Pene10 : Ha’api’i nō te patu i te fa’aro’o ia Iesu Mesia
« Pene 10 : Ha’api’i nō te patu i te fa’aro’o ia Iesu Mesia », ’Ia poro haere i tā’u nei ’Evanelia : E arata’i nō te fa’a’itera’a i te ’Evanelia a Iesu Mesia (2023)
« Pene 10 », ’Ia poro haere i tā’u nei ’Evanelia
Hōho’a
Sermon on the Mount [Te ha’api’ira’a i ni’a i te mou’a], nā Harry Anderson.
Pene 10
Ha’api’i nō te patu i te fa’aro’o ia Iesu Mesia
’A feruri na
Nāhea vau i te ha’api’i i te ta’ata ma te pe’e i te Vārua ?
Nāhea vau i te ha’api’i nā roto mai i te mau pāpa’ira’a mo’a ?
Nāhea vau i te fa’a’ite i tō’u ’itera’a pāpū ’ia ha’api’i ana’e au ?
Nāhea vau i te fa’anaho ’e i te fa’atano i tā’u ha’api’ira’a nō te pāhono i te mau hina’aro o te ta’ata ?
Nāhea vau i te ui atu i te mau uira’a maita’i a’e ’e e riro ’ei ta’ata fa’aro’o maita’i a’e ?
Nāhea vau i te tauturu i te ta’ata ’ia ’ite mai i te mau pāhonora’a i tā rātou mau uira’a, ’e ’ia fa’ari’i i te arata’ira’a ’e te pūai ?
’Ua pi’ihia ’oe nō te ha’api’i i te ’evanelia tei fa’aho’ihia mai a Iesu Mesia i te mau ta’ata ato’a ’o te fa’ari’i mai ia ’oe. Te ha’api’ira’a ’o te pū mau ïa o te mau mea ato’a tā ’oe e rave. ’A turu’i ai ’oe i ni’a i te Fatu nō te tauturu, ’ua fafau mai ’oia ē :
« ’E ’o ’oia ’o tē fa’ari’i mai ia ’outou na, ’ei reira ato’a ïa vau, nō te mea e haere au nā mua i tō ’outou mata. E vai ho’i au i tō ’outou pae ’atau ’e i tō ’outou pae ’aui […] ’ei roto ho’i tō’u Vārua i tō ’outou [’ā’au], ’e tā’u mau mēlahi ho’i e ’ati noa a’e ia ’outou na, ’ia ha’amara’a mai ia ’outou i ni’a » (Te Ha’api’ira’a Tumu ’e te mau Fafaura’a 84:88
’A pure, ’a tītau i te ’ite ’e ’a ’ohipa nō te ha’amaita’i i tō ’oe ’aravihi nō te ha’api’ira’a. ’A fa’a’ohipa i te mau parau tumu o teie pene ’e o te tahi atu mau pene o teie buka. ’A mā’imi hōhonu i te hōro’a nō te ha’api’ira’a, ’ia nehenehe ia ’oe e ha’amaita’i ia vetahi ’ē ’e ’ia fa’ahanahana i te Atua. E tauturu te Fatu ia ’oe ’ia ha’api’i ma mana ’e te ha’amanara’a, ’a ’imi itoito ai ’oe iāna ’e ’ia ha’api’i mai i tāna parau.
’A ’imi i te ha’api’i mai tā te Fa’aora i ha’api’i.
I roto i tāna tāvinira’a i te fenua nei, « haere atura Iesu […] i te ha’api’ira’a […] ’e te a’ora’a […] ’e te fa’aorara’a » (Mataio 4:23). ’Ua ha’api’i ’oia ia rātou i roto e rave rahi vāhi—i roto i te mau sunago, te mau fare, ’e i ni’a i te arati’a. ’Ua ha’api’i ’oia i roto i te mau rurura’a rarahi ’e i roto i te mau ’āparaura’a ’ōmo’e. Te tahi pae o tāna mau fārereira’a pūai mau, e mea poto roa ïa ’aore rā i roto i te mau vāhi mātau-’ore-hia. ’Ua ha’api’i ’oia nā roto i tāna mau ’ohipa ’oia ato’a nā roto tāna mau parau.
’Ua ha’api’i te Fa’aora i te ta’ata tāta’itahi ’ia au i tōna mau hina’aro ta’a ’ē. ’Ei hi’ora’a, i tōna tāvinira’a i te hō’ē ta’ata hāpepa, ’ua fa’a’ore ’oia i tāna mau hara ’e ’ua fa’aora iāna (hi’o Mareko 2:1–12). I tōna aupurura’a i te hō’ē vahine tei fa’aturi, ’ua pāruru ’oia ’iāna ’e ’ua ani atu iāna ’eiaha e hara fa’ahou (hi’o Ioane 8:2–11). I tōna ’āparaura’a ’e te ta’ata tao’a rahi tei hina’aro i te ora mure ’ore, ’ua « aroha atu ra [’oia] iāna » noa atu te pāto’ira’a a te tamaiti i tāna anira’a manihini ’ia pe’e mai iāna (Mareko 10:21 ; hi’o i te mau ’īrava 17–21).
E nehenehe ’oe e ha’amaita’i i tā ’oe ha’api’ira’a ma te ’apora’a mai, e mea nāhea te Fa’aora i te ha’api’ira’a. ’Ei hi’ora’a, ’ua here ’oia i te Metua ’e te feiā tāna e ha’api’i ra. Tei roto noa ’oia i te pure. ’Ua ha’api’i ’oia nā roto mai i te mau pāpa’ira’a mo’a. ’Ua fa’aineine iāna i te pae vārua ’Ua ui ’oia i te mau uira’a fa’auruhia. ’Ua ani manihini ’oia i te ta’ata ’ia ha’a ma te fa’aro’o. ’Ua fa’aau ’oia i te mau parau tumu o te ’evanelia i te orara’a o te mau mahana ato’a.
’A tītau i te ha’api’i mai tā te Fa’aora i ha’api’i ’o te hō’ē ïa ’ohipa nō te orara’a tā’āto’a. E tae mai te reira ia ’oe te tahi vāhi iti i’ō nei ’e te tahi vāhi iti i’ō atu ’a pe’e ai ’oe iāna (hi’o 2 Nephi 28:30 ; Etera 12:41).
« ’A ’imi ’ia noa’a tā’u parau »
Nō te ha’api’i i te ’evanelia a Iesu Mesia, e ti’a ia ’oe ’ia ’ite i tō te reira ha’api’ira’a tumu ’e te mau parau tumu niu. E ti’a ato’a ia ’oe ’ia roa’a i te ’itera’a pae vārua ’e te ha’apāpūra’a o te mau parau mau o te ’evanelia. ’Ua parau te Fatu, « ’Eiaha e tītau ’ia a’o atu i tā’u nei parau, ’a tītau rā nā mua ’ia noa’a ia ’oe tā’u nei parau ».
Te aura’a ’ia « noa’a » te parau a te Fatu ’o te tītaura’a ïa i te ’ite i te reira ’e te vaihora’a i te reira ’ia tomo hōhonu roa atu i roto i te ’ā’au. ’A rave ai ’oe i teie tauto’ora’a, ’ua fafau ’oia, « ’ei reira tō ’oe arero e matara ai ;’ei reira, mai te mea tē hina’aro ra ’oe, e noa’a ïa ia ’oe tā’u Vārua ’e tā’u nei parau, ’oia ïa, te mana o te Atua e tae noa atu i te ha’apāpūra’a atu i te mana’o o te ta’ata nei » (Te Ha’api’ira’a Tumu ’e te mau Fafaura’a 11:21).
Hōho’a
ta’ata e tāpa’o ra i te mau pāpa’ira’a mo’a
’Ua parau ato’a te Fatu e « ha’aputu noa i roto i tō ’outou mau ferurira’a i te mau taime ato’a i te mau parau nō te ora » (Te Ha’api’ira’a Tumu ’e te mau Fafaura’a 84:85). E mara’a mai te ha’aputu-noa-ra’a i te mau parau a te Fatu i tō ’oe ’ite ’e e ha’apūai i tō ’oe ’itera’a pāpū. E mara’a ato’a mai tō ’oe hina’aro ’e tō ’ōru’a ’aravihi nō te ha’api’i i te ’evanelia. (Hi’o Iakoba 4:6–7 ; Alama 32:27–42 ; 36:26 ; 37:8–9.)
Nā roto i te pure, ’ia noa’a ’e ’a fa’aherehere i te parau a te Fatu nā roto i te tītaura’a i te ’ite i te mau pāpa’ira’a mo’a, te mau parau a te mau peropheta ora, ’e i te mau ha’api’ira’a i roto i te pene 3.
Ha’api’i i te ta’ata ma te pe’e i te Vārua
Te ’evanelia a Iesu Mesia ’o te « mana ïa o te Atua, ’ia ora te feiā ato’a i fa’aro’o ra » (Roma 1:16). Nō teie tumu, e ti’a i te parau poro’i o te fa’aho’i-fa’ahou-ra’a mai o te ’evanelia ’ia ha’api’ihia nā roto i te mana o te ra’i—te mana o te Vārua Maita’i.
E mea faufa’a ’ia fa’ananea ’oe i te mau ’aravihi nō te ha’api’ira’a. E mea faufa’a ato’a ’ia ha’api’i mai ’oe i te ha’api’ira’a tumu ’e te mau parau tumu tā ’oe e ha’api’i. Nō reira, ’ia ha’api’i ana’e i te mau parau mau pae vārua, ’eiaha e turu’i noa i ni’a i tō ’oe iho mau ’aravihi ’e te ’ite.
E aha te aura’a ’ia ha’api’i i te ta’ata ma te pe’e i te Vārua
’Ia ha’api’i ana’e ’oe i te ta’ata ma te pe’e i te Vārua, e pure ’oe ’ia vai mai te mana o te Vārua Maita’i i roto i tā ’oe ha’api’ira’a. E pure ato’a ’oe ē ’ia fa’ari’i te ta’ata i te mau parau mau nā roto i te Vārua. E nehenehe te ta’ata ’ia ti’aturi i te tahi mau parau mau, terā ra ’ia fa’afāriuhia mai, e ti’a ia rātou ’ia roa’a i te ’itera’a ’e te Vārua (hi’o Te Ha’api’ira’a Tumu ’e te mau Fafaura’a 8:2–3).
’A fa’aineine ia ’oe ’ia riro ’ei mauha’a nā roto ho’i i te reira e nehenehe ai te Vārua e ha’api’i. ’A feruri i te Vārua Maita’i ’ei hoa nō ’oe i roto i te ha’api’ira’a.
’A turu’i i ni’a i te Vārua Maita’i nō te tauturu ia ’oe ’ia ’ite i te mea e parau atu. E fa’aha’amana’o mai ’oia i te ha’api’ira’a tumu ’o tā ’oe i tuatāpapa. E tauturu ’oia ia ’oe ’ia fa’anaho ’e ’ia fa’atano i te mea tā ’oe e ha’api’i ra ’ia au i te mau hina’aro o te ta’ata.
’Ia ha’api’i ana’e ’oe i te ta’ata ma te pe’e i te Vārua, e ’āfa’i atu ’oia i tā ’oe parau poro’i i roto i te ’ā’au o te ta’ata. E ha’apāpū ’oia i tā ’oe parau poro’i ’ia fa’a’ite ana’e ’oe i tō ’oe ’itera’a pāpū. E fa’ateiteihia ’oe ’e te feiā ’o tē fa’ari’i i te mea tā ’oe e ha’api’i i te ta’ata ma te pe’e i te Vārua, e māramarama te tahi ’e te tahi ’e e ’oa’oa ’āmui ’outou. (Hiʼo 2 Nephi 33:1 ; Te Ha’api’ira’a Tumu ’e te mau Fafaura’a 50:13–22.)
Hōho’a
Peresideni Ezra Taft Benson
« Te Vārua ’o te tuha’a faufa’a roa ïa i roto i teie ’ohipa. Nā te Vārua e ha’amaita’i i tō ’oe pi’ira’a, e nehenehe tā ’oe e rave i te mau temeio nō te Fatu i roto i te ’āua misiōni. ’Aita ana’e te Vārua, e’ita roa ïa ’oe e manuia noa atu tō ’oe tārēni ’e tō ’oe ’aravihi » (Ezra Taft Benson, seminaire nā te mau peresideni misiōni ’āpī, 25 nō Tiunu 1986).
Te parau fafau nō tō ’oe pi’ira’a
’Ua pi’ihia ’oe ’e ’ua fa’ata’ahia « nō te poro haere i tā’u nei ’evanelia nā roto i te Vārua, ’oia ho’i te Fa’aa’o, ’o tei tonohia atu nō te ha’api’i atu i te parau mau » (Te Ha’api’ira’a Tumu ’e te mau Fafaura’a 50:14). I te tahi taime, e nehenehe e tae mai ia ’oe te mana’o hitahita ’aore rā ’aravihi ’ore. Penei a’e tē ha’ape’ape’a nei ’oe nō te ’orera’a i nava’i te ’ite ’aore rā ’aita i nava’i te ’itera’a.
Tō ’oe Metua i te ao ra, tei mātau maita’i roa ia ’oe, ’ua pi’i ia ’oe nō te mea e nehenehe ’oe e hōro’a ’ei pipi itoito nā Iesu Mesia. E’ita roa ’oia e fa’aru’e ia ’oe. ’A ti’aturi ē e ha’amaita’i te Vārua i tō ’oe mau ’aravihi ’e e ha’api’i i te parau mau i te feiā e fa’aro’o mai.
Hōho’a
Elder Neil L. Andersen
’Ua parau Elder Neil L. Andersen : « ’A feruri ai au i te tāmatara’a o te hō’ē misiōni, ’ua tae mai te mana’o iā’u te ’aravihi ’ore roa ’e te ineine ’ore. Tē ha’amana’o nei au i te purera’a vau, ‘e te Metua i te ao ra, nāhea e ti’a ai iā’u ’ia tāvini i te hō’ē misiōni, e mea iti ho’i tō’u ’ite ?’ ’Ua ti’aturi au i te ’Ēkālesia, terā rā, ’ua ’ite rā vau e mea iti roa tō’u ’ite pae vārua. ’A pure ai au, tae mai nei te mana’o : ‘’Aita ’oe i ’ite i te mau mea ato’a, ’ua nava’i rā tā ’oe ’ite !’ Nā taua ha’apāpūra’a ra i hōro’a mai iā’u i te itoito nō te rave i te ta’ahira’a i muri iho i roto i te ’āua misiōni » (« You Know Enough [’Ua nava’i tō ’oe ’ite] », Liahona, Nov. 2008, 13).
’A ani manihini i te Vārua ’a ha’amata ai ’oe i te ha’api’i
Ma’a taime riri mātāmua ’e te ta’ata e mea faufa’a roa ïa. ’Ia vai mau noa ’e te fa’atura. Fa’a’ite i te ’ana’anatae mau ’e te here. ’A ’imi ’ia roa’a mai tō rātou ti’aturira’a. Hō’ē rāve’a nō te roa’a mai te ti’aturira’a, ’ia putapū ana’e te ta’ata i te Vārua ’e ’oe.
’A ui i te tahi mau uira’a ’ōhie nō te tauturu ia ’oe ’ia māramarama i tō rātou tupura’a, ’e tō rātou mau tīa’ira’a nō ni’a i tō ’oe fārereira’a mai. ’A fa’aro’o maita’i.
Hou ’oe ’a ha’amata ai, ’a ani manihini i te tā’āto’ara’a ’ia ’āmui mai i roto i te ha’api’ira’a. E fa’aitoito ia rātou e tātara ’ē atu i te mau fa’anevanevara’a ’ia nehenehe i te Vārua o te Fatu ’ia putapūhia.
E fa’ata’a atu ē, tē hina’aro nei ’oe e ha’amata ’e e fa’aoti i te ha’api’ira’a nā roto i te pure. E pupu atu nō te hōro’a i te pure ha’amatara’a. ’A pure ’ōhie noa ’e mā te ’ā’au tae, ’ia nehenene te Atua e ha’amaita’i mai i te feiā tā ’oe e ha’api’i nei, i roto i te mau huru ato’a o tō rātou orara’a. ’A pure ’ia putapū rātou i te parau mau nō te mea tā ’oe e ha’api’i ra. E ha’amana’o ē « te pure fa’a’ū’ana a [te ta’ata] parauti’a ra, e mea ti’a-rahi-hia mai ïa » (Iakobo 5:16).
’Ia vai te fa’aro’o i roto i te mana o te fa’afāriura’a o te Vārua Maita’i. Ma te arata’ihia e te Vārua, e nehenehe ’oe e fa’a’ite i te mau mana’o mai teie i muri nei, ’a ha’amata ai ’oe i te ha’api’i :
’O te Atua tō tātou Metua here i te ao ra. E mau taea’e ’e e mau tuahine tātou pā’āto’a. Tē hina’aro nei ’oia ’ia tāmata tātou i te ’oa’oa.
E mau tāmatara’a ’e e mau fifi tō tātou pā’āto’a. Noa atu te mea tā ’outou e fa’aruru nei, e nehenehe Iesu Mesia ’e tāna mau ha’api’ira’a e tauturu ia ’outou. E nehenehe ’oia e tauturu ia ’outou ’ia ’ite mai te hau, te tīa’ira’a, te fa’aorara’a, ’e te ’oa’oa. E nehenehe Iesu e tauturu ia ’outou ’ia roa’a mai te pūai rahi nō te fa’aruru i te mau fifi o te orara’a.
E rave tātou pā’ato’a i te mau hape ’o tē nehenehe e fa’atupu mai i te nino’a mana’o fa’ahapa, te ha’amā ’e te tātarahapa. E mōrohi teie mau nino’a mana’o i te taime noa ’a tātarahapa ai tātou ’e ’a ’imi ai i te fa’aorera’a hara a te Atua. Mea nā roto noa i te Tāra’ehara a Iesu Mesia tātou e nehenehe ai e fa’aora-hope-roa-hia ai i tā tātou mau hara.
E riro māua ’ei arata’i ’ia nehenehe ia ’outou e ha’api’i mai i te parau mau o tā māua parau poro’i nō ’outou iho. E ani manihini māua ia ’outou ’ia rave i te tahi mau ’ohipa, mai te tai’ora’a, te purera’a ’e te haerera’a i te purera’a. Tō māua ti’ara’a ’o tē tauturura’a ia ’outou ’ia ’ohipa i ni’a i teie mau anira’a manihini ’e ’ia fa’ata’a mai i te mau ha’amaita’ira’a tā ’outou e nehenehe e fa’ari’i. ’A ui mai i te mau uira’a.
’Ua pi’ihia māua e te hō’ē peropheta a te Atua nō te fa’a’ite i te mea tā māua i ’ite. ’Ua ’ite māua ē, e parau mau tā māua parau poro’i.
E ha’api’i māua ia ’outou e nāhea ’ia rave i te mau fafaura’a, ’aore rā te mau parau fafau ta’a ’ē, ’e e Atua. E fa’atu’ati teie mau fafaura’a ia ’outou i te Atua ’e e fa’ati’a ia ’outou ’ia fa’ari’i nā roto mai iāna i te ’oa’oa, te pūai, ’e te mau parau fafau ta’a ’ē.
E ha’api’i mai ’outou nāhea ’ia rave i te mau tauira’a i roto i tō ’outou orara’a ’e ’ia pe’e ia Iesu Mesia ’e i tāna mau ha’api’ira’a. Te hō’ē ha’api’ira’a rahi a Iesu Mesia, ’e te fafaura’a mātāmua tā tātou e rave, ’o te pe’era’a i tōna hi’ora’a ’e ’ia bāpetizohia nā roto i te ha’amanara’a tano (hi’o Ioane 3:5 ; Te Ha’api’ira’a Tumu ’e te mau fafaura’a 22).
Hōho’a
mau misiōnare e pure ra
Hou ’a ha’api’i ai i te hō’ē ha’api’ira’a, ’a hōro’a i te hō’ē hi’ora’a rere ā manu nō te mea tā ’oe e ha’api’i. Tauturu i te ta’ata ’ia ’ite nō te aha te reira e riro ai ’ei mea faufa’a nō rātou. ’Ei hi’ora’a, e nehenehe ’oe e parau, « tei i’ō nei māua nō te fa’a’ite i te parau poro’i ē, ’ua ha’amau Iesu Mesia i tāna ’Ēkālesia i ni’a i te fenua nei i teie mahana ’e ’ua pi’i i te mau peropheta ora nō te arata’i ia tātou ». ’Aore rā, e nehenehe ’oe e parau, « tei i’ō nei māua nō te tauturu ia ’oe ’ia ’ite ē, ’ua here te Atua ia ’oe ’e e fa’anahora’a nō te ’oa’ora tāna nō ’oe ».
E fana’o te mau ta’ata ato’a i te reira, ’a fa’ari’i ai ’e ’a ora ai rātou i te ’evanelia a Iesu Mesia. Penei a’e e ha’amaita’i te Metua i te ao ra i te feiā tā ’oe i ’ite mai ma te pūpūra’a i te fa’aineinera’a tao’a rahi pae vārua (hi’o Alama 16:16–17).
E tauturu te anira’a manihini i te Vārua ’e te fa’a’itera’a i te parau mau i te rurura’a mātāmua, i te ta’ata ’ia ’ite ia ’oe ’ei tāvini nō te Fatu.
Ha’api’ira’a ta’ata hō’ē ’e ha’api’ira’a ’e te hoa misiōnare
’A fa’a’ohipa i te mau mana’o i roto i teie tuha’a, nō te rave i te mau rāve’a rau nō te ha’amata i te hō’ē ha’api’ira’a.
Fa’a’ohipa i te mau pāpa’ira’a mo’a
E mau mauiha’a niu te mau pāpa’ira’a mo’a a te ’Ēkālesia nō te ha’api’i i te ’Evanelia a Iesu Mesia tei fa’aho’i-fa’ahou-hia mai. E rave rau tumu nō te aha e tītauhia ai ’ia fa’a’ohipa i te mau pāpa’ira’a mo’a ’ei niu nō tā ’oe ha’api’ira’a. ’Ei hi’ora’a :
E ani manihini te mau pāpa’ira’a mo’a i te Vārua Maita’i i roto i tā ’oe ha’api’ira’a (hi’o Luka 24:13–32)).
E mana pūai a’e tō te mau pāpa’ira’a mo’a i ni’a i te ferurira’a o te ta’ata i te tahi atu mea (hi’o Alama 31:5).
E pāhono te mau pāpa’ira’a mo’a i te mau uira’a rarahi o te vairua ta’ata (hi’o pene 5 ; hi’o ato’a 2 Nephi 32:3 ; Iakoba 2:8).
E hōro’a mai te mau pāpa’ira’a mo’a i te ha’amanara’a ’e te manara’a i tā ’oe ha’api’ira’a.
Ma te fa’a’ohipara’a i te mau pāpa’ira’a mo’a i roto i tā ’oe ha’api’ira’a, e nehenehe ’oe e tauturu ia vetahi ’ē ’ia ha’amata i te ’imi maita’i i te mau pāpa’ira’a nō rātou iho. ’Ia ’ite-ana’e-hia tō ’oe here nō te mau pāpa’ira’a mo’a, e fa’aitoitohia rātou ’ia imi maita’i. ’A fa’a’ite nāhea te ’imi-maita’i-ra’a i te mau pāpa’ira’a mo’a i te tauturu ia rātou ’ia ha’api’i mai i te ’evanelia ’e ’ia ’ite i te here o te Atua. ’A hōro’a i te mau hi’ora’a e nāhea te mau pāpa’ira’a mo’a i te tauturu ia rātou ’ia ’ite mai i te mau pāhonora’a i tā rātou mau uira’a ’e ’ia fa’ari’i i te arata’ira’a ’e te pūai.
’A pūpū ia ’oe iho ’ia ’imi maita’i i te mau pāpa’ira’a mo’a ’ia nehenehe ia ’oe ’ia ha’api’i ma te ’aravihi nā roto mai i te reira (hi’o pene 2). E maita’i roa mai tō ’oe ’aravihi nō te ha’api’i nā roto mai i te mau pāpa’ira’a mo’a, ’a ’imi maita’i ai ’oe i te reira i te mau mahana ato’a, te ta’ata hō’ē ’e te hoa misiōnare.
E tauturu i te ta’ata ’ia fa’ananea i tō rātou fa’aro’o ia Iesu Mesia ma te ’imi-maita’i-ra’a i te mau pāpa’ira’a mo’a, te Buka a Moromona ihoā rā. E nehenehe te mau mana’o i muri nei e tauturu.
Hōho’a
pupu e ’imi ra i te mau pāpa’ira’a mo’a
Fa’aōra’a mai i te mau pāpa’ira’a mo’a
’A fa’a’ite poto noa i te tupura’a o te tuha’a ’īrava. Tē fa’a’ite nei te mau hi’ora’a i muri nei i te tahi mau rāve’a nō te fa’aō mai i te hō’ē pāpa’ira’a mo’a :
« I roto i te ’ā’amu o Iosepha Semita, tē fa’ati’a nei Iosepha ia tātou nā roto i tāna iho mau parau, i te mea i tupu ’a pure ai ’oia i roto i te uru ra’au. ’Ua parau ’oia, ‘’ite atu ra vau i te hō’ē pou māramarama …’ »
« I roto i teie tuha’a, tē ha’api’i nei te peropheta Alama i te feiā veve ’ia fa’a’ohipa i tō rātou fa’aro’o i roto i te parau a te Atua. ’Ua fa’aau ’oia i te parau a te Atua i te hō’ē huero ’o te nehenehe e tanuhia i roto i tō tātou ’ā’au. E hina’aro ānei ’oe e ha’amata i te tai’o mai i te ’īrava … ? »
Tai’o i te tuha’a
E tai’o i te mau ’īrava ma te reo pūai ’aore rā e ani i te ta’ata tā ’oe e ha’api’i nei ’ia tai’o pūai mai. ʼIa vai ara maita’i nō te feiā e mea fifi ’ia tai’o. Mai te peu e mea fifi te tuha’a nō te māramarama nō rātou, ’a tai’o nā muri ia rātou ’e ’a fa’ata’a atu mai te mea e hina’arohia. ’A tātara i te aura’a o te mau ta’o ’aore rā o te mau pereota fifi. ’Aore rā ’a hōro’a ia rātou i te hō’ē tuha’a ’īrava ’ōhie nō te tai’o. E ani ia rātou ’ia mā’imi mai i te mau parau ta’a ’ē i roto i te reira tuha’a ’īrava.
Fa’a’ohipa i te mau pāpa’ira’a mo’a
’Ua parau Nephi, « ’ua fa’aau ho’i au i te mau parau pāpa’ira’a mo’a ato’a ia mātou, ’ia riro te reira ’ei maita’i ’e ’ei ha’api’ira’a ho’i nō mātou » (1 Nephi 19:23). Te aura’a o te « fa’aaura’a » ’o te fa’a’ohipara’a ïa i te mau pāpa’ira’a mo’a i roto i tō ’oe orara’a.
’A fa’aau i te mau pāpa’ira’a mo’a i te feiā o tā ’oe e ha’api’i nei, ma te fa’a’itera’a e nāhea te mau ’ā’amu ’e te mau parau tumu e tano ai i tō rātou iho huru. ’Ei hi’ora’a :
« Mai ia ’outou, e mau hōpoi’a teimaha mau tā te nuna’a o Alama e amo nei, ’ua hau atu i te nehenehe ia rātou e fa’a’oroma’i. I tō rātou rā fa’a’ohipara’a i te fa’aro’o ’e te purera’a, ’ua ha’apūaihia rātou e te Atua ’ia nehenehe ia rātou ’ia fa’a’oroma’i i te mau tāmatara’a. I muri iho, ’ua fa’aora ’oia ia rātou i tō rātou mau ’ati. Mai tāna i rave nō teie nuna’a, ’ua ’ite au e tauturu mai te Atua ia ’oe i roto i tō ’oe mau fifi ’a […] ai ’oe » (Hi’o Mosia 24.)
« E tano maita’i te ha’api’ira’a a Alama i te feiā i te mau pape nō Moromona nō tātou i teie mahana. E Tihoni, ’ua ineine ānei ’oe nō … ? » (Hi’o Mosia 18)
’A ha’api’i i te ta’ata e nāhea ’ia « fa’aau » i te mau pāpa’ira’a mo’a ia rātou iho. Te ’itera’a mai i te mau fa’aaura’a nō ta’ata iho, e tauturu te reira ia rātou ’ia fa’a’ohipa ’e ’ia ora i te mana o te parau a te Atua.
E ani manihini ’e ’a tauturu i te ta’ata ’ia tai’o i tō rātou pae
E tītauhia i te ta’ata tā ’oe e ha’api’i nei ’ia tai’o i te mau pāpa’ira’a mo’a, i te Buka a Moromona ihoā rā, nō te roa’a i te hō’ē ’itera’a pāpū nō te parau mau. Ma te fa’a’ohipa-’aravihi-ra’a i te mau pāpa’ira’a mo’a i roto i tā ’oe ha’api’ira’a, e nehenehe ’oe e tauturu i te ta’ata ’ia ha’amata i te ’imi-maita’i-ra’a i te mau pāpa’ira’a mo’a i tō rātou pae.
I muri mai i te fārereira’a tāta’itahi, ’a hōro’a atu i te mau pene ’aore rā i te mau ’īrava ta’a ’ē nō te tai’o nā rātou ’A hōro’a atu ia rātou i te mau uira’a e feruri i roto i tā rātou tai’ora’a. ’A fa’aitoito ia rātou ’ia ’imi maita’i i te mau pāpa’ira’a mo’a i te mau mahana ato’a, rātou ana’e ’e e tō rātou ’utuāfare. E nehenehe ato’a ’oe e ani i te mau melo ’ia tai’o ’e ’o rātou nā roto i te mau ha’api’ira’a.
Hou ’a ha’amata ai i te ha’api’ira’a nō muri iho, ’a hi’o fa’ahou i te mau mea tā ’oe i ani manihini i te ta’ata ’ia tai’o. Mai te mea e hina’arohia, ’a tauturu ia rātou ’ia hāro’aro’a ’e ’ia « fa’aau » i teie mau pāpa’ira’a mo’a. ʼA faʼaitoito ia rātou ’ia pāpa’i i tō rātou mau manaʼo ʼe mau uira’a.
’Ia tauturu ana’e ’oe i te ta’ata ’ia tai’o, ’ia hāro’aro’a ’e ’ia fa’a’ohipa i te mau pāpa’ira’a mo’a—te Buka a Moromona ihoā rā—e ora rātou i te mau ’itera’a pae vārua ’e te parau a te Atua. E nehenehe maita’i a’e nō rātou ’ia tai’o rātou ana’e ’e ’ia fa’ariro i te mau pāpa’ira’a mo’a ’ei mea faufa’a nō tō rātou orara’a.
Hōho’a
mau misiōnare e ha’api’i ra i te ’utuāfare
Tauturu i te ta’ata ’ia roa’a te mau pāpa’ira’a mo’a
E roa’a te mau pāpa’ira’a mo’a ’e te mau parau a te mau peropheta ora nā roto e rave rahi rāve’a ’e nā roto e rave rahi reo ’ia fa’aauhia i mua a’e nei. ’A hi’o e aha te mau rāve’a nene’ira’a ’e nūmeri e roa’a nō te ta’ata tā ’oe e ha’api’i ra. ’A tauturu i te ta’ata ’ia roa’a te mau pāpa’ira’a mo’a ma te rāve’a e tano i tō rātou mau hina’aro ’e mau mā’itira’a. ’A feruri i te mea i muri nei :
E ani i te ta’ata e aha te reo e mea au a’e nā rātou ’ia tai’o ’aore rā ’ia fa’aro’o i te mau pāpa’ira’a mo’a.
Nō te feiā e mea fifi nō rātou ’ia tai’o, ’aore rā mea fifi ’ia māramarama i te mea tā rātou e tai’o ra, e nehenehe rātou e fāna’o i te tai’ora’a pūai ’aore rā i te fa’aro’o i te mau haruharura’a reo. ’Ua roa’a te reira nā roto i te fa’aaura’a rorouira ’aore rā te mau tahua natirara tāmoni ’ore a te ’Ēkālesia.
Mai te peu tē vai ra tā te ta’ata hō’ē tauiha’a nūmeri, ’a tauturu iāna ’ia roa’a te mau pāpa’ira’a mo’a, te Buka a Moromona ihoā rā. E mea tāmoni ’ore ’e e mea ’ōhie ’ia fa’a’ite i te fa’aaura’a rorouira o te Buka a Moromona ’e o te Vaira’a buka ’evanelia.
Mai te peu e fa’a’ohipahia te putu poro’i, te ’āparaura’a nūmeri, ’aore rā rata uira, ’a hāpono atu i te mau hono ’aore rā te mau hōho’a o te mau pāpa’ira’a mo’a. ’Ia ha’api’i ana’e ’oe nā roto i te ’āparaura’a video, ’a feruri i te fa’a’ite atu i tā ’oe paruai, ’ia nehenehe ’oe ’ia tai’o ’āmui i te mau ’īrava.
Tauturu i te ta’ata ’ia roa’a i te mau parau a te mau peropheta ora.
Ha’api’ira’a ta’ata hō’ē ’e ha’api’ira’a ’e te hoa misiōnare
’Ia pāpū maita’i ia ’oe ’e i tō ’oe hoa misiōnare ē, ’ua fa’a’apī ’oe i te mau mātēria o te mau pāpa’ira’a mo’a i ni’a i tā ’oe niuniu paraparau, ’oia ato’a te fa’aaura’a rorouira o te Buka a Moromona ’e te Vaira’a buka ’evanelia.
Te hō’ē ’itera’a pāpū ’o te hō’ē ïa ’itera’a pae vārua tei hōro’ahia mai e te Vārua Maita’i. Te fa’a’itera’a i tō ’oe ’itera’a pāpū ’o te hōro’ara’a ïa i te hō’ē fa’ahitira’a ’ōhie, te ’āfaro nō te ’itera’a ’aore rā nō te ti’aturira’a nō te hō’ē parau mau o te ’evanelia. Te fa’a’itera’a i tō ’oe ’itera’a pāpū ’o te tu’ura’a atu ïa i tō ’oe iho ’itera’a pāpū nō te mau parau mau ’o tā ’oe i ha’api’i nā roto mai i te mau pāpa’ira’a mo’a.
Te fa’a’itera’a i tō ’oe ’itera’a pāpū ’o te hō’ē ïa rāve’a pūai nō te ani manihini i te Vārua ’e nō te tauturu ia vetahi ’ē ’ia putapū i tōna fa’aurura’a. Te hō’ē o te mau misiōni a te Vārua Maita’i ’o te fa’a’ite-pāpū-ra’a ïa nō te Metua i te ao ra ’e ia Iesu Mesia. E fa’atupu pinepine ’oia i te reira nā roto i te auhoara’a ia ’oe ’a fa’a’ite pāpū ai ’oe.
’Aita te hō’ē ’itera’a pāpū pūai i ha’amauhia i ni’a i te parau-’ōhie-ra’a ’aore rā i te fāito pūai o tō ’oe reo—i ni’a rā i te pāpūra’a ’e te ateatera’a o tō ’oe ’ā’au. E ara maita’i ’eiaha e rū noa ’aore rā e fa’a’ū’ana i tō ’oe ’itera’a pāpū. ’A hōro’a i te ta’ata te rāve’a ’ia putapū i te Vārua Maita’i e fa’a’ite ra ia rātou ē, e parau mau te mea tā ’oe i ha’api’i.
E nehenehe ato’a tō ’oe ’itera’a pāpū e riro e mea ’ōhie noa mai teie te huru « ’O Iesu Mesia tō tātou Fa’aora ’e Tāra’ehara » ’aore rā « ’Ua ha’api’i mai au nā roto iā’u iho ē, e parau mau te Buka a Moromona ». E nehenehe ato’a ’oe e fa’a’ite i te hō’ē ’itera’a poto, e mea nāhea te roa’ara’a ia ’oe teie ’itera’a pāpū.
’Ia ha’api’i ana’e ’oe, ’a fa’a’ite i tō ’oe ’itera’a pāpū ’a fa’auruhia ai ’oe, ’eiaha noa i te pae hope’a. ’Ia ha’api’i ana’e tō ’oe hoa misiōnare, ’a fa’a’ite i tō ’oe ’itera’a pāpū nō te hōro’a atu te piti o te ’itera’a pāpū nō te mea o tāna i ha’api’i.
’A fa’a’ite atu i tō ’oe ’itera’a pāpū ē, e riro te parau tumu tā ’oe e ha’api’i ra ’ei ha’amaita’ira’a nō te ta’ata e pe’e i te reira. ’A parau atu nā roto i te orara’a i te parau tumu, ’ua ha’amaita’ihia tō ’oe orara’a. E tauturu tō ’oe ’itera’a pāpū ateate ’ia fa’atupu i te hō’ē vāhi i reira te ta’ata e putapū ai, te ha’apāpū nei te Vārua Maita’i i te parau mau.
Ha’api’ira’a ta’ata hō’ē
E mau hi’ora’a te mau tuha’a ’īrava pāpa’ira’a mo’a i muri nei nō te fa’a’ite i te ’itera’a pāpū. ’A feruri i te mau uira’a ’a tai’o ai ’oe i te pāpa’ira’a mo’a tāta’itahi. ’A pāpa’i i tā ’oe mau pāhonora’a i roto i tā ’oe buka tāmahana.
I roto i teie mau ’īrava, e aha tā Iesu ’e tāna mau ’āposetolo ’e mau peropheta i fa’a’ite pāpu ?
Nāhea ’oe ’ia parau ē, ’ua pāpū maita’i ia rātou i te parau mau o te mea tā rātou e parau nei ?
’Ia parau ana’e ’oe « ’ua ’ite au e parau mau te reira », e aha te aura’a nō ’oe te reira ? E aha te tāhi atu mau ta’o tā ’oe e nehenehe e parau, nō te fa’a’ite i tō ’oe ti’aturira’a ?
’A fa’anaho ’e ’a ta’atano i tā ’oe ha’api’ira’a nō te pāhono i te mau hina’aro
E mea ta’a ’ē te ta’ata tāta’itahi tā ’oe e ha’api’i ra. ’A ’imi i te hāro’aro’a i tōna mau ’ana’anataera’a, mau hina’aro ’e mau māna’ona’ora’a pae vārua. ’A ui i te mau uira’a ’e ’a fa’aro’o maita’i. Noa atu ’aita paha ’oe i ta’a maita’i i te tā’āto’ara’a o te mau hina’aro o te ta’ata, ’a ha’amana’o ’ua ta’a maita’i i te Metua i te ao ra. E arata’i ’oia ia ’oe nā roto i te Vārua Maita’i.
Hōho’a
mau misiōnare e ha’api’i ra i nā ta’ata fa’aipoipo
’A vaiiho i te Vārua ’ia arata’i i te ’āna’ira’a o te mau ha’api’ira’a
’A vaiiho i te Vārua ’ia arata’i i te ’āna’ira’a ’a ha’api’i ai ’oe i te mau ha’api’ira’a. Tei ia ’oe te rāve’a nō te ha’api’i i te mau ha’api’ira’a ma te ’āna’ira’a e tano maita’i roa i te mau hina’aro, te mau uira’a ’e i te huru orara’a o te feiā tā ’oe e ha’api’i nei.
I te tahi taime, e nehenehe ’oe e ’āmui i te mau parau tumu o te mau ha’api’ira’a ta’a ’ē, nō te pāhono i te mau hina’aro ’e i te mau ’ana’anataera’a o te hō’ē ta’ata. ’A hi’o i nā e toru hi’ora’a i muri nei.
’Ua ’ite mai Yuki ia ’oe i ni’a i te natirara ’e tē ui nei nō te aha tōna mau hoa o te ’Ēkālesia ’aita rātou e puhipuhi nei i te ’ava’ava ’aore rā e inu i te ’ava. E nehenehe ’oe e ha’api’i iāna i te mau ha’amaita’ira’a o te mau fa’auera’a ma te fa’a’ohipara’a i te mau tuha’a i muri nei nō roto mai i te pene 3 :
’Aita o Samuel e ’ite ra i tōna rirora’a nō te hō’ē vāhi. E nehenehe ’oe e ha’api’i iāna i tōna ihota’ata ’e tōna pārahira’a i roto i te ’utuāfare o te Atua ma te fa’a’ohipa i te mau tuha’a i muri nei nō roto mai i te pene 3 :
’Ua ’imi maita’i Tatyana e rave rahi ha’apa’ora’a fa’aro’o ’e ’ua hina’aro ’ia ’ite i te mea e fa’ata’a ’ē nei i te ’Ēkālesia. E nehenehe ’oe e ha’api’i iāna nō ni’a i te fa’aho’i-fa’ahou-ra’a mai o te ’evanelia a Iesu Mesia ma te fa’a’ohipa i te mau tuha’a i muri nei nō roto mai i te pene 3 :
’Ua ’ite maita’i te Metua i te ao ra i tāna mau tamari’i, nō reira ’a ’imi i te fa’aurura’a nō te rave i teie mau fa’a’otira’a, ’a fa’aineine ai ’oe nō te ha’api’i. ’A pure nō te hōro’a o te ’ite-māite-ra’a, ’a fa’aoti ai ’oe e aha te mea e ha’api’i. ’A ara maita’i i te mau mana’o ’e i te mau nino’a mana’o ’o tē fā mai ia ’oe.
Hōho’a
’utuāfare e tai’o ra i te mau pāpa’ira’a mo’a
’A hōro’a i te taime i te ta’ata nō te fa’a’ohipa i te mea tā rātou i ’apo mai
’Ia ha’api’i ana’e ’oe, ’a hōro’a i te taime i te ta’ata ’ia fa’a’ohipa i te mea tā rātou i ’apo mai (hi’o 3 Nephi 17:2–3)). ’A ’imi mai i te mau rāve’a e tano nō te turu ia rātou ’ia ha’apa’o i tā rātou mau tītaura’a. ’A fa’atumu atu i ni’a i te tauturura’a ia rātou ma te mau ’ohipa ’o te patu i te niu o te fa’aro’o, mai te pure, te tai’ora’a ’e te haerera’a i te purera’a. E tauturu te reira ia rātou ’ia ha’apa’o i te mau tītaura’a hau atu ā.
’A fa’anaho ai ’e ’a ha’api’i ai ’oe, ’a feruri māite i te rahira’a ha’amāramaramara’a ’āpī ’o tā ’oe e fa’a’ite. Te hō’ē o te mau fā mātāmua o tā ’oe ha’api’ira’a ’o tē tauturura’a ïa i te hō’ē ta’ata ’ia fa’ananea i tōna fa’aro’o ia Iesu Mesia ’o tē arata’i atu i te tātarahapara’a. E ’ere tā ’oe fā i te hi’ora’a e hia ha’amāramaramara’a ’o tā ’oe e nehenehe e ha’aparare atu.
’A ha’api’i ma te hō’ē tīhauhau[rythme] e tano nō te ta’ata. ’A ui i te mau uira’a ’e ’a fa’aro’o maita’i, e ti’a ’ia māramarama maita’i ’oe e aha te fāito tōna ’apora’a mai ’e te fa’a’ohipara’a i te mea tā ’oe i ha’api’i.
E nehenehe te mau parau mau tā ’oe e ha’api’i ra, ’āpitihia ’e te mana o te Vārua Maita’i, e tura’i i te ta’ata ’ia fa’a’ohipa i tō rātou ti’amāra’a ma te rāve’a e ha’apūai i tō rātou fa’aro’o ia Iesu Mesia. ’A fa’a’ohipa ai rātou i te fa’aro’o i te Fatu ma te fa’a’ohipara’a i te mea tā rātou i ’apo mai, e ’ite rātou nā roto i te Vārua ē, e parau mau te ’evanelia.
’A fa’a’ohipa i te mau rāve’a rau o te ha’api’ira’a
E rave te mau rāve’a o te ha’api’ira’a e rave rahi hōho’a, mai te mau fārereira’a tino, te mau ’āparaura’a video, te mau tāniuniura’a, te mau putu poro’i ’e te mau rāve’a tōtiare.
Fa’atura i te taime o te ta’ata
’A tāpe’a ’ōhie noa ’e te poto tā ’oe ha’api’ira’a. E rahi a’e te ta’ata e hina’aro e fārerei ia ’oe, ’a fa’atura ai ’oe i tō rātou taime ’e tā rātou mau anira’a. ’A ani ia rātou e aha te taime roa nō te fārerei ia rātou. ’A ha’amata ’e ’a fa’aoti i te mau ’āparaura’a ato’a i te taime i fa’aauhia, ’e te ta’ata ānei ’aore rā nā te rāve’a nātirara. E ara maita’i ē, i te tahi mau vāhi e moni roa te mau ’āparaura’a tāniuniu ’aore rā te mau ’āparaura’a video.
E tītau ’oe e rave rahi fārereira’a nō te ha’api’i i te mau parau tumu i roto hō’ē noa ha’api’ira’a. Te tanora’a mau, ’eiaha te hō’ē fārereira’a nō te ha’api’ira’a ’ia hau atu i te 30 miniti te maoro, ’e e nehenehe ’oe e ha’api’i i te hō’ē ta’ata i roto noa e 5 minuti. ’A fa’atano i tā ’oe ha’api’ira’a ’ia au i te taime o te ta’ata.
Fa’a’ohipa i te ihi ano ha’a [technologie] ma te pa’ari
E rave rahi rāve’a tā ’oe nō te ha’api’i i te ta’ata ma te fa’a’ohipara’a i te ihi ano ha’a. E mea maita’i a’e nō te tahi mau ta’ata te fa’a’ōhiera’a ’aore rā te ’ōmo’era’a o te fārereira’a, nā roto i te mau rāve’a tāireuira. ’Oia ato’a te mau ta’ata ’o tā ’oe e fārerei tino nei, e nehenehe e fana’o i te turu hau atu maoti te ihi ano ha’a. E tāu’aparau i te mau rāve’a e vai nei nō te tūreiara’a. I muri iho, ’a pe’e atu ’e ’a vai tīhono noa. E vaiiho i te ti’ara’a o te ta’ata tāta’itahi e arata’i i tā ’oe mau ravera’a.
E nehenehe te mau ihi ano ha’a mai te mau niuniura’a video e riro ’ei tauturu ta’a ’ē, nō te ha’api’i i te ta’ata e mau tārena ’ohipa roa tā rātou ’aore rā e mea ātea te vāhi orara’a. I te tahi taime, e mea ’ōhie a’e nō te mau melo ’ia ’āmui atu i te hō’ē ha’api’ira’a nā roto i te ihi ano ha’a.
Tauturu i te feiā ’āpī e ’apo nei
I roto i te tāvinira’a a te Fa’aora, ’ua parau ’oia i tāna mau pipi, « ’a tu’u mai i te tamari’iri’i ’ia haere noa mai iā’u nei, e ’eiaha e tāpe’ahia atu ; mai ia rātou ho’i tō te bāsileia o te Atua » (Mareko 10:14). ’Ia ha’api’i ana’e ’oe i te mau tamari’i, ’a fa’atano i tā ’oe ravera’a ’e tā ’oe parau poro’i nō te pāhono i tō rātou mau hina’aro. ’A tauturu ia rātou ’ia ’apo mai i te ’evanelia ma te ’āparaura’a i te mau mea tei mātauhia e rātou. ’Ia pāpū ē, ’ua māramarama rātou i te mea tā ’oe e ha’api’i ra.
’Imira’a pāpa’ira’a mo’a
Tai’o Te Ha’api’ira’a Tumu ’e te mau Fafaura’a 84:85. E aha te aura’a ’ia hōro’a i « te tufa’a ’o tē fāitohia atu i te ta’ata ato’a » ? Nāhea ’oe i te fa’a’ohipa i te reira i roto i tā ’oe ha’api’ira’a ?
E aha tā te Fatu i fafau i te mau misiōnare ha’apa’o nō ni’a i te ’itera’a e aha te mea e parau atu ?
’Ua parau te Fatu, « ’ia haere tāta’ipiti atu ’outou nā roto i te mana o tō’u nei Vārua, i te poro-haere-ra’a i tā’u nei ’evanelia » (Te Ha’api’ira’a Tumu ’e te mau Fafaura’a 42:6). Tē fa’aue ato’a nei ’oia ia ’oe ’e tō ’oe hoa « ’ia tāhō’ē » (Te Ha’api’ira’a Tumu ’e te mau Fafaura’a 38:27). E pūai atu ā tā ’oe ha’api’ira’a ’e te ’ana’anatae mai te peu ’oe ’e tō ’oe hoa e ’ohipa tāhō’ē ’oe. ’A hōro’a te tahi i muri mai i te tahi i te mau tuha’a poto o te ha’api’ira’a.
I roto i te ha’api’ira’a ’e te hoa misiōnare, ’a ’āparaparau ’e ’a fa’a’ohipa i te rāve’a e nāhea ’oe ’ia ha’api’i ma te tāhō’ē. ’A fa’aineine e nāhea ’oe i te ha’a ’āmui ’a ha’api’i ai ’oe i te ta’ata nā ni’a i te natirara. ’A pe’e i te mau pārurura’a i roto i te fa’a’ohipara’a i te ihi ano ha’a, tei fa’ata’ahia i roto i te pene 2.
Hōho’a
misiōnare e ha’api’i ra i te hō’ē ta’ata
’Ia ha’api’i ana’e tō ’oe hoa misiōnare, ’a pure nōna, ’a fa’aro’o iāna, ’e ’a hi’o atu iāna. ’A pāturu i tō ’oe hoa misiōnare ma te hōro’ara’a i te piti o te ’itera’a pāpū nō te mau parau mau tāna e ha’api’i ra (hi’o Alama 12:1). ’A pe’e i tō ’oe mau fa’aurura’a ’ia tura’i-ana’e-hia ’oe e te Vārua ’ia parau i te tahi mea.
’Ia vai ’ana’anatae mau e te mau ta’ata ’o tā ’oe e ha’api’i nei. ’A fa’aro’o ia rātou. ’A tāmau noa i te hi’o atu ia rātou ’ia paraparau ana’e rātou ’aore rā ’oe. ’A hi’o maita’i i tā rātou mau pāhonora’a ’e ’a fa’a’ro’o i te mau muhumuhura’a pae vārua.
E ani i te mau melo ’ia ’āmui mai.
E ani manihini i te mau melo ’ia tauturu mai ia ’oe ’ia ha’api’i ’e ’ia turu i te feiā tā ’oe e ha’a nei i pīha’i iho. E nehenehe te reira e tupu ma te ta’ata tino roa ’aore rā nā roto i te rāve’a natirara. I roto i te mau rurura’a fa’aaura’a tāhepetoma, ’a tāu’aparau ’e te feiā fa’atere o te pāroita nō te ’ite mai ’o vai te nehenehe e tauturu mai.
’Ia ’āmui ana’e mai te mau melo i roto i te ha’api’ira’a ’e nō te fa’ahoara’a, e nehenehe rātou e hōro’a mai i te mau mana’o ’e e ha’amau i te mau tū’atira’a auhoa. E ’ite rātou i te ’oa’oa nō te ’ohipa misiōnare.
E ani manihini i te mau melo ’ia tauturu mai ia ’oe nō te ha’api’i
Hou te mau ha’api’ira’a, ’a fa’anaho ’e te mau melo e nāhea ’ia ha’a ’āmui. E nehenehe ’oe e fa’a’ohipa i te putu poro’i ’aore rā i te niuniura’a poto nō te ha’apāpū i te mea ’o tā ’oe e ha’api’i, nā vai e pure, nā vai e fa’atere i te ’āparaura’a ’e te tahi atu mau ha’apāpūra’a.
Te ti’ara’a mātamua o te mau melo i roto i te mau ha’api’ira’a ’o te hōro’ara’a ïa i te hō’ē ’itera’a pāpū ateate, te fa’a’ite-poto-ra’a i te mea i tupu nō rātou iho, ’e te fa’ananeara’a i te hō’ē tā’amura’a ’e te feiā e ha’api’ihia ra. E nehenehe ’oe e ani i te mau melo ’ia fa’a’ite e mea nāhea rātou i te ’apora’a mai, te fa’ari’ira’a ’e te orara’a i te hō’ē parau tumu ta’a ’ē i roto i te ha’api’ira’a. Mai te peu e melo fa’afāriuhia rātou, e ani ia rātou ’ia fa’a’ite mai e mea nāhea tō rātou fa’aotira’a e tomo mai i roto i te ’Ēkālesia.
’Ia fa’a’ite ana’e mai te melo i te hō’ē ta’ata, ’a ani atu iāna ’ia ’āmui mai i roto i te ha’api’ira’a. E ti’a i te melo ’ia fa’aō hope roa mai i roto i teie mau huru tupura’a. ’A a’o atu ia rātou e mea nāhea rātou e au ai ’ia ’āmui mai.
’A feruri e mea nāhea te fa’a’ohipara’a i te ihi ano ha’a nō te ha’api’i ’e te mau melo e tano ai. E fa’ati’a te ihi ano ha’a i te mau melo ’ia ’āmui mai ia ’oe, ’aita ana’e e taime e hina’arohia nō te hō’ē fārereira’a tino roa i te ta’ata.
I roto i te mau rurura’a fa’aaura’a tāhepetoma, ’a fa’anaho ’e te feiā fa’atere o te pāroita ’ia ’āmui mai hō’ē melo i te mau ha’api’ira’a ato’a e hina’arohia (hi’o pene 13). ’A feruri e ani atu i te mau melo ’āpī ’ia tauturu mai ia ’oe nō te ha’api’i.
Ha’api’ira’a ta’ata hō’ē ’e ha’api’ira’a ’e te hoa misiōnare
’A hāha’anūnui [imaginer] na ē, e fārereira’a tā ’oe nō te hōro’a i te hō’ē ha’api’ira’a i te hō’ē ’utuāfare i te nohora’a o te hō’ē melo. ’A tāu’aparau e nāhea ’oe i te fa’aō mai i te melo tāta’itahi i muri nei nō te tauturu ia ’oe ’ia ha’api’i :
Hō’ē misiōnare pāroita tei ho’i noa mai nei nā tāna misiōni rave tāmau
Hō’ē tahu’a
Hō’ē melo ’āpī
Te peresideni nō te pupu peresibutero ’aore rā nō te Sōtaiete Tauturu
Ani manihini i te mau melo ’ia hōro’a mai te pāturura’a
E nehenehe ato’a te mau melo e hōro’a mai i te turura’a ta’a ’ē i te mau ta’ata i rotopū i te mau fārereira’a nō te ha’api’ira’a. E nehenehe rātou e hāpono mai i te mau putu poro’i, tai’o ’āmui i te mau pāpa’ira’a mo’a, e ani manihini i te ta’ata ’ia haere mai i tō rātou vāhi nohora’a ’aore rā i te mau fa’a’oa’oara’a, ’aore rā ani manihini ia rātou ’ia pārahi ’āmui i te fare purera’a. E nehenehe rātou e pāhono i te mau uira’a ’e e fa’a’ite e mai te aha te huru o tō rātou orara’a ’ei melo nō te ’Ēkālesia. E nehenehe tō rātou ’itera’a o te orara’a ’e tō rātou hi’ora’a ātea e tauturu ia rātou ’ia ha’amau i te mau tā’amura’a ’e te ta’ata, ma te mau rāve’a i te tahi taime e mea ta’a ’ē i tera tō te mau misiōnare.
’A paraparau ’e te mau melo nō ni’a i te mau rāve’a e nehenehe ai ’outou e ha’a ’āmui nō te turu i te ta’ata i rāpae’au i te mau fārereira’a nō te ha’api’ira’a.
Ha’api’i ’ia māramarama maita’i
’A ha’api’i i te ’evanelia a Iesu Mesia ’ia māramarama maita’i te ta’ata i te reira. ’A ’imi maita’i i te mau pāpa’ira’a mo’a ’e te mau ha’api’ira’a, ’ia ti’a ia ’oe ’ia ha’api’i māramarama maita’i nā roto mai i te reira. ’A ha’api’i hau atu ai ’oe ma te māramarama, maita’i a’e atu ā ïa te mau rāve’a nō te Vārua Maita’i ’ia fa’a’ite pāpū i te parau mau.
’A ui i te mau uira’a nō te tauturu i te ta’ata ’ia feruri i te mea tā ’oe i ha’api’i. I muri iho, ’a fa’aro’o nō te hi’o ē, ’ua māramarama rātou i te reira ’e ’ua fa’ari’i i te reira.
Hō’ē tuha’a o te ha’api’ira’a ’ia māramarama maita’i ’oia ho’i te tātarara’a i te mau ta’o, te mau pereota, ’e te mau mana’o. E nehenehe ’oe e ha’amaita’i atu ā i tō ’oe ’aravihi ’ia ha’api’i i te ’evanelia nā roto i :
Te māramaramara’a i te mau ta’o ’o tā ’oe e fa’a’ohipa nei.
Te tātarara’a i te mau ta’o ’o tā vetahi e ’ore e māramarama.
Te uira’a i te ta’ata i te mau uira’a mai teie te huru « e hina’aro ānei ’oe e fa’a’ite mai ia māua i te mea tā ’oe i māramarama nō te mea tā māua i tātara a’e nei ? » ’aore rā « e hina’aro ānei ’oe e parau poto mai i te mea tā tātou i paraparau iho nei ? »
’A ha’api’i ai ’oe i te ha’api’ira’a tumu i roto te pene 3, ’a pāpa’i i te mau ta’o, te mau pereota, ’e te mau mana’o ’o tā te ta’ata e ’ore paha e māramarama. ’A tātara i te reira ma te fa’a’ohipa i te mau mātēria i roto i te Vaira’a buka ’Evanelia, mai te Arata’i nō te mau pāpa’ira’a mo’a .
’A tāpe’a ’ōhie noa ’e te poto tā ’oe ha’api’ira’a. ’Ia vai rōtahi noa i ni’a i te ’evanelia a Iesu Mesia, ma te patura’a i ni’a te māramaramara’a i te ha’api’ira’a tumu niu ’e te mau parau tumu. ’A tauturu i te ta’ata ’ia ’imi i te hāro’aro’ara’a nā roto mai i te Vārua Maita’i. ’A roa’a ai ia rātou teie hāro’aro’ara’a, e ha’amata rātou i te ti’aturi i te parau poro’i o i te ’evanelia.
’Imira’a pāpa’ira’a mo’a.
Nō te aha e mea ti’a ia tātou ’ia tātara maita’i i te ha’api’ira’a tumu ?
’Ua ui te Fa’aora i te mau uira’a ’o te ani manihini i te ta’ata ’ia feruri ’e ’ia putapū hōhonu i te mau parau mau tāna i ha’api’i. ’Ua tura’i tāna mau uira’a ’ia feruri hōhonu ’e ’ia rave i te mau tītaura’a.
E mea faufa’a ato’a te mau uira’a maita’i i roto i tā ’oe ha’api’ira’a. E tauturu te reira ia ’oe ’ia hāro’aro’a i te mau ’ana’anataera’a, mau ha’ape’ape’ara’a, ’e te mau uira’a a te ta’ata. E nehenehe te mau uira’a maita’i e ani manihini i te Vārua ’e e tauturu i te ta’ata ’ia hāro’aro’a.
Ui i te mau uira’a fa’auruhia
’A ’imi i te arata’ira’a a te Vārua nō te ui i te mau uira’a maita’i. E tauturu te mau uira’a maita’i i te mau taime tano i te ta’ata ’ia ’apo ma i te ’evanelia ’e ’ia putapū i te Vārua.
E tauturu te mau uira’a fa’auruhia ’e te fa’aro’ora’a ateate i te ta’ata ’ia vai matara noa nō te paraparau mai ’e nō te fa’a’ite mai i tō rātou mau nino’a mana’o [sentiment]. E tauturu ato’a te reira ia rātou ’ia ’ite mai i te hō’ē ’itera’a pāpū e tupu tāmau noa. E vai matara noa ato’a rātou nō te ui mai i te mau uira’a, ’ia ’ore ana’e rātou i hāro’aro’a i te hō’ē mea ’aore rā e mau māna’ona’ora’a tō rātou.
Tē fa’a’ite nei te tāpura i muri nei i te tahi mau parau tumu nō te ui atu i te mau uira’a fa’auruhia, ’oia ato’a te tahi mau hi’ora’a.
Mau parau tumu ’e mau hi’ora’a nō te mau uira’a fa’auruhia
Mau parau tumu
Mau hi’ora’a
’A ui i te mau uira’a ’o tē tauturu i te ta’ata ’ia putapū i te Vārua.
E nehenehe ānei ia ’oe e fa’a’ite mai i te hoē ’ohipa i tupu ’a putapū ai ’oe i te fa’aurura’a a te Atua i roto i tō ’oe orara’a ?
Mea nāhea tō ’oe putapūra’a i te here o te Atua nō ’oe ?
’A ui i te mau uira’a ’ōhie ’e te fifi ’ore nō te hāro’aro’a.
E aha tā ’oe i ha’api’i mai nō ni’a ia Iesu Mesia nā roto mai i teie pāpa’ira’a mo’a ?
’A ui i te mau uira’a ’o tē tauturu i te ta’ata ’ia feruri i te mea tā ’oe e ha’api’i nei.
Nāhea te reira e tū’ati ai i te mea tā ’oe i ti’aturi a’ena ? E aha e mea ta’a ’ē te reira ?
’A ui i te mau uira’a ’o tē tauturu ia ’oe ’ia ’ite i te fāito o te māramarama o te ta’ata, i te mea tā ’oe e ha’api’i nei.
E aha te uira’a tā ’oe e vai ra nō ni’a i te mea tā māua i ha’api’i i teie mahana ?
Nāhea ’oe ’ia parau poto mai i tā tātou paraparaura’a i teie mahana ?
’A ui i te mau uira’a ’o tē tauturu i te ta’ata ’ia fa’a’ite mai i te mea tā rātou i putapū.
Mea nāhea tō Iesu Mesia tauturura’a ia ’oe i roto i tō ’oe orara’a ?
E aha te mea i riro nā ’ei mea faufa’a roa a’e nō ’oe, ’ia au i te mea tā tātou i paraparau i teie mahana ?
’A ui i te mau uira’a ’o tē fa’a’ite ra i te here ’e te māna’ona’ora’a.
Nāhea māua e nehenehe ai e tauturu ia ’oe ?
’A ui i te mau uira’a ’o tē tauturu i te ta’ata ’ia fa’a’ohipa i te mea tā rātou i ’apo mai.
E aha tā tātou e nehenehe e ’apo mai nā roto mai i teie pāpa’ira’a mo’a ?
Nāhea teie pāpa’ira’a mo’a i te tauturu ia ’oe i roto i tō ’oe orara’a ?
Mai tā tātou i ’āparau a’e nei, e aha te mea tei tūra’i ia ’oe ’ia rave, ’ia au i te mea tā ’oe i ’apo mai ?
Ha’api’ira’a ’e te hoa misiōnare
’A hi’o fa’ahou i tā ’oe ’ōpuara’a nō te ha’api’ira’a, nā roto mai i te hō’ē ha’api’ira’a ’āpī tā ’oe i ha’api’i. ’A pāpa’i i te hō’ē uira’a nō te mau parau tumu rahi tāta’itahi i fa’a’itehia i roto i tā ’oe ’ōpuara’a.
’A hi’o fa’ahou i tā ’oe mau uira’a nō te hi’o, ’ua tano ānei i te mau parau tumu i roto i teie tuha’a.
I muri iho, ’a pāhono i te mau uira’a tāta’itahi mai te mea ra te ta’ata ’oe ’o te ’apo mai nei.
’A fa’a’ite i tā ’oe mau uira’a i tō ’oe hoa misiōnare. ’oe to’opiti, ’a fa’atītī’aifaro ’e ’a ha’amaita’i i tā ’oe mau uira’a.
Ha’api’ira’a ta’ata hō’ē ’e ha’api’ira’a ’e te hoa misiōnare
E nehenehe te feiā tā ’oe e ha’api’i nei e ora i te mau ’itera’a i muri nei :
E ora rātou i te hō’ē ’itera’a pae vārua ma te tai’ora’a i te Buka a Moromona.
Pinepine te mau hoa i te fa’a’ō’o’o i te mau ’ohipa pae vārua.
E mau melo pūai te mau feti’i i roto i te tahi atu ha’apa’ora’a fa’aro’o.
Tē ti’aturi nei te mau hoa ē, e ’ere te mau « momoni » i te feiā keresetiano.
’A feruri i te hō’ē uira’a ’o tā ’oe e ui atu nō te ’ite hau atu ā nō ni’a i teie mau huru tupura’a. ’A pāpa’i i teie mau uira’a i roto i tā ’oe buka tāmahana. ’A tāu’aparau ’e tō ’oe hoa e nāhea ’oe e nehenehe ai e ha’amaita’i atu ā i te mau uira’a tā ’oe i pāpa’i.
’A ’ape i te mau uira’a faufa’a ’ore ’e te fa’a’ū’ana
’A tāmata ’eiaha e ui i te mau uira’a :
’O te hōro’a mai i te pāhonora’a e ta’a noa.
’O te fa’aha’amā i te ta’ata ’ia ’ore ana’e ’oia e ’ite i te pāhonora’a.
’O te hōro’a mai e rave rahi mana’o.
Nō ni’a i te hō’ē ha’api’ira’a tumu ’aita ā ’oe i ha’api’i atu ra.
’Aita ana’e e fā māramarama.
Faufa’a ’ore.
Tano ’ore ’aore rā e nehenehe e fa’ariri ’aore rā e fa’a’ino’ino i te ta’ata.
Teie te tahi mau hi’ora’a nō te mau uira’a e ’ere i te mea faufa’a roa :
’O vai te peropheta mātāmua ? (’Aita paha te ta’ata i ’ite i te pāhonora’a).
Nāhea te ha’apa’ora’a ’ia vai mā noa tō tātou tino i te tauturu ia tātou ’ia vai mai te Vārua ’e ’ia fa’a’ite ē, ’ua ineine tātou i te pe’e i te hō’ē peropheta ? (’Ua hau i te hō’ē noa mana’o).
E mea faufa’a ānei ’ia ’ite i te mau fa’auera’a a te Atua ? (E uira’a ’ē-’aita, ’e e mea pāpū ïa te pāhonora’a).
E aha te mea tā tatou e nehenehe e rave i te mau mahana ato’a, nō te tauturu ia tātou ’ia ’ite ’ua piri atu tātou i te Atua ? (E uira’a ahoaho ’o te ’imi i te hō’ē pāhonora’a ta’a ’ē : pure).
’O vai te peropheta i muri mai ia Noa ? (’Aita paha te ta’ata i ’ite i te pāhonora’a, ’e e ’ere te uira’a i te mea faufa’a nō tā ’orua parau poro’i).
Tē ta’a ra ānei ia ’oe i te mea tā’u e parau nei ? (E nehenehe te ta’ata e mana’o ē, tē ha’afaufa’a ’ore nei ’oe iāna).
Ha’api’ira’a ta’ata hō’ē ’e ha’api’ira’a ’e te hoa misiōnare
’A feruri i te mau hina’aro o te ta’ata tā ’oe e ha’api’i nei. ’A tāu’aparau e nāhea ’oia e nehenehe ai e pāhono i tā ’oe mau uira’a. ’A fa’anaho i te tahi mau uira’a nō te ui ’o te pe’e i te mau arata’ira’a i roto i teie tuha’a. ’A tāu’aparau e nāhea teie mau uira’a e nehenehe ai e ani manihini i te Vārua ’e e tauturu i te ta’ata ’ia ’apo mai i te ’evanelia.
Fa’aro’o
’Ia fa’aro’o maita’i ana’e ’oe ia vetahi ’ē, e hāro’aro’a maita’i a’e ’oe ia rātou. ’Ia ’ite ana’e rātou ē, e mea faufa’a tō rātou mau mana’o ’e tō rātou mau nino’a mana’o nō ’oe, e nehenehe atu ā rātou e fa’ari’i i tā ’oe mau ha’api’ira’a, e fa’a’ite mai i tō rātou iho mau ’itera’a, ’e ’e rave i te mau tītaura’a.
’A fa’aro’o ai ’oe, e ’ite mai ’oe e nāhea i te fa’atano i tā ’oe ha’api’ira’a i tō rātou mau hina’aro ’e mau ’ana’anataera’a. E māramarama maita’i a’e ’oe e aha te mau parau mau o te ’evanelia e riro ’ei mea maita’i a’e nō rātou.
’A fa’aro’o ta’a ’ē i te mau muhumuhura’a a te Vārua. ’Ia fa’a’ite ana’e mai vetahi i tō rātou mau nino’a mana’o, e nehenehe te Vārua Maita’i e fa’auru ia ’oe ma te mau ferurira’a ’e te mau mana’o. E nehehe ato’a te Vārua e tauturu ia ’oe ’ia māramarama e aha tā vetahi e hina’aro nei e parau mai.
Hōho’a
mau misiōnare e paraparau ra i te ’utuāfare
’A fa’aro’o ma te ’ā’au hina’aro mau
E tītau te fa’aro’o i te tauto’ora’a ’e te ara maita’i mau. ’Ia paraparau ana’e vetahi, ’ia pāpū ia ’oe tē rotahi nei ’oe i ni’a i te mea e parauhia ra. E ’ape i te perera’a e fa’anaho i te mea tā ’oe e parau atu.
’Ua ha’api’i Elder Jeffrey R. Holland : « E mea faufa’a rahi roa a’e i te paraura’a i te fa’aro’ora’a. E ’ere teie mau ta’ata i te mau tao’a pohe tei tāpo’ipo’ihia ’ei fāito nūmera nō te bāpetizora’a […] ’A ani i teie mau hoa e aha te mea faufa’a roa a’e nō rātou. E aha te mea tā rātou e poihere roa, ’e e aha te mea e riro nō rātou e tao’a here roa ? ’E i muri iho ’a fa’aro’o atu. Mai te mea e tano te tupura’a, e nehenehe ’outou e ani atu ia rātou e aha tō rātou mau mata’u, i te mea tā rātou e tītau nei, ’aore rā i te mea tā rātou e ’ere nei i roto i tō rātou orara’a. Tē fafau atu nei au ia ’outou ē, te tahi ’ohipa i roto i tā rātou parau e hiti tāmau mai ihoā te parau mau o te ’evanelia, o tā ’outou e nehenehe e fa’a’ite pāpū atu ’e i ni’a i te reira e nehenehe ’outou i muri iho e hōro’a hayu atu […] Mai te mea e fa’aro’o tātou ma te here, e’ita tātou e feruri e aha tē parau atu. E hōro’ahia mai te reira ia tātou—na te Vārua ’e na tō tātou mau hoa » (« Witnesses unto Me » Ensign, Me 2001, 15).
’A hi’o maita’i i te mau parau poro’i ’aita i fa’ahitihia
E paraparau ato’a mai te ta’ata nā roto i tō rātou reo o te tino. ’A hi’o maita’i i te huru ’a parahi ai rātou, tō rātou huru hōho’a mata, te ’ohipa tā rātou e rave ra i tō rātou rima, te toma o tō rātou reo, ’e te vāhi tā rātou e hi’o ra. ’A hi’o maita’i i teie mau parau poro’i fa’ahiti-’ore-hia, e nehenehe e tauturu ia ’oe ’ia ta’a i te mau nino’a mana’o o te feiā tā ’oe e ha’api’i ra.
’A ha’apa’o maitai ato’a i tō ’oe iho reo o te tino. ’A hōro’a atu i te poro’i nō te ’ana’anatae ’e te ’oa’oa ma te fa’aro’o-mau-ra’a.
E vaiiho i te taime i te ta’ata ’ia feruri ’e ’ia pāhono
Pinepine te Fa’aora i te ui i te mau uira’a e tītauhia te taime i te ta’ata ’ia pāhono mai. ’Ia ui ana’e ’oe i te hō’ē uira’a, ’a fa’aea ri’i nō te hōro’a i te taime i te ta’ata te rāve’a ’ia feruri ’e ’ia pāhono mai. ’Eiaha e mata’u i te māmū-noa-ra’a. Pinepine te ta’ata i te rave i te taime nō te feruri ’e nō te pāhono mai i te mau uira’a ’aore rā nō te fa’a’ite mai i tō rātou nino’a mana’o.
E nehenehe ’oe e fa’aea ri’i i muri a’e i te uira’a i te hō’ē uira’a, i muri a’e i te fa’a’itera’a atu i te hō’ē ’ohipa pae vārua tei tupu, ’aore rā ’ia fifi ana’e te ta’ata i te fa’a’ite mai i tō rātou mau mana’o. ’Ia pāpū ia ’oe, ’ua hōro’a ’oe i te taime i te ta’ata nō te fa’aoti i tō rātou mau mana’o hou ’oe ’a pāhono atu ai. ’Eiaha e tāpū atu ’a paraparau ai rātou.
Pāhono atu ma te turura’a
’Ia pāhono ana’e te hō’ē ta’ata i te hō’ē uira’a, ’a ha’amata tā ’oe pāhonora’a ma te fa’a’ite i te turura’a, mai te mea e tano. E fa’a’ite te turura’a ē, tē ha’ape’ape’a mau nei ’oe nō rātou. ’Eiaha roa atu e rave i te mau fa’aotira’a vitiviti, tē hōro’a-’oi’oi-ra’a atu i te mau rāve’a, ’aore rā ma te fa’a’itera’a atu ē, tei ia ’oe ra te mau pāhonora’a ato’a.
’A ha’apāpu atu ē, ’ua māramarama ’oe i te mea tā te ta’ata e parau nei
’Ia ’imi ana’e ’oe i te hāro’aro’a maita’i i te mea tā te hō’ē ta’ata e parau ra, ’a ui atu nō te ha’apāpū ’ua māramarama ’oe. ’Ei hi’ora’a, e nehenehe ’oe e ui atu, « nō reira te mea ’o tā ’oe e parau ra ’o teie ïa . ’ua tano ānei ? » ’aore rā « Mai te mea ’ua ta’a maita’i iā’u, tē putapū nei ’oe i te reira ». ’Aita ana’e ’oe i pāpū, ’ua ta’a maita’i ānei ia ’oe, ’a ani i te ta’ata ’ia ha’amāramarama mai.
Terera’a nā roto i te mau fa’a’ohipara’a fifi
E tauturu rahi atu ā ’oe i te ta’ata ma te ha’api’ira’a ia rātou i te ’evanelia a Iesu Mesia. Penei a’e e hina’aro te tahi mau ta’ata e paraparau rahi atu ā. I te tahi taime, e hina’aro noa te ta’ata ’ia fa’aro’o te hō’ē ta’ata ia rātou ma te aumihi, i tō rātou mau ’arora’a ’e mau nino’a mana’o. E tāmata te tahi atu mau ta’ata i te ’imi ’ia fa’ahepo ’aore rā ’ia ’aimarō.
’A ha’api’i mai i te fa’atere i teie mau huru tupura’a ma te au maita’i ’e ma te here. E nehenehe paha ’oe e fa’atano i tā ’oe ha’api’ira’a nō te a’o atu i te hō’ē mea tā te hō’ē ta’ata i fa’a’ite mai. ’Aore rā, e nehenehe ’oe e parau atu ma te fa’atura ē, tē hina’aro nei ’oe e paraparau nō ni’a i tō rātou mau ha’ape’ape’ara’a i te tahi atu taime. E nehenehe te Vārua e tauturu ia ’oe ’ia ’ite e nāhea ’ia pāhono i roto i te tupura’a fifi.
Tauturu i te ta’ata ’ia ’ite i te au maita’i nō te fa’a’ite mai i te mau nino’a mana’o mau
Nō te ’ape i te taiāra’a, e pāhono te tahi mau ta’ata i te mau uira’a ’ia au i tō rātou mana’ora’a ’o te reira te pāhonora’a ’o tā ’oe e tīa’i nei, ’eiaha rā e fa’a’ite mai i tō rātou nino’a mana’o mau. ’A ’imi i te fa’ananea i te hō’ē tā’amura’a ’o te fa’ati’a ia rātou ’ia au maita’i nō te fa’a’ite mai i tō rātou nino’a mana’o mau ia ’oe.
Te hāro’aro’ara’a ’e te ha’amaura’a i te tā’amura’a ’e te ta’ata, e fa’ati’a te reira ia ’oe e tauturu ia rātou, e pāhono i tō rātou mau ’ana’anataera’a ’e mau hina’aro, ’e e fa’a’ite atu i te here o te Fa’aora nō rātou. ’A fa’atupu i te hō’ē tā’amura’a nō te ti’aturi ma te vai parau mau noa ia rātou, ma te aupurura’a i te hō’ē tā’amura’a misiōnare tano, ’e ma te fa’a’itera’a i te fa’atura.
Ha’api’ira’a ta’ata hō’ē ’e ha’api’ira’a ’e te hoa misiōnare
’A feruri i tā ’oe huru fa’aro’ora’a ia vetahi ’ē. Pāpa’i i te mau pāhonora’a i roto i tā ’oe buka tāmahana i te mau uira’a i raro nei. ’Aore rā ’a tāu’aparau i te reira ’e tō ’oe hoa misiōnare.
A = E ’ere roa i te parau mau nō’u, B = Te tahi tāime e parau mau nō’u, C = Te rahira’a taime e parau mau nō’u, D = E parau mau nō’u i te mau taime ato’a
’Ia paraparau ana’e mai vetahi iā’u, e feruri au i te mau ’itera’a mai te reira te huru ’o tā’u e nehenehe e fa’a’ite atu, ’āhani i te fa’aro’o-maita’i-ra’a atu.
’Ia fa’a’ite ana’e mai vetahi iā’u i tō rātou mau nino’a mana’o, e tāmata vau i te tu’u iā’u i tō rātou vaira’a nō te hi’o e aha te mea tā’u e putapū mai.
’Ia ha’api’i ana’e au i te ta’ata, e feruri au i te mea tā’u e parau atu ’aore rā e ha’api’i i muri mai.
E fa’ati’ihia [frustrer] vau ’ia paraparau rahi ana’e te ta’ata.
E mea fifi roa nō’u ’ia pe’e ’aore rā ’ia hāro’aro’a i te mea tā vetahi e tāmata nei i te parau mai iā’u.
Pinepine tō’u ferurira’a i te haere ’ē roa ’a ha’api’i ai tō’u hoa misiōnare.
E ’ino’ino vau mai te peu e paraparau mai te hō’ē ta’ata iā’u ’e e tāpū mai ’aore rā e fa’anevaneva mai vetahi i tō’u ara maita’i.
E fa’ari’i au i te fa’aurura’a a te Vārua nō te parau ’aore rā nō te rave i te hō’ē mea, e tau’a ’ore rā vau i te reira.
Tauturu i te ta’ata ’ia ’ite mai i te mau pāhonora’a i tā rātou mau uira’a ’e mau māna’ona’ora’a
’A rave i te tauto’ora’a pāpū nō te pāhono i te mau uira’a a te ta’ata ’e ’a tauturu ia rātou ’ia tātara i tō rātou mau mana’ona’ora’a. Terā rā, e ’ere i te hopoi’a nā ’oe ’ia pāhono i te mau uira’a ato’a. Te ti’ara’a mau, nā te ta’ata iho e ’imi i te tātara i tā rātou iho mau uira’a ’e i tō rātou iho mau mana’ona’ora’a.
’Ia ’ite mai ra ē, e’ita e roa’a i te pāhono hope roa i te mau uira’a ’e i te mau mana’ona’ora’a ato’a. E riro te tahi mau pāhonora’a e māramarama-maita’i-hia i roto i te tau. ’Aita ā te tahi i heheuhia mai atu ra. ’A rōtahi i ni’a i te patura’a o te hō’ē tumu pāpū o te mau parau mau niu, e tītauhia o te ’evanelia. E tauturu te reira tumu ia ’oe ’e te feiā tā ’oe e ha’api’i nei, ’ia haere i mua ma te fa’a’oroma’i ’e ma te fa’aro’o, ’ia hiti ana’e mai te mau uira’a fifi ’e e ’aita e pāhonora’a.
’Ua fa’ata’ahia te tahi mau parau tumu nō te pāhonora’a i te mau uira’a i roto i teie tuha’a.
Hōho’a
Iesu ’e te vahine nō Samaria i te ’āpo’o pape
Hāro’aro’a i te māna’ona’ora’a
Vetahi mau mea ’o tā ’oe e ha’api’i ra i te ta’ata e nehenehe e riro nō rātou ’ei mea fifi ’aore rā e mea mātau ’ore ri’i. Mai te peu e mau uira’a tā te ta’ata ’aore rā e mau māna’ona’ora’a, ’a ’imi nā mua roa i te hāro’aro’a maita’i ia rātou. I te tahi taime, e au ra te mau mana’ona’ora’a o te ta’ata mai te hō’ē mou’a pape pa’ari pāinu. Te hō’ē noa tuha’a iti ’o tē ’itehia i ni’a i te pape. E nehenehe teie mau māna’ona’ora’a e riro ’ei mea fifi roa. ’A pure nō te hōro’a o te ’itera’a mai, ’e ’a pe’e i te Vārua e nāhea ’ōru’a ’ia pāhono atu. ’Ua ’ite te Metua i te ao ra i te ’ā’au ’e i te mau ’ohipa i tupu nō te mau ta’ata ato’a (te tā’āto’ara’a o te mou’a pape pa’ari pāinu). E tauturu ’oia ia ’oe ’ia ’ite e aha te mea maita’i a’e nō te ta’ata tāta’itahi.
Pinepine te mau māna’ona’ora’a ’ua hau atu ïa i te pae tōtiare i te pae ha’api’ira’a tumu. ’Ei hi’ora’a, e mata’u a’e te tahi mau ta’ata i te pāto’ira’a a te mau melo o te ’utuāfare, mai te peu e tomo mai rātou i roto i te ’Ēkālesia. ’Aore rā e mata’u rātou i te tau’a-’ore-hia rātou e te mau hoa i te ’ohipa.
’A ’imi i te hāro’aro’a i te tumu mau o te māna’ona’ora’a ma te ui i te mau uira’a ’e te fa’aro’ora’a. ’Ua ha’amata ānei te māna’ona’ora’a nō te mea ’aita tā te ta’ata e ha’apāpūra’a pae vārua nō te parau mau o te Fa’aho’i-fa’ahou-ra’a mai ? Nō roto mai ānei te reira ē, ’aita te ta’ata e hina’aro e rave te tītaura’a e ora i te hō’ē parau tumu o te ’evanelia ? E tauturu te ’itera’a i te tumu nō te māna’ona’ora’a ia ’oe ’ia ’ite e ti’a ānei e tūtonu i ni’a i te ’itera’a pāpū ’aore rā i te tītaura’a.
’A fa’a’ohipa i te mau pāpa’ira’a mo’a, te Buka a Moromona ihoā rā, nō te pāhono i te mau uira’a.
’A fa’a’ite i te ta’ata e mea nāhea te mau parau mau e vai nei i roto i te mau pāpa’ira’a mo’a i te tauturu ’ia pāhono i tā rātou mau uira’a ’e ’ia tātara i tō rātou mau māna’ona’ora’a. (Hi’o « E pāhono te Buka a Moromona i te mau uira’a o te vairua » i roto i te pene 5). ’Ia ’imi ana’e te ta’ata i te fa’aurura’a ma te ’imi-maita’i-ra’a ’e te fa’a’ohipara’a i te mau pāpa’ira’a mo’a, e ha’amara’a rātou i tō rātou ’aravihi nō te fa’aro’o ’e nō te pe’e i te Fatu. E rahi atu ā tō rātou fa’aro’o iāna. Ma te fa’aro’o e rahi noa ra e tae mai te ’itera’a pāpu, te tārarahapa ’e te ’ōro’a o te bāpetizora’a.
Hōho’a
Peresideni Henry B. Eyring
« I te tahi mau taime e hi’opo’a vau i te mau pāpa’ira’a mo’a nō te ha’api’ira’a tumu. I te tahi mau taime e hi’opo’a vau i te mau pāpa’ira’a mo’a nō te arata’ira’a. E ui au i te hō’ē uira’a, ’e e uira’a rahi teie « E aha tā te Atua e hina’aro ’ia rave au ? » ’aore rā « E aha tāna e hina’aro ’ia putapū vau ? » Ma te tāmau noa, e ’ite mai au i te mau mana’o ’āpī, te mau ferurira’a ’o tā’u i ’ore roa na i fa’ari’i na mua a’e nei, ’e e fa’ari’i au i te fa’aurura’a, te arata’ira’a ’e te mau pāhonora’a i tā’u mau uira’a » (Henry B. Eyring, i roto « A discussion on Scripture Study », Ensign, Tiurai 2005, 22.
Penei a’e e mea faufa’a ’ia fa’ata’a ē, te hō’ē tuha’a rahi o tō tātou hāro’aro’ara’a i te ’evanelia a Iesu Mesia, ’ua tae mai ïa nā roto mai i te mea tei heheuhia ia Iosepha Semita, te peropheta, ’e i te feiā tei nā muri mai iāna. E nehenehe te mau uira’a nō ni’a i te parau mau o te ’evanelia e tātarahia ma te fa’ari’ira’a i te hō’ē ’itera’a pāpū ē, e peropheta Iosepha Semita nā te Atua. Te tai’ora’a ’e te purera’a nō ni’a i te Buka a Moromona ’o te hō’ē ïa rāve’a nō te fa’ari’i i teie ’itera’a pāpū.
’A tauturu i te ta’ata ’ia fa’atumu i ni’a i te ha’apūaira’a i tō rātou fa’aro’o ia Iesu Mesia. Te tai’ora’a ’e te purera’a nō ni’a i te Buka a Moromona ’o te hō’ē ïa rāve’a faufa’a roa nō te ha’apūai i tō rātou fa’aro’o
’Ani manihini i te ta’ata ’ia ’ohipa ma te fa’aro’o
’A fa’ananea ai ’e ’a ha’apūai ai te ta’ata i tō rātou ’itera’a pāpū nō te ’evanelia tei fa’aho’ihia mai, ’ua nehenehe ia rātou e pāhono i tā rātou mau uira’a ’e mau māna’ona’ora’a i ni’a i te hō’ē niu o te faʼaroʼo. Ma te ’ohipara’a ma te fa’aro’o i ni’a i te mau parau mau ’o tā rātou e ti’aturi nei, e nehenehe rātou e fa’ari’i i te mau ’itera’a pāpū nō te tahi atu mau parau mau.
Teie te tahi mau rāve’a nō te ha’ara’a ma te fa’aro’o :
E pure pinepine ’e ma te hina’aro mau nō te fa’ari’i i te fa’aurura’a ’e te arata’ira’a.
Te ’imi-maita’i-ra’a i te mau pāpa’ira’a mo’a, te Buka a Moromona ihoā rā.
Te haerera’a i te purera’a.
Ha’api’ira’a ’e te hoa misiōnare
’A mā’iti i te hō’ē anira’a manihinihi e hōro’a atu ’ia ha’api’i ana’e ’oe i te hō’ē ha’api’ira’a. ’A feruri i muri iho i te mau māna’ona’ora’a ’o te nehenehe e ’ōpani i te hō’ē ta’ata ’ia fa’ari’i i te anira’a manihini ’aore rā ’ia fa’atura i te tītaura’a. ’A paraparau ’e ’a fa’a’ohipa e nāhea ’oe e nehenehe ai e tauturu i te ta’ata ’ia tātara i tō rātou mau māna’ona’ora’a.
Ha’api’ira’a ta’ata hō’ē ’e ha’api’ira’a ’e te hoa misiōnare
’A tāpa’o i roto i tā ’oe buka tāmahana, e nāhea ’oe i te fa’atū’ati atu ia Iosepha Semita ’e i te Buka a Moromona nō te tātara i te mau māna’ona’ora’a i muri nei :
« ’Aita vau e ti’aturi fa’ahou ē, tē paraparau nei te Atua i te ta’ata ».
« Tē ti’aturi nei au ē, e nehenehe au e ha’amori i te Atua mai tā’u iho rāve’a ’eiaha rā nā roto i te hō’ē ha’apa’ora’a fa’aro’o tei ha’amauhia ».
« E aha i tītauhia ai iā’u ’ia fa’aea i te inu i te uaina i te taime tāmā’ara’a mai te peu e tomo vau i roto i tā ’outou ha’apa’ora’a fa’aro’o ? »
« Nō te aha vau e hina’aro ai i te hō’ē ha’apa’ora’a fa’aro’o ?
Vaiiho atu i te tahi ’ohipa nō te ’imi maita’i ’e nō te pure
I te pae hope’a o te fārereira’a tāta’itahi o te ha’api’ira’a, ’a hōro’a i te ta’ata i te tahi ’ohipa nō te ’imi maita’i, nō te feruri ’e nō te pure nō te fa’aineine i te fārereira’a i mua atu. E ani manihini te tai’ora’a, te purera’a ’e te ferurira’a nā roto i te mau fārereira’a o te ha’api’ira’a, i te fa’aurura’a o te Vārua Maita’i i roto i tō rātou orara’a.
E nehenehe ’oe e ani manihini i te ta’ata ’ia tai’o i te mau pene ta’a ’ē o te Buka a Moromona. E nehenehe ato’a ’oe e fa’aitoito ia rātou ’ia fa’a’ohipa i te mau mātēria a te ’Ēkālesia, mai te Vaira’a buka ’evanelia, nō te ’ite mai i te mau pāhonora’a i te mau uira’a, ’ia ’apo hau atu ā mai nō ni’a i te hō’ē tumu parau, ’aore rā te mata’ita’ira’a i te hō’ē video. E nehenehe te reira e riro ’ei hō’ē tumu parau nō te ’īriti i te ’āparaura’a i te fārereira’a i muri nei.
Hōho’a
ta’ata e ’imi ra i te pāpa’ira’a mo’a
’Eiaha e hōro’a rahi i te ’ohipa i te ta’ata nō te rave, mai te peu ihoā rā e fārereira’a pinepine ’e te poto nō te ha’api’ira’a tā ’oe ia rātou.
Ha’api’ira’a ta’ata hō’ē ’e ha’api’ira’a ’e te hoa misiōnare
’A feruri mā’ite i te ta’ata tāta’itahi ’o tā ’oe i tāpura e ha’api’i i teie hepetoma. E aha te mau pene i roto i te Buka a Moromona e riro ’ei mea tauturu rahi a’e nō rātou ? E aha te tahi atu mau mātēria ’o tā rātou e nehenehe e fāna’o ? ’A pāpa’i i te mea ’o tā ’oe e mana’o ra e hōro’a i te ta’ata tāta’itahi. ’A pāpa’i ato’a e aha tā ’oe e rave nō te ha’apāpū te pe’era’a nā muri i roto i tā ’oe fārereira’a i mua nei.
Tauturura’a i te ta’ata i te pae hia’ai maha ’ore
E nehenehe ’oe e tauturu i te ta’ata e ’aro nei nō te upo’oti’a i ni’a i tō rātou hia’ai maha ’ore, ma te ’āparaura’a ma te here nō tō rātou mau ’arora’a, ma te turura’a ia rātou, ’e ma te tīhono ia rātou ’e te mau rāve’a. E nehenehe ’oe e fa’aitoito ia rātou ’ia fa’aō atu i te hō’ē o te mau pupu tauturu a te ’Ēkālesia nō te mau hia’ai maha ’ore. E ruru teie mau pupu ma te tino ta’ata ’aore rā nā te natirara. (Hi’o AddictionRecovery.ChurchofJesusChrist.org). ’A fa’aitoito ia rātou i te fa’a’ohipa i te mau mātēria i roto i te tuha’a « Addiction [Hia’ai maha ’ore] » o te Life Help [Tauturu i te Orara’a] i roto i te Vaira’a buka ’evanelia.
E nehenehe ato’a te feiā fa’atere ’e te mau melo o te ’Ēkālesia o te fenua iho e turu mai. E hina’aro te tahi mau ta’ata e hia’ai maha ’ore tō rātou i te tauturura’a a te feiā ’aravihi i te pae o te rāpa’āura’a nō te ea ’e nō te manava.
Teie te tahi mau mana’o, e nāhea ’oe i te tauturu i te feiā e ’aro nei nō te upo’oti’a i ni’a i tō rātou hia’ai maha ’ore :
’A ha’apūai fa’ahou i tā rātou mau tauto’ora’a nō te haere mai i te Mesia ra. E tauturu ia rātou ’ia hi’o ē, tē ’itehia ra ’e tē ha’afaufa’ahia ra tā rātou mau tauto’ora’a ’ia ora mai ’e ’ia fa’aorahia, e te Metua i te ao ra ’e e Iesu Mesia. ’A ha’api’i ia rātou ē, e nehenehe rātou e ha’apūaihia māoti te Fa’aora ’e tāna Tāra’ehara. E ’ite hope roa ’oia i te hina’aro mau o tō rātou ’ā’au ’ia rave i te maita’i.
’A pure nō rātou i roto i tā ’oe mau pure ta’ata hō’ē ’e ’a pure ’e o rātou. ’Ia tano ana’e, ’a fa’aitoito ia rātou ’ia ’imi i te hō’ē ha’amaita’ira’a o te autahu’ara’a nā roto mai i te feiā fa’atere o te autahu’ara’a o te fenua iho.
’A tāmau noa i te ha’api’i ia rātou i te ’evanelia a Iesu Mesia. ’A ha’api’i ia rātou ē, ’ua here te Metua i te ao ra, te Fa’aora ’e te Vārua Maita’i ia rātou ’e te hina’aro nei ’ia manuia rātou.
’A tauturu ia rātou ’ia haere pinepine i te fare purera’a ’e ’ia fa’ananea i te mau auhoara’a ’e te mau melo.
’Ia vai ’ana’anatae noa ’e te turu pāpu, i te taime ihoā ra e topa fa’ahou rātou.
Hōho’a
Iesu e toro ra i te rima i te hō’ē vahine
E mea fifi roa nō te upo’oti’a mai i te hia’ai maha ’ore, ’e e nehenehe te topa-fa’ahou-ra’a e tupu mai. ’Eiaha te feiā fa’atere ’e te mau melo o te ’Ēkālesia ’ia hitimahuta nō te reira. E ti’a ia rātou e fa’a’ite i te here, ’eiaha rā e ha’avā atu.
E nehenehe te hō’ē melo ’āpī tei fa’aea i te haere mai i te purera’a, e ho’i fa’ahou i tōna hia’ai maha ’ore tāhito ’e e ’ite i tōna ti’a-mā ’ore ’e te ha’aparuparu. E tauturu te hō’ē fārereira’a ’oi’oi nō te fa’aitoito ’e nō te turura’a. E ti’a i te mau melo ’ia fa’a’ite nā roto i tā rātou parau ’e tā rātou ’ohipa ē, ’ua riro te ’Ēkālesia ’ei vāhi i reira e ’itehia ai te here o te Mesia (hi’o 3 Nephi 18:32).
Ha’api’ira’a ta’ata hō’ē ’e ha’api’ira’a ’e te hoa misiōnare
’A feruri i te hō’ē ta’ata ’o tā ’oe e ha’api’i nei ’aore rā i te hō’ē melo ’āpī ’aore rā tei ho’i mai, ’o te tāmata nei i te upo’oti’a i ni’a i te hō’ē hia’ai maha ’ore. ’A hi’o fa’ahou « Fa’aro’o ia Iesu Mesia » ’e « Tātarahapara’a » i roto i te ha’api’ira’a «Te ’Evanelia a Iesu Mesia » i roto i te pene 3.
E aha tā ’oe e nehenehe e ha’api’i i teie ta’ata nā roto mai i teie ha’api’ira’a ’e teie pene ’o te nehenehe e tauturu iāna ?
Hāmani i te hō’ē ’ōpuara’a o te ha’api’ira’a nō te tauturu i teie ta’ata.
Ha’api’ira’a i te ta’ata ’aita tō rātou e ta’ere keresetiano
Vetahi mau ta’ata ’o tā ’oe e ha’api’i nei ’aita paha tō rātou e ta’ere keresetiano ’aore rā ’aita e ti’aturi nei i te Metua i te ao ra ’e ia Iesu Mesia. Terā rā, e rave rahi ’o te reira mau ta’ata e ti’aturira’a tō rātou ’e te mau peu ’e mau vāhi ’o tā rātou e fa’ariro nei e mea mo’a. E mea faufa’a roa ’ia fa’a’ite ’oe i te fa’atura nō tō rātou mau ti’aturira’a ’e mau peu fa’aro’o.
Tauturu ia rātou ’ia māramarama ’o vai te Atua
E uiui paha ’oe e nāhea i te fa’atano i tā ’oe ha’api’ira’a i te feiā e ’aita tō rātou e ta’ere keresetiano. Te mau parau tumu ’o tē tauturu i te hō’ē ta’ata ’ia patu i te fa’aro’o hō’ē ā ïa huru i roto i te mau ta’ere ato’a. Tauturu i te ta’ata ’ia roa’a te hō’ē hāro’aro’ara’a tano o te Atua ’e i te misiōni hanahana a Iesu Mesia. Te rāve’a maita’i a’e nō rātou ’ia ha’api’i mai i teie mau parau mau ’o te orara’a ïa i te mau ’itera’a pae vārua nō rātou iho. Teie te tahi mau rāve’a e nehenehe ai ’oe e tauturu ia rātou ’ia roa’a teie mau ’itera’a i fa’ata’ahia i raro nei :
’A ha’api’i ē, ’o te Atua tō tātou Metua i te ao ra ’e tē here nei ’oia ia tātou. E mau tamari’i tātou nāna. ’A ani manihini ia rātou ’ia ’imi i teie ’itera’a pāpū nō rātou iho.
’A ha’api’i te fa’anahora’a nō te fa’aorara’a.
’A ha’api’i ē, ’ua fā mai te Metua i te ao ra ’e ’o Iesu Mesia i te peropheta Iosepha Semita.
’A fa’a’ite atu i te hō’ē ’itera’a pāpū ateate nō te ’evanelia, i ni’a ihoā ra e mea nāhea tō ’oe putapūra’a i te here o te Metua i te ao ra ’e nō te aha ’oe i mā’iti ai e pe’e ia Iesu Mesia.
E ani manihini ia rātou ’ia pure ’ōhie noa ’e te hina’aro mau o te ’ā’au—’e ’oe ’aore rā rātou ana’e.
E ani manihini ia rātou ’ia tai’o i te Buka a Moromona i te mau mahana ato’a—’e ’oe ’aore rā rātou ana’e.
E ani manihini ia rātou ’ia haere mai i te purera’a.
’A fa’a’ite atu ia rātou i te mau melo o te ’Ēkālesia ’o te nehenehe e fa’ata’a atu ē, e mea nāhea tō rātou ha’amatara’a i te ti’aturi i te Metua i te ao ra ’e ia Iesu Mesia.
E ani manihini ia rātou ’ia ha’pa’o i te mau fa’auera’a.
E hina’aro te rahira’a o te ta’ata ’ia roa’a i te hō’ē tīhonora’a rahi ’e te Atua ’e ’ia ’ite mai i te hō’ē fā ’e te aura’a i roto i te orara’a. ’A tauturu ia rātou ’ia hi’o, e mau tamari’i rātou nā te hō’ē Metua here i te ao ra ’e e ’ōpuara’a tāna nō rātou. ’Ei hi’ora’a, e nehenehe ’oe e ha’amata ma te parau i te hō’ē mea mai teie i muri nei :
’O te Atua tō tātou Metua i te ao ra, ’e tē here nei ’oia ia tātou. E mau tamari’i tātou nāna. ’Ua ora nā tātou i pīha’i iho iāna hou tātou ’a fānauhia mai ai. Nō te mea e mau tamari’i tātou pā’āto’a nāna, e mau taea’e ’e e mau tuahine tātou pā’āto’a. Tē hina’aro nei ’oia ’ia ho’i atu tātou iāna ra. Nō tōna here ia tātou, ’ua fa’aineine ’oia i te hō’ē rāve’a nō tātou nō ho’i atu iāna ra, nā roto i tāna Tamaiti ’o Iesu Mesia.
Fa’atano i tā ’oe ha’api’ira’a mai tei hinaʼarohia
E rave rahi feiā fa’afariuhia e ’ere rātou nō te fa’aro’o keresetiano, ’o tē parau nei ’aita rātou i māramarama rahi i te mea tā te mau misiōnare i ha’api’i ia rātou. Teie rā, ’ua putapū rātou i te Vārua ’e ’ua hina’aro e rave i te mea tā te mau misiōnare i ani ia rātou. ’A ’imi i te mau rāve’a atoa nō te tauturu i te ta’ata ’ia māramarama i te ha’api’ira’a tumu o te ’evanelia. ’A fa’a’oroma’i ’e ’a turu tāmau noa. E tītauhia paha i te tahi taime i te ta’ata ’ia ha’api’i mai i te ’ite pāpū ’e ’ia fa’a’ite mai i tō rātou mau nino’a mana’o. E ti’a paha ia ’oe e fa’atano i te terera’a ’e te hōhonura’a o tā ’oe ha’api’ira’a nō te tauturu ia rātou.
E nehenehe te mau mana’o i muri nei e tauturu ia ’ōru’a, ’a fa’aineine ai ’oe nō te ha’api’i i te ta’ata feiā ’aita tō rātou e ta’ere keresetiano :
’Ia hāro’aro’a e aha te hina’aro ’aore rā te ’ana’anataera’a pae vārua tei tura’i ia rātou e fārerei ia ’oe.
’A hōro’a i te mau hi’ora’a rere ā manu ’e te mau hi’o-fa’ahou-ra’a nō te ha’api’ira’a tāta’itahi.
’A ani atu ia rātou e aha tā rātou i māramarama ’e te mea tā rātou i ora mai.
’A tātara i te aura’a o te mau ta’o ’aore rā o te mau parau tumu faufa’a rahi. ’Aita paha te ta’ata e mātau maita’i e rave rahi ta’o tā ’oe e fa’a’ohipa nei nō te ha’api’i atu.
’A ho’i fa’ahou mai i te hō’ē ha’api’ira’a i ma’iri tei ha’api’ihia na, nō te ha’api’i i te ha’api’ira’a tumu ma te māramarama a’e. E nehenehe te reira e tītauhia i te taime ato’a i roto i te fa’anahora’a ha’api’ira’a.
’A ’ite pāpū mai i te mau anira’a manihini ’o tā ’oe e fa’atae atu, nō te tauturu i te ta’ata ’ia fāna’o i te mau ha’amaita’ira’a o te ’evanelia.
’Ua tāpurahia i raro nei te tahi mau māteria i roto i te Vaira’a buka ’evanelia ’o tā ’oe e nehenehe e fa’a’ohipa nō te tauturu i te feiā ’aita tō rātou e ta’ere keresetiano :
« ’O vai o te Atua ? »
« ’O vai o Iesu Mesia ? »
« Iesu Mesia, te Tamaiti a te Atua »
« E aha te mea e tupu ’ia fārerei ana’e i te mau misiōnare nō Te ’Ēkālesia a Iesu Mesia i te Feiā Mo’a i te mau Mahana Hope’a nei »
« Te mau Mahometa ’e te Feiā mo’a i te mau mahana hope’a nei : Te mau ti’aturira’a, te faufa’a mau ’e te mau huru orara’a »
Ha’api’ira’a ta’ata hō’ē ’e ha’api’ira’a ’e te hoa misiōnare
Mai te peu e nehenehe, ’a ’ite pāpū mai i te hō’ē melo fa’afāriuhia, ’aita tāna e ta’ere keresetiano hou ’oia ’a fārerei ai i te mau misiōnare. ’A fa’anaho nō te fārerei atu iāna ’e ’a ui atu iāna i te mau uira’a nō ni’a i tōna fa’afāriura’ahia mai ’Ei hi’ora’a, e nehenehe ’oe e ui atu i te ta’ata :
E aha te mea tei ’āfa’i mai iāna ’ia ti’aturi i te Metua i te ao ra ’e ia Iesu Mesia.
Mai te aha te huru te ’itera’a nō te pure mātāmua.
Mai te aha te huru te taime mātāmua ’a putapū ai ’oia i te pāhonora’a i te hō’ē pure.
Te ti’ara’a o te mau pāpa’ira’a mo’a i roto i tōna fa’afāriura’a.
E aha te huru i te haerera’a i te purera’a.
’A pāpa’i i te mea tā ’oe i ha’api’i mai i roto i tā ’oe buka tāmahana.
’A ferui i te ani manihini i teie ta’ata ’ia tauturu mai ia ’oe nō te ha’api’i i te hō’ē ta’ata ’aita tāna e ta’ere keresetiano.
Mana’o nō te ha’api’i ’e nō te rave
Ha’api’ira’a ta’ata hō’ē
’A feruri nā ē, tei roto ’oe i teie mau huru tupura’a i muri nei : Nāhea ’oe i te fa’a’ohipa i te mau parau tumu ’e te mau ’aravihi i roto i teie pene, nō te tauturu i teie mau ta’ata ’ia haere i mua ? ’A fa’anaho e nāhea ’oe i te fa’a’ohipa i te reira i roto i te mau tupura’a tāta’itahi.
’Ua parau mai te hō’ē ta’ata e fa’aineine ra nō te bāpetizora’a ia ’oe ē, ’aita ’oia e hina’aro fa’ahou e farerei ia ’oe.
Tē fārerei nei ’oe i te hō’ē ta’ata nō te hitura’a o te taime, tei ha’api’ihia e e rave rahi misiōnare i te roara’a e piti matahiti. E mea iti roa ’aore rā ’aita roa e tāpa’o nō te nu’ura’a i mua.
’A mā’iti i te hō’ē o te mau ha’api’ira’a misiōnare. ’A ’ite mai hō’ē ’aore rā e piti tuha’a pāpa’ira’a mo’a nō te parau tumu niu tāta’itahi. ’A ha’api’ipi’i ia ’oe i te ha’api’i nā roto mai i taua mau tuha’a pāpa’ira’a mo’a ra mai tei fa’a’itehia i roto i te tuha’a « Fa’a’ohipa i te pāpa’ira’a mo’a » o teie pene.
Ha’api’ira’a ’e te hoa misiōnare, ’e tāuiuira’a hoa
Tai’o i te ’ā’amu o Amona ’e te ari’i Lamoni i roto te Alama 18–19 ’e te ’ā’amu o Aarona i roto te Alama 22:4–18. ’A tai’o ai ’oe, ’a ’ite mai ’e ’a fa’ata’a mai e mea nāhea tō Amona ’e Aarona :
Pe’era’a i te Vārua ’e te ha’api’ira’a nā roto i te here.
Ha’amatara’a i te ha’api’i.
Fa’atanora’a i tā rāua ha’api’ira’a nō te pāhono i te mau hina’aro.
Fa’a’itera’a i te ’itera’a pāpū.
Fa’a’ohipara’a i te mau pāpa’ira’a mo’a.
Uira’a i te mau uira’a, fa’aro’ora’a, ’e tauturura’a i te feiā tā rāua i ha’api’i nō te tātara i tō rātou mau mana’ona’ora’a.
Fa’aitoitora’a i te feiā tā rāua e ha’api’i ra ’ia rave i te mau tītaura’a.
’Āparaura’a e mea nāhea tā rāua tāvinira’a ’e ha’api’ira’a i te fa’aurura’a i te ari’i Lamoni, tōna metua tāne, ’e ’o Abisa.
’Āpo’ora’a mata’eina’a, ’āmuira’a ārea misiōnare ’e ’āpo’ora’a feiā fa’atere misiōni
Tītau manihini i te mau melo ’aore rā i te feiā e ha’api’ipi’ihia ra i tā ’outou ’āpo’ora’a. ’A fa’ata’a i te pupu ē, tē hina’aro nei ’outou ’ia ha’amaita’i te mau misiōnare i tō rātou ’aravihi nō te fa’a’ite i tā rātou parau poro’i faufa’a roa. ’A mā’iti i te hō’ē ha’api’ira’a ’e te hō’ē ’aravihi. E ani i te misiōnare ’ia ha’api’i i te ta’ata ’aore rā i te mau ta’ata i te ha’api’ira’a ’o tā ’outou i mā’iti, nō te hō’ē roara’a e 20 minuti, ma te fa’atumura’a i ni’a i te ’aravihi o tā ’outou i ’ite mai. ’A parau ia rātou e taui i te ta’ata nō te ha’api’i i muri mai e 20 minuti. ’Ia hope ana’e te mau misiōnare i te ha’api’ira’a, ’a ha’aputu mai i te pupu. ’A ani i te ta’ata ’aore rā i te mau ta’ata ’ia parau i te mau misiōnare, i te mea tei riro ’ei mea ’aravihi a’e ’e te rāve’a e nehenehe ai rātou e ha’amaita’i atu ā.
’A fa’a’ite i te mau video nō te mau hi’ora’a o te mau misiōnare e ha’api’i ra ’aore rā e fārerei haere ra i te ta’ata. ’A mā’iti i te hō’ē ’aravihi ’e ’a tāu’aparau e mea nāhea tō te mau misiōnare fa’a’ohipara’a i te mau parau tumu nō te reira ’aravihi.
’A mā’iti i te hō’ē ’aravihi ’e ’a ’ite mai i te mau tuha’a o te ha’api’ira’a tumu ’aore rā o te mau pāpa’ira’a mo’a e turu i te reira. Ha’api’i i te ha’api’ira’a tumu niu o te ’aravihi i te mau misiōnare.
Feiā fa’atere misiōni ’e nā tauturu misiōni
I te tahi taime, ’a pe’e atu i te mau misiōnare ’a ha’api’i ai rātou. ’A fa’anaho e nāhea ’outou i te ’āmui atu i roto i te ha’api’ira’a.
’A fa’aitoito i te feiā fa’atere o te fenua ’ia ’āmui mai ’e te mau misiōnare i roto i tā rātou mau fārereira’a ha’api’ira’a.
’A fa’a’ite ’e ’a tauturu i te mau misiōnare ’ia fa’a’ohipa i te hō’ē o te mau ’aravihi nō te ha’api’i atu tei fa’ata’ahia i roto i teie pene, mai te uira’a i te mau uira’a maita’i ’e te fa’aro’ora’a.
’A fa’a’ite i te fa’a’ohipara’a maita’i a’e i te mau pāpa’ira’a mo’a, ’a ha’api’ihia ai te mau misiōnare i roto i te mau ’āmuira’a ārea misiōnare, te ’āpo’ora’a feiā fa’atere misiōni, ’e te mau uiuira’a. ’A nā reira ato’a ’ia ha’api’i ana’e ’outou ’e ’o rātou.
Tauturu i te mau misiōnare ’ia māramarama i te mau pāpa’ira’a mo’a ’e ’ia fa’ananea i te here nō te reira. ’Ua a’o atu Elder Jeffrey R. Holland i te feiā fa’atere misiōni :
« ’A fa’atupu i te here nō te parau a te Atua ’ei tao’a niu hope roa nō tā ’outou ta’ere misiōni […] ’A rave te matau-maita’i-ra’a i te mau heheura’a ’e te fa’a’ohipa-tāmau-ra’a i te mau pāpa’ira’a mo’a ’ei hō’ē o te hōho’a mātāmua roa nō tā ’outou mau misiōnare, nō te toe’a o tō rātou orara’a.
« ’Ia ha’api’i ana’e ’outou i te mau misiōnare—’e i te mau taime ato’a—’a ha’api’i atu ia rātou nā roto mai i te mau pāpa’ira’a mo’a. ’A vaiiho ia rātou ’ia ’ite nō hea mai tō ’outou pūai ’e te fa’aurura’a i te hutira’ahia mai. ’A ha’api’i ia rātou ’ia here ’e ’ia turu’i i ni’a i te reira mau heheura’a i ha’apu’ehia.
« E ha’api’i [tō’u] peresideni misiōni nā roto mai i te Buka a Moromona ’e te [tahi atu] mau pāpa’ira’a mo’a i te mau taime ato’a tei pīha’i iho ’oia ia mātou, mai te reira ri’i ihoā te huru. Te mau uiuira’a tāta’itahi ’ua tuituihia i te pāpa’ira’a mo’a. ’Ua hutihia mai te mau ’ōpuara’a o […] te mau rurura’a nā roto mai i te mau pāpa’ira’a mo’a.
« ’Aita mātou i ’ite i taua tau ra, terā rā ’ua fa’a’ahu tō mātou peresideni misiōni ia mātou i te pae ’atau ’e i te pae ’aui, mā te a’o hope mai ma tōna vairua ’e te pūai ato’a e vai ra iāna, ’ia tāpe’a pāpū i te mea ’auri ’ia ’ore roa ho’i mātou ’ia pohe [hi’o 1 Nephi 15:23-25] » (« Te pūai o te mau pāpa’ira’a mo’a », rurura’a nā te feiā fa’atere misiōni ’āpī, 25 nō Tiunu 2022).