Pagdumala sa mga Rekord ug mga Kapanguhaan

Pagkuha sa mga Rekord sa Pagkamiyembro

Sa daghang sitwasyon, ang kahimtang sa pagkamiyembro sa usa ka hamtong nga binilanggo dili ipahibalo, bisan sa indibidwal. Ang pagkahibalo sa kahimtang sa pagkamiyembro sa indibidwal importante alang kaniya aron molambo subay sa dalan paingon sa Manluluwas. Hinuon, ang mga lider kinahanglang dili maghulat nga motabang sa indibidwal nga maghinulsol, makadawat sa mga panalangin, ug moduol ngadto ni Jesukristo samtang ang mga rekord gikuha.

Sunda kini nga mga lagda kon modesisyon kon asa tipigan o ibalhin ang mga rekord sa nabilanggo nga miyembro:

• Kon ang termino sa pagkabilanggo sa indibidwal dili moabot og unom ka bulan, ang iyang rekord sa pagkamiyembro kinahanglang magpabilin diha sa ward sa indibidwal.

• Kon ang termino sa pagkabilanggo sa indibidwal sobra sa unom ka bulan, ang iyang rekord sa pagkamiyembro kinahanglang tipigan diha sa yunit nga labing makatubag sa mga panginahanglan sa indibidwal. Pipila ka butang nga ikonsiderar naglakip sa mosunod:

  • Ang kalagmitan sa indibidwal nga mopauli sa iyang ward

  • Ang nahimutangan sa mga sakop sa pamilya

  • Ang nangulo sa stake nga labing andam sa paghatag og makahuloganon nga konseho sa pagkamiyembro ug sa pagtabang sa indibidwal nga mahibalik sa dalan sa pakigsaad

Kon ang pagkamiyembro sa indibidwal pormal nga gibakwi sa konseho sa pagkamiyembro, wala nay rekord sa pagkamiyembro. Tan-awa sa Kinatibuk-ang Tamdanan nga Basahon, 32.2, alang sa dugang nga impormasyon.

Mga Report Matag Tulo ka Bulan

Ang mga lider kinahanglang mohatag sa mosunod nga mga datos ngadto sa ilang presidente sa stake matag tulo ka bulan:

• Sumada sa pagtambong sa nabilanggo nga mga indibidwal diha sa mga tulumanon sa pagsimba, mga klase, o ubang mga programa

• Sumada sa gidaghanon sa mga hamtong nga binilanggo nga miapil labing minos kaduha sa mga tulomanon sa pagsimba, mga klase, o ubang mga programa

• Mga gikinahanglan nga pagpangalagad sa bag-ong nabilanggo nga mga indibidwal nga miapil niini nga mga programa

• Report sa kalamboan bahin sa mga paningkamot sa pagtabang niadtong bag-ohay lang nga gibuhian

• Gidaghanon sa mga miyembro nga gitawag o ubang mga boluntaryo

• Pagsubay sa mga materyal nga napalit ug ubang mga bayranan

• Kahimtang sa relasyon sa pakigtambayayong sa mga opisyal ug mga chaplain sa bilanggoan, lakip na sa mga rekomendasyon alang sa paglambo sumala sa gikinahanglan

Pag-budget

Kon ang pasilidad sa prisohan o bilanggoan naorganisar na, ang mga budget himoon ug aprobahan sa samang paagi nga kini gihimo diha sa ubang mga ward ug mga branch. Ang sumada sa gidaghanon sa mga hamtong nga binilanggo nga nagtambong sa mga tulomanon sa pagsimba kinahanglang iphon isip ang gidaghanon sa mga miyembro nga nagtambong sa panagtigom alang sa sakramento.

Kon ang grupo sa pagpangalagad sa prisohan naorganisar na, ang bayranan sa mga kasulatan, mga subskripsiyon sa Liahona nga magasin, ug ubang mga materyal kinahanglang bayaran gamit ang mga halad sa puasa gikan sa stake. Kon nagkinahanglan og dugang nga pundo, ang presidente sa stake mahimong mopadala og hangyo ngadto sa Kapangulohan sa Area.

Ang mga lider giawhag nga magmadagayaon sa ilang mga paningkamot sa pagtabang sa mga indibidwal nga bag-ohay lang nga nabilanggo ug sa ilang mga pamilya sa pag-establisar pag-usab sa ilang mga kaugalingon diha sa ward nga adunay luwas nga kapuy-an, trabaho, ug ubang sukaranan nga mga panginahanglan.