“ບົດທີ 5: ໃຊ້ພະລັງຂອງພຣະຄຳພີມໍມອນ,” ຈົ່ງສັ່ງສອນພຣະກິດຕິຄຸນຂອງເຮົາ: ຄູ່ມືຕໍ່ການແບ່ງປັນພຣະກິດຕິຄຸນຂອງພຣະເຢຊູຄຣິດ (2023)
“ບົດທີ 5,” ຈົ່ງສັ່ງສອນພຣະກິດຕິຄຸນຂອງເຮົາ
ບົດທີ 5
ໃຊ້ພະລັງຂອງພຣະຄຳພີມໍມອນ
ໃຫ້ພິຈາລະນາສິ່ງນີ້
-
ພຣະຄຳພີມໍມອນເປັນສີລາສຳຄັນຂອງສາດສະໜາຂອງເຮົາແນວໃດ?
-
ເປັນຫຍັງພຣະຄຳພີມໍມອນຈຶ່ງມີພະລັງຫລາຍໃນຂະບວນການປ່ຽນໃຈເຫລື້ອມໃສ?
-
ພຣະຄຳພີມໍມອນສິດສອນຫຍັງແດ່ກ່ຽວກັບພຣະເຢຊູຄຣິດ?
-
ເຮົາຈະສາມາດໃຊ້ພຣະຄຳພີມໍມອນເພື່ອຊ່ວຍຕົນເອງ ແລະ ຄົນອື່ນໃຫ້ຫຍັບເຂົ້າໃກ້ພຣະເຈົ້າຫລາຍຂຶ້ນໄດ້ແນວໃດ?
-
ພຣະຄຳພີມໍມອນຕອບຄຳຖາມຂອງຈິດວິນຍານແນວໃດ?
-
ເຮົາຈະສາມາດຊ່ວຍຄົນໃຫ້ອ່ານ ແລະ ໄດ້ຮັບປະຈັກພະຍານເຖິງພຣະຄຳພີມໍມອນໄດ້ແນວໃດ?
ພຣະຄຳພີມໍມອນ, ລວມກັບພຣະວິນຍານ, ເປັນແຫລ່ງທີ່ມີພະລັງໃນການປ່ຽນໃຈເຫລື້ອມໃສຂອງທ່ານແນວໃດ? ໜັງສືເຫລັ້ມນີ້ເປັນບັນທຶກບູຮານທີ່ສັກສິດ ຖືກຂຽນເພື່ອໃຫ້ທຸກຄົນເຊື່ອວ່າພຣະເຢຊູຄືພຣະຄຣິດ (ເບິ່ງ ໜ້າວິເຄາະສະບັບຂອງພຣະຄຳພີມໍມອນ). ດັ່ງທີ່ຄຳບັນຍາຍກ່າວວ່າ, ພຣະຄຳພີມໍມອນເປັນ “ປະຈັກພະຍານອີກຢ່າງໜຶ່ງເຖິງພຣະເຢຊູຄຣິດ.” ມັນຍັງເປັນຫລັກຖານທີ່ໜ້າສົນໃຈວ່າ ພຣະເຈົ້າໄດ້ເອີ້ນໂຈເຊັບ ສະມິດ ໃຫ້ເປັນສາດສະດາ ແລະ ຟື້ນຟູພຣະກິດຕິຄຸນຂອງພຣະເຢຊູຄຣິດ ຜ່ານທາງເພິ່ນ.
ພຣະຄຳພີມໍມອນເປັນສີລາສຳຄັນຂອງສາດສະໜາຂອງເຮົາ.
ສາດສະດາໂຈເຊັບ ສະມິດ ໄດ້ສິດສອນວ່າພຣະຄຳພີມໍມອນເປັນ “ສີລາສຳຄັນຂອງສາດສະໜາຂອງພວກເຮົາ” (ຄຳນຳຕໍ່ພຣະຄຳພີມໍມອນ). ໃນໂອກາດໜຶ່ງອີກເພິ່ນໄດ້ກ່າວວ່າ: “ຖ້າເອົາພຣະຄຳພີມໍມອນ ແລະ ການເປີດເຜີຍອອກໄປ ແລ້ວຈະມີຫຍັງເຫລືອໃນສາດສະໜາຂອງເຮົາ? ເຮົາບໍ່ມີຫຍັງເລີຍ” (Teachings of Presidents of the Church: Joseph Smith [2007], 196).
ປະຕູໂຂງແມ່ນໂຄງສ້າງສະຖາປັດຕະຍະກຳທີ່ແຂງແກ່ນຈາກຊິ້ນສ່ວນຮູບຫລ່ຽມທີ່ຕິດກັນ. ຊິ້ນສ່ວນກາງ, ຫລື ສີລາສຳຄັນ, ຕາມປົກກະຕິແລ້ວ ມີຂະໜາດໃຫຍ່ກວ່າຊິ້ນສ່ວນອື່ນໆ ແລະ ຍຶດຊິ້ນສ່ວນອື່ນໆໃຫ້ເຂົ້າກັນ.
ປະທານເອສະຣາ ແທັບ ເບັນສັນ ໄດ້ກ່າວວ່າ ພຣະຄຳພີມໍມອນເປັນສີລາສຳຄັນຂອງສາດສະໜາຈັກຂອງເຮົາ ຢ່າງໜ້ອຍສາມປະການ:
ພະຍານຂອງພຣະຄຣິດ “ພຣະຄຳພີມໍມອນ ເປັນສີລາສຳຄັນໃນການເປັນພະຍານເຖິງພຣະເຢຊູຄຣິດ, ຜູ້ຊຶ່ງພຣະອົງເອງກໍເປັນສີລາເອກຂອງທຸກສິ່ງທີ່ເຮົາເຮັດ. ມັນເປັນພະຍານເຖິງຄວາມເປັນຈິງຂອງພຣະອົງດ້ວຍພະລັງ ແລະ ຄວາມແຈ່ມແຈ້ງ.”
ຄວາມສົມບູນຂອງຄຳສອນ. “ພຣະຜູ້ເປັນເຈົ້າເອງໄດ້ກ່າວວ່າ ພຣະຄຳພີມໍມອນບັນຈຸ ‘ຄວາມສົມບູນແຫ່ງພຣະກິດຕິຄຸນຂອງພຣະເຢຊູຄຣິດ’ [ຄຳສອນ ແລະ ພັນທະສັນຍາ 20:9; 27:5]. … ໃນພຣະຄຳພີມໍມອນ ເຮົາຈະພົບເຫັນຄວາມສົມບູນຂອງ [ຄຳສອນ] ທີ່ຈຳເປັນຕໍ່ຄວາມລອດຂອງເຮົາ. ແລະ [ມັນ] ຖືກສິດສອນໃນທາງທີ່ແຈ່ມແຈ້ງ ແລະ ລຽບງ່າຍ ແມ່ນແຕ່ເດັກນ້ອຍກໍສາມາດຮຽນຮູ້ເຖິງວິທີຂອງຄວາມລອດ ແລະ ຄວາມສູງສົ່ງ.”
ຮາກຖານຂອງປະຈັກພະຍານ. “ຄືກັນກັບປະຕູໂຂງຈະພັງທະລາຍຖ້າຫາກສີລາສຳຄັນຖືກຖອດອອກ, ສາດສະໜາຈັກທັງໝົດຈະຕັ້ງຢູ່ ຫລື ພັງທະລາຍດ້ວຍຄວາມຈິງຂອງພຣະຄຳພີມໍມອນເຊັ່ນກັນ. … ຖ້າຫາກພຣະຄຳພີມໍມອນເປັນຄວາມຈິງ … ເຮົາຕ້ອງຍອມຮັບຄຳກ່າວອ້າງຂອງການຟື້ນຟູ.” (Teachings of Presidents of the Church: Ezra Taft Benson [2014], 129, 131, 128.)
ໂດຍການໄດ້ຮັບປະຈັກພະຍານເຖິງພຣະຄຳພີມໍມອນວ່າເປັນພຣະຄຳຂອງພຣະເຈົ້າ, ເຮົາສາມາດຮູ້ວ່າ ໂຈເຊັບ ສະມິດ ເປັນສາດສະດາ. ຜ່ານທາງເພິ່ນ, ສິດອຳນາດຂອງຖານະປະໂລຫິດຂອງພຣະເຈົ້າໄດ້ຖືກຟື້ນຟູໂດຍຜູ້ສົ່ງຂ່າວຈາກສະຫວັນ. ພຣະເຈົ້າກໍໄດ້ອະນຸຍາດໃຫ້ໂຈເຊັບຈັດຕັ້ງສາດສະໜາຈັກຂອງພຣະເຢຊູຄຣິດນຳອີກ. ການເປີດເຜີຍສືບຕໍ່ໃນທຸກວັນນີ້ຜ່ານທາງສາດສະດາທີ່ມີຊີວິດຢູ່.
ພຣະຄຳພີມໍມອນເປັນສິ່ງສຳຄັນຕໍ່ການປ່ຽນໃຈເຫລື້ອມໃສສ່ວນຕົວ
ພາກສ່ວນທີ່ສຳຄັນຂອງການປ່ຽນໃຈເຫລື້ອມໃສແມ່ນການຮັບເອົາການເປັນພະຍານໂດຍອຳນາດຂອງພຣະວິນຍານບໍລິສຸດວ່າພຣະຄຳພີມໍມອນເປັນຄວາມຈິງ. ເມື່ອທ່ານອ່ານ ແລະ ສຶກສາມັນຢ່າງຈິງໃຈ, ທ່ານຈະຮູ້ສຶກວ່າຖ້ອຍຄຳຂອງມັນຂະຫຍາຍຈິດວິນຍານຂອງທ່ານ. ຖ້ອຍຄຳຂອງມັນຈະໃຫ້ຄວາມກະຈ່າງແຈ້ງແກ່ຄວາມເຂົ້າໃຈຂອງທ່ານກ່ຽວກັບຊີວິດ, ກ່ຽວກັບແຜນຂອງພຣະເຈົ້າ, ແລະ ກ່ຽວກັບພຣະເຢຊູຄຣິດ (ເບິ່ງ ແອວມາ 32:28). ຈົ່ງອະທິຖານກ່ຽວກັບໜັງສືເຫລັ້ມນີ້ດ້ວຍເຈດຕະນາອັນແທ້ຈິງ ແລະ ດ້ວຍສັດທາໃນພຣະຄຣິດ. ເມື່ອທ່ານເຮັດ, ທ່ານຈະໄດ້ຮັບການເປັນພະຍານຜ່ານທາງພຣະວິນຍານບໍລິສຸດ ວ່າມັນເປັນພຣະຄຳຂອງພຣະເຈົ້າ (ເບິ່ງ ໂມໂຣໄນ 10:4–5).
ປະຈັກພະຍານຂອງທ່ານເອງເຖິງພຣະຄຳພີມໍມອນສາມາດນຳໄປສູ່ສັດທາທີ່ເລິກເຊິ່ງ ແລະ ໝັ້ນຄົງໃນພະລັງຂອງມັນ ເພື່ອຊ່ວຍຄົນອື່ນໃຫ້ປ່ຽນໃຈເຫລື້ອມໃສ. ຊ່ວຍໃຫ້ຜູ້ຄົນທີ່ທ່ານສິດສອນຮັບຮູ້ຄວາມກະຈ່າງແຈ້ງທີ່ເຂົາເຈົ້າຮູ້ສຶກຂະນະທີ່ເຂົາເຈົ້າອ່ານມັນຢ່າງຈິງໃຈ. ເນັ້ນເຖິງການເປັນພະຍານທີ່ມີພະລັງເຖິງພຣະເຢຊູຄຣິດ. ຊຸກຍູ້ເຂົາເຈົ້າໃຫ້ອະທິຖານ ເພື່ອຮັບການເປັນພະຍານຂອງຕົນເອງວ່າ ໜັງສືນີ້ເປັນຄວາມຈິງ.
ການຊຸກຍູ້ຜູ້ຄົນໃຫ້ສະແຫວງຫາການເປັນພະຍານຈາກພຣະວິນຍານບໍລິສຸດກ່ຽວກັບພຣະຄຳພີມໍມອນ ຄວນເປັນຈຸດສຸມຫລັກຂອງການສິດສອນຂອງທ່ານ. ພຣະຄຳພີມໍມອນສາມາດປ່ຽນຊີວິດຂອງເຂົາເຈົ້າຕະຫລອດໄປ.
ໃຊ້ພຣະຄຳພີມໍມອນເພື່ອສິດສອນພຣະກິດຕິຄຸນຂອງພຣະເຢຊູຄຣິດ
ສາດສະດາໂຈເຊັບ ສະມິດ ໄດ້ກ່າວວ່າ, “ພຣະຄຳພີມໍມອນເປັນພຣະຄຳພີທີ່ຖືກຕ້ອງທີ່ສຸດໃນໂລກ” (ຄຳນຳຕໍ່ພຣະຄຳພີມໍມອນ). ມັນເປັນພະຍານເຖິງພຣະຄຣິດ ແລະ ສິດສອນຄຳສອນຂອງພຣະອົງຢ່າງຊັດເຈນ (ເບິ່ງ 2 ນີໄຟ 31; 32:1–6; 3 ນີໄຟ 11:31–39; 27:13–22). ມັນສິດສອນຄວາມສົມບູນຂອງພຣະກິດຕິຄຸນຂອງພຣະອົງ. ຫລັກທຳ ແລະ ພິທີການທຳອິດຂອງພຣະກິດຕິຄຸນ ດັ່ງທີ່ສິດສອນໃນພຣະຄຳພີມໍມອນ ແມ່ນທາງໄປສູ່ຊີວິດອັນອຸດົມສົມບູນ.
ໃຊ້ພຣະຄຳພີມໍມອນເປັນແຫລ່ງຕົ້ນຕໍຂອງທ່ານ ເພື່ອການສິດສອນພຣະກິດຕິຄຸນທີ່ຖືກຟື້ນຟູ. ຕາຕະລາງດັ່ງຕໍ່ໄປນີ້ບອກເຖິງຄວາມຈິງບາງຢ່າງຢູ່ໃນພຣະຄຳພີມໍມອນ ທີ່ທ່ານຈະສິດສອນ.
ບົດຮຽນຂອງຜູ້ສອນສາດສະໜາໃນ ບົດທີ 3 |
ຄຳສອນ |
ແຫລ່ງອ້າງອີງ |
---|---|---|
ບົດຮຽນຂອງຜູ້ສອນສາດສະໜາໃນ ບົດທີ 3 ຂ່າວສານກ່ຽວກັບການຟື້ນຟູພຣະກິດຕິຄຸນຂອງພຣະເຢຊູຄຣິດ | ຄຳສອນ ລັກສະນະຂອງພຣະເຈົ້າ, ການປະຕິບັດສາດສະໜາກິດ ແລະ ການຊົດໃຊ້ຂອງພຣະຜູ້ຊ່ວຍໃຫ້ລອດ, ການຕົກໄປ, ການຟື້ນຟູ, ໂຈເຊັບ ສະມິດ, ສິດອຳນາດຂອງຖານະປະໂລຫິດ | ແຫລ່ງອ້າງອີງ |
ບົດຮຽນຂອງຜູ້ສອນສາດສະໜາໃນ ບົດທີ 3 ແຜນແຫ່ງຄວາມລອດຂອງພຣະບິດາເທິງສະຫວັນ | ຄຳສອນ “ແຜນອັນຍິ່ງໃຫຍ່ຂອງພຣະເຈົ້າຜູ້ສະຖິດນິລັນດອນ,” ລວມທັງການຕົກຂອງອາດາມ ແລະ ເອວາ, ການຊົດໃຊ້ຂອງພຣະເຢຊູຄຣິດ, ການຟື້ນຄືນພຣະຊົນ, ແລະ ການພິພາກສາ | ແຫລ່ງອ້າງອີງ |
ບົດຮຽນຂອງຜູ້ສອນສາດສະໜາໃນ ບົດທີ 3 ພຣະກິດຕິຄຸນຂອງພຣະເຢຊູຄຣິດ | ຄຳສອນ ສັດທາໃນພຣະຄຣິດ, ການກັບໃຈ, ການບັບຕິສະມາ, ຂອງປະທານແຫ່ງພຣະວິນຍານບໍລິສຸດ, ແລະ ການອົດທົນຈົນເຖິງທີ່ສຸດ | ແຫລ່ງອ້າງອີງ |
ບົດຮຽນຂອງຜູ້ສອນສາດສະໜາໃນ ບົດທີ 3 ການກາຍເປັນສານຸສິດຂອງພຣະເຢຊູຄຣິດໄປຕະຫລອດຊີວິດ | ຄຳສອນ ພິທີການເຊັ່ນການບັບຕິສະມາ, ພິທີການຂອງຖານະປະໂລຫິດ, ແລະ ສິນລະລຶກ | ແຫລ່ງອ້າງອີງ |
ການສຶກສາພຣະຄຳພີ
ພຣະຜູ້ຊ່ວຍໃຫ້ລອດກ່າວຫຍັງແດ່ກ່ຽວກັບພຣະຄຳພີມໍມອນ?
ພຣະຄຳພີມໍມອນເປັນພະຍານເຖິງພຣະຄຣິດ
ຈຸດປະສົງຫລັກຂອງພຣະຄຳພີມໍມອນແມ່ນເພື່ອເປັນພະຍານເຖິງພຣະເຢຊູຄຣິດ. ມັນຢືນຢັນເຖິງຄວາມຈິງແທ້ຂອງພຣະຊົນຊີບ, ພາລະກິດ, ການຟື້ນຄືນພຣະຊົນ, ແລະ ອຳນາດຂອງພຣະອົງ. ມັນສິດສອນຄຳສອນທີ່ແທ້ຈິງກ່ຽວກັບພຣະຄຣິດ ແລະ ການຊົດໃຊ້ຂອງພຣະອົງ.
ສາດສະດາຫລາຍທ່ານທີ່ໄດ້ຂຽນ ແລະ ຮັກສາພຣະຄຳພີມໍມອນໄດ້ເຫັນພຣະຄຣິດກັບຕາ. ນ້ອງຊາຍຂອງຢາເຣັດ, ນີໄຟ, ແລະ ຢາໂຄບ ໄດ້ເຫັນພຣະຄຣິດກ່ອນພຣະອົງມາກຳເນີດ. ຝູງຊົນໄດ້ຢູ່ໃນລະຫວ່າງການປະຕິບັດສາດສະໜາກິດຂອງພຣະຜູ້ຊ່ວຍໃຫ້ລອດ ໃນບັນດາຊາວນີໄຟ (ເບິ່ງ 3 ນີໄຟ 11–28). ຕໍ່ມາ, ມໍມອນ ແລະ ໂມໂຣໄນ ໄດ້ເຫັນພຣະຄຣິດທີ່ຟື້ນຄືນພຣະຊົນແລ້ວ (ເບິ່ງ ມໍມອນ 1:15; ອີເທີ 12:39).
ເມື່ອຜູ້ຄົນອ່ານ ແລະ ອະທິຖານກ່ຽວກັບພຣະຄຳພີມໍມອນ, ເຂົາເຈົ້າຈະມາຮູ້ຈັກພຣະຜູ້ຊ່ວຍໃຫ້ລອດດີຂຶ້ນ ແລະ ປະສົບກັບຄວາມຮັກຂອງພຣະອົງ. ເຂົາເຈົ້າຈະເຕີບໂຕໃນປະຈັກພະຍານຂອງເຂົາເຈົ້າເຖິງພຣະອົງ. ເຂົາເຈົ້າຈະຮູ້ຈັກວິທີທີ່ຈະມາຫາພຣະອົງ ແລະ ໄດ້ຮັບຄວາມລອດ. (ເບິ່ງ 1 ນີໄຟ 15:14–15.)
ຮູບພາບປະທານຣະໂຊ ເອັມ ແນວສັນ“ພຣະຄຳພີມໍມອນໄດ້ໃຫ້ຄວາມເຂົ້າໃຈທີ່ສົມບູນ ແລະ ເຊື່ອຖືໄດ້ທີ່ສຸດ ເຖິງການຊົດໃຊ້ຂອງພຣະເຢຊູຄຣິດ ຫລາຍກວ່າໃນໜັງສືເຫລັ້ມອື່ນໆ. ມັນສອນເຖິງຄວາມໝາຍຂອງການເກີດໃໝ່ຢ່າງແຈ່ມແຈ້ງ. … ເຮົາຮູ້ວ່າເປັນຫຍັງເຮົາຈຶ່ງມາຢູ່ໃນໂລກນີ້. ຄວາມຈິງເຫລົ່ານີ້ ແລະ ຄວາມຈິງອື່ນໆ ແມ່ນມີພະລັງ ແລະ ຈູງໃຈຫລາຍ ຊຶ່ງສອນຢູ່ໃນພຣະຄຳພີມໍມອນ ຫລາຍກວ່າຈາກໜັງສືເຫລັ້ມອື່ນໆ. ພະລັງອັນສົມບູນແຫ່ງພຣະກິດຕິຄຸນຂອງພຣະເຢຊູຄຣິດບັນຈຸຢູ່ໃນພຣະຄຳພີມໍມອນ” (Russell M. Nelson, “The Book of Mormon: What Would Your Life Be Like without It?” Liahona, Nov. 2017, 62).
ການສຶກສາສ່ວນຕົວ
ຕະຫລອດໄລຍະການເຜີຍແຜ່ຂອງທ່ານ, ໃຫ້ຂຽນຄຳຕອບຕໍ່ຄຳຖາມດັ່ງຕໍ່ໄປນີ້ໃນບັນທຶກການສຶກສາຂອງທ່ານ:
-
ທ່ານໄດ້ຮຽນຮູ້ຫຍັງແດ່ກ່ຽວກັບພຣະເຢຊູຄຣິດ ຈາກການສຶກສາພຣະຄຳພີມໍມອນຂອງທ່ານ?
-
ການສຶກສາພຣະຄຳພີມໍມອນຂອງທ່ານມີອິດທິພົນຕໍ່ປະຈັກພະຍານຂອງທ່ານເຖິງພຣະເຢຊູຄຣິດແນວໃດ?
-
ທ່ານຈະສາມາດໃຊ້ພຣະຄຳພີມໍມອນ ເພື່ອຊ່ວຍຜູ້ຄົນເພີ່ມຄວາມເຂັ້ມແຂງໃຫ້ແກ່ປະຈັກພະຍານຂອງເຂົາເຈົ້າແນວໃດ?
ການສຶກສາພຣະຄຳພີ
ສາດສະດາໃນພຣະຄຳພີມໍມອນໃຫ້ເຫດຜົນຢ່າງໃດແດ່ສຳລັບການຂຽນບັນທຶກຂອງພວກເພິ່ນ?
ການສຶກສາສ່ວນຕົວ ຫລື ກັບຄູ່ສອນ
ພຣະຄຳພີມໍມອນຖືກຂຽນໄວ້ “ເພື່ອເຮັດໃຫ້ [ທຸກຄົນ] ຮັບຮູ້ວ່າພຣະເຢຊູຄື ພຣະຄຣິດ” (ໜ້າວິເຄາະສະບັບຂອງພຣະຄຳພີມໍມອນ). ຕາຕະລາງດັ່ງຕໍ່ໄປນີ້ສະແດງພຣະຄຳພີມໍມອນບາງບົດທີ່ເປັນພະຍານເຖິງພຣະຊົນຊີບ, ຄຳສອນ, ແລະ ການປະຕິບັດສາດສະໜາກິດຂອງພຣະເຢຊູຄຣິດ. ເລືອກຂໍ້ພຣະຄຳພີເພື່ອສຶກສາຕະຫລອດໄລຍະການເຜີຍແຜ່ຂອງທ່ານ.
ນອກເໜືອຈາກນີ້, ໃຫ້ຄິດກ່ຽວກັບຄວາມຕ້ອງການຂອງຜູ້ຄົນທີ່ທ່ານກຳລັງສິດສອນນຳອີກ. ວາງແຜນທີ່ຈະອ່ານຂໍ້ພຣະຄຳພີບາງຂໍ້ເຫລົ່ານີ້ກັບເຂົາເຈົ້າ ເພື່ອເສີມສ້າງຄວາມຮູ້ ແລະ ປະຈັກພະຍານຂອງເຂົາເຈົ້າເຖິງພຣະຜູ້ຊ່ວຍໃຫ້ລອດ.
ໜ້າວິເຄາະສະບັບ ແລະ ຄຳນຳ |
ລະບຸຈຸດປະສົງຂອງໜັງສືຢ່າງແຈ່ມແຈ້ງ. |
ລີໄຮ ແລະ ນີໄຟເປັນພະຍານເຖິງພຣະຜູ້ຊ່ວຍໃຫ້ລອດ. | |
ລີໄຮ ແລະ ຢາໂຄບເປັນພະຍານເຖິງພຣະເຢຊູຄຣິດ ແລະ ການຊົດໃຊ້ຂອງພຣະອົງ. | |
ນີໄຟສິດສອນຄຳສອນຂອງພຣະຄຣິດ. | |
ກະສັດເບັນຢາມິນເປັນພະຍານເຖິງພຣະຄຣິດ. | |
ແອວມາເປັນພະຍານເຖິງພຣະຜູ້ຊ່ວຍໃຫ້ລອດ. | |
ແອວມາປະສົບກັບອຳນາດແຫ່ງການຊົດໃຊ້ຂອງພຣະຄຣິດ. | |
ພຣະຜູ້ຊ່ວຍໃຫ້ລອດເຊື້ອເຊີນຜູ້ຄົນໃຫ້ມາຫາພຣະອົງ. | |
ພຣະຜູ້ຊ່ວຍໃຫ້ລອດສິດສອນຊາວນີໄຟເຖິງພຣະບິດາ ແລະ ຄຳສອນຂອງພຣະອົງ. | |
ພຣະຜູ້ຊ່ວຍໃຫ້ລອດສິດສອນພຣະກິດຕິຄຸນຂອງພຣະອົງ. | |
ອີເທີ ແລະ ໂມໂຣໄນສິດສອນວ່າ ສັດທາໃນພຣະເຢຊູຄຣິດເປັນຫລັກທຳຂອງການກະທຳ ແລະ ພະລັງ. | |
ມໍມອນສິດສອນເຖິງຄວາມຮັກອັນບໍລິສຸດຂອງພຣະຄຣິດ ແລະ ການຊົດໃຊ້ຂອງພຣະອົງ. | |
ໂມໂຣໄນເຊື້ອເຊີນທຸກຄົນໃຫ້ມາຫາພຣະຄຣິດ ແລະ ຖືກເຮັດໃຫ້ເປັນຄົນດີພ້ອມໃນພຣະອົງ. |
ພຣະຄຳພີມໍມອນຊ່ວຍໃຫ້ເຮົາຫຍັບເຂົ້າໃກ້ພຣະເຈົ້າຫລາຍຂຶ້ນ
ກ່ຽວກັບພຣະຄຳພີມໍມອນ, ສາດສະດາໂຈເຊັບ ສະມິດ ໄດ້ກ່າວວ່າ, “[ຊາຍ ຫລື ຍິງ] ຈະໄດ້ເຂົ້າໃກ້ພຣະເຈົ້າໂດຍການປະຕິບັດຕາມຄຳສັ່ງສອນຂອງພຣະຄຳພີນີ້ຫລາຍກວ່າປະຕິບັດຕາມໜັງສືເຫລັ້ມອື່ນໆ” (ຄຳນຳຕໍ່ພຣະຄຳພີມໍມອນ). ໃນການສິດສອນ ແລະ ການເຊື້ອເຊີນຜູ້ຄົນໃຫ້ດຳລົງຊີວິດຕາມຫລັກທຳໃນພຣະຄຳພີມໍມອນຢ່າງສະໝ່ຳສະເໝີ, ທ່ານຊ່ວຍໃຫ້ເຂົາເຈົ້າພັດທະນາສັດທາໃນພຣະເຢຊູຄຣິດ ແລະ ຫຍັບເຂົ້າໃກ້ພຣະເຈົ້າຫລາຍຂຶ້ນ.
ພຣະຄຳພີມໍມອນເສີມສ້າງປະຈັກພະຍານ ແລະ ເຊື້ອເຊີນການເປີດເຜີຍສ່ວນຕົວ. ໃຊ້ພຣະຄຳພີມໍມອນເພື່ອຊ່ວຍໃຫ້ຜູ້ຄົນມີປະສົບການທາງວິນຍານ, ໂດຍສະເພາະການເປັນພະຍານຈາກພຣະວິນຍານບໍລິສຸດ ວ່າໜັງສືນັ້ນເປັນພຣະຄຳຂອງພຣະເຈົ້າ.
ໃຫ້ຄວາມສຳຄັນຕໍ່ຂໍ້ພຣະຄຳພີໃນພຣະຄຳພີມໍມອນ ເມື່ອທ່ານສິດສອນ. ມັນມີອຳນາດແຫ່ງການປ່ຽນໃຈເຫລື້ອມໃສ ຜ່ານທາງພຣະວິນຍານບໍລິສຸດ. ເມື່ອທ່ານສິດສອນພຣະກິດຕິຄຸນໂດຍການໃຊ້ພຣະຄຳພີມໍມອນ, ການສິດສອນຂອງທ່ານຈະສະທ້ອນເຖິງພະລັງ ແລະ ຄວາມຊັດເຈນໃນໃຈ ແລະ ຄວາມຄິດ.
ປະທານກໍດອນ ບີ ຮິງລີ ໄດ້ສິດສອນວ່າ “ຄົນທີ່ອ່ານ [ພຣະຄຳພີມໍມອນ] ດ້ວຍການອະທິຖານ, ບໍ່ວ່າເຂົາຈະຮັ່ງມີ ຫລື ຍາກຈົນ, ໄດ້ຮຽນຮູ້ ຫລື ບໍ່ໄດ້ຮຽນຮູ້, ຈະເຕີບໂຕພາຍໃຕ້ພະລັງຂອງມັນ.” ເພິ່ນໄດ້ສິດສອນຕື່ມອີກວ່າ:
“ຂ້າພະເຈົ້າສັນຍາກັບທ່ານໂດຍບໍ່ລັງເລໃຈວ່າ ຖ້າຫາກທ່ານຈະອ່ານພຣະຄຳພີມໍມອນດ້ວຍການອະທິຖານ, ບໍ່ວ່າທ່ານເຄີຍອ່ານມາແລ້ວຈັກເທື່ອກໍຕາມ, ຈະມີພຣະວິນຍານຂອງພຣະຜູ້ເປັນເຈົ້າເຂົ້າມາໃນໃຈຂອງທ່ານທີ່ເພີ່ມເຕີມຫລາຍຂຶ້ນ. ຈະມີຄວາມຕັ້ງໃຈແນ່ວແນ່ຫລາຍຂຶ້ນ ທີ່ຈະດຳເນີນຊີວິດດ້ວຍການເຊື່ອຟັງພຣະບັນຍັດຂອງພຣະອົງ, ແລະ ຈະມີປະຈັກພະຍານທີ່ເຂັ້ມແຂງເຖິງການຊົງພຣະຊົນຈິງແທ້ຂອງພຣະບຸດຂອງພຣະເຈົ້າ” (“The Power of the Book of Mormon,” Ensign, June 1988, 6).
ພຣະຄຳພີມໍມອນຕອບຄຳຖາມຂອງຈິດວິນຍານ
ການອ່ານພຣະຄຳພີມໍມອນດ້ວຍການນຳພາຂອງພຣະວິນຍານ ສາມາດຊ່ວຍຜູ້ຄົນພົບເຫັນຄຳຕອບ ຫລື ຄວາມຮູ້ແຈ້ງຕໍ່ຄຳຖາມສ່ວນຕົວ—ຫລື ຄຳຖາມຂອງຈິດວິນຍານ. ຊ່ວຍໃຫ້ຜູ້ຄົນເຫັນວ່າຄຳສອນໃນພຣະຄຳພີມໍມອນຕອບຄຳຖາມຂອງຊີວິດແນວໃດ.
ຄຳຖາມບາງຢ່າງເຫລົ່ານີ້ຖືກລະບຸໄວ້ຢູ່ຂ້າງລຸ່ມ, ພ້ອມກັບແຫລ່ງອ້າງອີງຂອງພຣະຄຳພີມໍມອນທີ່ຕອບຄຳຖາມເຫລົ່ານັ້ນ.
-
ພຣະເຈົ້າມີແທ້ບໍ? ພຣະເຈົ້າແມ່ນໃຜ? (ໂມໄຊຢາ 4:9; ແອວມາ 18:24–40; 22:4–23; 30:44)
-
ພຣະເຈົ້າຮູ້ຈັກຂ້ອຍ ແລະ ຫ່ວງໃຍຂ້ອຍບໍ? ຂ້ອຍຈະຮູ້ສຶກເຖິງຄວາມຮັກຂອງພຣະອົງໄດ້ແນວໃດ? ຂ້ອຍຈະຮູ້ສຶກໃກ້ຊິດກັບພຣະອົງໄດ້ແນວໃດ? (2 ນີໄຟ 26:24; ໂມໄຊຢາ 4:9–12; ເອໂນດ 1:1–12; ແອວມາ 18:32; ໂມໂຣໄນ 10:32–33)
-
ແມ່ນຫຍັງຄືຈຸດປະສົງຂອງຊີວິດ? (2 ນີໄຟ 2:25; ແອວມາ 34:32)
-
ເປັນຫຍັງບາງຄັ້ງຊີວິດຈຶ່ງຍາກຫລາຍແທ້? ຂ້ອຍຈະຊອກຫາຄວາມເຂັ້ມແຂງໄດ້ແນວໃດໃນຊ່ວງເວລາທີ່ຫຍຸ້ງຍາກ? (1 ນີໄຟ 17:3; 2 ນີໄຟ 4:20–21; ແອວມາ 36:3; ອີເທີ 12:27)
-
ຂ້ອຍຈະພົບສັນຕິສຸກໃນຊ່ວງເວລາທີ່ມີຄວາມວຸ້ນວາຍໄດ້ແນວໃດ? (ໂມໄຊຢາ 24:13–15; ຮີລາມັນ 5:47)
-
ຂ້ອຍຈະມີຄວາມສຸກຫລາຍຂຶ້ນໄດ້ແນວໃດ? (ໂມໄຊຢາ 2:41; ແອວມາ 22:15–16)
-
ຂ້ອຍຈະກາຍເປັນຄົນທີ່ດີກວ່າໄດ້ແນວໃດ? (ໂມໄຊຢາ 26:30–31; ແອວມາ 5:12–13; 7:23–24; ອີເທີ 12:27)
-
ຂ້ອຍຈະຮູ້ສຶກເຖິງການໃຫ້ອະໄພຈາກພຣະເຈົ້າໄດ້ແນວໃດ? (ເອໂນດ 1:2–8; ແອວມາ 36:17–21)
-
ຈະເກີດຫຍັງຂຶ້ນຫລັງຈາກຂ້ອຍຕາຍໄປ? (2 ນີໄຟ 9:3–6, 11–13; ແອວມາ 11:42–44; 40:11)
ພຣະຄຳພີມໍມອນກໍຍັງໃຫ້ການນຳພາກ່ຽວກັບຄຳຖາມທີ່ສຳຄັນອື່ນໆນຳອີກ, ດັ່ງເຊັ່ນ:
-
ຂ້ອຍຈະມີສ່ວນເຮັດໃຫ້ຄອບຄົວຂອງຂ້ອຍມີຄວາມເປັນຢູ່ທີ່ດີທາງວິນຍານໄດ້ແນວໃດ? (1 ນີໄຟ 1:1; 8:36–38; ໂມໄຊຢາ 2:5–6; 4:14–15; 3 ນີໄຟ 18:21)
-
ຂ້ອຍຈະຊ່ວຍລູກໆຂອງຂ້ອຍສ້າງຄວາມເຂັ້ມແຂງເພື່ອຕໍ່ຕ້ານກັບການລໍ້ລວງໄດ້ແນວໃດ? (1 ນີໄຟ 15:23–25; ຮີລາມັນ 5:12; 3 ນີໄຟ 18:15, 18–21, 24–25)
-
ການເຊື່ອຟັງພຣະບັນຍັດຂອງພຣະເຈົ້າຊ່ວຍໃຫ້ຂ້ອຍມີຊີວິດທີ່ມີຄວາມສຸກຫລາຍກວ່າ ແລະ ອຸດົມສົມບູນໄດ້ແນວໃດ? (2 ນີໄຟ 2:25–28; 4:35; ໂມໄຊຢາ 2:41; 4 ນີໄຟ 1:15–18)
ຮູບພາບປະທານດາລິນ ເອັຈ ໂອກສ໌“ຜູ້ສອນສາດສະໜາຕ້ອງຮູ້ວິທີໃຊ້ພຣະຄຳພີເພື່ອຕອບຄຳຖາມຂອງຕົນເອງ ເພື່ອວ່າເຂົາເຈົ້າຈະສາມາດໃຊ້ພຣະຄຳພີນີ້ຢ່າງມີປະສິດທິພາບ ເພື່ອຊ່ວຍໃຫ້ຜູ້ອື່ນຮຽນຮູ້ທີ່ຈະເຮັດເຊັ່ນກັນ. … ເຂົາເຈົ້າຕ້ອງມີພະລັງຂອງພຣະຄຳພີມໍມອນຢູ່ໃນຕົວ ໃນການສິດສອນພຣະກິດຕິຄຸນທີ່ຖືກຟື້ນຟູ, ກ່ອນອື່ນໝົດ ໂດຍການນຳໃຊ້ມັນໃນຊີວິດຂອງຕົນເອງ ແລະ ແລ້ວໂດຍການແບ່ງປັນມັນກັບຜູ້ທີ່ເຂົາເຈົ້າສິດສອນ” (Dallin H. Oaks, “Counsel for Mission Leaders,” seminar for new mission leaders, June 25, 2022).
ການສຶກສາສ່ວນຕົວ ຫລື ກັບຄູ່ສອນ
ຂຽນຄຳຖາມກ່ຽວກັບຈິດວິນຍານທີ່ທ່ານມີ ຫລື ທີ່ທ່ານເຄີຍໄດ້ຍິນຈາກຄົນອື່ນ. ຊອກຫາຂໍ້ຕ່າງໆໃນພຣະຄຳພີມໍມອນທີ່ຊ່ວຍຕອບຄຳຖາມເຫລົ່ານີ້. ຂຽນຄວາມຮູ້ແຈ້ງ ແລະ ຂໍ້ອ້າງອີງພຣະຄຳພີມໍມອນໃສ່ໃນບັນທຶກການສຶກສາຂອງທ່ານ. ໃຊ້ມັນຂະນະທີ່ທ່ານສິດສອນ.
ພຣະຄຳພີມໍມອນ ແລະ ພຣະຄຣິສຕະທຳຄຳພີສະໜັບສະໜູນຊຶ່ງກັນແລະກັນ
ພຣະຜູ້ເປັນເຈົ້າໄດ້ກ່າວວ່າໃຫ້ “ສິດສອນຫລັກທຳພຣະກິດຕິຄຸນຂອງເຮົາ, ຊຶ່ງມີຢູ່ໃນພຣະຄຣິສຕະທຳຄຳພີ ແລະ ພຣະຄຳພີມໍມອນ, ຊຶ່ງໃນນັ້ນຄືຄວາມສົມບູນແຫ່ງພຣະກິດຕິຄຸນ” (ຄຳສອນ ແລະ ພັນທະສັນຍາ 42:12). ໄພ່ພົນຍຸກສຸດທ້າຍ “ເຊື່ອວ່າ ພຣະຄຣິສຕະທຳຄຳພີເປັນພຣະຄຳຂອງພຣະເຈົ້າຕາບໃດທີ່ແປມັນ ຖືກຕ້ອງ” (ຫລັກແຫ່ງຄວາມເຊື່ອ 1:8; ເບິ່ງ 1 ນີໄຟ 13:29 ນຳອີກ). ພຣະຄຣິສຕະທຳຄຳພີເປັນພຣະຄຳພີສັກສິດ. ພຣະຄຳພີມໍມອນເປັນພຣະຄຳພີສັກສິດຄຽງຄູ່ ທີ່ບັນຈຸຄວາມສົມບູນແຫ່ງພຣະກິດຕິຄຸນຂອງພຣະເຢຊູຄຣິດ.
ພຣະຄຣິສຕະທຳຄຳພີ ແລະ ພຣະຄຳພີມໍມອນສົ່ງເສີມ ແລະ ເຕີມເຕັມໃຫ້ກັນແລະກັນ (ເບິ່ງ ເອເຊກຽນ 37:16–17; 1 ນີໄຟ 13:40; ມໍມອນ 7:8–9). ພຣະຄຳພີທັງສອງເຫລັ້ມເປັນການຮວບຮວມຄຳສອນທີ່ບັນທຶກໂດຍສາດສະດາໃນສະໄໝບູຮານ. ພຣະຄຣິສຕະທຳຄຳພີບອກເຖິງການປະຕິສຳພັນຂອງພຣະເຈົ້າກັບຜູ້ຄົນຢູ່ໃນຊີກໂລກເບື້ອງຕາເວັນອອກເປັນເວລາຫລາຍພັນປີ. ພຣະຄຳພີມໍມອນບອກເຖິງການປະຕິສຳພັນຂອງພຣະເຈົ້າກັບຜູ້ຄົນຢູ່ໃນອາເມຣິກາໃນສະໄໝບູຮານເປັນເວລາຫລາຍກວ່າໜຶ່ງພັນປີ.
ສຳຄັນທີ່ສຸດ, ພຣະຄຣິສຕະທຳຄຳພີ ແລະ ພຣະຄຳພີມໍມອນສົ່ງເສີມກັນແລະກັນໃນການເປັນພະຍານເຖິງພຣະເຢຊູຄຣິດ. ພຣະຄຣິສຕະທຳຄຳພີໃຫ້ເລື່ອງລາວຂອງການກຳເນີດ, ການປະຕິບັດສາດສະໜາກິດໃນຊ່ວງມະຕະ, ແລະ ການຊົດໃຊ້ຂອງພຣະຜູ້ຊ່ວຍໃຫ້ລອດ—ລວມທັງການສິ້ນພຣະຊົນ ແລະ ການຟື້ນຄືນພຣະຊົນຂອງພຣະອົງ. ພຣະຄຳພີມໍມອນລວມຄຳທຳນາຍເຖິງການກຳເນີດ ແລະ ພາລະກິດຂອງພຣະຜູ້ຊ່ວຍໃຫ້ລອດ, ຄຳສອນກ່ຽວກັບການຊົດໃຊ້ຂອງພຣະອົງ, ແລະ ເລື່ອງລາວການປະຕິບັດສາດສະໜາກິດຂອງພຣະອົງໃນອາເມຣິກາ. ພຣະຄຳພີມໍມອນຢືນຢັນ ແລະ ຂະຫຍາຍປະຈັກພະຍານໃນພຣະຄຣິສຕະທຳຄຳພີ ວ່າພຣະເຢຊູເປັນພຣະບຸດອົງດຽວທີ່ຖືກຳເນີດຂອງພຣະເຈົ້າ ແລະ ເປັນພຣະຜູ້ຊ່ວຍໃຫ້ລອດຂອງໂລກ.
ທັງພຣະຄຣິສຕະທຳຄຳພີ ແລະ ພຣະຄຳພີມໍມອນສິດສອນກົດຂອງພະຍານວ່າ: “ຕ້ອງມີພະຍານສອງ ຫລື ສາມປາກຈຶ່ງເປັນທີ່ເຊື່ອຖືໄດ້” (2 ໂກຣິນໂທ 13:1; ເບິ່ງ 2 ນີໄຟ 11:2–3 ນຳອີກ). ໂດຍທີ່ສອດຄ່ອງກັບກົດນີ້, ໜັງສືພຣະຄຳພີທັງສອງເຫລັ້ມເປັນພະຍານເຖິງພຣະເຢຊູຄຣິດ (ເບິ່ງ 2 ນີໄຟ 29:8).
ການສຶກສາສ່ວນຕົວ ຫລື ກັບຄູ່ສອນ
ຊອກຫາການອ້າງອີງໃສ່ກັນກ່ຽວກັບຫົວຂໍ້ດັ່ງຕໍ່ໄປນີ້ໃນພຣະຄຳພີມໍມອນ ແລະ ພຣະຄຣິສຕະທຳຄຳພີ. ຕົວຢ່າງມີໃຫ້ຢູ່ໃນວົງເລັບຫລັງຈາກແຕ່ລະຫົວຂໍ້. ເພີ່ມເຕີມຫົວຂໍ້ ແລະ ຂໍ້ພຣະຄຳພີຂອງທ່ານເອງ.
-
ສາດສະດາ (ຢາໂຄບ 4:4–6; ອາໂມດ 3:7)
-
ການປະຖິ້ມຄວາມເຊື່ອ (2 ນີໄຟ 28; 2 ຕີໂມທຽວ 4:3–4)
-
ການຟື້ນຟູ (1 ນີໄຟ 13:34–42; ກິດຈະການ 3:19–21)
-
ເຮົາທຸກຄົນເປັນລູກຂອງພຣະເຈົ້າ (1 ນີໄຟ 17:36; ກິດຈະການ 17:29)
ຊ່ວຍໃຫ້ຜູ້ຄົນອ່ານ ແລະ ເຂົ້າໃຈພຣະຄຳພີມໍມອນ
ຜູ້ທີ່ບໍ່ອ່ານ ຫລື ບໍ່ເຂົ້າໃຈພຣະຄຳພີມໍມອນຈະມີບັນຫາໃນການຮັບພະຍານວ່າ ມັນເປັນຄວາມຈິງ. ທ່ານສາມາດຊ່ວຍໃຫ້ເຂົາເຈົ້າເຂົ້າໃຈພຣະຄຳພີ ໂດຍການອ່ານມັນກັບເຂົາເຈົ້າ. ອ່ານໃນລະຫວ່າງການນັດໝາຍສິດສອນ, ລະຫວ່າງການຢ້ຽມຕິດຕາມຜົນ, ຫລື ຜ່ານທາງເທັກໂນໂລຈີ. ທ່ານຍັງສາມາດຈັດໃຫ້ສະມາຊິກອ່ານກັບເຂົາເຈົ້ານຳອີກ. ການເບິ່ງວິດີໂອພຣະຄຳພີມໍມອນ ແລະ ແລ້ວອ່ານບົດທີ່ກ່ຽວຂ້ອງ ສາມາດເປັນປະໂຫຍດຫລາຍ.
ອະທິຖານຂໍຄວາມຊ່ວຍເຫລືອ ຂະນະທີ່ທ່ານເລືອກຂໍ້ພຣະຄຳພີທີ່ແກ້ໄຂຄວາມກັງວົນ ແລະ ຄວາມຕ້ອງການຂອງຜູ້ຄົນ. ອ່ານ ແລະ ສົນທະນາຂໍ້ພຣະຄຳພີທີ່ສັ້ນໆ, ດັ່ງເຊັ່ນ 1 ນີໄຟ 3:7 ຫລື ໂມໄຊຢາ 2:17. ພ້ອມທັງອ່ານ ແລະ ສົນທະນາຂໍ້ພຣະຄຳພີທີ່ຍາວໆ ຫລື ອ່ານຈົນຈົບບົດນຳອີກ, ດັ່ງເຊັ່ນ 2 ນີໄຟ 31, ແອວມາ 7, ຫລື 3 ນີໄຟ 18. ຊຸກຍູ້ໃຫ້ຜູ້ຄົນອ່ານພຣະຄຳພີມໍມອນຈາກຕອນຕົ້ນ, ລວມທັງປະຈັກພະຍານຂອງ ສາມຄົນ ແລະ ພະຍານແປດຄົນ ແລະ ປະຈັກພະຍານຂອງສາດສະດາໂຈເຊັບ ສະມິດ.
ພິຈາລະນາຄຳແນະນຳດັ່ງຕໍ່ໄປນີ້ຂະນະທີ່ທ່ານອ່ານພຣະຄຳພີມໍມອນກັບຜູ້ຄົນ:
-
ອະທິຖານກ່ອນທີ່ຈະອ່ານ. ທູນຂໍຄວາມຊ່ວຍເຫລືອໃນຄວາມເຂົ້າໃຈ. ອະທິຖານວ່າພຣະວິນຍານບໍລິສຸດຈະເປັນພະຍານຕໍ່ເຂົາເຈົ້າວ່າ ພຣະຄຳພີເປັນຄວາມຈິງ.
-
ປ່ຽນກັນອ່ານ. ອ່ານຕາມຄວາມໄວທີ່ເຂົາເຈົ້າສະດວກສະບາຍ. ອະທິບາຍຄຳສັບ ແລະ ວະລີທີ່ບໍ່ຄຸ້ນເຄີຍ.
-
ຢຸດເປັນບາງຄັ້ງເພື່ອສົນທະນາສິ່ງທີ່ທ່ານອ່ານ.
-
ອະທິບາຍຄວາມເປັນມາ ແລະ ສະພາບການຂອງຂໍ້ພຣະຄຳພີ ເຊັ່ນວ່າໃຜກຳລັງເວົ້າ, ຄົນນັ້ນເປັນແນວໃດ, ແລະ ສະຖານະການເປັນແບບໃດ. ຖ້າຫາກມີວິດີໂອພຣະຄຳພີມໍມອນທີ່ກ່ຽວຂ້ອງ, ໃຫ້ຄິດທີ່ຈະສາຍມັນ.
-
ຊີ້ໃຫ້ເຫັນຂໍ້ພຣະຄຳພີທີ່ສຳຄັນ ຫລື ຄຳສອນທີ່ຈະຊອກຫາ.
-
ແບ່ງປັນປະຈັກພະຍານຂອງທ່ານ ແລະ ຄວາມຮູ້ແຈ້ງ, ຄວາມຮູ້ສຶກ, ແລະ ປະສົບການສ່ວນຕົວທີ່ເໝາະສົມ.
-
ສິດສອນຄຳສອນໂດຍກົງຈາກຖ້ອຍຄຳຂອງສາດສະດາໃນພຣະຄຳພີມໍມອນ. ສິ່ງນີ້ຈະຊ່ວຍຜູ້ຄົນໃຫ້ຮູ້ສຶກເຖິງພະລັງທາງວິນຍານຂອງໜັງສືນັ້ນ.
-
ຊ່ວຍໃຫ້ຜູ້ຄົນ “ປຽບທຽບ” ສິ່ງທີ່ເຂົາເຈົ້າອ່ານກັບຊີວິດຂອງຕົນເອງ (1 ນີໄຟ 19:23). ຊ່ວຍໃຫ້ເຂົາເຈົ້າເຫັນວ່າ ພຣະຄຳພີກ່ຽວຂ້ອງກັບເຂົາເຈົ້າເປັນສ່ວນຕົວແນວໃດ.
ເມື່ອທ່ານນຳໃຊ້ຫລັກທຳເຫລົ່ານີ້, ທ່ານຈະຊ່ວຍໃຫ້ຜູ້ຄົນພັດທະນາຄວາມສາມາດ ແລະ ຄວາມປາດຖະໜາທີ່ຈະອ່ານພຣະຄຳພີມໍມອນດ້ວຍຕົວເອງ. ເນັ້ນວ່າການອ່ານພຣະຄຳພີທຸກວັນເປັນສິ່ງສຳຄັນເພື່ອກ້າວໄປສູ່ການຮັບບັບຕິສະມາ ແລະ ການປ່ຽນໃຈເຫລື້ອມໃສໄປຕະຫລອດຊີວິດ.
ເພິ່ງອາໄສຄຳສັນຍາຢູ່ໃນ ໂມໂຣໄນ 10:3–5. ຊຸກຍູ້ໃຫ້ຜູ້ຄົນອ່ານພຣະຄຳພີມໍມອນຢ່າງຈິງໃຈ ແລະ ອະທິຖານດ້ວຍເຈດຕະນາອັນແທ້ຈິງ ເພື່ອໃຫ້ຮູ້ວ່າພຣະຄຳພີເປັນຄວາມຈິງຫລືບໍ່. ອະທິບາຍວ່າ ເຈດຕະນາອັນແທ້ຈິງໝາຍເຖິງການເຕັມໃຈທີ່ຈະປະຕິບັດຕາມຄຳຕອບທີ່ເຂົາເຈົ້າໄດ້ຮັບຜ່ານທາງພຣະວິນຍານບໍລິສຸດ. ທຸກຄົນທີ່ອ່ານ ແລະ ອະທິຖານຢ່າງຈິງໃຈ ດ້ວຍເຈດຕະນາອັນແທ້ຈິງກ່ຽວກັບພຣະຄຳພີມໍມອນ ສາມາດຮູ້ເຖິງຄວາມຈິງຂອງມັນໂດຍອຳນາດຂອງພຣະວິນຍານບໍລິສຸດ.
ທ່ານກໍຄວນນຳໃຊ້ຄຳສັນຍານີ້ເປັນປະຈຳນຳອີກ ເພື່ອເພີ່ມຄວາມເຂັ້ມແຂງໃຫ້ແກ່ປະຈັກພະຍານຂອງທ່ານເອງເຖິງພຣະຄຳພີມໍມອນ. ປະຈັກພະຍານຂອງທ່ານຈະໃຫ້ຄວາມໝັ້ນໃຈແກ່ທ່ານວ່າ ຜູ້ທີ່ນຳໃຊ້ຄຳສັນຍານີ້ຈະໄດ້ຮັບການເປັນພະຍານວ່າ ໜັງສືນັ້ນເປັນພຣະຄຳຂອງພຣະເຈົ້າ.
ແນວຄິດສຳລັບການສຶກສາ ແລະ ການນຳໃຊ້
ການສຶກສາສ່ວນຕົວ
-
ອ່ານ 2 ນີໄຟ 2; 9; 30; 31; 32. ຂີດໝາຍເນັ້ນຂໍ້ອ້າງອີງແຕ່ລະຂໍ້ເຖິງພຣະເຢຊູຄຣິດ. ຂຽນລາຍການກ່ຽວກັບພຣະນາມ ແລະ ຕຳແໜ່ງທີ່ແຕກຕ່າງກັນສຳລັບພຣະຄຣິດໃນບົດເຫລົ່ານີ້. ໝາຍພຣະຄຳຂອງພຣະອົງ. ໝາຍເນັ້ນຄຸນລັກສະນະ ແລະ ການກະທຳຂອງພຣະອົງ.
-
ຂະນະທີ່ທ່ານອ່ານທຸກວັນຈາກພຣະຄຳພີມໍມອນ, ໃຫ້ບັນທຶກຂໍ້ພຣະຄຳພີທີ່ມີຄວາມໝາຍພິເສດສຳລັບທ່ານ ໄວ້ໃນບັນທຶກການສຶກສາຂອງທ່ານ. ຂຽນວິທີທີ່ທ່ານຈະນຳໃຊ້ມັນໃນຊີວິດຂອງທ່ານ.
-
ຂຽນໄວ້ໃນບັນທຶກສຶກສາຂອງທ່ານວ່າ ທ່ານຮູ້ສຶກແນວໃດເມື່ອທ່ານໄດ້ຮັບການເປັນພະຍານຄັ້ງທຳອິດວ່າ ພຣະຄຳພີມໍມອນເປັນຄວາມຈິງ.
-
ຂຽນສາມຄຳຖາມດັ່ງຕໍ່ໄປນີ້ໄວ້ໃນບັນທຶກການສຶກສາຂອງທ່ານ. ຕະຫລອດໄລຍະການເຜີຍແຜ່ຂອງທ່ານ, ໃຫ້ເພີ່ມຄຳຕອບໃສ່ກັບຄຳຖາມເຫລົ່ານີ້.
-
ຊີວິດຂອງເຮົາຈະເປັນແນວໃດຖ້າປາດສະຈາກພຣະຄຳພີມໍມອນ?
-
ແມ່ນຫຍັງທີ່ເຮົາຈະບໍ່ ຮູ້ ຖ້າປາດສະຈາກພຣະຄຳພີມໍມອນ?
-
ແມ່ນຫຍັງທີ່ເຮົາຈະບໍ່ ມີ ຖ້າປາດສະຈາກພຣະຄຳພີມໍມອນ?
-
-
ອ່ານຄຳເທດສະໜາທີ່ໂນນພູໃນ ມັດທາຍ 5–7 ແລະ ຄຳເທດສະໜາຂອງພຣະຄຣິດຢູ່ທີ່ພຣະວິຫານໃນ 3 ນີໄຟ 12–14. ການອ່ານຂໍ້ພຣະຄຳພີເຫລົ່ານີ້ນຳກັນ ຈະຊ່ວຍໃຫ້ທ່ານເຂົ້າໃຈຄຳສອນຂອງພຣະຜູ້ຊ່ວຍໃຫ້ລອດຫລາຍຂຶ້ນແນວໃດ?
-
ສຶກສາແຕ່ລະຕົວຢ່າງໃນພຣະຄຳພີມໍມອນທີ່ກ່າວເຖິງບາງຄົນທີ່ອະທິຖານ. ໃນບັນທຶກການສຶກສາຂອງທ່ານ, ໃຫ້ຂຽນສິ່ງທີ່ທ່ານຮຽນຮູ້ຈາກພຣະຄຳພີມໍມອນກ່ຽວກັບການອະທິຖານ.
-
ຈາກຫົວບົດຂອງ ໂມໄຊຢາ 11–16, ໃຫ້ຂຽນບົດສະຫລຸບກ່ຽວກັບສິ່ງທີ່ອະບີນາໄດໄດ້ສິດສອນ. ແລ້ວໃຫ້ອ່ານບົດເຫລົ່ານີ້ ແລະ ຂະຫຍາຍບົດສະຫລຸບຂອງທ່ານ.
-
ຈາກຫົວບົດຂອງ ໂມໄຊຢາ 2–5, ໃຫ້ຂຽນບົດສະຫລຸບກ່ຽວກັບສິ່ງທີ່ກະສັດເບັນຢາມິນໄດ້ສິດສອນ. ແລ້ວໃຫ້ອ່ານບົດເຫລົ່ານີ້ ແລະ ຂະຫຍາຍບົດສະຫລຸບຂອງທ່ານ.
ການສຶກສາກັບຄູ່ສອນ ແລະ ການສັບປ່ຽນຄູ່ສອນ
-
ອ່ານຂໍ້ພຣະຄຳພີມໍມອນນຳກັນ. ແບ່ງປັນສິ່ງທີ່ທ່ານໄດ້ຮຽນຮູ້ ແລະ ຮູ້ສຶກ. ສົນທະນາວິທີທີ່ທ່ານຈະນຳໃຊ້ມັນໃນຊີວິດຂອງທ່ານ.
-
ອ່ານ ແອວມາ 26 ແລະ 29 ນຳກັນ. ແບ່ງປັນວ່າທ່ານຮູ້ສຶກແນວໃດກ່ຽວກັບການເຜີຍແຜ່ຂອງທ່ານ. ຂຽນຄວາມຮູ້ສຶກຂອງທ່ານໄວ້ໃນບັນທຶກການສຶກສາຂອງທ່ານ.
-
ອ່ານ ແອວມາ 37:9 ແລະ ສົນທະນາວ່າພຣະຄຳພີມີຄວາມສຳຄັນຕໍ່ອຳໂມນ ແລະ ເພື່ອນສອນສາດສະໜາຂອງລາວແນວໃດ. ຊອກຫາຂໍ້ອ້າງອີງທີ່ບັນຍາຍວິທີທີ່ເຂົາເຈົ້າໄດ້ໃຊ້ພຣະຄຳພີ.
-
ອ່ານ ແອວມາ 11–14, ໂດຍມີຄົນໜຶ່ງໃນພວກທ່ານຮັບບົດບາດເປັນແອວມາ ຫລື ແອມມິວເລັກ ແລະ ຄົນອື່ນໆຮັບບົດບາດເປັນຜູ້ລົບກວນ. ສົນທະນາວິທີທີ່ຜູ້ສອນສາດສະໜາຕອບຄຳຖາມທີ່ຍາກໆແນວໃດ.
ສະພາທ້ອງຖິ່ນ, ກອງປະຊຸມອະນາເຂດ, ແລະ ສະພາຜູ້ນຳເຂດເຜີຍແຜ່
-
ຝຶກການໃຊ້ພຣະຄຳພີມໍມອນໃນແຕ່ລະວິທີທີ່ກ່າວມາໃນຫົວຂໍ້ໃຫຍ່ຂອງບົດນີ້.
-
ຂຽນຄຳຖາມທີ່ຖາມໂດຍຜູ້ທີ່ທ່ານກຳລັງສິດສອນ. ອະທິບາຍກັບກັນແລະກັນວ່າ ທ່ານຈະຕອບຄຳຖາມເຫລົ່ານີ້ແນວໃດ ໂດຍໃຊ້ພຣະຄຳພີມໍມອນ.
-
ອ່ານຂໍ້ພຣະຄຳພີມໍມອນນຳກັນ. ແບ່ງປັນຄວາມຮູ້, ຄວາມຮູ້ສຶກ, ແລະ ປະຈັກພະຍານ.
-
ຝຶກການໃຊ້ພຣະຄຳພີມໍມອນເພື່ອຢືນຢັນຂ່າວສານຂອງການຟື້ນຟູ.
-
ເຊື້ອເຊີນຜູ້ສອນສາດສະໜາໃຫ້ແບ່ງປັນປະສົບການ ຊຶ່ງໃນນັ້ນພຣະຄຳພີມໍມອນໄດ້ຊ່ວຍເຂົາເຈົ້າ ແລະ ຜູ້ທີ່ເຂົາເຈົ້າໄດ້ສິດສອນ ໃນຂະບວນການປ່ຽນໃຈເຫລື້ອມໃສແນວໃດ.
-
ໃຫ້ຜູ້ສອນສາດສະໜາແບ່ງປັນຂໍ້ພຣະຄຳພີມໍມອນທີ່ໂປດປານ ທີ່ຊ່ວຍຕອບຄຳຖາມຂອງຈິດວິນຍານ.
-
ເຊື້ອເຊີນສະມາຊິກຜູ້ທີ່ປ່ຽນໃຈເຫລື້ອມໃສ ໃຫ້ແບ່ງປັນບົດບາດຂອງພຣະຄຳພີມໍມອນໃນການປ່ຽນໃຈເຫລື້ອມໃສຂອງເຂົາເຈົ້າ.
ຜູ້ນຳເຜີຍແຜ່ ແລະ ທີ່ປຶກສາເຜີຍແຜ່
-
ສິດສອນຜູ້ສອນສາດສະໜາເຖິງວິທີການໃຊ້ພຣະຄຳພີມໍມອນເພື່ອຢືນຢັນຄວາມຈິງຂອງຂ່າວສານແຫ່ງການຟື້ນຟູ.
-
ອ່ານ 1 ນີໄຟ 1 ກັບຜູ້ສອນສາດສະໜາ ແລະ ປຽບທຽບມັນໃສ່ກັບປະສົບການຂອງໂຈເຊັບ ສະມິດ.
-
ຈັດຫາພຣະຄຳພີມໍມອນຊະນິດໜ້າປົກອ່ອນທີ່ສະອາດໃຫ້ແກ່ຜູ້ສອນສາດສະໜາ. ເຊື້ອເຊີນໃຫ້ເຂົາເຈົ້າອ່ານ ແລະ ໝາຍພຣະຄຳພີສອງເທື່ອໃນໄລຍະການຍ້າຍປ່ຽນຄູ່ສອນ ສອງສາມເທື່ອຂອງເຂົາເຈົ້າ.
-
ໃນການອ່ານຄັ້ງທຳອິດ, ຂໍໃຫ້ເຂົາເຈົ້າໝາຍທຸກສິ່ງທີ່ຊີ້ໄປຫາການເປັນພະຍານເຖິງພຣະເຢຊູຄຣິດ.
-
ໃນການອ່ານຄັ້ງທີສອງ, ຂໍໃຫ້ເຂົາເຈົ້າໝາຍຄຳສອນ ແລະ ຫລັກທຳຂອງພຣະກິດຕິຄຸນ.
ໃຫ້ຜູ້ສອນສາດສະໜາແບ່ງປັນສິ່ງທີ່ເຂົາເຈົ້າໄດ້ຮຽນຮູ້ ແລະ ຮູ້ສຶກ. ແອວເດີ ຣອນໂນ ເອ ແຣັສ໌ແບນ ໄດ້ບັນຍາຍວ່າ ການອ່ານພຣະຄຳພີມໍມອນດ້ວຍວິທີນີ້ ມີຜົນກະທົບຕໍ່ເພິ່ນໃນຖານະຜູ້ສອນສາດສະໜາແນວໃດ:
-
ຮູບພາບແອວເດີ ຣອນໂນ ເອ ແຣັສ໌ແບນ“ການອ່ານຂອງຂ້າພະເຈົ້າມີຄວາມໝາຍຫລາຍກວ່າພຽງແຕ່ການຂີດໝາຍພຣະຄຳພີເທົ່ານັ້ນ. ແຕ່ລະເທື່ອທີ່ໄດ້ອ່ານພຣະຄຳພີມໍມອນ, ຕັ້ງແຕ່ຕົ້ນຈົນຈົບ, ຂ້າພະເຈົ້າໄດ້ຮູ້ສຶກເຕັມໄປດ້ວຍຄວາມຮັກທີ່ເລິກເຊິ່ງຕໍ່ພຣະຜູ້ເປັນເຈົ້າ. ຂ້າພະເຈົ້າຮູ້ສຶກເຖິງພະຍານທີ່ຈຳເປັນ ແລະ ເລິກເຊິ່ງເຖິງຄວາມຈິງຂອງຄຳສອນຂອງພຣະອົງ ແລະ ວ່າມັນກ່ຽວຂ້ອງກັບ ‘ມື້ນີ້’ ແນວໃດ. ໜັງສືເຫລັ້ມນີ້ເໝາະສົມດີກັບຊື່ຂອງມັນ, ‘ປະຈັກພະຍານອີກຢ່າງໜຶ່ງເຖິງພຣະເຢຊູຄຣິດ.’ ດ້ວຍການສຶກສານັ້ນ ແລະ ການເປັນພະຍານທາງວິນຍານທີ່ຂ້າພະເຈົ້າໄດ້ຮັບ, ຂ້າພະເຈົ້າໄດ້ກາຍເປັນຜູ້ສອນສາດສະໜາຂອງພຣະຄຳພີມໍມອນ ແລະ ສານຸສິດຂອງພຣະເຢຊູຄຣິດ” (“This Day,” Liahona, Nov. 2022, 25).
-
ເຊື້ອເຊີນຜູ້ສອນສາດສະໜາໃຫ້ແບ່ງປັນຂໍ້ພຣະຄຳພີມໍມອນກັບທ່ານ ທີ່ມີຄວາມສຳຄັນໃນຊີວິດຂອງເຂົາເຈົ້າ.
-
ລະບຸຄຳຖາມຂອງຈິດວິນຍານສຳລັບຜູ້ຄົນໃນເຂດເຜີຍແຜ່ຂອງທ່ານ. ເຊື້ອເຊີນຜູ້ສອນສາດສະໜາໃຫ້ຊອກຫາຂໍ້ພຣະຄຳພີມໍມອນທີ່ຊ່ວຍຕອບຄຳຖາມເຫລົ່ານີ້.