Ngāue Fakaetauhi ki he Fakafoʻituitui mo e Ngaahi Fāmili ʻoku Ngāue Pōpula ha Taha ʻOku Nau ʻOfa Ai

Vakai foki ki he Tokoni maʻá e Kau Mēmipa ʻo e Fāmili ʻa e Tokotaha Ngāue Pōpulá pe Naʻe Ngāue Pōpula Kimuʻá.

ʻE lava ke hanga ʻe he ngāue pōpula ʻa ha mātuʻa ʻo uesia ʻa e tuʻunga moʻui lelei fakaeʻatamai, tōʻonga fakasōsiale, mo e ngaahi faingamālie fakaako ʻa ha fānau. ʻE lava ke fakalalahi ʻa e faingataʻaʻia fakaeloto ʻe ala hokó pea mo e ngaahi faingataʻaʻia ʻo e moʻui fakafāmili kuo veukí ʻe he fakafaikehekeheʻi fakasōsiale ʻoku fefaʻuhi mo e fānaú mei he ʻi ai ha mātuʻa ʻoku ngāue pōpulá. Mahalo kuo nau aʻusia ha faingataʻaʻia mei hono puke ke fakahū pilīsone ʻenau mātuʻá pe ngaahi aʻusia kimuʻa aí. ʻE lava foki ke fehangahangai ʻa e fānau ʻoku ngāue pōpula ʻenau mātuʻá mo ha ngaahi aʻusia faingataʻa kehe ʻi heʻenau kei tupu haké, hangē ko e sio tonu ʻi he fakamamahí ʻi honau tukui koló pe fāmilí pe ʻi hano fakaʻiloʻilo ki he faitoʻo konatapú pe kava mālohí.

Mahalo ʻe fiemaʻu ke fengāueʻaki ʻa e kau takí mo ha kau mataotao ki he moʻui lelei fakaeʻatamai ʻi heʻenau fai ha tokoní. Tokoniʻi ʻa e fānaú ke nau ako ke lotu ki he ʻOtuá mo fakatupulaki ʻa e tui kia Sīsū Kalaisí. Fakaafeʻi kinautolu ki he lotú mo e ngaahi polokalama fakasōsiale angamahení ke feʻiloaki mo ha ngaahi kaungāmeʻa foʻou pea maʻu ha fiefia.