“ບົດທີ 8: ບັນລຸວຽກງານຜ່ານທາງເປົ້າໝາຍ ແລະ ແຜນການ,” ຈົ່ງສັ່ງສອນພຣະກິດຕິຄຸນຂອງເຮົາ: ຄູ່ມືຕໍ່ການແບ່ງປັນພຣະກິດຕິຄຸນຂອງພຣະເຢຊູຄຣິດ (2023)
“ບົດທີ 8,” ຈົ່ງສັ່ງສອນພຣະກິດຕິຄຸນຂອງເຮົາ
ບົດທີ 8
ບັນລຸວຽກງານຜ່ານທາງເປົ້າໝາຍ ແລະ ແຜນການ
ໃຫ້ພິຈາລະນາສິ່ງນີ້
-
ເປັນຫຍັງເຮົາຕ້ອງຕັ້ງເປົ້າໝາຍ?
-
ຕົວຊີ້ບອກທີ່ສຳຄັນສຳລັບການປ່ຽນໃຈເຫລື້ອມໃສຈະສາມາດຊ່ວຍໃຫ້ເຮົາສຸມໃສ່ຄວາມກ້າວໜ້າຂອງແຕ່ລະບຸກຄົນໄດ້ແນວໃດ?
-
ເຮົາຈະຕັ້ງເປົ້າໝາຍ, ວາງແຜນເພື່ອບັນລຸມັນ, ແລະ ດຳເນີນການຕາມແຜນຂອງເຮົາໄດ້ແນວໃດ?
-
ເຮົາຈະດຳເນີນພາກການວາງແຜນປະຈຳອາທິດ ແລະ ປະຈຳວັນໄດ້ແນວໃດ?
-
ເຮົາຈະໃຊ້ແອັບ Preach My Gospel ເພື່ອຊ່ວຍໃຫ້ເຮົາບັນລຸວຽກງານໄດ້ແນວໃດ?
-
ແມ່ນຫຍັງຄືຫລັກທຳແຫ່ງຄວາມຮັບຜິດຊອບ? ມັນຈະເປັນພອນໃຫ້ແກ່ຄວາມພະຍາຍາມຂອງເຮົາແນວໃດ?
ທ່ານໄດ້ຮັບການມອບໝາຍໃຫ້ຊ່ວຍວຽກງານຂອງພຣະຜູ້ເປັນເຈົ້າ ໃນດ້ານໃດດ້ານໜຶ່ງໂດຍສະເພາະ. ພຣະອົງຕ້ອງການໃຫ້ທ່ານເປັນພອນແກ່ທຸກຄົນ ດ້ວຍຄວາມຮັກ ແລະ ຄວາມຈິງຂອງພຣະອົງ. ພຣະອົງຕ້ອງການໃຫ້ທ່ານເຊື້ອເຊີນ ແລະ ຊ່ວຍເຂົາເຈົ້າໃຫ້ມາຫາພຣະອົງ.
ພຣະຜູ້ເປັນເຈົ້າປາດຖະໜາໃຫ້ທ່ານ “ກະຕືລືລົ້ນໃນອຸດົມການດີ [ນີ້].” ພຣະອົງຂໍໃຫ້ທ່ານ “ເຮັດຫລາຍສິ່ງຫລາຍຢ່າງດ້ວຍຄວາມສະໝັກໃຈຂອງຕົນເອງ, ແລະ ເຮັດໃຫ້ເກີດຄວາມຊອບທຳຢ່າງຫລວງຫລາຍ” (ຄຳສອນ ແລະ ພັນທະສັນຍາ 58:27; ເບິ່ງ ຂໍ້ທີ 26–29). ຈົ່ງເຮັດທຸກສິ່ງທີ່ທ່ານສາມາດເພື່ອອອກຈາກແຕ່ລະຫວອດ ຫລື ສາຂາທີ່ທ່ານຮັບໃຊ້ໃຫ້ເຂັ້ມແຂງກວ່າຕອນທີ່ທ່ານມາເຖິງ.
ບົດນີ້ຈະຊ່ວຍໃຫ້ທ່ານຮຽນຮູ້ວິທີຕັ້ງເປົ້າໝາຍ, ວາງແຜນເພື່ອບັນລຸມັນ, ດຳເນີນການຕາມແຜນຂອງທ່ານຢ່າງພາກພຽນ. ມັນບັນຍາຍເຖິງຕົວຊີ້ບອກທີ່ສຳຄັນສຳລັບການປ່ຽນໃຈເຫລື້ອມໃສ, ຊຶ່ງນຳພາຄວາມພະຍາຍາມຂອງທ່ານໃນການຊ່ວຍໃຫ້ລູກໆຂອງພຣະເຈົ້າກ້າວໜ້າທາງວິນຍານ. ແລ້ວມັນຈະນຳສະເໜີຂະບວນການຕັ້ງເປົ້າໝາຍງ່າຍໆ ທີ່ທ່ານສາມາດໃຊ້ໄດ້ໃນທຸກດ້ານຂອງວຽກງານເຜີຍແຜ່ ລວມທັງເປົ້າໝາຍສ່ວນຕົວ ແລະ ກັບຄູ່ສອນຂອງທ່ານ. ມັນຍັງໃຫ້ໂຄງຮ່າງເຖິງວິທີຈັດພາກການວາງແຜນປະຈຳອາທິດ ແລະ ປະຈຳວັນກັບຄູ່ສອນຂອງທ່ານນຳອີກ.
ການຮຽນຮູ້ທີ່ຈະຕັ້ງເປົ້າໝາຍ ແລະ ວາງແຜນ ສາມາດເປັນພອນຕະຫລອດຊີວິດຂອງທ່ານ. ມັນສາມາດຊ່ວຍທ່ານເຮັດ ແລະ ຮັກສາພັນທະສັນຍາກັບພຣະເຈົ້າ, ຮັບໃຊ້ຢ່າງຊື່ສັດໃນສາດສະໜາຈັກ, ສະແຫວງຫາການສຶກສາ, ເຕີບໂຕໃນອາຊີບການງານ, ແລະ ສ້າງຄອບຄົວທີ່ເຂັ້ມແຂງ.
ການສຶກສາພຣະຄຳພີ
ທ່ານສາມາດຮຽນຮູ້ຫຍັງແດ່ຈາກຂໍ້ພຣະຄຳພີດັ່ງຕໍ່ໄປນີ້ ກ່ຽວກັບການວາງແຜນເພື່ອບັນລຸວຽກງານຂອງພຣະເຈົ້າ?
ຊ່ວຍໃຫ້ຄົນອື່ນປ່ຽນໃຈເຫລື້ອມໃສຕໍ່ພຣະຜູ້ຊ່ວຍໃຫ້ລອດ
ສຸມໃສ່ຈຸດປະສົງການເຜີຍແຜ່ຂອງທ່ານ
ບາງທີທ່ານອາດສົງໄສວ່າ ໜ້າທີ່ໃດໃນໜ້າທີ່ຫລາຍຢ່າງຂອງການເຜີຍແຜ່ຂອງທ່ານທີ່ມີຄວາມສຳຄັນທີ່ສຸດ. ນີ້ແມ່ນຄຳຖາມທີ່ດີໃຫ້ພິຈາລະນາ ຂະນະທີ່ທ່ານຕັ້ງເປົ້າໝາຍປະຈຳອາທິດ ແລະ ປະຈຳວັນ. ເພື່ອຊ່ວຍຕອບ, ໃຫ້ຄິດກ່ຽວກັບຈຸດປະສົງຂອງທ່ານໃນຖານະຜູ້ສອນສາດສະໜາ:
“ເຊື້ອເຊີນຜູ້ອື່ນໃຫ້ເຂົ້າມາຫາພຣະຄຣິດ ໂດຍການຊ່ວຍໃຫ້ເຂົາເຈົ້າຮັບເອົາພຣະກິດຕິຄຸນທີ່ຖືກຟື້ນຟູ ຜ່ານທາງສັດທາໃນພຣະເຢຊູຄຣິດ ແລະ ການຊົດໃຊ້ຂອງພຣະອົງ, ການກັບໃຈ, ການຮັບບັບຕິສະມາ, ການຮັບເອົາຂອງປະທານແຫ່ງພຣະວິນຍານບໍລິສຸດ, ແລະ ການອົດທົນຈົນເຖິງທີ່ສຸດ.”
ປ່ອຍໃຫ້ຈຸດປະສົງການເຜີຍແຜ່ຂອງທ່ານ ນຳພາເປົ້າໝາຍ ແລະ ແຜນການຂອງທ່ານ. ສຸມໃສ່ວິທີທີ່ທ່ານສາມາດຊ່ວຍແຕ່ລະຄົນໃຊ້ອຳເພີໃຈຂອງເຂົາເຈົ້າ ເພື່ອປ່ຽນໃຈເຫລື້ອມໃສຕໍ່ພຣະຜູ້ຊ່ວຍໃຫ້ລອດ ແລະ ຮັບເອົາພຣະກິດຕິຄຸນຂອງພຣະອົງ.
ສະແຫວງຫາການນຳພາຈາກພຣະວິນຍານ ແລະ ປຶກສາຫາລືກັບຄູ່ສອນຂອງທ່ານ ຂະນະທີ່ທ່ານຕັ້ງເປົ້າໝາຍ ແລະ ວາງແຜນ. ແລ້ວເຮັດຕາມແຜນຂອງທ່ານ ແລະ ໃຊ້ເວລາຢ່າງມີປະສິດທິພາບ.
“ເຮົາບໍ່ໄດ້ສັ່ງສອນ ແລະ ສິດສອນເພື່ອ ‘ນຳຜູ້ຄົນເຂົ້າມາໃນສາດສະໜາຈັກ’ ຫລື ເພີ່ມຈຳນວນສະມາຊິກກະພາບຂອງສາດສະໜາຈັກ. ເຮົາບໍ່ໄດ້ສັ່ງສອນ ແລະ ສິດສອນ ພຽງແຕ່ເພື່ອຊັກຊວນຜູ້ຄົນໃຫ້ດຳລົງຊີວິດທີ່ດີກວ່າເກົ່າເທົ່ານັ້ນ. … ເຮົາເຊື້ອເຊີນທຸກຄົນໃຫ້ມາຫາພຣະຄຣິດ ໂດຍການກັບໃຈ ແລະ ຮັບບັບຕິສະມາ ແລະ ການຢືນຢັນ ເພື່ອເປີດປະຕູຂອງອານາຈັກຊັ້ນສູງແກ່ບຸດ ແລະ ທິດາຂອງພຣະເຈົ້າ. ບໍ່ມີໃຜສາມາດເຮັດສິ່ງນີ້ໄດ້” (Dallin H. Oaks, “The Purpose of Missionary Work,” missionary satellite broadcast, Apr. 1995).
ການສຶກສາພຣະຄຳພີ
ຜູ້ສອນສາດສະໜາ ແລະ ສາດສະດາເຫລົ່ານີ້ໄດ້ບັນລຸແຜນຂອງພວກເພິ່ນດ້ວຍຄວາມຊ່ວຍເຫລືອຂອງພຣະຜູ້ເປັນເຈົ້າແນວໃດ?
ສອດຄ່ອງກັບຕົວຊີ້ບອກທີ່ສຳຄັນສຳລັບການປ່ຽນໃຈເຫລື້ອມໃສ
ຜູ້ນຳຂອງສາດສະໜາຈັກໄດ້ລະບຸຕົວຊີ້ບອກທີ່ສຳຄັນຫົກຢ່າງສຳລັບການປ່ຽນໃຈເຫລື້ອມໃສ. ຕົວຊີ້ບອກທີ່ສຳຄັນຊ່ວຍທ່ານສຸມໃສ່ຄວາມກ້າວໜ້າທາງວິນຍານຂອງລູກໆຂອງພຣະເຈົ້າ. ມັນມີຈຸດປະສົງເພື່ອຊ່ວຍໃຫ້ທ່ານຈັດຄວາມພະຍາຍາມປະຈຳວັນຂອງທ່ານກັບຈຸດປະສົງການເຜີຍແຜ່ຂອງທ່ານ.
ຕົວຊີ້ບອກທີ່ສຳຄັນສຳລັບການປ່ຽນໃຈເຫລື້ອມໃສສະແດງຢູ່ຂ້າງລຸ່ມ.
|
ຮູບພາບ ຜູ້ສອນສາດສະໜາກຳລັງຈັບມືກັບຜູ້ຊາຍ |
ຄົນໃໝ່ກຳລັງຖືກສິດສອນ. ແຕ່ລະຄົນ (ບໍ່ໄດ້ຮັບບັບຕິສະມາ) ຜູ້ໄດ້ຮັບບົດຮຽນໃນອາທິດທີ່ກຳນົດ (ແຕ່ບໍ່ໄດ້ຮັບການສິດສອນໃນຊ່ວງໄລຍະສາມເດືອນທີ່ຜ່ານມາ) ແລະ ໄດ້ຍອມຮັບການນັດໝາຍສະເພາະໃຫ້ກັບມາ. ຕາມປົກກະຕິແລ້ວ ບົດຮຽນແມ່ນລວມທັງການອະທິຖານ (ເມື່ອເໝາະສົມ), ສິດສອນຢ່າງໜ້ອຍໜຶ່ງຫລັກທຳພຣະກິດຕິຄຸນ, ແລະ ສະເໜີການເຊື້ອເຊີນ. |
|
ຮູບພາບ ຜູ້ສອນສາດສະໜາກຳລັງສິດສອນ |
ບົດຮຽນທີ່ມີສະມາຊິກເຂົ້າຮ່ວມ. ຈຳນວນຂອງບົດຮຽນໃນອາທິດທີ່ກຳນົດ ຊຶ່ງໃນນັ້ນບຸກຄົນ (ບໍ່ໄດ້ຮັບບັບຕິສະມາ) ໄດ້ຖືກສິດສອນ ແລະ ສະມາຊິກໄດ້ເຂົ້າຮ່ວມ. |
|
ຮູບພາບ ຄອບຄົວຢູ່ທີ່ໂບດ |
ຜູ້ຄົນທີ່ຮັບການສິດສອນເຂົ້າຮ່ວມກອງປະຊຸມສິນລະລຶກ. ແຕ່ລະຄົນ (ບໍ່ໄດ້ຮັບບັບຕິສະມາ) ທີ່ທ່ານກຳລັງສິດສອນ ທີ່ເຂົ້າຮ່ວມກອງປະຊຸມສິນລະລຶກ ໃນອາທິດທີ່ກຳນົດ. |
|
ຮູບພາບ ຄອບຄົວກຳລັງອະທິຖານ |
ຜູ້ຄົນທີ່ມີວັນບັບຕິສະມາ. ແຕ່ລະຄົນຜູ້ໄດ້ຕົກລົງທີ່ຈະຮັບບັບຕິສະມາ ແລະ ການຢືນຢັນໃນວັນທີໃດໜຶ່ງສະເພາະ. |
|
ຮູບພາບ ການບັບຕິສະມາ |
ຜູ້ຄົນທີ່ຮັບບັບຕິສະມາ ແລະ ການຢືນຢັນ. ສະມາຊິກໃໝ່ແຕ່ລະຄົນທີ່ໄດ້ຮັບພິທີການບັບຕິສະມາ ແລະ ການຢືນຢັນ ແລະ ຜູ້ທີ່ໃບຟອມຖືກສົ່ງໄປທາງອີເລັກໂທຣນິກ ໃນອາທິດທີ່ກຳນົດ. (ເບິ່ງ ບົດທີ 12 ສຳລັບຄຳນິຍາມຂອງການບັບຕິສະມາຜູ້ປ່ຽນໃຈເຫລື້ອມໃສ ແລະ ສຳລັບຂໍ້ມູນກ່ຽວກັບການສ້າງບັນທຶກ.) |
|
ຮູບພາບ ຜູ້ຍິງຢູ່ທີ່ໂບດ |
ສະມາຊິກໃໝ່ເຂົ້າຮ່ວມກອງປະຊຸມສິນລະລຶກ. ສະມາຊິກໃໝ່ແຕ່ລະຄົນທີ່ຟອມບັບຕິສະມາ ແລະ ການຢືນຢັນຖືກສົ່ງໄປພາຍໃນ 12 ເດືອນຜ່ານມາ ທີ່ເຂົ້າຮ່ວມກອງປະຊຸມສິນລະລຶກ ໃນອາທິດທີ່ກຳນົດ. |
ໂດຍສະຫລຸບ, ໃຫ້ຄວາມສຳຄັນກັບການຊ່ວຍໃຫ້ຜູ້ຄົນເລືອກທີ່ຈະມີສ່ວນຮ່ວມໃນປະສົບການເຫລົ່ານີ້. ສຸມຄວາມພະຍາຍາມຂອງທ່ານໃສ່ກິດຈະກຳດັ່ງຕໍ່ໄປນີ້:
-
ຜູ້ທີ່ຊ່ວຍທ່ານຫາຄົນໃໝ່ເພື່ອສິດສອນ
-
ຜູ້ທີ່ຊ່ວຍໃຫ້ຜູ້ຄົນກ້າວໜ້າໄປສູ່ການເຮັດ ແລະ ການຮັກສາພັນທະສັນຍາ
-
ຜູ້ທີ່ຊ່ວຍຜູ້ຄົນທີ່ໄດ້ຮັບບັບຕິສະມາ ແລະ ການຢືນຢັນໃນປີທີ່ຜ່ານມາ
ຖ້າຫາກທ່ານບໍ່ສາມາດເຫັນໄດ້ວ່າ ຄວາມພະຍາຍາມຂອງທ່ານອາດຈະຊ່ວຍໃຫ້ບຸກຄົນໃດໜຶ່ງກ້າວໜ້າໄປໃນທາງທີ່ສະທ້ອນຢູ່ໃນຕົວຊີ້ບອກທີ່ສຳຄັນຂອງທ່ານ, ໃຫ້ປະເມີນວ່າກິດຈະກຳນັ້ນເປັນການໃຊ້ເວລາຂອງທ່ານຢ່າງກຸ້ມຄ່າຫລືບໍ່.
ສຳລັບຜູ້ຄົນທີ່ທ່ານໃຊ້ເວລາໜ້ອຍກັບເຂົາເຈົ້າ, ໃຫ້ສືບຕໍ່ບຳລຸງລ້ຽງຄວາມສົນໃຈຂອງເຂົາເຈົ້າໃນພຣະກິດຕິຄຸນ. ທ່ານສາມາດເຊື້ອເຊີນສະມາຊິກໃຫ້ເອື້ອມອອກໄປຫາເຂົາເຈົ້າ. ທ່ານກໍສາມາດໃຊ້ເທັກໂນໂລຈີນຳອີກ ເພື່ອຊຸກຍູ້ເຂົາເຈົ້າ ແລະ ສືບຕໍ່ປະຕິບັດສາດສະໜາກິດຕໍ່ເຂົາເຈົ້າ. ເບິ່ງ “ໃຊ້ເທັກໂນໂລຈີ” ໃນ ບົດທີ 9 ສຳລັບແນວຄິດເພີ່ມເຕີມ.
“ຈຸດປະສົງສູງສຸດຂອງການວາງແຜນ ແລະ ການຕັ້ງເປົ້າໝາຍແມ່ນການສ້າງສານຸສິດ—ນັ້ນຄື, ມີຜູ້ປ່ຽນໃຈເຫລື້ອມໃສທີ່ອຸທິດຕົນ ທີ່ເຮັດ ແລະ ຮັກສາພັນທະສັນຍາ, ເລີ່ມຕົ້ນດ້ວຍພັນທະສັນຍາແຫ່ງການບັບຕິສະມາ ນຳໄປສູ່ພັນທະສັນຍາພຣະວິຫານ” (Quentin L. Cook, “Purpose and Planning,” mission leadership seminar, June 25, 2019).
ຕັ້ງເປົ້າໝາຍຕົວຊີ້ບອກທີ່ສຳຄັນ ແລະ ວາງແຜນ
ລະຫວ່າງການວາງແຜນປະຈຳອາທິດ, ທ່ານ ແລະ ຄູ່ສອນຂອງທ່ານຕັ້ງເປົ້າໝາຍສຳລັບຕົວຊີ້ບອກທີ່ສຳຄັນ. ເປົ້າໝາຍຕົວຊີ້ບອກທີ່ສຳຄັນຂອງທ່ານຄວນສະທ້ອນເຖິງຄວາມປາດຖະໜາຂອງທ່ານທີ່ຈະຊ່ວຍໃຫ້ຜູ້ຄົນປະສົບກັບພອນຂອງການປ່ຽນໃຈເຫລື້ອມໃສຫລາຍຂຶ້ນ.
ຕັ້ງເປົ້າໝາຍ ແລະ ວາງແຜນທີ່ຈະເຮັດສິ່ງຕ່າງໆໃນການຄວບຄຸມຂອງທ່ານ ທີ່ສາມາດມີອິດທິພົນຕໍ່ຜົນໄດ້ຮັບຂອງຕົວຊີ້ບອກທີ່ສຳຄັນ. ຍົກຕົວຢ່າງ:
-
ທ່ານອາດຕັ້ງເປົ້າໝາຍຕົວຊີ້ບອກທີ່ສຳຄັນ ເພື່ອເລີ່ມສິດສອນຕາມຈຳນວນຜູ້ຄົນທີ່ກຳນົດໃນລະຫວ່າງອາທິດນັ້ນ. ບໍ່ວ່າທ່ານຈະບັນລຸເປົ້າໝາຍຫລືບໍ່ແມ່ນຂຶ້ນຢູ່ກັບອຳເພີໃຈຂອງຜູ້ຄົນ. ແຕ່ໃຫ້ເຮັດໃນສິ່ງທີ່ຢູ່ໃນການຄວບຄຸມຂອງທ່ານ ເພື່ອບັນລຸມັນ. ວິທີໜຶ່ງຄືການຕັ້ງເປົ້າໝາຍທີ່ຈະເວົ້າລົມກັບຜູ້ຄົນໃໝ່ໆຈຳນວນໃດໜຶ່ງສະເພາະໃນແຕ່ລະວັນ. ແລ້ວວາງແຜນວ່າ ທ່ານຈະເຮັດແນວໃດ. ເບິ່ງແນວຄິດຢູ່ໃນ ພາກຫ້ອຍທ້າຍ 2 ຂອງບົດນີ້ ແລະ ໃນ ບົດທີ 9.
-
ທ່ານອາດຕັ້ງເປົ້າໝາຍຕົວຊີ້ບອກທີ່ສຳຄັນເພື່ອໃຫ້ສະມາຊິກໃໝ່ ແລະ ຜູ້ຄົນທີ່ທ່ານກຳລັງສິດສອນຈຳນວນໃດໜຶ່ງສະເພາະເຂົ້າຮ່ວມກອງປະຊຸມສິນລະລຶກ. ບໍ່ວ່າເຂົາເຈົ້າຈະມາ ຫລື ບໍ່ມາ ກໍຂຶ້ນຢູ່ກັບອຳເພີໃຈຂອງເຂົາເຈົ້າ. ແຕ່ໃຫ້ເຮັດໃນສິ່ງທີ່ຢູ່ໃນການຄວບຄຸມຂອງທ່ານ ເພື່ອມີອິດທິພົນຕໍ່ຜົນໄດ້ຮັບຂອງຕົວຊີ້ບອກທີ່ສຳຄັນ. ວາງແຜນວ່າຈະເຊື້ອເຊີນເຂົາເຈົ້າເມື່ອໃດ ແລະ ຈະຕິດຕາມຜົນແນວໃດ.
-
ທ່ານອາດຕັ້ງເປົ້າໝາຍຕົວຊີ້ບອກທີ່ສຳຄັນ ເພື່ອໃຫ້ສະມາຊິກມີສ່ວນຮ່ວມໃນຈຳນວນບົດຮຽນໃດໜຶ່ງສະເພາະ ລະຫວ່າງອາທິດນັ້ນ. ບໍ່ວ່າທ່ານຈະເອື້ອມເຖິງເປົ້າໝາຍນັ້ນຫລືບໍ່ ແມ່ນຂຶ້ນຢູ່ກັບສະມາຊິກ ແລະ ຜູ້ຄົນທີ່ທ່ານກຳລັງສິດສອນ. ແຕ່ໃຫ້ເຮັດຕາມທີ່ທ່ານສາມາດເຮັດໄດ້ ເພື່ອໃຫ້ມີອິດທິພົນຕໍ່ຜົນໄດ້ຮັບຂອງຕົວຊີ້ບອກທີ່ສຳຄັນນີ້. ຕັ້ງເປົ້າໝາຍເພື່ອເຮັດວຽກງານກັບຜູ້ນຳໃນຫວອດ ເພື່ອໃຫ້ສະມາຊິກເຂົ້າຮ່ວມ. ແລ້ວວາງແຜນວິທີທີ່ທ່ານຈະປະສານງານການມີສ່ວນຮ່ວມຂອງເຂົາເຈົ້າ.
ໃນຖານະເປັນຄູ່ສອນ, ທ່ານຕັ້ງເປົ້າໝາຍຕົວຊີ້ບອກທີ່ສຳຄັນ ສຳລັບເຂດຂອງທ່ານເອງ. ອີງໃສ່ (1) ຄວາມກ້າວໜ້າຂອງຜູ້ທີ່ທ່ານກຳລັງສິດສອນ ແລະ (2) ຄວາມຕ້ອງການທີ່ຈະຊອກຫາຄົນໃໝ່ເພື່ອສິດສອນ. ການຊອກຫາຄົນໃໝ່ເພື່ອສິດສອນນັ້ນເປັນຄວາມຕ້ອງການຕະຫລອດເວລາ.
ເປົ້າໝາຍຕົວຊີ້ບອກທີ່ສຳຄັນທົ່ວເຂດເຜີຍແຜ່ ແມ່ນຂຶ້ນຢູ່ກັໍບເປົ້າໝາຍທີ່ຕັ້ງໂດຍແຕ່ລະຄູ່.
ແອັບ Preach My Gospel ຈະຊ່ວຍໃຫ້ທ່ານສຸມໃຈໃສ່ຜູ້ຄົນ ຂະນະທີ່ທ່ານຕັ້ງເປົ້າໝາຍຕົວຊີ້ບອກທີ່ສຳຄັນ. ແອັບນີ້ຈະຊ່ວຍໃຫ້ທ່ານຮຽນຮູ້ຈາກເປົ້າໝາຍທີ່ຜ່ານມາ ແລະ ສະແດງໃຫ້ເຫັນຄວາມຄືບໜ້າຂອງທ່ານໄປສູ່ເປົ້າໝາຍໃນປະຈຸບັນ.
ເປົ້າໝາຍ ແລະ ຜົນໄດ້ຮັບຕົວຊີ້ບອກທີ່ສຳຄັນຖືກລາຍງານໂດຍອັດຕະໂນມັດຕໍ່ຜູ້ນຳເຜີຍແຜ່ຂອງທ່ານ ແລະ ຜູ້ນຳຜູ້ສອນສາດສະໜາໜຸ່ມ ຜ່ານທາງແອັບ Preach My Gospel.
ລະວັງຢ່າເນັ້ນເປົ້າໝາຍຕົວຊີ້ບອກທີ່ສຳຄັນອັນໃດອັນໜຶ່ງຫລາຍກວ່າເປົ້າໝາຍອື່ນໆ. ການສຸມໃສ່ຢ່າງຕໍ່ເນື່ອງກ່ຽວກັບຕົວຊີ້ບອກທີ່ສຳຄັນທັງໝົດ ຈະຊ່ວຍໃຫ້ທ່ານເຊື້ອເຊີນຄົນອື່ນໃຫ້ມາຫາພຣະຄຣິດ ແລະ ເຮັດພັນທະສັນຍາຢ່າງສະໝ່ຳສະເໝີ.
“ເມື່ອຜົນງານຖືກວັດແທກ, ຜົນງານຈະດີຂຶ້ນ. ເມື່ອຜົນງານຖືກວັດແທກ ແລະ ຖືກລາຍງານ, ອັດຕາການປັບປຸງຈະເລັ່ງໄວຂຶ້ນ” (quoted by Thomas S. Monson, “Thou Art a Teacher Come from God,” Improvement Era, Dec. 1970, 101).
ເຮັດວຽກງານຢ່າງພາກພຽນ
ພຣະຜູ້ເປັນເຈົ້າປາດຖະໜາໃຫ້ທ່ານ “ກະທຳ … ດ້ວຍຄວາມພາກພຽນ” ໃນການຮັບໃຊ້ເຜີຍແຜ່ຂອງທ່ານ (ຄຳສອນ ແລະ ພັນທະສັນຍາ 107:99). ຄວາມພາກພຽນແມ່ນຄວາມພະຍາຍາມທີ່ສະໝ່ຳສະເໝີ ແລະ ກ້າຫານ.
ຈົ່ງເຮັດວຽກງານຢ່າງພາກພຽນໃນເປົ້າໝາຍຕົວຊີ້ບອກທີ່ສຳຄັນຂອງທ່ານ. ເຊື້ອເຊີນຜູ້ຄົນໃຫ້ເຮັດຄຳໝັ້ນສັນຍາທີ່ນຳໄປສູ່ການປ່ຽນໃຈເຫລື້ອມໃສ. ຄວາມພະຍາຍາມຢ່າງພາກພຽນຂອງທ່ານສາມາດດົນໃຈເຂົາເຈົ້າໃຫ້ເຮັດສິ່ງທີ່ຈະຊ່ວຍໃຫ້ເຂົາເຈົ້າມາຫາພຣະຄຣິດ (ເບິ່ງ 2 ນີໄຟ 2:14–16).
ສິດສອນພຣະກິດຕິຄຸນໃນວິທີທີ່ສະໜອງຄວາມຕ້ອງການຂອງຜູ້ຄົນ. ຄຳສອນ, ເມື່ອເຂົ້າໃຈໂດຍພຣະວິນຍານ, ຈະມີແນວໂນ້ມຫລາຍກວ່າສິ່ງອື່ນໃດໃນການດົນໃຈເຂົາເຈົ້າໃຫ້ກະທຳ.
ໃນເວລາດຽວກັນ, ໃຫ້ຮັບຮູ້ວ່າເປົ້າໝາຍຕົວຊີ້ບອກທີ່ສຳຄັນແມ່ນຂຶ້ນຢູ່ກັບອຳເພີໃຈຂອງຄົນອື່ນ. ໃຫ້ເຄົາລົບອຳເພີໃຈຂອງຜູ້ຄົນສະເໝີ.
ຈົ່ງຈື່ຈຳວ່າຕົວຊີ້ບອກທີ່ສຳຄັນບໍ່ແມ່ນເປົ້າໝາຍສຸດທ້າຍ. ແຕ່, ມັນເປັນຕົວແທນຂອງຄວາມກ້າວໜ້າທາງວິນຍານທີ່ເປັນໄປໄດ້ຂອງບຸກຄົນ ໄປສູ່ການບັບຕິສະມາ, ການຢືນຢັນ, ແລະ ການປ່ຽນໃຈເຫລື້ອມໃສທີ່ຍືນຍົງ. ຄວາມກ້າວໜ້າທີ່ແທ້ຈິງຂອງຜູ້ຄົນຈະຂຶ້ນຢູ່ກັບທາງເລືອກຂອງເຂົາເຈົ້າ. ທ່ານສະໜັບສະໜູນຄວາມກ້າວໜ້າຂອງເຂົາເຈົ້າໂດຍການໃຊ້ສັດທາໃນພຣະຄຣິດແທນເຂົາເຈົ້າ ເມື່ອທ່ານຕັ້ງເປົ້າໝາຍ, ວາງແຜນ, ກະທຳຢ່າງພາກພຽນ, ແລະ ປະຕິບັດສາດສະໜາກິດຕໍ່ເຂົາເຈົ້າດ້ວຍວິທີທີ່ໄດ້ຮັບການດົນໃຈ.
ວິທີຕັ້ງເປົ້າໝາຍ ແລະ ວາງແຜນເພື່ອບັນລຸມັນ
ການຕັ້ງເປົ້າໝາຍ ແລະ ການວາງແຜນເປັນການກະທຳດ້ວຍສັດທາ. ເປົ້າໝາຍສະທ້ອນເຖິງຄວາມປາດຖະໜາຂອງໃຈເຮົາ ແລະ ວິໄສທັດຂອງເຮົາ ທີ່ຈະຊ່ວຍຕົວທ່ານເອງ ແລະ ຄົນອື່ນໃຫ້ມາຫາພຣະຜູ້ຊ່ວຍໃຫ້ລອດ.
ການພິຈາລະນາເປົ້າໝາຍ ແລະ ແຜນຢ່າງຮອບຄອບຈະເຮັດໃຫ້ທ່ານມີທິດທາງທີ່ຊັດເຈນ. ມັນສາມາດຊ່ວຍໃຫ້ທ່ານພົບເຫັນຜູ້ຄົນເພີ່ມເພື່ອສິດສອນ. ມັນສາມາດນຳພາທ່ານໃນການຊ່ວຍຄົນທີ່ທ່ານສິດສອນເສີມສ້າງສັດທາຂອງເຂົາເຈົ້າ ແລະ ກ້າວໜ້າໄປສູ່ການປ່ຽນໃຈເຫລື້ອມໃສ.
ເຮັດໃຫ້ການຕັ້ງເປົ້າໝາຍ ແລະ ການວາງແຜນຂອງທ່ານເປັນປະສົບການທີ່ດົນໃຈ. ອະທິຖານຢ່າງຈິງໃຈ, ໃຊ້ສັດທາ, ປຶກສາຫາລືກັບຄູ່ສອນຂອງທ່ານ, ແລະ ເຮັດຕາມການກະຕຸ້ນຂອງພຣະວິນຍານ. ຂະນະທີ່ທ່ານວາງແຜນແບບນີ້, ທ່ານຈະຮູ້ສຶກວ່າພຣະຜູ້ເປັນເຈົ້າທຳງານຜ່ານທາງທ່ານເພື່ອເປັນພອນໃຫ້ແກ່ຄົນອື່ນ.
“ເປົ້າໝາຍແມ່ນຈຸດໝາຍປາຍທາງ ຫລື ຈຸດ ຈົບ, ໃນຂະນະທີ່ແຜນແມ່ນເສັ້ນທາງທີ່ທ່ານຈະໄປຮອດຈຸດນັ້ນ. … ການຕັ້ງເປົ້າໝາຍເປັນສິ່ງຈຳເປັນໂດຍການເລີ່ມຕົ້ນໂດຍມີຈຸດຈົບຢູ່ໃນໃຈ. ແລະ ການວາງແຜນແມ່ນການຫາວິທີໄປສູ່ຈຸດຈົບນັ້ນ” (M. Russell Ballard, “Return ແລະ Receive,” Liahona, May 2017, 62–63).
ຫລັກທຳສຳລັບການຕັ້ງ ແລະ ການບັນລຸເປົ້າໝາຍ
ຂັ້ນຕອນດັ່ງຕໍ່ໄປນີ້ຈະຊ່ວຍໃຫ້ທ່ານຕັ້ງ ແລະ ບັນລຸເປົ້າໝາຍ.
-
ຕັ້ງເປົ້າໝາຍ ແລະ ວາງແຜນດ້ວຍການອະທິຖານ. ຕັ້ງເປົ້າໝາຍທີ່ເປັນຈິງ ແຕ່ເປັນອັນທີ່ຈະຍືດຂະຫຍາຍທ່ານ ແລະ ຮຽກຮ້ອງສັດທາ. ຫລີກເວັ້ນຈາກການຕັ້ງເປົ້າໝາຍທີ່ສູງເກີນໄປ ຫລື ຕ່ຳເກີນໄປ. ວາງແຜນວິທີທີ່ທ່ານຈະບັນລຸມັນ.
-
ບັນທຶກ ແລະ ກຳນົດເວລາ. ບັນທຶກເປົ້າໝາຍ ແລະ ແຜນຂອງທ່ານໃນຕາຕະລາງທີ່ລະອຽດ.
-
ກະທຳຕາມແຜນຂອງທ່ານ. ເຮັດວຽກຢ່າງພາກພຽນເພື່ອບັນລຸເປົ້າໝາຍຂອງທ່ານ. ໃຊ້ສັດທາໃນພຣະຜູ້ເປັນເຈົ້າເພື່ອຊ່ວຍເຫລືອທ່ານ.
-
ທົບທວນ ແລະ ຕິດຕາມຜົນ. ປະເມີນຄວາມກ້າວໜ້າ ແລະ ບັນທຶກຄວາມພະຍາຍາມຂອງທ່ານເປັນປະຈຳ. ຕັດສິນໃຈວ່າຈະເຮັດສິ່ງໃດໃຫ້ແຕກຕ່າງ ແລະ ຈະປັບປຸງແນວໃດ. ປັບແຜນຕາມຄວາມຈຳເປັນ.
ເມື່ອທ່ານໃຊ້ຂະບວນການຕັ້ງເປົ້າໝາຍນີ້, ພຣະຜູ້ເປັນເຈົ້າຈະຂະຫຍາຍຄວາມພະຍາຍາມຂອງທ່ານ. ທ່ານຈະເຕີບໂຕໃນຄວາມສາມາດຂອງທ່ານ ໃນຖານະເຄື່ອງມືໃນພຣະຫັດຂອງພຣະອົງ. ທ່ານຈະນຳສິ່ງທີ່ດີຢ່າງຫລວງຫລາຍມາ ໃນການເປັນພອນໃຫ້ແກ່ລູກໆຂອງພຣະບິດາເທິງສະຫວັນ.
ຕັ້ງເປົ້າໝາຍ ແລະ ວາງແຜນໃນທຸກດ້ານຂອງວຽກງານ
ສະແຫວງຫາການນຳພາຈາກພຣະວິນຍານດ້ວຍການອະທິຖານ ຂະນະທີ່ທ່ານນຳໃຊ້ຂະບວນການຕັ້ງເປົ້າໝາຍກັບທຸກດ້ານຂອງວຽກງານເຜີຍແຜ່. ສິ່ງເຫລົ່ານີ້ແມ່ນລວມທັງ:
-
ການຊ່ວຍຜູ້ຄົນທີ່ທ່ານກຳລັງສິດສອນໃຫ້ກ້າວໜ້າ (ເບິ່ງ ພາກຫ້ອຍທ້າຍ 1 ໃນບົດນີ້).
-
ການຊອກຫາຄົນໃໝ່ເພື່ອສິດສອນ (ເບິ່ງ ພາກຫ້ອຍທ້າຍ 2 ໃນບົດນີ້).
-
ການເຮັດວຽກງານກັບສະມາຊິກ ແລະ ຮັບໃຊ້ຜູ້ຄົນໃນຊຸມຊົນ ແລະ ຫວອດ (ເບິ່ງ ບົດທີ 9 ແລະ 13).
-
ການເຮັດວຽກງານໃນຄວາມສາມັກຄີກັບຄູ່ສອນຂອງທ່ານ (ເບິ່ງ ຂໍ້ 6 ໃນ “ພາກການວາງແຜນປະຈຳອາທິດ”).
-
ເພີ່ມຄວາມເຂັ້ມແຂງໃຫ້ແກ່ສັດທາຂອງທ່ານໃນພຣະເຢຊູຄຣິດ.
-
ເສີມສ້າງຄວາມຮູ້, ແລະ ຄວາມສາມາດຂອງທ່ານ, ລວມທັງການຮຽນພາສາ (ເບິ່ງ ບົດທີ 7).
ຕັ້ງເປົ້າໝາຍທີ່ເໝາະສົມ
ຫລີກເວັ້ນຈາກການຕັ້ງເປົ້າໝາຍຕົວຊີ້ບອກທີ່ສຳຄັນ ໃຫ້ຜູ້ສອນສາດສະໜາຄົນອື່ນ. ເຖິງຢ່າງໃດກໍຕາມ, ທ່ານອາດນຳພາ ແລະ ຊຸກຍູ້ເຂົາເຈົ້າໃນການນຳໃຊ້ຫລັກທຳການຕັ້ງເປົ້າໝາຍ ຂະນະທີ່ເຂົາເຈົ້າຕັ້ງເປົ້າໝາຍຂອງເຂົາເຈົ້າ.
ລະວັງຢ່າປຽບທຽບກັບຄົນອື່ນ.
ຫ້າມໃຊ້ຄວາມສຳເລັດເປົ້າໝາຍເປັນໂຄຕ້າ, ເພື່ອການຮັບຮູ້ໃນທີ່ສາທາລະນະ, ເພື່ອແກ້ໄຂ ຫລື ເຮັດໃຫ້ຄົນໃດຄົນໜຶ່ງອັບອາຍ.
“ເຮົາເຊື່ອໃນການຕັ້ງເປົ້າໝາຍ. ເຮົາດຳລົງຊີວິດຕາມເປົ້າໝາຍ. … [ໜຶ່ງ] ເປົ້າໝາຍທີ່ສຳຄັນ ແມ່ນການນຳພຣະກິດຕິຄຸນມາໃຫ້ຜູ້ຄົນທັງປວງ. … ເປົ້າໝາຍຂອງເຮົາແມ່ນເພື່ອບັນລຸຊີວິດນິລັນດອນ. ນັ້ນຄືເປົ້າໝາຍທີ່ຍິ່ງໃຫຍ່ທີ່ສຸດໃນໂລກ” (Spencer W. Kimball, regional representatives’ seminar, Apr. 3, 1975, 6).
ຈັດພາກການວາງແຜນປະຈຳອາທິດ ແລະ ປະຈຳວັນ
ການວາງແຜນປະຈຳອາທິດຊ່ວຍທ່ານເຫັນພາບໃຫຍ່ ແລະ ສຸມໃສ່ຜູ້ຄົນ. ມັນຍັງຊ່ວຍໃຫ້ທ່ານສຸມໃສ່ກິດຈະກຳທີ່ສຳຄັນທີ່ສຸດ. ການວາງແຜນປະຈຳວັນຊ່ວຍໃຫ້ທ່ານປັບຕົວ ແລະ ກຽມພ້ອມທີ່ຈະດຳເນີນການສະເພາະໃນແຕ່ລະວັນ. ທ່ານຕ້ອງການມີປະສິດທິພາບ, ບໍ່ແມ່ນແຕ່ຫຍຸ້ງລ້າໆ.
ໃນລະຫວ່າງພາກການວາງແຜນ, ຖາມຕົວເອງດ້ວຍຄຳຖາມພື້ນຖານກ່ຽວກັບສິ່ງທີ່ທ່ານຮູ້ສຶກວ່າ ພຣະຜູ້ເປັນເຈົ້າປະສົງໃຫ້ທ່ານເຮັດ. ສະແຫວງຫາການດົນໃຈເພື່ອຕອບຄຳຖາມເຫລົ່ານີ້ດ້ວຍວິທີທີ່ເໝາະສົມກັບແຕ່ລະສະຖານະການ ແລະ ແຕ່ລະບຸກຄົນ. ແລ້ວຄຳຕອບຄວນເປັນຮູບຮ່າງໃນແຜນຂອງທ່ານ.
ພາກການວາງແຜນປະຈຳອາທິດ
ຈັດພາກການວາງແຜນປະຈຳອາທິດກັບຄູ່ສອນຂອງທ່ານໃນວັນ ແລະ ເວລາທີ່ໄດ້ຕັ້ງໄວ້ໂດຍປະທານເຜີຍແຜ່ຂອງທ່ານ. ເຮັດຕາມຂັ້ນຕອນຢູ່ຂ້າງລຸ່ມ.
-
ອະທິຖານ ແລະ ສະແຫວງຫາການດົນໃຈ. ທູນຂໍໃຫ້ພຣະບິດາເທິງສະຫວັນນຳພາໃນການວາງແຜນ ທີ່ຈະຊ່ວຍບັນລຸຈຸດປະສົງຂອງພຣະອົງ. ຂໍໃຫ້ພຣະອົງອວຍພອນຄວາມພະຍາຍາມຂອງທ່ານ ເພື່ອຊ່ວຍໃຫ້ຜູ້ຄົນກ້າວໜ້າ ແລະ ມາຫາພຣະຄຣິດ.
-
ຕັ້ງເປົ້າໝາຍ ແລະ ວາງແຜນສຳລັບຕົວຊີ້ບອກທີ່ສຳຄັນທັງໝົດ ໂດຍການໃຊ້ແອັບ Preach My Gospel. ໃຊ້ຂະບວນການຕັ້ງເປົ້າໝາຍທີ່ອະທິບາຍໄວ້ກ່ອນໜ້ານີ້ ໃນບົດນີ້. ເລີ່ມຕົ້ນດ້ວຍ:
-
ຜູ້ຄົນທີ່ໄດ້ຮັບບັບຕິສະມາ ແລະ ການຢືນຢັນພາຍໃນປີທີ່ຜ່ານມາ.
-
ຜູ້ຄົນທີ່ມີວັນທີບັບຕິສະມາ.
-
ຜູ້ຄົນທີ່ທ່ານກຳລັງສິດສອນ ທີ່ເຂົ້າຮ່ວມກອງປະຊຸມສິນລະລຶກ.
-
ຄົນໃໝ່ທີ່ກຳລັງຮັບການສິດສອນ.
-
ສະມາຊິກທີ່ກັບຄືນມາ, ຄອບຄົວທີ່ເປັນສະມາຊິກບາງສ່ວນ, ແລະ ຜູ້ຄາດຫວັງເປັນແອວເດີ.
-
ຜູ້ຄົນທີ່ໄດ້ສິດສອນຜ່ານມາ.
ເບິ່ງ ພາກຫ້ອຍທ້າຍ 1 ໃນບົດນີ້ ສຳລັບແນວຄິດການໃຊ້ຂະບວນການຕັ້ງເປົ້າໝາຍໃນການເຮັດວຽກກັບຜູ້ຄົນທີ່ທ່ານກຳລັງສິດສອນ.
-
-
ໃຊ້ຂະບວນການຕັ້ງເປົ້າໝາຍໃນການຊອກຫາຜູ້ຄົນເພື່ອສິດສອນ (ເບິ່ງ ພາກຫ້ອຍທ້າຍ 2 ໃນບົດນີ້ ແລະ ບົດທີ 9 ສຳລັບຄວາມຊ່ວຍເຫລືອໃນການຊອກຫາ).
-
ໃຊ້ຂະບວນການຕັ້ງເປົ້າໝາຍເພື່ອສ້າງຄວາມສຳພັນກັບຜູ້ນຳໃນຫວອດ ແລະ ສະມາຊິກ. ຕັ້ງເປົ້າໝາຍ ແລະ ວາງແຜນສຳລັບວິທີທີ່ທ່ານຈະສະໜັບສະໜູນເຂົາເຈົ້າໃນຄວາມພະຍາຍາມຂອງເຂົາເຈົ້າທີ່ຈະແບ່ງປັນພຣະກິດຕິຄຸນ (ເບິ່ງ ແນວຄິດໃນ ບົດທີ 9 ແລະ 13). ກຽມການປະຊຸມປະສານງານປະຈຳອາທິດຂອງຫວອດ (ເບິ່ງ ບົດທີ 13).
-
ທົບທວນແຜນ ແລະ ເປົ້າໝາຍຂອງທ່ານໃນແອັບ Preach My Gospel. ຢືນຢັນການນັດໝາຍ ແລະ ການປະຊຸມຂອງທ່ານ.
-
ຈັດສະພາການເປັນຄູ່ສອນ. ຕາມປົກກະຕິແລ້ວ ສິ່ງນີ້ແມ່ນລວມທັງອົງປະກອບດັ່ງຕໍ່ໄປນີ້:
-
ຖ້າຕ້ອງການ, ໃຫ້ແບ່ງປັນເປົ້າໝາຍສ່ວນຕົວທີ່ເໝາະສົມ ແລະ ຂໍໃຫ້ຄູ່ສອນຂອງທ່ານຊ່ວຍໃນການບັນລຸມັນ.
-
ສົນທະນາຄວາມເຂັ້ມແຂງຂອງຄວາມສຳພັນຂອງທ່ານ. ສົນທະນາການທ້າທາຍກ່ຽວກັບການເຊື່ອຟັງ ຫລື ການເຮັດວຽກນຳກັນໃນຄວາມສາມັກຄີ. ແກ້ໄຂຂໍ້ຂັດແຍ້ງໃດໆໂດຍ (1) ເປີດໂອກາດໃຫ້ແຕ່ລະຄົນສະແດງຄວາມຄິດເຫັນຂອງຕົນຢ່າງເຕັມທີ່, (2) ເຂົ້າໃຈ ແລະ ຮັບຮູ້ຄວາມກັງວົນຂອງແຕ່ລະຄົນ, ແລະ (3) ສ້າງວິທີແກ້ບັນຫານຳກັນ ເພື່ອແກ້ໄຂຄວາມກັງວົນທີ່ສຳຄັນທີ່ສຸດ.
-
ແບ່ງປັນກັບຄູ່ສອນຂອງທ່ານສິ່ງທີ່ທ່ານຄິດວ່າເປັນຈຸດເດັ່ນຂອງລາວ. ຂໍຄຳແນະນຳກ່ຽວກັບວິທີທີ່ທ່ານສາມາດປັບປຸງ.
-
ຕັ້ງເປົ້າໝາຍທີ່ຈະປັບປຸງຄວາມສຳພັນຂອງທ່ານ.
ສະພາຄູ່ສອນສາມາດຊ່ວຍໃຫ້ທ່ານພັດທະນາທັກສະທີ່ສຳຄັນ ທີ່ທ່ານສາມາດນຳໃຊ້ໃນຊີວິດສ່ວນຕົວຂອງທ່ານ ແລະ ຊີວິດຄອບຄົວ, ການຮັບໃຊ້ສາດສະໜາຈັກ, ການງານ, ແລະ ການຄົບຫາສະມາຄົມອື່ນໆ.
-
-
ປິດດ້ວຍການອະທິຖານ.
ພາກການວາງແຜນປະຈຳວັນ
ຕັ້ງເປົ້າໝາຍ ແລະ ວາງແຜນກັບຄູ່ສອນຂອງທ່ານ ເປັນເວລາ 30 ນາທີ ທຸກເຊົ້າ. ເຮັດຕາມຂັ້ນຕອນຢູ່ຂ້າງລຸ່ມ.
-
ອະທິຖານ ແລະ ສະແຫວງຫາການດົນໃຈ.
-
ທົບທວນຄວາມກ້າວໜ້າໄປສູ່ເປົ້າໝາຍຕົວຊີ້ບອກທີ່ສຳຄັນຂອງທ່ານ.
-
ທົບທວນແຜນຂອງທ່ານເພື່ອຊ່ວຍຜູ້ຄົນທີ່ທ່ານກຳລັງສິດສອນ. ຈັດລຳດັບຄວາມສຳຄັນຂອງຄວາມພະຍາຍາມຂອງທ່ານ ເພື່ອຊ່ວຍຜູ້ທີ່ກ້າວໜ້າທີ່ສຸດ. ປັບເປົ້າໝາຍ ແລະ ແຜນປະຈຳວັນຕາມຄວາມຕ້ອງການ.
-
ໃຫ້ຄຳໝັ້ນສັນຍາວ່າທ່ານຈະກະທຳໃນວັນນັ້ນ ເພື່ອຫາຄົນໃໝ່ເພື່ອສິດສອນ ແລະ ເພື່ອຊ່ວຍຜູ້ຄົນທີ່ທ່ານກຳລັງສິດສອນ.
-
ວາງແຜນວ່າທ່ານຈະເຮັດວຽກງານກັບຜູ້ນຳໃນທ້ອງຖິ່ນ ແລະ ສະມາຊິກ.
-
ປິດດ້ວຍການອະທິຖານ.
ການສຶກສາກັບຄູ່ສອນ
ທົບທວນ ພາກຫ້ອຍທ້າຍ 1 ແລະ ພາກຫ້ອຍທ້າຍ 2 ຢູ່ໃນທ້າຍຂອງບົດນີ້ ສຳລັບແນວຄິດກ່ຽວກັບວິທີນຳໃຊ້ຂະບວນການຕັ້ງເປົ້າໝາຍ ໃນການສິດສອນ ແລະ ການຊອກຫາ. ລະບຸວິທີທີ່ທ່ານສາມາດໃຊ້ແນວຄິດບາງຢ່າງເຫລົ່ານີ້.
ໃຊ້ແອັບ Preach My Gospel
ກ່ຽວກັບຜູ້ທີ່ໄດ້ຮັບບັບຕິສະມາໃນວັນເວລາຂອງເພິ່ນ, ໂມໂຣໄນໄດ້ກ່າວວ່າ, “ຊື່ຂອງເຂົາຖືກຮັບໄວ້, ເພື່ອເຂົາຈະໄດ້ຖືກຈົດຈຳ ແລະ ບຳລຸງລ້ຽງດ້ວຍພຣະຄຳອັນປະເສີດຂອງພຣະເຈົ້າ, ເພື່ອຮັກສາເຂົາຢູ່ໃນທາງທີ່ຖືກຕ້ອງ” (ໂມໂຣໄນ 6:4). ການຮັກສາບັນທຶກທີ່ດີເປັນວິທີໜຶ່ງທີ່ທ່ານສາມາດນຳໃຊ້ຫລັກທຳນີ້ໄດ້.
ບັນທຶກຄວາມພະຍາຍາມຂອງທ່ານ
ການຮັກສາບັນທຶກເປັນສ່ວນຂອງການດູແລເຂດຂອງທ່ານຢ່າງພາກພຽນ ດ້ວຍຄວາມຮັກ ແລະ ຄວາມຫ່ວງໃຍ. ຮັກສາບັນທຶກຂອງທ່ານຢ່າງຖືກຕ້ອງ ແລະ ເປັນປະຈຸບັນ. ສິ່ງນີ້ຈະຊ່ວຍໃຫ້ທ່ານຈື່ຈຳສິ່ງທີ່ທ່ານຕ້ອງເຮັດເພື່ອຊ່ວຍຜູ້ຄົນ.
ແອັບ Preach My Gospel ຊ່ວຍໃຫ້ທ່ານປະສານງານ ແລະ ແບ່ງປັນຂໍ້ມູນທີ່ສຳຄັນກັບຜູ້ນຳໃນທ້ອງຖິ່ນ ແລະ ສະມາຊິກ ເຖິງຄວາມກ້າວໜ້າຂອງຜູ້ຄົນ ແລະ ວຽກງານ.
ປະຕິບັດຕາມແນວທາງຊີ້ນຳເລື່ອງຂໍ້ມູນ ແລະ ຄວາມເປັນສ່ວນຕົວ
ປະຕິບັດຕາມແນວທາງຊີ້ນຳເລື່ອງການຮັກສາຂໍ້ມູນ ແລະ ຄວາມເປັນສ່ວນຕົວ ເມື່ອບັນທຶກເປົ້າໝາຍ ແລະ ແຜນ ໄວ້ໃນແອັບ Preach My Gospel ແລະ ໃນເຄື່ອງມືທີ່ພິມອອກ. ສຳລັບຂໍ້ມູນ, ໃຫ້ເບິ່ງ Missionary Standards for Disciples of Jesus Christ, 7.5.
ຖາມຕົວເອງຄຳຖາມດັ່ງຕໍ່ໄປນີ້ ກ່ອນທີ່ທ່ານຈະບັນທຶກ ຫລື ແບ່ງປັນຂໍ້ມູນຢູ່ໃນແອັບ Preach My Gospel, ອີເມວ, ສື່ສັງຄົມ, ບັນທຶກ, ຫລື ການສື່ສານອື່ນໆ:
-
ບຸກຄົນນີ້ຈະຮູ້ສຶກແນວໃດກ່ຽວກັບສິ່ງທີ່ເຮົາກຳລັງບັນທຶກ?
-
ເຮົາຈະຮູ້ສຶກແນວໃດຖ້າຫາກຄົນໃດຄົນໜຶ່ງແບ່ງປັນຂໍ້ມູນແບບນີ້ກ່ຽວກັບເຮົາກັບຄົນອື່ນ?
-
ເຮົາປະຕິບັດຕາມນະໂຍບາຍຂອງສາດສະໜາຈັກ ແລະ ກົດໝາຍຄວາມເປັນສ່ວນຕົວຂອງຂໍ້ມູນສຳລັບເຂດຂອງເຮົາຫລືບໍ່ ຖ້າຫາກເຮົາບັນທຶກ ຫລື ແບ່ງປັນຂໍ້ມູນນີ້?
ຄວາມຮັບຜິດຊອບ
ຫລັກທຳຂອງຄວາມຮັບຜິດຊອບເປັນພື້ນຖານໃນແຜນນິລັນດອນຂອງພຣະເຈົ້າ (ເບິ່ງ ແອວມາ 5:15–19; ຄຳສອນ ແລະ ພັນທະສັນຍາ 104:13; 137:9). ຫລັກທຳນີ້ມີອິດທິພົນຕໍ່ວິທີທີ່ທ່ານຄິດ ແລະ ຮູ້ສຶກກ່ຽວກັບໜ້າທີ່ຮັບຜິດຊອບອັນສັກສິດທີ່ພຣະຜູ້ເປັນເຈົ້າໄດ້ມອບໃຫ້ທ່ານ. ຄວາມຮັບຜິດຊອບກໍຍັງມີອິດທິພົນຕໍ່ວິທີທີ່ທ່ານເຂົ້າເຖິງວຽກງານຂອງທ່ານນຳອີກ.
ລະຫວ່າງການປະຕິບັດສາດສະໜາກິດຂອງພຣະອົງຢູ່ເທິງໂລກ, ພຣະຜູ້ຊ່ວຍໃຫ້ລອດໄດ້ມອບການມອບໝາຍໃຫ້ແກ່ສານຸສິດຂອງພຣະອົງ ເພື່ອຊ່ວຍໃຫ້ເຂົາເຈົ້າເຕີບໂຕ, ພັດທະນາ, ແລະ ບັນລຸວຽກງານຂອງພຣະອົງ. ພຣະອົງກໍຍັງໄດ້ມອບໂອກາດໃຫ້ເຂົາເຈົ້ານຳອີກ ເພື່ອຮັບຜິດຊອບຕໍ່ວຽກງານທີ່ເຂົາເຈົ້າຖືກມອບໃຫ້ເຮັດ (ເບິ່ງ ລູກາ 9:10; 3 ນີໄຟ 23:6–13). ໃນຖານະຜູ້ສອນສາດສະໜາ, ທ່ານກໍມີຄວາມຮັບຜິດຊອບເໝືອນກັນ ຕໍ່ວຽກງານທີ່ພຣະຜູ້ເປັນເຈົ້າໄດ້ມອບໃຫ້ທ່ານເຮັດ.
ເຂົ້າເຖິງການຕັ້ງເປົ້າໝາຍຂອງທ່ານ ແລະ ວາງແຜນດ້ວຍແນວຄິດທີ່ທ່ານຈະຮັບຜິດຊອບຕໍ່ພຣະຜູ້ເປັນເຈົ້າ ຜ່ານທາງການອະທິຖານໃນແຕ່ລະວັນ. ພ້ອມທັງຮັບຜິດຊອບຕໍ່ຕົວທ່ານເອງ ແລະ ຕໍ່ຜູ້ນຳເຜີຍແຜ່ຂອງທ່ານ.
ການສະແດງຄວາມຮັບຜິດຊອບຄວນເປັນປະສົບການທີ່ມີຄວາມຮັກ ແລະ ໃນທາງບວກ ຊຶ່ງໃນນັ້ນຄວາມພະຍາຍາມຂອງທ່ານຖືກຮັບຮູ້ ແລະ ທ່ານລະບຸວິທີທີ່ທ່ານສາມາດປັບປຸງ.
ການສຶກສາພຣະຄຳພີ
ຄວາມຮັບຜິດຊອບໝາຍຄວາມວ່າແນວໃດ?
ເປັນຫຍັງອຳເພີໃຈຈຶ່ງສຳຄັນໃນຄວາມຮັບຜິດຊອບ?
ຜູ້ສອນສາດສະໜາ ແລະ ຜູ້ນຳເຜີຍແຜ່ຄວນທຳງານດ້ວຍກັນແນວໃດ?
ພຣະຜູ້ເປັນເຈົ້າສັນຍາຫຍັງແດ່ກັບຜູ້ທີ່ຊື່ສັດໃນໜ້າທີ່ຮັບຜິດຊອບຂອງເຂົາເຈົ້າ?
ແນວຄິດສຳລັບການສຶກສາ ແລະ ການນຳໃຊ້
ການສຶກສາສ່ວນຕົວ
-
ພິຈາລະນາປະໂຫຍກດັ່ງຕໍ່ໄປນີ້ຈາກຈົດໝາຍການເອີ້ນຂອງທ່ານ: “ຂະນະທີ່ທ່ານອຸທິດເວລາ ແລະ ຄວາມສົນໃຈຂອງທ່ານໃນການຮັບໃຊ້ພຣະຜູ້ເປັນເຈົ້າ, ໂດຍປະພາລະກິດສ່ວນຕົວອື່ນໆທັງໝົດໄວ້ຂ້າງຫລັງ, ພຣະຜູ້ເປັນເຈົ້າຈະອວຍພອນທ່ານດ້ວຍຄວາມຮູ້ ແລະ ປະຈັກພະຍານເພີ່ມເຕີມເຖິງພຣະເຢຊູຄຣິດ ແລະ ພຣະກິດຕິຄຸນທີ່ຖືກຟື້ນຟູຂອງພຣະອົງ.” ຖາມຕົວເອງຄຳຖາມດັ່ງຕໍ່ໄປນີ້, ແລະ ບັນທຶກຄວາມປະທັບໃຈຂອງທ່ານ.
-
ເຮົາອຸທິດເວລາ ແລະ ຄວາມສົນໃຈຂອງເຮົາໃນການຮັບໃຊ້ພຣະຜູ້ເປັນເຈົ້າແນວໃດ?
-
ພອນຢ່າງໃດແດ່ທີ່ເຮົາເຄີຍປະສົບ?
-
ປະຈັກພະຍານຂອງເຮົາຖືກເຮັດໃຫ້ເຂັ້ມແຂງແນວໃດ?
-
ເຮົາຈະສາມາດປັບປຸງມັນໄດ້ແນວໃດ?
-
-
ໃຊ້ເວລາບຶດໜຶ່ງເພື່ອຄິດກ່ຽວກັບມື້ສຸດທ້າຍໃນສະໜາມເຜີຍແຜ່ຂອງທ່ານ. ເມື່ອມື້ນັ້ນມາເຖິງ:
-
ທ່ານຢາກໃຫ້ຄວາມສຳພັນຂອງທ່ານກັບພຣະບິດາເທິງສະຫວັນ ແລະ ພຣະເຢຊູຄຣິດເປັນແບບໃດ?
-
ທ່ານຢາກກາຍເປັນແນວໃດ?
ໃນບັນທຶກການສຶກສາຂອງທ່ານ, ໃຫ້ຂຽນຄຳຕອບຕໍ່ຄຳຖາມແຕ່ລະຂໍ້ເຫລົ່ານີ້. ໃຊ້ຂະບວນການຕັ້ງເປົ້າໝາຍເພື່ອວາງແຜນສິ່ງທີ່ທ່ານສາມາດເຮັດໃນເວລານີ້ໄປສູ່ເປົ້າໝາຍເຫລົ່ານັ້ນ. ບັນທຶກແຜນຂອງທ່ານ.
-
ການສຶກສາກັບຄູ່ສອນ ແລະ ການສັບປ່ຽນຄູ່ສອນ
-
ໃຊ້ແອັບ Preach My Gospel, ຕອບຄຳຖາມຢູ່ຂ້າງລຸ່ມ:
-
ບັນທຶກທັງໝົດເປັນປະຈຸບັນ ແລະ ຖືກຕ້ອງຫລືບໍ່?
-
ຜູ້ສອນສາດສະໜາໃໝ່ຕໍ່ເຂດຈະໄດ້ຮັບຜົນປະໂຫຍດຈາກບັນທຶກຂອງທ່ານ ເຖິງຄວາມພະຍາຍາມຂອງທ່ານເພື່ອຊອກຫາຄົນໃໝ່ເພື່ອສິດສອນຫລືບໍ່?
-
ຖ້າຫາກທ່ານທົບທວນແອັບຂອງທ່ານໃນຕອນນີ້, ມັນຈະຊ່ວຍໃຫ້ທ່ານຮູ້ວ່າຜູ້ຄົນຢູ່ໃສຫລືບໍ່? ມັນຈະຊ່ວຍໃຫ້ທ່ານຮູ້ກ່ຽວກັບຄວາມກ້າວໜ້າຂອງເຂົາເຈົ້າຫລືບໍ່?
-
ສະພາທ້ອງຖິ່ນ, ກອງປະຊຸມອະນາເຂດ, ແລະ ສະພາຜູ້ນຳເຂດເຜີຍແຜ່
-
ເຊື້ອເຊີນຜູ້ສອນສາດສະໜາໃຫ້ແບ່ງປັນປະສົບການດ້ວຍເປົ້າໝາຍທີ່ເຂົາເຈົ້າໄດ້ຕັ້ງໄວ້ ແລະ ແຜນທີ່ເຂົາເຈົ້າໄດ້ກຳນົດໄວ້ ເພື່ອຊ່ວຍໃຫ້ຜູ້ຄົນກ້າວໜ້າ. ຕົວຢ່າງອາດລວມທັງເປົ້າໝາຍ ແລະ ແຜນການທີ່ຈະຊ່ວຍຜູ້ຄົນ:
-
ພັດທະນາສັດທາທີ່ຍິ່ງໃຫຍ່ກວ່າໃນພຣະຜູ້ຊ່ວຍໃຫ້ລອດ.
-
ກັບໃຈ ແລະ ເຮັດການປ່ຽນແປງເພື່ອເຂົ້າໃກ້ ພຣະເຈົ້າ.
-
ຮັບບັບຕິສະມາ ແລະ ການຢືນຢັນ.
-
ກັບຄືນສູ່ສາດສະໜາຈັກ ແລະ ຕໍ່ພັນທະສັນຍາແຫ່ງການບັບຕິສະມາຂອງເຂົາເຈົ້າ.
-
-
ອ່ານໜຶ່ງສະຖານະການດັ່ງຕໍ່ໄປນີ້ໃຫ້ຜູ້ສອນສາດສະໜາຟັງ. ໃຫ້ຜູ້ສອນສາດສະໜາແຍກອອກເປັນກຸ່ມນ້ອຍໆ. ໃຫ້ແຕ່ລະກຸ່ມໃຊ້ ຂັ້ນຕອນທີ 1 ແລະ 2 ໃນຂະບວນການຕັ້ງເປົ້າໝາຍ ເພື່ອຊ່ວຍຜູ້ຄົນໃນຕົວຢ່າງເຫລົ່ານີ້ກ້າວໜ້າໄປສູ່ການບັບຕິສະມາ ແລະ ການຢືນຢັນ. ໃຫ້ແຕ່ລະກຸ່ມແບ່ງປັນແນວຄິດຂອງເຂົາເຈົ້າ.
-
ບຸກຄົນໜຶ່ງທີ່ທ່ານກຳລັງສິດສອນໄດ້ຕອບຮັບຄຳເຊື້ອເຊີນໃຫ້ໄປໂບດໃນອາທິດນີ້.
-
ບຸກຄົນໜຶ່ງໄດ້ຍອມຮັບຄຳເຊື້ອເຊີນໃຫ້ຮັບບັບຕິສະມາ ແລະ ໄດ້ຕັ້ງເປົ້າໝາຍກັບທ່ານທີ່ຈະຮັບບັບຕິສະມາ.
-
ບຸກຄົນໜຶ່ງໄດ້ຍອມຮັບຄຳເຊື້ອເຊີນຂອງທ່ານໃຫ້ອ່ານພຣະຄຳພີມໍມອນ ແລະ ໄດ້ໃຫ້ຄຳໝັ້ນສັນຍາວ່າຈະອ່ານ 1 ນີໄຟ 1.
-
-
ເຊື້ອເຊີນຜູ້ສອນສາດສະໜາໃຫ້ໃຊ້ແອັບ Preach My Gospel ເພື່ອຊ່ວຍເຂົາເຈົ້າໃຫ້ຕັ້ງເປົ້າໝາຍທີ່ເປັນຈິງ ແຕ່ຍືດຂະຫຍາຍໂດຍ:
-
ການທົບທວນປະຫວັດຕົວຊີ້ບອກທີ່ສຳຄັນ ແລະ ຄວາມຄືບໜ້າ.
-
ການຕັ້ງເປົ້າໝາຍທຸກວັນ, ທຸກອາທິດ, ແລະ ທຸກເດືອນ.
-
ຕື່ມຜູ້ຄົນໃສ່ເປົ້າໝາຍຕົວຊີ້ບອກທີ່ສຳຄັນ.
ສົນທະນາວິທີທີ່ຂັ້ນຕອນເຫລົ່ານີ້ສາມາດຊ່ວຍຜູ້ສອນສາດສະໜາວາງແຜນທີ່ມີປະສິດທິພາບຫລາຍຂຶ້ນ ຍ້ອນວ່າມັນຊ່ວຍໃຫ້ຜູ້ຄົນກ້າວໜ້າ. ຂໍໃຫ້ຜູ້ສອນສາດສະໜາພິຈາລະນາສິ່ງດັ່ງຕໍ່ໄປນີ້:
-
ເຈົ້າຈະໃຊ້ແອັບ Preach My Gospel ໃນອະນາຄົດແນວໃດຕາມທີ່ເຈົ້າວາງແຜນ?
-
ມີວິທີອື່ນໃດແດ່ທີ່ເຈົ້າໄດ້ຄົ້ນພົບ ເພື່ອໃຊ້ແອັບ ໃຫ້ມີປະສິດທິພາບຫລາຍຂຶ້ນ?
-
ຜູ້ນຳເຜີຍແຜ່ ແລະ ທີ່ປຶກສາເຜີຍແຜ່
-
ທົບທວນແອັບ Preach My Gospel ຂອງຜູ້ສອນສາດສະໜາເລື້ອຍໆ. ເຊື້ອເຊີນເຂົາເຈົ້າໃຫ້ແບ່ງປັນວິທີທີ່ເຂົາເຈົ້າໃຊ້ມັນ ເພື່ອຕິດຕາມເປົ້າໝາຍ ແລະ ແຜນຂອງເຂົາເຈົ້າ ໃນການຊ່ວຍໃຫ້ຜູ້ຄົນກ້າວໜ້າ.
-
ເປັນບາງຄັ້ງບາງຄາວ ໃຫ້ສັງເກດພາກການວາງແຜນປະຈຳອາທິດ ຫລື ປະຈຳວັນຂອງຜູ້ສອນສາດສະໜາ.
ພາກຫ້ອຍທ້າຍ 1
ນຳໃຊ້ຂະບວນການຕັ້ງເປົ້າໝາຍໃນການເຮັດວຽກກັບຜູ້ຄົນທີ່ທ່ານກຳລັງສິດສອນ
ພາກນີ້ໃຫ້ຕົວຢ່າງຂອງວິທີທີ່ທ່ານອາດຈະນຳໃຊ້ຂະບວນການຕັ້ງເປົ້າໝາຍເພື່ອຊ່ວຍຜູ້ຄົນທີ່ທ່ານກຳລັງສິດສອນ.
1. ຕັ້ງເປົ້າໝາຍ ແລະ ວາງແຜນ
ພິຈາລະນາດ້ວຍການອະທິຖານເຖິງຄວາມຕ້ອງການທາງວິນຍານຂອງຜູ້ຄົນທີ່ທ່ານກຳລັງສິດສອນຢູ່. ຕັ້ງເປົ້າໝາຍ ແລະ ວາງແຜນເພື່ອຊ່ວຍເຂົາເຈົ້າຕອບສະໜອງຄວາມຕ້ອງການເຫລົ່ານີ້. ໃຊ້ແອັບ Preach My Gospel ເພື່ອທົບທວນຄວາມກ້າວໜ້າຂອງແຕ່ລະຄົນ. ໃຊ້ຕົວຊີ້ບອກທີ່ສຳຄັນສຳລັບການປ່ຽນໃຈເຫລື້ອມໃສ ເພື່ອລະບຸການກະທຳທີ່ຈະຊ່ວຍໃຫ້ແຕ່ລະຄົນກ້າວໜ້າໄປສູ່ຂັ້ນຕໍ່ໄປ ໃນການມາຫາພຣະຄຣິດ.
ຂະນະທີ່ທ່ານຕັ້ງເປົ້າໝາຍ ແລະ ວາງແຜນ, ໃຫ້ຖາມຕົວເອງດ້ວຍຄຳຖາມແບບດັ່ງຕໍ່ໄປນີ້:
-
ການເລືອກໃດແດ່ທີ່ບຸກຄົນເຮັດ ທີ່ສະແດງເຖິງສັດທາທີ່ເຕີບໂຕຂຶ້ນໃນພຣະເຢຊູຄຣິດ?
-
ປະສົບການໃດແດ່ທີ່ບຸກຄົນມີກັບພຣະວິນຍານ?
-
ມີການທ້າທາຍໃດແດ່ທີ່ລາວອາດປະເຊີນ?
-
ເຮົາສາມາດຮຽນຮູ້ຫຍັງຕື່ມອີກແດ່ຈາກບຸກຄົນນີ້ ເພື່ອຊ່ວຍລາວ?
-
ແມ່ນຫຍັງຕ້ອງໄດ້ເກີດຂຶ້ນເພື່ອຊ່ວຍບຸກຄົນນີ້ພັດທະນາສັດທາໃນພຣະເຢຊູຄຣິດ, ຮູ້ສຶກ ແລະ ຮັບຮູ້ພຣະວິນຍານ, ກັບໃຈ, ແລະ ຮັບບັບຕິສະມາ?
-
ເຮົາຈະສາມາດກຽມພ້ອມສຳລັບການປະຊຸມປະສານງານປະຈຳອາທິດໄດ້ແນວໃດ ເພື່ອລວມຜູ້ນຳໃນຫວອດ ແລະ ສະມາຊິກເຂົ້ານຳ ໃນການຊ່ວຍເຫລືອບຸກຄົນນີ້? (ເບິ່ງ ບົດທີ 13.)
-
ເປົ້າໝາຍຕົວຊີ້ບອກທີ່ສຳຄັນອັນໃດແດ່ທີ່ເຮົາສາມາດຕັ້ງ ທີ່ສະທ້ອນເຖິງສັດທາຂອງເຮົາໃນພຣະຜູ້ເປັນເຈົ້າ?
2. ບັນທຶກ ແລະ ກຳນົດເວລາແຜນຂອງທ່ານ
ໃຊ້ແອັບ Preach My Gospel ເພື່ອບັນທຶກ ແລະ ກຳນົດເວລາເປົ້າໝາຍ ແລະ ວາງແຜນໂດຍລະອຽດ. ສິ່ງນີ້ຈະຊ່ວຍໃຫ້ທ່ານຈັດລະບຽບວຽກງານ ແລະ ລະບຸສິ່ງທີ່ຕ້ອງເຮັດໃນແຕ່ລະວັນ. ປະຕິບັດຕາມກົດຄວາມເປັນສ່ວນຕົວຂອງຂໍ້ມູນສຳລັບເຂດຂອງທ່ານ.
ຂະນະທີ່ທ່ານບັນທຶກ ແລະ ກຳນົດເວລາແຜນຂອງທ່ານ, ໃຫ້ຖາມຕົວເອງຄຳຖາມຄືກັນກັບດັ່ງຕໍ່ໄປນີ້:
-
ສິ່ງສະເພາະໃດແດ່ທີ່ເຮົາສາມາດເຮັດໃນມື້ນີ້ ແລະ ອາທິດນີ້ ເພື່ອສະໜັບສະໜູນຄວາມກ້າວໜ້າຂອງບຸກຄົນ?
-
ຄຳສອນໃດ (ຫລື ບົດຮຽນໃດ) ຈະຊ່ວຍບຸກຄົນນີ້ພັດທະນາສັດທາທີ່ເຂັ້ມແຂງໃນພຣະຄຣິດ ແລະ ດຳລົງຊີວິດຕາມພຣະກິດຕິຄຸນ? ເຮົາຈະສິດສອນຄຳສອນນີ້ໄດ້ແນວໃດ ເພື່ອໃຫ້ລາວເຂົ້າໃຈ ແລະ ໄດ້ຮັບຄວາມຮູ້ແຈ້ງໂດຍພຣະວິນຍານບໍລິສຸດ?
-
ເຮົາຈະຢືນຢັນການນັດໝາຍແນວໃດ ແລະ ເມື່ອໃດ?
-
ຄຳເຊື້ອເຊີນໃດທີ່ເຮົາຄວນສະເໜີ ຫລື ຕິດຕາມຜົນ? ເຮົາຈະຕິດຕາມຜົນໄດ້ແນວໃດ ແລະ ເມື່ອໃດ?
-
ເຮົາຈະຊ່ວຍບຸກຄົນເພື່ອໄປໂບດ, ອ່ານພຣະຄຳພີ, ອະທິຖານ, ແລະ ຮັກສາພຣະບັນຍັດທີ່ນຳໄປສູ່ການເຮັດພັນທະສັນຍາກັບພຣະເຈົ້າໄດ້ແນວໃດ ແລະ ເມື່ອໃດ?
-
ສະມາຊິກສາມາດມີສ່ວນຮ່ວມໄດ້ແນວໃດ?
-
ແຫລ່ງຂໍ້ມູນອອນລາຍໃດແດ່ທີ່ເຮົາສາມາດແບ່ງປັນກັບບຸກຄົນນັ້ນ?
-
ມີແຜນສຳລອງໃດແດ່ທີ່ເຮົາສາມາດເຮັດ ຖ້າຫາກບາງສິ່ງບາງຢ່າງບໍ່ເປັນໄປຕາມແຜນ?
3. ກະທຳຕາມແຜນຂອງທ່ານ
ອະທິຖານຢູ່ໃນໃຈທ່ານຕະຫລອດທັງວັນ ຂະນະທີ່ທ່ານກະທຳຕາມແຜນຂອງທ່ານ. ພຣະວິນຍານຈະຊ່ວຍໃຫ້ທ່ານຮູ້ວ່າຈະໄປໃສ, ຈະເວົ້າຫຍັງ, ແລະ ຈະປັບປ່ຽນສິ່ງໃດ.
ໃນລະຫວ່າງມື້, ໃຫ້ຖາມຕົວເອງດ້ວຍຄຳຖາມແບບດັ່ງຕໍ່ໄປນີ້:
-
ເຮົາຈະສາມາດເຮັດວຽກດ້ວຍສັດທາ, ໄວ້ວາງໃຈພຣະຜູ້ເປັນເຈົ້າເພື່ອຊ່ວຍເຮົາ ແລະ ຂະຫຍາຍຄວາມພະຍາຍາມຂອງເຮົາ ທີ່ຈະຮັບໃຊ້ລູກໆຂອງພຣະອົງ?
-
ເຮົາຈະສາມາດສ້າງສັນ ແລະ ກ້າຫານໄດ້ແນວໃດເມື່ອກະທຳຕາມແຜນຂອງເຮົາ?
-
ເຮົາຈະປັບແຜນຂອງເຮົາຕາມຄວາມຕ້ອງການ ແລະ ສະຖານະການຂອງຜູ້ຄົນໄດ້ແນວໃດ?
ແຜນມັກຈະບໍ່ເປັນໄປຕາມທີ່ທ່ານຫວັງສະເໝີໄປ. ມີຄວາມປັບຕົວໄດ້ງ່າຍ ແລະ ໃຊ້ແຜນສຳລອງເມື່ອຈຳເປັນ.
4. ທົບທວນຄວາມກ້າວໜ້າ ແລະ ຕິດຕາມຜົນ
ກັບຄູ່ສອນຂອງທ່ານ, ໃຫ້ທົບທວນຄວາມກ້າວໜ້າໄປສູ່ເປົ້າໝາຍທີ່ທ່ານຕັ້ງໄວ້ ກັບຄູ່ສອນຂອງທ່ານ ເພື່ອສິດສອນຜູ້ຄົນ ແລະ ໃຫ້ເຂົາເຈົ້າກ້າວໜ້າ. ວາງແຜນວິທີຕິດຕາມຜົນ. ປັບແຜນຂອງທ່ານຕາມຄວາມຈຳເປັນ ຂະນະທີ່ທ່ານພະຍາຍາມບັນລຸເປົ້າໝາຍ.
ຖາມຕົວເອງດ້ວຍຄຳຖາມແບບດັ່ງຕໍ່ໄປນີ້:
-
ຜູ້ຄົນທີ່ເຮົາກຳລັງສິດສອນມຸ້ງສູ່ການເຮັດພັນທະສັນຍາກັບພຣະເຈົ້າຫລືບໍ່?
-
ມີການທ້າທາຍໃດແດ່ທີ່ເຂົາເຈົ້າປະເຊີນ? ແມ່ນຫຍັງຄືຄວາມກັງວົນຂອງເຂົາເຈົ້າ?
-
ເຮົາສາມາດເຮັດຫຍັງໄດ້ແດ່ໃນມື້ນີ້ເພື່ອຊ່ວຍເຂົາເຈົ້າ ແລະ ຊຸກຍູ້ເຂົາເຈົ້າໃຫ້ກະທຳ—ດ້ວຍຕົວເອງ ຫລື ຜ່ານທາງເທັກໂນໂລຈີ?
-
ເຂົາເຈົ້າມີປະສົບການກັບຄວາມຮູ້ສຶກເຖິງພຣະວິນຍານບໍ?
-
ເຂົາເຈົ້າເຊື່ອມໂຍງກັບຜູ້ນຳໃນສາດສະໜາຈັກ ແລະ ສະມາຊິກ ແລະ ສ້າງມິດຕະພາບບໍ? ໃຜຈະເຂົ້າຮ່ວມໃນຄັ້ງຕໍ່ໄປທີ່ພວກເຮົາສິດສອນ?
-
ເຮົາສາມາດຮຽນຮູ້ຫຍັງແດ່ຈາກຄວາມລົ້ມເຫລວ?
-
ເຮົາເຮັດໄດ້ດີຫລາຍປານໃດໃນການບັນລຸເປົ້າໝາຍ? ມີຫຍັງທີ່ເຮົາຄວນປັບ ຫລື ເຮັດແຕກຕ່າງ?
-
ເຖິງເວລາທີ່ຕ້ອງຕິດຕໍ່ໜ້ອຍລົງແລ້ວບໍ?
ເບິ່ງ ບົດທີ 11 ສຳລັບຫລັກທຳ ແລະ ແນວຄິດເພີ່ມເຕີມກ່ຽວກັບວິທີຕິດຕາມຜົນ ແລະ ຊ່ວຍໃຫ້ຜູ້ຄົນກ້າວໜ້າ.
ພາກຫ້ອຍທ້າຍ 2
ໃຊ້ຂະບວນການຕັ້ງເປົ້າໝາຍໃນການຊອກຫາຄົນເພື່ອສິດສອນ
ພາກນີ້ໃຫ້ຕົວຢ່າງເຖິງວິທີທີ່ທ່ານອາດນຳໃຊ້ຂະບວນການຕັ້ງເປົ້າໝາຍ ໃນການຊອກຫາຄົນໃໝ່ເພື່ອສິດສອນ. ໃຊ້ຂະບວນການນີ້ໃນການວາງແຜນປະຈຳອາທິດ ແລະ ປະຈຳວັນຂອງທ່ານ.
1. ຕັ້ງເປົ້າໝາຍ ແລະ ວາງແຜນ
ກັບຄູ່ສອນຂອງທ່ານ, ພິຈາລະນາດ້ວຍການອະທິຖານກ່ຽວກັບສິ່ງທີ່ພຣະບິດາເທິງສະຫວັນປະສົງໃຫ້ທ່ານເຮັດ ເພື່ອຊອກຫາຜູ້ຄົນເພີ່ມເພື່ອສິດສອນ. ເຮັດສິ່ງນີ້ໃນແຕ່ລະອາທິດ ແລະ ແຕ່ລະວັນ. ມີສັດທາວ່າພຣະອົງຈັດກຽມຜູ້ຄົນໄວ້ໃຫ້ທ່ານ (ເບິ່ງ ຄຳສອນ ແລະ ພັນທະສັນຍາ 100:3–8).
ຕັ້ງເປົ້າໝາຍການຊອກຫາໃນແຕ່ລະວັນ. ວາງແຜນການປະຕິບັດໃນການຄວບຄຸມຂອງທ່ານທີ່ມີອິດທິພົນຕໍ່ຜົນໄດ້ຮັບຂອງຕົວຊີ້ບອກທີ່ສຳຄັນ. ຕົວຢ່າງລວມທັງ:
-
ມີຄົນໃໝ່ຈັກຄົນທີ່ທ່ານຈະລົມເລື່ອງພຣະກິດຕິຄຸນໃນແຕ່ລະມື້.
-
ທ່ານຈະຖາມສະມາຊິກ, ຜູ້ຄົນທີ່ທ່ານກຳລັງສິດສອນ, ແລະ ຜູ້ຄົນທີ່ທ່ານຕິດຕໍ່ຈັກເທື່ອ ຖ້າຫາກວ່າເຂົາເຈົ້າຮູ້ຈັກບາງຄົນທີ່ອາດສົນໃຈຂ່າວສານຂອງທ່ານ.
-
ທ່ານຈະຕອບສະໜອງຕໍ່ຜູ້ທີ່ຖືກແນະນຳໃຫ້ທ່ານ ຫລື ຕອບໂພສທີ່ລົງໃນສື່ສັງຄົມໄວ້ເທົ່າໃດ.
ທົບທວນແອັບ Preach My Gospel ແລະ ຖາມຕົວເອງດ້ວຍຄຳຖາມແບບດັ່ງຕໍ່ໄປນີ້:
-
ພຣະບິດາເທິງສະຫວັນຈະໃຫ້ເຮົາເຮັດຫຍັງໃນມື້ນີ້ ແລະ ໃນອາທິດນີ້ ໃນການຊອກຫາຜູ້ຄົນເພື່ອສິດສອນ?
-
ເປົ້າໝາຍຕົວຊີ້ບອກທີ່ສຳຄັນປະຈຳວັນ ແລະ ປະຈຳອາທິດຢ່າງໃດແດ່ທີ່ເຮົາສາມາດຕັ້ງ ໃນການຊອກຫາຜູ້ຄົນເພື່ອສິດສອນ?
-
ກິດຈະກຳການຊອກຫາຢ່າງໃດແດ່ທີ່ດີທີ່ສຸດສຳລັບເວລານີ້ ແລະ ສະຖານທີ່ນີ້?
-
ເຮົາຈະສ້າງແຮງບັນດານໃຈ ແລະ ສະໜັບສະໜູນສະມາຊິກໃນຄວາມພະຍາຍາມຂອງເຂົາເຈົ້າທີ່ຈະແບ່ງປັນພຣະກິດຕິຄຸນຜ່ານທາງຫລັກທຳຂອງຄວາມຮັກ, ການແບ່ງປັນ, ແລະ ການເຊື້ອເຊີນໄດ້ແນວໃດ?
-
ສະມາຊິກໃໝ່ຄົນໃດທີ່ເຮົາສາມາດຕິດຕໍ່ ເພື່ອຊ່ວຍເຂົາເຈົ້າເຂົ້າຮ່ວມກອງປະຊຸມສິນລະລຶກ? ເຂົາເຈົ້າມີໝູ່ເພື່ອນທີ່ເຂົາເຈົ້າອາດເຊື້ອເຊີນຫລືບໍ່?
-
ເຮົາຈະເຮັດວຽກງານກັບສະພາຫວອດ ຫລື ເຂົ້າຮ່ວມການປະຊຸມປະສານງານປະຈຳອາທິດຂອງຫວອດ ເພື່ອລະບຸຄອບຄົວທີ່ເປັນສະມາຊິກບາງສ່ວນ, ສະມາຊິກທີ່ກັບຄືນມາ, ແລະ ຜູ້ຄາດຫວັງເປັນແອວເດີ ທີ່ຈະຕິດຕໍ່ໄດ້ແນວໃດ?
-
ແມ່ນໃຜແດ່ໃນຜູ້ຄົນທີ່ກຳລັງຮັບການສິດສອນໃນປະຈຸບັນ, ໃນຜູ້ຄົນທີ່ໄດ້ສິດສອນຜ່ານມາ, ແລະ ໃນຜູ້ຄົນທີ່ຖືກແນະນຳ ທີ່ເຮົາສາມາດຕິດຕໍ່? ເຮົາຈະຕິດຕໍ່ເຂົາເຈົ້າແນວໃດ? (ດ້ວຍຕົນເອງ, ຜ່ານທາງເທັກໂນໂລຈີ, ທາງໂທລະສັບ, ຫລື ດ້ວຍວິທີອື່ນໆ)
-
ມີວິທີໃໝ່ໃດແດ່ທີ່ເຮົາສາມາດຊອກຫາຜູ້ຄົນ?
-
ມີພອນສະຫວັນ ແລະ ຄວາມເຂັ້ມແຂງສ່ວນຕົວໃດແດ່ທີ່ເຮົາສາມາດໃຊ້?
-
ເຮົາຈະສາມາດປັບປຸງຄວາມສາມາດຂອງເຮົາໃນການຊອກຫາຜູ້ຄົນເພື່ອສິດສອນໄດ້ແນວໃດ?
-
ເຮົາຈະສາມາດຊ່ວຍຜູ້ທີ່ເຮົາຕິດຕໍ່ໃຫ້ຮູ້ສຶກເຖິງອິດທິພົນຂອງພຣະວິນຍານບໍລິສຸດໄດ້ແນວໃດ?
ສຳລັບຕົວຢ່າງຂອງກິດຈະກຳການຊອກຫາ, ໃຫ້ເບິ່ງ ບົດທີ 9, 10, ແລະ 13.
ໃຊ້ແອັບ Preach My Gospel ເພື່ອຊ່ວຍທ່ານໃຫ້ລະບຸກິດຈະກຳການຊອກຫາ ທີ່ມີປະສິດທິພາບໃນອະດີດ. ຍົກຕົວຢ່າງ, ທ່ານສາມາດເບິ່ງວິທີທີ່ຜູ້ປ່ຽນໃຈເຫລື້ອມໃສເມື່ອບໍ່ດົນມານີ້ໄດ້ຖືກພົບເຫັນແນວໃດ.
ສະແຫວງຫາການດົນໃຈ ແລະ ເປີດໃຈຮັບຄວາມປະທັບໃຈ ແລະ ແນວຄິດໃໝ່. ຫລີກເວັ້ນຈາກການຕິດຢູ່ກັບກິດຈະວັດປະຈຸບັນ. ຜູ້ສອນສາດສະໜາທີ່ຫາຄົນໃໝ່ເພື່ອສິດສອນຢ່າງສະໝ່ຳສະເໝີ ມັກຈະໃຊ້ຫລາກຫລາຍວິທີໃນແຕ່ລະອາທິດ. ເຂົາເຈົ້າເຮັດວຽກງານຢູ່ສະເໝີ.
2. ບັນທຶກ ແລະ ກຳນົດເວລາແຜນຂອງທ່ານ
ກັບຄູ່ສອນຂອງທ່ານ, ໃຫ້ໃຊ້ແອັບ Preach My Gospel ເພື່ອບັນທຶກ ແລະ ກຳນົດເວລາເປົ້າໝາຍ ແລະ ແຜນຢ່າງລະອຽດ. ການບັນທຶກ ແລະ ການກຳນົດເວລາແຜນຂອງທ່ານ ຈະຊ່ວຍໃຫ້ທ່ານລະບຸວ່າ ຄວນເຮັດສິ່ງໃດ ແລະ ເຮັດເມື່ອໃດ.
ຖາມຕົວເອງດ້ວຍຄຳຖາມແບບດັ່ງຕໍ່ໄປນີ້:
-
ເຮົາຈະຕິດຕໍ່ຜູ້ຄົນເມື່ອໃດ ແລະ ແນວໃດ? ແມ່ນຫຍັງຄືການເຂົ້າເຖິງທີ່ດີທີ່ສຸດ? ສະຖານທີ່ ທີ່ດີທີ່ສຸດຢູ່ໃສ? ເວລາໃດທີ່ດີທີ່ສຸດໃນແຕ່ລະວັນສຳລັບວິທີຕ່າງໆຂອງການຊອກຫາຜູ້ຄົນ?
-
ເຮົາຈະສາມາດມີການສົນທະນາທີ່ມີຄວາມໝາຍກັບຜູ້ຄົນທີ່ເຮົາພົບໄດ້ແນວໃດ?
-
ເຮົາຈະຊອກຫາທາງອອນລາຍໂດຍໃຊ້ສື່ສັງຄົມ ແລະ ເທັກໂນໂລຈີອື່ນໆໄດ້ແນວໃດ ແລະ ເມື່ອໃດ?
-
ເຮົາຈະຕິດຕໍ່ຫາຜູ້ທີ່ຖືກແນະນຳໃຫ້ເຮົາເມື່ອໃດ?
-
ເຮົາຈະເຮັດແຜນສຳລອງຢ່າງໃດແດ່ທີ່ເຮົາຈະໃຊ້ເມື່ອແຜນອື່ນລົ້ມເຫລວ?
3. ກະທຳຕາມແຜນຂອງທ່ານ
ພະຍາຍາມຢ່າງພາກພຽນເພື່ອບັນລຸເປົ້າໝາຍຂອງທ່ານໃນການຊອກຫາຜູ້ຄົນເພື່ອສິດສອນ. ອະທິຖານໃນໃຈຕະຫລອດທັງວັນ. ເປີດໃຈທັກທາຍ ແລະ ເວົ້າລົມກັບຜູ້ຄົນທີ່ທ່ານພົບ. ພຣະວິນຍານຈະຊ່ວຍໃຫ້ທ່ານຮູ້ວ່າຈະໄປໃສ, ຈະເວົ້າຫຍັງ, ແລະ ຈະປັບປ່ຽນສິ່ງໃດ.
ໃນລະຫວ່າງມື້, ໃຫ້ຖາມຕົວເອງດ້ວຍຄຳຖາມແບບດັ່ງຕໍ່ໄປນີ້:
-
ເຮົາຈະສາມາດເຮັດວຽກດ້ວຍສັດທາ, ໄວ້ວາງໃຈພຣະຜູ້ເປັນເຈົ້າເພື່ອຊ່ວຍເຮົາ ແລະ ຂະຫຍາຍຄວາມພະຍາຍາມຂອງເຮົາ ທີ່ຈະຮັບໃຊ້ລູກໆຂອງພຣະອົງໄດ້ແນວໃດ?
-
ເຮົາຈະສາມາດສ້າງສັນ ແລະ ກ້າຫານໄດ້ແນວໃດເມື່ອກະທຳຕາມແຜນຂອງເຮົາ?
-
ເຮົາຈະປັບແຜນຂອງເຮົາຕາມຄວາມຕ້ອງການ ແລະ ສະຖານະການຂອງຜູ້ຄົນໄດ້ແນວໃດ?
-
ເຮົາຈະສາມາດຊ່ວຍໃຫ້ຜູ້ຄົນຮູ້ສຶກເຖິງອິດທິພົນຂອງພຣະວິນຍານບໍລິສຸດໄດ້ແນວໃດ?
ແຜນມັກຈະບໍ່ເປັນໄປຕາມທີ່ທ່ານຫວັງສະເໝີໄປ. ມີຄວາມປັບຕົວໄດ້ງ່າຍ ແລະ ໃຊ້ແຜນສຳລອງເມື່ອຈຳເປັນ.
4. ທົບທວນຄວາມກ້າວໜ້າ ແລະ ຕິດຕາມຜົນ
ຕະຫລອດທັງວັນ ແລະ ອາທິດ, ໃຫ້ທົບທວນຄວາມກ້າວໜ້າດ້ວຍການອະທິຖານ ໃນການບັນລຸເປົ້າໝາຍຂອງທ່ານ ທີ່ຈະຊອກຫາຜູ້ຄົນເພື່ອສິດສອນ. ຖາມຕົວເອງດ້ວຍຄຳຖາມແບບດັ່ງຕໍ່ໄປນີ້:
-
ເຮົາເຮັດໄດ້ດີຫລາຍປານໃດໃນການບັນລຸເປົ້າໝາຍ ແລະ ການເຮັດຕາມແຜນຂອງເຮົາ?
-
ການປັບປ່ຽນຢ່າງໃດແດ່ທີ່ເຮົາຄວນເຮັດ ເພື່ອໃຫ້ບັນລຸເປົ້າໝາຍໃນການຊອກຫາຄົນ?
-
ເຮົາຈະຫລີກລ້ຽງຈາກການເຮັດກິດຈະວັດທີ່ບໍ່ມີປະສິດທິພາບໃນການຊອກຫາຄົນເພື່ອສິດສອນໄດ້ແນວໃດ?
-
ມີສິ່ງໃໝ່ໆຢ່າງໃດແດ່ທີ່ເຮົາສາມາດລອງໄດ້ໃນຊ່ວງເວລານີ້ຂອງມື້?
-
ມີແນວຄິດຢ່າງໃດແດ່ທີ່ເຮົາສາມາດສົນທະນາຢູ່ໃນການປະຊຸມປະສານງານປະຈຳອາທິດຂອງຫວອດ ເພື່ອຊ່ວຍໃຫ້ເຮົາຊອກຫາຄົນເພື່ອສິດສອນ? (ເບິ່ງ ບົດທີ 13.)
ໃນຖານະຄູ່ສອນ, ໃຫ້ໃຊ້ແຜນພາບ “ຄວາມພະຍາຍາມໃນການຊອກຫາ” ໃນ ບົດທີ 9 ເພື່ອປະເມີນຄວາມພະຍາຍາມໃນການຊອກຫາປະຈຳອາທິດ ແລະ ປະຈຳວັນຂອງທ່ານ. ຮັບຮູ້ສິ່ງທີ່ທ່ານກຳລັງເຮັດໄດ້ດີ, ແລະ ພິຈາລະນາວິທີທີ່ທ່ານສາມາດປັບປຸງ.
ຕະຫລອດທັງວັນ, ໃຫ້ຢຸດຊົ່ວຄາວສອງສາມນາທີເພື່ອຮັບຮູ້ພຣະຫັດຂອງພຣະເຈົ້າໃນວຽກງານຂອງທ່ານ.