Taiala Mo Le Faiaoga

O le olaga faaipoipo ma le faaleaiga ua faauuina e le Atua (tagai i le MF&F 49:15). Na ta’ua e le Au Peresitene Sili ma le Korama a Aposetolo e Toasefululua lenei mea e faatatau i le faaipoipoga ma aiga: “Ua i ai i le tane ma le ava se tiute faamaoni ina ia alofa ma fetausiai le tasi i le isi faapea i le la fanau. ‘O fanau o le tofi lea mai le Alii’ (Salamo 127:3).Ua i ai i matua se tiute paia e tausia a latou fanau i le alofa ma le amiotonu, ia tuuina atu i ai mea e manaomia faaletino ma le faaleagaga, ma ia aoao i latou e alolofa ma feauaunaa’i, ia tausia poloaiga a le Atua ma avea ma tagatanuu usiusitai i tulafono i soo se mea latou te nonofo ai. O tane ma ava—tina ma tamā—o le a latou tali atu i le Atua mo le faataunuuina o nei tiute.”¹

O aiga malolosi ma mausali ua taua i nei aso e gata ai ina ia fetaiai ma faaosoosoga ma luitau o loo feagai ma matua ma fanau. I le talanoa ai e uiga i lo tatou vaitaimi, na saunoa mai ai Peresitene Gordon B. Hinckley faapea: “Ua lepetia le aiga i le lalolagi atoa. O fusi tuai na sa fusia faatasi ai le tama ma le tina ma le fanau, ua motusia i soo se mea. … Ua nutimomoia loto; ua fetagisi fanau. Pe le mafai ea ona lelei atu se mea tatou te fai? Ioe, e tatou te mafaia.”²

Ua fatuina lenei kosi e tali atu ai i le manaomia o uiga faamatua e sili atu ona lelei ma ni aiga e sili atu le malolosi. O loo aofia ai aoaoga o le talalelei ma tomai faamatua e fesoasoani ai i tama ma tina ina ia manuia le tausiaina o a latou fanau. Ao aoaoina e matua ma faaaogaina ma le agaga tatalo ia aoaoga o le talalelei ma tomai, i le atinaeina o se faigapaaga ma le Atua i le tausiaina o Ana fanau, o le a Ia faamanuiaina ma fesoasoani i a latou taumafaiga (tagai i le 3 Nifae 18:20–21).

Faaaoga faatasi le tusi taiala lenei a le faiaoga ma le taiala o punaoa mo matua. O loo maua ai ni fesoasoaniga faaopoopo e fesoasoani ai ia te oe i le faatinoina ma le manuia o vasega.

O le tele o manatu i le folasaga lenei o le Tusi Taiala a le Faiaoga ma i le faaopoopoga na suia mai le Principles of Parenting [Mataupu Faavae Faamatua], o se tusi taiala na tusia e H. Wallace Goddard ma sa lolomi ma faasalalauina e le Alabama Cooperative Extension Service.³

Faatautaia o le Kosi

O le kosi e tatau ona aoaoina i vaega taito’a 20 o tagata auai, pe toalaiti ifo foi, e tagata e i ai tomai faapitoa o le ofisa o Tautua a le AAG mo Aiga po o ni volenitia mai uarota ma siteki. O le kosi masani e iva i le sefululua vasega. O vasega e tele lava ina 90 minute le uumi. E aofia i le Faamalosia o le Aiga: Taiala o Punaoa mo Matua ni autu se iva e ono mafai ona faaaoga i ni fonotaga faavaega. A o e filifiliina ni autu e te manatu o le a sili ona taulimaina ai manaoga o tagata o le vaega, o le vasega 1, “Mataupu Faavae Faamatua ma Faatinoga,” e tatau lava ona avea ma lesona muamua e aoaoina i le kosi. O nisi autu atonu e manaomia ai ni vasega se lua pe sili atu foi ina ia talafeagai le taulimaina.

Mafaufau i fautuaga nei mo le faatautaia o le kosi:

Mulimuli i taiala a le ofisa mo le totogiina o pili a vaega, pe afai o loo lagolagoina le kosi e se lala o le Tautua a le AAG mo Aiga. Afai o loo lagolagoina le kosi e se siteki po o uarota, e na o le tau o meaaoga e tatau ona totogi e tagata auai. E tatau ona totogi e sui auai le pili i le faiaoga i le amataga o le kosi ina ia fesoasoani i le faamalosia o le auai.
Faamalosiau atu i ulugalii e auai faatasi i vasega pe a mafai. O mataupu faavae la te aoaoina e sili ona taua pe a malamalama ma faaaogaina faatasi e matua. E mafai ona avea ia mataupu faavae ma mafuaaga o se teteaga ma feteenaiga pe afai e le o aafia pe le lagolagoina e se tasi o i laua. Afai e na o le toatasi le matua e auai, taumafai ia faamautinoa o loo lagolagoina e le matua e le’o auai le aafia ai o lona toalua i le kosi ma e talisapaia ia faamatalaga fou i tulaga faamatua.
Ia tausia se faamaumauga o le aofai o vasega o loo auai tagata taitasi e ala i le faia o se tauvalaauga i taimi taitasi tou te feiloai ai (tagai i le itulau 102 i le faaopoopoga).
Faafesootai le ofisa o le Tautua a le AAG mo Aiga o lata ane pe afai o i ai ni au fesili e uiga i le aoaoina o le kosi. E mafai ona maua ia nofoaga ma numera o telefoni i le www.ldsfamilyservices.org.

Faalauiloaina o le Kosi

Afai e te faasoaina atu faamatalaga e uiga i le kosi, ia faamatala atu faamanuiaga e mafai ona maua e matua e ala i le auai. O se lisi o faamanuiaga o le aoaoina o mataupu faavae ma tomai faamatua—mo se faataitaiga, faateleina le lotogatasi ma faaleleia fesootaiga i le aiga, po o le sili atu ona mafai ona foia feeseeseaiga e aunoa ma le ita—o le a sili atu ai le uunaia o matua e auai nai lo se lisi o autu e talanoaina.

O le a aoaoina matua pe faapefea ona faalogologo atu ia latou fanau i auala e valaaulia ai ia fanau e faasoa mai ni lagona patino. O le a aoaoina i latou i le ala e faasoa lelei mai ai o latou lava lagona, e tusa lava pe latou te le o fiafia ia latou fanau. O le a aoaoina foi matua i le ala latou te aoao atu ai ia latou fanau amio talafeagai, foiaina o feeseeseaiga, ma le faafaileleina o le lototele ma le tuputupu ae manuia. O le a latou aoao i le ala e faamalosia ai ia fuafaatatau o le aoaiga lea o le a fesoasoani ia latou fanau e aoao ia amio talafeagai. O le a sili atu lo latou loto faafetai mo le taua e faavavau o mafutaga faaleaiga ma le uiga o le avea ai ma ni matua faamanuiaina.

O matua e faaaogaina ia mataupu faavae ma tomai e aoaoina i lenei kosi o le a fatuina se siosiomaga sili atu faaleaiga lea e mafai ona afio ai le Agaga o le Alii. O le a latou fiafia i ni mafutaga sili atu ona fiafia ma sili atu ona lotogatasi.

Mafaufau e faaaoga le pepa o faamatalaga o i le itulau 106 i le faaopoopoga e faasoa atu ai se faamatalaga e uiga i le kosi.

O Agavaa e Aoao Atu ai Lenei Kosi

Atonu e mafai ona aoao atu lenei kosi e soo se tagata matua o lē ua atinaeina ni tomai o mafutaga lelei ma sē ua sili lona malamalama e uiga i le tausiga o fanau. O ki i le aoaoina atu faamanuiaina e aofia ai le amanaiaina o lagona o isi ma le talisapaia o le paia o le olaga faaleaiga.

O le agavaa sili ona taua mo le aoaoina o lenei kosi o lau sauniuniga patino lea ina ia maua le taitaiga a le Agaga Paia. Na fetalai mai le Alii, “Ma o le a tuu atu ia te outou le Agaga e ala i le tatalo o le faatuatua; ma afai tou te le maua le Agaga aua tou te aoao atu” (MF&F 42:14). O le toatele o tagata ua latou aoaoina mai mea na tutupu, o le tuuta’ia i le faagasologa o le lesona ona o manatu e foliga mai e le fesootai ma ua le maua ai le savali ona ua le fia faalogo le vasega. Faatusatusa la ituaiga tulaga na ma taimi na auai ai le Agaga, ina ua o’o i le mafaufau faamatalaga ma uunaiga, ina ua solo lelei le tuuina atu o upu ma ua tuuina atu e le Agaga le upu moni i loto ma mafaufau o isi.

Aoao Atu Faamanuiaina

O le a sili ona faamanuiaina oe pe a e sailia musumusuga ma aumai lou lava silafia, manatu, aafiaga, ma ou uiga lelei i le vasega. Faaalu se taimi e te mafaufau ai e uiga i lou olaga, ma mafaufau i le ala e te mafai ona faaaoga ai ou aafiaga i le aoaoina atu ma le faamalosia o mataupu o lenei kosi. Ia tuu atoa lou loto i lau aoaoga, ona e maua lea o le olioli sili i a outou fegalegaleaiga ma tagata o le vasega.

O le oa o mea na tutupu mai soifuaga o sui auai taitasi o se aseta sili lea mo oe a o e aoaoina atu le kosi. Ia mataulia le tiutetauave o matua taitoatasi mo lona aiga, ma ia faasoa atu lou silafia ma tomai e tusa ma le taitaiga a le Agaga. E ao ona e malamalama o lou tiutetauave o le tatalaina lea o le faitotoa mo avanoa fou, ae le o le faalau atu o mea i sui auai o le kosi. O le vasega o se taumafaiga tuu-faatasi, e fefaasoaa’i ai oe ma tagata o le vasega i manatu ma malamalamaaga ma ofoina atu le lagolagosua.

A o e faasoaina atu lou silafia, aafiaga, ma manatu, ia faamalosiau atu i tagata auai o le vasega e manatunatu i mea na tutupu i o latou lava olaga, atoa ai ma malosiaga. Fesoasoani ia i latou ia iloa mataupu faavae, na e mafai ona fesoasoani e siitia ai i latou, ma faamalosiau atu a o latou atiina ae tomai, ina ia faaaoga ai na mataupu faavae. A o e faatinoina na lava tomai, o le a faatupula’ia lou tomai o se faiaoga.

E mafai ona e faatulagaina lau lesona e ala i lou mafaufau i mea o lo o moomia e tagata taitoatasi o le vasega mai le mataupu o le a e aoaoina. Taumafai e fesili ifo ia te oe lava, “O le a se mea e manaomia ona aoaoina e tagata o le vasega i lenei aso?” Atonu o le a e mauaina mai se manatu taua se tasi, pe lua foi. Ona mafaufau lea, po o a ni manatu lagolago o le a fesoasoani i tagata o le vasega e malamalama ai i manatu autu. O le taimi lava e maua ai se manatu autu ma manatu lagolago, ia fuafua loa le auala sili e tuu atu ai. O fautuaga faafaiaoga nei e mafai ona fesoasoani ia te oe a o fuafuaina lau lesona.

Faaaogaina o Tala e Faapupula ai se Mataupu Faavae

Ina ia amataina se vasega, atonu e te manao e tusia le manatu autu, po o le mataupu faavae i luga o se laupapa, ona faamatala lea o se tala e faapupula ai. E aoga tele ia tala, aua e mafai ona latou pa’i atu i loto ma suia olaga; e mafai ona latou faapupula atu mataupu faavae pupuu ma faigofie ona malamalama ai. O le olaga e tumu i tala, ma e faigofie atu i tagata ona manatua tala ma mataupu faavae ia latou te aoao atu.

Na sili ona mamana le aoao atu a le Faaola, e ala i le faaaogaina o tala. Taumafai e faapupuu tala e te faamatalaina, ma ia faafaigofie i le mea e gata ai le mafai. Ia faaeteete ia aua ne’i tele naua tala patino ia te oe e faamatalaina. E ono osofaia ai tulaga patino o lou aiga, pe faatiga ai foi isi.

O le a faigata i tagata o le vasega ona fesootai atu i au tala patino, pe afai ua foliga mai o lou aiga ua atoatoa naua. O le tele o ituaiga tala faapena, atonu e faavaivaia ai tagata o le vasega i a latou lava taumafaiga ina ia suia. Pe a foliga mai ua talafeagai ai, ia faasoa atu ni tala e uiga i luitau na feagai ma oe, ma faafitauli na oulua feagai, faapea foi tala e uiga i mea na faamanuiaina ai oe. Pe a e faasoa atu nei tala, faamatala mea na e aoaoina mai na mea na tutupu. Ia taula’i atu i itu lelei, ma faamatala mea na e faia e faaleleia ai. Afai o au tala o le a aliali atu ai le tele o faafitauli, atonu o le a aveesea ai le moni, ma e ono manatu sui auai, e le aoga ia mataupu faavae o lo o e aoaoina atu.

Faatino i Taga

Pe a mae’a ona e aoaoina tagata o le vasega i se auala e faaaoga ai se mataupu faavae i le faaipoipoga, atonu e te faamautuina le mataupu faavae i le faatinoina i taga. O le faatinoga sili i taga, e masani ona tupu pe a amata i lou faapea atu, “O le a le mea e masani lava ona tupu i tulaga faapea?” Ia tofi se tasi e faatinoina. Ona talanoa lea o tagata o le vasega i mea sese a matua i tulaga faapea. A maea se talanoaga, e mafai ona e fai atu: “Se’i tatou toe faatinoina la le tulaga lea i taga, ae o le taimi lenei, ia faaaoga le mataupu faavae lea na tatou talanoaina. Ona tatou vaavaai lea po o a mea na aoga a o a foi nisi mea e manaomia ona faaleleia.”

O lenei metotia faaleaoaoga e masani o se auala sili ona lelei e fesoasoani ai i matua ia aoao i mataupu faavae ma suia a latou amio.

Aoao atu se mataupu faavae ma le auala e mafai ona faaaoga ai i se tulaga faamatua.
Valaaulia se tasi e faatinoina se amio masani.
Ia talanoaina le faatinoga i taga ma pe mafai faapefea e matua ona faaaoga le mataupu faavae i lenei tulaga ma isi tulaga talitutusa faamatua.
Valaaulia se tasi e faatino i taga le faaaogaina sili atu o le mataupu faavae.
Ia talanoaina le faatinoga i taga ma pe faapefea ona faaleleia le auala faamatua.
Faaauau le faagasologa o faatinoga i taga ma le talanoaga seia masani matua i auala sili ona lelei e faaaoga ai le mataupu faavae.⁴

E le tatau ona faamoemoe atu i sui auai ina ia atoatoa le faatinoga. Atonu o le a latou mauaina, o le a lelei lo latou faatinoina o nisi mea, a o nisi vaega e manaomia ai le faaleleia atili. Atonu o le a latou iloaina foi, e le faapea e tatau lava ona atoatoa i latou i le taimi lava lea; e mafai ona siitia o latou tulaga i le faagasologa o taimi. A o e matauina mea ua lelei ona latou faatinoina, faailoa atu o latou malosiaga. O nisi tagata o le vasega atonu e mananao e faatino i taga le tulaga e tasi a o faagasolo le vasega, pe, atonu foi latou te mananao e filifili se tasi o tulaga mai o latou lava soifuaga. E mafai e sui auai ona faaauau ona faataitaia le faaaogaina o se mataupu faavae, seia latou malamalama i tomai latou te manaomia ona aoaoina.

Afai e foliga mai e le lelei lagona o tagata o le vasega i le faatinoina i taga, faaauai i latou i se talanoaga e uiga i auala e faaaoga ai le mataupu faavae i le tele o tulaga eseese, a le o tulaga faale-tagata lava ia, po o tulaga e aofia ai ulugalii latou te iloa (e aunoa ma le faalauiloaina o nisi o faamatalaga ua mataulia po o le faaaluina o le taimi e faitatala ai).

Valaauliaina ma le Taialaina o Talanoaga Faavaega

O talanoaga faavaega o se meafaigaluega faafaiaoga taua tele. Pe a e valaauliaina talanoaga, ua e faaali atu e te faatauaina tele manatu ma mea na tutupu i isi, ma e te le lagonaina faapea o oe ua iloa tali i faafitauli uma. Ua e faaali atu foi, o luitau e mafai ona foia i ni auala se tele. Faalagolago i le Agaga ina ia fesoasoani ia te oe a o e aoao atu, ma ia e iloa o le Agaga o le a musuia foi isi. Fesili atu i tagata o le vasega mo a latou fautuaga. O le a aoga ia i latou le faalogologo atu i manatu eseese.

O nisi tagata o le vasega o le a vave ona lagonaina le fiafia e auai ai i talanoaga. O isi, e fai si matamumuli ma e le mananao e ofoina mai o latou manatu ma mafaufauga. O le a sili atu ona ‘anoa le vasega mo tagata taitoatasi, pe a maua e i latou se avanoa e auai ai i le faatinoga. O le a aoga foi o latou manatu i isi tagata o le vasega. Ia saunia se siosiomaga saogalemu mo le vasega, e ala i le faaalia o le faaaloalo mo tagata uma o le vasega. Ia faailoa atu e te faatauaina manatu ma mea na tutupu i tagata taitoatasi, ma ia aua ne’i faatagaina se tasi e ula i manatu o isi.

O taiala nei o le a fesoasoani ia te oe e valaaulia ma taialaina le auai faavaega ma o le a fesoasoani e fausia ai se siosiomaga lelei mo tagata o le vasega.

Ia faatutuina tulafono faavae manino e fesoasoani ai i tagata taitoatasi e lagonaina le saogalemu e faasoa mai. Ia aofia ai mea nei:
- Le Faalauaiteleina. O faamatalaga patino ia e fetufaai i le taimi o le vasega, e gata ai lava i le vasega.
- Pupuu. O faamatalaga mai tagata o le vasega e ao ina faapupuu.
- Paleni. E mafai e tagata o le vasega ona talanoa mai i soo se taimi e mananao ai, ae ia mautinoa o loo maua foi e isi tagata o le vasega se avanoa laugatasia e faasoa mai ai.
- Onosai ma Agalelei. O le a manaomia e tagata auai se taimi e aoao ma fefaasoaai ai tomai fou. E ao i matua ona onosai ma agalelei le tasi i le isi, faapea ia i latou lava.
- Faamalosiauga. E ao i tagata o le vasega ona faamalosiau le tasi i le isi, a o latou faaaogaina faamatalaga mai le kosi i le aiga.
- Faamagaloga. E fai e tagata taitasi mea sese, e tusa lava pe ua uma ona aoaoina ni auala fou e faatinoina ai ni mea. E manaomia e sui auai taitoatasi ona malamalama i le taua o lona faamagaloina o ia lava ma isi.*
Ia fai fesili e valaaulia ai manatu, ae le o fesili e na o le tasi le tali sao. Mo se faataitaiga, e mafai ona e fesili atu, “O le a sou manatu, o a nisi o uiga sili ona taua o se tama po o se tina lelei?” nai lo le “O le a le uiga sili ona taua … ?” O le a sili atu ona mananao tagata e faasoa mai o latou manatu pe a latou iloa e te le o saili atu mo na o le tasi le tali.
Faaaloalo i faamatalaga a tagata uma. Mafaufau e tusi faapuupuu se aotelega o tali taitasi i luga o le laupapa, e faailoa atu ai lou amanaia o tali na tuuina mai. Vaai mo avanoa e tuuina atu ai ni faamatalaga faamalosiau anoa e pei o le, “O ni manatu lelei tele ia.” Faafetai atu ia i latou na tuuina mai faamatalaga, e tusa lava pe o i ai se faamatalaga e ono fesiligia le moni.
Ia poto e taulai atu fesili i isi, pe a foliga mai ua fepalepaleai e se toatasi le talanoaga. O lenei toe faatonutonuina e masani lava e le faigofie, aua o nisi sui auai e mananao e talanoa mo se taimi umi e uiga i faafitauli o loo feagai ma i latou. E ui o o latou faamoemoega atonu e foliga mai e lelei, e le tatau ona e faatagaina latou e faaaluina atoa le taimi manaomia mo aoaoga po o le aveesea foi o le avanoa mo isi matua e faasoa mai ai o latou aafiaga. Ia faalogo ma le toto’a, ma aloaia lagona, peitai ia taulai atu i isi tagata o le vaega. E mafai ona e fai atu faapenei: “E foliga mai o lena mea ua avea ma luitau moni lava mo oe. Ou te fia manao lava e iloa pe faapefea ona fesoasoani ia te oe mataupu faavae ma tomai ua e aoaoina i lenei aoga. O ai se isi e i ai sana mataupu po o se luitau e fia faasoa mai?” po o le “Ua e tuuina mai ni fesili faigata atonu o le a sili ona talanoaina i vasega o loo mulimuli mai.”
Atonu o nisi sui auai o le a latou fautuaina mai ni amioga le talafeagai. Nai lo le teenaina o le ala ma faamaasiasia ai, fesoasoani i le tagata e saili ni manatu fou. E mafai foi ona e faapea atu: “E foliga mai o se luitau moni lena. O le a ou faasoa atu ni manatu, i se taimi mulimuli ane, e uiga i lena mataupu atonu o le a e iloa ai e faapitoa lava le aoga. O le a i ai foi ni manatu o le vaega.” Aua ne’i finau ma tagata o le vasega e uiga i le eseesega o auala.
Pe a lagona e sui auai le saogalemu, faatauaina, ma faaaloalogia, o le a mafai ona e fesoasoani ia i latou ina ia sili atu ona malamalama i lagona o a latou fanau. A o faamatala mai o latou aafiaga, ia fai atu fesili e pei o le “Ana faapea o oe o lau tama ua i ai i lena tulaga, faamata o le a sou lagona?” “Faamata o le a se mea atonu na mafaufau i ai lau tama?” po o le “Faamata o le a se tulaga o le a faigata ai lenei mea mo ia?” Ia fai atu nei fesili i se auala e le tuuaia ai. A o faamatala mai e tagata taitoatasi lagona o a latou fanau i o latou lava aafiaga, atonu o le a sili atu ai lo latou malamalama i a latou fanau.
Fai atu fesili e fesoasoani ai ia te oe e iloilo manaoga o tagata auai. Taitai le talanoaga i auala e talafeagai ma o latou manaoga. Fetuunai le polokalama ma gaoioiga e aoao ai e tusa ma o latou malosiaga.
Fesoasoani i matua e saili tulaga lea na latou fai ai ni amioga le talafeagai po o le le faamanuiaina. Tuu atu latou te talanoaina ma tusia se fuafuaga mo se isi auala e tali atu ai i na tulaga.
Ia faaaoga tausuaga talafeagai, ma ia mataalia ma tiotio.
Ia vaevae le taimi o le lesona i ni ituaiga eseese o gaoioiga—valaaulia talanoaga faavaega, faamatala se tala, pe fai se gaoioiga faavaega e ola ai le lesona.
A maea vasega taitasi, ia faafetai atu ia i latou na auai.

Mulimulitaia o se Faatulagaga

O talanoaga e mafai i nisi taimi ona manaia ma malie, ma e ono faigata ai ia te oe ona tata’i le vasega i le isi gaoioiga e sosoo ai. O le taimi lava e malamalama ai tagata o le vasega i se mataupu faavae ma iloa ona faaaoga, o nisi talanoaga faaopoopo atonu o le a maimau ai le taimi e manaomia mo isi gaoioiga. Toe tata’i le talanoaga i se isi mea, po o le aga’i i le isi gaoioiga pe a ua oo i le taimi e fai ai.

O se faagasologa tusitusia i luga o le laupapa, e mafai i nisi taimi ona fesoasoani ia te oe e faatumauina se lesona solo lelei. O le faagasologa e mafai ona auiliili, pe lautele foi e tusa ma lona aoga. Atonu e mafai ona e tusia se faagasologa e pei ona tuuina atu i lalo.

7:00 i le 7:15—Toe faamanatu manatu faavae ma gaoioiga ua tuanai
7:15 i le 7:30—Manaomia o le faafaileleina ma auala e faafailele ai
7:30 i le 7:45—Laasaga e fesoasoani ai i matua e faafailele a latou fanau
7:45 i le 8:30—Faataitaiina o tomai o le faafaileleina⁵

Afai ua e saunia mo le agai atu i le isi mataupu aoaoina, ae o lo o mananao lava le vasega e talanoaina le mataupu ua te’a, atonu e mafai ona e faasino i le faagasologa ma faapea atu: “E manaia tele o outou manatu ma malamalamaaga. Atonu e mafai ona tatou toe talanoaina i se isi taimi o mulimuli mai. Mo le taimi nei, tatou se’e atu i le isi autu.” Peitai, afai e te lagona o le a sili atu ona faamanuiaina ai tagata o le vasega mai le faaauauina o le talanoaga i se autu, e mafai ona e suia le faasologa.

Faaaogaina o Faasalaulauga

Pe a tatau ai, ia filifili ata pupuu mai CD, DVD, po o kaseti vitio, e fesoasoani ia te oe e aoao atu ai manatu faavae ma aumai ai mafaufau o tagata o le vasega. E fautuaina ina ia faaaoga ata ua faatagaina mai e le Ekalesia. O ata pupuu e sili atu nai lo ata uumi e faatumauina ai le fiafia o sui auai. Ia mautinoa e te le solia le tulafono o le kopiina o ata. A i ai ni fesili i le faaaogaga, ia valaau i le Church Intellectual Property Office at 1-801-240-3959.

Faataitaiga o Mea E Te Aoao Atu

O le sini a lenei kosi o le aoaoina atu lea o tomai aoga ma uunaia matua e faaaoga na tomai e fausia ai se siosiomaga mafanafana, ma alofa mo a latou fanau. O le siosiomaga o le vasega o se avanoa lelei lea e faataitai ai, e faapea foi i le aoao atu, o mataupu faavae, uiga, ma tomai o tulaga faamatua lelei. Aoao atu tama ma tina ia agalelei ma agamalu e ala i le faia lelei o i latou. Ia amanaia lagona o isi, agaalofa, ma loto alofa, aemaise pe a manaomia e sui auai le toe faatonutonuina. Faaaoga tomai mo fesootaiga lelei. O nisi tagata e seasea ona fesootai ma se isi tagata o le a faalogo atu ma le toto’a ia i latou. O le auala tou te fesootai ai atonu e taua tele e pei o le faamatalaga e te tuuina atu. O lau faataitaiga lelei e mafai ona fesoasoani ia i latou e suia le auala latou te fesootai ai i tagata o o latou aiga.

O nisi tagata o le vasega atonu, i nisi taimi, e loto vaivai pe feita foi ma saua. O ou uiga faaalia e tali atu ai e mafai ona faia ai se eseesega atoa i le tele o le aoga o le kosi i nei tagata o le vasega. A o e tali atu ma le agalelei, o le a e faailoa atu tomai lelei o le faalogo ma le foiaina o faafitauli. Aua e te faatagaina se tasi o lo o ita e pulea, pe faumālo i fetufaaiga a le vasega.

Amataina ma le Faamae’aina o le Kosi

O fautuaga o loo i lalo, o le a fesoasoani ia te oe e amata ma faauma ai le kosi i se tulaga lelei.

O Le Amataina

Ina ia fesoasoani ia sologa lelei le ulua’i vasega, atonu e te manao e faia mea nei:

Afai e le masani tagata o le vasega i le fale e fai ai le vasega, mafaufau e faatutu ni faailoilo e faailoga ai le auala i le potu aoga ma falelēta’ua.
Aumai ni kopi o le Faamalosia o le Aiga: Taiala o Punaoa mo Matua mo sui auai. E mafai foi ona i ai ni au pepa o igoa ma maka po o peni ina ia mafai ai e tagata o le vasega ona fai ma faaaoga o latou pepa o igoa seia o latou iloa le igoa o le tasi ma le isi.
Afai o le vasega o loo lagolagoina e se lala o le Tautua a le AAG mo Aiga, tuu atu i sui auai le numera o le telefoni a le ofisa, ina ia mafai ona valaau atu i ai pe a i ai ni a latou fesili.

Ia mautinoa ua tuu atu le 15 i le 30 minute i le amataga o vasega taitasi e toe iloilo ai manatu faavae ma gaoioiga na tuuina atu i le vasega ua faatoa maea atu.

Lesona tulitatao ma le Iloiloga

I le vasega faaiu, atonu e te manao e faia mea lenei:

Tufatufa atu kopi o le Pepa o Iloiloga (tagai i le itulau 110 i le faaopoopoga), ma tuu atu i sui auai taitasi e faatumu.
Ia faailoa taumafaiga ma le alualu i luma o sui auai. (Itulau 111 i le faaopopoga o loo i ai se tusi faamaonia atonu e te manao e faaaoga.)