A man, presumably a chaplain or member of a bishopric, sits in a room visiting with an inmate. They appear to be in conversation together. Special Services of the Priesthood department has requested that PSD capture images of various Correctional facilities that will be used on websites and curriculum targeted to spiritually support LDS members in correctional confinement and their families.

Talateu

ʻI hoʻo hoko ko e taki ʻo e Siasí, ʻokú ke muimui ai ki he sīpinga ʻa Sīsū Kalaisí ʻi hoʻo ngāue fakaetauhi kiate kinautolu naʻe uesia ʻe he faihiá mo e ngāue pōpulá. ʻOku ʻafioʻi mo ʻofa ʻa e Tamai Hēvaní ʻi Heʻene fānaú, pea ʻe tokoni ki ha tokolahi ʻa hoʻo ngāue ʻi ha ngāue fakaetauhi ʻa e Siasí ki he ʻapi pōpulá ke nau ako, fakalakalaka, mo fakatupulaki ai ha ngaahi sīpinga moʻui te ne tataki kinautolu ʻi heʻenau fakalakalaka ʻi he hala ki honau Fakamoʻuí. ʻOku faʻa fakamamahi ʻa e ngaahi meʻa ʻoku iku ki he ngāue pōpula ʻa ha taha pea ʻoku fiemaʻu ki ai ʻa e fakamoʻuí, fakaakeaké, mo e fakamolemolé. ʻI hoʻo ngāue fakaetauhí, te ke tokoni ai ki he ʻEikí ke fakahaofi ʻEne fānaú, fakatupulaki honau kahaʻú, pea toe fakatahaʻi kinautolu mo honau ngaahi fāmilí.

ʻOku poupouʻi ʻa e kau takí ke nau fakakaukau ki he ngaahi fehuʻi ko ʻení:

• Kuo tau ʻiloʻi lelei nai ʻa e niʻihi fakafoʻituitui mo e ngaahi fāmili ko ia ʻoku uesia ʻe he faihiá mo e ngāue pōpulá, pea ʻoku tau ʻiloʻi nai ʻa e meʻa ʻoku nau fiemaʻú?

• Kuo tau ui mo teuteuʻi nai ha kāingalotu ʻi hotau siteikí ke tokoni?

• ʻOku mahino nai kiate kitautolu ʻa e taumuʻa mo e ola ʻoku fiemaʻu mei heʻetau ngaahi ngāué?

• ʻOku tau maheni nai mo e ngaahi fakahinohino ki he ʻapi pōpula fakalotofonuá pea pehē ki he ngaahi maʻuʻanga tokoni ʻaonga ʻo e koló?

• Kuo tau teuteuʻi nai kitautolu ʻi he ako mo e lotu ke fakahoko ʻa e ngāue fakaetauhi ko ʻení?

Ko e Kamatá

Kuo pau ke mahino ha ngaahi moʻoniʻi meʻa faingataʻa kae lava ke fai ʻa e ngāué ni. He ʻikai lave ʻa e ngaahi fakahinohino ko ʻení ki he tūkunga kotoa pē, ka te nau ʻoatu ʻa e ngaahi tefitoʻi meʻa mahuʻinga ʻoku fiemaʻu ke ke fakahoko ʻaki ʻa e ngāué ni. ʻOku tupulaki ʻetau malava ke tāpuekina ʻa e niʻihi kehe ʻoku uesia ʻe he faihiá mo e ngāue pōpulá ʻi heʻetau vakai ki he ngaahi meʻá ʻi honau tuʻunga totonú pea ngāue ʻi ha founga ʻokú ne fakahaaʻi ʻa e mahino ko iá.