Vasega Valu
Aoao Atu o le Amio Pulea
Faamoemoega o le Vasega
I lenei vasega, fesoasoani i matua:
-
Ia malamalama pe faapefea ona aoao a latou fanau i le amio faatuatuaina.
-
Ia iloa pe faapefea ona tau atu ia latou fanau le mea o loo latou faamoemoe mai ia i latou.
-
Ia malamalama i le mataupu o le aoaoina o fanau i le tasi le laasaga i le taimi.
-
Ia iloa pe faapefea ona tuuina atu filifiliga e fesoasoani ai ia latou fanau e amio pulea.
O Le Taua o le Aoao Atu Faalelei
O loo i matua le tiutetauave paia o le aoaoina o a latou fanau ia usitai i poloaiga a le Atua ma tulafono i le aiga ma le alalafaga.1 Ua faatonu mai e le Alii matua e aoao a latou fanau ia tatalo ma usitai, ia maua le faatuatua ia Keriso, ia salamo i agasala, ia papatiso ma maua le meaalofa o le Agaga Paia, ma ia galulue (tagai i le MF&F 68:25–32). Na ia aoai nisi o taitai muamua o le Ekalesia i le le aoaoina faalelei o a latou fanau (tagai i le MF&F 93:42–44, 47–48). E tatau i matua ona “tausi ae [latou] fanau i le malamalama ma le upu moni” (MF&F 93:40), aua “o le malamalama ma le upumoni e lafoai i le toatasi leaga lena” (MF&F 93:37).
O nisi matua e le aoaoina tatau a latou fanau. E tele lava ina tausia e matua a latou fanau i le auala lava lena na tausia ai i latou. O nisi matua ua tuufau fanau ao isi ua ova le saua. O isi ua tele ina pisi i isi faalavelave ma tuua ai lo latou tiute ma le avanoa e aoao ai a latou fanau. O nisi matua e nenefu manatu i fanau, e vaai ia i latou e lelei lava faalenatura, e aunoa ma le manaomia o le faatonuina ma le aoaia, po o le leaga faalenatura ma e manaomia ai le faasalaina. E i ai nai matua e le aoaoina a latou fanau ona latou te le i mananao i ni fanau i le taimi muamua; o nei fanau e masani ona lamatia i le sauaina i lagona ma le tuulafoaia.
E faamoemoe le Alii i matua ia avea o latou tiute o le aoao atu o se mea taua. Ua folafola mai e le Au Peresitene Sili ma le Korama a le Toasefululua: “O tane ma ava—tina ma tama—o le a latou tali atu i le Atua mo le faataunuuina o nei mea e ao ona [latou] faia.”2
Aoaoina o Fanau
O le taimi e amata ai ona aoao fanau o le taimi ao laiti i latou. E fananau mai fanau faatasi ma se manao faalenatura e aoao. O se sootaga i le va o matua ma le tamaitiiti “e tuputupu ae lemu mai i vaiaso ma masina” pe a mavae le fanau mai o le tamaitiiti ao latou feoeoeai pea lava pea le tasi ma le isi, ao aoao e faamasani i “auala faapitoa a le tasi.”3 O le mafutaga i le va o matua ma fanau e fatuina se avanoa lelei mo le aoaoina. E amata e fanau ona pue auala e fai ai gaoioiga a o latou matua e ala i le tilotilo ma faalogo, e tusa lava pe le i atiina ae le tomai i le tautala. Pe a uma ona aoao e tautala, ona fai lea e fanau fesili ia latou maua ai faamatalaga e uiga i le lalolagi. E mafai e matua ona faaaoga mo lo latou lelei le fia iloa masani lea o fanau, i le tuuina atu lea i upu ma faataitaiga faamatalaga e manaomia e fanau mo le ola manuia.
Atonu o tausaga sili ona taua i le olaga o se tagata e tupu i le taimi atonu ua sili ai ona saoloto ma le popole o ia i le lumanai—tamaitiiti ma le talavou. I nei tausaga o le tuputupu ae, e pue ai e le fanau tulaga faatauaina, uiga, ma amioga na o le a taialaina a latou amio i o latou olaga atoa. E maua e matua le avanoa matagofie e aoao ai ia latou fanau tulaga faatauaina ma le amio pulea i auala e maua ai le galulue faatasi nai lo le feteenai.
O mataupu faavae nei o le a fesoasoani i matua e aoao ai a latou fanau:
Aoao atu i Faataitaiga
O se tasi o luitau ma avanoa maoae e maua e matua o le aoao lea o a latou fanau i se auala faapitoa ia mananao ai fanau e mulimuli i le fautuaga a matua. Na faamatalaina e Peresitene Tavita O. Makei le faataitaiga o se “auala sili ona lelei ma manuia e aoao ai.”4
Na maualuga le viia e Elder Delbert L. Stapley o le Korama a le Toasefululua o le taua o le aoao atu i faataitaiga: “O se tagata poto, ina ua fesiligia e lisi ni vaega taua se tolu e pei o olaga o ni faiaoga maoae o le olaga e avea o se taiala mo faiaoga fou, na fai mai: ‘Muamua, aoao atu i faataitaiga. Lua, aoao atu i faataitaiga. Tolu, aoao atu i faataitaiga.’”5 Na faamalamalama mai e Peresitene Thomas S. Monson o le Au Peresitene Sili o Iesu na “aoao atu le loto faamagalo e ala i le faamagalo atu. Na Ia aoao atu le alofa e ala i le alofa mutimutivale. Na ia aoao atu le tuuina ma le loto atoa e ala i le tuuina atu o Ia lava. Na aoao atu Iesu e ala i faataitaiga.”6
Na folafola mai e Bishop H. David Burton, le Epikopo Pulefaamalumalu o le Ekalesia, e mafai e matua ona taitaia a latou fanau pe a latou tuuina atu se faataitaiga amiotonu: “E tatau ona tatou mautinoa o faatulagaina lelei o tatou olaga. O le faafiaamiotonu i luma o tagata e le aoga, ma e le aoga lava i aso nei. Ua manaomia i tatou e taitai i le amiotonu ma uunaia o tatou aiga e mulimuli i a tatou faataitaiga. Taitai o tatou aiga i afiafi faaleaiga. Taitai o tatou aiga i le suesueina o tusitsusiga paia. Ia tuuina atu faamanuiaga o le perisitua. Taitai o tatou aiga i tatalo faaletagata ma tatalo faaleaiga.”7
“O faataitaiga e manatua pea, ua avea ma taiala i o tatou olaga,” na iloa e Elder Robert D. Hales o le Korama a le Toasefululua.8 O le a sili atu ona manatua e a tatou fanau faataitaiga na e faia mo latou nai lo se isi lava mea na e faia pe fai atu ai.
Tuu atu i Fanau Tiutetauave
E tele matua e soona tuu atu mea ia latou fanau ma puipuia i latou mai tiutetauave na latou o mai ai—aafiaga na fesoasoani ia i latou e avea mani tagata matutua tutoatasi. Pe a tufa atu e matua ni mea ma auauna ia latou fanau ae le manaomia se taui mai, e le maua e a latou fanau le uunaiga ia avea ma tagata tutoatasi ma faatuatuaina. Nai lo o lena, o le a avea i latou ma tagata paie, manatu faapito, ma manao tele ai lava. Na aoao mai Elder Neal A. Maxwell o le Korama a le Toasefululua, “O i latou e soona fai mea moa latou fanau o le a vave ona iloa e leai se mea e mafai ona latou faia ia latou fanau.”9
Na faamalamalama mai e Elder Joe J. Christensen o le Fitugafulu o le soona tuuina atu o mea i fanau e faavaivaia ai i latou ma latou le maua ai lesona taua:
“I o tatou aso, e toatele fanau ua tutupu ae ma ni tulaga faatauaina le mautinoa ona o le soona tuu atu o mea i ai e i tatou o matua. E tusa pe o tatou mautu, pe pei foi o le toatele o i tatou, ua lava ma totoe mea ua tatou maua, ua masani i tatou o matua ona taumafai e tuuina atu soo se mea lava latou te manaomia, ma faapea ona aveesea ai mai ia i latou faamanuiaga o le tulitulimatagau, o le faananau i se mea latou te le o maua. O se tasi o mea sili ona taua e mafai ona tatou aoao ia tatou fanau, o le ola e aunoa ma ni mea. O le faamalieina vave e faia mo tagata vaivai. E toafia ni tagata maoae moni taitoatasi tou te silafia e le tauivi lava? …
“… O se vaega lava o ia faaupuga e taua tele i le atinaeina o uiga o a tatou fanau ina ia aoao ‘o loo taamilomilo pea le lalolagi i tafatafa o le la’ ae le o tafatafa o i latou. Nai lo lena, e tatau ona tatou aoaoina a tatou fanau ina ia fai ifo ia i latou lava le fesili lea, E faapefea ona avea le lalolagi ma se nofoaga lelei ona o loo latou ola ai?”10
Na lapatai mai Elder Christensen e tatau i fanau ona aoao e galulue nei latou tuua le aiga e le o saunia mo le lalolagi i fafo. Na ia taua: “E oo lava i gaoioiga a aiga, e manaomia ona tatou ausia se paleni i le va o le galue ma le taalo. O nisi o mea e sili ona faagalogata ia te au ao ou tuputupu ae, e faaautu lea i gaoioiga faaleaiga: e aoaoina ai pe faapefea ona atoina se taualuga, fausia se pa, po o le galue i le togalaau. Nai lo le na o le galue lava e aunoa ma se taalo, o le toatele o a tatou fanau e toetoe lava o le taalo lava ae tau leai se galue.”11
E tatau i matua ona aoao fanau e galulue faatasi ma i latou, e amata ao laiti a latou fanau ma o loo i ai se manaoga faanatura e fesoasoani atu. E tatau i matua ona tuuina atu i fanau ni tiute masani e tusa ai ma o latou malosi.
Na fautua mai Kathleen Slaugh Bahr o le Iunivesite o Polika Iaga ma ana paaga o le galulue faatasi e faamalosia ai tagata o le aiga, i le soofaatasia lea o i latou i ni mafutaga tumau:
“Pe a galulue faatasi tagata o le aiga i le agaga sao, o le a tupu se faavae o le manatu alofa ma le tuuto mai la latou aafiaga tuufaatasi i aso uma. O galuega e sili ona masani ai, e pei o le faia o meaai po o le tagamea, e faatumauina ai se malosiaga maoae mo le soofaatasia o i tatou i e tatou te auauna i ai ma i latou ua tatou auauna faatasi. …
“… O le tuuina atu o se galuega o se valaaulia fou mo tagata uma e ulufale mai i le lio o le aiga. O tiute sili ona masani ai e mafai ona avea ma se tu masani o le alofa ma le avea ma se tasi o le aiga.”12
E tatau foi ona aoao e matua a latou fanau e auauna i isi. Na aoao mai Elder Derek A. Cuthbert o le Fitugafulu, “O matua atamamai e saunia avanoa auauna atu i le aiga mo latou fanau mai lava ao laiti.”13 Pe afai e mafai, e tatau i matua ona galulue faatasi ma a latou fanau, ma taumafai e avea gaoioiga o se mea fiafia.
Ao faia e fanau tiutetauave, e manaomia matua e faamafanafana i latou pe afai ua le lelei, ma i na tulaga e tatau i matua ona faaauau le faamalosiauina o i latou e toe taumafai. Na aoao mai Peresitene Thomas S. Monson: “O lo tatou tiutetauave o le siitia lea mai le vaivai i le manuia, mai le le faamanuiaina i le faaeaina. O la tatou galuega o le avea ma o tatou tagata sili. O se tasi o meaalofa sili a le Atua mo i tatou o le olioli lea i le toe taumafai, aua e le manaomia le avea o le le faamanuiaina ma laasaga mulimuli.”14
Faamanino Faamoemoega
O nisi taimi e faapea matua ua iloa lelei lava e a latou fanau le mea ua faamoemoeina mai ia i latou. E faanoanoa matua pe afai ua le faataunuuina nei faamoemoega e lei faaleoina.
O nisi matua e fefefe e fai atu ia latou fanau e fai galuega pe sui amio, e fefefe i fai mai le tamaitiiti e leai pe inoino pe teena i latou i le fesili atu. Pe afai e le faamalamalamaina e matua faamoemoega, atonu o le a faatupuina se pa o le le mautonu ma le inoino, ona fausia ai lea o se va faalelagona o matua ma le tamaitiiti. O faamoemoega e manino ona faaleoina e aveesea ai le le mautonu ma le faanoanoa, ona faamalosia lea o le mafutaga matua-tamaitiiti.
Talanoaina ma matua nei mataupu faavae mo le faailoaina o a latou faamoemoega:
-
Faamanino i lou mafaufau le mea e te manao ai. Ia mautinoa e talafeagai au faamoemoega. Ia talanoaina ma lou toalua na o oulua ma malilie muamua i faamoemoega, o auala e fesili atu ai, ma taunuuga o le a oo mai pe afai e le taliaina e le tamaitiiti. Afai e le fia faalogo pe le fiafia le tamaitiiti, e tatau ona i ai uma oulua pe a tuuina atu manaoga, pe a mafai.
-
Filifili se taimi lelei e tuu atu ai lua manaoga. Talanoaina lua manaoga pe afai ua saunia le tamaitiiti faalelagona ma faaletino, ae le o le taimi o loo popole, ita, po o le pisi i se isi mea. O fonotaga faaleaiga po o afiafi faaleaiga e masani ona talafeagai.
-
Ia vaai i le itu lelei ma ia faamaoti. Nai lo le tautala atu i itu le lelei po o le faalauaitele (“Matua gasu lenei potu. Faamolemole faamama!”), vaai i le itu lelei ma faamaoti: “Kerisa, a e faamamaina ipu, ou te manao ia oe e faamama ipu taitasi ao le i tuuina i totonu o le masini fuluipu aua o le a mama lelei ipu ma o le a umi na aoga le masini fuluipu.”
-
Faaali atu le uiga o lau tala. E aunoa ma lou faia o le galuega mo le tamaitiiti, faataitai atu le mea o loo e faamoemoeina. Mo se faataitaiga, e mafai ona e fesoasoani i le tamaitiiti e faamama faalelei ipu, tuu i totonu o le masini fuluipu, ma solo le fata.
-
Faatele ni tala lelei e fai atu. Pe a uma le galuega, e mafai ona e fai atu: “Lelei tele. O le faiga sao lava lena.” Tau atu i le tamaitiiti le auala e faamanuiaina ai oe ma isi i le amio lea: “Ou te fiafia pe a vaai ua lelei ona faamamaina ipu. E avea lo tatou aiga ma se nofoaga filemu pe a manaia ma mama.”
Aoao Amio Pulea e Tasi le Laasaga i le Taimi
I le faatonutonuina o le tuputupu ae faaleagaga o Lana fanau, na tuuina mai e le Alii le aoaoina o aoaoga faavae autu—lesusu—e saunia ai i latou mo le malamalama ma le poto sili atu—le aano (tagai i le MF&F 19:22). I se auala faapena, e tatau ona aoaoina fanau e fai galulega faigofie o ni laa laiti e agai atu ai i le amio e faamoemoeina mai ia i latou pe a matutua. Atonu e manaomia e fanau laa agai i luma e aoao ai isi mea e pei o le faaaloalo i isi, faaaogaina o amio lelei, faamamaina o se potu, po o le faia o galuega i fafo.
O le amio e mafai ona vaevaeina i galuega faigofie, mafai ona fai, e tusa ai ma le matua ma le malosi o le tamaitiiti. Mo se faataitaiga, e mafai e se tamaitiiti ona fesoasoani e teu meataalo ao le’i aoao e faamama se potu atoa. Faatasi ai ma le onosai ma le atamai, e mafai e matua ona fesoasoani ia latou fanau ia galulue faatasi, fesoasoani, ma faatuatuaina, e puipuia ai le tele o faafitauli ao matutua ae fanau.
Kamile
O Kamile, o se tamaitai ulavale e fa tausaga, e fiafia e fai faatau ma lona tina. O taimi uma lava, e toso mai e ia mea mai fata, manao e tago atu ma ave ni mea, ma faalii pe a faasa e Tina. O Tina, e manao ia Kamile ia amio talafeagai, sa ote ma faafefe o ia ae na le faamanuiaina i le suia o le amio.
Ina ua maea ona talanoa ma se uo e sili atu le tomai, na faataitai loa e Tina se auala e aafia ai ni laasaga o le aoao atu. O le laasaga muamua o le faasoa atu o le faafitauli i se auala agalelei ma alofa: “Kamile, ou te manao ta te o e faatau, ae peitai ou te le fiafia pe a e aveese mea mai le fata. Ona e ee lea pe a ou toe tuuina i le fata.” Ona sosoo ai lea, na ia faamanino atu ona faamoemoega: “E mafai ona e sau ta te faatau pe afai e te fesoasoani mai. Afai e te avea ni mea ma le usitai, o le a ou aveina oe i le fale, ma o le a e le toe sau faatasi ma au i se isi taimi. E le tatau ona e avea se mea vagana ua ou fai atu e te aumaia lena mea mo au. Ou te fia mautinoa ua e malamalama, ia tau mai ia te au le mea na e faalogo o ou fai atu ai.” Ina ua toe faamatala sao mai e Kamile faamoemoega, na fai atu loa Tina: “Tau mai le mea o le a tupu pe a e avea ni mea pe le usitai.” Ina ua malamalama le tamaitiiti i faamoemoega ma taunuuga mo le le usitai ma malie i ai, na faatagaina o ia e toe alu i le faatauga.
I le isi vaega o le aoao atu, na ave e Tina Kamile mo ni asiasiga pupuu i le faleoloa. Na faagata i le tasi po o le lua mea e faatau. I le iloaina o le manao o Kamile e fesoasoani ma i lona manao e faatonutonu lena manao i se auala lelei, na faataga ai e Tina Kamile e fesoasoani e filifili se oloa ma taofi. Na faafetaia amio talafeagai i upu faaviivii. Ina ua aoao Kamile i amio talafegai mai asiasiga pupuu, na valaaulia loa o ia i asiasiga uumi atu. Na maua e Tina ni tiute aoga mo ia, e pei o le filifiliga i le va o ituaiga sirio[cereal] e lua e taliaina, filifilia o le apu e sili ona manaia, po o le taofia o le ato tupe a Tina ao ia tuuina se mea i le taavale fai faatau. Na tuuina atu e Tina le tele o upu faaviivii pe a fesoasoani o ia.
I se tasi taimi, na faalii ai Kamile. Na vave ave o ia e Tina i le fale. E aunoa ma le ita po o le saua, na ia fai atu: “Ua ou faanoanoa ua e filifili e le usitai i le faleoloa ananei. O le isi taimi ou te alu ai e faatau, o le a e nofo i le fale ma se tausi tama. Afai e te filifili e mafai ona e mulimuli i tulafono pe a ta o e faatau, o le a ta toe faataitaia, a ea?” I ni nai vaiaso, na faatumauina le amio talafeagai a Kamile i nofoaga faitele.
Tuu atu Filifiliga
O fanau, pei lava o tagata matutua, e le mananao e faatonutonu i taimi uma. O le faatonuina o se tamaitiiti e “faamama nei loa le potu” e masani ona faaosoina le tetee, e pei o le “O le a ou faia mulimuli.” E vave ona lagolago mai fanau pe a latou filifili i ni mea se lua e taliaina: “Ou te manao e teu ou lavalava ae e te le’i alu e taalo i lenei aoauli. E te manao e teu nei ao le’i sau le pasi, pe sei fai i le taimi lava e te sau ai mai le aoga?” O loo faaitiitia le filifiliga, ae e mafai e fanau ona fai se filifiliga, e fesoasoani ia i latou e tali atu i le tiutetauave.
Pe a faatagaina e matua fanau e filifili, e tatau i matua ona mautinoa o filifiliga latou te tuuina atu e taliaina e i latou o matua. Mo se faataitaiga, pe a fai atu se matua i se talavou, “e mafai ona e moaina le vao nei, po o lou le faaaogaina o le taavale i le po taeao,” atonu e filifili le tamaitiiti e tuu le taavale ae o ma ana uo. E maua e le tamaitiiti le mea e manao ai, ae tumau le le moaina o le vao—o se taunuuga e le taliaina e matua. E sili ai le fai atu, “E mafai ona e moaina le vao nei, po o lou faamamaina o le faletaavale mo au ina ia lava lou taimi e moa ai le vao.” I lenei tulaga, e talafeagai avanoa uma i le matua, ma o loo i ai le filifiliga a le tamaitiiti.
O filifiliga e le tatau ona aofia ai faasalaga: “E mafai ona e moaina le vao nei, po o le faasalaina o oe mo se masina.” O lenei faamatalaga ua ofoina atu ai le leai o se filifiliga (“E tatau ona e fai le mea ua ou fai atu ai, po o lo’u faasalaina o oe”) ma o le a faaosoina lagona o le inoino.
Ua lisiina i lalo nisi o filifiliga e ono tulai mai mo tulaga feteenai.
-
Ua amata ona ala umi i po le 11-tausaga, ua faigata ona ala i le taeao, ma e manao e momoli ia e lona tina i le aoga. E mafai e le matua ona fai atu, “E mafai ona e vave ala i luga e alu i le pasi, po o lou savali i le aoga.” (O lenei filifiliga e faatoa mafai ona tuuina atu pe afai e mafai ona savali i le aoga ma e saogalemu.)
-
Ua faatuai ona fufulu ipu a le valu-tausaga. E mafai ona fai atu le matua, “E mafai ona e fufuluina ipu nei, po o lou faia nanei ao matamata le aiga i le TV.”
-
Ua leotele naua le musika a se talavou. E mafai ona fai atu le matua, “E mafai ona e faalogologo i lau laau faalogologo i lou potu ao tapuni le faitotoa, po o lou faaaogaina o mea faalogo. E le mafai ona faaauau se talanoaga ona ua leotele naua lau musika.”
E le fiafia i taimi uma fanau e talia ni suiga fou e manaomia ai i latou e amio talafeagai. Ia saunia e faalogo i faamatalaga e pei o le “E le fetaui.” “Aisea e tatau ai ona ou faia lenei mea?” “O isi matua e le tuu atu ia latou fanau e fai na mea,” po o le “E te le manatu i o’u lagona po ua e le fai mai e fai lenei mea.” E le tatau ona uuania matua e na ituaiga faamatalaga. E tatau ona latou lotomau i mataupu tau filifiliga. Mafaufau i le faataitaiga lenei.
Mati
Na nofo ae i lalo Mati i luma o le komepiuta, o se masani i po faatoa amata talu ai nei e fai muamua nai lo ana tiute faatonuina. I se fonotaga a le aiga i ni masina talu ai, na malilie ai tagata o le aiga o tiute e tatau ona faamuamua, ae ua ia toe le amanaiaina foi le tulafono. Na tuu atu e lona tama ia te ia se filifiliga:
|
Tama: |
Mati, e tuuina atu ia oe lau faatagaga e faaaoga le komepiuta nei pe a uma na fai ou tiute, ae afai e te manao e fai ou tiute taeao, e mafai ona e faaaogaina le komepiuta i le po taeao pe a uma le galuega. |
|
Mati: |
O le a ou faia tiute pe a uma ona ou faaaogaina le komepiuta. E le lava sou taimi nei. |
|
Tama: |
Atonu o le mea lena, atalii. Ae e mafai ona e faaaogaina le komepiuta pe a uma ona fai tiute. |
|
Mati: |
E tatau ona ou alu nei i le initoneti. O se tasi o au uo o loo faatali mai ia te au. |
|
Tama: |
Ou te mautinoa e sao lena. O le mafuaaga sili lena ia manatua ai e fai ou tiute i le taimi e te sau ai i le fale mai le aoga. Ou te le fiafia e vaai ia te oe ua loto vaivai pe le fiafia. Ae e manaomia le galuega ia faia. O le a e manatuaina na tatou talanoaina lenei tulafono i le fono faaleaiga, ma na e malie e usitai i ai. E faatagaina oe e faaaoga le komepiuta i le taimi lava e uma ai le galuega. |
|
Mati: |
E le fetaui lena mea. Na ou fai atu o le a ou faia tiute mulimuli. E i ai isi mea e manaomia lou faia nei lava. |
|
Tama: |
Atonu e sao lena, ae e mafai ona e faaaogaina le komepiuta pe a uma ona fai galuega. |
Atonu e manaomia e le matua ona toe tau atu soo filifiliga ma e tatau ona faia o lea e aunoa ma le ita. Atonu o le a vave ona lelava le tamaitiiti e faalogo i le savali ma usitai loa i le manao pe afai ua ia iloa e moni le manao a lona matua.
Pe a tuuina atu filifiliga, e le tatau i matua ona masalosalo pe finau. Afai e manao le tamaitiiti e finauina le mataupu, e mafai e matua ona faailoa ana faamatalaga i se tala puupuu e pei o le “Atonu e sao lena” ona toe tau atu lea o filifiliga. E sologa lelei le faagasologa atoa pe afai na malilie muamua i tulafono.
Pe afai e musu le tamaitiiti e usitai pe a tuuina atu filifiliga, e tatau i le matua ona faamamafa atu se taunuuga (e pei ona faamatalaina i le vasega 9) e fetaui lelei ma le amio le tatau. O taunuuga e sao ona faaaoga, ma fetaui lelei e fesoasoani i fanau e aoao ai amio talafeagai. Afai e le paleni pe leai se faia a le taunuuga ma le mea sese, o le a foliga mai e leai se uiga, faafuasei, ma mamafa tele, e faaosoina ai le tamaitiiti e lagona le ita, inoino, ma tetee.
Auai i Gaoioiga Faaleaiga
O taumafaiga a matua e aoao atu o le a faaleleia ao latou auai i gaoioiga ma a latou fanau. O fanau e galulue ma taaalo faatasi ma o latou matua e sili atu ona aoga i ai aoaoga ma faataitaiga a matua i o latou olaga. E tatau ona fuafua e matua gaoioiga e taua ma fiafia i ai tagata uma. O le galue ma le taalo e mafai ona faafiafiaina pe a faafaileleina e matua le mafutaga lelei ma a latou fanau.
O le Tulaga Faatauaina o le Aoao Atu o le Amio Pulea
Na faamamafaina mai e Peresitene James E. Faust o le Au Peresitene Sili le taua o le aoaoina o fanau i amio talafeagai: “Afai e le aoaia e matua a latou fanau ma ua le aoaoina i latou ina ia usiusitai, e mafai e le lautele ona aoaia i latou i ni auala e le mananao ai matua po o fanau foi. … A aunoa ma le aoaia ma le usiusitai i totonu o le aiga, o le a faapea ona solofa i lalo le lotogatasi i totonu o se aiga.”15 O le a tele atu le filemu ma le fiafia e oo mai i aiga ao aoaoina e matua fanau ma le alofa e tausi poloaiga a le Atua ma tulafono a le aiga ma le alalafaga .
“O i latou e soona fai mea mo a latou fanau o le a vave ona iloa e leai se mea e mafai ona latou faia ia latou fanau.”
Elder Neal A. Maxwell