“ບົດທີ 12: ຊ່ວຍຜູ້ຄົນກຽມພ້ອມສຳລັບການບັບຕິສະມາ ແລະ ການຢືນຢັນ,” ຈົ່ງສັ່ງສອນພຣະກິດຕິຄຸນຂອງເຮົາ: ຄູ່ມືຕໍ່ການແບ່ງປັນພຣະກິດຕິຄຸນຂອງພຣະເຢຊູຄຣິດ (2023)

“ບົດທີ 12,” ຈົ່ງສັ່ງສອນພຣະກິດຕິຄຸນຂອງເຮົາ

ບົດທີ 12

ຊ່ວຍຜູ້ຄົນກຽມພ້ອມສຳລັບການບັບຕິສະມາ ແລະ ການຢືນຢັນ

ໃຫ້ພິຈາລະນາສິ່ງນີ້

ເຮົາຈະສາມາດຊ່ວຍຜູ້ຄົນກຽມພ້ອມສຳລັບການບັບຕິສະມາ ແລະ ການຢືນຢັນໄດ້ແນວໃດ?
ເຮົາຈະທຳການສຳພາດບັບຕິສະມາແນວໃດ?
ພິທີບັບຕິສະມາທີ່ຍົກລະດັບຖືກວາງແຜນ ແລະ ດຳເນີນແນວໃດ?
ເປັນຫຍັງຈຶ່ງສຳຄັນທີ່ຈະປະກອບ ແລະ ສົ່ງຟອມການບັບຕິສະມາ ແລະ ການຢືນຢັນ?
ເຮົາຈະສາມາດສົ່ງເສີມສະມາຊິກໃໝ່ໄດ້ແນວໃດ?

ການບັບຕິສະມາເປັນພິທີການແຫ່ງຄວາມຫວັງທີ່ມີຄວາມສຸກ ທີ່ນຳອຳນາດຂອງພຣະເຈົ້າມາສູ່ຊີວິດຂອງບຸກຄົນ. ອຳນາດນັ້ນມາເຖິງຜ່ານທາງການຮັບຂອງປະທານແຫ່ງພຣະວິນຍານບໍລິສຸດ. ມັນຈະຕໍ່ເນື່ອງເມື່ອບຸກຄົນອົດທົນຈົນເຖິງທີ່ສຸດ ໃນການຮັກສາພັນທະສັນຍາແຫ່ງການບັບຕິສະມາ.

ຈຸດປະສົງຂອງການສິດສອນຂອງທ່ານແມ່ນເພື່ອຊ່ວຍຄົນອື່ນພັດທະນາສັດທາຂອງເຂົາເຈົ້າໃນພຣະຄຣິດ, ກັບໃຈຈາກບາບຂອງເຂົາເຈົ້າ, ແລະ ຮັບບັບຕິສະມາດ້ວຍຄວາມປາດຖະໜາທີ່ຈິງໃຈໃນການຕິດຕາມພຣະຄຣິດ. ດັ່ງທີ່ມໍມອນໄດ້ສິດສອນວ່າ, “ຜົນທຳອິດຂອງການກັບໃຈຄື ການບັບຕິສະມາ” (ໂມໂຣໄນ 8:25). ເມື່ອຜູ້ຄົນທີ່ທ່ານສິດສອນຮັກສາຄຳໝັ້ນສັນຍາທີ່ທ່ານເຊື້ອເຊີນເຂົາເຈົ້າໃຫ້ເຮັດ, ເຂົາເຈົ້າຈະກຽມພ້ອມທີ່ຈະເຮັດ ແລະ ຮັກສາພັນທະສັນຍາກັບພຣະເຈົ້າ ແລະ ຊື່ນຊົມກັບພອນທີ່ສັນຍາໄວ້.

ການບັບຕິສະມາ ແລະ ການຢືນຢັນບໍ່ແມ່ນຈຸດໝາຍປາຍທາງສຸດທ້າຍ. ແຕ່, ພິທີການເຫລົ່ານີ້ແມ່ນປະຕູ ຊຶ່ງໂດຍທາງນັ້ນລູກໆຂອງພຣະເຈົ້າຈະເຂົ້າໄປສູ່ເສັ້ນທາງແຫ່ງພັນທະສັນຍາ. ເສັ້ນທາງນີ້ນຳໄປສູ່ພິທີການ, ພັນທະສັນຍາ, ແລະ ພອນທີ່ມີຄວາມສຸກຂອງພຣະວິຫານ—ແລະ ໃນທີ່ສຸດ ໄປສູ່ຊີວິດນິລັນດອນ (ເບິ່ງ 3 ນີໄຟ 11:20–40).

ຄຸນສົມບັດສຳລັບການບັບຕິສະມາ ແລະ ການຢືນຢັນ

ພຣະເຈົ້າເຊື້ອເຊີນລູກໆທຸກຄົນຂອງພຣະອົງໃຫ້ມາຫາພຣະອົງ ຜ່ານທາງການບັບຕິສະມາ ແລະ ການຢືນຢັນ (ເບິ່ງ 2 ນີໄຟ 26:33; 3 ນີໄຟ 27:20). ຄຸນສົມບັດສຳລັບການບັບຕິສະມາແມ່ນຄືກັນສຳລັບທຸກຄົນ.

ຈາກ ຄຳສອນ ແລະ ພັນທະສັນຍາ 20:37:

ໃຫ້ຖ່ອມຕົວລົງຢູ່ຕໍ່ພຣະພັກຂອງພຣະເຈົ້າ.
ປາດຖະໜາທີ່ຈະຮັບບັບຕິສະມາ.
ອອກມາດ້ວຍໃຈທີ່ຊອກຊ້ຳ ແລະ ວິນຍານທີ່ສຳນຶກຜິດ.
ກັບໃຈຈາກບາບທັງໝົດຂອງທ່ານ ແລະ ອະທິຖານຂໍການໃຫ້ອະໄພ.
ເຕັມໃຈທີ່ຈະຮັບເອົາພຣະນາມຂອງພຣະຄຣິດ.
ມີຄວາມຕັ້ງໃຈທີ່ຈະຮັບໃຊ້ພຣະຄຣິດຈົນເຖິງທີ່ສຸດ.
ສະແດງອອກໂດຍວຽກງານຂອງທ່ານ ວ່າທ່ານໄດ້ຮັບພຣະວິນຍານຂອງພຣະຄຣິດໄປສູ່ການປົດບາບຂອງທ່ານ.

ຈາກຝ່າຍປະທານສູງສຸດ ແລະ ກຸ່ມອັກຄະສາວົກສິບສອງ

ຕອບຢ່າງເໝາະສົມຕໍ່ຄຳຖາມການສຳພາດບັບຕິສະມາ.
ໄດ້ຮັບບົດຮຽນທັງໝົດຂອງຜູ້ສອນສາດສະໜາ.
ພົບກັບປະທານກຸ່ມແອວເດີ, ປະທານສະມາຄົມສະຕີສົງເຄາະ, ແລະ ອະທິການ.
ເຂົ້າຮ່ວມກອງປະຊຸມສິນລະລຶກຫລາຍຄັ້ງ.

ຄຸນສົມບັດເຫລົ່ານີ້ລະບຸເຖິງຄວາມກ້າວໜ້າທາງວິນຍານຂອງການປ່ຽນໃຈເຫລື້ອມໃສ. ເມື່ອຜູ້ຄົນມີຄຸນສົມບັດເຫລົ່ານີ້, ເຂົາເຈົ້າກໍພ້ອມແລ້ວສຳລັບພິທີການສັກສິດຂອງການບັບຕິສະມາ ແລະ ການຢືນຢັນ.

ເມື່ອບຸກຄົນໄດ້ກຳນົດວັນທີທີ່ແນ່ນອນ:

ໃຫ້ທົບທວນບັນທຶກຂອງລາວຢ່າງລະອຽດໃນແອັບ Preach My Gospel ເພື່ອໃຫ້ແນ່ໃຈວ່າ ທ່ານໄດ້ສິດສອນຄຳສອນ ແລະ ພຣະບັນຍັດທີ່ຈຳເປັນ.
ສ້າງຕາຕະລາງສຳລັບລາຍການທີ່ຈຳເປັນຕໍ່ການກະກຽມສຳລັບການບັບຕິສະມາ ແລະ ການຢືນຢັນ. ທົບທວນຕາຕະລາງນີ້ກັບບຸກຄົນ.
ຖ້າເປັນໄປໄດ້, ເຊື້ອເຊີນບຸກຄົນໃຫ້ໄປຮ່ວມພິທີບັບຕິສະມາກ່ອນການບັບຕິສະມາຂອງລາວເອງ.

ການສຶກສາພຣະຄຳພີ

ສຶກສາຂໍ້ພຣະຄຳພີດັ່ງຕໍ່ໄປນີ້. ທ່ານຈະສາມາດຊ່ວຍຜູ້ທີ່ທ່ານສິດສອນກະກຽມສຳລັບການບັບຕິສະມາ ແລະ ການຢືນຢັນໄດ້ແນວໃດ? ບັນທຶກສິ່ງທີ່ທ່ານກຳລັງຮຽນຮູ້ຈາກການສຶກສາຂອງທ່ານ.

ຊ່ວຍຜູ້ຄົນກຽມພ້ອມສຳລັບການສຳພາດບັບຕິສະມາຂອງເຂົາເຈົ້າ

ການສຳພາດບັບຕິສະມາແມ່ນຂັ້ນຕອນສຳຄັນໃນການໃຫ້ແນ່ໃຈວ່າ ບຸກຄົນມີຄຸນສົມບັດຂອງພຣະຜູ້ເປັນເຈົ້າສຳລັບການບັບຕິສະມາ. ກຳນົດເວລາການສຳພາດບັບຕິສະມາພຽງແຕ່ເມື່ອບຸກຄົນພ້ອມເທົ່ານັ້ນ.

ຊ່ວຍຜູ້ຄົນກຽມພ້ອມສຳລັບການສຳພາດນີ້ ເພື່ອວ່າເຂົາເຈົ້າຈະຮູ້ສຶກສະບາຍໃຈກ່ຽວກັບມັນ. ອະທິບາຍວ່າມັນຈະເປັນຈັ່ງໃດ. ບອກເຂົາເຈົ້າວ່າເຂົາເຈົ້າຈະຕ້ອງພົບກັບຜູ້ສອນສາດສະໜາອີກຄົນໜຶ່ງທີ່ຄືກັນກັບທ່ານ.

ອະທິບາຍຈຸດປະສົງຂອງການສຳພາດ. ມັນເປັນໂອກາດສຳລັບເຂົາເຈົ້າທີ່ຈະເປັນພະຍານວ່າ ເຂົາເຈົ້າ “ໄດ້ກັບໃຈຢ່າງແທ້ຈິງຈາກບາບທັງໝົດຂອງເຂົາ [ແລະ] ສະແດງໃຫ້ປະຈັກຢ່າງແທ້ຈິງດ້ວຍວຽກງານຂອງເຂົາ ວ່າເຂົາໄດ້ຮັບເອົາພຣະວິນຍານຂອງພຣະຄຣິດໄປສູ່ການປົດບາບຂອງເຂົາ” (ຄຳສອນ ແລະ ພັນທະສັນຍາ 20:37).

ແບ່ງປັນຄຳຖາມທີ່ຜູ້ສຳພາດຈະຖາມ (ເບິ່ງຂ້າງຫລຸ່ມ). ສິ່ງນີ້ຈະຊ່ວຍບຸກຄົນໃຫ້ກຽມພ້ອມທີ່ຈະຕອບ.

ໃຫ້ແນ່ໃຈວ່າບຸກຄົນເຂົ້າໃຈສິ່ງທີ່ທ່ານໄດ້ສິດສອນ ແລະ ພັນທະສັນຍາທີ່ລາວຈະເຮັດຕອນຮັບບັບຕິສະມາ. ພັນທະສັນຍານີ້ແມ່ນທີ່ຈະ:

ເຕັມໃຈທີ່ຈະຮັບເອົາພຣະນາມຂອງພຣະເຢຊູຄຣິດ.
ຮັກສາພຣະບັນຍັດຂອງພຣະເຈົ້າ.
ຮັບໃຊ້ພຣະເຈົ້າ ແລະ ຄົນອື່ນ.
ອົດທົນຈົນເຖິງທີ່ສຸດ (ເບິ່ງ ບົດຮຽນທີ 4.)

ສະແດງປະຈັກພະຍານກ່ຽວກັບພອນອັນຍິ່ງໃຫຍ່ທີ່ມາຈາກການຮັບບັບຕິສະມາ ແລະ ການຢືນຢັນ ແລະ ຮັກສາພັນທະສັນຍາແຫ່ງການບັບຕິສະມາ. ພອນເຫລົ່ານີ້ແມ່ນລວມທັງການປົດບາບ ແລະ ຂອງປະທານແຫ່ງພຣະວິນຍານບໍລິສຸດ.

ການດຳເນີນການສຳພາດບັບຕິສະມາ

ແຕ່ລະຄົນຜູ້ປາດຖະໜາທີ່ຈະຮັບບັບຕິສະມາ ຈະໄດ້ຮັບການສຳພາດໂດຍຜູ້ນຳຖານະປະໂລຫິດທີ່ໄດ້ຮັບອະນຸຍາດ. ໃນເຂດເຜີຍແຜ່, ບຸກຄົນນີ້ຈະເປັນຜູ້ນຳທ້ອງຖິ່ນ ຫລື ຜູ້ນຳອະນາເຂດ. ເພິ່ນດຳເນີນການສຳພາດສຳລັບ:

ບຸກຄົນອາຍຸ 9 ປີຂຶ້ນໄປ ທີ່ບໍ່ເຄີຍຮັບບັບຕິສະມາ ແລະ ການຢືນຢັນ.
ເດັກນ້ອຍອາຍຸ 8 ປີຂຶ້ນໄປ ຜູ້ທີ່ພໍ່ແມ່ບໍ່ໄດ້ເປັນສະມາຊິກຂອງສາດສະໜາຈັກ.
ເດັກນ້ອຍອາຍຸ 8 ປີຂຶ້ນໄປ ຜູ້ທີ່ພໍ່ແມ່ຄົນໜຶ່ງກຳລັງຈະຮັບບັບຕິສະມາ ແລະ ການຢືນຢັນເຊັ່ນກັນ

ແນວທາງຊີ້ນຳສຳລັບການສຳພາດມີຢູ່ຂ້າງລຸ່ມ.

ຈັດການສຳພາດໃນສະຖານທີ່ສະດວກ ແລະ ເປັນສ່ວນຕົວ ບ່ອນທີ່ສາມາດຮູ້ສຶກພຣະວິນຍານໄດ້.
ເມື່ອສຳພາດເດັກນ້ອຍ, ຊາວໜຸ່ມ, ຫລື ຜູ້ຍິງທີ່ເປັນຜູ້ໃຫຍ່, ຄູ່ຂອງຜູ້ສຳພາດຄວນຢູ່ໃກ້ໃນຫ້ອງຖັດໄປ, ໃນຫ້ອງໂຖງ, ຫລື ຢູ່ບ່ອນທາງຍ່າງ. ຖ້າຫາກບຸກຄົນປາດຖະໜາ, ກໍສາມາດເຊື້ອເຊີນຜູ້ໃຫຍ່ຄົນໜຶ່ງໃຫ້ເຂົ້າຮ່ວມການສຳພາດກໍໄດ້. ຜູ້ສອນສາດສະໜາຄວນຫລີກເວັ້ນຈາກທຸກສະຖານະການ ທີ່ຈະກໍ່ໃຫ້ເກີດການເຂົ້າໃຈຜິດ.
ເລີ່ມຕົ້ນດ້ວຍການອະທິຖານ.
ຊ່ວຍບຸກຄົນໃຫ້ຮູ້ສຶກສະບາຍໃຈ.
ເຮັດໃຫ້ການສຳພາດເປັນປະສົບການທີ່ຍົກລະດັບທາງວິນຍານ.
ເຮັດໃຫ້ແນ່ໃຈວ່າ ບຸກຄົນເຂົ້າໃຈຈຸດປະສົງຂອງການສຳພາດ.
ຖາມຄຳຖາມການສຳພາດບັບຕິສະມາທີ່ລະບຸໄວ້ຢູ່ຂ້າງລຸ່ມ. ປັບຄຳຖາມຕາມອາຍຸ, ວຸດທິພາວະ, ແລະ ສະຖານະການຂອງບຸກຄົນຕາມຄວາມຈຳເປັນ.
ຕອບຄຳຖາມຂອງບຸກຄົນ.
ທົບທວນຂໍ້ມູນຢູ່ໃນຟອມການບັບຕິສະມາ ແລະ ການຢືນຢັນເພື່ອຄວາມຖືກຕ້ອງ. ຖ້າຫາກບຸກຄົນເປັນຄົນໄວລຸ້ນ, ພໍ່ແມ່ ຫລື ຜູ້ປົກຄອງຄົນໜຶ່ງຈຳເປັນຕ້ອງເຊັນຟອມກ່ອນການບັບຕິສະມາ (ເບິ່ງພາກ “ການບັບຕິສະມາ ແລະ ການຢືນຢັນ: ຄຳຖາມ ແລະ ຄຳຕອບ” ໃນບົດນີ້).
ເຊື້ອເຊີນບຸກຄົນໃຫ້ສະແດງປະຈັກພະຍານ ຫລື ແບ່ງປັນຄວາມຮູ້ສຶກຂອງລາວ.
ສະແດງຄວາມຂອບໃຈທີ່ສາມາດພົບກັບບຸກຄົນນັ້ນ.

ຄຳຖາມການສຳພາດບັບຕິສະມາ

ຄຳຖາມການສຳພາດບັບຕິສະມາມີດັ່ງຕໍ່ໄປນີ້:

ເຈົ້າເຊື່ອວ່າພຣະເຈົ້າເປັນພຣະບິດານິລັນດອນຂອງເຮົາບໍ່? ເຈົ້າເຊື່ອວ່າພຣະເຢຊູຄຣິດເປັນພຣະບຸດອົງດຽວຂອງພຣະເຈົ້າ ແລະ ເປັນພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງໂລກບໍ?
ເຈົ້າເຊື່ອວ່າສາດສະໜາຈັກ ແລະ ພຣະກິດຕິຄຸນຂອງພຣະເຢຊູຄຣິດໄດ້ຖືກຟື້ນຟູຜ່ານທາງສາດສະດາໂຈເຊັບ ສະມິດ ບໍ? ເຈົ້າເຊື່ອບໍວ່າ [ປະທານຂອງສາດສະໜາຈັກໃນປະຈຸບັນ] ເປັນສາດສະດາຂອງພຣະເຈົ້າ? ສິ່ງນີ້ໝາຍຄວາມວ່າແນວໃດຕໍ່ເຈົ້າ?
ການກັບໃຈໝາຍຄວາມວ່າແນວໃດຕໍ່ເຈົ້າ? ເຈົ້າຮູ້ສຶກວ່າເຈົ້າໄດ້ກັບໃຈຈາກບາບທີ່ຜ່ານມາແລ້ວບໍ?
ເຈົ້າໄດ້ຖືກສິດສອນວ່າ ການເປັນສະມາຊິກໃນສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ແມ່ນລວມທັງການດຳລົງຊີວິດຕາມມາດຕະຖານຂອງພຣະກິດຕິຄຸນ. ເຈົ້າເຂົ້າໃຈຢ່າງໃດແດ່ກ່ຽວກັບການເຮັດຕາມມາດຕະຖານດັ່ງຕໍ່ໄປນີ້? ເຈົ້າເຕັມໃຈທີ່ຈະເຊື່ອຟັງມັນບໍ?
- ກົດພົມມະຈັນ, ຊຶ່ງຫ້າມບໍ່ໃຫ້ມີຄວາມສຳພັນທາງເພດນອກພັນທະຂອງການແຕ່ງງານຕາມກົດໝາຍ ລະຫວ່າງຊາຍ ແລະ ຍິງ
- ກົດສ່ວນສິບ
- ພຣະວາຈາແຫ່ງປັນຍາ
- ການຮັກສາວັນຊະບາໂຕໃຫ້ສັກສິດ, ລວມທັງການຮັບສ່ວນສິນລະລຶກທຸກອາທິດ ແລະ ຮັບໃຊ້ຄົນອື່ນ
ເຈົ້າເຄີຍເຮັດການອາຊະຍາກຳທີ່ຮ້າຍແຮງບໍ? ຖ້າເປັນເຊັ່ນນັ້ນ, ຕອນນີ້ເຈົ້າຢູ່ໃນສະພາບອະນຸໂລມ ຫລື ຖືກປ່ອຍຕົວອອກຈາກຄຸກບໍ?
ເຈົ້າເຄີຍທຳແທ້ງບໍ? (ເບິ່ງ ຄູ່ມືທົ່ວໄປ, 38.6.1.)
ເມື່ອເຈົ້າບັບຕິສະມາ, ເຈົ້າເຮັດພັນທະສັນຍາກັບພຣະເຈົ້າ ວ່າເຈົ້າເຕັມໃຈຮັບເອົາພຣະນາມຂອງພຣະຄຣິດ, ຮັບໃຊ້ຄົນອື່ນ, ຢືນເປັນພະຍານຂອງພຣະເຈົ້າໃນທຸກເວລາ, ແລະ ຮັກສາພຣະບັນຍັດຂອງພຣະອົງຕະຫລອດຊີວິດຂອງເຈົ້າ. ເຈົ້າກຽມພ້ອມທີ່ຈະເຮັດພັນທະສັນຍາ ແລະ ພະຍາຍາມຊື່ສັດຕໍ່ມັນບໍ?

ສຳລັບຄຳແນະນຳຖ້າບຸກຄົນຕອບຄຳຖາມຂໍ້ທີ 5 ຫລື 6 ວ່າ ແມ່ນແລ້ວ, ເບິ່ງ ຄູ່ມືທົ່ວໄປ, 38.2.8.7 ແລະ 38.2.8.8.

ໃຫ້ຄຸ້ນເຄີຍກັບນະໂຍບາຍ ແລະ ແນວທາງຊີ້ນຳຕໍ່ການບັບຕິສະມາ ແລະ ການຢືນຢັນໃນ ຄູ່ມືທົ່ວໄປ, 38.2.8. ນະໂຍບາຍບາງຢ່າງເຫລົ່ານີ້ກ່ຽວຂ້ອງກັບສະຖານະການສະເພາະ ທີ່ທ່ານອາດປະເຊີນ.

ຫລັງຈາກການສຳພາດ, ຜູ້ສອນສາດສະໜາ ແລະ ຜູ້ສະໝັກຈະເຂົ້າຮ່ວມກັບຜູ້ສອນສາດສະໜາຄົນອື່ນອີກຄັ້ງ. ຖ້າຫາກບຸກຄົນພ້ອມແລ້ວສຳລັບການບັບຕິສະມາ, ຜູ້ສອນສາດສະໜາຈະອະທິບາຍສິ່ງທີ່ເກີດຂຶ້ນໃນພິທີບັບຕິສະມາ. ພວກເພິ່ນຍັງອະທິບາຍວ່າ ຕາມປົກກະຕິແລ້ວ ການຢືນຢັນຈະເກີດຂຶ້ນທີ່ກອງປະຊຸມສິນລະລຶກຂອງຫວອດ ບ່ອນທີ່ບຸກຄົນນັ້ນອາໄສຢູ່.

ເມື່ອການບັບຕິສະມາຕ້ອງຖືກເລື່ອນ

ບາງເທື່ອການບັບຕິສະມາຕ້ອງຖືກເລື່ອນ ຍ້ອນຄວາມທ້າທາຍເລື່ອງປະຈັກພະຍານ ຫລື ຄວາມມີຄ່າຄວນ. ເມື່ອສິ່ງນີ້ເກີດຂຶ້ນ, ໃຫ້ຈັດການກັບສະຖານະການຢ່າງລະອຽດອ່ອນ ແລະ ເປັນສ່ວນຕົວ. ຊ່ວຍບຸກຄົນໃຫ້ເຂົ້າໃຈວິທີການກຽມພ້ອມສຳລັບການບັບຕິສະມາໃນວັນໃໝ່ໃນອະນາຄົດ.

ຊຸກຍູ້ບຸກຄົນ ແລະ ໃຫ້ຄວາມຫວັງໃນພຣະຄຣິດ ແລະ ການຊົດໃຊ້ຂອງພຣະອົງ. ຂໍໃຫ້ສະມາຊິກໃຫ້ຄວາມເປັນມິດ. ສືບຕໍ່ສິດສອນຫລັກທຳຂັ້ນພື້ນຖານຂອງພຣະກິດຕິຄຸນ ຈົນກວ່າບຸກຄົນນັ້ນກຽມພ້ອມທີ່ຈະຮັບບັບຕິສະມາ ແລະ ການຢືນຢັນ. ຖ້າຈົນເຖິງເວລານັ້ນໃນການກຳນົດເວລາວັນຮັບບັບຕິສະມາ.

ຄຳຖາມ ແລະ ຄຳຕອບການບັບຕິສະມາ ແລະ ການຢືນຢັນ

ຂ້ອຍຕ້ອງໄດ້ຮັບອະນຸຍາດເພື່ອໃຫ້ບັບຕິສະມາຄົນໄວລຸ້ນຫລືບໍ່? ສາດສະໜາຈັກຫ່ວງໃຍກັບຄວາມຜາສຸກຂອງເດັກນ້ອຍ ແລະ ຄວາມປອງດອງໃນສະພາບແວດລ້ອມຂອງບ້ານເຮືອນຂອງພວກເຂົາ. ຕາມທີ່ກຳນົດໄວ້ໂດຍກົດໝາຍໃນທ້ອງຖິ່ນ, ຄົນໄວລຸ້ນສາມາດຮັບບັບຕິສະມາໄດ້ ຕາມເງື່ອນໄຂສອງຢ່າງດັ່ງຕໍ່ໄປນີ້:

ພໍ່ ຫລື ແມ່ຜູ້ມີສິດຕາມກົດໝາຍ ຫລື ຜູ້ປົກຄອງຕາມກົດໝາຍ ອະນຸຍາດເປັນລາຍລັກອັກສອນ. ເຂົາເຈົ້າຄວນເຂົ້າໃຈທົ່ວໄປກ່ຽວກັບຄຳສອນທີ່ລູກຂອງເຂົາເຈົ້າຈະຖືກສິດສອນ ໃນຖານະສະມາຊິກຂອງສາດສະໜາຈັກ. ເຂົາເຈົ້າກໍຄວນເຕັມໃຈທີ່ຈະສະໜັບສະໜູນລູກໃນການເຮັດ ແລະ ຮັກສາພັນທະສັນຍາແຫ່ງການບັບຕິສະມາ.
ບຸກຄົນທີ່ທຳການສຳພາດຫລິງເຫັນວ່າ ເດັກເຂົ້າໃຈພັນທະສັນຍາແຫ່ງການບັບຕິສະມາ. ເພິ່ນຄວນຮູ້ສຶກໝັ້ນໃຈວ່າ ເດັກຈະພະຍາຍາມຮັກສາພັນທະສັນຍາ ໂດຍການເຊື່ອຟັງພຣະບັນຍັດ, ລວມທັງການເຂົ້າຮ່ວມການປະຊຸມຂອງສາດສະໜາຈັກ.

ຂ້ອຍຕ້ອງໄດ້ຮັບການອະນຸຍາດຈາກຄູ່ຄອງກ່ອນຈະໃຫ້ບັບຕິສະມາແກ່ສາມີ ຫລື ພັນລະຍາຂອງເຂົາເຈົ້າຫລືບໍ່? ແມ່ນແລ້ວ. ບຸກຄົນທີ່ແຕ່ງງານແລ້ວຄວນໄດ້ຮັບການອະນຸຍາດຈາກຄູ່ຄອງຂອງຕົນ ກ່ອນຈະຮັບບັບຕິສະມາ.

ຖ້າຫາກພໍ່ ຫລື ແມ່ໃນຄອບຄົວບໍ່ພ້ອມສຳລັບການບັບຕິສະມາ, ຂ້ອຍຄວນໃຫ້ບັບຕິສະມາສະມາຊິກຄົນອື່ນໆບໍ ຫລື ຕ້ອງລໍຖ້າຈົນກວ່າພໍ່ ຫລື ແມ່ກຽມພ້ອມ? ດີທີ່ສຸດຖ້າຫາກສະມາຊິກໃນຄອບຄົວສາມາດຮັບບັບຕິສະມາພ້ອມກັນ. ເຖິງຢ່າງໃດກໍຕາມ, ຖ້າຫາກຄົນໃດຄົນໜຶ່ງຍັງບໍ່ກຽມພ້ອມ, ບຸກຄົນອື່ນໃນຄອບຄົວສາມາດຮັບບັບຕິສະມາໄດ້ ຕາບໃດທີ່ໄດ້ຮັບການອະນຸຍາດທີ່ຈຳເປັນ.

ຄວນລໍການບັບຕິສະມາໄວ້ກ່ອນບໍ ຈົນກວ່າພໍ່ໄດ້ຮັບຖານະປະໂລຫິດແຫ່ງອາໂຣນ ແລະ ປະຕິບັດການບັບຕິສະມາດ້ວຍຕົວລາວເອງ? ບໍ່. ອ້າຍນ້ອງທີ່ຫາກໍໄດ້ຮັບບັບຕິສະມາຈະບໍ່ໄດ້ຮັບຖານະປະໂລຫິດແຫ່ງອາໂຣນໃນວັນທີ່ເຂົາເຈົ້າຮັບບັບຕິສະມາ. ກ່ອນອື່ນໝົດເຂົາເຈົ້າຕ້ອງໄດ້ຮັບການສຳພາດໂດຍອະທິການ ແລະ ໄດ້ຮັບການແຕ່ງຕັ້ງເປັນສະມາຊິກຂອງສາດສະໜາຈັກ.

ຂ້ອຍຄວນສິດສອນ ແລະ ໃຫ້ບັບຕິສະມາແກ່ບຸກຄົນທີ່ໄດ້ລາອອກຈາກສະມາຊິກກະພາບຂອງສາດສະໜາຈັກບໍ ຫລື ຜູ້ທີ່ສະມາຊິກກະພາບຖືກຖອນບໍ່? ຜູ້ຄົນທີ່ໄດ້ລາອອກຈາກສະມາຊິກກະພາບຂອງສາດສະໜາຈັກ ຫລື ຜູ້ທີ່ສະມາຊິກກະພາບຖືກຖອນ ອາດຖືກຮັບເຂົ້າໂດຍການບັບຕິສະມາ ແລະ ການຢືນຢັນ. ຖ້າຫາກເຂົາເຈົ້າຕ້ອງການຮັບການສິດສອນ, ໃຫ້ປຶກສາກັບຜູ້ນຳຖານະປະໂລຫິດໃນທ້ອງຖິ່ນ ແລະ ປະທານເຜີຍແຜ່ຂອງທ່ານກ່ຽວກັບບົດບາດໃດໆທີ່ທ່ານອາດມີ.

ໃນສະເຕກ, ການຮັບເຂົ້າຄືນໂດຍການບັບຕິສະມາແມ່ນພາຍໃຕ້ການຊີ້ນຳຂອງອະທິການ ຫລື ປະທານສະເຕກ. ໃນເຂດເຜີຍແຜ່, ການຮັບເຂົ້າຄືນແມ່ນພາຍໃຕ້ການຊີ້ນຳຂອງປະທານເຜີຍແຜ່. ຜູ້ນຳເຫລົ່ານີ້ຈະໄດ້ຮັບການນຳພາຈາກຝ່າຍປະທານສູງສຸດຕາມຄວາມຈຳເປັນ. ຜູ້ສອນສາດສະໜາບໍ່ດຳເນີນການສຳພາດບັບຕິສະມາເຫລົ່ານີ້ ຫລື ປະກອບຟອມການບັບຕິສະມາ ແລະ ການຢືນຢັນ. ເຖິງຢ່າງໃດກໍຕາມ, ຜູ້ສອນສາດສະໜາຄົນໜຶ່ງອາດຖືກເຊື້ອເຊີນໃຫ້ປະຕິບັດການບັບຕິສະມາ.

ອະດີດສະມາຊິກຂອງສາດສະໜາຈັກຜູ້ກັບມາເຂົ້າຮ່ວມອີກຄັ້ງບໍ່ແມ່ນຜູ້ປ່ຽນໃຈເຫລື້ອມໃສ. ເຖິງຢ່າງໃດກໍຕາມ, ບາງຄັ້ງຜູ້ສອນສາດສະໜາສາມາດມີບົດບາດທີ່ສຳຄັນ ໃນການຊ່ວຍເຂົາເຈົ້າໃຫ້ຊື່ນຊົມກັບພອນຂອງສະມາຊິກກະພາບຂອງສາດສະໜາຈັກອີກຄັ້ງ.

ຄວນເຮັດແນວໃດຖ້າຫາກບຸກຄົນມີວັນກຳນົດບັບຕິສະມາ ແຕ່ບໍ່ໄດ້ຮັກສາພັນທະສັນຍາ? ລໍນັດສຳພາດການບັບຕິສະມາຈົນກວ່າບຸກຄົນນັ້ນຈະຮັກສາຄຳໝັ້ນສັນຍາ ແລະ ມີຄຸນສົມບັດເໝາະສົມກັບການບັບຕິສະມາ. ເບິ່ງ “ເມື່ອການບັບຕິສະມາຕ້ອງຖືກເລື່ອນ” ໃນບົດນີ້.

ຈະເຮັດແນວໃດຖ້າຫາກຄູ່ຮັກຢາກຮັບບັບຕິສະມາ ແຕ່ເຂົາເຈົ້າຢູ່ກິນນຳກັນ? ຄູ່ຮັກທີ່ຢູ່ກິນນຳກັນນອກການແຕ່ງງານຕາມກົດໝາຍລະຫວ່າງຊາຍ ແລະ ຍິງ ບໍ່ສາມາດຮັບບັບຕິສະມາ ຈົນກວ່າເຂົາເຈົ້າຈະດຳລົງຊີວິດຕາມກົດພົມມະຈັນ. ນີ້ໝາຍເຖິງການບໍ່ຢູ່ນຳກັນອີກຕໍ່ໄປ—ບໍ່ວ່າຈະເປັນຄູ່ຮັກຕ່າງເພດ ຫລື ຄູ່ຮັກເພດດຽວກັນ—ຫລື, ສຳລັບຊາຍ ແລະ ຍິງ, ຊຶ່ງໝາຍເຖິງການແຕ່ງງານ. ມັນກໍຍັງລວມທັງການໃຊ້ສັດທາໄປສູ່ການກັບໃຈ ດັ່ງທີ່ອະທິບາຍໄວ້ໃນ ຄຳສອນ ແລະ ພັນທະສັນຍາ 20:37. ການແຕ່ງງານລະຫວ່າງຊາຍ ແລະ ຍິງ ເປັນສ່ວນຈຳເປັນໃນແຜນຂອງພຣະເຈົ້າ.

ຄຳຖາມຂໍ້ທີ 5 ແລະ 6 ໃນການສຳພາດບັບຕິສະມາຖາມ ຖ້າຫາກບຸກຄົນໄດ້ເຮັດອາຊະຍາກຳທີ່ຮ້າຍແຮງ ຫລື ມີສ່ວນຮ່ວມໃນການແທ້ງລູກ. ຂ້ອຍຄວນເຮັດແນວໃດຖ້າຫາກຄົນໃດຄົນໜຶ່ງຕອບ “ແມ່ນແລ້ວ” ກັບຄຳຖາມຂໍ້ໃດໜຶ່ງເຫລົ່ານີ້? ຖ້າຫາກທ່ານຮູ້ຈັກສະຖານະການໃດໜຶ່ງເຫລົ່ານີ້ລະຫວ່າງການສຳພາດບັບຕິສະມາ, ບໍ່ຕ້ອງຖາມກ່ຽວກັບລາຍລະອຽດ. ບໍ່ຕ້ອງສັນຍາວ່າ ບຸກຄົນຈະຖືກອະນຸຍາດສຳລັບການບັບຕິສະມາ. ແຕ່, ໃຫ້ສະແດງຄວາມຮັກ ແລະ ອະທິບາຍຢ່າງອ່ອນໂຍນວ່າ ຄົນໃດຄົນໜຶ່ງທີ່ວຸດທິພາວະສູງກວ່າ ແລະ ມີປະສົບການຫລາຍກວ່າ ຈະເວົ້າລົມກັບບຸກຄົນນັ້ນ ແລະ ຊ່ວຍເຫລືອ.

ສົ່ງໃບຮ້ອງຂໍການສຳພາດບັບຕິສະມາໄປໃຫ້ປະທານເຜີຍແຜ່ຂອງທ່ານ. ເພິ່ນ ຫລື ທີ່ປຶກສາຄົນໜຶ່ງຂອງເພິ່ນຈະພົບກັບບຸກຄົນນັ້ນ. ເບິ່ງ ຄູ່ມືທົ່ວໄປ, 38.2.8.7 ແລະ 38.2.8.8.

ຂ້ອຍຄວນເຮັດສິ່ງໃດ ຖ້າຫາກບັນທຶກສະມາຊິກກະພາບໄດ້ຖືກສ້າງກ່ອນຂ້ອຍສົ່ງຟອມການບັບຕິສະມາ ແລະ ການຢືນຢັນ? ຕິດຕໍ່ຫາປະທານເຜີຍແຜ່ຂອງທ່ານສຳລັບການແນະນຳ.

ການສຶກສາສ່ວນຕົວ

ຄິດກ່ຽວກັບວິທີທີ່ທ່ານອາດຮູ້ສຶກ ຖ້າຫາກທ່ານກຳລັງຮັບການສຳພາດ. ພິຈາລະນາຄຳຖາມດັ່ງຕໍ່ໄປນີ້, ແລະ ບັນທຶກຄວາມປະທັບໃຈຂອງທ່ານ.

ການສຳພາດເບິ່ງຄືວ່າບໍ່ສະບາຍໃຈຕໍ່ທ່ານແນວໃດ? ຜູ້ສຳພາດຄວນເຮັດຫຍັງ ຫລື ເວົ້າຫຍັງ ເພື່ອໃຫ້ທ່ານຮູ້ສຶກສະບາຍໃຈຂຶ້ນ?
ທ່ານຢາກໃຫ້ຜູ້ສຳພາດທ່ານປະຕິສຳພັນກັບທ່ານໃນທາງໃດ?
ທ່ານຢາກໃຫ້ຜູ້ສຳພາດທ່ານຕອບຮັບແນວໃດ ຖ້າຫາກທ່ານສະແດງຄວາມສົງໄສ ຫລື ບໍ່ເຂົ້າໃຈ ຫລື ຖ້າຫາກທ່ານສາລະພາບບາບອັນຮ້າຍແຮງ?

ພິທີບັບຕິສະມາ

ພິທີບັບຕິສະມາ ແລະ ການຢືນຢັນຄວນເປັນຄວາມສຳຄັນທາງວິນຍານສຳລັບສະມາຊິກໃໝ່. ພິທີບັບຕິສະມາຄວນຖືກກຳນົດເວລາທັນທີທີ່ບຸກຄົນມີຄຸນສົມບັດເໝາະສົມສຳລັບການບັບຕິສະມາ. ອະທິບາຍສິ່ງທີ່ຖືກວາງແຜນ ແລະ ເຫດຜົນ. ສົນທະນາການນຸ່ງຖືທີ່ເໝາະສົມ, ລວມທັງວ່າບຸກຄົນຈະໄດ້ຮັບເຄື່ອງນຸ່ງສີຂາວເພື່ອໃຫ້ໃສ່ສຳລັບການບັບຕິສະມາ.

ພິທີບັບຕິສະມາສຳລັບຜູ້ປ່ຽນໃຈເຫລື້ອມໃສຖືກວາງແຜນພາຍໃຕ້ການນຳພາຂອງອະທິການ. ຜູ້ນຳເຜີຍແຜ່ປະຈຳຫວອດ (ຖ້າຄົນໃດຄົນໜຶ່ງຖືກເອີ້ນ) ຫລື ສະມາຊິກໃນຝ່າຍປະທານກຸ່ມແອວເດີ ຜູ້ນຳພາວຽກງານເຜີຍແຜ່ ຈະວາງແຜນ ແລະ ດຳເນີນພິທີເຫລົ່ານີ້. ລາວປະສານງານກັບຜູ້ສອນສາດສະໜາເຕັມເວລາ. ພິທີບັບຕິສະມາຄວນລຽບງ່າຍ, ສັ້ນ, ແລະ ຍົກລະດັບທາງວິນຍານ.

ເຊື້ອເຊີນສະມາຊິກຄົນໜຶ່ງໃນຝ່າຍອະທິການ, ສະມາຊິກຄົນໜຶ່ງໃນຝ່າຍປະທານສະມາຄົມສະຕີສົງເຄາະ, ແລະ ສະມາຊິກຄົນໜຶ່ງໃນຝ່າຍປະທານກຸ່ມແອວເດີ (ຖ້າຫາກລາວບໍ່ໄດ້ດຳເນີນພິທີ) ໃຫ້ໄປຮ່ວມພິທີບັບຕິສະມາ. ເມື່ອເໝາະສົມ, ໃຫ້ເຊື້ອເຊີນຜູ້ນຳອົງການຕ່າງໆ, ຜູ້ນຳຊາວໜຸ່ມ, ແລະ ອ້າຍນ້ອງ ແລະ ເອື້ອຍນ້ອງຜູ້ປະຕິບັດສາດສະໜາກິດ (ຖ້າຖືກມອບໝາຍ). ເຮັດວຽກກັບບຸກຄົນທີ່ກຳລັງຈະຮັບບັບຕິສະມາ ເພື່ອເຊື້ອເຊີນໝູ່ເພື່ອນ ແລະ ຍາດພີ່ນ້ອງ ເພື່ອໄປຮ່ວມພິທີບັບຕິສະມາ ແລະ ການຢືນຢັນ.

ພິຈາລະນາເຊື້ອເຊີນຄົນອື່ນໆທີ່ທ່ານກຳລັງສິດສອນ. ປະສົບການເຫລົ່ານີ້ຈະຊ່ວຍໃຫ້ເຂົາເຈົ້າຮູ້ສຶກເຖິງພຣະວິນຍານ ແລະ ຮຽນຮູ້ກ່ຽວກັບພຣະກິດຕິຄຸນຫລາຍຂຶ້ນ. ຫລັງຈາກພິທີ, ໃຫ້ຕິດຕາມຜົນເພື່ອສົນທະນາກ່ຽວກັບປະສົບການຂອງເຂົາເຈົ້າ ແລະ ເຊື້ອເຊີນເຂົາເຈົ້າໃຫ້ຮັບການຮຽນຮູ້.

ພິທີບັບຕິສະມາອາດລວມທັງສິ່ງດັ່ງຕໍ່ໄປນີ້:

ດົນຕີກ່ອນພິທີ
ກ່າວຄຳຕ້ອນຮັບສັ້ນໆ ຈາກຜູ້ນຳຖານະປະໂລຫິດຜູ້ດຳເນີນພິທີ (ສະມາຊິກຄົນໜຶ່ງໃນຝ່າຍອະທິການຄວນຄວບຄຸມຖ້າເປັນໄປໄດ້)
ເພງສວດເປີດ ແລະ ການອະທິຖານ
ຂ່າວສານສັ້ນໆ ໜຶ່ງ ຫລື ສອງຢ່າງກ່ຽວກັບຫົວຂໍ້ພຣະກິດຕິຄຸນ, ດັ່ງເຊັ່ນການບັບຕິສະມາ ແລະ ຂອງປະທານແຫ່ງພຣະວິນຍານບໍລິສຸດ
ເພງພິເສດ
ການບັບຕິສະມາ
ຊ່ວງເວລາແຫ່ງຄວາມຄາລະວະ ຂະນະທີ່ຜູ້ມີສ່ວນໃນການບັບຕິສະມາກຳລັງປ່ຽນເຄື່ອງນຸ່ງ. (ເພງສວດ ຫລື ເພງປະຖົມໄວ ອາດຖືກຫລິ້ນ ຫລື ຮ້ອງເພງລະຫວ່າງເວລານີ້. ຫລື ຜູ້ສອນສາດສະໜາສາມາດສະເໜີເລື່ອງພຣະກິດຕິຄຸນສັ້ນໆ.)
ສະແດງປະຈັກພະຍານໂດຍສະມາຊິກໃໝ່, ຖ້າປາດຖະໜາ
ເພງສວດປິດ ແລະ ການອະທິຖານ
ດົນຕີຫລັງພິທີ

ຖ້າຫາກທ່ານກຳນົດເວລາຈັດການບັບຕິສະມາໃນວັນອາທິດ, ໃຫ້ເລືອກເວລາທີ່ຂັດກັບການປະຊຸມໃນວັນອາທິດຕາມປົກກະຕິໃຫ້ໜ້ອຍທີ່ສຸດເທົ່າທີ່ຈະເປັນໄປໄດ້.

ການຢືນຢັນ

ບຸກຄົນຮັບພິທີການຂອງການຢືນຢັນຫລັງຈາກລາວໄດ້ຮັບບັບຕິສະມາແລ້ວ (ເບິ່ງ ຄຳສອນ ແລະ ພັນທະສັນຍາ 20:41). ຜູ້ປ່ຽນໃຈເຫລື້ອມໃສໃໝ່ຖືກພິຈາລະນາວ່າເປັນສະມາຊິກຂອງສາດສະໜາຈັກ ຫລັງຈາກພິທີການແຫ່ງການບັບຕິສະມາ ແລະ ການຢືນຢັນສຳເລັດເສັດສິ້ນ ແລະ ຖືກບັນທຶກໄວ້ຢ່າງຖືກຕ້ອງ.

ການຢືນຢັນແມ່ນພາຍໃຕ້ການຊີ້ນຳຂອງອະທິການ. ເຖິງຢ່າງໃດກໍຕາມ, ເພິ່ນບໍ່ດຳເນີນການສຳພາດແຍກຕ່າງຫາກສຳລັບການຢືນຢັນ.

ເຮັດວຽກງານຢ່າງໃກ້ຊິດກັບອະທິການ ແລະ ຜູ້ນຳເຜີຍແຜ່ປະຈຳຫວອດ (ຖ້າຫາກຄົນໃດຄົນໜຶ່ງຖືກເອີ້ນ) ເພື່ອໃຫ້ແນ່ໃຈວ່າ ຜູ້ປ່ຽນໃຈເຫລື້ອມໃສໃໝ່ໄດ້ຮັບການຢືນຢັນ. ການຢືນຢັນຄວນເກີດຂຶ້ນທັນທີຢ່າງສົມເຫດສົມຜົນຫລັງຈາກການບັບຕິສະມາ, ຈະດີທີ່ສຸດແມ່ນວັນອາທິດຖັດໄປ. ເຖິງຢ່າງໃດກໍຕາມ, ອະທິການສາມາດອະນຸຍາດໃຫ້ມີການຢືນຢັນຢູ່ທີ່ພິທີບັບຕິສະມາເປັນຂໍ້ຍົກເວັ້ນ (ເບິ່ງ ຄູ່ມືທົ່ວໄປ, 18.8).

ຕາມປົກກະຕິແລ້ວ ຜູ້ປ່ຽນໃຈເຫລື້ອມໃສຖືກຢືນຢັນຢູ່ທີ່ກອງປະຊຸມສິນລະລຶກໃນຫວອດທີ່ເຂົາເຈົ້າອາໄສຢູ່. ຕາມປົກກະຕິແລ້ວ ອະທິການຈະເຊື້ອເຊີນແອວເດີຜູ້ສອນສາດສະໜາທີ່ຮັບໃຊ້ໃນຫວອດ ມາຮ່ວມໃນການຢືນຢັນ. ຖ້າຫາກຜູ້ສອນສາດສະໜາຄົນໜຶ່ງປະຕິບັດການຢືນຢັນ, ລາວຕ້ອງໄດ້ຮັບການອະນຸຍາດຈາກປະທານເຜີຍແຜ່ຂອງລາວນຳອີກ (ເບິ່ງ ຄູ່ມືທົ່ວໄປ, 18.8.1). ຢ່າງໜ້ອຍສະມາຊິກຄົນໜຶ່ງໃນຝ່າຍອະທິການເຂົ້າຮ່ວມນຳ.

ສຳເລັດການປະກອບຟອມການບັບຕິສະມາ ແລະ ການຢືນຢັນ

ມັນສຳຄັນທີ່ບັນທຶກສະມາຊິກກະພາບຖືກສ້າງຂຶ້ນຢ່າງທັນທີ ຫລັງຈາກບຸກຄົນໄດ້ຮັບບັບຕິສະມາ ແລະ ການຢືນຢັນ. ກ່ຽວກັບບັນທຶກເຊັ່ນນັ້ນໃນວັນເວລາຂອງເພິ່ນ, ໂມໂຣໄນໄດ້ຂຽນວ່າ ສະມາຊິກໃໝ່ “ຈຶ່ງໄດ້ຖືກນັບເຂົ້າຢູ່ໃນບັນດາຜູ້ຄົນຂອງສາດສະໜາຈັກຂອງພຣະຄຣິດ; ແລະ ຊື່ຂອງເຂົາຖືກຮັບໄວ້, ເພື່ອເຂົາຈະໄດ້ຖືກຈົດຈຳ ແລະ ບຳລຸງລ້ຽງດ້ວຍພຣະຄຳອັນປະເສີດຂອງພຣະເຈົ້າ, ເພື່ອຮັກສາເຂົາຢູ່ໃນທາງທີ່ຖືກຕ້ອງ” (ໂມໂຣໄນ 6:4).

ຂະນະທີ່ທ່ານສິດສອນຄົນໃດຄົນໜຶ່ງທີ່ກຳລັງກຽມຮັບບັບຕິສະມາ, ໃຫ້ເລີ່ມຕົ້ນປະກອບຟອມການບັບຕິສະມາ ແລະ ການຢືນຢັນ ໃນແອັບ Preach My Gospel. ອະທິບາຍວ່າ ຟອມນີ້ຈະຖືກໃຊ້ເພື່ອສ້າງບັນທຶກສະມາຊິກກະພາບ. ບັນທຶກນີ້ຈະບັນຈຸຂໍ້ມູນສຳຄັນກ່ຽວກັບພິທີການທີ່ບຸກຄົນໄດ້ຮັບ. ເມື່ອສະມາຊິກຂອງສາດສະໜາຈັກຍ້າຍບ່ອນຢູ່, ບັນທຶກສະມາຊິກກະພາບຂອງເຂົາເຈົ້າຈະຖືກສົ່ງຕໍ່ໄປໃຫ້ຫວອດໃໝ່ຂອງເຂົາເຈົ້າ ເພື່ອວ່າຜູ້ນຳໃນທ້ອງຖິ່ນ ແລະ ສະມາຊິກຈະສາມາດສະໜັບສະໜູນເຂົາເຈົ້າ.

ທັນທີທີ່ສະມາຊິກໃໝ່ໄດ້ຮັບບັບຕິສະມາ ແລະ ການຢືນຢັນ, ໃຫ້ອັບເດດຟອມດ້ວຍຂໍ້ມູນກ່ຽວກັບແຕ່ລະພິທີການ, ລວມທັງຜູ້ປະຕິບັດພິທີການ. ເມື່ອທ່ານປະກອບຟອມແລ້ວ, ໃຫ້ບັນທຶກຂໍ້ມູນໄວ້ໃນແອັບ Preach My Gospel ແລະ ສົ່ງມັນໄປໃຫ້ສະໝຽນຫວອດທາງອີເລັກໂທຣນິກ. ທັນທີທີ່ສະໝຽນໄດ້ຮັບຟອມ, ລາວຈະກວດເບິ່ງ ແລະ ສ້າງບັນທຶກສະມາຊິກກະພາບ.

ຫລັງຈາກບັນທຶກສະມາຊິກກະພາບໄດ້ຖືກສ້າງ, ສະໝຽນຈະກຽມໃບຢັ້ງຢືນການບັບຕິສະມາ ແລະ ການຢືນຢັນ. ໃບຢັ້ງຢືນນີ້ຈະຖືກເຊັນໂດຍອະທິການ ແລະ ມອບມັນໃຫ້ບຸກຄົນ.

ຊື່ ແລະ ເພດ ຢູ່ໃນບັນທຶກສະມາຊິກກະພາບຄວນກົງກັບຢູ່ໃນໃບຢັ້ງຢືນການເກີດຂອງບຸກຄົນ, ທະບຽນການເກີດຂອງພົນລະເມືອງ, ຫລື ຊື່ຕາມກົດໝາຍໃນປະຈຸບັນ.

ການສຶກສາສ່ວນຕົວ ຫລື ກັບຄູ່ສອນ

ສຶກສາ ໂມໄຊຢາ 6:1–3 ແລະ ໂມໂຣໄນ 6:1–4. ຂໍ້ພຣະຄຳພີເຫລົ່ານີ້ກ່ຽວຂ້ອງກັບການຮັກສາບັນທຶກຂອງການບັບຕິສະມາ ແລະ ການຢືນຢັນໃຫ້ຖືກຕ້ອງແນວໃດ?

ຫລັງຈາກການບັບຕິສະມາ ແລະ ການຢືນຢັນ

ສືບຕໍ່ປະຕິບັດສາດສະໜາກິດ

ສືບຕໍ່ຜູກມິດ ແລະ ສະໜັບສະໜູນສະມາຊິກໃໝ່ ຫລັງຈາກເຂົາເຈົ້າຮັບບັບຕິສະມາ ແລະ ການຢືນຢັນ. ຊ່ວຍເຂົາເຈົ້າໃຫ້ໄປໂບດ ແລະ ສ້າງຄວາມສຳພັນກັບສະມາຊິກ. ອ່ານພຣະຄຳພີມໍມອນກັບເຂົາເຈົ້າ, ແລະ ຊ່ວຍເຂົາເຈົ້າໃຫ້ແບ່ງປັນພຣະກິດຕິຄຸນກັບສະມາຊິກໃນຄອບຄົວ ແລະ ໝູ່ເພື່ອນ. ແນະນຳເຂົາເຈົ້າຕໍ່ປຶ້ມນ້ອຍ My Covenant Path. ສືບຕໍ່ການໃຊ້ແອັບ Preach My Gospel ເພື່ອບັນທຶກຄວາມກ້າວໜ້າຂອງເຂົາເຈົ້າ, ດັ່ງເຊັ່ນການເຂົ້າຮ່ວມກອງປະຊຸມສິນລະລຶກ ແລະ ບົດຮຽນທີ່ເຂົາເຈົ້າໄດ້ຮັບ.

ຫລັງຈາກການຢືນຢັນ, ໃຫ້ສິດສອນບົດຮຽນຂອງຜູ້ສອນສາດສະໜາຄືນອີກ. ທ່ານນຳພາການສິດສອນ. ເຖິງຢ່າງໃດກໍຕາມ, ໃຫ້ປະສານງານກັບຜູ້ນຳໃນຫວອດ ເພື່ອວ່າຜູ້ສອນສາດສະໜາປະຈຳຫວອດ ຫລື ສະມາຊິກຄົນອື່ນໆຈະສາມາດເຂົ້າຮ່ວມ. ຂະນະທີ່ທ່ານສິດສອນ, ຊຸກຍູ້ສະມາຊິກໃໝ່ໃຫ້ຮັກສາຄຳໝັ້ນສັນຍາທັງໝົດຢູ່ໃນບົດຮຽນ.

ໃນການປະຊຸມປະສານງານປະຈຳອາທິດ, ໃຫ້ປຶກສາກ່ຽວກັບວ່າ ສະມາຊິກຈະສາມາດສະໜັບສະໜູນຜູ້ປ່ຽນໃຈເຫລື້ອມໃສໃໝ່ ແລະ ຊ່ວຍໃຫ້ເຂົາເຈົ້າເຂັ້ມແຂງໃນສາດສະໜາຈັກຕໍ່ໄປໄດ້ແນວໃດ. ວາງແຜນວ່າໃຜຈະແນະນຳເຂົາເຈົ້າໃຫ້ຮູ້ຈັກຜູ້ນຳກຸ່ມ ຫລື ຜູ້ນຳອົງການ. ປະສານງານການມີສ່ວນຮ່ວມຂອງສະມາຊິກຄົນອື່ນໆ ຂະນະທີ່ທ່ານສິດສອນບົດຮຽນຄືນອີກ. ຂໍໃຫ້ມອບໝາຍບາງຄົນເປັນອ້າຍນ້ອງຜູ້ປະຕິບັດສາດສະໜາກິດ (ແລະ ເອື້ອຍນ້ອງຜູ້ປະຕິບັດສາດສະໜາກິດສຳລັບຜູ້ຍິງ).

ຫລັງຈາກຜູ້ຊາຍໄດ້ຮັບການຢືນຢັນແລ້ວ, ລາວກໍເໝາະສົມທີ່ຈະໄດ້ຮັບຖານະປະໂລຫິດແຫ່ງອາໂຣນ ຖ້າຫາກເຂົາເຈົ້າຈະມີອາຍຸຢ່າງໜ້ອຍ 12 ປີ ໃນທ້າຍປີ. ພິທີການແຕ່ງຕັ້ງຂອງຖານະປະໂລຫິດແຫ່ງອາໂຣນແມ່ນຢູ່ພາຍໃຕ້ການຊີ້ນຳຂອງອະທິການ (ເບິ່ງ ຄູ່ມືທົ່ວໄປ, 38.2.9.1).

ຕາມຄວາມເໝາະສົມ, ໃຫ້ຕິດຕໍ່ຫາຜູ້ທີ່ທ່ານໄດ້ສິດສອນຕະຫລອດຊີວິດຂອງທ່ານ. ສະໜັບສະໜູນເຂົາເຈົ້າໃນການຮັບພອນທັງໝົດແຫ່ງພຣະກິດຕິຄຸນຂອງພຣະເຢຊູຄຣິດ.

“ເມື່ອເຮົາມາພ້ອມດ້ວຍຫົວໃຈທີ່ຊອກຊ້ຳ ແລະ ວິນຍານທີ່ສຳນຶກຜິດ, ເຮົາສາມາດພົບເຫັນສຸລະສຽງໃນພຣະເຢຊູຄຣິດ, ແລະ ຖືກໂອບກອດໄວ້ໃນອ້ອມແຂນທີ່ປອດໄພຂອງພຣະອົງ. ພິທີການສັກສິດສະເໜີມອບພັນທະສັນຍາຂອງການໄດ້ເປັນພາກສ່ວນ ແລະ ‘ອຳນາດຂອງຄວາມເປັນເໝືອນພຣະເຈົ້າ’ [ຄຳສອນ ແລະ ພັນທະສັນຍາ 84:20]. ດ້ວຍພຣະກະລຸນາທິຄຸນທີ່ຊົງຮັກ ແລະ ການອົດກັ້ນຂອງພຣະອົງ, ສາດສະໜາຈັກຂອງພຣະອົງກາຍເປັນໂຮງແຮມຂອງພຣະອົງ” (Gerrit W. Gong, “Room in the Inn,” Liahona, May 2021, 27).

ຊ່ວຍໃຫ້ສະມາຊິກໃໝ່ມີສ່ວນຮ່ວມໃນພອນຂອງພຣະວິຫານ

ສະມາຊິກໃໝ່ຕາມອາຍຸທີ່ເໝາະສົມອາດໄດ້ຮັບໃບຮັບຮອງເຂົ້າພຣະວິຫານ ເພື່ອຮັບບັບຕິສະມາແທນສະມາຊິກໃນຄອບຄົວທີ່ລ່ວງລັບໄປແລ້ວຂອງເຂົາເຈົ້າ (ເບິ່ງ ຄູ່ມືທົ່ວໄປ, 26.4.2). ເຂົາເຈົ້າໄດ້ຮັບໃບຮັບຮອງນີ້ຈາກອະທິການ. ຊຸກຍູ້ ແລະ ຊ່ວຍໃຫ້ສະມາຊິກໃໝ່ໄດ້ຮັບໃບຮັບຮອງເຂົ້າພຣະວິຫານທັນທີທີ່ສົມເຫດສົມຜົນ. ຖ້າຫາກມີພຣະວິຫານຢູ່ໃກ້, ໃຫ້ພິຈາລະນາສະເໜີຄຳເຊື້ອເຊີນສຳລັບເວລາໃດໜຶ່ງສະເພາະ ເພື່ອໃຫ້ສະມາຊິກໃໝ່ປະຕິບັດການບັບຕິສະມາແທນບັນພະບຸລຸດທີ່ລ່ວງລັບໄປແລ້ວ.

ໃນການປະຊຸມປະສານງານປະຈຳອາທິດ, ໃຫ້ວາງແຜນວ່າໃຜຈະແນະນຳສະມາຊິກໃຫ້ຮູ້ຈັກກັບຜູ້ນຳຝ່າຍພຣະວິຫານ ແລະ ປະຫວັດຄອບຄົວຂອງຫວອດ. ຜູ້ນຳຄົນນີ້ສາມາດຊ່ວຍໃຫ້ເຂົາເຈົ້າກຽມພ້ອມທີ່ຈະຮັບພອນຂອງພຣະວິຫານ ໂດຍການເຮັດພັນທະສັນຍາພຣະວິຫານສຳລັບຕົນເອງ.

ຈື່ຈຳສິ່ງນີ້

ໃຫ້ແນ່ໃຈວ່າ ຜູ້ສະໝັກມີຄຸນສົມບັດສຳລັບການບັບຕິສະມາ ແລະ ການຢືນຢັນ.
ຊ່ວຍໃຫ້ຜູ້ສະໝັກຮັບບັບຕິສະມາກຽມພ້ອມສຳລັບການສຳພາດບັບຕິສະມາ.
ຊ່ວຍເຮັດໃຫ້ພິທີບັບຕິສະມາເປັນການຍົກລະດັບທາງວິນຍານ.
ປະກອບ ແລະ ສົ່ງຟອມການບັບຕິສະມາ ແລະ ການຢືນຢັນ.
ສືບຕໍ່ສະໜັບສະໜູນ ແລະ ສິດສອນສະມາຊິກໃໝ່ຫລັງຈາກການບັບຕິສະມາ.

ແນວຄິດສຳລັບການສຶກສາ ແລະ ການນຳໃຊ້

ການສຶກສາສ່ວນຕົວ

ຂຽນລາຍການ ການທ້າທາຍທີ່ຜູ້ສະໝັກຮັບບັບຕິສະມາອາດປະເຊີນ. ເປັນຫຍັງມັນຈຶ່ງສຳຄັນທີ່ບຸກຄົນຮູ້ສຶກເຖິງຄວາມຮັກ ແລະ ມິດຕະພາບຂອງສະມາຊິກຂອງສາດສະໜາຈັກ?
ສຶກສາ ໂມໂຣໄນ 6 ແລະ ຄຳສອນ ແລະ ພັນທະສັນຍາ 20:68–69. ທ່ານຮຽນຮູ້ຫຍັງແດ່ຈາກຂໍ້ພຣະຄຳພີເຫລົ່ານີ້ ກ່ຽວກັບການຊ່ວຍກະກຽມສຳລັບການບັບຕິສະມາ ແລະ ການຢືນຢັນ? ຂຽນສິ່ງທີ່ທ່ານຮຽນຮູ້. ແບ່ງປັນຄວາມຄິດຂອງທ່ານກັບຄູ່ສອນຂອງທ່ານລະຫວ່າງການສຶກສາກັບຄູ່ສອນ.

ການສຶກສາກັບຄູ່ສອນ ແລະ ການສັບປ່ຽນຄູ່ສອນ

ປະທານເຮັນຣີ ບີ ຮິງລີ ໄດ້ອະທິບາຍວ່າ ເປັນຫຍັງມາດຕະຖານພຣະກິດຕິຄຸນຈຶ່ງສຳຄັນ. ສົນທະນາຄຳແນະນຳດັ່ງຕໍ່ໄປນີ້. ທ່ານຈະສາມາດຊຸກຍູ້ຜູ້ຄົນໃຫ້ມີຄວາມປາດຖະໜາທີ່ຈະປະຕິບັດຕາມມາດຕະຖານເຫລົ່ານີ້ໄດ້ແນວໃດ?

“ພຣະຜູ້ເປັນເຈົ້າຕັ້ງມາດຕະຖານຂອງພຣະອົງເພື່ອວ່າພຣະອົງຈະສາມາດອວຍພອນເຮົາ. ຄິດກ່ຽວກັບພອນເຫລົ່ານັ້ນ: ພຣະອົງສັນຍາຜູ້ທີ່ປະຕິບັດຕາມມາດຕະຖານ ວ່າຈະໄດ້ຮັບຄວາມຊ່ວຍເຫລືອຈາກພຣະວິນຍານບໍລິສຸດ. ພຣະອົງສັນຍາຄວາມສະຫງົບສຸກສ່ວນຕົວ. ພຣະອົງສັນຍາໂອກາດທີ່ຈະໄດ້ຮັບພິທີການສັກສິດໃນບ້ານຂອງພຣະອົງ. ແລະ ພຣະອົງສັນຍາຜູ້ທີ່ອົດທົນໃນການດຳລົງຊີວິດຕາມມາດຕະຖານຂອງພຣະອົງ ວ່າເຂົາເຈົ້າຈະໄດ້ຮັບຊີວິດນິລັນດອນ. …

“ຍ້ອນເຮົາຮັກຜູ້ຄົນທີ່ເຮົາຮັບໃຊ້, ເຮົາທຸກຄົນຈຶ່ງຕ້ອງການທີ່ຈະເຮັດໃຫ້ດີຂຶ້ນໃນການຍົກລະດັບລູກໆຂອງພຣະບິດາເທິງສະຫວັນ ເຖິງຄວາມຊື່ສັດ ແລະ ຄວາມບໍລິສຸດ ທີ່ເຂົາເຈົ້າຕ້ອງການ ເພື່ອຈະໄດ້ຮັບພອນຂອງພຣະຜູ້ເປັນເຈົ້າ. …

“… ທ່ານເລີ່ມຕົ້ນໂດຍການຍຶດຖືໃນມາດຕະຖານຂອງພຣະຜູ້ເປັນເຈົ້າຢ່າງແຈ້ງຊັດ ແລະ ປາດສະຈາກການຂໍອະໄພ. ແລະ ຍິ່ງໂລກເຫີນຫ່າງຈາກມາດຕະຖານນັ້ນ ແລະ ເຍາະເຍີ້ຍມັນຫລາຍຂຶ້ນເທົ່າໃດ, ເຮົາຍິ່ງຕ້ອງກ້າຫານໃນການເຮັດສິ່ງນັ້ນຫລາຍຂຶ້ນເທົ່ານັ້ນ” (“Standards of Worthiness,” First Worldwide Leadership Training Meeting, Jan. 2003, 10–11).
ທົບທວນຄຳຖາມການສຳພາດບັບຕິສະມາ. ພິຈາລະນາວ່າທ່ານຈະຈັດການກັບສະຖານະການເຊັ່ນດັ່ງຕໍ່ໄປນີ້ແນວໃດ:
- ບຸກຄົນນັ້ນບໍ່ໄດ້ບອກທ່ານວ່າລາວຖືກອະນຸໂລມສຳລັບການອາຊະຍາກຳ.
- ບຸກຄົນນັ້ນຍັງບໍ່ໄດ້ຮັບຄຳຕອບຕໍ່ຄຳອະທິຖານວ່າ ໂຈເຊັບ ສະມິດ ເປັນສາດສະດາ.
- ບຸກຄົນນັ້ນໄດ້ສູບຢາໃນສອງມື້ກ່ອນ.
- ບຸກຄົນນັ້ນບໍ່ແນ່ໃຈວ່າ ລາວໄດ້ຮັບຄຳຕອບຕໍ່ຄຳອະທິຖານຂອງລາວ.
- ຄອບຄົວນັ້ນໄດ້ຮັບການກົດດັນຈາກໝູ່ເພື່ອນ ແລະ ບໍ່ແນ່ໃຈວ່າເຂົາເຈົ້າພ້ອມສຳລັບການບັບຕິສະມາຫລືບໍ່.
ທົບທວນຟອມການບັບຕິສະມາ ແລະ ການຢືນຢັນ. ເປັນຫຍັງຂໍ້ມູນທີ່ທ່ານໃຫ້ໄວ້ຈຶ່ງຄວນຖືກຕ້ອງ ແລະ ຄົບຖ້ວນ?

ສະພາທ້ອງຖິ່ນ, ກອງປະຊຸມອະນາເຂດ, ແລະ ສະພາຜູ້ນຳເຂດເຜີຍແຜ່

ທົບທວນຄວາມສຳຄັນຂອງການສຳພາດບັບຕິສະມາ. ສົນທະນາວິທີທີ່ຜູ້ສອນສາດສະໜາສາມາດຊ່ວຍຜູ້ຄົນກຽມພ້ອມສຳລັບການສຳພາດ.
ສົນທະນາວິທີທີ່ຈະໃຊ້ພິທີບັບຕິສະມາ ແລະ ການຢືນຢັນໃຫ້ເປັນໂອກາດຊອກຫາ.

ຜູ້ນຳເຜີຍແຜ່ ແລະ ທີ່ປຶກສາເຜີຍແຜ່

ເຮັດວຽກງານກັບຜູ້ນຳຖານະປະໂລຫິດ ແລະ ຜູ້ນຳອົງການໃນທ້ອງຖິ່ນ ເພື່ອໃຫ້ແນ່ໃຈວ່າ ເຂົາເຈົ້າກຳລັງໃຊ້ Covenant Path Progress report ຢ່າງມີປະສິດທິພາບ.
ສິດສອນຜູ້ນຳທ້ອງຖິ່ນ, ຜູ້ນຳອະນາເຂດ, ແລະ ຊິດສະເຕີຜູ້ນຳການຝຶກອົບຮົມ ກ່ຽວກັບວິທີກຽມຜູ້ຄົນສຳລັບການສຳພາດບັບຕິສະມາ. ເຊື້ອເຊີນເຂົາເຈົ້າໃຫ້ຝຶກອົບຮົມຜູ້ສອນສາດສະໜາຄົນອື່ນໆ ເພື່ອກຽມຜູ້ຄົນສຳລັບການສຳພາດ.
ສິດສອນຜູ້ນຳທ້ອງຖິ່ນ ແລະ ຜູ້ນຳອະນາເຂດວິທີດຳເນີນການສຳພາດບັບຕິສະມາ.
ສິດສອນວິທີຕອບຮັບໃນການສຳພາດບັບຕິສະມາ ເມື່ອຄົນໃດຄົນໜຶ່ງເປີດເຜີຍວ່າ ເຂົາໄດ້ເຮັດບາບອັນຮ້າຍແຮງ.
ເມື່ອເປັນໄປໄດ້, ໃຫ້ໄປຮ່ວມພິທີບັບຕິສະມາສຳລັບສະມາຊິກໃໝ່. ເວົ້າລົມກັບສະມາຊິກໃໝ່ ແລະ ຮຽນຮູ້ກ່ຽວກັບປະສົບການ ການປ່ຽນໃຈເຫລື້ອມໃສຂອງເຂົາເຈົ້າ. ແບ່ງປັນສິ່ງທີ່ທ່ານຮຽນຮູ້ກັບຄູ່ສອນຂອງທ່ານ ແລະ ກັບຜູ້ສອນສາດສະໜາ.