Vasega Muamua

Mataupu Faavae Faamatua ma Faatinoga

Faamoemoega o le Vasega

I lenei vasega, fesoasoani i matua:

Ia malamalama i lo latou matafaioi paia o le tausiaina o a latou fanau.
Ia malamalama i mataupu faavae o le talalelei lea e fausia ai le faavae mo le faatinoina o tiute faamatua.
Ia matau manatu o fanau e uiga i le lalolagi ua faaseseina ai matua ma faaleagaina ai fanau.
Ia malamalama pe faapefea ona fesoasoani ia feagaiga i matua e laveai a latou fanau.
Ia nofouta i aoaoga faavae i le fuaina o le manuia i tiute faamatua.

Puipuiga Faasaga i Aiga ua Malepelepe

E leai se isi taimi na sili ai ona manaomia ni matua alolofa, ma mataalia. I le 1997, na faailoaina mai ai e Peresitene Gordon B. Hinckley ua “malepelepe aiga i le lalolagi atoa. O fusi tuai na sa fusia faatasi ai le tama ma le tina ma le fanau, ua motusia i soo se mea. … Ua nutimomoia loto; ua aue fanau.”¹

Ua osofaia e Satani le aiga aua e taua tele i le fuafuaga a le Foafoa mo le fiafia ma le faaolataga o Lana fanau. Ua tusia e le Alii Lana vaifofo mo osofaiga a Satani: “Ua ou poloaina outou ia tausi ae a outou fanau i le malamalama ma le upumoni” (MF&F 93:40), aua “o le malamalama ma le upu moni e lafoai i le toatasi leaga lena” (MF&F 93:37).

Na faamamafaina mai e Peresitene Hinckley ua manaomia vave ina ia faamalosia, alofa, ma puipui fanau: “O lau aioiga—ma ou te moomoo maimau pe ana i ai nisi upu lelei sili atu ou te faaupu atu ai—o le aioiga ia laveai fanau. Ua toatele naua i latou ua ola i le tiga ma le matau, i le faaesea ma le faanoanoa. E manaomia e fanau le susulu o le la. Latou te manaomia le fiafia. Latou te manaomia le alofa ma le tausiga lelei. Latou te manaomia le agalelei ma le faafouga o lagona ma aafiaga. E mafai e aiga uma, e tusa po o le a le tau o le fale, ona maua se siosiomaga o le alofa lea e avea ma se siosiomaga o le faaolataga.”²

O aiga fiafia, ma lotogatasi o se faamanuiaga i matua ma fanau; o na ituaiga aiga ua saunia foi mo le ola faavavau. E moni, “o le ola favavau o se olaga faaleaiga e faatasi ai ma se Tama alofa i le Lagi ma faatasi ai ma o tatou tuaa ma a tatou fanau.”³

O Uiga Faalauaitele i Tiute Faamatua

O le tele o amioga faamatua e tosina mai manatu faalauaitele faapea, o fanau e (1) fanau mai e leaga; (2) fanau mai e lelei; (3) e pei o se maatusi avanoa ; (4) e fausia mai amio a matua; po o le (5) mafai ona faauigaina lo latou siosiomaga, faatulaga a latou lava amio, ma suia po o le lafoaia foi o tulaga faatauaina faamatua.

Fanau mai e Leaga. O nisi tagata e manatu faapea o fanau e fananau mai e leaga ona o le pau o Atamu ma Eva. O le mea lea, e talitonu ai i latou, e manaomia e fanau se faasalaga mamafa e “aveese ai le tiapolo” mai ia i latou. O matua e talitonu faapea e seasea lava faaalia le alofa ia latou fanau ma e oo lava ina talitonu o le agalelei e matautia. Atonu o uiga eseese o lenei manatu o loo i ai i mafaufau o matua na e sauaina a latou fanau.⁴
Fanau mai e Lelei. O le isi manatu e faapea o fanau e fananau mai e lelei ma amio lelei, “faatoa faaleaga lava ese lalolagi o tagata matutua leaga.” Na fautua mai le tagata Farani faapitoa i le mafaufau o Jean-Jacques Rousseau faapea afai e “tuu fanau latou te filifili mo i latou lava, o le a latou ausia lo latou malosiaga sili.” O lea la, ua taumafai ai matua e tuu atu i latou e aoao mai mea e tutupu ma mulimuli i o latou lava manao. O tagata popoto faapitoa i mafaufau o tagata, e pei o Carl Rogers ma Abraham Maslow, e tutusa o latou manatu.⁵
Maatusi Avanoa. Na faalauiloa mai e John Locke le manatu faapea o fanau e pei lava o se maatusi avanoa, e le leaga pe lelei. Na ia manatu, o fanau, na tele lava ina fofoa mai i o latou aafiaga. O tagata faapitoa o amio, e pei o John B. Watson ma B. F. Skinner, ua ioeina, i le faamaninoina mai o matua e mafai ona fausia pe mamanuina se tamaitiiti i soo se ituaiga tagata lava latou te mananao ai e ala i le puleaina ma le suia o le siosiomaga.⁶
Mai Matua. O lenei manatu, na lauiloa mai le senituri e 20, e aofia ai le tupuga mai manu, natura, ma talitonuga e mai matua. O nei talitonuga ua faapea mai o fanau e pei lava o se maatusi avanoa i le fanau mai ma o eseesega ao latiti e mafai lava ona faamalamalamaina mai le natura o matua. O le tele lava o vaega o lenei manatu e faapea o amio e maua mai le natura ma faaitiitia ai le matafaioi o le saolotoga o le tagata.
Fausia e le tamaitiiti lava ia. O lenei manatu, na lagolagoina e se tagata tomai faapitoa o le mafaufau mai Suitiselani o Jean Piaget ma isi, na taulai atu i le gafatia o le tagata ona faauigaina —po o le fausiaina foi—o lona siosiomaga. E sili atu ona ia amanaia le saolotoga nai lo isi manatu ma fautuaga faapea e mafai e tagata ona fetuunai le aoga o faatosinaga mai matua ma le siosiomaga. Ae e le mafai ona faamatalaina ai le mea e maua mai ai lenei malosiaga, pe mafai foi ona fesoasoani i se matua po o se tamaitiiti ia iloa po o fea le mea sao po o le sese. O i latou e talitonu i lenei manatu e talitonu e faaaoga e fanau a latou lava faauigaga i mea o loo aoaoina ai. O le mea lea, e masani ona latou fautua mai faapea e ono masani lava ma e le maalofia le tuua po o le suia o tulaga faatauaina na aoaoina mai e matua ma isi.

O loo aofia ai i le tele po o nei manatu uma lava ia ni elemene o le upu moni. Mo se faataitaiga, e ui lava ina mama ma le agasala fanau, o loo i ai i tagata le tulaga pau, ma le siosiomaga, natura, ma le saolotoga patino e faatosina uma lava i o tatou olaga i le lalolagi. Ae ui i lea, a aunoa ma le poto mai le Atua, o nei manatu taitasi—po o se tuufaatasiga uma—e leai se atoatoaga o le mea moni.

O le mea sili ona taua, e le o ofoina mai e nei manatu ni taiala mautu mo le amio pulea. O matua e faapea o a latou fanau e fananau mai e leaga o le a saili ma vaavaai mo o latou leaga, e oo lava i le faamasino-seseina ma le tauleagaina o gaoioiga mama. O nei matua e faapea ua i ai ia i latou le aia tatau e fai ai soo se ituaiga o amioga faamatua, po o le a lava le matautia, ona o lo latou lagona o le pule tatau. O le manatu o le maatusi avanoa e le gata ina aveesea le saolotoga o le tamaitiiti i le faapea mai o ia e mautinoa lava o se fua o le siosiomaga, ua ia faaleaogaina le ofoina atu o le taitaiga tatau ai. O matua e vaai o a latou fanau e fananau mai e lelei atonu e lagona e itiiti se tulaga manaomia e taitai ma aoai ai i latou, i le taliaina o soo se amio e tulai mai le natura o le tamaitiiti. O le i ai o lenei manatu, atonu o le a le amanaiaina ma opogi ai e matua amioga sa masani ona faapea e leaga ma le talafeagai.

O matua e talitonu o le natura e pulea amio atonu latou te saunia se siosiomaga e lagona ai e fanau e le pau ia i latou a latou lava gaoioiga. O matua e manatu e mai le tagata lava ia lana amio latou te iloa le malosiaga o a latou fanau e fai filifiliga ma le iloa, ae latou te le tuuina atu se fua faatatau mo le sao ma le sese nai lo le mea e taliaina e tagata. Ma le isi foi, pe a tuua e fanau tulaga faatauaina a matua ona o tulaga faatauaina a tupulaga, e masani ona vaaia i latou ua maualuga mafaufauga. Faatasi ai ma lenei vaaiga, e ono faaigoaina e soo se vaega o tupulaga a latou lava tulaga faatonuina o le sao ma le sese.

O Le Malamalama o le Upu Moni o le Talalelei

E ala mai faaaliga, ua iloa e le Au Paia o Aso e Gata Ai le natura paia o le tagata ma le auala e tausi ai e matua a latou fanau. I le folafolaga i le lalolagi, na faailoa mai e le Au Peresitene Sili ma le Korama a le Toasefululua:

“O tagata soifua uma—tane ma le fafine—ua foafoaina i le faatusa o le Atua. O i latou taitoatasi o se atalii po o se afafine agaga faapelepele a ni matua faalelagi, ma, o lea ua tofu ai i latou taitoatasi ma se natura ma se taunuuga paia. …

“… ‘O fanau o le tofi lea mai le Alii’ (Salamo 127:3). Ua i ai i matua se tiute paia e tausia a latou fanau i le alofa ma le amiotonu, ia tuuina atu i ai mea e manaomia faaletino ma le faaleagaga, ia aoao i latou e alolofa ma feauaunaa’i, ia tausia poloaiga a le Atua ma avea ma tagatanuu usiusitai i tulafono. … O tane ma ava—tina ma tamā—o le a latou tali atu i le Atua mo le faataunuuina o nei mea e ao ona faia.”⁷

Ua faailoa mai e tusitusiga paia o fanau e mama ma e le agasala ona o le Togiola a Iesu Keriso. Na aoao mai le perofeta o Mamona “ua maloloina tamaiti laiti, ona ua le mafai ona latou faia se agasala; o le mea lea ua aveese mai ia te i latou le fetuu o Atamu” (Moronae 8:8). Ae ui i lea, “pe a amata ona latou tutupu ae, ona tuputupu o le agasala i o latou loto” (Mose 6:55). Na matauina e Peresitene Tavita O. Makei: “O le tagata e itulua faalenatura—tasi, e fesootai ma le tulaga faalelalolagi po o le olaga o manu; o le isi, o le olaga faaleagaga, e pei o le faalelagi. O le tino o le tagata ua na o se fale e nofo ai lona agaga.”⁸ Ua i ai i matua le tiutetauave o le talisapaia o le tulaga matagofie ia latou fanau ma aoaoina i latou ia ola amiotonu ma filifili le lelei (tagai i leMF&F 68:25).

O fanau faaleagaga taitasi a le Atua e tulagaese. O agaga taitasi e ulu atu i le tino faaletino, e tulagaese foi i lona tulaga tuufaasolo mai matua. O le mea lea, e faaalia ai e tamaiti taitasi mea e fiafia i ai le tagata lava ia, taleni, uiga patino, manaoga, ma malosiaga. E uunaia foi e matua, uso ma tuafafine, faapea ma isi ia tamaiti taitoatasi o loo tuputupu ae.

Ua maua mai suesuega faasaienitisi faapea o uiga mai tuaa e aafia ai “uiga ma amioga a fanau,” e aofia ai “le faananau atu i le … matamuli, vafealoai, ulavale … , tulaga o gaoioiga … , [ma] faalelagona.” Ma le isi foi, e mafai e fanau i se isi tulaga ona “filifili, suia, ma iu lava ina fausia o latou lava siosiomaga e tusa ai ma o latou faananauga faaleolaga.”⁹ Mo se faataitaiga, o se tamaitiiti e fiafia i tagata o le a saili avanoa e fegalegaleai ai ma ana tupulaga, i le isi itu o se tamaitiiti matamuli e ono aloese mai mafutaga faamasani; o tamaiti uma nei e faamalosia ni mamanu o amioga e ono oo atu ai lava i le tulaga faatagata matua.

A o mafai ona uunaia e mea o le siosiomaga ma uiga tuufaasolo le tuputupu ae o le tamaitiiti, o fanau taitasi a le Atua e i ai lona saolotoga. Na matauina e Elder Neal A. Maxwell o le Korama a Aposetolo e Toasefululua: “E moni e taua tele o tatou kene [tuufaasolo], tulaga, ma siosiomaga i le faatinoina o o tatou ituaiga o tagata. Peitai ua i totonu o i tatou se mea tatou te pule atoatoa i ai, vagana ai ua tatou tuu atu le pule i lena mea. O lena mea ua iloa ai lo tatou tagata patino ma le faamasinoina o le tagata lava ia.”¹⁰

O le eseesega i fanau e ono manaomia ai le eseese o tali a matua. O fanau e lototoa e ono faaoso ai popolega o matua, tulafono faaopoopo, ma faateleina le tau vaavaaia. O fanau matamumuli atonu e le manaomia tele le vaavaaia po o le gauai i ai. Ma le isi foi, e tali atu fanau i faiga faamatua e tusa ai ma o latou lava manatu tulagaese. Mo se faataitaiga, e ono vaai se tamaitiiti popole i se faatonuga famatua faapea e taufaafefe. Atonu e faataunuu ma le faaaloalo le manaoga e le tamaitiiti ae o loo lagona le vaivai ma le fefe. O se isi tamaitiiti e ono vaai atu i le faatonuga lava lena o se luitau ma tali atu ma le malosi po o le tetee.

E tatau ona atamamai matua i le ala latou te tali atu ai ia latou fanau. Na uunaia e Polika Iaga matua ia “suesue ia latou [fanau] fuafuaga ma o latou uiga, ma feutagai lelei ma i latou.”¹¹

Auala Faatuatuaina mo Tiute Faamatua

E pei lava ona eseese uiga ma amioga a fanau, e eseese foi auala a matua e tausi ai a latou fanau. O nisi auala e sili atu ona lelei nai lo isi. E masani ona iloa e matua le aoga o le suesue ma le agaga tatalo i auala eseese o tiute faamatua, ma fuafua ai po o fea e sili ona aoga ao fea e le tele se aoga.

Auala e Tolu o Tiute Faamatua

O tiute faamatua e masani ona pau i se tasi o vaega nei: saua, tuuavanoa, ma le faatuatuaina.¹²

Saua. “O matua saua e taumafai e faatulaga, pulea, ma iloilo amio ma uiga o le tamaitiiti e tusa ai ma le tulaga faatonuina ua faatulaga o le amio.” Ia latou taumafaiga e taitaia le amio a se tamaitiiti, e le valaauliaina e nei matua le tamaitiiti ia auai i se talanoaga o tulafono ma faamoemoega, “ma talitonu e tatau ona talia e fanau le upu a matua mo le mea sao.” O nei matua e faatauaina le pulea ma le saua o amio o a latou fanau, ma e masani ona latou faaalia sina alofa laitiiti. E seasea lava ona latou uunaia a latou fanau e faaali o latou lagona po o manatu, ae maise lava i tulaga o aoaiga.¹³

Tuuavanoa. O matua e tuuavanoa e masani lava ona faaalia le agalelei ma le alofa ia latou fanau ae tuuina atu sina taitaiga po o se faatonuga laitiiti. Latou te “taumafai e faaalia uiga o le le faasala atu, talisapaia, ma vaai i le itu lelei. … Latou te tuuina atu i latou lava e avea o ni punaoa e faaaogaina pe a mananao ai a latou fanau, ae le o ni tagata e i ai le tiutetauave o le fausiaina po o le suia o amio o a latou fanau i le taimi nei ma le lumanai. Latou te faatagaina a latou fanau e pulea a latou lava gaoioiga i le tele o taimi, aloese mai le faatinoga o le pulepuletutu, ma e le faamalosia a latou fanau ia usitai i tulaga faatonuina manino mai fafo.” O nei matua e “aloese mai le faaaogaina o le pule faaalia” ae atonu e taumafai e faatulaga amio a latou fanau i auala e le iloa gofie. Latou te aloese mai fefinauaiga.¹⁴

Faatuatuaina. O matua faatuatuaina e faaalia le faamoemoega maualuga lava lea e tasi mo a latou fanau e pei o matua saua, ae latou te faaalia foi le tulaga maualuga o le agalelei ma le talisapaia. Latou te alolofa ma lagolagosua. Ao latou taitaia a latou fanau, latou te “uunaia le talanoa atu ma le taliaina o manatu ma fefaasoaai ma a latou fanau le mafuaaga mo a latou aiaiga.” O nei matua “e faaaoga le pule mautu i le taimi o le feeseeseaiga a matua-fanau ae le faatapulaaina a latou fanau i le faasasaina. O matua faatuatuaina e faigata i le tulaga latou te taitaia ai ma le maumaututu ma le faifai pea ia gaoioiga a latou fanau ma tuu atu latou te saofaga i gaoioiga a le aiga i le fesoasoani i galuega i le fale. Latou te fetaiai ma le fiafia a latou fanau ina ia maua le maliega, faamatala manino a latou tulaga faatauaina, ma faamoemoe ia latou fanau e faaaloalo i o latou tulaga faatonuina.” I ana suesuega i le sili atu ma le tele o vaitausaga, na maua ai e Diana Baumrind, o se tagata tomai faapitoa i le suesueina o uiga ma amio, o fanau e ola ae i aiga faatuatuaina e tele lava ina lelei le va ma isi, faauo, ola pulea faaletagata lava ia, lotogatasi, ma mananao e ausia ni sini.¹⁵

O mataupu faavae faamatua ua aoaoina i lenei kosi e vavalalata lava le tutusa i tiute faamatua faatuatuaina. O lenei auala e sili ona talafeagai ma tusitusiga paia ma aoaoga mai taitai o le Ekalesia.

E tusa ai ma lenei tulaga faatonuina, e aoao atu ma taialaina e matua a latou fanau i le faatauanau, onosai, ma le alofa (tagai i le MF&F 121:41–44). Ua latou malilie e talanoaina a latou filifiliga ma a latou fanau ma faamalamalama atu a latou mafuaaga mo na filifiliga. Ua latou naunau foi e aoai a latou fanau pe a taitaiina ai e le Agaga ma tuuina atu ia i latou le taitaiga latou te manaomia.

Mataupu Faavae mo le Faamanuiaina i Tulaga Faamatua

Na tuuina mai e le Au Peresitene Sili ma le Korama a le Toasefululua ni mataupu faavae se iva e taitaia ai tama ma tina i o latou tiutetauave faamatua: : “O faaipoipoga ma aiga manuia e faavae ma tumau i mataupu faavae o le faatuatua, tatalo, salamo, faamagaloga, faaaloalo, alofa, agalelei, galuega, ma gaoioiga faafiafia tuufaatasi.”¹⁶ E mafai e matua ona aoaoina ma faaaoga nei mataupu faavae i le tele o auala.

Faatuatua. E tatau i matua ona aoao fanau ia faatuatua ia Iesu Keriso ma faaaoga lo latou faatuatua tuputupu ae i mataupu faavae e pulea ai o latou olaga patino (tagai i leMataio 17:20; Eperu 11:6; 3 Nifae 18:20; MF&F 68:25).
Tatalo. E tatau i fanau ona aoao e tatalo taitoatasi ma faatasi foi o se aiga. E mafai ona aoao fanau ao laiti e uiga i le mana o le tatalo (tagai i le Enosa 1:1–5; Mosaea 27:8–14; Alema 34:17–27; 37:37; 3 Nifae 18:21).
Salamo. E tatau i matua ona faailoa, tautau atu, ma lafoai agasala ina ia mafai ona latou olioli i le taitaiga musuia a le Agaga Paia. E mafai ona latou fesoasoani ia latou fanau ina ia malamalama ma faaaoga nei mataupu faavae i o latou olaga (tagai i le Alema 34:33; 3 Nifae 9:22; Moronae 10:32–33; MF&F 6:9; 58:42–43).
Faamagaloga. E mafai e matua ona avea ma faataitaiga o le faamagaloga e ala i le faamagaloina o i latou lava, a latou tane [ava], ma a latou fanau i o latou vaivaiga (tagai i le Mataio 6:14–15; Efeso 4:32; Mosaea 26:29–31; MF&F 64:8–10).
Faaaloalo. O tagata o le aiga e tatau ona aoao e faaaloalo le tasi i le isi. E tatau i matua ma fanau ona aoao e faaaloalo ma agalelei le tasi i le isi, i le vaai atu lea i le isi i se tulaga sili ona maualuga (tagai i le Mareko 9:42; MF&F 121:41–46). E tatau i matua ona taumafai e aveese manatu ma upu faitio e uiga i le isi faapea foi a latou fanau.
Alofa. E tatau i matua ona alolofa ia latou fanau i le ala na faamatalaina mai e Paulo, Alema, ma Mamona—i le onosai, agamalu, agaalofa, le losilosi, ma le le faafefeteina (tagai i le 1 Korinito 13; Alema 7:23–24; Moronae 7:45–48).
Agaalofa. E mafai e matua ona faaalia le agaalofa mo le isi ma a latou fanau. E tatau ona latou lagona le faanoanoa mo puapuaga ua oo i ai tagata o le aiga ma saili ia malamalama ma lagolago tagata o le aiga i o latou taimi faigata (tagai i le Ruta 1:11–17; Sakaria 7:8–10; Luka 15:11–32).
Galuega. O galuega faaleaiga e maua ai e fanau avanoa e aoao ai e faafetaia le galue ma lagona le faamalieina i le faataunuuina (tagai i le MF&F 42:42; 58:27–28), ae maise lava pe a galulue faatasi matua ma fanau. E tatau ona fetuutuunai ia galuega e tusa ma le matua ma malosiaga o fanau ina ia maua ai lagona o le faamanuiaina ma le lototele.
Gaoioiga Faafiafia Lelei. E faamalosia ma faafouina aiga pe a auai faatasi tagata o le aiga i gaoioiga faafiafia, ma lelei.

O le mataupu faavae silisili o nei mataupu o le alofa (tagai i le Mataio 22:36–40; 1 Korinito 13:13; Moronae 7:46). O le mea sili ona taua e mafai e matua ona fai mo a latou fanau o le alofa lea ia latou fanau i se auala faaKeriso. Pe a lagona ma iloa e fanau o loo alofagia i latou, o le a sili atu ona latou faalogo i aoaoga a o latou matua, mulimuli ia latou faataitaiga, ma talia a latou aoaiga. O le alofa e faaosofiaina ma taitaia amioga uma faamatua.

O Le Tulaga Faatonuina o le Talalelei mo le Faatosinaga Faamatua

Na ala mai le Perofeta o Iosefa Samita, na tuuina mai ai e le Alii le fautuaga na faamautuina le tulaga faatonuina mo le faatosinaga faamatua:

“E leai se mana po o se aafiaga e mafai pe tatau ona faatumauina ona o le perisitua, nao i le faatauanau, i le tali-tiga, i le agamaualalo ma le agamalu, ma le alofa faamaoni;

“I le agalelei, ma le malamalama manino, lea o le a faalautele tele ai le agaga e aunoa ma le pepelo, ma aunoa ma le faa’ole’ole—

“E aoai atu i taimi e tatau ai ma le maatiati, pe a uunaia ai e le Agaga Paia; ma ona faaali atu ai lea pe a mavae, o se alofa faateleina ia te ia o le na e aoaiina, nei manatu o ia ia te oe o sona fili;

“Ina ia iloa ai e ia e sili atu le malosi o lou faamaoni i lo fusi o le oti” (MF&F 121:41–44).

E tusa ai ma lenei tulaga faatonuina, e aoao atu ma taialaina e matua a latou fanau i le faatauanau, onosai, ma le alofa. Ua latou malilie e talanoaina a latou filifiliga ma a latou fanau ma faamalamalama atu a latou mafuaaga mo na filifiliga. Latou te tuuina atu ia latou fanau le taitaiga latou te manaomia ma aoai i latou pe a uunaia ai e le Agaga. Pe a aoaia e matua a latou fanau, latou te faaali atu le alofa faateleina ina ia iloa e a latou fanau lo latou alolofa.

O Le Mana o Feagaiga

E le o tuua na o matua i la latou taumafaiga e laveai a latou fanau. Ua saunia e le Tama Faalelagi feagaiga paia e mafai ai e Lana fanau ona maua faamanuiaga. Pe a osia e ulugalii le feagaiga o le faaipoipoga e faavavau ma ola ai i aiaiga o lena feagaiga, ua folafola e le Tama ia i laua le ola e faavavau (tagai i le MF&F 132:20). Na aoao uma mai Iosefa Samita, Polika Iaga, ma Iosefa Filitia Samita o faamanuiaga faaopoopo e oo mai i fanau ua faamauina o latou matua i le feagaiga o le faaipoipoga faalemalumalu, ma ua fesoasoani ia i latou e toe foi i lo latou Tama Faalelagi.¹⁷ Na saunoa mai Polika Iaga o fanau o lenei feagaiga o le faaipoipoga e avea ma “suli faatulafono i le Malo ma ona faamanuiaga ma folafolaga uma lava.”¹⁸

O nisi taimi e se ese fanau. Na uunaia matua e Elder Orson F. Whitney o le Korama a Aposetolo e Toasefululua e aua le fiu i nei fanau faalogogata.

“Outou matua o fanau lotomaaa ma faalogogata! Aua le fiu ia i latou. Aua le tuliesea i latou. E le o leiloloa atoatoa i latou. O le a maua e le Leoleo Mamoe ana mamoe. O ana mamoe ia ae le i avea ma a outou—ae le i taitai lava ona tuuina mai i latou i la outou tausiga; ma e le mafai ona outou amata alolofa ia i latou e pei ona ia alofa ia i latou. Ua na ona se ese i latou ma le le iloa mai le Ala o le Sao, ma e alofa mutimutivale le Atua i le le iloa. Ua na o le malamalama atoatoa e aumaia le atoatoa o le tali atu. E sili atu le alofa mutimutivale o lo tatou Tama Faalelagi, e le iu le tele o le agaalofa, nai lo ana auauna sili, ma o le Talalelei Faavavau e sili atu le malosi i le mana e laveai ai nai lo le mafai e o tatou mafaufau papau ma vaivai ona malamalama ai.

“Na folafola mai e le Perofeta o Iosefa Samita—ma na te le i aoaoina mai se aoaoga faavae e sili ona faamafanafana loto—faapea o faamauga faavavau o matua faatuatua ma folafolaga paia na tuuina atu ia i latou mo le auaunaga maoae i le Faamoemoe o le Upumoni, o le a le na o i latou o le a laveaiina, ae o le a faapena foi a latou fanau. E ui lava atonu e se ese nisi o mamoe, o loo i ai pea le vaaiga a le Leoleo Mamoe ia i latou, ma o le a oo mai lava le taimi latou te lagonaina ai … le aapa atu o le Taitai Paia ma toe toso mai i latou i le lafu. A le o le olaga nei po o le olaga a sau, o le a latou foi mai ai. E ao ona latou totogiina la latou aitalafu i le faamasinoga tonu; o le a latou puapuagatia mo a latou agasala; ma atonu o le a savalia se auala matuituia; ae afai o le a ia taitaia i latou mulimuli ane, e pei o le Faamaumauoa loto momomo, i le loto o se tama alofa ma loto faamagalo faapea le aiga, o le a le maimau le aafiaga tiga. Tatalo mo a outou fanau faatamala ma le le usiusitai; taofimau ia i latou ma lou faatuatua. Faamoemoe i ai, talitonu i ai, seia e vaai i le faaolataga a le Atua.”¹⁹

Na ofoina mai e Peresitene James E. Faust o le Au Peresitene Sili le faamalamalamaga lenei o le aoaoga a Elder Whitney:

“O se mataupu faavae i lenei saunoaga e masani ona le amanaiaina, o le tatau lea i [fanau le usiusitai] ona salamo atoatoa ma ‘pagatia mo a latou lava agasala’ ma ‘totogi la latou aitalafu i le faamasinoga tonu.’ …

“… O le mana o le faamauga o matua faamaoni e na o tuutuuga lava o le salamo o a latou fanau vaogata ma le Togiola a Keriso o le a taliaina ai. O le a fiafia fanau vaogata ua salamo i le faaolataga ma faamanuiaga uma e aumai faatasi ai, peitai o le faaeaga e matua sili atu. E tatau ona galue ina ia mauaina ma le atoatoa. O le fesili pe o ai e faaeaina e ao lava ona taatia atu i le Alii i Lona alofa mutimutivale.

“E toalaiti lava i latou e matua tele naua a latou amioga faatiapolo ma le fouvale ‘ua aveesea ai le mana e salamo ai’ (Alonzo A. Hinckley, i le Conference Report, Oke. 1919, 161).O lena faamasinoga e tatau ona taatia atu i le Alii. Ua Ia tau mai ia i tatou, ‘O Au, o le Alii, Ou te faamagalo i le o le a Ou faamagaloina, ae o outou ua poloaiina ia faamagalo atu i tagata uma’ (MF&F 64:10).”²⁰

I lena lava saunoaga, na fautua mai ai Peresitene Faust atonu e le malamalama tagata i lenei olaga “i le malosi o le maea tuaiti o le faamauga o matua amiotonu ia latou fanau.” Na ia aoao mai atonu o loo i ai “nisi sosia fesoasoani o loo galulue ua tatou iloa” e taitaia atu fanau vaogata i lo latou Tama Faalelagi, e aofia ai le faatosinaga a tuaa i le isi itu o le veli.²¹ O saunoaga faavaloaga ua faailoaina mai o le mana e laveai ai fanau e silisili pe a osia ma tausia e matua folafolaga o feagaiga.

Gaoioiga e Aoao ai: Toe Iloiloina o Feagaiga

O feagaiga o se taiala taua lea i le amio. E osia e tagata feagaiga pe a latou papatiso ma faamauina, pe a latou maua le perisitua, pe a maua o latou faaeega paia, ma pe a latou faaipoipo. O feagaiga taitasi, pe a tausia, o le a faamalosia tagata i a latou mafutaga ma tagata o le aiga. Mo se faataitaiga, pe a tausia e tagata o le Ekalesia a latou feagaiga o le papatisoga ina ia “faanoanoa faatasi ma e faanoanoa … ma faamafanafana atu ia te i latou o e e manaomia le faamafanafanaga” (Mosaea 18:9), o le a mouese atu le manatu faapito ma o le a faaitiitia le taua o le le atoatoa o isi.

Fai atu i matua e tusi i lalo feagaiga ua latou osia ma le Alii ma pe tatau faapefea e na feagaiga ona aafia ai a latou fegalegaleaiga ma a latou fanau. (O loo aofia i le itulau e 11 se lisi e mafai ona kopiina ma tufatufaina atu i tagata o le vasega.)

Fuaina o le Manuia o Tulaga Faamatua

O nisi matua e vaai mo ni faailoga po o le a le lelei o mea o loo latou faia. Na tuuina mai e Peresitene Howard W. Hunter lenei faatonuga: “O se matua faamanuiaina o se tasi na alofa, se tasi na ositaulaga, ma o se tasi na tausia, aoao, ma auauna atu i manaoga o se tamaitiiti. Afai na e faia uma nei mea ae o loo vaogata pea lou atalii pe faatupu faalavelave pe faalelalolagi, e mafai lava ona faapea o oe, e ui lava i lea, o se matua faamanuiaina. Atonu e i ai fanau e o mai i le lalolagi o le a luiina soo se ituaiga matua i soo se tulaga. Masalo e faapena foi, ona i ai isi o le a faamanuiaina olaga, ma avea o se fiafiaga, e toeitiiti lava o soo se tama po o se tina.”²²

Na aoao mai Peresitene Faust o matua lelei o “i latou ia na taumafai ma le alofa, ma le agaga tatalo, e aoao a latou fanau e ala ia latou faataitaiga ma le aoaoga ia ‘tatalo, ma savavali tonu i luma o le Atua’ (MF&F 68:28). E moni lenei mea e ui lava o nisi o a latou fanau e le usitai ma e faalelalolagi. . … O matua faamanuiaina o i latou ia sa ositaulaga ma tauivi e fai le mea sili latou te mafaia i o latou lava tulaga faaleaiga.”²³

O matua na tausia ma le manuia a latou fanau e tatau ona nofouta ia i latou atonu e talitonu ua latou toilalo. O matua e lagona ua faamanuiaina e tatau ona loto faafetai, ae le o le mitamita i se ala e faateleina ai le faanoanoa o isi matua. Na fautua mai Peresitene Faust:

“E matua le fetaui lava ma le le alofa le faamasino o ni matua faamaoni ma le maelega ona e fouvale nisi o a latou fanau pe se ese foi mai aoaoga ma le alofa a o latou matua. Amuia ulugalii e i ai fanau ma fanau a a latou fanau latou te aumaia le filemu ma le loto malie. E tatau ona tatou manatunatu i na matua lelei ma amiotonu o loo tauivi ma mafatia i fanau faalogogata.

“E i ai se tasi o au uo e masani ona faapea mai, ‘Afai e le’i i ai lava ni faafitauli mai lau fanau, ia faatalitali la mo sina taimi.’ ”²⁴

Faatasi ai ma le faaaloalo i matua e talitonu ua toilalo, na fautua mai Peresitene Spencer W. Kimball, “O le mea o loo i ai luitau [ma tagata o le aiga], faatoa e toilalo lava pe a e toilalo e taumafai pea!”²⁵ E le tatau i matua ona faasalaina i latou lava pe a tulai mai ni faafitauli ma ni mea sese ae ia taumafai e aoao mai ai, ma taumafai e fai le mea e sili atu. O le tulaga faamatua o se tiutetauave faifai pea, e tusa lava pe ua tuua e fanau le aiga ma tausi a latou lava fanau. E le tatau lava ona fiu matua ia latou fanau. E tatau ona faaauau pea ona latou alolofa ia i latou, tatalo mo i latou, ma faaaoga ma le atamai avanoa e fesoasoani ai ia i latou.

Na ofoina mai e Peresitene Faust lenei faamafanafanaga: “I matua loto nutimomoia, o e amiotonu, maelega, ma loto tatalo i le aoaoina o a latou fanau lē usiusitai, matou te fai atu ia te outou, o loo leoleoina i latou e le Leoleo Mamoe lelei. Ua silafia e le Atua ma malamalama foi i le loloto o lo outou faanoanoaga. O loo i ai le faamoemoe. Ia faamafanafanaina outou i upu a Ieremia: ‘E fai le taui a lau galuega,’ ma e ‘toe foi mai lau fanau mai le laueleele o le fili’ (Ieremia 31:16).”²⁶

“Ua i ai i matua se tiute paia e tausia a latou fanau i le alofa ma le amiotonu, … e aoao i latou e alolofa ma feauaunaai.”

“O Le Aiga: O Se Folafolaga i le Lalolagi”

O Le Auala e Taiala ai e Feagaiga le Amio

E masani ona osia e tagata o le Ekalesia feagaiga ma le Alii. O lenei lisi ua faaalia ai mea ua tuuto ai tagata o le Ekalesia e fai pe a latou osia feagaiga ma le Alii. O i latou e tausia ia feagaiga e maua faamanuiaga, e aofia ai le mafutaga ma le Agaga Paia, e faamalosia i latou i aso taitasi.

O le aafiaga faamoemoeina o nei feagaiga e ofoofogia. Afai ua na o feagaiga o le papatisoga lava e tausia e matua, o le a mafai lava ona latou foia le tele o faafitauli e tulai mai i o latou aiga.

Papatisoga

(Tagai i le 2 Nifae 31:17–21; Mosaea 18:8–10; MF&F 20:37; Mataupu Faavae o le Faatuatua 1:4.)

Tauaveina i luga o le tagata lava ia le suafa o Iesu Keriso.
Tu atu e avea o se molimau mo Iesu Keriso.
Ia tausia e le aunoa ia poloaiga.
Tauave avega a isi; faanoanoa faatasi ma i latou o faanoanoa; faamafanafana i e ua tatau i ai le faamafanafanaga.
Faaalia se naunautaiga e auauna i le Atua i le olaga atoa.
Faaalia le salamo mai agasala.

Faamanatuga

(Tagai i le 3 Nifae 18:28-29; Moronae 4, 5; MF&F 20:75-79; 27:2; 46:4.)

Faafou feagaiga o le papatisoga.
Toe tautino atu e tauave i ona lava luga le suafa o Keriso, ia manatua pea o Ia, ma tausi Ana poloaiga.

Tautoga ma le Feagaiga o le Perisitua

(Tagai i le Iakopo 1:19; MF&F 84:33–44; 107:31.)

Faalautele valaauga ma faataunuu ma le faamaoni tiutetauave o le perisitua.
Aoao atu le afioga a le Atua ma galue ma le filiga ina ia alualu i luma faamoemoega a le Alii.
Ia usitai; ia maua se malamalamaaga o le talalelei ma ola e tusa ai ma lena malamalamaaga.
Auauna atu i isi ma galue e faamanuia o latou olaga.

Faaeega Paia o le Malumalu

“O sauniga o le faaeega paia ua fai ma faatusa o matafaioi patino i le vaega a le tagata lava ia, e pei o le feagaiga ma le folafolaga e tausia le tulafono o le amio mama a’ia’i ma le legavia, ia agaalofa, agalelei, onosai ma le mama atoatoa; ina ia tuuto atu uma taleni ma mea ua maua i le faasalalauina o le upumoni ma le siitiaina o le taufetuliga; ina ia faatumauina le tuuto atu i le puna o le upmoni; ma saili atu i auala uma e saofaga ai i le tapenapenaga tele ina ia saunia le lalolagi e talia lona Tupu,—o le Alii o Iesu Keriso” (James E. Talmage, The House of the Lord [1968], 84).

Faaipoipoga Faaselesitila

Alofa i lou toalua ma tumau faamaoni ia te ia ma le Atua e oo i le faavavau.
Ola i auala e saofaga atu ai i le olaga fiafia faaleaiga ma galue ina ia faamanuiaina olaga o lou toalua ma le fanau.
“Ia fanafanau ia, ma ia uluola, ma ia tumu ai le lalolagi” (Kenese 1:28).