Mësoni

Koha Maksimale: 60 Minuta

1. Ndryshimi midis Fitimit dhe Qarkullimit të Parave në Dorë

Lexoni:

Keni mësuar se suksesi i biznesit kërkon mbajtje të përditshme të dokumenteve. Çdo herë që biznesi juaj merr ose bën një pagesë, nevojitet ta regjistroni atë. Gjithashtu keni mësuar se si të krijoni një deklaratë të ardhurash, e cila tregon një përmbledhje të fitimit (ose humbjes) të arritur nga biznesi juaj për një periudhë të caktuar kohore. Fitimi përkufizohet si paratë e mbetura për biznesin tuaj pasi hiqni shpenzimet tuaja nga të ardhurat tuaja bruto.

Ndërkohë që fitimi është një njësi matëse e rëndësishme, ai nuk është i vetmi që kërkon vëmendjen tuaj si pronar biznesi. Qarkullimi i parave në dorë është një njësi matëse që përqendrohet te periudha e futjes së parave në biznesin tuaj dhe e nxjerrjes prej tij çdo ditë. Qarkullim i parave në dorë është gjaku jetëdhënës i biznesit tuaj. Kur biznesi juaj ka në dispozicion para në dorë, ju mund të ndiqni mundësi për rritje, mund të bëni investime dhe të kurseni para për situata të papritura ose raste të ngutshme.

Deklarata juaj e të ardhurave mund të tregojë se si biznesi juaj është fitimprurës, por do të falimentojë nëse nuk ka para të mjaftueshme në dorë për t’i paguar detyrimet e veta. Problemet e qarkullimit të parave në dorë janë një prej shkaqeve kryesore të falimentimit të bizneseve.

Veprimtari (10 minuta)

Punoni së bashku si grup për ta përfunduar këtë veprimtari. Zgjidhni dy anëtarë të grupit që të bashkohen me ndërmjetësin.

Ndërmjetësi: Sot do të flasim rreth qarkullimit të parave në dorë. Qarkullimi i parave në dorë i referohet kohës dhe sasisë së parave në dorë që qarkullojnë brenda dhe jashtë biznesit tuaj. Mund të bëhet i ndërlikuar. Do të shohim dy biznese dhe mënyrën se si ata e administrojnë qarkullimin e tyre të parave në dorë. Teksa mësoni rreth secilit biznes, nënvizoni pikat kyç që mendoni se do ta ndikojnë qarkullimin e parave në dorë të tyre.

Pronari i Biznesit 1: Biznesi im po rritet shpejt, me shumë shitje. Ne i paguajmë furnizuesit tanë shpejt që të krijojmë një marrëdhënie të mirë. Klientët tanë na paguajnë më në fund, kështu që faturat e papaguara të tyre janë si para në bankë.

Pronari i Biznesit 2: Biznesi im po rritet me një ritëm të zakonshëm. Shitjet tona luhaten; ka kohë të këqija dhe kohë të mira. Ne përpiqemi fort t’i paguajmë furnizuesit tanë brenda tre ose katër javësh pasi i marrim faturat e tyre. Gjithashtu i gjurmojmë me kujdes faturat tona të papaguara dhe punojmë që t’i bëjmë klientët tanë të na paguajnë në kohë.

Ndërmjetësi: Tani le të paraqitim sfidat e të dy bizneseve dhe të diskutojmë si grup mënyrën se si do ta prisnim të vepronte secilin biznes. (Shënim: Mbarojeni leximin dhe diskutimin e Sfidës A përpara leximit dhe diskutimit të Sfidës B.)

Sfida A: Për shkak të shitjeve të shtuara, biznesi duhet ta dyfishojë personelin e vet gjatë katër muajve të ardhshëm. Cili do të jetë më i mirë në plotësimin e kësaj nevoje nga një këndvështrim i qarkullimit të parave në dorë? Përse?

Sfida B: Biznesi ka një mundësi të papritur për t’u zgjeruar në një treg premtues. Cili do të jetë më i mirë në plotësimin e kësaj nevoje nga një këndvështrim i qarkullimit të parave në dorë? Përse?

• Cili nga këta biznese do të ketë marrëdhënie më të forta me furnizuesit e vet?

• A janë “faturat e papaguara” të njëjta me “paratë në bankë”?

• Cili nga këto biznese do të ketë sukses më të madh afatgjatë? Përse?

2. Të Kuptuarit e Qarkullimit të Parave në Dorë

Lexoni:

Ka dy lloje qarkullimi të parave në dorë:

Qarkullimi pozitiv i parave në dorë ndodh kur sasia totale e parave në dorë që po vijnë në biznesin tuaj gjatë një periudhe të caktuar kohe, është më e madhe se shuma totale e parave në dorë që largohet nga biznesi juaj gjatë po asaj kohe. Kjo është gjëja që dëshironi: një cikël pozitiv të qarkullimit të parave në dorë.

Qarkullimi negativ i parave në dorë ndodh kur sasia totale e parave në dorë që po largohen nga biznesi juaj gjatë një periudhe të caktuar kohe, është më e madhe se shuma e parave në dorë që po vijnë në biznesin tuaj gjatë po asaj kohe. Kjo është një gjendje e rrezikshme, e padëshiruar, të cilën duhet ta shqyrtoni menjëherë me veprime që prodhojnë para në dorë sa më shpejt që është e mundur dhe i ulin kostot.

Le të shqyrtojmë tre shembuj të ndryshëm për të kuptuar vështirësitë e qarkullimit të parave në dorë dhe mënyrën se si një pronar biznesi mund t’i zgjidhë ato. Përfytyroni që një biznes e fillon muajin me 300 dollarë në dorë. Biznesi zakonisht merr pagesa me para në dorë prej 200 dollarësh çdo të hënë dhe 200 dollarë çdo të mërkurë. Ai paguan 300 dollarë me para në dorë çdo të premte. Shembulli A më poshtë tregon ciklin e qarkullimit të parave në dorë për këtë biznes për një periudhë prej tri javësh. Paratë hyjnë në biznes dhe dalin prej biznesit në një model të parashikueshëm.

Shembulli A: Qarkullimi ideal i parave në dorë

Qarkullim ideal i parave në dorë

Për fat të keq, çdo biznes përjeton të papritura dhe probleme. Shembulli B më poshtë tregon se çfarë ndodh kur një biznes nuk është i përgatitur për një qarkullim negativ të parave në dorë. Në këtë rast dy klientë nuk e paguajnë faturën e tyre, duke shkaktuar 400 dollarë të pambledhur nga paratë që priteshin (gjithashtu i quajtur borxh i keq). Pronari i biznesit po mbështetej te këto para për të paguar punonjësit. Biznesit gjithashtu i ndodh një shpenzim urgjent që duhet të paguhet menjëherë.

Shembulli B: Qarkullimi negativ i parave në dorë – i papërgatitur

Qarkullimi negativ i parave në dorë: I papërgatitur

Shembulli C më poshtë tregon të njëjtat të papritura dhe probleme si shembulli B. Por në këtë rast, pronarja e biznesit është e përgatitur. Ajo mbështetet te linja e saj e kredisë për ta mbajtur biznesin e vet në funksionim. Ajo e ripaguan balancën e linjës së saj të kredisë sa më shpejt që mundet.

Shembulli C: Qarkullimi negativ i parave në dorë – i përgatitur

Qarkullimi i Mundshëm Negativ i Parave në Dorë

Diskutoni:

Çfarë ju mësojnë këta shembuj rreth sfidave ose administrimit të qarkullimit të parave në dorë?

Lexoni:

Është e zakonshme që pronarët e bizneseve të kenë sfida të qarkullimit të parave në dorë. Disa nga këto sfida përfshijnë:

• Biznesi është shumë i ri, gjë që e bën të vështirë të marrë ose të paguajë me kredi.

• Mundësitë për rritje, të cilat mund ta pakësojnë sasinë e parave në dorë që i kanë në dispozicion.

• Pasja e inventarit, që kufizon paratë në dorë për përdorim.

• Klientët që paguajnë me kredi, gjë që vonon sasinë e parave në dorë të cilat hyjnë në biznes.

• Shitja bizneseve të tjera që paguajnë me kredi, gjë e cila e vonon sasinë e parave në dorë që hyjnë në biznes.

• Shitje jo të njëtrajtshme për shkak të sezonalitetit ose faktorëve të tjerë, që mund të krijojnë nivele të larta dhe të ulëta në sasinë e parave në dorë që keni.

• Shpenzime të papritura.

• Mospagesa nga klientët (borxh i keq).

Diskutoni:

Çfarë sfidash të mundshme parashikoni në qarkullimin e parave në dorë të biznesit tuaj?

3. Strategjitë për Përmirësimin e Qarkullimit të Parave në Dorë

Lexoni:

Ka shumë gjëra që mund t’i bëni për të krijuar një cikël pozitiv të qarkullimit të parave në dorë për biznesin tuaj dhe për t’u përgatitur për të papriturat dhe problemet e mundshme. Për shembull, ju mund të hulumtoni kushtet e pagesës standarde në sektorin tuaj. Në disa sektorë, shitësit mund të presin deri në 90 ditë ose më gjatë përpara se t’u kërkohet të bëjnë një pagesë. Sektorë të tjerë shpesh kërkojnë pagesë brenda 30 ditësh. Kur i kuptoni kushtet e pagesës standarde për sektorin tuaj, atëherë ju mund të veproni që të zhvilloni bisedime për kushte më të favorshme për vetë biznesin tuaj.

Veprimtari (15 minuta)

Hapi 1: Si grup rishikoni strategjitë vijuese për përmirësimin e qarkullimit të parave në dorë të biznesit tuaj. Ndaloni pas secilës pjesë për të përcaktuar epërsitë dhe mangësitë e këtyre strategjive.

Të Paguheni Shpejt

• Ofrojuni zbritje klientëve që paguajnë herët.

• Merrni parasysh të zbatoni një pagesë shtesë për pagimin me vonesë.

• Ose mos ofroni pagim me kredi, ose përcaktoni kushte të rrepta për pagimin me kredi.

• Pranoni pagesa me karta krediti.

• Lëshojini menjëherë faturat.

• Krijoni një plan për ndjekjen e ecurisë së llogarive arkëtuese (Ll/A).

• Ofrojuni klientëve pagesa automatike të faturave.

Ruajini Paratë në Dorë

• Ndiqni një mundësi biznesi me pak kosto fikse.

• Eliminoni shpenzimet e panevojshme.

• Administroni dhe kontrolloni inventarin.

• Prisni që t’i paguani faturat deri pak ditë përpara afatit.

• Zhvilloni bisedime me furnizuesit për kushtet e pagesave të vonuara nëse është e nevojshme.

Administrojeni Qarkullimin

• Mbani një rezervë parash në dorë.

• Merrni një hua ose një linjë kredie për të zgjidhur periudhat e qarkullimit jo të njëtrajtshëm të parave në dorë.

Hapi 2: Individualisht shkruani përgjigjet për pyetjet vijuese:

Çfarë veprimesh mund të ndërmerrni që ta shpejtoni qarkullimin e parave në dorë që po vijnë në biznesin tuaj?

Çfarë veprimesh mund të ndërmerrni që ta ngadalësoni qarkullimin e parave në dorë që po largohen nga biznesi juaj?

Diskutoni:

Në përgjithësi pronarët e bizneseve dëshirojnë të marrin ose të mbledhin para në dorë sa më shpejt që të jetë e mundur dhe ta vonojnë pagimin e parave në dorë derisa t’u kërkohet ta bëjnë këtë. Në pamje të jashtme, ky parim mund të duket se është në kundërshtim me mësimin e Shpëtimtarit që “gjithçka … që ju dëshironi t’ju bëjnë njerëzit, ua bëni edhe ju atyre” (Mateu 7:12). Si do t’i pajtonit këto parime si pronar biznesi?

Lexoni:

Teksa punoni për të krijuar një cikël pozitiv të qarkullimit të parave në dorë për biznesin tuaj, është e rëndësishme që të veproni me integritet moral. Bëni përpjekjen për t’i kuptuar kushtet e pagesës për sektorin tuaj. Jini të mençur në caktimin e strategjisë suaj të pagimit. Punoni që të krijoni kushte të favorshme pagimi për biznesin tuaj. Pasi ta keni caktuar strategjinë tuaj të pagesës, i komunikoni qartë pritshmëritë tuaja dhe mbajini të gjitha zotimet tuaja.

4. Administrimi në Mënyrë Aktive i Qarkullimit të Parave të Mia në Dorë

Lexoni:

Nuk mjafton që herë pas here ta kontrolloni llogarinë bankare të biznesit tuaj dhe të shpresoni që numrat të përputhen. Ju nevojitet ta administroni në mënyrë aktive qarkullimin e parave në dorë të biznesit tuaj.

Si pronar i suksesshëm biznesi ju duhet ta dini se sa para në dorë ka në dispozicion biznesi juaj në çdo kohë. Mos u mbështetni te deklaratat bankare për të administruar qarkullimin e parave tuaja në dorë. Bilanci i llogarisë suaj shpesh nuk i pasqyron pagesat që janë në proces e sipër, të tilla si pagesat që shkojnë te furnizuesit ose pagesat që vijnë nga klientët.

Ju nevojitet të krijoni dhe vazhdimisht të përditësoni parashikimet tuaja të qarkullimit të parave në dorë. Siç u shpjegua më lart, qarkullimi i parave në dorë është koha dhe sasia e parave në dorë që qarkullon brenda dhe jashtë biznesit tuaj gjatë një periudhe të veçantë kohe. Parashikimi juaj duhet të tregojë qarkullimin tuaj të pritshëm të parave në dorë për disa muaj në vijim. Parashikimi juaj nuk mund të jetë 100 përqind i saktë, por është thelbësor që ju të krijoni vazhdimisht vlerësime të kujdesshme për të ardhurat bruto, shpenzimet e ndryshueshme dhe shpenzimet tuaja fikse mujore.

Qarkullimi pozitiv i parave në dorë nuk ndodh thjesht për një biznes. Ai arrihet me punë të madhe dhe planifikim të kujdesshëm. Nëse e dini gjendjen tuaj të tanishme të parave në dorë dhe parashikimin e qarkullimit të ardhshëm të parave në dorë, ju mund të merrni vendime që do ta ndihmojnë biznesin tuaj të ketë sukses dhe të rritet. Pronarët e suksesshëm të bizneseve mbajnë një rezervë parash në dorë për shpenzime të papritura dhe shpesh bëjnë një listë burimesh kredie bazuar te nevojat e tyre të parashikuara të qarkullimit të parave në dorë.

Veprimtari (15 minuta)

Si grup lexoni me zë të lartë secilën situatë më poshtë. Diskutoni pyetjet për situatën e parë përpara se të lexoni situatën pasuese.

Situata A: Përfytyroni sikur keni filluar një biznes që shet në internet veshje fëmijësh për Hallouin. Në qershor blini 300 veshje nga prodhuesit tuaj. Ju blini masa të ndryshme veshjesh që mendoni se do të shiten më shumë. Kjo blerje i përdor pothuajse të gjitha paratë në dorë të biznesit tuaj. Shitjet tuaja fillojnë ngadalë në korrik dhe gusht, por ato fillojnë të rriten në shtator. Ju vini re se dy veshje shiten menjëherë dhe ju vazhdoni të merrni kërkesa nga klientët për to. Ndërkohë inventari juaj ka shumë veshje të tjera që nuk po shiten dhe aq. Ju doni të blini më shumë prej dy veshjeve më të pëlqyera, por deri në kohën kur të keni grumbulluar mjaft para në dorë sa për të bërë blerjen, e kuptoni se veshjet nuk do të arrijnë në kohën e duhur për t’i shitur përpara Hallouinit.

• Çfarë faktorësh luajtën rol në sfidat tuaja të qarkullimit të parave në dorë në këtë situatë?

• Çfarë mund të bënit ndryshe vitin e ardhshëm për ta përmirësuar qarkullimin tuaj të parave në dorë dhe suksesin në tërësi të biznesit tuaj?

Situata B: Përfytyroni sikur keni një kompani që mirëmban mjediset përreth godinave. Shpesh ju projektoni dhe instaloni sisteme të reja të vaditjes. Kohët e fundit keni marrë në punë dy punonjës të rinj, që do të thotë se tani mund të veproni me dy ekipe instalimi. Qarkullimi juaj i parave në dorë është i paktë, por ndiheni optimist rreth sasisë së punës së re që do të jeni në gjendje ta shtoni këtë sezon me një ekip të dytë.

Pasi i mbaroni disa punë, ju keni klientë të shumtë që nuk ju paguajnë në kohë. Një klient ka hasur probleme financiare dhe po kërkon kohë shtesë që t’ju paguajë. Klienti tjetër është i pakënaqur me sistemin e tij të sapoinstaluar. Ai do që ju të bëni më shumë punë dhe thotë që nuk do t’ju paguajë derisa të jetë tërësisht i kënaqur. Tani ju jeni i shqetësuar për aftësinë tuaj që t’i paguani punonjësit tuaj gjatë disa javëve të ardhshme.

• Çfarë faktorësh luajtën rol në sfidat tuaja të qarkullimit të parave në dorë në këtë situatë?

• Çfarë mund të bëni ndryshe që ta rritni këtë punë ndërkohë që mbani një cikël pozitiv të qarkullimit të parave në dorë?