Vasega Tolu

Fesootai atu i le Alofa

Faamoemoega o le Vasega

I lenei vasega, fesoasoani i matua:

Ia malamalama i le taua o le faia o fesootaiga lelei ma le ogaoga o fesootaiga le lelei.
Ia faailoa atu ma taofi auala matautia o fesootaiga ma a latou fanau.
Ia aoao tomai taufesootaiga ma tu e faamalosia ai mafutaga faaleaiga.

O le Taua o Fesootaiga Lelei

O le fesootaiga e aofia ai mafaufauga uma, lagona, gaoioiga, po o le manao na e faasoaina i le va o matua ma fanau i faaupuga po o le leai foi o ni upu. E faigata pe a leai se fesootaiga. E pei ona matauina e Peresitene Spencer W. Kimball, “O o tatou foliga, o tatou leo, a tatou gaoioiga, o tatou mafaufauga e faalataina i tatou.”¹ O a tatou gaoioiga ma upu e tau atu ai po o ai i tatou, po o a o tatou lagona i mea, ma le tulaga ua tatou oo i ai. E oo lava i le musu e tautala e auina atu ai lava se savali i isi, e ui lava atonu e malamalama tonu pe leai foi i le savali.

O fesootaiga le lelei o se uiga ma o se mafuaaga o faafitauli faaleaiga. O matua ma fanau e feita ma lē fiafia, e masani ona fesootai i auala matautia, i le lagonaina o le le fia faalogo ma sili atu le manao e fai atu mea le lelei ma faatiga. E faapena foi, pe a faalogo matua ma fanau i savali le lelei, ma faatiga, e masani ona tali atu i upu ma gaoioiga le talafeagai. O le suia o uiga o se tasi agai i le olaga, ia te ia lava, ma isi o nisi taimi e manaomia muamua a o le i mafai ona maua le fesootaiga lelei.

E mafai e matua ona motusia lio o fesootaiga matautia e ala i le suia o le auala latou te faalogo ma tali atu ai, ona fatuina ai lea o se siosiomaga maloloina e mafai ona taitai atu i le suiga o le loto i o latou atalii ma afafine.

Tu ma Aga Matautia

O tu ma aga masani o fesootaiga e tuliesea ai fanau e aofia ai:

Aoaoga uumi, faatonutonu, lauga, suesueina.

“Sa ou tau muamua atu ia te oe, ua faaafe ona ou tau atua ia te oe. E le mafai ea ona ofi i lou ulu malo lena …”

“Ua tatau ona e maasiasi ia te oe lava ia. Vaai la i le mea ua e faia.”

“Aisea lava ua e fai ai lena mea?”
Le faatauaina, faafilemuina, tuuina atu o faamaoniga le moni.

“Faato’ato’a mai. E leai se mafuaaga e ita ai.”

“Ua lelei, po o le a lava le mea e te maua ai le fiafia.”

“O le a lelei mea uma. E toatele tagata na sili atu le pagatia.”
Faamasino, fetuu, faafefe.

“O le faalavelave ia oe o le …”

“O le a e le oo lava i se mea lelei.”

“Toe fai la lau mea lena ma o le a le mafai one e saofai i lalo mo le vaiaso.”
Tuuaia, faitioina, amusia.

“O oe a na mafua ai.”

“E ese lou faasoesa.”

“E le mafai ona ou onosai pe a e faitio faapena.”
O le talanoa e uiga i ou lava lagona ao manaomia e le tamaitiiti le faasoa mai o ona lagona.

“Ou te iloa lelei lava ou lagona. Ao ou laitiiti pei o oe, na ou …”

Gaoioiga e Aoao ai: Taofia o Tu Taufesootaiga Matautia

Fai atu i matua e mafaufau pe faapefea ona aoga nei tusitusiga paia ia i latou:

“O mea e sau mai le gutu, ua alu ae ia mai le loto” (Mataio 15:18)—fesili atu i matua po o a mafaufauga, uiga, ma manaoga e aafia ai le auala latou te fesootai ai ma tagata o le aiga.
“A le sese se tasi i le upu, o le tagata lea ua sao, na te mafaia foi ona taofi i le tino uma” (Iakopo 3:2)—fesili i matua e mafaufau po o le a le lelei latou te taulimaina ai o latou lagona ia aloese ai mai le tuuina atu o mea sese, ae maise lava pe a fai e a latou fanau ni mea e sese ia i latou.

Fai atu i tagata o le vasega e tusi i lalo tu taufesootaiga le talafeagai na latou faaaogaina. O lenei lisi o le a fesoasoani ia i latou e manatua e aua nei toe faia ia tu. Faatonu i latou o le laasaga muamua i le faaleleia o fesootaiga o le faailoa lea o le mea sese na latou faia ma taofi loa le fai atu o [tala] ma le faia o mea matautia. Faamalosiau atu ia i latou ia tumau i le faia o lenei suiga, e tusa lava pe faaauau pea ona faalogogata a latou fanau.

Fesootaiga FaaKeriso

O matua e fesootai i le auala faaKeriso e faigofie atu ona faataunuuina lo latou “tiute paia e tausia a latou fanau i le alofa ma le amiotonu” ma ia “aoao i latou e alolofa ma feauaunaai, ia tausia poloaiga a le Atua ma avea ma tagatanuu usiusitai i tulafono i soo se mea e nonofo ai.”²

O tulaga faatauaina ma talitonuga talafeagai e tele lava ina le oo atu i fanau e aunoa ma le feaveaia ma le faaeteete, ma le maaleale o ni faamatalaga. O le naunau o fanau e faalogo ma talanoa e masani ona faalagolago i le ituaiga siosiomaga mo le fesootaiga ua fatuina e matua i le aiga.

I le avea ai ma Faaola ma Togiola, o Iesu Keriso o lo tatou faataitaiga: “O au nei le ala, ma le upu moni, ma le ola: e le alu atu lava se tasi i le Tama, pe a le ui mai ia te au” (Ioane 14:6). Ona na o le pau lea o le tagata atoatoa na soifua i le fogaeleele, na Ia tuuina mai le faataitaiga maoae o le ala e tatau ona i ai tagata ma le ala e tatau ona latou fesootai ai le tasi ma le isi.

Ua faamanino mai e tusitusiga paia o Iesu na:

Telegese e faasala, e pei o le fafine na molia ona o le mulilua (tagai i le Ioane 8:3–11).
Loto Faamagalo, e pei ona Ia saili atu le faamagaloga a le Tama mo e na faasatauro ia te ia (tagai i le Luka 23:33–34).
Agaalofa, e pei ona Ia tagi faatasi ma Maria ma Mareta i le oti o Lasalo (tagai i le Ioane11:33–36).
Manatu i Lona aiga, e pei ona Ia saunia le tausiga mo Lona tina ao i ai o Ia i luga o le satauro (tagai i le Ioane 19:25–27).
Naunau e taui le leaga i le lelei, e pei ona Ia faamalolo le taliga o se tasi o i latou na pueina o Ia (tagai i le Luka 22:50–51).
Alofa i tamaiti, e pei ona faaalia i Lona faamanuiaina o i latou (tagai i le Mataio 19:14–15; 3 Nifae 17:21–24).
Loto faafetai, e pei ona Ia viia le fafine na uuina o Ia i le suauu (tagai i le Luka 7:44–48).
Naunau e auauna atu, e pei ona Ia mulumuluina vae o Ona soo, ma aoaoina i latou e auauna atu i isi (tagai i le Ioane 13:4–17).
Naunau e osi taulaga, e pei ona faaalia i Lana togiola mo agasala a le lalolagi (tagai i le Mataio 26:35–45).

O fesootaiga aoga o se taunuuga moni lea ao atiina ae e alii ma tamaitai uiga faaKeriso o le faatuatua, faamoemoe, agaalofa, alofa, manatu tasi i le mamalu o le Atua, amiomama, poto, le gaoia, onosai, alofa faauso, amioatua, lotomaualalo, ma le filiga (tagai i le MF&F 4:5–6). Na aoao mai Peresitene Tavita O. Makei: “E leai se tagata e mafai ona faia sana faaiuga faamaoni e faaaoga i lona olaga i aso taitasi ia aoaoga a Iesu le Nasareta, e aunoa ma lona lagonaina o se suiga i lona lava natura. O le fuaitau, ‘toe fanauina,’ e loloto atu lona uiga i lo le mea ua manatu i ai le toatele o tagata.”³ A o mulimuli matua i aoaoga a Keriso, latou te manumalo i tu le aoga ma matautia faalefesootaiga. Ao latou faaaogaina uiga faaleatua, ua faigofie ia i latou ona taulimaina lagona faaletagata ma sili atu la latou tali atu i amioga a isi; ua matele ina latou tali sao atu pe a le faaaloalo ma le pulea fanau.

Gaoioiga e Aoao ai: Iloiloina o le Tulaga o lau Fesootaiga

Fai atu i tagata o le vasega e mafaufau pe faapefea ona latou tali i fesili nei (e aunoa ma le faaalia o a latou tali i le vasega):

Pe talitonu lau fanau e te fia faalogo i mea o loo latou fai mai ai?
Pe o e fiafia ia latou gaoioiga, sini, ma mea ua ausia?
Pe latou te lagonaina le saogalemu i le talanoaina ma oe o o latou faafitauli ma manaoga patino?
Pe mafai ona latou fesili atu ia te oe ni fesili maaleale e aunoa ma le faitioina po o le aoaiina?

Afai o a latou tali o le ioe uma, atonu e faalogo a latou fanau ma talia tulaga faatauaina amiotonu ma talitonuga latou te aoao atu. Fautua atu ia talanoaina e matua a latou tali i le aiga ia iloa ai pe malilie i ai o latou taitoalua po o fanau ia latou tali.

O le faia o se tautinoga e masani lava ona faateleina ai le uunaiga o se tagata ia faataunuu le fuafuaga. Fai atu i matua e tusi i lalo se mea se tasi pe lua o le a latou faia i se isi auala e mulimuli ai i faataitaiga a le Faaola ao latou fesootai ma a latou fanau. Fautua atu ia tau atu i o latou taitoalua ma fanau le mea o le a latou faia.

Faaleleia o Fesootaiga

O faafitauli tau fesootaiga e tutupu mai pea. O le sailia po o anafea na amata ai ma po o ai na amataina faafitauli e masani ona faigata, ma e masani ona tele atu ai le leaga nai lo le lelei i le tuuaia. Nai lo le tuuaia, e tatau i matua ona tulimatai le faaleleia o a latou tomai tau fesootaiga.

O mataupu faavae ma tomai tau fesootaiga ua aoaoina i lenei vasega e aoga faapitoa lava pe a feita fanau ma e aoga le talatalanoa ma se tasi. E pei ona tuuina mai e le tagata poto faapitoa o mafaufau o John Gottman, o matua e fe’oe’oea’i lelei ma a latou fanau i taimi faigata ua aumaia se uunaiga o le suiga o le olaga, i le fesoasoani lea ia latou fanau e aoao e taulimaina lelei o latou lagona ma pulea lelei o latou va ma isi.⁴ E mafai e matua ona aoao ma faaaoga lelei mataupu faavae ma tomai aoga taufesootaiga. Pe afai latou te faia faatasi ai ma se manaoga moni ia faalogo ma malamalama, o le tulaga ma le aofai o a latou fe’oe’oea’iga ma a latou fanau e masani lava ona faateleina. O mataupu faavae nei o le a fesoasoani i matua e faaleleia fesootaiga ma isi faapea foi ma a latou fanau.

Taui atu le Leaga i le Lelei

O se auala aoga e motusia ai mamanu matautia o fesootaiga o le mulimuli lea i le faataitaiga a Iesu ina ia taui atu le leaga i le lelei. E tatau i matua ona tautala atu i se leo filemu pe a ee mai i ai se isi, talanoa faaaloalo pe afai e le faaaloalo a latou fanau, ia atamai pe afai ua le atamamai a latou fanau, ia saunia ma le alofa taunuuga pe afai ua solia e fanau tulafono faaleaiga (tagai i le vasega 9).

O le avea faapei o Keriso e le faapea o le a talia ai e matua manaoga le talafeagai. I le isi itu, o lona uiga o le taulimaina o faafitauli nai lo le aloese mai ai. Pe a onosai ma agaalofa matua, o le tele o fanau e iu lava ina tali mai i se auala lelei. O nisi taimi e le oo mai ni suiga i amio seiloga ua mautinoa e le tamaitiiti e mananao moni lava matua i se mafutaga sili atu ona lelei. O le iuga la, o le a manaomia e matua le tumau ia latou taumafaiga ina ia fesootai atu ma le talafeagai, e tusa lava po o a amioga a a latou fanau.

Vaai i le Itu Lelei o Fanau

E manaomia e matua ona gauai atu ia latou fanau, ae maise lava pe a talafeagai amioga a latou fanau. O le gauai atu o se uunaiga maoae lea. Afai e faalogo ma talanoa matua ia latou fanau i taimi o le sologa lelei, o le a latou faamalosia amioga lelei. E ono toe fai e fanau amioga na e tosina ai le gauai mai o latou matua. E tatau ona le amanaia e matua amioga le lelei ma le talafeagai pe afai e le afaina. Pe afai ua inosia, le talafeagai, pe matautia le amio, ua tatau loa ona faamamafaina e matua se taunuuga ina ia puipuia le tamaitiiti mai le mauaina o le gauai atu le manaomia. (tagai i le vasega 9).

Faalogo i Fanau

E masani lava ona lelei amio a fanau pe afai latou te lagonaina le faatauaina ma le faaaloalogia. E mafai e matua ona fesoasoani ia latou fanau ia lagona le faatauaina ma le faaaloalogia e ala i le faalogo atu ia i latou ma talia o latou lagona. O nisi taimi e i ai lagona o fanau e ono le fiafia i ai matua. Peitai, e masani lava ona suia lagona le manaomia pe a faatagaina fanau e talanoa e uiga i ai.

O lagona ita o se tamaitiiti i se matua, e masani lava ona vave suia i le alofa pe a faatagaina le tamaitiiti e talanoa i na lagona e aunoa ma le faasalaina. O le faalogo atu i lagona faigata o fanau o se auala lea e tuuina atu ai le fesoasoani muamua faalelagona. E lagona e fanau le loto vaivai ma le le mautonu pe a le amanaia pe teena foi o latou lagona; atonu e iu ina latouaoao ina ia le faatuatuaina le mea o loo latou lagonaina. O fanau laiti, e faapitoa lava, ona faalagolago i o latou matua ina ia fesoasoani ia i latou ia malamalama i o latou lagona.

Na ofoina mai e Elder Russell M. Nelson o le Korama a le Toasefululua lenei fautuaga: “O le taimi e faalogo atu ai, o le taimi lea e manaomia ai e se tasi ona lagonaina o ia. E fiafia tele tamaiti e faamatala mai mea na oo ia i latou, mea lelei atoa ma mea faanoanoa. O tatou naunau ea e faalogo? Afai o latou taumafai e faamatala mai lo latou mafatia, pe mafai ea ona tatou faalogo atu ma le malamalama i se aafiaga faateia e aunoa ma le faateia o i tatou lava? Pe mafai ea ona tatou faalogo atu e aunoa ma le lavetala atu ma aunoa ma le faamasino vave e tapunia ai le faitotoa o le fia tautala mai? E mafai ona tatalaina pea faatasi ai ma le faamautinoaga mālū, tatou te talitonu ia i latou ma malamalama i o latou lagona.”⁵

O mataupu faavae nei o le a fesoasoani i matua ia sili atu ona faalogo lelei.

Faaali le fiafia i ai ma se naunautaiga e faalogo. Afai o faaalia i upu a matua le fiafia i mea o fai mai ai le tamaitiiti ae o faaalia mai i o latou taga le le fiafia ma le le onosai, o le a talitonu le tamaitiiti i le gagana faitāga a le tino. E tatau i matua ona taofia isi mea o loo latou faia ma tuuina atu le gauai atoatoa ia latou fanau. Nai lo le tutu ma vaavaai atu i lalo ia latou fanau, lea e tau atu ai le malosi ma le tulaga maualuga, ae e tatau ona latou taumafai e fesootai i se tulaga o le mata-i-le-mata. E tatau ona latou nofouta i a latou gagana faitāga a le tino. E leotele atu taga na i lo upu.

Fai atu fesili e valaaulia ai le tamaitiiti e tautala. Mo se faataitaiga, atonu e fai atu le matua, “E foliga mai e i ai se mea o mamafa ia te oe. E te fia tau maia ia te au?” “O le a sou vaai i ai?” “Tau mai isi mea.” O le tuuina atu o fesili e tatau ona faia i se auala lagolago nai lo se auala faamalosi ina ia le lagona ai e fanau o loo suesueina i latou.

Faailoa ma tau mai lagona o le tamaitiiti. O le a lagona e fanau le mafanafana pe a faailoa ma tau mai e matua o latou lagona. Latou te iloa ai e malamalama se isi. E mafai ona faapea atu se matua, “Na e lagona le tiga ina ua le valaaulia oe e Ioane i lana pati, a ea.” O nisi fanau e tutupu ae e aunoa ma le faalogo i upu ia e tau atu ai o latou lagona le lelei. (Tagai i levasega 4 mo nisi faamatalaga i le faailoaina ma le tauina o lagona.)

Faalogo lelei e ala i le toe faaupuina o le tala a le tamaitiiti. Pe afai ua i ai se faafitauli i se tamaitiiti ma manao e talanoa, o nisi matua e faalogo i se upu e tasi pe lua, faapea loa ua latou malamalama i le faafitauli, ona oso atu lea ma amata ona tuuina atu fautuaga. Afai e le faalogo ma le atoatoa matua, e masani ona loto vaivai ai le tamaitiiti.

E tatau ona faalogo ma le faaeteete matua e aunoa ma le faalavelave. I taimi o le malologa i le talanoaga, e mafai ona laua toe faaupuina lo la malamalama i le mea o loo fai mai ai le tamaitiiti ma ona lagona, ma faatagaina le tamaitiiti e faasa’o laua pe afai na sese lo laua malamalama i le savali. E tatau ona la faaaloalo ma agaalofa ma aloese mai le fesuiaia po o le faaopoopo i le savali a le tamaitiiti.

O le toe faaupuina i lenei tulaga na ta’ua o le toe manatunatu po o le faalogo ma le toto’a. O se auala aoga e faaali ai i fanau e manatu mamafa ma malamalama o latou matua i mea latou te mafaufau i ai ma lagona, e pei o nei faataitaiga e lua:

Ua ulu mai se tamaitiiti i le potu, ato le tusi i luga o le laulau, ma faatau pupula atu i le matua.

Matua: “Ua e ita ia te au. Ua ou faia se mea ua e le fiafia ai.”

Ua sau se tamaitiiti i le fale mai le aoga, ua faanoanoa.

Tamaitiiti: “Na matuai o’u faaletonu lava i le kemisi ana nei. Na faaletonu le suega.”

Matua: “Ua e popole ua le pasi lau suega.”

Tali atu ma le to’a pe a le fiafia le tamaitiiti. Ua iloa e matua o le faalogo e faapitoa lava le faigata pe a ita le tamaitiiti ia i latou. O le tele lava o matua e mananao i le maliega a fanau ma e lagona le fefe, le to’a, ma le teena pe a faitioina.

Nai lo le tali atu ma le le to’a, e tatau ona latou tali atu ma le to’a e ala i le faalogo ina ia malamalama. Ma le isi, e tatau ona latou taliaina le mea sao i le mea o loo fai mai ai le tamaitiiti e uiga ia i latou. E tusa lava pe ua mamafa tele le tuuaiga, e masani lava ona i ai sina vaega e moni. (Mo se faataitaiga, e ono faapea atu se matua: “Ua ou faia se mea sese, ma ua e le fiafia ia te au. Sa le tatau ona ou … ” Afai o le popolega o le matua o le puipuia o ia lava, atonu o le a iu ina finau le matua ma le tamaitiiti. E tusa lava pe malo le matua i le finauga, e ono faaleagaina le mafutaga, ma o le a le maua ai e le matua le avanoa e fesoasoani ai. E masani lava ona mafai e fanau ona foia lagona o le ita pe a latou maua le avanoa e talanoa e uiga i ai faatasi ma se matua e faalogo.

Atonu e fesoasoani le fautuaga a Elder H. Burke Peterson o le Fitugafulu: “Manatua, e mafai ona e faalogo ina ia malamalama, ae le ina ia ioe i ai.”⁶

Faasoa Faalelei atu Lagona pe Afai ua E le Fiafia

E masani ona fai e matua mea sese maoae pe a feita. O upu o le ita e mafai ona tutupu mai ai manua e faigata ona faamaloloina. O le sese ona faaleoina atu o le ita e masani ona i ai le upu oe ma ua taua o faamatalaga o le “oe”. Mo se faataitaiga: “E le mafai e oe ona faia se mea sao?” O na fuaiupu e masani ona taufaatauvaaina ma tausalaina, ma latou te faaosoina ai le taliupu i fanau.

O se auala e sili ona talafeagai, o le faasoa atu lea e matua o le ala latou te aafia ai i amioga a se tamaitiiti: “Ou te lagona le le fiafia pe afai e le i faia galuega faatonuina.” O nei fuaiupu e taulai atu i le mea o loo tupu e aunoa ma le faamaasiasiina o le tamaitiiti. Ua ta’ua o fuaiupu “ou”. Latou te valaaulia se tali sili atu mai le tamaitiiti. O fanau o loo faaalia i ai le faaaloalo e masani lava ona mananao e fai amio faaaloalo.

O fuaiupu “ou” e sili atu le sao nai lo fuaiupu “oe” aua o loo i ai ia i latou se faaaliga faigofie o lagona faaletagata e uiga i le amio a le tamaitiiti. (“Ou te lagona le le fiafia pe a … ”) E faigata i se tamaitiiti ona finau ma se matua pe a fai mai, “Ou te le fiafia ma faanoanoa pe a ave le taavale e aunoa ma le faanoi.” Ae ui i lea, afai e fai atu le matua, “E te le faamaoni ma amiolilo” (o se fuaiupu “oe”), e ono talitonu le tamaitiiti o le faaiuga a le matua e le fetaui ma matuia. Atonu e manao le tamaitiiti e finau ma le matua. O le tulaga e sili ona leaga, e ono talitonu le tamaitiiti i le faaiuga a le matua ma amio ai e tusa ai ma igoa ua faaigoaina ai.

O fuaiupu “ou” e aumaia se tali sili atu mai le tamaitiiti. Pe a faalogo atu le tamaitiiti o faapea mai se matua ma le alofa, “Ua tae lou fatu ua nutililii lau mea tuu teu e sili ona ou fiafia ai i le fola,” o le a ia lagona le salamo ma manao e fai se faaleleiga nai lo le fai atu o le matua, “E te faavalevalea tele. Vaai la i le mea ua e faia.” O fanau e faaalia i ai le faaaloalo e masani ona mananao e puipui lena faaaloalo. O fanau e agaleagaina e masani ona lagona le inoino ma le faatauvaa ma e le manatu tele i le fesoasoani atu i le matua ia maua se lagona sili atu ona lelei.

Gaoioiga e Aoao ai: Faataitaiina o Fuaiupu “Ou”

Tuu atu i tagata o le vasega e faataitai le faaaogaina o fuaiupu “ou” faatasi ma o latou taitoalua po o se isi matua. O se tasi auala e fai ai se fuaiupu “ou” o le vaevae lea i ni vaega se tolu. E mafai e le matua ona: (1) faamatala ona lagona (ita, faalii, le toa, ma isi foi); (2) faamatala pe aisea ua le fiafia ai o ia; ma (3) faamalamalama pe faapefea ona aafia o ia i le amio. Mo se faataitaiga: “Ua ou le fiafia ona ua masaa le vaiinu i luga o le fola o le potu malolo ma o lea la e tatau ai ona tā le kapeta ma o le a taugata lena mea.” O le tasi matua e tatau ona avea ma tamaitiiti a o le isi e tali atu i le matafaioi a le matua. E mafai ona la faataitai i le faasoaina o le popolega o loo ia i laua e uiga i le amio a se tasi o le la fanau. A maea ona faataitai mo le 5 i le 10 minute, ua tatau loa ona fesuiai tofiga ma faataitai mo le isi 5 i le 10 minute. Fai atu ia i laua e tuuina atu i le isi ni lagona e faaleleia ai tomai.

Faamanino le Mea ua Faamoemoeina mai Fanau

E masani ona ofo matua pe a iloaina e le o malamalama lelei a latou fanau i le mea o loo faamoemoeina mai ia i latou. I le faaopoopo atu i le tuuina atu o se fuaiupu “ou”, e tatau i matua ona tuuina atu se savali manino o le mea latou te mananao ai. Mo se faataitaiga: “Ou te lagona le le faafetaia pe a ou aveina oe i ni nofoaga ae le maua mai lava se faafetai mo lena mea. E masani lava ona talafeagai le fai mai ‘faafetai’ pe a fai e se tasi se mea mo oe. Ou te fia faalogo i ai, e faapena foi isi. Faamolemole pe mafai lava ona e faafetai i tagata pe a latou faia ni mea mo oe?”

Na faailoa mai e le tina na faia lenei talosaga o lana tama teine, lea ua matua, o loo faaauau pea ona tuuina atu le faafetai mo mea o loo ia faia mo ia. E mautinoa lava, e le o fanau uma o le a tali lelei atu. O le toe fai e ono manaomia e pei foi o isi tulaga talafeagai o loo faamatalaina i isi vasega mulimuli mai.

Gaoioiga e Aoao ai: Tuuina atu o Faamoemoega Tau i Amio

Fai atu i matua e faataitai ni faamatalaga “ou” faatasi ai ma lenei faaopoopoga—a uma le faamatalaga “ou”, e tatau loa ona latou tuuina atu manino o latou faamoemoega tau i le amio mo le tamaitiiti. Mo se faataitaiga, e mafai e le matua ona fai atu i se tamaitiiti na faia se galuega gaogaosa o le fufuluina o le fale taavale: “Ua ou le fiafia ina ua e fai mai na e faamamaina le fale taavale, ae ua ou vaai o loo gasu pea. E le mama foliga, ma e le saogalemu. E mafai e isi ona lavevea i mea ia o loo i ai i luga o le fola. O le mea la lea ou te manao e te faia: ave i luga mea faigaluega ma tuu i fata e tatau ona tuu ai; ona ave lea i fafo o le moavao ma isi mea o loo i luga o le fola, salu le fola, ona tuu lea o na mea i o latou nofoaga e tatau ai.” Tuu atu i le tasi matua e avea ma tamaitiiti ao le isi e tali atu o se matua. A uma ona faataitai mo le 5 minute, ona fesuiai lea o tofiga ma faataitai mo le isi 5 minute. Fesili atu ia i laua e tuuina mai ni manatu pe na lelei le faiga o nei fuaiupu ae pe na talafeagai foi.

Foiaina o Faafitauli Ia e Faaleagaina le Malosiaga e Faalogo ai

O nisi taimi e i ai i matua uiga ma manatu le lelei ma le le talafeagai e faalavelave ai i le faalogo, e pei o mea nei:

Lagonaina o le tiute e foia ia faafitauli uma a le la tama. O fanau laiti e faapitoa lava le manaomia tele o le fesoasoaniga a o latou matua e foia ia faafitauli. O fanau e matutua atu e manaomia foi i nisi taimi le fesoasoani. Ae ui i lea, e tatau ona aoao fanau uma e foia o latou lava faafitauli. O le lototele e maua mai le feagai ma le foiaina o luitau o le olaga ma faafitauli. E tatau ona avea matua ma punaoa pe afai ua sili atu faafitauli nai lo malosiaga a o latou fanau.
Lagonaina o lona tiutetauave o le tausia o ni fanau faamanuiaina nai lo le tulimatai atu i le avea ma matua faamanuiaina. (Iloilo le uiga o se matua faamanuiaina i le vasega 1.)
Manao e pulea a latou fanau.
O le soona lafoai ma tuuavanoa, ua faatagaina ai fanau e matua saoloto e aunoa ma le faatonu, taiala, ma ni tuaoi.
Fefe i le toilalo ma le maasiasi i luma o tagata.
Talitonu e sao lava latou (matua) i taimi uma lava.
Manaomia le lagona o le alofagia e fanau ma le fefe i le teenaina e i latou.

Afai e manaomia e matua le fesoasoani i nisi o nei faafitauli, e tatau ona latou talanoa faatasi ma o latou taitoalua, anapopogi ma tatalo mo le taitaiga, auai i le malumalu, ma, pe a manaomia, talanoa atu i lo latou epikopo ma fesili atu mo se fesoasoani mai tagata popoto faapitoa.

O Le Mana o Fesootaiga Aoga

Na apoapoai mai le Aposetolo o Paulo, “Ia fai oe ma faaaoao i e faatuatua, i le upu, ma le amio, ma le alofa” (1 Timoteo 4:12). I lana tusi i tagata Filipi, na ia aoao atu foi, “Tau ina ia tusa la outou amio ma le talalelei ia Keriso” (Filipi 1:27). O upu ma amio o loo i ai le mana e faatiga po o le fesoasoani, e faatupuina le tiga ma le pagatia po o le faamaloloina o lagona tiga, ia faaosoina le masalosalo ma le fefe po o le faatumauina o le faatuatua ma le lototoa. A lelei auala e fesootai ai matua, e mafai e i latou ona faia se faatosinaga sili ona maoae ia latou fanau.

Na aoao mai e Elder L. Lionel Kendrick o le Fitugafulu le taua o le avea faapei o Keriso i le fesootaiga ma isi:

“O a tatou fesootaiga e atagia i o tatou foliga. O le mea lea, e tatau ai ona tatou faaeteete e le gata i mea tatou te faafesootai atu, ae po o faapefea foi ona tatou faia. O agaga e mafai ona faamalosia po o le faatamaia e le savali ma le ala tatou te fesootai ai. …

“… O fesootaiga faaKeriso e faaalia i siuleo o le alofa ae le o le leotele. E faamoemoe ina ia avea ma fesoasoani ae le o le faatiga. E faamoemoe e noa faatasi ai i tatou ae le o le faafeeseesea’i. …

“O le luitau moni … o le faatulaga o tatou loto ia maua le lagona faaKeriso mo fanau uma lava a le Tama Faalelagi. Pe afai ua tatou atiina ae lenei lagona mo le tulaga o isi, o le a tatou fesootai loa ma i latou e pei ona tatau ai i le Faaola. O le a tatou faamafanafana loa loto o i latou atonu o loo pagatia ma le le leoa. … Ona mafai lea ona tatou faia ia sili atu le malamalama o la latou malaga ona o mea tatou te fai atu ai.”⁷

O upu ma amio e i ai le mana e faatiga pe fesoasoani, e faatupu ai le tiga ma le pagatia po o le faamaloloina o lagona tiga, e faaosoina masalosaloga ma le fefe po o le faatumauina o le faatuatua ma le lototoa.