Ngaahi Tuʻutuʻuni ki he Fetuʻutakí

Fetuʻutaki Meilí

4:3

ʻE lava ke kau ʻi he ngāue fakaetauhi kiate kinautolu ʻoku tuku pōpulá, ʻa e fetuʻutaki kiate kinautolu ʻi he ʻīmeilí pe meili tohí. ʻOku mahuʻinga ki heʻenau ako mo e lelei ʻa e tokotaha ngāue pōpulá, hono tali taimi totonu ʻene ngaahi tohí. ʻOku ʻoatu ʻe he fetuʻutaki meilí ha faingamālie ke ke fakaafeʻi ʻa e pōpulá ke haʻu kia Sīsū Kalaisi pea fakahoko ha ngāue fakaetauhi fakataautaha. ʻOkú ne fakaʻatā foki koe ke ke tali ʻenau ngaahi fehuʻí, langaki hake kinautolu, mo vahevahe ʻa e ngaahi naunau ʻa e Siasí ke tokoniʻi kinautolu ke nau ʻunu ʻo ofi ange ki he Fakamoʻuí.

ʻE lava ke ui ʻe he palesiteni fakasiteikí ha niʻihi fakafoʻituitui, kau ai ha ngaahi hoa mali, ke nau fetuʻutaki mo ha pōpula. ʻOku totonu ke fakahaaʻi ʻe he fetuʻutaki kotoa pē ʻa e ʻofa faka-Kalaisí, fakaʻehiʻehi mei he fakaangá pe fakahalaiaʻi ʻa e tōʻonga faihia ʻa e fakafoʻituituí.

ʻOku fakaʻaongaʻi ʻa e ngaahi fakahinohino ko ʻení ʻi he taimi ʻoku fekauʻaki ai mo e niʻihi fakafoʻituitui ʻoku ngāue pōpulá:

Kuo pau ke taʻu 18 ʻa e tokotahá.
ʻOku totonu ke fakaʻaongaʻi ha puha pōsiti ʻōfisi ke maluʻi ʻa e totonu fakafoʻituitui ʻa e tokotaha ʻokú tali ʻa e tohí.
ʻOku ʻikai totonu ke lōloa ange ʻa e ʻū tohí ʻi he peesi ʻe nimá.
ʻOku totonu ke fakamoʻoni hingoa ʻa e ngaahi tohí ʻaki ʻa e hingoa ʻuluaki ʻo e tokotaha tali ʻa e tohí pea ʻoku totonu ke fakaʻehiʻehi mei hono vahevahe ha faʻahinga fakaikiiki fakataautaha pē.
ʻOku ʻikai ngofua ke fakaʻaongaʻi ʻa e ngaahi sila fakalanulanú, pepa pe naunau fakalanulanú, ʻū kaati fakafeʻiloaki, kaati, mo e ngaahi pepa fakalanu kehekehe.
ʻOku ʻikai ngofua ke ʻave ha ʻū tā pe paʻanga fakataautaha.
ʻOku ʻikai ngofua ke fetuʻutaki ki he ngaahi kaungāmeʻa pe fāmili ʻo e tokotaha ngāue pōpulá.
ʻOku ʻikai ngofua ke fakaʻekeʻeke fekauʻaki mo e ngaahi ʻuhinga pe fakaikiiki ʻo e ngāue pōpula ʻa e fakafoʻituituí.
ʻOku totonu ke ʻoua naʻa fakahāhāholo ʻa e ngaahi tohi mei ha tokotaha ʻoku ngāue pōpula. ʻE lava ke tauhi kinautolu ʻi ha feituʻu malu ʻo aʻu ki ha māhina ʻe ono, hili iá ʻoku fakaʻauha leva kinautolu. ʻOku SAI PĒ ke scan mo ʻīmeili ʻa e ngaahi tohí ʻi loto ʻi ha ngāue ʻa e siteikí. Neongo ia, ka ʻoku totonu ke tamateʻi ʻa e ngaahi tatau fakaʻilekitulōniká hili ha māhina ʻe ono.
ʻOku totonu ke tohi ʻa e ngaahi tohi kotoa pē ʻaki ʻa e mahino ʻe tokangaʻi ʻa e ngaahi fetuʻutakí pea lau ʻe he kau ngāue ʻo e ʻapi pōpulá.
ʻOku ʻikai ʻaupito totonu ke kau ʻi he ngaahi tohí ha faleʻi fakalao pe fakamatala ki he ngaahi meʻa fakalaó.
Kapau ʻoku kau ʻi ha tohi mei ha tokotaha ngāue pōpula haʻane vetehia ki ha faihia kehe, fakamanamana ke fakalaveaʻi ha taha, pe fakahaaʻi ha sāuni fakalao ki he Siasí, pea ʻoku totonu leva ke fetuʻutaki leva ʻa e kau takí ki he ʻŌfisi ʻo e Faifaleʻi Fakalūkufuá (Office of General Counsel) ʻi he 1-801-240-6301.

Ko Hono ʻOta ʻo e Ngaahi Tohi ʻa e Siasí

ʻOku poupouʻi ʻa e kau taki fakasiteikí ke ʻoange ki he tokotaha takitaha ʻoku ngāue pōpulá ha tatau ʻo e folofolá, makasini Liahoná, mo ha ngaahi tohi kehe te ne ala poupouʻi ʻa e fakaakeaké, moʻui lelei fakaeʻatamaí mo fakaelotó, fakaakeake mei he maʻunimaá, mo e moʻui fakafalala pē kiate kitá. Ko e lahi taha ʻo e ngaahi ʻapi pōpulá ʻoku nau fakangatangata ʻa e lahi ʻo e ngaahi meʻa fakataautaha ʻoku maʻu ʻe ha tokotaha.

Fakapapauʻi ke muimui ki he ngaahi fakahinohino ko ʻení:

ʻOua naʻá ke ʻave ha ngaahi tohi ʻoku takafi fefeka pe fakamaʻu ʻaki ha meʻa.
Kuo pau ke muimui ki he ngaahi tuʻutuʻuni kotoa ʻo e ʻapi pōpulá. Kātaki ʻo vakai ki he uepisaiti ʻa e ʻapi pōpulá ki ha ngaahi fakaikiiki. ʻI he ngaahi meʻa lahi, ʻoku totonu ke ʻave hangatonu pē ʻa e ngaahi naunau naʻe ʻotá mei he faipulusí pe kautaha naʻe fai mei ai ʻa e fakataú ki he tuʻasila meili ʻo e ʻapi pōpulá.
ʻOku fiemaʻu kotoa ʻa e hingoa kakato ʻo e tokotaha ʻoku ngāue pōpulá, fika ʻo e pōpulá, mo e ʻiunití pe poloka ʻo e lokí ke fakahoko ha ʻota, pea pehē ki he tuʻasila meili ʻo e ʻapi pōpulá.
ʻE lava ke fakaʻaongaʻi ʻa e paʻanga ʻa e Siasí ke fakatau mai ʻaki ha ngaahi tohi lelei mei ha niʻihi ʻoku nau tuʻuaki atu ha tohi falalaʻanga.

Fakaʻatā ki he Ngaahi ʻAʻahi ki he ʻApi Pōpulá

ʻOku totonu ke muimui ʻa e kau takí ki he ngaahi lao pau ki he kau ʻaʻahí ʻo hangē ko ia ʻoku maʻu ʻi he uepisaiti ʻo e ʻapi pōpulá. ʻOku totonu ke fakafekauʻaki ʻa e toutou ʻaʻahí, ngaahi fakataha lotu fakauiké, pe ngaahi kalasi kehé mo e tokoni ʻa e faifekau ʻo e ʻapi pōpulá. ʻE lava ke ʻaonga lahi kiate koe mo kinautolu ʻokú ke tokoniʻí ha vā fetuʻutaki lelei mo e faifekau ʻo e ʻapi pōpulá. ʻOku ʻi ai ha ngaahi ʻapi pōpula ʻe niʻihi ʻoku fiemaʻu ai ke fai ʻe he kau taki ʻo e Siasí ha tohi fakamafaiʻi ko ha fakafofonga kinautolu ʻo e Siasí kuo fakangofuá. ʻE lava ke ʻīmeili ʻa e kau takí ki he ʻōfisi Ngāue Fakaetauhi ʻi he ʻApi Pōpulá ʻi he hetikuota ʻo e Siasí ke kole ha tohi ki he taumuʻa ko ʻení ʻi he PrisonMinistry@ChurchofJesusChrist.org.