Kahilwasan

Ang mga miyembro nga nangalagad niadtong nabilanggo kinahanglang magmatinahoron ug mosunod sa tanang lagda sa pasilidad ug mga pamaagi sa kahilwasan. Kinahanglan nga mosunod usab sila niini nga mga sumbanan:

• Maglikay nga mag-inusara uban sa hamtong nga binilanggo. Ang paghatag og personal nga tambag o panalangin sa pagkapari gitugotan kon adunay pagtugot sa mga opisyal sa pasilidad ug samtang magsunod sa ilang mga sumbanan.

• Kinahanglang likayan sa mga miyembro ang paghisgot sa mga detalye sa krimen sa indibidwal, sentensiya, o gikinahanglan nga mga pagtambal lapas pa sa gikinahanglan aron matabangan siya sa proseso sa paghinulsol. Kinahanglang sundon nila ang mga pamaagi sa konseho sa pagkamiyembro. Kon nahibaloan sa mga miyembro ang bisan unsang matang sa pag-abuso, kinahanglan nga kontakon dayon nila ang legal nga mga awtoridad. Ang mga presidente sa branch, mga bishop, ug mga presidente sa stake kinahanglang motawag sa help line sa pag-abuso alang sa giya sa paghimo og mga paagi sa pagpanalipod ug sa pag-atiman sa mga kinahanglanon sa pagreport (tan-awa sa Kinatibuk-ang Tamdanan nga Basahon, 38.6.2, 38.6.2.1).

• Ang mga miyembro kinahanglang dili mohatag ug kuwarta o mga regalo ngadto sa usa ka hamtong nga binilanggo, ni sila mohimo ug bisan unsang kasabotan sa pagbuhat niini human sa makagawas ang tawo. Ang tanang pinansiyal nga suporta kinahanglan nga mag-agi sa mga pundo sa stake, ward, o branch. Ang Simbahan dili mobayad sa legal o korte nga bayranan sa usa ka binilanggo, hinuon mahimong mobayad kini sa mga tiket sa bus, mga amot aron makakuha og ikapuli nga identipikasyon, o ubang tabang sa kaayohan (tan-awa sa Kinatibuk-ang Tamdanan nga Basahon, 22.5.2).

• Ang mga miyembro kinahanglang dili gayod mopakigbahin sa ilang address sa balay o motugot sa gibuhian nga indibidwal sa pagbisita o pagpabilin sa tibuok gabii sa ilang balay. Ang ubang impormasyon sa pagkontak, sama sa email address o numero sa telepono, mahimo lamang ipakigbahin sa gibuhian nga indibidwal kon ang mga lagda sa pasilidad motugot sa pagkontak human sa pagbuhi ug ang miyembro adunay buluhaton sa paghatag og padayon nga suporta.

• Ang mga lider sa Simbahan kinahanglang dili mag-apil-apil sa sibil o kriminal nga mga kaso alang sa mga miyembro sa ilang mga yunit nga dili una mokonsulta sa legal nga tigtambag sa Simbahan (tan-awa sa Kinatibuk-ang Tamdanan nga Basahon, 38.8.23.1). Naglakip kini sa pagtestigo o paghimo og sinulat o berbal nga pagsumiter ngadto sa probation o parole board, ingon man sa pagpakigkontak sa mga kawani sa korte alang sa mga kriminal nga akusado o uban pa. Bisan unsa ka maayo ang tumong, ang pagpakigbahin sa mga lider sa Simbahan og impormasyon sa legal nga mga kahimoan mahimong masaypan og sabot ug makadaot—ilabi na ngadto sa mga biktima ug sa ilang mga pamilya. Kini nga palisiya makapanalipod usab sa Simbahan aron dili madamay sa dili tukmang legal nga mga butang. Kon ang usa ka lider nagtuo nga siya kinahanglan nga motestigo o makig-istoryahay mahitungod sa usa ka legal nga butang o kon ang usa ka lider gikinahanglan nga mobuhat sa ingon pinaagi sa legal nga proseso, siya kinahanglan nga mokontak sa legal counsel sa Simbahan. Sa Estados Unidos ug Canada, ang mga lider mokontak sa Church’s Office of General Counsel.

  Sa gawas sa Estados Unidos ug Canada, ang mga lider mokontak sa legal counsel sa buhatan sa area.

• Ang mga miyembro kinahanglang dili mohatod og mga mensahe tali sa mga indibidwal nga nabilanggo ug sa ilang mga higala ug mga pamilya.

• Sa mga prisohan, labing menos duha ka lalaki o usa ka magtiayon ang kinahanglan nga tawagon aron motabang sa mga lalaki nga binilanggo nga mga indibidwal. Labing menos duha ka lalaki, duha ka babaye, o usa ka magtiayon ang kinahanglang tawagon nga makigtinabangay sa babaye nga binilanggo nga mga indibidwal.

Human mabuhii ang usa ka indibidwal gikan sa pasilidad, ang mga miyembro mahimong mohatag og transportasyon samtang magsunod niini nga mga sumbanan:

• Ang transportasyon kinahanglan nga panagsa lamang, temporaryo, ug alang sa tinuod nga mga panginahanglan nga dili sayon nga ipahigayon sa laing mga paagi. Ang angay nga mga panginahanglan mahimong maglakip sa transportasyon ngadto sa simbahan, mga serbisyong medikal, mga interbiyo sa panarbaho, ug mga bus stop o mga estasyonan sa tren aron mahiusa pag-usab ang gibuhian nga indibidwal uban sa iyang pamilya.

• Ang transportasyon sa kasagaran kinahanglan nga ihatag diha lamang sa komunidad diin magpuyo ug magtrabaho ang gibuhian nga indibidwal. Ang lagyo nga mga biyahe kinahanglang likayan.

• Kon magpasakay og binuhian nga indibidwal, kinahanglang adunay duha ka hamtong nga sakay sa sakyanan dugang ngadto sa gibuhian nga indibidwal. Importante kaayo kini kon ang gibuhian nga indibidwal usa ka minor de edad o kanhi nakombikto sa seryoso nga mga krimen.