Ngaahi Fatongia ʻo e Siteikí

ʻE tataki ʻe he palesiteni fakasiteikí ʻa e ngaahi ngāue fakaetauhi ki he ʻapi pōpulá ʻi loto ʻi he ngaahi ngataʻanga ʻo e siteikí mo fakapapauʻi ʻa e faʻahinga poupou ke fakahoko ʻi he fale fakatonutonu takitaha. ʻOku kau ʻi he ngaahi ngāue ko ʻení ʻa hono poupouʻi ʻo e kakai lalahi mo e toʻu tupu ʻoku tauhi fakalaó. ʻE lava ke fokotuʻu ha kulupu ngāue fakaetauhi ʻa e siteikí ki he ʻapi pōpulá ke poupouʻi ʻa e ngāué ni. Ko e angamahení, ʻoku kau ʻi he kulupú ʻa e palesiteni fakasiteikí pe ko ha taha ʻo hono ongo tokoní, ko ha alēleaʻanga māʻolunga, mēmipa ʻo e kau palesitenisī fakasiteiki ʻo e Fineʻofá, mo e ngaahi hoa mali pe niʻihi fakafoʻituitui kehe naʻe ui mei he siteikí. ʻI ha ngaahi tūkunga ʻe niʻihi, ʻe lava ke ʻoatu ʻe hono fokotuʻu ha kolo ʻo e Siasí ʻa e poupou ʻoku fiemaʻú (vakai, Tohi Tuʻutuʻuni Fakakātoá: Ko e Ngāue ʻi Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 37.6). Kuo pau ke muimui ʻa e ngaahi ngāue fakaetauhi kotoa pē ki he ngaahi fakahinohino ʻa e kau pule ʻo e ʻapi pōpula fakalotofonuá.

ʻE toe ngāue fakataha foki ʻa e kau taki ʻo e siteikí mo e uōtí ke tokangaʻi ʻa kinautolu naʻe toki tukuange mei hono tauhi fakalaó. ʻOku nau tokangaʻi ʻa e kau mēmipa ʻo e fāmili ʻoku ʻi ai hanau ʻofaʻanga ʻoku ngāue pōpula.

Kapau ʻe fiemaʻu tokoni ha siteiki ʻi hono fai ha tokoni ki ha ʻapi pōpula ʻi loto ʻi honau ngaahi ngataʻangá, ʻe lava ke vahe ʻe he Kau Palesitenisī Fakaʻēliá ki ha siteiki ʻe taha pe lahi ange ʻoku ofi mai ke nau tokoni.