“Japta 10: Tij blong Bildimap Fet long Jisas Kraes,” Prijim Gospel blong Mi: Wan Gaed blong Serem Gospel blong Jisas Kraes (2023)

“Japta 10,” Prijim Gospel blong Mi

Japta 10

Tij blong Bildimap Fet long Jisas Kraes

Tingting long Hemia

?Olsem wanem mi save tij tru long Spirit?
?Olsem wanem mi save tij long ol skripja?
?Olsem wanem mi save serem testemoni blong mi taem mi stap tij?
?Olsem wanem mi save mekem plan mo arenjem gud tijing blong mi blong mitim nid blong pipol?
?Olsem wanem mi save askem ol gudfala kwestin mo stap olsem wan we i save lisin gud?
?Olsem wanem mi save helpem pipol blong faenem ol ansa blong ol kwestin blong olgeta mo kasem gaed mo paoa?

Oli singaotem yu blong tijim gospel blong Jisas Kraes we i kambak long plante pipol we bae oli akseptem yu. Tijing i stamba wok blong evri samting we yu stap mekem. Taem yu putum tras blong yu long Lod, Hem i promes:

“Mo long weaples we eniwan i akseptem yufala, ples ia bae mi stap long hem tu, from we bambae mi go long fored blong yufala. Bambae mi stap long raet han blong yufala, mo long lef blong yufala,mo Spirit blong mi bambae i stap insaed long hat blong yufala, mo ol enjel blong mi oli stap raonem yufala, blong sapotem yufala” (Doktrin mo Ol Kavenan 84:88).

Prea, stadi, mo praktis blong mekem fasin blong yu blong tij i kam moa gud. Folem ol prinsipol blong japta ia mo ol nara japta blong buk ia. Lukaotem presen blong save tij wetem hat blong yu, mekem se yu save blesem laef blong ol narafala man mo givim glori long God. Lod bae i helpem yu blong tij wetem paoa mo atoriti sapos yu traehad blong lukaotem Hem mo lanem ol toktok blong Hem.

Lukaotem blong Tij Olsem Sevya I Stap Tij

Long taem blong ministri blong Hem long wol ia, Jisas “i stap wokbaot long olgeta ples … tijim ol man … , talemaot gud nius … , mo i stap mekem olgeta man we oli sik, oli gud bakegen” (Matiu 4:23). Hem i stap tij long plante ples—long ol haos blong prea, long haos blong ol man, mo long rod. Hem i bin tij long bigfala grup blong ol man mo storian long wanwan man. Sam long ol taem blong Hem we i spendem wetem ol man, i sot nomo mo i gat paoa o long sam wei we i neva stap hapen. Hem i laef folem ol toktok we Hem i stap tijim.

Sevya i tijim wanwan man o woman folem wanwan nid blong olgeta. Eksampol, taem i givim seves long man we haf bodi blong hem i ded, Hem i fogivim ol sin blong hem mo i hilim hem (luk long Mak 2:1–12). Taem i givhan long wan woman we i bin komitim adaltri, Hem i protektem hem mo invaetem hem blong no moa mekem sin (luk long Jon 8:2–11). Taem Hem i toktok wetem rijman we i wantem blong kasem laef we i no save finis, Hem i “lavem hem” nating we yang man ia i no akseptem invitesen blong Hem blong folem Hem (Mak 10:21; luk long ol ves 17–21).

Yu save mekem tijing blong yu i kam gud moa, taem yu lanem olsem wanem Sevya i bin stap tij. Eksampol, Hem i lavem Papa mo olgeta we Hem i stap tijim . Hem i stap prea oltaem. Hem i tijim ol samting we i stap long skripja. Hem i stap rere long saed blong spirit. Hem i askem ol kwestin we i gat insperesen. Hem i invaetem ol pipol blong laef folem fet. Hem i komperem ol prinsipol blong gospel long evri dei laef.

Stap lukaotem blong tij olsem Sevya i stap tij i wan samting we yu save folem long ful laef blong yu. Bae i kam long yu tijing folem tijing taem yu folem Hem (luk long 2 Nifae 28:30; Ita 12:41).

“Lukaot blong Kasem Toktok blong Mi”

Blong tijim gospel blong Jisas Kraes, yu nid blong save stamba doktrin mo ol prinsipol. Yu nidim save long saed blong spirit mo kasem toktok blong Spirit se ol trutok blong gospel ia oli tru. Lod i talem, “No lukaot blong talemaot toktok blong mi, be fastaem, lukaot blong kasem toktok blong mi.”

Blong “kasem” toktok blong Lod i minim blong stadi long hem mo letem i draon dip insaed long hat blong yu. Sapos yu traehad blong mekem olsem, Hem i promes, “nao bae tang blong yu i fri; afta, sapos yu wantem, bambae yu gat Spirit blong mi mo toktok blong mi, yes, paoa blong God blong winim tingting blong man” (Doktrin mo Ol Kavenan 11:21).

Lod i talem tu blong “oltaem holemtaet long maen blong yufala, ol toktok blong laef” (Doktrin mo Ol Kavenan 84:85). Taem yu stap holemtaet ol toktok blong Lod oltaem, bae i mekem save blong yu i kam bigwan mo mekem testemoni blong yu i kam strong. Tingting blong hat blong yu mo fasin blong yu blong serem gospel tu bae i gro kam antap. (Luk long Jekob 4:6–7; Alma 32:27–42; 36:26; 37:8–9.)

Prea oltaem blong kasem mo holemtaet toktok blong Lod tru long stadi long ol skripja, ol toktok blong profet we oli stap laef, mo ol lesen long japta 3.

Tij wetem Spirit

Gospel blong Jisas Kraes i “paoa blong God blong sevem olgeta man we oli biliv long hem” (Rom 1:16). From risen ia, mesej blong restoresen blong gospel ia i nid blong oli tijim wetem paoa we i tabu—paoa blong Tabu Spirit.

Hem i impoten blong yu developem ol skil blong tij. I impoten tu blong yu lanem doktrin mo ol prinsipol we yu stap tijim. Be taem yu stap tijim ol trutok long saed blong spirit, yu no stap dipen plante long save blong yu mo tingting se yu save mekem yuwan.

Oli tijim ol trutok long saed blong spirit tru long paoa blong Tabu Spirit. Lod i talem, “Mo bae mi givim Spirit long yufala tru long prea blong fet; mo sapos yufala i no kasem Spirit, bae yufala i no save tij.” (Doktrin mo Ol Kavenan 42:14; luk tu long Doktrin mo Ol Kavenan 50:13–14, 17–22).

Wanem I Minim blong Tij Wetem Spirit

Taem yu tij wetem Spirit, yu prea blong gat paoa blong Tabu Spirit long tijing blong yu. Yu prea tu se pipol bae i kasem ol trutok ia tru long Spirit. Sam trutok oli save traem tijim long wei we man bae i save andastanem klia, be blong man i konvet, oli nidim blong gat eksperiens wetem Spirit (luk long Doktrin mo Ol Kavenan 8:2–3).

Mekem yu rere blong stap olsem wan tul blong Spirit i save tij tru long yu. Tingting long tabu Spirit olsem kompanion blong yu long ol tijing blong yu.

Dipen long Spirit blong helpem yu save wanem blong talem. Bae hem i karem doktrin we yu stadi long hem i kambak long maen blong yu. Bae hem i helpem yu mekem plan mo arenjem gud wanem yu stap tijim i go wetem nid blong man o woman we yu tijim.

Taem yu tij wetem spirit, bae Hem i karem mesej blong yu i go long hat blong ol pipol. Bae hem i konfemem mesej blong yu taem yu talemaot testemoni blong yu. Yu mo olgeta we oli kasem wanem yu tijim wetem Spirit bae yufala i harem gud, andastanem wanwan long yufala, mo glad tugeta. (Luk long 2 Nifae 33:1; Doktrin mo Ol Kavenan 50:13–22.)

“Spirit i wan impoten tul long wok ia. Sapos yu givim seves long misinari wok blong yu wetem Spirit, bae yu save mekem merikel blong Lod long misin fil. Sapos yu no gat Spirit, bae yu neva gat sakses no mata sapos yu gat talen mo paoa blong save mekem wok” (Ezra Taft Benson, seminar for new mission presidents, June 25, 1986).

Promes blong Koling blong Yu

Yu kasem wan koling mo oli setem yu apat “blong prijim gospel folem Spirit, we i Spirit blong Givhan we mi bin sendem i kam blong tijim trutok” (Doktrin mo Ol Kavenan 50:14). Sam taem bae yu filim se yu fraet smol o yu filim se yu no save gud. Maet yu wari se yu no gat inaf save o se yu no gat inaf eksperiens.

Papa blong yu long Heven, we i save gud long yu, i kolem yu from wanem yu save mekem o givim olsem wan man we i komitim hem blong folem Jisas Kraes. Bae Hem i neva fogetem yu. Gat tras se Spirit bae i mekem paoa blong yu blong wok i kam moa bigwan mo bae i tijim trutok long olgeta we oli akseptem yu.

Elda Neil L. Andersen i talem: “taem mi stap tingting long jalenj ia blong go long wan misin, mi filim se mi no naf mo mi no rere. Mi tingbaot se mi stap prea: ‘Papa long Heven. ?Olsem wanem bae mi go givim seves long wan misin taem mi save smol samting nomo?’ Mi bin biliv long Jos, be tu, mi bin filim se save blong mi long saed blong spirit i bin smol tumas. Taem mi bin stap prea, filing ia i bin kam: ‘Yu no save evri samting, !be yu save inaf!’ Glad toktok ia i givim mi strong paoa long tingting blong tekem nekis step ia blong go long misin fil” (“You Know Enough,” Liahona, Nov. 2008, 13).

Invaetem Spirit Taem Yu Statem Tijing

Ol Fasfala smolsmol taem wetem pipol i impoten tumas. Stap kaen mo soem respek. Soem tru intres mo lav. Lukaotem ol wei blong kasem tras blong olgeta. Wan wei blong kasem tras hem i taem we pipol i filim Spirit i stap wetem yu.

Askem sam simpol kwestin blong helpem yu andastanem bakgraon blong olgeta mo letem oli save abaot ol visit blong yu. Lisin gud.

Bifo yu stat, invaetem evriwan we oli stap blong joen long lesen. Leftemap tingting blong olgeta blong karemaot ol samting we i pulumaot tingting blong olgeta mekem se oli save filim Spirit blong Lod.

Eksplenem se yu wantem blong statem mo endem evri lesen wetem prea. Talem se yu bae i givim opening prea. Prea simpol nomo mo wetem tru tingting se God bae i blesem pipol we yu stap tijim long evri samting oli stap mekem long laef. Prea se bae oli filim trutok long wanem bae yu tijim. Tingbaot se “tru prea blong wan stret man o woman i save karem plante frut” (Jemes 5:16).

Gat fet long paoa blong Tabu Spirit blong jenisim laef blong man. Olsem we Spirit i lidim yu, yu save talem ol tingting olsem olgeta ia, taem yu stat blong tij:

God i Papa blong yumi long Heven we i lavem yumi. Yumi evriwan i ol brata mo sista. Hem i wantem yumi blong eksperiensem glad.
Yumi evriwan i gat ol hadtaem mo ol traehad. Nomata long wanem yu stap go tru long hem, Jisas Kraes mo tijing blong Hem bae i save helpem yu. Hem i save helpem yu faenem pis, hop, hiling, mo hapines. Jisas i save helpem yu blong gat bigfala paoa blong fesem ol hadtaem blong laef.
Yumi evriwan i mekem ol mistek, we i save krietem filing blong stap gilti, sem, mo rigret. Ol filing oli save go lus nomo sapos yu sakem sin mo lukaotem fogivnes we i kam long God. Tru long Atonmen blong Jisas Kraes nomo yumi save kasem ful hiling from ol sin blong yumi.
Bae mifala i stap olsem ol gaed, blong yu save lanem ol trutok blong ol mesej blong mifala blong yuwan. Bae mifala i invaetem yu blong mekem sam samting olsem, blong stap rid, stap prea, mo stap atendem jos. Rol blong mifala i blong helpem yu wok long ol invitesen ia o eksplenem ol blesing we yu save kasem. Plis askem ol kwestin.
Wan profet blong God i bin sendem mifala long ples ia blong serem wanem mifala i save. Mifala i save we mesej blong mifala i tru.
Bae mifala i tijim yu olsem wanem blong mekem ol kavenan, o spesel promes, wetem God. Ol kavenan ia bae oli konektem yu wetem God mo mekem yu kasem glad, paoa, mo ol spesel promes we i kam long Hem.
Bae yu lanem olsem wanem blong mekem ol jenis long laef blong yu mo folem Jisas Kraes mo ol tijing blong Hem. Wan impoten tijing blong Jisas Kraes, mo fasfala kavenan we yumi mekem, i blong folem eksampol blong Hem mo kasem baptaes tru long raet atoriti (luk long Jon 3:5; Doktrin mo Ol Kavenan 22).

Bifo yu tijim wan lesen, tokbaot long sot toktok nomo, ful samting we bae yu tijim. Helpem pipol blong luk olsem wanem oli save harem save ol toktok ia. Eksampol, yu maet talem, “Mifala i stap ia blong serem mesej ia se Jisas Kraes i bin stanemap Jos blong Hem long wol ia tedei mo i bin kolem ol profet we oli stap laef blong lidim yumi.” O yu save talem, “Mifala i stap ia blong helpem yu save se God i lavem yu mo Hem i gat wan plan blong mekem yu yu glad.”

Evri pipol bae oli kasem blesing taem oli akseptem mo laef folem gospel blong Jisas Kraes. Maet Papa long Heven i mekem olgeta we yu faenem oli rere gud long saed blong spirit (luk long Alma 16:16–17).

Invaetem spirit mo serem trutok long fas miting bae i helpem ol pipol blong luksave se yufala ol wokman blong Lod.

Stadi blong Yuwan o Kompanion Stadi

Yusum ol tingting long seksen ia blong praktisim ol defren wei blong statem wan lesen.

Yusum ol skripja

Ol standet wok blong Jos oli stamba tul we bae yu yusum blong tijim gospel blong Jisas Kraes we i kambak. I gat plante risen from wanem hem i impoten blong mas yusum ol skripja olsem ol impoten tul long tijing blong yu. Eksampol:

Ol skripja oli invaetem Tabu Spirit i kam long tijing blong yu (luk long Luk 24:13–32).
Ol skripja oli gat moa bigfala paoa long tingting blong ol pipol bitim eni narafala samting (luk long Alma 31:5).
Ol skripja oli tokbaot ol bigfala kwestin blong sol blong man (luk long japta 5; luk tu long 2 Nifae 32:3; Jekob 2:8).
Ol skripja oli givim paoa mo mekem tijing blong yu i gat moa mining.
Lod mo ol profet blong Hem oli bin talem blong mekem olsem (luk long Doktrin mo Ol Kavenan 42:12, 56–58; 71:1).

Taem yu yusum ol skripja long tijing blong yu, yu save helpem olgeta we yu stap tijim blong oli stat stadi long ol skripja olgetawan. Taem yu soemaot lav blong yu long ol skripja, bae i leftemap tingting blong olgeta blong stadi. Soem long olgeta olsem wanem taem oli stadi long ol skripja bae i helpem olgeta blong lanem gospel mo filim lav blong God. Givim eksampol blong olsem wanem ol skripja i save helpem olgeta faenem ol ansa long ol kwestin blong olgeta mo kasem gaed mo paoa.

Komitim yuwan blong stadi ol skripja blong yu save yusum olgeta long tijing blong yu (luk long japta 2). Save blong yu blong tij aot long ol skripja bae i kam gud moa taem yu stap stadi long olgeta evri dei, tugeta yuwan, mo wetem kompanion blong yu.

Helpem pipol blong developem fet long Jisas Kraes tru stadi long ol skripja, speseli Buk blong Momon. Ol tingting ia oli save help.

Introdiusum Skripja

Eksplenem long sot toktok bakgraon blong ves ia. Ol eksampol we i stap daon ia i soem samfala wei blong introdiusum wan skripja:

“Long Josef Smit histri, Josef i talem long yumi long toktok blong hemwan wanem i hapen taem hem i go long smol bus blong prea. Hem i talem, ‘Mi bin luk wan laet …’”
“Long ves ia, profet Alma i tijim pipol we oli pua blong oli eksasaesem fet blong olgeta long toktok blong God. Hem i komperem toktok blong God long wan sid we oli save planem long hat blong yumi. Yu save stat blong ridim ves … ?”

Ridim Ves

Ridim ol ves laod o askem olgeta we yu stap tijim blong ridim laod. Soem respek long olgeta we oli gat hadtaem blong rid. Sapos wan ves i had long olgeta blong oli andastanem, ridim wetem olgeta mo eksplenem sapos i nid. Eksplenem eni toktok o sentens we i had. O givim wan simpol ves long olgeta blong rid. Invaetem olgeta blong lukaotem sam impoten poen long ves ia.

Laef Folem Ol Skripja

Nifae i bin talem: “mi yusum evri skripja long laef blong mifala, blong hem i save stap blong helpem mifala mo blong mifala i lanem samting” (1 Nifae 19:23 Blong “yusum” i minim blong laef folem ol skripja long laef blong yu.

Soem long olgeta we yu stap tijim olsem wanem nao ol stori mo ol prinsipol insaed long ol skripja i konek long olgeta wanwan. Eksampol:

“Olsem yufala, ol pipol blong Alma oli stap karem ol hevi samting long laef, we i hevi tumas long olgeta. Be taem oli eksasaesem fet mo prea, God i mekem olgeta i kam strong blong oli save fesem ol jalenj. Afta Hem i mekem olgeta i go fri aot long hadtaem blong olgeta. Olsem we Hem i mekem wetem pipol ia, mi save God i save helpem yufala long ol hadtaem blong yufala taem yufala …” (Luk long Mosaea 24.)
“Instraksen blong Alma long ol pipol long ol wota blong Momon i aplae long yumi tedei. Jon, yu yu wiling blong … ?” (Luk long Mosaea 18.)

Tijim pipol olsem wanem blong “yusum” ol skripja long laef blong olgetawan. Taem oli kam blong faenemaot olgetawan olsem wanem blong yusum bae i helpem olgeta blong aplae mo eksperiensem paoa blong toktok blong God.

Invaetem mo Helpem Pipol blong Rid Olgetawan

Pipol we yu stap tijim oli nidim blong ridim ol skripja, speseli Buk blong Momon, blong save gat wan testemoni blong trutok. Taem yu yusum gud ol skripja long tijing blong yu, yu save helpem ol pipol i stat blong stadi skripja olgetawan.

Afta long wanwan visit, givim ol stret japta o ves long olgeta blong ridim. Givim ol kwestin long olgeta blong tingting long hem taem oli stap rid. Leftemap tingting blong olgeta blong stadi long ol skripja evri dei olgetawan o wetem famli blong olgeta. Yu maet wantem blong askem ol memba blong rid wetem olgeta long taem blong ol lesen.

Bifo yu statem nekis lesen, yu biaen long olgeta mo tokbaot wanem yu invaetem olgeta blong ridim. Sapos i nid, helpem olgeta blong andastanem mo “yusum” ol skripja ia. Leftemap tingting blong olgeta blong raetemaot ol tingting mo kwestin we oli gat.

Taem yu helpem pipol i rid, andastanem, mo laef folem ol skripja—speseli Buk blong Momon—bae oli gat eksperiens long saed blong spirit wetem toktok blong God. Bae oli save rid blong olgetawan mo mekem ol skripja i kam wan impoten pat blong laef blong olgeta.

Helpem Ol Pipol blong Save Gat Ol Skripja

Ol skripja mo ol toktok blong ol profet we oli stap laef oli stap long evri wei mo moa lanwis bitim bifo. Lanem wanem oli printim mo wanem i stap long dijitol opsen long ol pipol we yu stap tijim. Helpem ol pipol blong gat ol skripja folem nid blong olgeta mo long wan wei we olgeta i wantem. Tingting long ol wei ia:

Askem ol pipol wanem lanwis oli wantem blong ridim o lisin long ol skripja long hem.
Olgeta we oli faenem i had blong rid, o faenem i had blong andastanem wanem oli ridim, maet blong rid tugeta mo i laod i save helpem olgeta o lisin long voes we oli rekodem. Ol samting ia yu save kasem olgeta fri nomo tru long ol Jos ap mo websaet blong Jos.
Sapos wan man o woman i gat wan dijitol divaes, helpem hem blong gat ol skripja, speseli Buk blong Momon. Buk blong Momon ap mo Gospel Laebri i fri mo isi nomo blong serem.
Sapos i yusum teks, jat, o imel, sendem ol link o ol pikja blong ol skripja. Taem yu tij long vidio jat, tingting blong serem skrin blong yu blong mekem se yufala i save ridim ol ves tugeta.
Helpem ol pipol i save gat ol toktok blong ol profet we oli stap laef.

Stadi blong Yuwan mo Kompanion Stadi

Mekem sua se yu mo kompanion blong yu i gat ol risos blong skripja we i apdeit long fon blong yutufala, wetem Buk blong Momon ap mo Gospel Laebri.

Selektem wan long ol ves blong skripja we i stap ia: taetol pej blong Buk blong Momon; 3 Nifae 11; Moronae 10:3–8; Jon 17:3; Rom 8:16–17; 1 Korin 15:29; Jemes 1:5; 1 Pita 3:19–20; Amos 3:7.

Jusum olsem wanem blong mekem:

Introdiusum ves ia.
Givim bakgraon mo risen blong ves ia.
Ridim ves ia mo eksplenem mining blong hem.
Eksplenem ol toktok we i had.
Helpem olgeta we yu stap tijim blong laef folem ol toktok ia long laef blong olgeta.

Skripja Stadi

?From wanem hem i impoten blong tij long ol skripja?

Serem testemoni blong yu.

Wan testemoni i wan save long saed blong spirit we yumi kasem tru long paoa blong Tabu Spirit. Blong serem testemoni blong yu, hem i blong givim wan simpol, daerek dikleresen blong save o bilif abaot wan trutok blong gospel. Taem yu serem testemoni blong yu i givim witnes blong yuwan long ol trutok we yu bin tijim aot long ol skripja.

Serem testemoni blong yu i wan wei we i gat paoa blong invaetem Spirit mo helpem ol narawan i filim paoa blong Hem. Wan misin blong Tabu Spirit i blong testifae abaot Papa long Heven mo Jisas Kraes. Hem i mekem hemia i hapen oltaem olsem kompanion blong yu taem yu serem testemoni blong yu.

Wan testemoni we i gat paoa i no dipen long naesfala voes o volium blong voes blong yu—Be long hamas yu save long hat blong yuwan se i tru. Yu mas lukaot se yu no hariap o mekemap testemoni blong yu nomo. Givim long ol pipol wan janis blong filim Tabu Spirit i witnes long olgeta se wanem yu bin tijim i tru.

Testemoni blong yu i save stap simpol nomo olsem “Jisas Kraes i Sevya mo Ridima blong yumi” o “mi bin lanem blong miwan se Buk blong Momon i tru.” Yu save serem tu long sot toktok nomo, eksperiens blong yu olsem wanem yu kasem testemoni ia.

Taem yu stap tij, serem testemoni blong yu taem yu filim se yu mas serem , yu no wet kasem en blong serem. Taem kompanion i stap tij, serem testemoni blong yu olsem wan seken witnes long wanem hem i stap tijim.

Serem testemoni blong yu se ol prinsipol yufala i stap tijim bae i blesem laef blong man o woman we i laef folem. Talem olsem wanem taem yu laef folem ol prinsipol ia i bin blesem laef blong yu. Testemoni blong yu we i tru, i save helpem ol pipol blong save filim Tabu Spirit blong konfemem trutok.

Stadi blong Yuwan

Ol ves blong skripja we i stap ia oli ol eksampol blong serem testemoni. Tingting long ol kwestin taem yu stap ridim ol skripja. Raetemdaon ol ansa blong yu insaed long stadi jenol blong yu.

Long ol ves ia, ?wanem nao Jisas mo ol aposol blong Hem mo ol profet oli testifae long hem?
?Olsem wanem bae yu save talem se ol toktok we oli stap talem oli ol tru toktok?
Taem yu talem, “Mi save se i tru,” ?yu stap minim wanem ia? ?Wanem ol nara toktok we yu save yusum blong talemaot se yu stap talem tru toktok?

Skripja Stadi

?Wanem ol prinsipol mo promes blong serem testemoni we ol skripja ia i tijim?

Stretem Tijing blong Yu blong Mitim Ol Nid

Wanwan man o woman we yu tijim i defren hemwan. Lukaotem blong save andastanem intres blong hem long saed blong spirit, ol nid, mo wari blong hem. Askem ol kwestin mo lisin gud. Maet bae yu no save andastanem fulwan ol nid blong man o woman ia, tingbaot se Papa long Heven i save. Bae Hem i lidim yu tru long Tabu Spirit.

Letem Spirit I Lidim Oda blong Ol Lesen

Letem Spirit i lidim oda we yu stap tijim ol lesen long hem . Yu save tijim ol lesen ia folem ol wei we i save ansarem nid, ol kwestin, mo ol situesen blong olgeta we yu stap tijim.

Samfala taem yu save putum tugeta ol prinsipol we i stap long ol defren lesen blong save tokbaot nid mo intres blong wan man o woman. Luk long trifala eksampol we i stap ia.

Yuki i faenem yu onlaen mo i askem from wanem fren blong hem long Jos i no smok o dring. Yu maet tijim hem abaot ol blesing blong ol komanmen, yusum ol seksen we oli stap long japta 3:

Samuel i filim se hem i no pat long eni ples. Yu maet tijim hem abaot weaples hem i kam long hem mo ples blong hem insaed long famli blong God, yusum ol seksen we i stap long japta 3:

Tatyana i bin stadi long plante relijin mo i wantem blong save wanem i mekem se Jos i defren. Yu maet tijim hem abaot Restoresen blong gospel blong Jisas Kraes yusum ol seksen we i stap long japta 3:

Papa long Heven i save ol pikinini blong Hem, lukaotem insperesen blong mekem ol desisen ia taem yu stap rere blong tij. Prea blong kasem presen ia blong luksave samting taem yu disaed long wanem blong tijim. Lisin gud long ol tingting mo ol filing we i kam long yu.

Givim Taem long Ol Pipol blong Laef Folem Wanem Oli Stap Lanem

Taem yu tij, givim taem long ol pipol blong laef folem wanem oli stap lanem (luk long 3 Nifae 17:2–3). Lukaotem ol gudfala wei blong sapotem olgeta blong kipim ol komitmen blong olgeta. Lukluk moa blong stap blong helpem olgeta wetem ol wok we bae i bildim wan fandesen blong fet, olsem blong stap prea, blong stap rid, mo stap atendem jos. Hemia bae i mekem olgeta oli kipim ol narafala komitmen.

Taem yu plan mo tij, lukaotem gud long hamas niufala infomesen yu stap serem. Wan stamba lukluk blong tijing blong yu i blong helpem wan man o woman i bildim fet long Jisas Kraes blong i save lidim hem i go long rod blong sakem sin. Stamba wok blong yu i no blong hamas infomesen yu save givimaot.

Tij folem level blong save mo hamas samting man o woman i save lanem long wan taem. Askem ol kwestin mo lisin gud blong andastanem olsem wanem hem i stap lanem mo folem wanem yu stap tijim.

Ol trutok we yu tijim, wetem paoa blong Tabu Spirit, i mekem pipol i eksasaesem fridom blong mekem joes blong olgeta long ol wei we i bildim fet blong olgeta long Kraes. Taem oli eksasaesem fet blong olgeta long Lod, tru long fasin blong laef folem wanem oli stap lanem, bae oli kam blong save tru long paoa blong Spirit se gospel i tru.

Yusum Plante Defren Wei long Ol Janis blong Stap Tij

Ol janis blong stap tij i kam long plante wei, olsem man i kam long ol visit, ol vidio jat, ol fon kol, ol teks mesej, mo sosol media.

Respektem Taem blong Ol Pipol

Kipim tijing blong yu i simpol mo i sot. Pipol bae oli laekem mit wetem yu, taem yu respektem taem mo rikwes blong olgeta. Askem hamas taem oli gat blong save stap long visit ia. Statem mo endem eni toktok tugeta long taem ia we oli agri long hem, nomata yufala i stap tugeta o yufala i onlaen. Tingbaot se long sam ples, fon kol mo vidio jat i sas.

Bae yu nidim plante miting blong tijim ol prinsipol long wan lesen. Wan tijing visit i no mas tekem moa long 30 minit, mo yu save tijim wan man o woman long 5 minit nomo. Stretem tijing blong yu folem taem blong ol pipol.

Yusum Teknoloji Wetem Waes

Yu gat plante janis blong yusum teknoloji blong tijim ol pipol. Sam pipol oli wantem moa blong kipim storian blong olgeta i praevet taem oli yusum ol lektronik divaes olsem wei blong storian . Ol pipol tu we yu stap visitim olgeta long hom blong olgeta oli save gat ekstra sapot tru long teknoloji. Tokbaot ol risos o ol wei we ol pipol ia i gat i stap blong yufala i yusum blong toktok long yufala. Afta, biaen long olgeta mo stap konek wetem olgeta. Letem wanem we wanwan man o woman i wantem i lidim storian blong yu wetem olgeta.

Teknoloji olsem ol vidio kol i save help speseli blong tijim olgeta we oli stap longwe o i gat bisi taem tebol. Samtaem i isi blong ol memba i save tekpat long wan lesen tru long teknoloji.

Helpem Olgeta we Oli Yang blong Lan

Long Taem blong ministri blong Sevya, Hem i talem long ol disaepol blong Hem, “!Yufala i no blokem ol pikinini ya! Yufala i letem olgeta oli kam long mi, from we ol pikinini tu oli gat raet wetem ol man we God i King blong olgeta” (Mak 10:14). Taem yu tijim ol pikinini, stretem wei blong yu blong tij mo mesej blong yu blong save mitim ol nid blong olgeta. Helpem olgeta i lanem gospel tru long ol stori mo ol samting we oli save gud long hem. Mekem sua se yu andastanem wanem yu stap tijim.

Skripja stadi

Ridim Doktrin mo Ol Kavenan 84:85. ?Wanem i minim blong givim long yufala “pat ia we bae mi givim long evri man”? ?Olsem wanem yu save yusum hemia long tijing blong yu?

?Wanem nao Lod i promesem long ol fetful misinari abaot, save wanem blong talem?

Tij wetem Kompanion blong Yu long Yuniti

Lod i bin talem, “bambae yufala i mas go aot wetem paoa blong Spirit blong mi, mo stap prijim gospel blong mi, mo wokbaot tutu” (Doktrin mo Ol Kavenan 42:6). Hem i putum toktok ia tu long yu mo kompanion blong yu blong mas “stap wan” (Doktrin mo Ol Kavenan 38:27). Tijing blong yutufala bae i gat moa paoa mo bae i pulum intres blong man sapos yu mo kompanion blong yu i wok long yuniti. Serem long wanwan long yutufala blong i gat ol pat blong ol lesen blong givim.

Long taem blong kompanion stadi, toktok raon mo praktis long olsem wanem yutufala bae i tij blong mekem se yutufala i save stap wan. Rere blong olsem wanem yutufala i save wok tugeta blong tijim ol pipol onlaen. Folem ol sekiuriti rul blong stap yusum teknoloji, i stap long aotlaen blong japta 2.

Taem kompanion blong yu i stap tij, prea from hem, lisin long hem, mo lukluk hem. Serem testemoni blong yu blong stap olsem seken witnes long ol trutok we kompanion blong yu i bin tijim (luk long Alma 12:1). Folem ol filing blong yu taem Spirit i talem long yu blong talem wan samting.

Mas gat wan tru intres long ol pipol we yu stap tijim. Lisin long olgeta. Lukluk long ae blong olgeta taem oli toktok o taem yu toktok. Skelem gud ol ansa blong olgeta, mo lisin long ol smol voes blong spirit.

Invaetem Ol Memba blong Tekem Pat

Invaetem ol memba blong helpem yu tijim mo sapotem ol pipol we yu stap wok wetem olgeta. Hemia bae i hapen long taem yutufala mitim ol pipol ia o konek wetem olgeta onlaen. Long taem blong kodinesen miting blong evri wik, toktok long ol lida blong wod hu bae i save help.

Taem ol memba oli kam folem yufala blong tekem pat blong stap tij mo stap felosip, oli save givim moa tingting mo mekem koneksen olsem ol fren. Bae oli filim glad blong misinari wok.

Invaetem Ol Memba blong Helpem Yu Yu Tij

Bifo long ol lesen, plan wetem ol memba olsem wanem blong wok tugeta. Yu save yusum teks mesej o sot fon kol blong konfemem wanem bae yu tijim, huia bae i prea, huia bae i kondak, mo ol nara samting.

Wok blong ol memba insaed long ol lesen i blong givim testemoni we i tru, serem ol eksperiens blong hem, mo developem rilesensip wetem olgeta we oli stap tijim olgeta. Yu maet wantem blong askem ol memba blong serem olsem wanem oli bin lanem, akseptem, mo laef folem ol prinsipol insaed long lesen ia. Sapos oli ol konvet invaetem olgeta blong serem olsem wanem oli disaed blong joenem Jos.

Taem ol memba oli givim nem blong wan blong tijim, askem ol memba ia blong tekem pat long tijing. Ol memba oli save tekem pat moa long kaen situesen olsem. Toktok long olgeta blong faenemaot olsem wanem oli wantem blong wok wetem yufala.

Tingting long wetaem nao i stret blong yusum teknoloji blong tij wetem ol memba. Teknoloji i letem yu joen wetem ol memba long taem we wan visit blong mit tugeta i no save hapen.

Long kodinesen miting blong evri wik, mekem plan wetem ol lida blong wod blong gat wan memba i tekem pat long moa long wan lesen sapos i save mekem (luk long japta 13). Tingting blong askem ol niu memba blong helpem yu yu tij.

Stadi blong Yuwan o Kompanion Stadi

Pikjarem long maen se yu gat wan apoenmen blong tijim wan lesen long wan famli long haos blong wan memba. Tokbaot olsem wanem bae yu mekem blong ol memba ia oli helpem yu yu tij:

Wan misinari blong wod we i jes kambak long wan fultaem misin
Wan pris
Wan niu memba
Presiden blong kworom blong ol elda o Rilif Sosaeti

Invaetem ol Memba blong Givim Sapot

Ol memba oli save givim sapot we i gat mining long ol pipol long ol taem blong tij. Oli save teks, ridim ol skripja tugeta, invaetem ol pipol i kam long haos blong olgeta o long ol aktiviti, o invaetem olgeta blong sidaon tugeta long jos. Oli save givim ansa long ol kwestin mo soemaot laef blong olgeta i olsem wanem, olsem ol memba blong Jos. Eksperiens mo lukluk blong olgeta i save helpem olgeta i konek wetem ol pipol long wan wei we i defren long olsem wanem ol misinari i konek wetem olgeta.

Toktok wetem ol memba abaot ol wei yu save wok tugeta blong sapotem ol pipol aotsaed long ol taem blong tij.

Tij blong Man i Andastanem

Tijim Gospel blong Jisas Kraes long wan wei we ol pipol i save andastanem. Stadi ol skripja mo ol lesen blong mekem se yu save tij moa klia, aot long olgeta. Taem tijing blong yu i klia gud, janis i bigwan blong Tabu Spirit i testifae long trutok.

Askem kwestin blong helpem pipol i tingbaot wanem yu bin tijim. Afta lisin blong luk sapos oli andastanem mo akseptem.

Pat blong tij blong man i andastanem i blong eksplenem ol toktok, ol sentens, mo ol aedia. Yu save mekem save blong yu blong tijim gospel i kam gud moa tru long:

Andastanem ol toktok we yu stap yusum.
Eksplenem ol toktok we ol narawan bae oli no save andastanem.
Askem ol pipol ol kwestin olsem “?Yu save serem wetem yumi save blong yu blong wanem we mifala i eksplenem naoia nomo?” o “?Yu glad blong tokbaot smol nomo wanem mifala i tokbaot?”

Taem yu tijim doktrin long japta 3, luksave eni toktok, sentens, mo aedia we pipol maet oli no andastanem. Yusum ol risos long Gospel Laebri blong eksplenem, ol risos olsem Gaed long Ol Skripja, Bible Dictionary, mo Gospel Topics.

Kipim tijing blong yu i simpol mo sot. Kipim tijing blong yu i stap nomo long gospel blong Jisas Kraes, bildimap save blong ol stamba doktrin mo prinsipol. Helpem ol pipol i lukaotem save we i kam long Tabu Spirit. Taem oli kasem save ia, bae oli kam blong bilivim mesej blong gospel ia.

Skripja Stadi

?From wanem yumi mas lukaot gud taem yumi eksplenem doktrin?

?Olsem wanem nao yumi lanem samting? ?From wanem i impoten blong tijim infomesen smosmol?

?From wanem i impoten blong talemaot samting long wan klia mo stret fasin?

?Wanem nao yu save lanem aot long ol ves ia abaot olsem wanem God i toktok wetem ol pikinini blong Hem?

Askem Ol kwestin

Sevya i askem ol kwestin we i mekem ol pipol i tingting mo filim paoa blong ol trutok we Hem i stap tijim. Ol kwestin blong Hem i mekem wan i wantem blong lukaotem mo mekem komitmen.

Ol gud kwestin oli impoten tu long tijing blong yu. Bae oli save helpem yu blong andastanem intres, ol wari, mo ol kwestin blong ol pipol. Gud kwestin i save invaetem Spirit mo helpem pipol i lanem samting.

Askem Ol Kwestin we I Givim Insperesen

Lukaotem blong gat Spirit i lidim yu blong askem ol gud kwestin. Raet kwestin long raet taem i save helpem ol pipol i lanem gospel mo filim Spirit.

Gudfala kwestin mo tru fasin blong stap lisin i helpem pipol i filim kamfot, oli no fraet blong toktok mo serem ol filing blong olgeta. Hemia bae i save helpem olgeta blong faenem wan testemoni we bae i stap gro. Bae oli faenem i isi long olgeta blong askem yu ol kwestin taem oli no andastanem samting o gat wan wari.

Tebol we i stap ia i soem sam prinsipol blong askem ol kwestin we i givim insperesen wetem sam eksampol.

Ol Prinsipol mo Ol Eksampol blong Ol Kwestin we I Givim Insperesen

Ol Prinsipol	Ol Eksampol
Askem ol kwestin we i helpem pipol i filim Spirit.	?Yu save serem wan eksperiens taem yu filim paoa blong God long Laef blong yu? ?Yu filim lav blong God long yu olsem wanem?
Askem ol kwestin we i simpol mo isi blong andastanem.	?Wanem nao yu lanem abaot Jisas Kraes long skripja ia?
Askem ol kwestin we i helpem ol pipol i tingbaot wanem yu stap tijim.	?Olsem wanem nao ol samting ia oli semmak long wanem we yu yu save finis long hem? ?Wanem nao i defren?
Askem ol kwestin we i helpem yu save se ol pipol oli andastanem gud wanem yu stap tijim.	?Wanem kwestin yu gat long wanem mifala i tijim tedei? ?Yu save talem evri samting we mifala i bin tijim tedei long wan sot toktok?
Askem ol kwestin we bae i helpem ol pipol i serem wanem oli stap filim.	?Olsem wanem Jisas Kraes i bin helpem yu long laef blong yu? ?Wanem long ol samting we yumi tokbaot tedei i moa impoten long yu?
Askem ol kwestin we i soem moa lav mo wari.	?Olsem wanem nao mifala i save helpem yu?
Askem ol kwestin we i helpem pipol i laef folem wanem oli lanem.	?Wanem nao yumi save lanem aot long skripja ia? ?Olsem wanem nao skripja ia i save helpem yu long laef blong yu? ?Taem yumi bin stap storian, wanem nao yu filim se yu nid blong wok long hem aot long wanem yu bin lanem?

Kompanion Stadi

Luklukbak long plan blong lesen blong yu afta long lesen we yu jes tijim. Raetem wan kwestin blong wanwan long ol bigfala prinsipol we oli stap long aotlaen blong plan blong yu.

Luklukbak long ol kwestin blong yu blong luk sapos oli go gud wetem ol prinsipol long seksen ia.

Nekiswan, ansarem wanwan kwestin ia olsem se yu nao yu wan we oli stap tijim.

Serem ol kwestin blong yu wetem kompanion blong yu. Wok tugeta blong mekem ol kwestin blong yutufala i kam moa gud.

Stadi blong Yuwan o Kompanion Stadi

Ol pipol yu stap[ tijim olgeta maet oli fesem ol eksperiens olsem olgeta ia:

Oli gat wan eksperiens long saed blong spirit taem oli ridim Buk blong Momon.
Ol man o woman we oli wok wetem olgeta oli tok jikim ol samting long saed blong spirit oltaem.
Ol memba blong famli oli strong memba blong wan narafala jos.
Ol fren oli biliv se “ol Momon”oli no ol Kristian.

Tingting long wan kwestin we bae yu askem blong lan moa abaot wanwan long ol situesen ia. Raetem ol kwestin ia long stadi jenol blong yu. Tokbaot wetem kompanion blong yu olsem wanem yutufala i save mekem i kam moa gud ol kwestin we yutufala i bin raetem.

No Raetem Daon Ol Kwestin we Oli No Save Wok o I Tumas blong Tingbaot

No traem blong askem ol kwestin we:

I isi blong faenem ol ansa.
Bae i save mekem wan i sem sapos i no save ansa.
Putum insaed long kwestin blong yu moa long wan aedia.
I konek long doktrin we yu no tijim yet.
I no gat wan klia stamba tingting.
I givim tumas samting blong tingbaot.
I save mekem pipol i harem nogud o kros.

Hemia ol eksampol blong ol kwestin we i no wok gud tumas:

?Huia i fas profet? (Man o woman ia i maet no save ansa blong kwestin ia.)
?Olsem wanem taem yumi stap kipim bodi blong yumi i klin i helpem yumi gat Spirit mo soem se yumi wantem blong folem wan profet blong God? (I gat moa long wan aedia long kwestin ia.)
?Hem i impoten blong save abaot ol komanmen blong God? (Hemia i wan yes-no kwestin, mo ansa blong hem i stap finis.)
?Wanem i samting we yumi save mekem evri dei we bae i helpem yumi i filim kolosap long God? (Hemia i wan kwestin we i no klia blong stap lukaotem wan ansa we i moa stret i go long wan nomo: prea.)
?Huia i nekis profet afta long Noa? (Man o woman ia i maet no save ansa blong kwestin, mo kwestin ia i no impoten blong mesej blong yu.)
?Yu andastanem wanem mi stap talem? (Man o woman ia bae i filim se yu tekem hem olsem wan we i no save samting.)

Stadi blong Yuwan o Kompanion Stadi

Tingting long ol nid blong wan we yu stap tijim. Toktok raon long olsem wanem nao man o woman ia i maet ansarem ol kwestin blong yu. Mekem plan blong sam kwestin blong askem, we i folem ol gaedlaen we i stap long seksen ia. Tokbaot blong olsem wanem ol kwestin ia i save help blong invaetem Spirit mo helpem man o woman i lanem gospel.

Lisin

Taem yu lisin gud long ol narawan, yu save andastanem gud olgeta. Taem oli save se ol tingting mo filing blong olgeta oli impoten long yu, bae oli kam blong wantem moa long ol tijing blong yu, serem ol eksperiens blong olgeta, mo mekem ol komitmen.

Taem yu lisin, bae yu kasem moa save blong stretem ol tijing blong yu folem ol nid mo intres blong olgeta. Bae yu andastanem gud moa wanem trutok blong gospel nao bae i moa gud blong helpem olgeta.

Lisin speseli long smol voes blong Spirit. Taem ol narawan oli serem ol filing blong olgeta, Tabu Spirit i maet toktok long yu tru long ol tingting o ol aedia. Spirit i save helpem yu tu blong andastanem wanem ol narawan oli stap traem blong talemaot.

Lisin wetem Gudfala Hat blong Stap Kea

Blong stap lisin i tekem had wok mo wan gudfala hat blong stap kea. Taem ol narawan oli stap toktok, yu mekem sua se yu stap lisin gud long wanem oli stap talem. Kamaot long tingting ia blong stap mekem plan blong wanem bae yu talem.

Elda Jeffrey R. Holland i tijim: “Wanem i impoten moa bitim blong toktok, hem i blong lisin. … Ol pipol ia oli no olsem wan tul we i wan namba blong baptaes nomo we i no gat laef long olgeta. … Askem ol fren ia wanem nao i moa impoten long olgeta. ?Wanem olgeta i laekem, o wanem nao olgeta i holemtaet long hat blong olgeta? Mo afta lisin. Sapos taem i stret yu maet askem wanem nao ol samting we oli fraet long hem, wanem ol samting we oli wantem tumas blong kasem, o wanem nao oli filim se i nogat long laef blong olgeta. Mi promes long yu se samting we bae oli talem bae i oltaem haelaetem wan trutok blong gospel we yu save serem testemoni blong yu abaot mo we bae yu save talem moa testemoni long hemia. … Sapos yumi lisin wetem lav, bae yumi no nid blong tingting tumas long wanem blong talem. Bae oli givim long yumi—tru long Spirit mo tru long ol fren blong yumi” (“Witnesses unto Me,” Ensign, May 2001, 15).

Luksave Ol Mesej we I No Kamaot Tru long Toktok

Pipol i toktok tu tru long bodi lanwis. Luk long wei we oli sidaon, lukluk long fes blong olgeta, wanem oli mekem wetem han blong olgeta, ton blong voes blong olgeta, mo ples we oli stap lukluk long hem. Taem yu luksave ol mesej ia we oli no kamaot tru long ol toktok i save helpem yu andastanem ol filing blong olgeta we yu stap tijim olgeta.

Yu tu yu mas save bodi lanwis blong yuwan. Taem yu lisin gud yu save sendem wan mesej we bae i mekem olgeta i glad mo gat intres.

Givim Taem long Ol Pipol blong Tingting mo Ansa

Sevya i oltaem askem ol kwestin we i nidim taem blong wan man o woman blong ansa. Taem yu askem wan kwestin, stop smol blong givim long man o woman ia wan janis blong i tingting mo ansa. Yu no fraet long fasin blong stap kwaet mo no toktok. Oltaem pipol i nidim taem blong tingting long hem mo ansa long ol kwestin o blong talemaot wanem oli stap filim.

Yu maet stop smol afta we yu askem wan kwestin, afta we yu serem wan eksperiens long saed blong spirit, o taem ol pipol oli gat hadtaem blong talemaot wanem i stap long hat blong olgeta. Mekem sua blong givim taem long olgeta blong finisim gud ol tingting blong olgeta bifo yu ansa. Yu no stap katem toktok taem olgeta oli stap toktok.

Ansa wetem Fasin blong Andastanem wan

Taem wan man o woman i ansarem wan kwestin, sapos i nid, talem long hem se yu andastanem ansa blong hem, mo finisim toktok blong yu. Blong luksave tingting o filing blong ol narawan i soem se yu stap kea. Yu no jam i go long en blong tijing, givim ol ansa kwiktaem, o talemaot se yu gat evri ansa.

Talemaot stret Se Yu Andastanem Wanem Ol Pipol I Talem

Taem yu stap lukaotem blong andastanem wanem wan man o woman i stap talem, askem blong mekem sua se yu andastanem. Olsem eksampol, yu maet askem se, “So wanem yu stap talem hem i . I stret ia?” o “Sapos mi andastanem i stret, yu yu filim se .” Taem yu no sua se yu andastanem, askem man o woman ia blong i kliarem gud.

Kontrolem Ol Jalenj We I Kamaot long Taem blong Lesen

Bae yu helpem pipol moa taem yu tijim olgeta long gospel blong Jisas Kraes. Sam pipol maet oli wantem blong stap toktok nomo oltaem. Samtaem ol pipol oli wantem nomo blong wan i lisin gud long olgeta taem oli stap talem ol filing mo wanem ol hadtaem oli stap go tru long hem. Nara pipol oli lukaotem blong win long toktok o stap rao.

Lanem blong manejem kaen situesen olsem wetem stret fasin mo lav. Maet bae yu save oganaesem tijing blong yu blong save tijim wanem we wan i bin serem. O yu maet talem long olgeta wetem kaen fasin se bae yu save tokbaot wari blong olgeta long wan nara taem. Spirit i save helpem yu save olsem wanem blong ansa long ol jalenj we yu fesem.

Helpem Ol Pipol Oli Filim Gud blong Stap Serem Ol tru Filing blong Olgeta

Sam pipol oli no wantem filim sem, mekem se oli ansarem ol kwestin long wei we oli tingting long hem se yu wantem olgeta blong ansarem ol kwestin , be oli no serem ol tru filing blong olgeta. Lukaotem blong developem wan rilesensip we bae i mekem olgeta i filim se hem i oraet blong oli save serem ol tru filing blong olgeta wetem yu.

Taem yu andastanem mo konektem yu wetem ol pipol, bae i mekem yu kam blong save helpem olgeta i mitim ol intres mo nid blong olgeta, mo soemaot lav blong Sevya long olgeta. Krietem wan rilesensip blong tras tru long fasin blong stap ones wetem olgeta, stap tru oltaem olsem wan misinari, mo soem respek.

Stadi blong Yuwan o Kompanion Stadi

Lukluk long olsem wanem yu stap lisin gud long ol narafala man. Raetem ol ansa blong ol kwestin we i stap daon ia long stadi jenol blong yu. O tokbaot olgeta wetem kompanion blong yu.

A = Long mi, i neva tru, B = Long mi, i tru samtaem, C = Long mi, i tru evri taem, D = Long mi, i tru oltaem

Taem ol narawan oli toktok long mi, mi tingting long ol semmak eksperiens we mi save serem be mi no stap lisin gud.
Taem ol narawan oli stap talem long mi abaot filing blong olgeta, mi traem blong putum mi insaed long posisen blong olgeta blong luk olsem wanem bae mi filim.
Taem mi tijim pipol, mi stap tingting long wanem bae mi talem o tijim afta.
Mi no laekem tumas taem ol pipol i toktok plante.
Mi wokhad blong folem o andastanem wanem ol narawan oli stap traem blong talem long mi.
Maen blong mi i stap go olbaot taem kompanion blong mi i stap tij.
Mi no glad taem wan i stap toktok long mi mo ol narawan oli katem toktok o mekem mi no save lisin gud.
Mi kasem smol voes blong spirit blong talem o mekem wan samting, be mi no mekem.

Helpem Ol Pipol Oli Faenem Ansa long Ol Kwestin mo Wari blong Olgeta

Mekem wan tru wok blong ansarem kwestin blong ol pipol mo helpem olgeta blong solvem wari blong olgeta. Nomata long hemia, i no wok blong yu blong ansarem evri kwestin. Be long en, pipol i mas faenem ansa blong ol kwestin mo ol wari blong olgetawan.

Yu nid blong save se yu no save givim ful ansa blong evri kwestin mo wari. Sam ansa oli kam moa klia folem taem. I gat sam ansa we i no kam yet long yumi. Lukluk moa blong bildimap wan strong fandesen blong ol impoten stamba trutok blong gospel we i stap. Fandesen ia bae i helpem yu mo olgeta we yu stap tijim olgeta blong stanap strong mo go fored wetem fasin blong save wet longtaem mo fet blong fesem ol kwestin we i had mo i no gat ansa.

Sam long prinsipol blong ansarem ol kwestin oli stap long seksen ia.

Andastanem Wari

Sam long ol samting we yu stap tijim pipol long hem i maet ol had samting o olgeta oli no save ol samting ia. Sapos ol pipol oli gat ol kwestin o wari, fas samting lukaotem blong andastanem gud olgeta. Samtaem ol wari blong ol pipol i olsem wan bigfala pis blong sno we i stap flot. Wan smol pat blong hem nomo i stap kamaot antap long wota. Ol Wari oli save bigwan. Prea blong kasem presen ia blong save luksave samting, mo folem Spirit blong olsem wanem yu save ansa. Papa long Heven i save ol hat mo ol eksperiens blong evri pipol (ful pis blong sno we i stap flot). Bae Hem i helpem yu blong save wanem i gud blong wanwan man o woman.

Plante taem ol wari oli gat ol nid we i moa long saed blong sosol bitim saed blong doktrin. Eksampol, sam pipol oli maet fraet se ol memba blong famli bae oli kam agens sapos oli joenem Jos. O maet oli fraet se fren blong olgeta long ples blong wok bae oli nomo wantem olgeta.

Lukaotem blong andastanem wea ples nao wari i kamaot long hem, tru long fasin blong askem kwestin mo stap lisin. ?Wari ia i kamaot from se man o woman ia i no kasem konfemesen long saed blong spirit blong trutok we i Kambak? ?Wari ia i kam antap from se man o woman ia i no wantem blong komitim hem blong laef folem wan gospel prinsipol? Taem yu save stret samting we oli stap wari from bae i save helpem yu blong wok long testemoni o komitmen blong olgeta.

Yusum Ol Skripja, Speseli Buk blong Momon, blong Help Ansarem Ol Kwestin

Soem long ol pipol olsem wanem ol trutok insaed long ol skripja i save help ansarem ol kwestin blong olgeta mo wok tu long ol wari blong olgeta. (Luk long “Buk blong Momon I Ansarem Ol Kwestin blong Sol blong Man” long japta 5.) Taem ol pipol oli stap lukaotem inspiresen tru long stadi mo laef folem ol skripja, paoa blong olgeta blong harem mo folem Lod bae i gro i kam antap. Fet blong olgeta long Hem bae i kam antap. Taem fet i gro i kam antap i mekem testemoni i kam, fasin blong sakem sin i kam, mo odinens blong baptaes i kam.

“Samtaem mi go long ol skripja blong faenem doktrin. Samtaem mi go long ol skripja blong faenem instraksen. Mi go wetem wan kwestin, mo kwestin oltaem hem i ?‘Wanem nao God i wantem mi blong mekem?’ o ?‘Wanem nao bae Hem i wantem mi blong filim?’ Evri taem mi faenem ol niu aedia, ol tingting we mi neva bin gat bifo, mo mi kasem inspiresen mo instraksen mo ol ansa long ol kwestin blong mi” (Henry B. Eyring, long “A Discussion on Scripture Study,” Ensign, July 2005, 22).

Eksplenem se fulap long ol andastaning blong yumi abaot gospel blong Jisas Kraes i kam long wanem we oli bin talemaot long Profet Josef Smit mo olgeta profet we oli kam afta long hem. Kwestin abaot trutok blong gospel, ansa blong hem i save kam tru long wan testemoni we yu kasem blong yuwan se Josef Smit i bin wan profet blong God. Ridim mo prea abaot Buk blong Momon i givim paoa blong save kasem testemoni ia.

Helpem ol pipol oli wok had blong mekem fet blong olgeta long Jisas Kraes i kam moa strong. Ridim mo prea abaot Buk blong Momon i wan impoten wei blong mekem fet blong olgeta i kam strong.

Invaetem Ol Pipol blong Mekem Samting Wetem Fet

Taem we pipol oli stap developem mo mekem testemoni blong olgeta i kam strong long gospel we i kam bak, bae oli save tokbaot ol kwestin mo wari blong olgeta antap long wan fandesen blong fet. Taem oli wok wetem fet long ol trutok we oli bilif long hem, bae oli save kasem testemoni blong olgeta blong ol nara trutok blong gospel.

Sam long ol wei blong wok long fet i gat:

Prea oltaem mo wetem tru tingting blong kasem insperesen mo gaed.
Stadi long ol skripja, speseli Buk blong Momon.
Atendem jos.

Kompanion Stadi

Jusum wan invitesen blong givimaot long taem blong tijim lesen. Afta, luksave ol wari we maet i save stopem wan blong i no save akseptem invitesen ia o i no save kipim komitmen ia. Toktok raon mo praktisim olsem wanem yu save helpem ol pipol i wok blong solvem ol wari blong olgeta.

Stadi blong Yuwan o Kompanion Stadi

Long stadi jenol blong yu, raetem olsem wanem yu save tokbaot Josef Smit mo Buk blong Momon blong givim ansa long ol wari we i stap ia:

“Mi no biliv se God i nomo stap toktok wetem ol pipol.”
“Mi bilif se mi save wosip long God long wanem wei we mi wantem be i no tru long wan oganaes relijin.”
?“From wanem mi mas stop blong dring waen wetem kakae blong mi sapos mi joen long jos blong yu?”
?“From wanem mi nidim relijin?”

Givim Wan Samting I Stap blong Stadi mo Prea From

Long en blong wanwan tijing visit, givim long pipol wan samting blong oli stadi, mo tingting hevi, mo prea from blong rere long nekis visit. Blong stap rid, prea, mo tingting hevi long taem blong ol tijing visit i invaetem paoa blong Tabu Spirit long laef blong olgeta.

Yu maet invaetem ol pipol blong ridim sam long ol impoten japta insaed long Buk blong Momon. O yu maet leftemap tingting blong olgeta blong oli yusum ol risos blong Jos, olsem Gospel Laebri, blong faenem ol ansa long ol kwestin, lanem abaot wan topik, o wajem wan vidio. Hemia bae i save kam olsem wan open topik blong tokbaot nekis taem yufala i mit.

No givim tumas samting long ol pipol blong mekem, speseli sapos yu stap spenem sot taem nomo wetem olgeta blong stap tij.

Stadi blong Yuwan o Kompanion Stadi

Tingting long evri man o woman we yu plan blong tijim olgeta long wik ia. ?Wanem ol japta long Buk blong Momon bae helpem olgeta moa? ?Wanem ol nara risos we bae i helpem olgeta? Rekodem wanem yu tingting blong givim long wanwan man o woman. Rekodem tu wanem bae yu mekem blong folemap wanem yu givim long nekis visit blong yu.

Stap Helpem Ol Pipol Wetem Ol Adiksen

Yu save helpem ol pipol we oli stap wok had blong winim adiksen, tru long toktok wetem lav long olgeta abaot traehad blong olgeta, sapotem olgeta, mo konektem olgeta wetem ol risos. Yu maet helpem olgeta blong atendem wan long ol Jos sapot grup blong kam gud bakegen long ol adiksen. Ol grup ia oli mit tugeta long man o woman o onlaen. (Luk long AddictionRecovery.ChurchofJesusChrist.org.) Leftemap tingting blong olgeta blong yusum ol risos we i stap long “Addiction” seksen blong Laef Help insaed long Gospel Laebri.

Ol Lokol lida blong Jos mo ol memba oli save givim sapot. Sam pipol wetem adiksen bae oli nidim helt tritmen blong dokta blong meresin o long saed blong maen.

Hemia sam tingting blong olsem wanem yu save sapotem ol pipol we oli stap traehad blong winim adiksen:

Putum moa paoa long traehad blong olgeta blong kam long Kraes. Helpem olgeta oli luk se Papa long Heven mo Jisas Kraes tufala i luksave ol traehad blong olgeta blong kam oraet mo kam hil. Tijim olgeta se oli save kam strong moa tru long Sevya mo Atonmen blong Hem. Hem i save gud filing blong hat blong olgeta blong mekem gudfala samting.
Prea from olgeta long ol prea blong yuwan, mo prea wetem olgeta. Sapos i nid, leftemap tingting blong olgeta blong lukaotem blong kasem wan prishud blesing long wan long ol lokol prishud lida.
Gohed blong stap tijim olgeta gospel blong Jisas Kraes. Tijim olgeta se Papa long Heven, Sevya, mo Tabu Spirit oli lavem olgeta mo oli wantem olgeta i winim wanem oli stap traehad from.
Leftemap tingting blong olgeta blong kam atendem jos oltaem mo developem frensip wetem ol memba.
Stap lukluk long gud saed mo sapot oltaem, nomata sapos oli go bak long olfala laef blong olgeta.

Adiksen i wan had samting blong winim, mo blong go bak long olfala laef i save hapen. Ol memba blong Jos mo ol lida oli no mas sapraes long hemia. Oli mas soem lav, be no jajem olgeta.

Wan niu memba we i stop blong kam long jos i maet go bak long olfala laef blong adiksen mo i filim se hem i no moa klin inaf mo tingting i slak. Wan kwik visit we i leftemap tingting mo i givim sapot i save help. Ol memba oli mas soem long toktok mo long aksen se Jos i wan ples we yumi save faenem lav blong Kraes i stap long hem (luk long 3 Nifae 18:32).

Stadi blong Yuwan o Kompanion Stadi

Tingting long wan we yu stap tijim o wan niu o wan memba we i kambak we i stap traem blong winim wan adiksen. Luklukbak long “Fet long Jisas Kraes” mo long “Fasin blong Sakem Sin” we i stap long lesen ia “Gospel blong Jisas Kraes” long japta 3.

?Wanem nao yu save tijim man o woman ia long lesen ia mo long japta ia we i save helpem hem?
Krietem wan lesen plan blong helpem man o woman ia.

Tijim Ol Pipol We Oli No Gat wan Kristin Bakgraon

Sam long ol pipol we yu tijim olgeta oli no gat wan Kristin bakgraon o oli no bilif long Papa long Heven mo Jisas Kraes. Nomata long hemia, plante long ol pipol ia oli gat ol bilif, ol praktis, mo ol ples we oli holem i tabu. Hem i impoten se yu mas soem respek long ol relijin bilif mo kastom blong olgeta.

Helpem Olgeta I Andastanem Huia Hem I God

Maet bae yu tingting se olsem wanem nao bae yu save arenjem tijing blong yu blong tijim wan we i no gat wan kristin bakgraon. Ol prinsipol we i helpem wan man o woman i bildim fet oli semmak long evri kalja. Helpem ol pipol i kasem wan stret andastaning blong God mo tabu misin blong Jisas Kraes. Nambawan wei blong olgeta blong lanem ol trutok ia i blong gat ol eksperiens long saed blong spirit blong olgetawan. Sam long ol wei ia we yu save helpem olgeta long ol eksperiens ia oli stap taon ia:

Tijim se God i Papa blong yumi long Heven, mo Hem i lavem yumi. Yumi ol pikinini blong Hem. Invaetem olgeta blong lukaotem o faenemaot witnes ia blong olgetawan.
Tij abaot gospel blong fasin blong sevem man.
Tijim se God Papa mo Jisas Kraes tufala i kam kamaot long Profet Josef Smit.
Serem tru testemoni blong gospel, wetem filing blong yu long lav blong Papa long Heven mo from wanem yu jusum blong folem Jisas Kraes.
Invaetem olgeta blong givim ol prea we i simpol mo i kam long hat—wetem yu mo taem oli stap olgetawan.
Invaetem olgeta blong rid long Buk blong Momon evri dei—wetem yu mo taem oli stap olgetawan.
Invaetem olgeta blong atendem jos.
Soem olgeta long ol memba blong Jos we oli save eksplenem olsem wanem oli kam blong bilif long Papa long Heven mo Jisas Kraes.
Invaetem olgeta blong kipim ol komanmen.

Plante pipol oli wantem blong gat wan gudfala koneksen wetem God mo blong faenem stamba mining blong laef. Helpem olgeta i luk olsem wanem oli ol pikinini blong wan Papa long Heven we i gat lav mo olsem wanem Hem i gat wan plan blong olgeta. Eksampol, blong stat yu maet talem ol toktok we oli stap ia:

God i Papa blong yumi long Heven, mo Hem i lavem yumi. Yumi ol pikinini blong Hem. Yumi stap wetem Hem bifo yumi bon i kam long wol. From se yumi evriwan i ol pikinini blong Hem, yumi evriwan i ol brata mo sista. Hem i wantem yumi blong gobak long Hem. From se Hem i lavem yumi, Hem i givim wan wei blong yumi blong gobak long Hem tru long Pikinini blong Hem, Jisas Kraes.

Arenjem Tijing blong Yu Sapos I Gat Nid

Plante long ol konvet we oli kam long ol bakgraon we oli Kristin oli talem se oli no andastanem tumas wanem we ol misinari oli stap tijim. Nomata long hemia, oli filim Spirit mo wantem blong mekem wanem ol misinari i askem. Mekem evri samting yu save mekem blong helpem ol pipol i andastanem doktrin blong gospel. Gat fasin ia blong save wet longtaem mo stap sapot. I maet tekem longtaem blong ol pipol i save lanem blong luksave mo talemaot filing blong olgeta. Yu maet nid blong arenjem spid mo mekem tijing blong yu i moa dip blong helpem olgeta.

Ol tingting we i stap ia maet oli save helpem yu rere blong tijim olgeta we oli no gat wan Kristin bakgraon:

Andastanem wanem nid long saed blong spirit o intres i mekem olgeta blong mit wetem yu.
Givim ol simpol luklukbak mo riviu long evri lesen.
Askem olgeta blong talem long yu wanem oli andastanem mo wanem oli gat eksperiens long hem.
Givim mining blong ol toktok mo prinsipol we oli impoten. Maet ol pipol i no save ol toktok we yu yusum taem yu stap tij.
Blong tijim doktrin i klia moa go bak long wan lesen we yu bin tijim bifo finis . Hemia i nid blong hapen eni taem long taem we yu stap tijim wan lesen.
Faenemaot ol invitesen we yu save givimaot blong helpem ol pipol oli kasem ol eksperiens blong ol blesing blong gospel.

I gat sam risos we i stap andanit ia long Gospel Laebri we yu save yusum blong helpem olgeta we oli no gat wan Kristin bakgraon:

“Huia I God?”
“Huia I Jisas Kraes?”
“Jisas Kraes, Pikinini blong God”
“Wanem Sam Samting Yu Mas Save o Gat Taem Yu Kasem Wan Visit blong Ol Misinari blong Jos Ia blong Jisas Kraes blong Ol Lata-dei Sent”
“Ol Bilif, Ol Valiu, mo Laefstael blong ol Muslim mo Ol Lata-dei Sent”

Stadi blong Yuwan o Kompanion Stadi

Sapos i posibol, faenemaot wan konvet we i no bin gat Kristin bakgraon bifo i mit wetem ol misinari. Arenjem blong mit wetem hem mo askem abaot stori blong konvesen blong hem. Olsem eksampol, yu maet askem woman o man ia abaot:

Wanem i lidim hem blong bilif long Papa long Heven mo Jisas Kraes.
Eksperiens blong hem blong prea blong fas taem i olsem wanem.
I olsem wanem blong filim ansa blong prea blong fastaem.
Rol blong skripja insaed long stori blong konvesen blong hem.
I olsem wanem blong atendem jos.

Raetem wanem yu lanem long stadi jenol blong yu.

Tingting blong invaetem man o woman ia blong helpem yu tijim wan we i no gat Kristin bakgraon.

Ol Aedia blong Stadi mo Yusum

Stadi blong Yuwan

Tingting olsem yu yu stap long ol situesen ia. ?Olsem wanem nao bae yu yusum ol prinsipol mo skil long japta ia blong helpem ol pipol i progres? Plan blong yusum olgeta olsem wanem long wanwan situesen.
- Wan we i bin stap rere blong kasem baptaes i talem long yu se hem i no moa wantem blong mit wetem yu.
- Yu mit blong seven taem nao wetem wan man o woman we ol misinari oli bin stap tijim hem ova tu(2) yia nao. I soem smol saen nomo blong progres.
Selektem wan long ol misinari lesen. Faenemaot wan o tu(2) ves blong skripja long wanwan prinsipol we i stap ia. Praktisim tijing long ol ves ia olsem oli putum long seksen ia “Yusum Ol Skripja” long japta ia.

Kompanion Stadi mo Jenisim Kompanion

Ridim stori blong Amon mo King Lamonae long Alma 18–19 mo stori blong Eron long Alma 22:4–18. Taem yu rid, faenemaot olsem wanem Amon mo Eron:
- Oli folem Spirit mo tij wetem lav.
- Statem blong tij.
- Jenisim tijing blong olgeta folem ol nid.
- Serem testemoni.
- Yusum ol skripja.
- Askem ol kwestin, lisin, mo helpem olgeta we oli stap tijim blong ansarem ol wari blong olgeta.
- Leftemap tingting blong olgeta we oli stap tijim blong mekem ol komitmen.
Tokbaot olsem wanem seves mo tijing blong olgeta i wok long King Lamonae, papa blong hem, mo Abis.

Distrik Kaonsel, Son Konfrens,mo Misin Lida Kaonsel

Invaetem ol memba o olgeta yu jes stap tijim olgeta i kam long miting blong yu. Eksplenem long grup se yu wantem ol misinari blong mekem fasin blong olgeta blong serem ol impoten mesej blong olgeta i kam gud moa. Selektem wan lesen mo wan skil. Mekem ol misinari i tijim man o woman o pipol long lesen we yu bin selektem blong 20 minit mo lukluk moa long skil we yu bin jusumaot. Mekem olgeta we oli stap tijim i jenis afta long 20 minit. Afta we ol misinari oli finis blong tij, karem grup i kam tugeta. Mekem man o woman o pipol ia, i talem long ol misinari wanem nao oli mekem i gud mo wanem oli nidim blong kam moa gud long hem o mekem i kam gud moa.
Soem vidio eksampol blong ol misinari i stap tijim o kontaktem ol pipol. Selektem wan skil mo tokbaot olsem wanem nao ol misinari oli yusum gud ol prinsipol blong skil ia.
Selektem wan skil, mo faenemaot doktrin o ol ves blong skripja we i sapotem skil ia. Tijim stamba doktrin blong skil ia long ol misinari.

Ol Misin Lida mo Ol Misin Kaonsela

Wanwan taem folem ol misinari taem oli tij. Mekem plan blong olsem wanem yu save tekem pat long taem blong tijing.
Leftemap tingting blong ol lokol lida blong oli tekem pat wetem ol misinari long tijing visit blong olgeta.
Soemaot mo helpem ol misinari blong praktisim wan long ol tijing skil we oli tokbaot gud long japta ia, tru askem olgeta ol gudfala kwestin mo lisin long olgeta.
Soemaot nambawan fasin blong yusum ol skripja taem yu stap tijim ol misinari long ol son konfrens, misin lidasip kaonsel, mo ol intaviu. Mekem i semmak taem yu tij wetem olgeta.
Helpem misinari andastanem ol skripja mo developem wan lav blong ol skripja. Elda Jeffrey R. Holland i givim wan toktok long ol misin lida:

“Lavem toktok blong God mo mekem i kam stamba kalja blong misin blong yu. … Luksave ol revelesen mo yusum ol skripja ia oltaem olsem ol stret tul blong wok blong ol misinari blong yu truaot laef blong olgeta.

“Taem yu tijim ol misinari blong yu—mo hemia hem i evri taem—tijim olgeta long ol skripja. Letem olgeta i luk wea ples yu karem paoa mo insperesen blong yu. Tijim olgeta blong lavem mo dipen long grup blong ol revelesen evri taem.

“Misin presiden blong [mi] i tij oltaem long Buk blong Momon mo ol [nara] skripja evri taem we mifala i stap wetem hem, o taem hem i luk se i stret blong mekem. Ol intaviu blong wanwan misinari i go oltaem wetem skripja. Ol aotlaen blong ol … miting oli karemaot olgeta long ol skripja. …

“Mifala i no bin save long taem ia, be presiden blong mifala i stap putum ol klos blong faet long mifala long raet mo lef han blong mifala, askem long mifala wetem evri paoa blong sol blong hem mo wetem evri save we hem i gat blong mifala i hang strong long rel blong aean ia blong mekem se bae mifala i no save gowe blong lus [luk long 1 Nifae 15:23–25]” (“The Power of the Scriptures” seminar for new mission leaders, June 25, 2022).