Fundisha kuhusu Yesu Kristo Bila Kujali Kile Unachokifundisha

Kuna mambo mengi ya kufundisha katika injili iliyorejeshwa ya Yesu Kristo—kanuni, amri, unabii, na hadithi za maandiko. Lakini haya yote ni matawi ya mti mmoja, kwa sababu vyote hivi vina dhumuni moja: kuwasaidia watu wote waje kwa Kristo na wakamilishwe ndani Yake (ona Yaromu 1:11; Moroni 10:32). Hivyo basi, bila kujali kile unachokifundisha, kumbuka kwamba hakika unafundisha kuhusu Yesu Kristo na jinsi ya kuwa kama Yeye. Roho Mtakatifu anaweza kukusaidia ujifunze kutambua kweli kuhusu Mwokozi na nguvu Yake ya kukomboa katika kila kanuni ya injili, amri, na mafundisho ya kinabii (ona Yakobo 7:10–11).

Je, unafundisha kuhusu dhabihu? Zingatia kuchunguza pamoja na wanafunzi jinsi gani dhabihu tunazofanya huzielekeza nafsi zetu kwenye dhabihu iliyo “kuu na ya mwisho” (Alma 34:10). Je, unafundisha kuhusu umoja? Zingatia kujadili umoja Yesu Kristo alioupata pamoja na Baba Yake na mwaliko Wake kwetu wa kuwa na umoja pamoja Nao (ona Yohana 17). Ona kila mada ya injili kama fursa ya kufundisha na kujifunza kuhusu Yesu Kristo.

Kila amri pia inatoa fursa hii. Usifokasi tu juu ya sheria za injili—jifunze pia kuhusu Mtoa Sheria. Kama mnajadili Neno la Hekima na mnatua kwenye mambo ya kufanya na ya kutofanya juu ya kuishi maisha yenye afya bora, unakosa fursa ya kutafakari jinsi gani Yesu Kristo anajali sana kutuhusu sisi—vyote ustawi wetu wa kimwili na wa kiroho—hata akatupatia sheria hii. Fokasi juu ya jinsi gani Mwokozi alivyo tayari na mwenye shauku ya kutubariki sisi kwa nguvu Yake ili kutusaidia tuishi sheria Zake. Kila sheria Yeye anayotupatia inafunua kitu fulani kuhusu mawazo, mapenzi, na moyo Wake—tafuteni shangwe katika kugundua hili pamoja!

Sisitiza Mfano wa Yesu Kristo

Tunaweza kumweka Yesu Kristo kwenye kiini cha kufundisha na kujifunza kwa kutambua na kusisitiza kwamba Yeye ni mfano mkamilifu wa kanuni zote za injili. Kama wanafunzi, hatufuati tu kanuni—tunamfuata Yesu Kristo. Tunapofokasi juu ya mfano mkamilifu wa Mwokozi, Roho Mtakatifu atashuhudia juu Yake na kutushawishi tumfuate Yeye.

Tafakari kwa dakika chache kwamba wewe unafundisha kanuni ya kuvumilia hadi mwisho. Mjadala kuhusu jinsi gani Mwokozi ni mfano wa kuvumilia hadi mwisho ungeweza kuleta hisia za unyenyekevu wa dhati Kwake Yeye. Wale unaowafundisha wanaweza kujifunza na kuhisi nini kutokana na mfano Wake?

Mwokozi aliweka mfano mkamilifu kwa ajili yetu sote. Aliwaponya Wote, na Michael Malm

Fundisha kuhusu Majina, Wajibu, na Sifa za Yesu Kristo

Yesu Kristo ana majina mengi katika maandiko. Kila moja linaakisi moja ya wajibu Wake katika mpango wa Mungu na linatufundisha kuhusu sifa Zake za kiungu. Unaweza kuzingatia kuchunguza pamoja na wanafunzi majina kama Mwanakondoo wa Mungu, Mwombezi, Mtimizaji wa Imani Yetu, na Nuru ya Ulimwengu yanatufundisha nini kumhusu Yesu Kristo. Pia, unapowasaidia wanafunzi kuja kujua zaidi kumhusu Mwokozi, nenda mbali zaidi ya kile alichokisema na kukifanya kwa vile alivyo na jukumu analotamani kulitimiza katika maisha yetu. Mnapojifunza pamoja kuhusu sifa na tabia za Mwokozi, Roho Mtakatifu ataongeza kina cha uelewa wenu juu Yake na upendo wenu kwake Yeye.

Tafuta Ishara Ambazo Hushuhudia juu Yesu Kristo

“Vitu vyote,” Bwana alitamka, “vimeumbwa na kutengenezwa ili vinishuhudie mimi” (Musa 6:63; ona pia 2 Nefi 11:4). Tukiwa na ukweli huu akilini, tunaweza kujifunza kuona wingi wa ishara katika maandiko ambazo zinashuhudia juu ya Mwokozi. Ishara hizi zinajumuisha vitu kama mkate, maji, na nuru. Mara tunapokuwa tumeelewa jinsi gani vitu hivi vinahusiana na Mwokozi, vinaweza kutufundisha juu ya nguvu Zake na sifa Zake. Unaweza hata kupata mifanano ya maisha ya Mwokozi katika maisha ya manabii na watu wengine wake kwa waume walio waaminifu katika maandiko. Kutafuta ishara kunafunua kweli kuhusu Mwokozi katika mahali ambapo vinginevyo usingepatilia maanani.