Mga Palisiya alang sa mga Grupo ug mga Tulumanon sa Pagsimba

Mga Grupo sa Area sa Pagpangalagad diha sa Prisohan o Bilanggoan

Sa paghatag sa mga lider sa stake ug sa ward og dugang nga suporta, ang Kapangulohan sa Area mahimong mag-organisar og grupo sa area sa pagpangalagad sa prisohan. Ang katuyoan niini nga grupo mao ang pagsuporta sa lokal nga mga lider samtang nagtuman sila sa ilang responsibilidad sa pagpangalagad niadtong naapektohan sa pagkabilanggo. Ang mga Kapangulohan sa Area mahimong mag-establisar og tukma nga mga tumong alang sa grupo nga gibase sa mga panginahanglan sa ilang area. Ang grupo motubag sa komplikado nga mga isyu nga naglambigit sa daghang utlanan sa stake. Kinahanglan nga mopasiugda kini sa seguridad ug ubang epektibo nga mga sundanan sa pagpangalagad sa prisohan ug sa pag-atiman human makagawas.

Mga Calling sa Pagpangalagad diha sa Prisohan o Bilanggoan ug mga Tulomanon sa Pagsimba

Ang presidente sa stake moseguro nga ang makahimo nga mga lider mao ang tawagon sa mga calling sa stake sa pagpangalagad sa prisohan. Kasagaran, ang mga magtiayon o mga indibidwal nga tawagon sa stake sa pagpangalagad diha sa bilanggoan dili itudlo isip pangserbisyo nga mga misyonaryo, ni sila magsul-ob og mga name tag sa misyonaryo. Ang lainlaing mga calling mahimong iestablisar sulod sa grupo sa stake sa pagpangalagad sa prisohan o branch aron matubag ang mga panginahanglan niadtong giserbisyohan sa grupo. Ang mga calling sa pagpangulo sa Relief Society kinahanglang ilakip kon mangalagad sa mga babaye nga nabilanggo.

Ang mga tulumanon sa pagsimba alang sa mga miyembro nga anaa sa mga bilanggoan ug uban pang mga institusyon himoon nga yano kon gikinahanglan aron matubag ang ilang mga panginahanglan. Kini nga mga tulumanon sa kasagaran magsunod sa susamang han-ay sama sa panagtigom alang sa sakramento gawas nga ang sakramento dili ipangalagad ngadto sa nabilanggo nga mga indibidwal. Ang nabilanggo nga mga indibidwal makaapil sa paghatag og mga pag-ampo, paghatag og mga pakigpulong, pagpakigbahin og mga pagpamatuod, o pagtuman sa ubang tukma nga mga buluhaton, bisan unsa pa ang relihiyon nga giapilan o kahimtang diha sa Simbahan. Ang pagpanganta og mga himno makadapit sa Espiritu ug makahatag sa mga indibidwal og kahigayonan sa pag-apil ug sa pagsimba.

Ang mga miyembro nga gitawag aron motabang sa pagpahigayon sa mga tulumanon sa pagsimba diha sa prisohan mahimong mangalagad sa sakramento ngadto sa usag usa sa usa ka gilahi nga miting ubos sa mando sa presidente sa stake.