“ບົດທີ 13: ຮ່ວມມືກັບຜູ້ນຳ ແລະ ສະມາຊິກໃນການສະຖາປະນາສາດສະໜາຈັກ,” ຈົ່ງສັ່ງສອນພຣະກິດຕິຄຸນຂອງເຮົາ: ຄູ່ມືຕໍ່ການແບ່ງປັນພຣະກິດຕິຄຸນຂອງພຣະເຢຊູຄຣິດ (2023)

“ບົດທີ 13,” ຈົ່ງສັ່ງສອນພຣະກິດຕິຄຸນຂອງເຮົາ

ບົດທີ 13

ຮ່ວມມືກັບຜູ້ນຳ ແລະ ສະມາຊິກໃນການສະຖາປະນາສາດສະໜາຈັກ

ໃຫ້ພິຈາລະນາສິ່ງນີ້

ເຮົາຈະສາມາດເຮັດວຽກງານກັບຜູ້ນຳໃນຫວອດ ແລະ ສະມາຊິກເພື່ອສະຖາປະນາສາດສະໜາຈັກໄດ້ແນວໃດ?
ໜ້າທີ່ຮັບຜິດຊອບຂອງຜູ້ນຳສະເຕກ ແລະ ຫວອດໃນວຽກງານເຜີຍແຜ່ມີຢ່າງໃດແດ່?
ແມ່ນຫຍັງຄວນເກີດຂຶ້ນຢູ່ໃນການປະຊຸມປະສານງານທຸກອາທິດກັບຜູ້ນຳໃນຫວອດ?
ເຮົາຈະສາມາດສະໜັບສະໜູນຜູ້ນຳໃນການແບ່ງປັນພຣະກິດຕິຄຸນ ແລະ ເພີ່ມຄວາມເຂັ້ມແຂງໃຫ້ແກ່ສະມາຊິກໃໝ່ ແລະ ສະມາຊິກທີ່ກັບຄືນມາໄດ້ແນວໃດ?

ຜູ້ສອນສາດສະໜາເຮັດວຽກງານກັບຜູ້ນຳ ແລະ ສະມາຊິກ ໃນການຊອກຫາຜູ້ຄົນເພື່ອສິດສອນ ແລະ ນຳພາເຂົາເຈົ້າໄປຫາພຣະຜູ້ຊ່ວຍໃຫ້ລອດ. ພວກທ່ານເປັນນ້ຳໜຶ່ງໃຈດຽວກັນໂດຍຄວາມຮັກທີ່ພວກທ່ານມີຕໍ່ພຣະເຈົ້າ ແລະ ລູກໆຂອງພຣະອົງ. ພຣະອົງຈະຂະຫຍາຍຄວາມພະຍາຍາມຂອງທ່ານໃນລະດັບທີ່ທ່ານເຮັດວຽກງານເປັນນ້ຳໜຶ່ງໃຈດຽວກັນກັບຜູ້ນຳ ແລະ ສະມາຊິກໃນທ້ອງຖິ່ນ. ເຮັດໃຫ້ການເຮັດວຽກງານກັບເຂົາເຈົ້າເປັນພາກສ່ວນທີ່ສຳຄັນໃນເປົ້າໝາຍ ແລະ ແຜນຂອງທ່ານ.

ເມື່ອທ່ານມາຮູ້ຈັກ ແລະ ຮັກຜູ້ນຳ ແລະ ສະມາຊິກໃນທ້ອງຖິ່ນ, ທ່ານຈະເຫັນວິທີທີ່ທ່ານສາມາດສະໜັບສະໜູນເຂົາເຈົ້າໃນການເອີ້ນຂອງເຂົາເຈົ້າ ແລະ ໃນຄວາມພະຍາຍາມເຜີຍແຜ່ຂອງເຂົາເຈົ້າ. ສະເໜີມອບຂອງປະທານ ແລະ ພອນສະຫວັນຂອງທ່ານໃນທາງທີ່ຍົກລະດັບ ແລະ ເພີ່ມຄວາມເຂັ້ມແຂງໃຫ້ເຂົາເຈົ້າ.

ບົດນີ້ອະທິບາຍວິທີທີ່ທ່ານສາມາດເຮັດວຽກງານກັບສະມາຊິກ ໃນການແບ່ງປັນພຣະກິດຕິຄຸນ ແລະ ເພີ່ມຄວາມເຂັ້ມແຂງໃຫ້ແກ່ສະມາຊິກໃໝ່ ແລະ ສະມາຊິກທີ່ກັບຄືນມາ. ສຳລັບລາຍລະອຽດເພີ່ມເຕີມ, ໃຫ້ເບິ່ງ ບົດທີ 23 ຂອງ ຄູ່ມືທົ່ວໄປ.

ການສຶກສາສ່ວນຕົວ ຫລື ກັບຄູ່ສອນ

ທົບທວນເລື່ອງລາວກ່ຽວກັບການປ່ຽນໃຈເຫລື້ອມໃສຂອງກະສັດລາໂມໄນ, ມະເຫສີຂອງເພິ່ນ, ແລະ ຜູ້ຄົນຂອງເພິ່ນໃນ ແອວມາ 18–19.

ນາງເອບິດມີບົດບາດຢ່າງໃດແດ່ໃນການປ່ຽນໃຈເຫລື້ອມໃສຄັ້ງນີ້? ນາງສາມາດເຮັດສິ່ງໃດທີ່ອຳໂມນບໍ່ສາມາດເຮັດໄດ້?
ທ່ານຮຽນຮູ້ຫຍັງແດ່ຈາກຕົວຢ່າງຂອງນາງກ່ຽວກັບສະມາຊິກ ແລະ ຜູ້ສອນສາດສະໜາທີ່ເຮັດວຽກງານນຳກັນ?

ພິຈາລະນາຕົວຢ່າງອື່ນໆເຫລົ່ານີ້ຂອງສະມາຊິກທີ່ຊ່ວຍໃນວຽກງານເຜີຍແຜ່:

ແອມມິວເລັກ (ແອວມາ 10:1–11)
ປີຊະກີລາ ແລະ ອາກີລາ (ກິດຈະການ 18:24–28)
ຍິງຊາວຊາມາເຣຍ (ໂຢຮັນ 4:5–30, 39–42)

ທ່ານສາມາດຊຸກຍູ້ຜູ້ນຳ ແລະ ສະມາຊິກໃຫ້ຕິດຕາມຕົວຢ່າງຂອງເຂົາເຈົ້າໄດ້ແນວໃດ?

ສ້າງຄວາມສຳພັນກັບຜູ້ນຳ ແລະ ສະມາຊິກໃນທ້ອງຖິ່ນ

ຜູ້ນຳ ແລະ ສະມາຊິກຂອງສາດສະໜາຈັກໃນທ້ອງຖິ່ນແມ່ນຄູ່ຮ່ວມງານຂອງທ່ານໃນວຽກງານຂອງທ່ານ. ສ້າງຄວາມສຳພັນທີ່ຊ່ວຍໃຫ້ທ່ານເຮັດວຽກງານນຳກັນ ເພື່ອນຳພຣະກິດຕິຄຸນທີ່ຖືກຟື້ນຟູມາສູ່ລູກໆຂອງພຣະບິດາເທິງສະຫວັນ. ຄວາມສຳພັນເຫລົ່ານີ້ສາມາດເປັນພອນໃຫ້ແກ່ທ່ານໄປຕະຫລອດຊີວິດ.

ສ້າງຄວາມໄວ້ວາງໃຈ ແລະ ຄວາມສຳພັນທີ່ແທ້ຈິງກັບຜູ້ນຳ ແລະ ສະມາຊິກໃນທ້ອງຖິ່ນ. ຢ້ຽມຢາມເຂົາເຈົ້າ ແລະ ຮຽນຮູ້ກ່ຽວກັບຄອບຄົວ, ພື້ນຖານ, ຄວາມສົນໃຈ, ແລະ ປະສົບການໃນສາດສະໜາຈັກຂອງເຂົາເຈົ້າ. ໃຫ້ຄວາມສົນໃຈໃນຊີວິດຂອງເຂົາເຈົ້າຢ່າງແທ້ຈິງ.

ເມື່ອທ່ານຢ້ຽມຢາມ, ໃຫ້ເຮັດດ້ວຍຈຸດປະສົງ. ສະແດງໃຫ້ເຫັນວ່າທ່ານກະຕືລືລົ້ນໃນວຽກງານການຊອກຫາ ແລະ ສິດສອນ. ເຄົາລົບເວລາ ແລະ ຕາຕະລາງຂອງເຂົາເຈົ້າ.

ເມື່ອທ່ານພົບກັບເຂົາເຈົ້າ ແລະ ສິດສອນພຣະກິດຕິຄຸນໃນບ້ານຂອງເຂົາເຈົ້າ, ໃຫ້ສະແຫວງຫາທີ່ຈະຊ່ວຍເຂົາເຈົ້າເພີ່ມຄວາມເຂັ້ມແຂງໃຫ້ແກ່ສັດທາຂອງເຂົາເຈົ້າ. ສະແຫວງຫາທີ່ຈະມີພຣະວິນຍານສະຖິດຢູ່ກັບທ່ານດ້ວຍການອະທິຖານ. ແບ່ງປັນປະສົບການທີ່ທ່ານມີກັບວຽກງານເຜີຍແຜ່ຢູ່ໃນເຂດຂອງທ່ານ.

ສະໜັບສະໜູນຜູ້ນຳໃນທ້ອງຖິ່ນ ໃນບົດບາດຂອງເຂົາເຈົ້າ

ການເອີ້ນຂອງຜູ້ນຳບາງຄົນມີໜ້າທີ່ຮັບຜິດຊອບສຳລັບວຽກງານເຜີຍແຜ່. ການເຂົ້າໃຈໜ້າທີ່ຮັບຜິດຊອບເຫລົ່ານີ້ ຊ່ວຍທ່ານສະໜັບສະໜູນຜູ້ນຳເຫລົ່ານີ້. ການບັນຍາຍດັ່ງຕໍ່ໄປນີ້ແມ່ນມາຈາກ ບົດທີ 23 ໃນ ຄູ່ມືທົ່ວໄປ.

ປະທານສະເຕກ: ດຳລົງຂໍກະແຈຂອງຖານະປະໂລຫິດໃນສະເຕກສຳລັບການແບ່ງປັນພຣະກິດຕິຄຸນ ແລະ ການເພີ່ມຄວາມເຂັ້ມແຂງໃຫ້ແກ່ສະມາຊິກໃໝ່ ແລະ ສະມາຊິກທີ່ກັບຄືນມາ. ເພິ່ນ ແລະ ທີ່ປຶກສາຂອງເພິ່ນໃຫ້ການຊີ້ນຳໂດຍລວມສຳລັບຄວາມພະຍາຍາມເຫລົ່ານີ້.

ຝ່າຍອະທິການ: ປະສານງານກັບຝ່າຍປະທານກຸ່ມແອວເດີ ແລະ ຝ່າຍປະທານສະມາຄົມສະຕີສົງເຄາະ ຂະນະທີ່ເຂົາເຈົ້ານຳພາຄວາມພະຍາຍາມຂອງຫວອດ ໃນການແບ່ງປັນພຣະກິດຕິຄຸນ ແລະ ເພີ່ມຄວາມເຂັ້ມແຂງໃຫ້ແກ່ສະມາຊິກໃໝ່ ແລະ ສະມາຊິກທີ່ກັບຄືນມາ.

ຝ່າຍປະທານກຸ່ມແອວເດີ ແລະ ຝ່າຍປະທານສະມາຄົມສະຕີສົງເຄາະ: ນຳພາຄວາມພະຍາຍາມປະຈຳວັນຂອງຫວອດ ໃນການແບ່ງປັນພຣະກິດຕິຄຸນ ແລະ ເພີ່ມຄວາມເຂັ້ມແຂງໃຫ້ແກ່ສະມາຊິກໃໝ່ ແລະ ສະມາຊິກທີ່ກັບຄືນມາ. ເຂົາເຈົ້າເຮັດວຽກງານນຳກັນໃນການນຳພາຄວາມພະຍາຍາມເຫລົ່ານີ້ກັບສະພາຫວອດ, ພາຍໃຕ້ການປະສານງານຂອງອະທິການ. ເບິ່ງ ຄູ່ມືທົ່ວໄປ, 8.2.3 ແລະ 9.2.3.

ຜູ້ນຳເຜີຍແຜ່ປະຈຳຫວອດ (ຖ້າຫາກຖືກເອີ້ນ): ປະສານວຽກງານຂອງສະມາຊິກ ແລະ ຜູ້ນຳໃນຫວອດ, ຜູ້ສອນສາດສະໜາປະຈຳຫວອດ, ແລະ ຜູ້ສອນສາດສະໜາເຕັມເວລາ. ຖ້າຫາກຜູ້ນຳເຜີຍແຜ່ປະຈຳຫວອດບໍ່ໄດ້ຖືກເອີ້ນ, ສະມາຊິກຄົນໜຶ່ງໃນຝ່າຍປະທານກຸ່ມແອວເດີຈະເຮັດບົດບາດນີ້. ເບິ່ງ ຄູ່ມືທົ່ວໄປ, 23.5.3.

ຖາມຕົວເອງເປັນປະຈຳວ່າ, “ເຮົາເປັນພອນໃຫ້ແກ່ຜູ້ນຳໃນທ້ອງຖິ່ນຫລືບໍ່?” ພັດທະນາທັດສະນະຄະຕິທີ່ວ່າ “ໃຫ້ຂ້ອຍຊ່ວຍຫຍັງໄດ້ບໍ?”

ການສຶກສາກັບຄູ່ສອນ

ກຳນົດເວລາໄປຢ້ຽມຢາມບຶດໜຶ່ງກັບຜູ້ນຳຫວອດ. ຖາມວ່າທ່ານຈະສາມາດສະໜັບສະໜູນລາວໄດ້ດີກວ່າເກົ່າໄດ້ແນວໃດ. ວາງແຜນເພື່ອປັບປຸງ.

ການປະຊຸມປະສານງານປະຈຳອາທິດ

ການປະສານງານກັບຜູ້ນຳໃນທ້ອງຖິ່ນ—ລວມທັງຜູ້ນຳຊາວໜຸ່ມ—ເປັນສິ່ງຈຳເປັນຕໍ່ການເປັນນ້ຳໜຶ່ງໃຈດຽວກັນໃນຄວາມພະຍາຍາມເຜີຍແຜ່ຂອງທ່ານ. ຖ້າຫາກຄົນໃດຄົນໜຶ່ງຖືກເອີ້ນໃຫ້ເປັນຜູ້ນຳເຜີຍແຜ່ປະຈຳຫວອດ, ລາວຈະດຳເນີນການປະຊຸມປະສານງານປະຈຳອາທິດ. ຖ້າບໍ່ດັ່ງນັ້ນ, ສະມາຊິກຄົນໜຶ່ງໃນຝ່າຍປະທານກຸ່ມແອວເດີຈະເຮັດບົດບາດນີ້ໃນການເປັນຜູ້ດຳເນີນ.

ໃນການປະຊຸມສັ້ນໆ ແລະ ເປັນກັນເອງເຫລົ່ານີ້, ຜູ້ນຳໃນທ້ອງຖິ່ນ ແລະ ທ່ານຈະປະສານງານເພື່ອແບ່ງປັນພຣະກິດຕິຄຸນ ແລະ ເພີ່ມຄວາມເຂັ້ມແຂງໃຫ້ແກ່ສະມາຊິກໃໝ່ ແລະ ສະມາຊິກທີ່ກັບຄືນມາ (ເບິ່ງ ຄູ່ມືທົ່ວໄປ, 23.4). ການປະຊຸມອາດຈັດຂຶ້ນແບບເຂົ້າຮ່ວມດ້ວຍຕົນເອງ ຫລື ເຂົ້າຮ່ວມທາງໄກ. ການປະສານງານກໍຄວນເກີດຂຶ້ນໃນວິທີອື່ນລະຫວ່າງອາທິດ, ລວມທັງການໂທລະສັບ, ການສົ່ງຂໍ້ຄວາມ, ແລະ ການສົ່ງອີເມວ.

“ຄວາມພະຍາຍາມ ແລະ ການສຸມໃຈໃສ່ຢ່າງເປັນນ້ຳໜຶ່ງໃຈດຽວກັນ ໂດຍທີ່ການວາງແຜນເຜີຍແຜ່ ແລະ ການຕັ້ງເປົ້າໝາຍສອດຄ່ອງກັບການວາງແຜນ ແລະ ການຕັ້ງເປົ້າໝາຍຂອງຫວອດ ຫລື ສາຂາ ສາມາດເປັນປະໂຫຍດຕໍ່ການບັນລຸວຽກງານຂອງການເຕົ້າໂຮມອິດສະຣາເອນ” (Quentin L. Cook, “Purpose and Planning,” ກອງປະຊຸມສຳມະນາຜູ້ນຳເຜີຍແຜ່, ວັນທີ 25 ເດືອນມິຖຸນາ, 2019).

ກຽມພ້ອມສຳລັບການປະຊຸມປະສານງານປະຈຳອາທິດ

ສະໜັບສະໜູນຜູ້ນຳໃນຫວອດໂດຍການກຽມພ້ອມທີ່ຈະເຂົ້າຮ່ວມການປະຊຸມປະສານງານປະຈຳອາທິດ. ກ່ອນການປະຊຸມ, ໃຫ້ໃຊ້ເວລາລະຫລ່າງການສຶກສາກັບຄູ່ສອນ ເພື່ອສົນທະນາວິທີທີ່ພວກທ່ານຈະສາມາດມີສ່ວນຮ່ວມຢ່າງມີປະສິດທິພາບໄດ້ແນວໃດ.

ອັບເດດບັນທຶກຂອງທ່ານຢູ່ໃນແອັບ Preach My Gospel ເພື່ອວ່າຜູ້ນຳຈະມີຂໍ້ມູນປະຈຸບັນກ່ຽວກັບຜູ້ທີ່ທ່ານກຳລັງສິດສອນ. ກຽມພ້ອມທີ່ຈະລາຍງານການມອບໝາຍຈາກການປະຊຸມທີ່ຜ່ານມາ.

ມີສ່ວນຮ່ວມໃນການປະຊຸມປະສານງານປະຈຳອາທິດ

ການປະຊຸມປະສານງານປະຈຳອາທິດມີຈຸດປະສົງເພື່ອສຸມໃສ່ຄວາມຕ້ອງການຂອງບຸກຄົນ. ລະຫວ່າງການປະຊຸມ, ໃຫ້ສະເໜີວິທີທີ່ທ່ານສາມາດສະໜັບສະໜູນສະມາຊິກຫວອດ, ລວມທັງຊາວໜຸ່ມ, ໃນການຊ່ວຍສະໜອງຄວາມຕ້ອງການຂອງແຕ່ລະບຸກຄົນ.

ຕາມປົກກະຕິແລ້ວ ການປະຊຸມປະສານງານປະຈຳອາທິດຈະກວມສີ່ຫົວຂໍ້ດັ່ງຕໍ່ໄປນີ້:

ເຮົາຈະສາມາດຊ່ວຍເຫລືອຜູ້ທີ່ກຳລັງຮັບການສິດສອນໄດ້ແນວໃດ? ລາຍການສົນທະນາທີ່ເປັນໄປໄດ້:

ສະມາຊິກຄົນໃດສາມາດເຂົ້າຮ່ວມບົດຮຽນໃນອາທິດທີ່ຈະມາເຖິງນີ້? ໃຜຈະເຊື້ອເຊີນເຂົາເຈົ້າໃຫ້ເຂົ້າຮ່ວມ?
ມີການທ້າທາຍໃດແດ່ສຳລັບຜູ້ທີ່ກຳລັງຮັບການສິດສອນ? ສະມາຊິກຈະຊ່ວຍໄດ້ແນວໃດ?
ມີຄວາມຕ້ອງການໃດແດ່ສຳລັບຜູ້ທີ່ມີກຳນົດວັນບັບຕິສະມາ? ມີການວາງແຜນການບັບຕິສະມາແລ້ວ ຫລື ບໍ່? (ເບິ່ງ “ພິທີບັບຕິສະມາ” ໃນ ບົດທີ 12.)

ເຮົາຈະສາມາດຊ່ວຍຜູ້ທີ່ຫາກໍໄດ້ຮັບບັບຕິສະມາໄດ້ແນວໃດ? ລາຍການສົນທະນາທີ່ເປັນໄປໄດ້:

ສະມາຊິກໃໝ່ຄົນໃດໃນປີທຳອິດຂອງການເປັນສະມາຊິກຂອງເຂົາເຈົ້າ ໄດ້ເຂົ້າຮ່ວມກອງປະຊຸມສິນລະລຶກ? ເຮົາຈະສາມາດຊ່ວຍຄົນໃດແດ່ທີ່ບໍ່ມາໂບດ?
ສະມາຊິກໃໝ່ຄົນໃດມີໝູ່ເພື່ອນໃນຫວອດ? ອ້າຍນ້ອງ ແລະ ເອື້ອຍນ້ອງຜູ້ປະຕິບັດສາດສະໜາກິດສາມາດຊ່ວຍຫຍັງໄດ້ແດ່? ກຸ່ມຊາວໜຸ່ມ ແລະ ຫ້ອງຮຽນສາມາດຊ່ວຍຫຍັງໄດ້ແດ່?
ສະມາຊິກໃໝ່ຄົນໃດມີການມອບໝາຍ ຫລື ການເອີ້ນ?
ເຮົາຈະສາມາດຊ່ວຍສະມາຊິກໃໝ່ເລີ່ມຕົ້ນຄົ້ນຫາບັນພະບຸລຸດທີ່ລ່ວງລັບໄປແລ້ວຂອງເຂົາເຈົ້າ ເພື່ອວ່າພິທີການພຣະວິຫານຈະຖືກປະຕິບັດແທນເຂົາເຈົ້າໄດ້ແນວໃດ? ສະມາຊິກໃໝ່ມີໃບຮັບຮອງເຂົ້າພຣະວິຫານບໍ? ຖ້າຫາກພຣະວິຫານຕັ້ງຢູ່ໃກ້, ເຮົາຈະສາມາດຊ່ວຍເຂົາເຈົ້າໄປພຣະວິຫານ ເພື່ອປະຕິບັດການບັບຕິສະມາສຳລັບບັນພະບຸລຸດເຫລົ່ານັ້ນໄດ້ແນວໃດ?
ບົດຮຽນໃດແດ່ຈາກ ບົດທີ 3 ທີ່ຈະຕ້ອງສິດສອນຄືນອີກ? ສະມາຊິກສາມາດມີສ່ວນຮ່ວມໄດ້ແນວໃດ?
ທົບທວນຄວາມກ້າວໜ້າໃນ My Covenant Path ສຳລັບສະມາຊິກໃໝ່ແຕ່ລະຄົນ.

ເຮົາຈະຊ່ວຍສະມາຊິກທີ່ກັບຄືນມາໄດ້ແນວໃດ? ລາຍການສົນທະນາທີ່ເປັນໄປໄດ້:

ຄອບຄົວທີ່ເປັນສະມາຊິກບາງສ່ວນຄົນໃດທີ່ຜູ້ສອນສາດສະໜາສາມາດຢ້ຽມຢາມ ແລະ ສິດສອນ?
ສະມາຊິກທີ່ກັບຄືນມາຄົນໃດທີ່ຜູ້ສອນສາດສະໜາສາມາດຢ້ຽມຢາມ ແລະ ສິດສອນ?
ສະມາຊິກທີ່ກັບຄືນມາຄົນໃດມີໝູ່ເພື່ອນຢູ່ໃນຫວອດ ແລະ ມີໂອກາດເໝາະສົມທີ່ຈະຮັບໃຊ້?
ເຮົາຈະສະມາດຊ່ວຍສະມາຊິກເຫລົ່ານີ້ໄດ້ແນວໃດ?

ເຮົາຈະສາມາດພົບເຫັນຜູ້ຄົນເພີ່ມເພື່ອສິດສອນໄດ້ແນວໃດ? ລາຍການສົນທະນາທີ່ເປັນໄປໄດ້:

ເຮົາຈະສາມາດຊ່ວຍບຸກຄົນ, ລວມທັງຊາວໜຸ່ມ, ແລະ ຄອບຄົວໃຫ້ນຳໃຊ້ຫລັກທຳແຫ່ງຄວາມຮັກ, ແບ່ງປັນ, ແລະ ເຊື້ອເຊີນໄດ້ແນວໃດ? (ເບິ່ງ “ຮ່ວມມືກັບສະມາຊິກ” ໃນ ບົດທີ 9.)
ເຮົາຈະສາມາດຊ່ວຍສະມາຊິກ, ລວມທັງຜູ້ນຳປະຖົມໄວ, ໃຫ້ເຊື້ອເຊີນໝູ່ເພື່ອນໄປຮ່ວມກິດຈະກຳຂອງຫວອດໄດ້ແນວໃດ?

ການສຶກສາກັບຄູ່ສອນ

ເບິ່ງວິດີໂອກ່ຽວກັບການປະຊຸມປະສານງານປະຈຳອາທິດໃນ ຄູ່ມືທົ່ວໄປ, 23.4. ທ່ານຮຽນຮູ້ຫຍັງແດ່ ທີ່ທ່ານສາມາດນຳໃຊ້ໃນການປະຊຸມປະສານງານປະຈຳອາທິດຄັ້ງຕໍ່ໄປ? ທ່ານຈະສາມາດກຽມພ້ອມເພື່ອສົນທະນາກ່ຽວກັບຄວາມຕ້ອງການ ແລະ ວາງແຜນກັບຜູ້ນຳໃນຫວອດໄດ້ແນວໃດ? ໃນພາກການວາງແຜນຄັ້ງຕໍ່ໄປຂອງທ່ານ, ໃຫ້ຕັ້ງເປົ້າໝາຍສຳລັບວິທີທີ່ທ່ານຈະພັດທະນາ.

ສະໜັບສະໜູນແຜນຂອງຫວອດສຳລັບການແປ່ງປັນພຣະກິດຕິຄຸນ

ສະພາຫວອດສ້າງແຜນທີ່ລຽບງ່າຍສຳລັບການແປ່ງປັນພຣະກິດຕິຄຸນ (ເບິ່ງ ຄູ່ມືທົ່ວໄປ, 23.5.6). ທຳຄວາມຄຸ້ນເຄີຍກັບແຜນນີ້. ໃນການປະຊຸມປະສານງານປະຈຳອາທິດ, ໃຫ້ຊອກຫາວິທີທາງທີ່ຈະຊ່ວຍຜູ້ນຳເຮັດວຽກງານໃຫ້ບັນລຸເປົ້າໝາຍຂອງເຂົາເຈົ້າ. ແຈ້ງໃຫ້ຜູ້ນຳຊາບກ່ຽວກັບສິ່ງທີ່ທ່ານກຳລັງເຮັດ ເພື່ອສະໜັບສະໜູນສະມາຊິກໃນການແບ່ງປັນພຣະກິດຕິຄຸນ.

ຖ້າຫາກທ່ານໄດ້ຮັບເຊື້ອເຊີນໃຫ້ເຂົ້າຮ່ວມການປະຊຸມສະພາຫວອດ, ໃຫ້ກຽມພ້ອມທີ່ຈະອັບເດດສັ້ນໆ ກ່ຽວກັບຄວາມກ້າວໜ້າຂອງຜູ້ທີ່ທ່ານກຳລັງສິດສອນ ແລະ ການມອບໝາຍໃດໆທີ່ທ່ານໄດ້ຮັບ (ເບິ່ງ ຄູ່ມືທົ່ວໄປ, 29.2.5). ເບິ່ງໂອກາດນີ້ວ່າເປັນເວລາທີ່ຈະສ້າງຄວາມໝັ້ນໃຈ ແລະ ຄວາມໄວ້ວາງໃຈຂອງຜູ້ນຳໃນຫວອດ.

ປັບໃຫ້ເຂົ້າກັບຄວາມຕ້ອງການໃນເຂດຂອງທ່ານ

ແຕ່ລະຫວອດ ຫລື ແຕ່ລະສາຂາໄດ້ມີຄວາມຕ້ອງການສະເພາະສຳລັບທ່ານທີ່ຈະປັບຕົວເຂົ້າກັບ. ທ່ານອາດຮັບໃຊ້ໃນສາຂານ້ອຍ ຫລື ຫວອດຜູ້ໃຫຍ່ໜຸ່ມໂສດ, ຫລື ທ່ານອາດຮັບໃຊ້ໃນຫລາຍໆຫວອດ. ຜູ້ນຳບາງຄົນຈະມີປະສົບຫລາຍກວ່າ ແລະ ບາງຄົນໜ້ອຍກວ່າ. ຜູ້ນຳບາງຄົນຈະມີເວລາຫລາຍກວ່າຄົນອື່ນໆ.

ໃຫ້ຫາທາງຊ່ວຍເຫລືອຜູ້ນຳໃນທ້ອງຖິ່ນ. ເຂົາເຈົ້າອາດຂໍໃຫ້ທ່ານຊ່ວຍສະໜັບສະໜູນສະມາຊິກໃນວຽກງານມອບໝາຍການປະຕິບັດສາດສະໜາກິດຂອງເຂົາເຈົ້າ. ເຂົາເຈົ້າອາດຂໍໃຫ້ທ່ານຊຸກຍູ້ສະມາຊິກໃໝ່ ເພື່ອເຊື້ອເຊີນໝູ່ເພື່ອນຂອງເຂົາເຈົ້າໃຫ້ມາໂບດ. ທ່ານສາມາດໃຫ້ຄວາມຮູ້ແຈ້ງອັນມີຄ່າກ່ຽວກັບວຽກງານເຜີຍແຜ່ ຂະນະທີ່ຜູ້ນຳ ແລະ ສະມາຊິກຮຽນຮູ້ວິທີທີ່ຈະແບ່ງປັນພຣະກິດຕິຄຸນ.

ບ່ອນທີ່ໜ່ວຍສາດສະໜາຈັກຍັງໃໝ່, ຜູ້ນຳໃນສາຂາອາດຂໍໃຫ້ທ່ານຊ່ວຍສະມາຊິກໃໝ່ໃຫ້ເຂົ້າໃຈວິທີທີ່ພຣະຜູ້ເປັນເຈົ້າໄດ້ຈັດຕັ້ງສາດສະໜາຈັກຂອງພຣະອົງແນວໃດ.

ວຽກງານຂອງທ່ານກັບຜູ້ນຳອາດແຕກຕ່າງກັນໄປໃນແຕ່ລະເຂດ, ແຕ່ກິດຈະກຳເຫລົ່ານີ້ທັງໝົດແມ່ນຈຳເປັນຕໍ່ການເປັນພອນໃຫ້ແກ່ສ່ວນບຸກຄົນ ແລະ ຕໍ່ການສະຖາປະນາສາດສະໜາຈັກຂອງພຣະຜູ້ເປັນເຈົ້າ.

ຊ່ວຍສະມາຊິກ ແລະ ຜູ້ນຳໃຫ້ຮັກ, ແບ່ງປັນ, ແລະ ເຊື້ອເຊີນ

ຊຸກຍູ້ສະມາຊິກໃຫ້ແບ່ງປັນພຣະກິດຕິຄຸນໃນວິທີທີ່ປົກກະຕິ ແລະ ທຳມາຊາດ. ຄູ່ມືທົ່ວໄປ ມີຄຳແນະນຳ ແລະ ວິດີໂອ ເພື່ອຊ່ວຍສະມາຊິກ ແລະ ຜູ້ນຳເຮັດສິ່ງນີ້ໂດຍການດຳລົງຊີວິດຕາມຫລັກທຳແຫ່ງຄວາມຮັກ, ແບ່ງປັນ, ແລະ ເຊື້ອເຊີນ (ເບິ່ງ ຄູ່ມືທົ່ວໄປ, 23.1.1, 23.1.2, ແລະ 23.1.3). ຮັກສາຫລັກທຳເຫລົ່ານີ້ໄວ້ໃນໃຈຂະນະທີ່ທ່ານເຮັດວຽກງານກັບຜູ້ນຳ.

ທ່ານຈະເປັນພອນໃຫ້ແກ່ຜູ້ນຳ ຂະນະທີ່ທ່ານສະໜັບສະໜູນຄວາມພະຍາຍາມຂອງເຂົາເຈົ້າໃນວຽກງານນີ້. ໃນທາງກັບກັນ, ຕົວຢ່າງຂອງເຂົາເຈົ້າຈະຊ່ວຍສະມາຊິກໃຫ້ມີສ່ວນຮ່ວມໃນການແບ່ງປັນພຣະກິດຕິຄຸນ ແລະ ການເພີ່ມຄວາມເຂັ້ມແຂງໃຫ້ແກ່ສະມາຊິກໃໝ່ ແລະ ສະມາຊິກທີ່ກັບຄືນມາຫລາຍກວ່າເກົ່າ.

ເບິ່ງ “ຮ່ວມມືກັບສະມາຊິກ” ໃນ ບົດທີ 9 ສຳລັບແນວຄິດກ່ຽວກັບການສະໜັບສະໜູນສະມາຊິກ ໃນຄວາມພະຍາຍາມຂອງເຂົາເຈົ້າທີ່ຈະແບ່ງປັນພຣະກິດຕິຄຸນ.

ການສຶກສາພຣະຄຳພີ

ສຶກສາຂໍ້ດັ່ງຕໍ່ໄປນີ້. ພຣະຜູ້ຊ່ວຍໃຫ້ລອດ ແລະ ສານຸສິດເຫລົ່ານີ້ ຮັກ, ແບ່ງປັນ, ແລະ ເຊື້ອເຊີນແນວໃດ? ການກະທຳໃດແດ່ທີ່ຕົວຢ່າງເຫລົ່ານີ້ດົນໃຈໃນການສິດສອນຂອງທ່ານ? ທ່ານຈະສາມາດຊ່ວຍສະມາຊິກໃຫ້ແບ່ງປັນພຣະກິດຕິຄຸນໃນວິທີທາງປົກກະຕິ ແລະ ເປັນທຳມະຊາດໄດ້ແນວໃດ?

ຄວາມຮັກ

ແບ່ງປັນ

ເຊື້ອເຊີນ

ທຸກເທື່ອທີ່ທ່ານສຶກສາ, ໃຫ້ບັນທຶກສິ່ງທີ່ທ່ານຮຽນຮູ້.

ສະໜັບສະໜູນຜູ້ນຳໃນທ້ອງຖິ່ນໃນການເພີ່ມຄວາມເຂັ້ມແຂງໃຫ້ແກ່ສະມາຊິກໃໝ່

ເມື່ອຜູ້ຄົນຮັບບັບຕິສະມາ ແລະ ການຢືນຢັນ, ເຂົາເຈົ້າກາຍເປັນ “ພົນລະເມືອງອັນດຽວກັນກັບພວກໄພ່ພົນຂອງພຣະເຈົ້າ” (ເອເຟໂຊ 2:19; ເບິ່ງ 1 ໂກຣິນໂທ 12:12–27 ນຳອີກ). ເຮັດວຽກງານກັບຜູ້ນຳໃນທ້ອງຖິ່ນເພື່ອຊ່ວຍສະມາຊິກໃໝ່ຮັບການ “ບຳລຸງລ້ຽງດ້ວຍພຣະຄຳອັນປະເສີດຂອງພຣະເຈົ້າ, ເພື່ອຮັກສາເຂົາຢູ່ໃນທາງທີ່ຖືກຕ້ອງ, … ເພິ່ງອາໄສແຕ່ໃນພຣະຄຸນຄວາມດີຂອງພຣະຄຣິດຢ່າງດຽວ” (ໂມໂຣໄນ 6:4).

“ຜູ້ປ່ຽນໃຈເຫລື້ອມໃສໃໝ່ເຂົ້າມາໃນສາດສະໜາຈັກດ້ວຍຄວາມກະຕືລືລົ້ນກັບສິ່ງທີ່ເຂົາເຈົ້າໄດ້ພົບເຫັນ. ແລະ ເຮົາຕ້ອງສ້າງຂຶ້ນເທິງຄວາມກະຕືລືລົ້ນນັ້ນທັນທີ. … ຜູ້ສອນສາດສະໜາສາມາດຊ່ວຍແນະນຳ ແລະ ເຊື່ອມໂຍງຜູ້ຄົນທີ່ເຂົາເຈົ້າສິດສອນ ແລະ ຜູ້ປ່ຽນໃຈເຫລື້ອມໃສໃໝ່ກັບສະມາຊິກທີ່ຊື່ສັດ ຜູ້ຈະເອື້ອມອອກໄປຫາເຂົາເຈົ້າ, ຮັບຟັງເຂົາເຈົ້າ, ນຳພາເຂົາເຈົ້າ, ແລະ ຕ້ອນຮັບເຂົາເຈົ້າໃນໂບດ ແມ່ນແຕ່ກ່ອນທີ່ເຂົາເຈົ້າໄດ້ຮັບບັບຕິສະມາ. … ຂະນະທີ່ເຮົາ [ປະຕິບັດສາດສະໜາກິດ] ຕໍ່ຜູ້ທີ່ລົງໄປໃນນ້ຳແຫ່ງບັບຕິສະມາ, ເຮົາຈະເຫັນລູກໆຂອງພຣະເຈົ້າຫລາຍຄົນຕື່ມອີກທີ່ອົດທົນຈົນເຖິງທີ່ສຸດ ແລະ ຮັບເອົາຊີວິດນິລັນດອນ” (Ulisses S. Soares, “Convert Retention,” ກອງປະຊຸມສຳມະນາຜູ້ນຳເຜີຍແຜ່, ວັນທີ 25 ເດືອນມິຖຸນາ, 2018).

ສະມາຊິກໃໝ່ເຂົ້າຮ່ວມກອງປະຊຸມສິນລະລຶກ

ທ່ານມີບົດບາດອັນສຳຄັນໃນການຊ່ວຍສະມາຊິກໃໝ່ໃຫ້ໄປໂບດ. ເຮັດວຽກງານຮ່ວມກັບຜູ້ນຳເພື່ອໃຫ້ແນ່ໃຈວ່າ ທ່ານ ຫລື ສະມາຊິກຫວອດຊ່ວຍເຂົາເຈົ້າໄປໂບດ. ຕົວຊີ້ບອກສຳຄັນສະແດງໃຫ້ເຫັນເຖິງການເຂົ້າຮ່ວມກອງປະຊຸມສິນລະລຶກຂອງສະມາຊິກໃໝ່ ສາມາດຊ່ວຍໃຫ້ທ່ານ ແລະ ຜູ້ນຳໃນຫວອດເຫັນວ່າ ເມື່ອໃດທີ່ລາວຈະຕ້ອງການການຊຸກຍູ້ເພີ່ມເຕີມ.

ສະມາຊິກໃໝ່ມີແນວໂນ້ມທີ່ຈະສືບຕໍ່ເຂົ້າຮ່ວມກອງປະຊຸມສິນລະລຶກ ແລະ ຮັບສ່ວນສິນລະລຶກ ເມື່ອເຂົາເຈົ້າມີໝູ່ເພື່ອນໃນຫວອດ. ຊ່ວຍເຂົາເຈົ້າໃຫ້ຮູ້ສຶກເຖິງການເປັນພາກສ່ວນ, ໂດຍສະເພາະລະຫວ່າງປີທຳອິດຂອງການດຳລົງຊີວິດຕາມພຣະກິດຕິຄຸນ. (ເບິ່ງ ຄຳສອນ ແລະ ພັນທະສັນຍາ 84:106, 108.)

ສິດສອນບົດຮຽນຕ່າງໆຢູ່ໃນ ບົດທີ 3 ຄືນອີກ.

ຊ່ວຍສະມາຊິກໃໝ່ສືບຕໍ່ເພີ່ມຄວາມເຂັ້ມແຂງໃຫ້ແກ່ສັດທາຂອງເຂົາເຈົ້າໃນພຣະຜູ້ຊ່ວຍໃຫ້ລອດ ພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ. ຄວາມຈິງ ແລະ ຫລັກທຳຂອງພຣະກິດຕິຄຸນຢັ່ງຮາກເລິກຫລາຍຂຶ້ນ ເມື່ອສະມາຊິກໃໝ່ສືບຕໍ່ຮຽນຮູ້ໂດຍພຣະວິນຍານ.

ຫລັງຈາກການຢືນຢັນ, ໃຫ້ສິດສອນບົດຮຽນຂອງຜູ້ສອນສາດສະໜາຄືນອີກ. ທ່ານນຳພາການສິດສອນ. ເຖິງຢ່າງໃດກໍຕາມ, ໃຫ້ປະສານງານກັບຜູ້ນຳໃນຫວອດ ເພື່ອວ່າຜູ້ສອນສາດສະໜາປະຈຳຫວອດ ຫລື ສະມາຊິກຄົນອື່ນໆຈະສາມາດເຂົ້າຮ່ວມ. ການສິດສອນບົດຮຽນຄືນອີກໃນ ບົດທີ 3 ເປັນວິທີທີ່ສຳຄັນໃນການຊ່ວຍສະມາຊິກໃໝ່ ໃຫ້ “ບຳລຸງລ້ຽງດ້ວຍພຣະຄຳອັນປະເສີດຂອງພຣະເຈົ້າ” (ໂມໂຣໄນ 6:4). ຂະນະທີ່ທ່ານສິດສອນ, ຊຸກຍູ້ສະມາຊິກໃໝ່ໃຫ້ຮັກສາຄຳໝັ້ນສັນຍາທັງໝົດຢູ່ໃນບົດຮຽນ.

ອ່ານພຣະຄຳພີກັບສະມາຊິກໃໝ່, ໂດຍສະເພາະພຣະຄຳພີມໍມອນ, ແລະ ສິດສອນຫລັກທຳພຣະກິດຕິຄຸນ. ຊ່ວຍເຂົາເຈົ້າແບ່ງປັນພຣະກິດຕິຄຸນໃຫ້ກັບໝູ່ເພື່ອນ ແລະ ຄອບຄົວ. ສະມາຊິກໃໝ່ແຕ່ລະຄົນມີຄວາມຕ້ອງການພິເສດ, ແລະ ທ່ານສາມາດຊ່ວຍເຂົາເຈົ້າໃຫ້ຮູ້ສຶກເປັນທີ່ຮັກ ແລະ ຖືກຕ້ອນຮັບ.

ໃບລາຍງານ Covenant Path Progress ແລະ My Covenant Path

ຜູ້ນຳໃນທ້ອງຖິ່ນມີແຫລ່ງຂໍ້ມູນສຳລັບຄວາມພະຍາຍາມເຜີຍແຜ່ເຊັ່ນດຽວກັບທ່ານ. ໜຶ່ງໃນໃບລາຍງານ Covenant Path Progress ເຫລົ່ານີ້, ມີຢູ່ໃນແອັບ Member Tools ຫລື ແຫລ່ງຊ່ວຍຜູ້ນຳ ແລະ ສະໝຽນ. ໃບລາຍງານນີ້ຊ່ວຍໃຫ້ຜູ້ນຳໃນທ້ອງຖິ່ນເຫັນປະສົບການສຳຄັນທີ່ບຸກຄົນຕ້ອງດຳເນີນຕໍ່ໄປໃນເສັ້ນທາງແຫ່ງພັນທະສັນຍາ ກ່ອນ ແລະ ຫລັງຈາກການບັບຕິສະມາ.

My Covenant Path ແມ່ນແຫລ່ງຂໍ້ມູນທີ່ຊ່ວຍສະມາຊິກໃໝ່ໃຫ້ “ຍຶດໝັ້ນໃນສັດທາ [ຂອງເຂົາເຈົ້າ] ໃນພຣະເຢຊູຄຣິດ ແລະ ຮູ້ສຶກສະບາຍໃຈໃນສາດສະໜາຈັກ” (My Covenant Path, iv). ມັນແນະນຳສະມາຊິກໃໝ່ໃຫ້ຮູ້ຈັກກິດຈະກຳ ແລະ ໂອກາດຕ່າງໆ, ດັ່ງເຊັ່ນປະຫວັດຄອບຄົວ ແລະ ຊ່ວຍບັນພະບຸລຸດທີ່ລ່ວງລັບໄປແລ້ວໃຫ້ໄດ້ຮັບພິທີການສັກສິດໃນພຣະວິຫານ. ຊຸກຍູ້ສະມາຊິກໃນທ້ອງຖິ່ນໃຫ້ນຳພາສະມາຊິກໃໝ່ຜ່ານທາງປະສົບການເຫລົ່ານີ້. ໃຫ້ການສະໜັບສະໜູນຕາມທີ່ຮ້ອງຂໍ.

ການສຶກສາສ່ວນຕົວ ຫລື ກັບຄູ່ສອນ

ສຶກສາ My Covenant Path. ທ່ານຮຽນຮູ້ຫຍັງແດ່ກ່ຽວກັບບົດບາດຂອງທ່ານໃນການຊ່ວຍສະມາຊິກໃໝ່ໃຫ້ເຂັ້ມແຂງ? ທ່ານຈະສາມາດສະໜັບສະໜູນຄວາມພະຍາຍາມຂອງສະພາຫວອດໄດ້ແນວໃດ? ແຕ່ລະຄັ້ງທີ່ທ່ານສຶກສາບົດນີ້, ໃຫ້ບັນທຶກສິ່ງທີ່ທ່ານຮຽນຮູ້.

ສະໜັບສະໜູນຜູ້ນຳໃນທ້ອງຖິ່ນໃນການເພີ່ມຄວາມເຂັ້ມແຂງໃຫ້ແກ່ສະມາຊິກທີ່ກັບຄືນມາ

ສະມາຊິກບາງຄົນເລືອກທີ່ຈະຢຸດຕິການມີສ່ວນຮ່ວມໃນສາດສະໜາຈັກ. ຜູ້ນຳ ແລະ ສະມາຊິກຄົນອື່ນໆໃນທ້ອງຖິ່ນ ພະຍາຍາມທີ່ຈະສ້າງຄວາມສຳພັນທີ່ແໜ້ນແຟ້ນກັບເຂົາເຈົ້າ ແລະ ເອື້ອມອອກໄປຫາເຂົາເຈົ້າ. ພຣະຜູ້ຊ່ວຍໃຫ້ລອດໄດ້ກ່າວວ່າ:

“ຈົ່ງປະຕິບັດສາດສະໜາກິດແກ່ຄົນນັ້ນສະເໝີໄປ ເພາະເຈົ້າບໍ່ສາມາດຈະຮູ້ໄດ້ວ່າ ເຂົາອາດຈະກັບມາ ແລະ ກັບໃຈຫລືບໍ່, ແລະ ມາຫາເຮົາດ້ວຍຈຸດປະສົງເຕັມທີ່ແຫ່ງໃຈ, ແລະ ເຮົາຈະປິ່ນປົວເຂົາ; ແລະ ເຈົ້າຈະເປັນທາງນຳຄວາມລອດມາສູ່ເຂົາ” (3 ນີໄຟ 18:32).

ຜູ້ນຳໃນທ້ອງຖິ່ນອາດຂໍໃຫ້ທ່ານຊ່ວຍສະມາຊິກທີ່ກັບຄືນມາໃຫ້ສ້າງສັດທາຂອງເຂົາເຈົ້າ. ສ່ວນຫລາຍແລ້ວການມອບໝາຍເຫລົ່ານີ້ຈະເປັນກັບຄອບຄົວທີ່ເປັນສະມາຊິກບາງສ່ວນ. ພິຈາລະນາດ້ວຍການອະທິຖານວ່າ ທ່ານຈະສາມາດເຊື້ອເຊີນພຣະວິນຍານເຂົ້າມາໃນບ້ານຂອງສະມາຊິກ ທີ່ຫາກໍກັບຄືນມາໄດ້ແນວໃດ ຂະນະທີ່ທ່ານສິດສອນຫລັກທຳພຣະກິດຕິຄຸນໃຫ້ເຂົາເຈົ້າ ແລະ ເຊື້ອເຊີນເຂົາເຈົ້າໃຫ້ປະຕິບັດ. ສະແດງຄວາມເຂົ້າອົກເຂົ້າໃຈ ແລະ ຄວາມເຫັນອົກເຫັນໃຈຕໍ່ຄວາມກັງວົນຂອງເຂົາເຈົ້າ.

ຕາມທີ່ສະຖານະການຈະເອື້ອອຳນວຍ, ສິດສອນພຣະກິດຕິຄຸນໃຫ້ກັບຄົວເຮືອນທີ່ຍັງບໍ່ໄດ້ຮັບບັບຕິສະມາເທື່ອ. ຄວາມຮັກ ແລະ ການສະໜັບສະໜູນຂອງທ່ານ ສາມາດຊ່ວຍໃຫ້ເຂົາເຈົ້າມີສັດທາໃນພຣະຄຣິດຢ່າງເລິກເຊິ່ງຫລາຍຂຶ້ນ ແລະ ເພີ່ມຄວາມປາດຖະໜາຂອງເຂົາເຈົ້າທີ່ຈະເຮັດ ແລະ ຮັກສາພັນທະສັນຍາ.

ປະສານງານກັບຜູ້ນຳໃນທ້ອງຖິ່ນ ເມື່ອທ່ານເຮັດວຽກງານກັບສະມາຊິກທີ່ກັບຄືນມາ. ຄວາມພະຍາຍາມເຫລົ່ານີ້ສາມາດມີຜົນກະທົບໄລຍະຍາວຕໍ່ບຸກຄົນ ແລະ ກຸ່ມຊຸມນຸມຊົນໃນທ້ອງຖິ່ນ.

ການສຶກສາພຣະຄຳພີ

ພຣະເຢຊູຄຣິດໄດ້ສິດສອນຫຍັງແດ່ກ່ຽວກັບການຊ່ວຍຜູ້ຄົນທີ່ອາດກຳລັງຕໍ່ສູ້ດີ້ນລົນ?

ແອວມາ ແລະ ແອມມິວເລັກໄດ້ສິດສອນຫລາຍຄົນທີ່ຕົກອອກໄປຈາກສາດສະໜາຈັກ. ທ່ານສາມາດຮຽນຮູ້ຫຍັງແດ່ຈາກປະສົບການຂອງພວກເພິ່ນກ່ຽວກັບການເພີ່ມຄວາມເຂັ້ມແຂງໃຫ້ແກ່ສະມາຊິກທີ່ກັບຄືນມາ?

ຈື່ຈຳສິ່ງນີ້

ຮ່ວມມືກັບຜູ້ນຳ ແລະ ສະມາຊິກໃນຫວອດ, ແລະ ສະໜັບສະໜູນເຂົາເຈົ້າໃນຄວາມພະຍາຍາມຂອງເຂົາເຈົ້າທີ່ຈະແບ່ງປັນພຣະກິດຕິຄຸນ.
ສ້າງຄວາມສຳພັນທີ່ແໜ້ນແຟ້ນກັບຜູ້ນຳໃນຫວອດ, ແລະ ສະໜັບສະໜູນເຂົາເຈົ້າໃນການເອີ້ນຂອງເຂົາເຈົ້າ.
ມີສ່ວນຮ່ວມໃນການປະຊຸມປະສານງານປະຈຳອາທິດ.
ເພີ່ມຄວາມເຂັ້ມແຂງໃຫ້ແກ່ສະມາຊິກໃໝ່ ໂດຍການຊ່ວຍເຂົາເຈົ້າໃຫ້ເຂົ້າຮ່ວມກອງປະຊຸມສິນລະລຶກ ແລະ ສິດສອນບົດຮຽນຂອງຜູ້ສອນສາດສະໜາຄືນອີກ.
ຊ່ວຍເພີ່ມຄວາມເຂັ້ມແຂງໃຫ້ແກ່ສະມາຊິກທີ່ກັບຄືນມາ.

ແນວຄິດສຳລັບການສຶກສາ ແລະ ການນຳໃຊ້

ການສຶກສາສ່ວນຕົວ

ໃຊ້ແອັບ Preach My Gospel ເພື່ອວາງແຜນທີ່ຈະເວົ້າລົມກັບສະມາຊິກໃໝ່ ແລະ ສະມາຊິກທີ່ຫາກໍກັບຄືນມາ ຜູ້ກຳລັງປ່ຽນແປງຊີວິດຂອງເຂົາເຈົ້າ ແລະ ໄປໂບດ. ແມ່ນຫຍັງທີ່ຊ່ວຍເຂົາເຈົ້າໄດ້ຫລາຍທີ່ສຸດ? ໃນບັນທຶກການສຶກສາຂອງທ່ານ, ໃຫ້ຂຽນຄວາມນຶກຄິດຂອງທ່ານກ່ຽວກັບປະສົບການຂອງເຂົາເຈົ້າ. ທ່ານໄດ້ຮຽນຮູ້ຫຍັງແດ່ທີ່ຈະຊ່ວຍທ່ານເຮັດວຽກງານກັບຜູ້ທີ່ທ່ານກຳລັງສິດສອນ?
ສຶກສາ 2 ນີໄຟ 31:18–20, ແອວມາ 26:1–7, ແອວມາ 32:32–43, ແລະ ໂມໂຣໄນ 6. ຂຽນສິ່ງທີ່ທ່ານຮຽນຮູ້ຈາກຂໍ້ເຫລົ່ານີ້ກ່ຽວກັບການເພີ່ມຄວາມເຂັ້ມແຂງໃຫ້ແກ່ສະມາຊິກໃໝ່.

ການສຶກສາກັບຄູ່ສອນ ແລະ ການສັບປ່ຽນຄູ່ສອນ

ອ່ານ ແລະ ສົນທະນາ ບົດທີ 23 ໃນ ຄູ່ມືທົ່ວໄປ. ທ່ານຈະສາມາດສະໜັບສະໜູນຜູ້ນຳໃນທ້ອງຖິ່ນໃນໜ້າທີ່ຮັບຜິດຊອບຂອງເຂົາເຈົ້າໄດ້ແນວໃດ?
ລະຫວ່າງການປະຊຸມປະສານງານປະຈຳອາທິດ, ຖາມຜູ້ນຳໃນຫວອດວ່າມີສະມາຊິກທີ່ກັບຄືນມາບໍໃນເຂດຂອງທ່ານ ທີ່ເຂົາເຈົ້າຢາກໃຫ້ທ່ານໄປຢ້ຽມຢາມໃນອາທິດນີ້. ເມື່ອທ່ານຢ້ຽມຢາມເຂົາເຈົ້າ, ໃຫ້ສະແຫວງຫາທີ່ຈະສ້າງສັດທາຂອງເຂົາເຈົ້າໃນພຣະເຢຊູຄຣິດ.
ລະບຸທຸກຄົນທີ່ໄດ້ຮັບບັບຕິສະມາ ແລະ ການຢືນຢັນໃນປີແລ້ວນີ້. ທົບທວນບັນທຶກໃດໜຶ່ງໃນນັ້ນ ແລະ ສົນທະນາວິທີທີ່ພວກທ່ານສາມາດເຮັດວຽກງານກັບຜູ້ນຳໃນການປະຊຸມປະສານງານປະຈຳອາທິດຄັ້ງຕໍ່ໄປ ເພື່ອຊ່ວຍບຸກຄົນນີ້. ບັນທຶກແນວຄິດ ແລະ ຄຳແນະນຳຂອງທ່ານໃນແອັບ Preach My Gospel. ເຮັດສິ່ງນີ້ຄືນສຳລັບຜູ້ປ່ຽນໃຈເຫລື້ອມໃສເມື່ອບໍ່ດົນມານີ້ທຸກຄົນຢູ່ໃນເຂດຂອງທ່ານ.

ສະພາທ້ອງຖິ່ນ, ກອງປະຊຸມອະນາເຂດ, ແລະ ສະພາຜູ້ນຳເຂດເຜີຍແຜ່

ເຊື້ອເຊີນອະທິການ ຫລື ຜູ້ນຳໃນຫວອດຄົນອື່ນໆໃຫ້ເວົ້າລົມກ່ຽວກັບການເພີ່ມຄວາມເຂັ້ມແຂງໃຫ້ແກ່ສະມາຊິກໃໝ່ ແລະ ສະມາຊິກທີ່ກັບຄືນມາ. ຂໍໃຫ້ບຸກຄົນນີ້ເນັ້ນວ່າ ຜູ້ສອນສາດສະໜາຈະສາມາດຊ່ວຍໄດ້ແນວໃດ.
ສົນທະນາຄຳອຸປະມາກ່ຽວກັບແກະທີ່ເສຍ, ເງິນທີ່ເສຍ, ແລະ ລູກຊາຍທີ່ເສຍ (ເບິ່ງ ລູກາ 15). ເຊື້ອເຊີນຜູ້ສອນສາດສະໜາໃຫ້ແບ່ງປັນສິ່ງທີ່ເຂົາເຈົ້າກຳລັງຮຽນຮູ້ ແລະ ວິທີທີ່ເຂົາເຈົ້າສາມາດນຳໃຊ້ມັນໃນວຽກງານເຜີຍແຜ່ຂອງເຂົາເຈົ້າ.

ຜູ້ນຳເຜີຍແຜ່ ແລະ ທີ່ປຶກສາເຜີຍແຜ່

ເຮັດວຽກງານກັບຜູ້ນຳໃນທ້ອງຖິ່ນເພື່ອຊຸກຍູ້ເຂົາເຈົ້າໃນການຊ່ວຍສະມາຊິກໃໝ່:
- ຮັບການແຕ່ງຕັ້ງສູ່ຕຳແໜ່ງໃນຖານະປະໂລຫິດ (ສຳລັບຜູ້ຊາຍທີ່ມີອາຍຸເໝາະສົມ).
- ຮັບການມອບໝາຍເປັນອ້າຍນ້ອງຜູ້ປະຕິບັດສາດສະໜາກິດ (ແລະ ເອື້ອຍນ້ອງຜູ້ປະຕິບັດສາດສະໜາກິດສຳລັບຜູ້ຍິງ).
- ຮັບໃບຮັບຮອງເຂົ້າພຣະວິຫານ ເພື່ອຮັບບັບຕິສະມາໃນພຣະວິຫານແທນບັນພະບຸລຸດທີ່ລ່ວງລັບໄປແລ້ວຂອງເຂົາເຈົ້າ.
- ກຽມຊື່ບັນພະບຸລຸດທີ່ລ່ວງລັບໄປແລ້ວ ເພື່ອເອົາໄປພຣະວິຫານ.
- ຮັບເອົາການມອບໝາຍ ຫລື ການເອີ້ນໃຫ້ຮັບໃຊ້ໃນຫວອດ ຫລື ສາຂາຂອງເຂົາເຈົ້າ.
ໃນການປະສານງານກັບປະທານສະເຕກ, ໃຫ້ສິດສອນຜູ້ນຳໃນທ້ອງຖິ່ນເຖິງວິທີຈັດການປະຊຸມປະສານງານປະຈຳອາທິດ.
ຕິດຕາມຜົນກັບສະມາຊິກໃໝ່ເປັນບາງຄັ້ງ ເພື່ອເບິ່ງວ່າເຂົາເຈົ້າເປັນຈັ່ງໃດ ແລະ ວ່າຜູ້ສອນສາດສະໜາ ແລະ ສະມາຊິກສາມາດຊ່ວຍໄດ້ແນວໃດ.
ເຊື້ອເຊີນສະມາຊິກໃໝ່ໃຫ້ເວົ້າລົມກັບຜູ້ສອນສາດສະໜາ ແລະ ເລົ່າປະສົບການຂອງເຂົາເຈົ້າໃນສາດສະໜາຈັກ.