Pag-ila sa mga Panginahanglan

Ang proseso diin ang mga lider moila sa mga panginahanglan niadtong naapektohan sa pagkabilanggo sa usa ka lugar o stake mahimong magkalahi. Ang mga miyembro mahimong tawagon aron sa pagtabang niini nga proseso ug sa paghatag og padayon nga suporta. Ang mga lider kinahanglan nga sensitibo sa pagkapribado ug sa mga panginahanglan sa mga naapektohan sa pagkabilanggo. Limitahi ang pag-apod-apod sa impormasyon mahitungod sa mga sirkumstansiya sa indibidwal o pamilya ngadto sa nanginahanglan niini. Naglakip kini sa mubong mga sulat sa miting, personal nga mubong mga sulat, ug elektronik nga komunikasyon.

Ikonsiderar ang mosunod:

1. Kinsa ang mga indibidwal o mga pamilya ang negatibong naapektohan sa krimen o pagkabilanggo?

2. Aduna bay dinalian nga temporal nga mga panginahanglan nga kinahanglang tubagon?

3. Aduna ba silay regular nga kontak sa tigpangalagad nga magtiayon o mga lider sa ward?

4. Aduna bay mga batan-on o mga bata niini nga mga pamilya nga tingali nanginahanglan og dugang nga suporta?

5. Unsa ang mental o emosyonal nga mga hagit nga ilang nasinati? Nagtabang ba ang medikal nga mga propesyonal o ubang gisaligan nga mga kapanguhaan?

6. Pila kabuok ang bilanggoan nga mga pasilidad nga anaa sa mga utlanan sa stake?

7. Kinsa nga mga hamtong nga binilanggo niini nga mga pasilidad ang adunay kanhi nga kalambigitan o bag-o lang nga interes sa Simbahan?

8. Hangtod kanus-a kini nga mga indibidwal mabilanggo?

9. Unsa ang ilang indibidwal nga mga panginahanglan mahitungod sa espirituhanong pagtubo, edukasyon, pagkaayo sa pagkaadik, ug sosyal o bokasyonal nga mga kahanas?

10. Unsa nga akses ang anaa karon sa pagbisita, paghimo og mga miting o mga klase, o paghatag og ubang suporta?