Various men in a correctional facility attend a church meeting.

Ngaahi Tuʻutuʻuni ki he Ngaahi Kulupú mo e Ngaahi Fakatahaʻanga Lotú

Ngaahi Kulupu Ngāue Fakaetauhi Fakaʻēlia ki he ʻApi Pōpulá pe Pilīsoné

Ke tokoni lahi ange ki he kau taki ʻo e siteikí mo e uōtí, ʻe lava ke fokotuʻu ʻe he Kau Palesitenisī Fakaʻēliá ha kulupu ngāue fakaetauhi fakaʻēlia ʻi he ʻapi pōpulá. Ko e taumuʻa ʻo e kulupu ko ʻení ke poupouʻi ʻa e kau taki fakalotofonuá ʻi heʻenau fakahoko honau fatongia ke ngāue fakaetauhi kiate kinautolu ʻoku uesia ʻe he ngāue pōpulá. ʻE lava ke fokotuʻu ʻe he Kau Palesitenisī Fakaʻēliá ha ngaahi kaveinga ngāue lelei maʻá e kulupú ʻo fakatatau mo e ngaahi fiemaʻu honau feituʻú. ʻOku ngāue ʻa e kulupú ki he ngaahi palopalema faingataʻa ʻoku kau ki ai ha ngaahi ngataʻanga fakasiteiki lahi. ʻOku totonu ke ne poupouʻi ʻa e tuʻunga malu mo e ngaahi sīpinga lelei kehe ʻo e ngāue fakaetauhi ʻi he ʻapi pōpulá mo hono tokangaekina hili hono tukuangé.

Ngaahi Uiuiʻi mo e Ngaahi Fakatahaʻanga Lotu ʻi he ʻApi Pōpulá

ʻE fakapapauʻi ʻe he palesiteni fakasiteikí ʻoku uiuiʻi ha kau taki mo ha ivi malava lahi ki he ngaahi uiuiʻi fakasiteiki ʻo e ngāue fakaetauhi ki he ʻapi pōpulá. Ko e angamahení, ʻoku ʻikai fiemaʻu ke vahe ʻa e ngaahi hoa mali pe niʻihi fakafoʻituitui naʻe ui ki he kulupu ngāue fakaetauhi ʻa e siteikí ki he ʻapi pōpulá ke nau hoko ko ha kau faifekau tokoni, pe te nau tui ha pine hingoa fakafaifekau. ʻE lava ke fokotuʻu ha ngaahi uiuiʻi kehekehe ʻi loto ʻi ha kulupu ngāue fakaetauhi ʻa e siteikí pe koló ki he ʻapi pōpulá ke feau ʻa e ngaahi fiemaʻu ʻa e niʻihi ʻoku ngāue ki ai ʻa e kulupú. ʻOku totonu ke fakakau ʻa e ngaahi uiuiʻi fakatakimuʻa ʻo e Fineʻofá ʻi he taimi ʻoku ngāue fakaetauhi ai ki he kakai fefine ʻoku ngāue pōpulá.

ʻE lava ke fakanounouʻi ʻa e ngaahi moihū maʻá e kau mēmipa ʻi he ʻapi pōpulá pe ngaahi feituʻu kehé ʻo hangē ko hono fiemaʻú ke feau ʻenau ngaahi fiemaʻú. ʻOku meimei ke muimui ʻa e ngaahi houalotu ko ʻení ʻi he founga ʻo e houalotu sākalamēnití tuku kehe pē ʻa e ʻikai tufa ʻa e sākalamēnití ki he kau ngāue pōpulá. ʻE lava ke kau ʻa e niʻihi fakafoʻituitui ʻoku ngāue pōpulá ʻaki haʻanau fai ha ngaahi lotu, fakahoko ha lea, vahevahe ʻenau ngaahi fakamoʻoní, pe fakahoko ha ngaahi ngāue kehe ʻoku tāú, tatau ai pē pe ko e hā ʻa e tui fakalotú pe tuʻunga ʻi he Siasí. ʻE lava ʻe hono hivaʻi ʻo e ngaahi himí ʻo fakaafeʻi ʻa e Laumālié mo ʻoange ki he fakafoʻituituí ha faingamālie ke nau kau mo moihū ai.

ʻE lava ke fakahoko ʻa e sākalamēnití ʻe he kāingalotu ʻoku uiuiʻi ke nau tokoni ʻi hono fakahoko ʻo e ngaahi houalotu ʻi he ʻapi pōpulá ʻi ha fakataha mavahe ʻi he malumalu ʻo e fakahinohino ʻa e palesiteni fakasiteikí.