“ຄຳນຳຕໍ່ ຈົ່ງສັ່ງສອນພຣະກິດຕິຄຸນຂອງເຮົາ,” ຈົ່ງສັ່ງສອນພຣະກິດຕິຄຸນຂອງເຮົາ: ຄູ່ມືຕໍ່ການແບ່ງປັນພຣະກິດຕິຄຸນຂອງພຣະເຢຊູຄຣິດ (2023)

“ຄຳນຳ,” ຈົ່ງສັ່ງສອນພຣະກິດຕິຄຸນຂອງເຮົາ

ຄຳນຳຕໍ່ ຈົ່ງສັ່ງສອນພຣະກິດຕິຄຸນຂອງເຮົາ

ພຣະຜູ້ເປັນເຈົ້າແນະນຳຜູ້ຮັບໃຊ້ຂອງພຣະອົງໃຫ້ “ສັ່ງສອນພຣະກິດຕິຄຸນຂອງເຮົາໂດຍພຣະວິນຍານ, ແມ່ນແຕ່ພຣະຜູ້ປອບໂຍນ ຊຶ່ງຖືກສົ່ງອອກໄປເພື່ອສິດສອນຄວາມຈິງ” (ຄຳສອນ ແລະ ພັນທະສັນຍາ 50:14).

ຈົ່ງສັ່ງສອນພຣະກິດຕິຄຸນຂອງເຮົາ ຖືກອອກແບບເພື່ອຊ່ວຍທ່ານບັນລຸຈຸດປະສົງຂອງທ່ານໃນຖານະຜູ້ສອນສາດສະໜາ. ມັນສຸມໃສ່ຄວາມສຳຄັນຂອງວຽກງານເຜີຍແຜ່. ມັນບໍ່ມີຄຳຕອບໃຫ້ທຸກຄຳຖາມ ຫລື ໃຫ້ການຊີ້ນຳສຳລັບທຸກສະຖານະການທີ່ທ່ານຈະປະເຊີນ. ເຖິງຢ່າງໃດກໍຕາມ, ມັນເປັນແຫລ່ງຂໍ້ມູນສຳຄັນສຳລັບທ່ານເພື່ອເຕີບໂຕໃນພະລັງ ແລະ ຄວາມສາມາດທາງວິນຍານ. ຈົ່ງສຶກສາ ແລະ ນຳໃຊ້ຄຳສອນ ແລະ ຫລັກທຳທີ່ພົບເຫັນຢູ່ໃນພຣະຄຳພີ ແລະ ໃນປຶ້ມເຫລັ້ມນີ້.

ໂຢຮັນບັບຕິສະໂຕກຳລັງໃຫ້ບັບຕິສະມາແກ່ພຣະເຢຊູຄຣິດ

ຈົ່ງສັ່ງສອນພຣະກິດຕິຄຸນຂອງເຮົາ ຖືກຈັດຂຶ້ນເພື່ອຊ່ວຍທ່ານໃນວິທີທາງດັ່ງຕໍ່ໄປນີ້:

ເຂົ້າໃຈຈຸດປະສົງຂອງທ່ານໃນຖານະຜູ້ສອນສາດສະໜາ
- ບົດທີ 1: ບັນລຸຈຸດປະສົງການເປັນຜູ້ສອນສາດສະໜາຂອງທ່ານ
ຮຽນຮູ້ ແລະ ສິດສອນຄຳສອນ
- ບົດທີ 3: ສຶກສາ ແລະ ສິດສອນພຣະກິດຕິຄຸນຂອງພຣະເຢຊູຄຣິດ
ເຕີບໂຕໃນການພັດທະນາທາງວິນຍານ ແລະ ການປ່ຽນໃຈເຫລື້ອມໃສເປັນສ່ວນຕົວຂອງທ່ານ
ພັດທະນາຄວາມສາມາດຂອງທ່ານໃນການເຊື້ອເຊີນ ແລະ ຊ່ວຍຜູ້ຄົນໃຫ້ຮັບເອົາພຣະກິດຕິຄຸນທີ່ຖືກຟື້ນຟູ.

ສຶກສາບົດຮຽນຄືນອີກຕະຫລອດໄລຍະການເຜີຍແຜ່ຂອງທ່ານ. ປະເມີນວຽກງານຂອງທ່ານ. ຕັ້ງເປົ້າໝາຍ ແລະ ວາງແຜນເພື່ອບັນລຸມັນ. ຜູ້ສອນສາດສະໜາທີ່ກຽມພ້ອມຕົນເອງທຸກວັນ ແລະ ພັດທະນາເປັນປະຈຳຈະເປັນພອນໃຫ້ແກ່ຊີວິດຂອງຜູ້ທີ່ເຂົາເຈົ້າສິດສອນ ແລະ ຮັບໃຊ້. ເຂົາເຈົ້າຈະໄດ້ຮັບພອນໃນຊີວິດຂອງເຂົາເຈົ້າເອງເຊັ່ນກັນ.

ໂອກາດສຳລັບການສຶກສາ ແລະ ການຮຽນຮູ້

ການສຶກສາທີ່ມີປະສິດທິພາບລະຫວ່າງການເຜີຍແຜ່ຂອງທ່ານ ຈະຊ່ວຍໃຫ້ທ່ານເສີມສ້າງປະຈັກພະຍານຂອງທ່ານເຖິງພຣະກິດຕິຄຸນ ແລະ ກາຍເປັນສານຸສິດທີ່ຊື່ສັດຫລາຍຂຶ້ນຂອງພຣະເຢຊູຄຣິດ.

ການສຶກສາພຣະຄຳພີ ແລະ ຈົ່ງສັ່ງສອນພຣະກິດຕິຄຸນຂອງເຮົາ ຈະຊ່ວຍທ່ານສິດສອນດ້ວຍພະລັງທາງວິນຍານ. ມັນກໍຈະຊ່ວຍທ່ານເຮັດໃຫ້ການສິດສອນຂອງທ່ານກ່ຽວຂ້ອງກັບຄວາມຕ້ອງການຂອງບຸກຄົນນຳອີກ.

ໂອກາດໃນການສຶກສາ ແລະ ການຮຽນຮູ້ແມ່ນລວມທັງ:

ການສຶກສາສ່ວນຕົວ.
ການສຶກສາກັບຄູ່ສອນ.
ການສັບປ່ຽນຄູ່ສອນ.
ການປະຊຸມສະພາທ້ອງຖິ່ນ.
ກອງປະຊຸມອະນາເຂດ
ສະພາຜູ້ນຳເຜີຍແຜ່ (ສຳລັບຜູ້ນຳຜູ້ສອນສາດສະໜາລຸ້ນນ້ອງ).

ມື້ສ່ວນໃຫຍ່, ຕາຕະລາງການເຜີຍແຜ່ຂອງທ່ານແມ່ນລວມທັງເວລາສຳລັບການສຶກສາສ່ວນຕົວ ແລະ ການສຶກສາກັບຄູ່ສອນ. ເບິ່ງ Missionary Standards for Disciples of Jesus Christ, 2.4, ສຳລັບຂໍ້ມູນກ່ຽວກັບຕາຕະລາງປະຈຳວັນຂອງທ່ານ.

ສິ່ງທີ່ທ່ານຮຽນຮູ້ໃນການສຶກສາສ່ວນຕົວ ຈະຊ່ວຍທ່ານໃນການສຶກສາກັບຄູ່ສອນ ແລະ ໃນໂອກາດຮຽນຮູ້ອື່ນໆທີ່ບັນຈຸຢູ່ຂ້າງເທິງ. ໃນສະພາບແວດລ້ອມເຫລົ່ານີ້ ທ່ານຈະ “ສິດສອນຄຳສອນຂອງອານາຈັກໃຫ້ກັນແລະກັນ” (ຄຳສອນ ແລະ ພັນທະສັນຍາ 88:77).

ແນວຄິດທີ່ຈະພັດທະນາການສຶກສາຂອງທ່ານໃນ ຈົ່ງສັ່ງສອນພຣະກິດຕິຄຸນຂອງເຮົາ

ຈົ່ງສັ່ງສອນພຣະກິດຕິຄຸນຂອງເຮົາ ປະສົມປະສານພຣະຄຳພີ ແລະ ຫລັກທຳພຣະກິດຕິຄຸນເຂົ້າກັນ ເພື່ອຊ່ວຍໃຫ້ທ່ານມາຮູ້ຈັກພຣະຜູ້ຊ່ວຍໃຫ້ລອດ ແລະ ພຣະກິດຕິຄຸນຂອງພຣະອົງ. ມັນມີຈຸດປະສົງເພື່ອຊ່ວຍດຶງດູດທ່ານເຂົ້າໄປໃນພຣະຄຳພີ ແລະ ເສີມຂະຫຍາຍການສຶກສາຂອງທ່ານກ່ຽວກັບມັນ. ສຶກສາຂໍ້ອ້າງອີງພຣະຄຳພີໃນແຕ່ລະບົດຕະຫລອດໄລຍະການເຜີຍແຜ່ຂອງທ່ານ.

ແຕ່ລະບົດໃນ ຈົ່ງສັ່ງສອນພຣະກິດຕິຄຸນຂອງເຮົາ ລວມດ້ວຍແນວຄິດ ແລະ ກິດຈະກຳ ເພື່ອຊ່ວຍທ່ານສຶກສາ ແລະ ນຳໃຊ້ສິ່ງທີ່ທ່ານຮຽນຮູ້. ໃຊ້ສິ່ງເຫລົ່ານີ້ໃນການສຶກສາສ່ວນຕົວ ແລະ ການສຶກສາກັບຄູ່ສອນຂອງທ່ານ (ເບິ່ງ Missionary Standards, 2.4). ທ່ານກໍຍັງສາມາດໃຊ້ມັນລະຫວ່າງການປະຊຸມສະພາທ້ອງຖິ່ນ ແລະ ກອງປະຊຸມອະນາເຂດນຳອີກ. ການສຶກສາຂອງທ່ານຈະມີປະສິດທິພາບຫລາຍຂຶ້ນ ເມື່ອທ່ານພົບເຫັນວິທີທີ່ຈະນຳໃຊ້ສິ່ງທີ່ທ່ານຮຽນຮູ້.

ມັນເປັນປະໂຫຍດທີ່ຈະມີແຜນສຳລັບການສຶກສາສ່ວນຕົວຂອງທ່ານ. ທ່ານສາມາດສ້າງແຜນຂອງຕົນເອງທີ່ໃຫ້ຄວາມສຳຄັນກັບຫລັກທຳພຣະກິດຕິຄຸນ ທີ່ທ່ານຢາກເຂົ້າໃຈຫລາຍຂຶ້ນ. ທ່ານກໍສາມາດສ້າງແຜນການສຶກສາຕາມບົດຕ່າງໆໃນ ຈົ່ງສັ່ງສອນພຣະກິດຕິຄຸນຂອງເຮົາ. ຍົກຕົວຢ່າງ, ທ່ານສາມາດໃຊ້ບົດຮຽນຕ່າງໆໃນ ບົດທີ 3 ເພື່ອນຳພາການສຶກສາຄຳສອນ ແລະ ຫລັກທຳຂອງທ່ານ ທີ່ທ່ານຈະສິດສອນ. ທ່ານຈຳເປັນຕ້ອງຮູ້ບົດຮຽນເຫລົ່ານີ້ໃຫ້ດີ ເພື່ອວ່າທ່ານຈະສາມາດສິດສອນໂດຍພຣະວິນຍານ ໃນຖ້ອຍຄຳຂອງທ່ານເອງ.

ຈົດບັນທຶກໃນຂະນະທີ່ທ່ານສຶກສາ. ໃຊ້ບັນທຶກການສຶກສາທີ່ເປັນເຈ້ຍ ຫລື ອີເລັກໂທຣນິກ (ດັ່ງເຊັ່ນ ຫ້ອງສະໝຸດພຣະກິດຕິຄຸນ) ເພື່ອຊ່ວຍໃຫ້ທ່ານເຂົ້າໃຈ, ຊີ້ແຈງ, ແລະ ຈື່ຈຳສິ່ງທີ່ທ່ານກຳລັງຮຽນຮູ້.

ເລີ່ມຕົ້ນການສຶກສາຂອງທ່ານໂດຍການອະທິຖານຂໍໃຫ້ພຣະວິນຍານບໍລິສຸດຊ່ວຍທ່ານຮຽນຮູ້. ພຣະອົງຈະນຳຄວາມຮູ້, ຄວາມເຂົ້າໃຈ, ແລະ ຄວາມໝັ້ນໃຈມາໃຫ້ ຊຶ່ງຈະເປັນພອນໃຫ້ແກ່ຊີວິດຂອງທ່ານ ແລະ ໃຫ້ທ່ານເປັນພອນແກ່ຄົນອື່ນ. ເປີດຈິດໃຈ ແລະ ຫົວໃຈຂອງທ່ານຮັບຄວາມປະທັບໃຈ ແລະ ຄວາມຮູ້ແຈ້ງທີ່ທ່ານໄດ້ຮັບຈາກພຣະອົງ. ລວມຄວາມຮູ້ແຈ້ງເຫລົ່ານີ້ໄວ້ໃນບັນທຶກຂອງທ່ານ.

ທົບທວນບັນທຶກການສຶກສາຂອງທ່ານເປັນປະຈຳ ເພື່ອຈື່ຈຳປະສົບການທາງວິນຍານ, ເບິ່ງຄວາມຮູ້ແຈ້ງໃໝ່, ແລະ ຮັບຮູ້ການເຕີບໂຕຂອງທ່ານ.

ແອັບພລິເຄຊັນ ຈົ່ງສັ່ງສອນພຣະກິດຕິຄຸນຂອງເຮົາ

ໃຊ້ແອັບ Preach My Gospel ເພື່ອຊ່ວຍທ່ານນຳໃຊ້ຫລັກທຳທີ່ທ່ານກຳລັງຮຽນຮູ້. ແອັບນີ້ມີຢູ່ໃນອຸປະກອນມືຖືຂອງທ່ານ. ມັນມີຄຸນລັກສະນະທີ່ຈະຊ່ວຍໃຫ້ທ່ານບັນລຸຈຸດປະສົງການເຜີຍແຜ່ຂອງທ່ານໄດ້ດີກວ່າ. ຄຸນລັກສະນະເຫລົ່ານີ້ແມ່ນລວມທັງ:

ຂໍ້ມູນກ່ຽວກັບຄວາມຕ້ອງການ ແລະ ຄວາມກ້າວໜ້າຂອງຜູ້ຄົນທີ່ທ່ານກຳລັງສິດສອນ.
ຊ່ອງວ່າງໃຫ້ບັນທຶກຄວາມກ້າວໜ້າຂອງທ່ານໄປສູ່ເປົ້າໝາຍຕົວຊີ້ບອກທີ່ສຳຄັນຂອງທ່ານ.
ປະຕິທິນເພື່ອບັນທຶກແຜນ ແລະ ກຳນົດກິດຈະກຳຂອງທ່ານ.
ແຜນທີ່ເຂດຂອງທ່ານ ແລະ ຂໍ້ມູນທີ່ສຳຄັນອື່ນໆ ເພື່ອຊ່ວຍທ່ານບັນລຸເປົ້າໝາຍຂອງທ່ານ.

ຈົ່ງສັ່ງສອນພຣະກິດຕິຄຸນຂອງເຮົາ ລວມດ້ວຍຫລາຍແນວຄິດສຳລັບການໃຊ້ແອັບ ເພື່ອຊ່ວຍໃຫ້ທ່ານພົບເຫັນ, ສິດສອນ, ແລະ ໃຫ້ບັບຕິສະມາແກ່ຜູ້ຄົນ.

ການໃຊ້ ຈົ່ງສັ່ງສອນພຣະກິດຕິຄຸນຂອງເຮົາ ໂດຍສະມາຊິກຂອງສາດສະໜາຈັກ

ຈົ່ງສັ່ງສອນພຣະກິດຕິຄຸນຂອງເຮົາ ເປັນແຫລ່ງຂໍ້ມູນທີ່ມີຄ່າ ບໍ່ແມ່ນພຽງແຕ່ສຳລັບຜູ້ສອນສາດສະໜາເທົ່ານັ້ນ ແຕ່ສຳລັບສະມາຊິກທຸກຄົນຂອງສາດສະໜາຈັກເຊັ່ນກັນ. ຍົກຕົວຢ່າງ, ການສຶກສາຈະຊ່ວຍສະມາຊິກ:

ຮຽນຮູ້ ແລະ ສິດສອນພຣະກິດຕິຄຸນຂອງພຣະເຢຊູຄຣິດ (ສຶກສາ ບົດທີ 1, 2, 3, ແລະ 10).
ຕອບຄຳຖາມກ່ຽວກັບພຣະກິດຕິຄຸນ (ສຶກສາ ບົດທີ 3 ແລະ 5).
ເຂົ້າໃຈຫລາຍຂຶ້ນກ່ຽວກັບການສະແຫວງຫາ ແລະ ການເພິ່ງອາໄສພຣະວິນຍານບໍລິສຸດ (ສຶກສາ ບົດທີ 4).
ເຂົ້າໃຈພະລັງຂອງພຣະຄຳພີມໍມອນ (ສຶກສາ ບົດທີ 5).
ສະແຫວງຫາຄຸນລັກສະນະຢ່າງພຣະຄຣິດ (ສຶກສາ ບົດທີ 6).
ບັນລຸໜ້າທີ່ຮັບຜິດຊອບແຫ່ງພັນທະສັນຍາຂອງເຂົາເຈົ້າ ໃນການແບ່ງປັນພຣະກິດຕິຄຸນ ໂດຍການດຳລົງຊີວິດຕາມຫລັກທຳແຫ່ງຄວາມຮັກ, ແບ່ງປັນ, ແລະ ເຊື້ອເຊີນ (ສຶກສາ ບົດທີ 9 ແລະ 13).
ສ້າງຄວາມເປັນນ້ຳໜຶ່ງໃຈດຽວກັນກັບຜູ້ສອນສາດສະໜາເຕັມເວລາ (ສຶກສາ ບົດທີ 13).

ການສຶກສາ ຈົ່ງສັ່ງສອນພຣະກິດຕິຄຸນຂອງເຮົາ—ໂດຍສະເພາະບົດທີ 3—ຈະເປັນປະໂຫຍດໂດຍສະເພາະສຳລັບຊາວໜຸ່ມ ແລະ ຜູ້ອາວຸໂສ ທີ່ກຳລັງກະກຽມສຳລັບການຮັບໃຊ້ເຜີຍແຜ່.