. ຕັດສິນໃຈເລືອກເຄື່ອງມືພາສາທີ່ຈະຊ່ວຍໃຫ້ທ່ານບັນລຸເປົ້າໝາຍ. ເຄື່ອງມືພາສາສາມາດລວມທັງພຣະຄຳພີ, ວັດຈະນານຸກົມ, ປຶ້ມໄວຍະກອນ, ແອັບ the TALL Embark, ແລະ ອື່ນໆ. ກຳນົດເວລາທີ່ທ່ານຈະສຶກສາ ແລະ ໃຊ້ພາສາຢ່າງເປັນທາງການ. ຍົກຕົວຢ່າງ, ທ່ານອາດກຳນົດເວລາອ່ານອອກສຽງຈາກພຣະຄຳພີມໍມອນ ເປັນເວລາ 15 ນາທີ ໃນແຕ່ລະວັນ ໃນລະຫວ່າງກິນເຂົ້າທ່ຽງ.
ກະທຳຕາມແຜນຂອງທ່ານ. ພຣະຜູ້ເປັນເຈົ້າຮັກຄວາມພະຍາຍາມ, ສະນັ້ນຈົ່ງເຮັດວຽກຢ່າງພາກພຽນເພື່ອບັນລຸເປົ້າໝາຍຂອງທ່ານ. ປົກປ້ອງເວລາສຶກສາພາສາຂອງທ່ານ ແລະ ຈັດຕາຕະລາງໃໝ່ສຳລັບການສຶກສາພາຍຫລັງຖ້າຫາກຕ້ອງໄດ້ເຮັດສິ່ງອື່ນກ່ອນ.
ທົບທວນ ແລະ ຕິດຕາມຜົນ. ທົບທວນແຜນການສຶກສາຂອງທ່ານເລື້ອຍໆເພື່ອປະເມີນວ່າ ມັນໄດ້ຜົນດີພຽງໃດ. ເຊື້ອເຊີນຄູ່ສອນຂອງທ່ານ, ຜູ້ນຳເຜີຍແຜ່, ສະມາຊິກ, ແລະ ຄົນອື່ນໆຢູ່ໃນເຂດຂອງທ່ານ ໃຫ້ແນະນຳວິທີທີ່ທ່ານສາມາດປັບປຸງ. ເຂົ້າຮ່ວມໃນການປະເມີນພາສາຕາມກຳນົດເວລາເປັນປະຈຳ ເພື່ອຈັດແຜນພາບຄວາມກ້າວໜ້າຂອງທ່ານ ແລະ ລະບຸວິທີການປັບປຸງ.

ສ້າງຄວາມສົມດຸນລະຫວ່າງການສຶກສາພາສາຂອງທ່ານກັບເປົ້າໝາຍໄລຍະຍາວສຳລັບການສ້າງພື້ນຖານພາສາກັບເປົ້າໝາຍໄລຍະສັ້ນສຳລັບກິດຈະກຳສະເພາະ ແລະ ຄົນທີ່ທ່ານກຳລັງສິດສອນ.

ໃນຊ່ວງເວລາການສຶກສາພາສາເປັນທາງການຂອງທ່ານ, ໃຫ້ສ້າງຄວາມສົມດຸນລະຫວ່າງເປົ້າໝາຍ ແລະ ແຜນຂອງທ່ານ ໃນດ້ານພື້ນຖານຂອງພາສາທີ່ສະແດງຢູ່ຂ້າງລຸ່ມ. ຕັດສິນໃຈວ່າທ່ານຈະຮຽນຮູ້ຫຍັງແດ່ຕະຫລອດທັງວັນ.

ທັກສະການຟັງ	ທັກສະການອ່ານ	ໄວຍະກອນ
ທັກສະການເວົ້າ	ທັກສະການຂຽນ	ຄຳສັບ

ການສຶກສາສ່ວນຕົວ ຫລື ກັບຄູ່ສອນ

ໃຊ້ເວລາໃນແຕ່ລະອາທິດເພື່ອປະເມີນການສຶກສາພາສາຂອງທ່ານ ໂດຍການຖາມຄຳຖາມດັ່ງຕໍ່ໄປນີ້:

ຂ້ອຍສຶກສາພາສາການເຜີຍແຜ່ຂອງຂ້ອຍທຸກວັນໃນອາທິດນີ້ຫລືບໍ່? ຂ້ອຍສາມາດເຮັດຫຍັງໄດ້ແດ່ເພື່ອປັບປຸງພາສາການເຜີຍແຜ່ຂອງຂ້ອຍຢ່າງສະໝ່ຳສະເໝີ?
ແຜນຂອງຂ້ອຍຊ່ວຍຂ້ອຍຊອກຫາ, ສິດສອນ, ແລະ ເຮັດວຽກກັບສະມາຊິກໄດ້ດີຂຶ້ນບໍ? ຂ້ອຍຕ້ອງໄດ້ປັບປ່ຽນສິ່ງໃດແດ່ໃນແຜນຂອງຂ້ອຍ?
ຂ້ອຍມັກຫຍັງຫລາຍທີ່ສຸດໃນການສຶກສາພາສາຂອງຂ້ອຍ? ຂ້ອຍສາມາດເຮັດຫຍັງເພື່ອຊື່ນຊົມກັບມັນຫລາຍຂຶ້ນ?
ຂ້ອຍຄວນໃຊ້ເວລາຫລາຍປານໃດເພື່ອຝຶກການຟັງ, ການອ່ານ, ການຂຽນ, ແລະ ການເວົ້າ? ຂ້ອຍຈະສາມາດຮຽນຮູ້ຄຳສັບ, ໄວຍະກອນ, ແລະ ການອອກສຽງໄດ້ດີຂຶ້ນແນວໃດ?
ກິດຈະກຳ ແລະ ແຫລ່ງຂໍ້ມູນອັນໃດແດ່ທີ່ຂ້ອຍກຳລັງໃຊ້ເພື່ອສຶກສາພາສາຂອງຂ້ອຍ? ອັນໃດທີ່ຊ່ວຍຂ້ອຍໄດ້ຫລາຍທີ່ສຸດ? ມີແຫລ່ງຂໍ້ມູນ ຫລື ກິດຈະກຳອັນໃດແດ່ທີ່ອາດຈະເປັນປະໂຫຍດ?
ອັນໃດຕ້ອງການຄວາມສົນໃຈຫລາຍ?

ຫລັງຈາກຕອບຄຳຖາມເຫລົ່ານີ້, ໃຫ້ປັບແຜນການສຶກສາຂອງທ່ານ ແລະ ເບິ່ງວ່າມັນປັບປຸງຜົນການຮຽນຂອງທ່ານຫລືບໍ່. ພຣະວິນຍານຈະນຳພາທ່ານ ເມື່ອທ່ານສືບຕໍ່ສະແຫວງຫາທີ່ຈະປັບປຸງການສຶກສາພາສາຂອງທ່ານ.

ຮຽນກັບຄູ່ສອນຂອງທ່ານ

ຊ່ວຍຄູ່ສອນຂອງທ່ານປະສົບຄວາມສຳເລັດ ແລະ ໄດ້ຮັບຄວາມໝັ້ນໃຈໃນການຮຽນຮູ້ພາສາການເຜີຍແຜ່ ຫລື ໃນການຮຽນພາສາອັງກິດ. ຍ້ອງຍໍຄູ່ສອນຂອງທ່ານ ແລະ ຜູ້ສອນສາດສະໜາຄົນອື່ນໆຢ່າງຈິງໃຈ ແລະ ເລື້ອຍໆ ກ່ຽວກັບຄວາມກ້າວໜ້າຂອງເຂົາເຈົ້າ.

ໃຫ້ຄຳຄິດເຫັນທີ່ລຽບງ່າຍ ແລະ ແທ້ຈິງດ້ວຍຄວາມເມດຕາ. ໃຫ້ໂອກາດເຂົາເຈົ້າຢ່າງຫລວງຫລາຍເພື່ອສິດສອນ ແລະ ເປັນພະຍານທີ່ປະສົບຄວາມສຳເລັດ. ສັງເກດວິທີທີ່ຜູ້ສອນສາດສະໜາທີ່ມີປະສົບການຫລາຍກວ່າຊ່ວຍຄູ່ສອນຂອງລາວ ໃນເລື່ອງຈິງດັ່ງຕໍ່ໄປນີ້.

ຂ້ອຍຫາກໍມາຮອດເຂດທີສອງ ເມື່ອຄູ່ສອນຂອງຂ້ອຍບອກຂ້ອຍວ່າ ມັນແມ່ນເວລາຂອງຂ້ອຍທີ່ຈະໃຫ້ຂໍ້ຄິດທາງວິນຍານໃນເວລານັດກິນເຂົ້າ. ຄູ່ສອນຄົນທຳອິດຂອງຂ້ອຍມີຄວາມສຸກສະເໝີທີ່ໄດ້ສິດສອນ, ແລະ ຂ້ອຍກໍເຄີຍຊິນກັບການໃຫ້ບົດຮຽນສ່ວນນ້ອຍໆຂອງຂ້ອຍ ແລະ ແລ້ວຟັງ.

ຂ້ອຍໄດ້ພະຍາຍາມຊັກຊວນຄູ່ສອນຂອງຂ້ອຍວ່າ ລາວຄວນໃຫ້ຂໍ້ຄິດທາງວິນຍານ, ແຕ່ລາວໄດ້ຊຸກຍູ້ໃຫ້ຂ້ອຍເຮັດວຽກງານມອບໝາຍ. ຂ້ອຍໄດ້ຝຶກຫັດດ້ວຍຄວາມຊ່ວຍເຫລືອຂອງລາວ.

ເມື່ອເວລາມາເຖິງ, ຂ້ອຍໄດ້ເປີດພຣະຄຳພີຂອງຂ້ອຍ ແລະ ອ່ານຈາກ 3 ນີໄຟ 5 ແລະ 7. ຂ້ອຍໄດ້ມີບັນຫາ ແຕ່ສາມາດອະທິບາຍໄດ້ວ່າ ເປັນຫຍັງຂ້ອຍຈຶ່ງຮູ້ສຶກວ່າຂໍ້ພຣະຄຳພີທີ່ຂ້ອຍເລືອກມີຄວາມສຳຄັນ ແລະ ຂ້ອຍຮູ້ສຶກໂລ່ງໃຈເມື່ອເຮັດສຳເລັດ. ເມື່ອມີຄົນຖາມ, ຂ້ອຍຫລຽວເບິ່ງຄູ່ສອນຂອງຂ້ອຍເພື່ອຄຳຕອບ, ແຕ່ລາວບໍ່ເປີດປາກ. ນັ້ນແມ່ນເວລາທີ່ຂ້ອຍປະຫລາດໃຈກັບຄຳຕອບໃນພາສາຝຣັ່ງທີ່ເຂົ້າໃຈໄດ້. ຂ້ອຍຍິ່ງປະຫລາດໃຈຫລາຍຂຶ້ນທີ່ສະມາຊິກເບິ່ງຄືວ່າບໍ່ຮູ້ສຶກວ່າ ຂ້ອຍບໍ່ໝັ້ນໃຈໃນທັກສະພາສາການສື່ສານຂອງຂ້ອຍ. ຂ້ອຍໄດ້ຮັບຄວາມໝັ້ນໃຈ ແລະ ຮັບຮູ້ວ່າພາສາຝຣັ່ງຂອງຂ້ອຍດີກວ່າທີ່ຂ້ອຍຄິດ.

ຫລາຍອາທິດໄດ້ຜ່ານໄປ, ແລະ ຄູ່ສອນຂອງຂ້ອຍສືບຕໍ່ໃຫ້ຂ້ອຍສິດສອນ—ແມ່ນແຕ່ຕອນທີ່ຂ້ອຍບໍ່ຄິດວ່າຂ້ອຍສາມາດເຮັດໄດ້ ແລະ ເຖິງແມ່ນວ່າລາວອາດສົງໄສວ່າຂ້ອຍຈະສາມາດເຮັດໄດ້ຫລືບໍ່. ຂ້ອຍຮູ້ສຶກວ່າຂ້ອຍກາຍເປັນເຄື່ອງມືຂອງພຣະບິດາຜູ້ສະຖິດຢູ່ໃນສະຫວັນ ແທນທີ່ຈະເປັນພຽງແຕ່ຄູ່ສອນທີ່ມິດງຽບເທົ່ານັ້ນ.

ການສຶກສາສ່ວນຕົວ ຫລື ກັບຄູ່ສອນ

ເຮັດວຽກກັບຜູ້ສອນສາດສະໜາຄົນອື່ນໆ ເພື່ອຊ່ວຍທ່ານຮຽນພາສາການເຜີຍແຜ່ຂອງທ່ານ.

ຖ້າຫາກທ່ານກຳລັງເຮັດວຽກກັບຜູ້ສອນສາດສະໜາໃໝ່, ທ່ານຈະຊ່ວຍໃຫ້ຄູ່ສອນຂອງທ່ານຮຽນພາສາອັງກິດໄດ້ດີຂຶ້ນໄດ້ແນວໃດ?
ຖ້າຫາກທ່ານເປັນຜູ້ສອນສາດສະໜາໃໝ່, ທ່ານຈະຂໍຄວາມຊ່ວຍເຫລືອແບບໃດຈາກຄູ່ສອນຂອງທ່ານ?

ວັດທະນະທຳ ແລະ ການຮຽນພາສາ

ວັດທະນະທຳ ແລະ ພາສາມີຄວາມກ່ຽວຂ້ອງຢ່າງໃກ້ຊິດ. ການເຂົ້າໃຈວັດທະນະທຳຂອງຜູ້ຄົນຈະຊ່ວຍອະທິບາຍວິທີພາສາຖືກໃຊ້. ຄວາມເຂົ້າໃຈນີ້ຍັງຈະຊ່ວຍໃຫ້ທ່ານສື່ສານລັກສະນະພິເສດຂອງຂ່າວສານແຫ່ງການຟື້ນຟູ ໃນທາງທີ່ຈະແຈ່ມແຈ້ງຕໍ່ຜູ້ຄົນ.

ໜຶ່ງໃນສິ່ງທີ່ຍິ່ງໃຫຍ່ທີ່ສຸດ ທີ່ທ່ານສາມາດເຮັດໄດ້ເພື່ອໃຫ້ໄດ້ຮັບຄວາມໄວ້ວາງໃຈ ແລະ ຄວາມຮັກຈາກຜູ້ຄົນ ຄືການເຄົາລົບ ແລະ ຍອມຮັບວັດທະນະທຳຂອງເຂົາເຈົ້າດ້ວຍວິທີທີ່ເໝາະສົມ. ຜູ້ສອນສາດສະໜາທີ່ຍິ່ງໃຫຍ່ຫລາຍຄົນໄດ້ເຮັດສິ່ງນີ້ (ເບິ່ງ 1 ໂກຣິນໂທ 9:20–23).

ການສຶກສາສ່ວນຕົວ ຫລື ກັບຄູ່ສອນ

ໃຊ້ແນວຄິດຢູ່ຂ້າງລຸ່ມເພື່ອຊ່ວຍທ່ານກຽມສິດສອນຄົນໃດຄົນໜຶ່ງທີ່ມີພື້ນຖານວັດທະນະທຳທີ່ແຕກຕ່າງ.

ຄິດກ່ຽວກັບພື້ນຖານວັດທະນະທຳ ແລະ ສາດສະໜາຂອງຜູ້ຄົນທີ່ທ່ານສິດສອນ. ລະບຸດ້ານໃດດ້ານໜຶ່ງຂອງພື້ນຖານຂອງເຂົາເຈົ້າທີ່ອາດເຮັດໃຫ້ມັນຍາກທີ່ຈະເຂົ້າໃຈຫລັກທຳຂອງພຣະກິດຕິຄຸນ. ວາງແຜນວິທີການສິດສອນຫລັກທຳນີ້ຢ່າງແຈ່ມແຈ້ງ.

ຂອງປະທານແຫ່ງການເວົ້າພາສາ

ຂອງປະທານແຫ່ງພຣະວິນຍານມີແທ້ຈິງ. ຂອງປະທານແຫ່ງການເວົ້າພາສາ ແລະ ການແປຄວາມໝາຍພາສາມີການສະແດງອອກຫລາຍ. ບາງຢ່າງເຫລົ່ານີ້ແມ່ນການເວົ້າ, ຄວາມເຂົ້າໃຈ, ແລະ ການແປຄວາມໝາຍ. ທຸກວັນນີ້ຂອງປະທານແຫ່ງການເວົ້າພາສາມັກສະແດງໃຫ້ປະຈັກໃນການຮຽນຮູ້ ແລະ ການສຶກສາເພື່ອຊ່ວຍຜູ້ສອນສາດສະໜາຮຽນພາສາໃນການເຜີຍແຜ່ຂອງເຂົາເຈົ້າ.

ພຣະວິນຍານບໍລິສຸດສາມາດສະແດງໃຫ້ປະຈັກເຖິງຄວາມຈິງຂອງປະຈັກພະຍານຂອງທ່ານ ເຖິງແມ່ນວ່າຈະມີອຸປະສັກດ້ານພາສາລະຫວ່າງທ່ານກັບຜູ້ທີ່ທ່ານສິດສອນ. ເຊັ່ນດຽວກັນ, ພຣະວິນຍານບໍລິສຸດສາມາດນຳຖ້ອຍຄຳ ແລະ ວະລີມາສູ່ຄວາມຊົງຈຳຂອງທ່ານ ແລະ ຊ່ວຍໃຫ້ທ່ານເຂົ້າໃຈສິ່ງທີ່ຜູ້ຄົນເວົ້າອອກມາຈາກໃຈຂອງເຂົາເຈົ້າ.

ສ່ວນຫລາຍແລ້ວ, ທ່ານຈະບໍ່ໄດ້ຮັບຂອງປະທານເຫລົ່ານີ້ ໂດຍປາດສະຈາກຄວາມພະຍາຍາມ. ທ່ານຕ້ອງສະແຫວງຫາມັນຢ່າງແຂງຂັນ ເພື່ອເປັນພອນໃຫ້ແກ່ຄົນອື່ນ (ເບິ່ງ ຄຳສອນ ແລະ ພັນທະສັນຍາ 46:8–9, 26). ສ່ວນໜຶ່ງຂອງການສະແຫວງຫາຂອງປະທານແຫ່ງການເວົ້າພາສາຄືການອອກແຮງ ແລະ ເຮັດທຸກສິ່ງທີ່ທ່ານສາມາດ ເພື່ອຮຽນຮູ້ພາສາ. ຈົ່ງອົດທົນຂະນະທີ່ທ່ານສຶກສາ ແລະ ຝຶກຫັດພາສາດ້ວຍການອະທິຖານ. ໄວ້ວາງໃຈວ່າພຣະວິນຍານຈະຊ່ວຍທ່ານ ຂະນະທີ່ທ່ານໃຊ້ຄວາມພະຍາຍາມຢ່າງພາກພຽນ. ມີສັດທາວ່າທ່ານສາມາດມີຂອງປະທານໃນການເວົ້າພາສາເພື່ອຊ່ວຍທ່ານ ແລະ ຄົນທີ່ທ່ານສິດສອນ.

ເມື່ອທ່ານດີ້ນລົນກັບການສະແດງຕົວເອງໃຫ້ຊັດເຈນຕາມທີ່ທ່ານຕ້ອງການ, ຈົ່ງຈື່ຈຳວ່າພຣະວິນຍານສາມາດເວົ້າກັບໃຈຂອງລູກໆຂອງພຣະເຈົ້າ. ປະທານທອມມັສ ແອັສ ມອນສັນ ໄດ້ສິດສອນວ່າ:

“ມີພາສາດຽວ … ທີ່ໃຊ້ນຳກັນສຳລັບຜູ້ສອນສາດສະໜາແຕ່ລະຄົນ—ພາສາຂອງພຣະວິນຍານ. ບໍ່ສາມາດຮຽນຈາກປຶ້ມແບບຮຽນທີ່ຂຽນໂດຍມະນຸດທີ່ເປັນນັກຂຽນ, ທັງມັນບໍ່ໄດ້ມາຈາກການອ່ານ ແລະ ການທ່ອງຈຳ. ພາສາຂອງພຣະວິນຍານມາສູ່ຜູ້ທີ່ສະແຫວງຫາດ້ວຍສຸດໃຈຂອງເຂົາເຈົ້າ ທີ່ຈະຮູ້ຈັກພຣະເຈົ້າ ແລະ ຮັກສາພຣະບັນຍັດອັນສູງສົ່ງຂອງພຣະອົງ. ຄວາມສາມາດໃນພາສານີ້ອະນຸຍາດໃຫ້ບຸກຄົນຜ່ານຜ່າສິ່ງກີດຂວາງ, ເອົາຊະນະອຸປະສັກ, ແລະ ສຳຜັດໃຈຂອງມະນຸດ ” (“The Spirit Giveth Life,” Ensign, June 1997, 2).

ການສຶກສາສ່ວນຕົວ ຫລື ກັບຄູ່ສອນ

ໃຊ້ຂໍ້ຄວາມດັ່ງຕໍ່ໄປນີ້ເພື່ອປະເມີນຄວາມພະຍາຍາມຂອງທ່ານ ໃນການສະແຫວງຫາຂອງປະທານແຫ່ງການເວົ້າພາສາ. ບັນທຶກຄວາມປະທັບໃຈ ແລະ ເປົ້າໝາຍເພື່ອຊ່ວຍໃຫ້ທ່ານປັບປຸງການຮຽນພາສາຂອງທ່ານ.

ຂ້ອຍເຊື່ອວ່າຂ້ອຍໄດ້ຖືກເອີ້ນຈາກພຣະເຈົ້າ, ຜ່ານທາງສາດສະດາ, ເພື່ອສັ່ງສອນພຣະກິດຕິຄຸນໃນພາສາໃໝ່. (ຄຳສອນ ແລະ ພັນທະສັນຍາ 90:11)
ຄວາມຮັກຂອງຂ້ອຍທີ່ມີຕໍ່ພຣະຜູ້ເປັນເຈົ້າ ແລະ ຕໍ່ຜູ້ທີ່ຂ້ອຍຮັບໃຊ້ ເປັນແຮງຈູງໃຈຂ້ອຍ. (ຄຳສອນ ແລະ ພັນທະສັນຍາ 46:9; 1 ໂກຣິນໂທ 14:12)
ຂ້ອຍພະຍາຍາມດຳລົງຊີວິດຢ່າງມີຄ່າຄວນສຳລັບພຣະວິນຍານບໍລິສຸດ ໂດຍການຮັກສາພຣະບັນຍັດ, ການດຳລົງຊີວິດຕາມມາດຕະຖານຂອງການເຜີຍແຜ່, ແລະ ກັບໃຈທຸກວັນ. (ຄຳສອນ ແລະ ພັນທະສັນຍາ 46:9, 33)
ຂ້ອຍອະທິຖານຕະຫລອດເວລາເພື່ອຈະໄດ້ຮັບຂອງປະທານແຫ່ງການເວົ້າພາສາ. (ຄຳສອນ ແລະ ພັນທະສັນຍາ 46:28, 30–32)
ຂ້ອຍສຶກສາ, ຝຶກຫັດ, ແລະ ໃຊ້ພາສາການເຜີຍແຜ່ ໃຫ້ຫລາຍເທົ່າທີ່ເປັນໄປໄດ້ໃນແຕ່ລະວັນ. (1 ໂກຣິນໂທ 12:31)

ຈື່ຈຳສິ່ງນີ້

ສະແຫວງຫາທີ່ຈະເພີ່ມຄວາມເຂັ້ມແຂງໃຫ້ແກ່ສັດທາຂອງທ່ານ ວ່າພຣະເຢຊູຄຣິດຈະຊ່ວຍທ່ານຮຽນພາສາການເຜີຍແຜ່ຂອງທ່ານ.
ສ້າງແຜນການສຶກສາພາສາ ແລະ ລອງໃຊ້ແນວຄິດໃໝ່ເປັນປະຈຳ ເພື່ອປັບປຸງຄວາມສາມາດທາງພາສາຂອງທ່ານ.
ສະແຫວງຫາການນຳພາຈາກພຣະວິນຍານ ເພື່ອຊ່ວຍໃຫ້ທ່ານເຂົ້າໃຈ ແລະ ສື່ສານກັບຜູ້ຄົນໃນເຂດເຜີຍແຜ່ຂອງທ່ານ.
ອ່ານອອກສຽງ ແລະ ສຶກສາພຣະຄຳພີມໍມອນແຕ່ລະວັນໃນພາສາການເຜີຍແຜ່ຂອງທ່ານ.

ແນວຄິດສຳລັບການສຶກສາ ແລະ ການນຳໃຊ້

ການສຶກສາສ່ວນຕົວ

ທົບທວນແຫລ່ງພາສາໃນ Missionary Portal. ລະບຸບາງສິ່ງທີ່ທ່ານຍັງບໍ່ໄດ້ລອງເທື່ອ, ແລະ ຕັ້ງເປົ້າໝາຍທີ່ຈະລອງໃນສອງສາມມື້ຂ້າງໜ້າ.
ໃນສະພາທ້ອງຖິ່ນເທື່ອຕໍ່ໄປ, ຖາມຜູ້ສອນສາດສະໜາທີ່ມີປະສົບການ ພ້ອມກັບຄວາມສາມາດທາງພາສາວ່າເຂົາເຈົ້າໄດ້ເຮັດສິ່ງໃດແດ່ເພື່ອຮຽນຮູ້ພາສາ.

ການສຶກສາກັບຄູ່ສອນ ແລະ ການສັບປ່ຽນຄູ່ສອນ

ຝຶກສອນບົດຮຽນຜູ້ສອນສາດສະໜາໃຫ້ກັນແລະກັນ ໃນພາສາການເຜີຍແຜ່ຂອງທ່ານ. ທຳອິດ, ຜູ້ສອນສາດສະໜາໃໝ່ອາດສິດສອນຢ່າງລຽບງ່າຍ, ແບ່ງປັນປະຈັກພະຍານທີ່ລຽບງ່າຍ, ແລະ ກ່າວທ່ອງຈຳຂໍ້ພຣະຄຳພີ. ເມື່ອຄວາມໝັ້ນໃຈ ແລະ ຄວາມສາມາດຂອງເຂົາເຈົ້າເພີ່ມຂຶ້ນ, ເຂົາເຈົ້າຈະສາມາດມີສ່ວນຮ່ວມຢ່າງເຕັມທີ່ໃນການສິດສອນ.
ທົບທວນແນວຄິດໃນບົດຮຽນນີ້ ແລະ ແຫລ່ງຂໍ້ມູນພາສາໃນ Missionary Portal. ສົນທະນາຄຳແນະນຳທີ່ທ່ານຈະໃຊ້ໃນການສຶກສາກັບຄູ່ສອນລະຫວ່າງອາທິດໜ້າ.
ຂໍໃຫ້ຄູ່ສອນຂອງທ່ານຟັງການອອກສຽງ ແລະ ຊ່ວຍທ່ານປັບປຸງ. ຂໍໃຫ້ລາວສັງເກດສະຖານະການໃນເວລາທີ່ທ່ານບໍ່ເຂົ້າໃຈ. ຂຽນລາຍການຄຳສັບ, ວະລີ, ຫລື ໄວຍະກອນທີ່ຈະຊ່ວຍໄດ້. ອະທິບາຍ ແລະ ຝຶກຫັດວິທີໃຊ້ສິ່ງທີ່ຢູ່ໃນລາຍການ ໃນກິດຈະກຳທີ່ຈະມາເຖິງ.
ຝຶກຫັດການຟັງຢ່າງຫ້າວຫັນ. ວາງແຜນເວລາໃນລະຫວ່າງວັນເພື່ອຟັງຢ່າງຫ້າວຫັນ ເພື່ອລະບຸຄຳສັບ ແລະ ແບບແຜນທີ່ທ່ານໄດ້ຮຽນຮູ້. ເມື່ອທ່ານໄດ້ຍິນວະລີຖືກກ່າວໃນວິທີແຕກຕ່າງຈາກວິທີທີ່ທ່ານຈະເວົ້າ, ໃຫ້ຂຽນມັນລົງໄວ້ ແລະ ຝຶກມັນ.
ຂຽນລາຍການສິ່ງທີ່ຜູ້ຄົນອາດເວົ້າໃນມື້ນັ້ນ. ວາງແຜນ ແລະ ຝຶກຫັດວິທີທີ່ທ່ານສາມາດຕອບ.

ສະພາທ້ອງຖິ່ນ, ກອງປະຊຸມອະນາເຂດ, ແລະ ສະພາຜູ້ນຳເຂດເຜີຍແຜ່

ເຊື້ອເຊີນເຈົ້າຂອງພາສາມາຮ່ວມການປະຊຸມເຫລົ່ານີ້ນຳ. ຈັດໃຫ້ຜູ້ສອນສາດສະໜາສິດສອນເຂົາເຈົ້າໃນກຸ່ມນ້ອຍໆ. ຂໍໃຫ້ເຈົ້າຂອງພາສາຈົດບັນທຶກ ແລະ ໃຫ້ຄຳຄິດເຫັນກ່ຽວກັບຄວາມສາມາດທາງພາສາຂອງຜູ້ສອນສາດສະໜາ.
ມອບໝາຍຜູ້ສອນສາດສະໜາໜຶ່ງ ຫລື ສອງຄົນລ່ວງໜ້າ ເພື່ອບອກກ່ຽວກັບຜົນສຳເລັດທີ່ເຂົາເຈົ້າມີໃນການສຶກສາພາສາ.
ມອບໝາຍຜູ້ສອນສາດສະໜາທີ່ມີປະສົບການຄົນໜຶ່ງໃຫ້ສະເໜີບາງສ່ວນສັ້ນໆ ໃນພາສາທີ່ຕາມປົກກະຕິແລ້ວ ເປັນເລື່ອງຫຍຸ້ງຍາກສຳລັບຜູ້ສອນສາດສະໜາ. ໃຫ້ລາວສະເໜີຕົວຢ່າງຂອງການໃຊ້ພາສາທີ່ດີ, ແລະ ໃຫ້ຜູ້ສອນສາດສະໜານຳໄປປະຕິບັດ.
ໃຫ້ຜູ້ສອນສາດສະໜາທີ່ເປັນເຈົ້າຂອງວັດທະນະທຳແບ່ງປັນຄວາມຮູ້ແຈ້ງຂອງເຂົາເຈົ້າ.

ຜູ້ນຳເຜີຍແຜ່ ແລະ ທີ່ປຶກສາເຜີຍແຜ່

ເນັ້ນໜັກເຖິງຄວາມສຳຄັນຂອງການສຶກສາພາສາທຸກວັນຢ່າງສະໝ່ຳສະເໝີ.
ຊຸກຍູ້ຜູ້ສອນສາດສະໜາໃຫ້ໃຊ້ພາສາການເຜີຍແຜ່ຂອງເຂົາເຈົ້າໃຫ້ຫລາຍເທົ່າທີ່ເປັນໄປໄດ້.
ຈັດກຽມອົງປະກອບຂອງແຜນການສຶກສາພາສາການເຜີຍແຜ່ໃນຕາຕະລາງການສຶກສາທີ່ເປັນລະບົບ. ທົບທວນສິ່ງນີ້ໃນການປະຊຸມສະພາທ້ອງຖິ່ນ.
ຊອກຫາໂອກາດທີ່ຈະເວົ້າລົມກັບຜູ້ສອນສາດສະໜາ ໃນພາສາທີ່ເຂົາເຈົ້າກຳລັງຮຽນຮູ້. ສຳພາດເຂົາເຈົ້າໃນພາສານີ້ເປັນໄລຍະໆ.
ຂໍແນວຄິດຈາກຜູ້ນຳ ແລະ ສະມາຊິກໃນທ້ອງຖິ່ນ ວ່າຜູ້ສອນສາດສະໜາຈະພັດທະນາຄວາມສາມາດທາງພາສາຂອງເຂົາເຈົ້າໄດ້ແນວໃດ.
ໃຫ້ຄຳແນະນຳໃນກອງປະຊຸມອະນາເຂດ ຫລື ໃນການປະຊຸມຜູ້ນຳເຂດເຜີຍແຜ່ກ່ຽວກັບຂໍ້ຜິດພາດທີ່ພົບເຫັນຫລາຍທີ່ສຸດ ໂດຍຜູ້ສອນສາດສະໜາຜູ້ກຳລັງຮຽນພາສາການເຜີຍແຜ່ຂອງທ່ານ.
ສິດສອນຜູ້ສອນສາດສະໜາກ່ຽວກັບຂອງປະທານທາງວິນຍານ.
ສັງເກດເບິ່ງຜູ້ສອນສາດສະໜາໃນເວລາທີ່ເຂົາເຈົ້າສິດສອນໃນພາສາການເຜີຍແຜ່.