Ko Hono Tokangaʻi ʻo e Ngaahi Lekōtí mo e Ngaahi Maʻuʻanga Tokoní

Ko Hono Kole ʻo e Ngaahi Lekooti Mēmipasipí

ʻI ha ngaahi tūkunga lahi, ʻoku ʻikai ʻiloʻi ʻa e tuʻunga mēmipasipi ʻo ha tokotaha lahi ʻoku tauhi fakalaó, naʻa mo e mēmipá. ʻOku mahuʻinga ʻa hono ʻiloʻi ʻa e tuʻunga mēmipasipi ʻo e tokotahá kiate ia mo ʻene fakalakalaka ʻi he hala ki he Fakamoʻuí. Neongo ia, ʻoku ʻikai totonu ke tatali ʻa e kau takí ke tokoniʻi ha taha ke fakatomala, maʻu ʻa e ngaahi tāpuakí, pea haʻu kia Sīsū Kalaisí kae ʻoua ke maʻu ʻa e ngaahi lekōtí.

Muimui ki he ngaahi fakahinohino ko ʻení ʻi he taimi ʻokú ke fakakaukauʻi ai ʻa e feituʻu ke tauhi pe ʻave ki ai ʻa e ngaahi lekooti ʻa ha mēmipa ʻoku ngāue pōpula:

• Kapau ʻoku siʻi hifo ʻi he māhina ʻe onó ʻa e taimi ngāue pōpula ʻo ha taha fakafoʻituitui, ʻoku totonu ke tuku pē hono lekooti mēmipasipí ʻi he uooti totonu ʻo e fakafoʻituituí.

• Kapau ʻoku laka hake ʻi he māhina ʻe onó ʻa e ngāue pōpula ʻa ha taha fakafoʻituitui, ʻoku totonu ke tauhi hono lekooti mēmipasipí ʻi he ʻiuniti te ne lava ʻo feau lelei taha ʻa e ngaahi fiemaʻu ʻa e fakafoʻituituí. ʻOku kau ʻi he ngaahi meʻa ke fakakaukauʻí ʻa e ngaahi meʻá ni:

  • Lahi ʻo e faingamālie ʻe foki ai ʻa e fakafoʻituituí ki hono uōtí

  • Feituʻu ʻoku nofo ai ʻa e kau mēmipa ʻo e fāmilí

  • ʻOku totonu ke mateuteu lelei ʻa e kau taki ʻo e siteikí ke fakahoko ha fakataha alēlea ki he tuʻunga mēmipasipi ʻoku mahuʻingamālié mo tokoniʻi ʻa e fakafoʻituituí ke foki ki he hala ʻo e fuakavá

Kapau naʻe toʻo ʻa e mēmipasipi ʻo ha taha ʻe ha fakataha alēlea ki he tuʻunga mēmipasipí, ʻoku ʻikai ke ʻi ai ha lekooti mēmipasipi ia. Vakai, Tohi Tuʻutuʻuni Fakakātoá,, 32.2, ki he fakamatala lahi ange.

Lipooti Fakakuatá

ʻOku totonu ke ʻave ʻe he kau takí ʻa e fakamatala ko ʻení ki heʻenau palesiteni fakasiteikí ʻi he kuata takitaha:

• ʻAvalisi ʻo e maʻulotu ʻa ha niʻihi fakafoʻituitui ʻi he ngaahi fakatahaʻanga lotú, ngaahi kalasí, pe ngaahi polokalama kehé

• Tokolahi fakakātoa ʻo e kakai lalahi ʻoku tauhi fakalaó ʻa ia naʻe kau atu ki ha fakatahaʻanga lotu, ngaahi kalasi, pe ngaahi polokalama kehé

• Ngaahi fiemaʻu fakaetauhi ʻa e kau pōpula foʻou ʻoku nau kau atu ki he ngaahi polokalama ko ʻení

• Lipooti fakalakalaka ʻi he ngaahi ngāue ke tokoniʻi ʻa kinautolu naʻe toki tukuangé

• Tokolahi ʻo e kāingalotu kuo uiuiʻí pe kau ngāue tokoni kehé

• Fakamatala fakatohi ʻo e ngaahi naunau naʻe fakataú mo e ngaahi fakamole kehé

• Tuʻunga ʻo e fengāueʻaki mo e kau ʻōfisa ʻo e ʻapi pōpulá mo e kau faifekaú, kau ai mo e ngaahi fokotuʻu ki ha fakalakalaka ʻo ka fiemaʻu

Fakapatisetí

Kapau kuo ʻosi fokotuʻu ha kolo ʻo e Siasí ʻi ha ʻapi pōpula, ʻoku fokotuʻu mo fakangofua ʻa e patisetí ʻi he founga tatau pē ʻoku fakahoko ʻaki ʻi he ngaahi uooti mo e kolo kehé. ʻOku totonu ke lau ʻa e ʻavalisi ʻo e tokolahi ʻo e kakai lalahi ʻoku tauhi fakalaó ʻi he ngaahi houalotú ko e tokolahi ia ʻo e kāingalotu ʻoku maʻu houalotu sākalamēnití.

Kapau kuo fokotuʻutuʻu ha kulupu ngāue fakaetauhi ki he ʻapi pōpulá, ʻoku totonu ke totongi ʻa e ngaahi folofolá, totongi ʻo e makasini Liahoná, mo ha ngaahi naunau kehe ʻo fakaʻaongaʻi ʻa e foaki ʻaukai mei he siteikí. Kapau ʻe fiemaʻu ha paʻanga lahi ange, ʻe lava ke ʻave ʻe he palesiteni fakasiteikí ha tohi kole ki he Kau Palesitenisī Fakaʻēliá.

ʻOku poupouʻi ʻa e kau takí ke nau angaʻofa ʻi heʻenau feinga ke tokoniʻi ʻa e niʻihi fakafoʻituitui naʻe toki fakahū pōpulá pea mo honau ngaahi fāmilí ke nau kau ki ha uooti mo ʻi ai ha nofoʻanga malu, ngāue maʻuʻanga moʻui, mo e ngaahi tefitoʻi fiemaʻu kehé.