Kapitulo 13

Mga Baruganan sa Seguridad sa Panalapi

Sa atong paglikay sa utang ug sa pagbayad sa atong mga ikapulo ug mga halad, ang Ginoo manalangin kanato sa pinansyal ug espirituhanon nga paagi ug mohatag kanato sa kahigayunan sa pagtabang sa pagtukod sa Iyang gingharian.

Gikan sa Kinabuhi ni Heber J. Grant

Usa ka krisis sa ekonomiya nakaapekto sa kadaghanan sa Estados Unidos niadtong 1893, nagbutang sa gatusan ka mga bangko, mga estasyonan sa tren, mga minahan, ug uban pang mga negosyo diha sa pinansyal nga pagkahugno. Kana nga krisis, gitawag nga Kalisang sa 1893, nakapapugwat ni Elder Heber J. Grant ug sa daghan pa. Kini mipaantus ni Elder Grant, nga nianang higayona usa ka sakop sa Korum sa Napulog Duha ka mga Apostoles, tungod sa mga utang nga milungtad og mga tuig una niya nabayari. Sa usa ka pakigpulong nga iyang gihatag nianang panahona siya miingon: “Ako mokumpisal kaninyo nga ako ug daghan pa nakahimo og sayop. Ngano man? Tungod kay gusto kaayo kami nga makabaton og daghang salapi nga nalubong na hinoon kami sa utang, ug karon dili na kami makabayad og sayo sa among mga utang…. Sa unang higayon sa akong kinabuhi adunay mga tawo nga miduol ug naningil kanako nga bayaran ang kwarta nga akong nautang nila, ug kinahanglan ko nga mangayo og lugway sa panahon. Kon ang Ginoo mopasaylo lang nako niini dili na gayud ako mousab pa. Tigpanghulam gyud ko og kwarta sukad pa niadtong diseotso pa ko, apan kon makabayad lang ko sa unsay akong nahulaman karon, kontento na ko, ako nagtuo, uban sa mga panalangin sa Ginoo, bisan unsa pa kini, ma dako man o ma gamay kini.”¹

Isip Presidente sa Simbahan, si Heber J. Grant mitambag sa mga Santos sa mga butang kabahin sa seguridad sa panalapi, migamit sa iyang kaugalingong mga kasinatian ug misunod sa ehemplo sa nag-una kaniya, si Presidente Joseph F. Smith. Si Presidente Grant mipokus sa duha ka sukaranang mga baruganan: ang kalinaw nga moabut kon maglikay kita sa utang ug ang temporal ug espirituhanong mga panalangin nga atong madawat kon mobayad kita sa mga ikapulo ug mga halad. Niadtong Abril 1932 mitudlo siya niining mga baruganan atol sa kinatibuk-ang komperensya sa Relief Society. Niadtong panahona ang Estados Unidos nahitumpawak ngadto sa pagkawalay paglaum sa Grabe nga Depresyon, usa ka mikatap nga krisis sa minos nga kalihokan sa ekonomiya ug taas nga pagkawalay trabaho. Si Presidente Grant mibadlong sa mga Santos tungod sa wala pagpatalinghug sa tambag nga ilang nadawat gikan ni Presidente Smith:

“Kon ang katawhan nga nailhan isip mga Santos sa Ulahing mga Adlaw naminaw pa sa tambag nga gihatag gikan niining pulpito sa nag-una kanako, ubos sa pagdasig sa Ginoo, nagtawag ug nag-awhag sa mga Santos sa Ulahing mga Adlaw nga dili mangutang, kining grabe nga depresyon makaapekto lang unta og gamay ra gayud kaayo sa mga Santos sa Ulahing mga Adlaw…. Sa akong hunahuna, ang dakong rason sa depresyon sa Estados Unidos sa kinatibuk-an, mao ang pagkaulipon sa utang ug ang diwa sa pagpamasin diha sa mga tawo.”

Nagpadayon sa iyang pakigpulong, si Presidente Grant mihatag og gibug-aton sa panginahanglan sa paglikay sa utang. Iya usab nga giawhag ang iyang mga tigpaminaw sa pagbayad sa mga ikapulo ug mga halad, bisan sa mga panahon sa kalisud sa panalapi. Siya mihisgut sa usa ka panahon sa daghang katuigan nga milabay sa dihang nangutang siya aron sa pagpalit og stock sa Teyatro sa Salt Lake, naglaum nga maluwas ang bilding gikan sa pagkaguba:

“Gusto nako nga ang tanang mga tawo nga maabot sa akong tingog makabenepisyo pinaagi sa akong kasinatian sa pagpalit og stock sa teyatro. [Kay] sa 32 ka tuig sa akong kinabuhi, … matag dolyar nga akong kinitaan nahanaw na sa wala pa nako kini makuha. Hilabihan kini nga alantuson, sa sinambingay nga pagkasulti, ang makabaton og patay nga kabayo, ug ang pagpas-an sa kabayo sulod sa 32 ka tuig una pa nimo kini nabutang ilalom sa yuta. Kini terible nga kahimtang, ug ang tanan tungod sa utang. Sukad nianang panahona kanunay gayud ako naggasto sa unsa lamang ang akong kinitaan….

“… Kon aduna may tawong buhi kinsa angayang mosulti nga, ‘Likayi ang utang, ’ ang iyang ngalan mao si Heber J. Grant. Salamat sa Ginoo nga nakabayad ra ko [sa tanan nakong utang], ug nakabayad niini nga wala mohangyo ni bisan kinsa nga minosan kini. Ako wala magtuo nga ako kadtong mabayran kon dili pa ko hingpit nga matinuoron sa Ginoo. Dihang ako nakakwarta, ang unang utang nga akong gibayaran mao ang sa Ginoo, ug ako nagtuo sa walay pagduhaduha, nga kon ang mga Santos sa Ulahing mga Adlaw isip usa ka katawhan, misunod sa tambag sa Propeta sa Ginoo, ug nahimong andam nga mga magbabayad sa ikapulo wala unta sila sa ilang kahimtang karon. Kon sila matinuoron ug matarung sa pagbayad sa [mga halad sa puasa] kita makaatiman sa matag tawo nga anaa sa malisud nga mga kahimtang niini nga Simbahan.”²

Si Presidente Grant misunod sa mga baruganan nga iyang gitudlo, ug sa katapusan nahimo siyang malampuson sa pinansyal nga mga butang diha sa personal ug sa mga pinansyal nga may kalabutan ang Simbahan. Sa gihapon, siya sa kanunay mabinantayon sa pagpahayag nga ang tinuod nga kalampusan dili makita diha sa abilidad sa pagpangita og kwarta. Siya miingon: “Dili lang kadtong milampus sa pag-angkon og bahandi, ug mopakubos sa natural nga mga pagbati sa kasingkasing, ug isalikway ang gugma sa iyang isigkaingon, nga maingon nga tinud-anay nga malampuson: apan siya kinsa nagpakabuhi aron kadtong kinsa mas nakaila kaniya mohigugma kaniya sa hilabihan; ug nga ang Dios, kinsa nasayud dili lamang sa iyang mga binuhatan, apan sa mga tinud-anay usab nga mga sentimento sa iyang kasingkasing, mohigugma kaniya: ang ingon nga tawo––bisan pa man kon mamatay siya sa kakabus––mahimong masulti gayud ug sa pagkatinuod, ‘siya pagakoronahan og korona sa kalampusan.’ ”³

Mga Pagtulun-an ni Heber J. Grant

Pinaagi sa pagpuyo sigun sa atong kinitaan, atong malikayan ang pagkaulipon sa utang.

Kon aduna may usa ka butang nga makadala og kalinaw ug katagbawan ngadto sa kasingkasing sa tawo, ug ngadto sa pamilya, kini mao ang pagpuyo sigun sa atong kinitaan. Ug kon aduna may usa ka butang nga makapabug-at ug makawala og paglaum ug makapasakit, kini mao ang pagbaton og mga utang ug mga obligasyon nga ang usa dili makabayad.⁴

Mopasidaan ko sa mga Santos sa Ulahing mga Adlaw sa pagpalit og mga sakyanan ug sa pagpalit og ordinaryong mga panginahanglan sa kinabuhi kon sila adunay kwarta aron sa pagpalit niini, ug sa dili pagbutang sa ilang kaugmaon nga puno sa utang…. Gusto ko nga mosulti kaninyo nga kadtong wala maghunahuna sa ilang kaugmaon, kinsa modangup sa utang alang sa ordinaryong mga panginahanglan sa kinabuhi ug sa mga kapritso sa kinabuhi, nagbutang og mga alantuson sa ilang mga kaugalingon nga mobalik uban sa dako kaayo og interes nga magbutang kanila sa hilabihang kalisud ug kaulawan.⁵

Kon ang usa ka tawo nanag-iya sa unsay anaa kaniya ug dili kinahanglang mobayad og interes, ug mipalit lamang tungod kay siya adunay kwarta nga ipalit, ang kadaghanan sa mga tawo maanaa sa igo-igong komportable nga mga kahimtang…. Atong gibutang sa utang ang atong kaugmaon nga wala maghunahuna sa mga insidente nga mahimong mahitabo––balatian, mga operasyon, ubp.⁶

Wala nato masayri ang tanang mahitabo sa umaabot. Apan adunay usa ka butang nga atong masayran, ug kana mao nga kon kita adunay kwarta sa atong mga kamot aron ipalit og radyo, sakyanan, o bisan unsa pa, ug ato kining gipalit, bisan mokunhod pa man ang bili niini kini ato na.⁷

Ako nagtuo nga hapit tanang mga kalisdanan sa kadaghanan sa mga tawo mahanaw kon sila andam sa pagbiya sa naandang pagsul- ob sa sida nga mga medyas, sa ingon nga pagkasulti ug mobalik sa ordinaryong kinaiya nga magsul-ob sa yano, ligdong nga paagi; molikay sa kanunay sa pagtan-aw og mga salida nga ilang naandan; mobalik sa mga pamaagi sa pagdaginot ug pangiyawat.⁸

Ang matinuorong pagbayad sa mga ikapulo ug mga halad makadala og temporal ug espirituhanong mga panalangin.

Gusto nakong sublion ngadto sa mga Santos sa Ulahing mga Adlaw ang akong lig-ong pagtuo nga ang Dios ang atong langitnong Amahan mopauswag ug mopanalangin ug mohatag og kaalam niadtong mga kalalakin-an ug niadtong kababayen-an kinsa hingpit nga matinuoron ngadto kaniya sa pagbayad sa ilang ikapulo. Ako nagtuo nga kon ang usa ka tawo anaa sa kalisud sa panalapi, ang labing maayo nga paagi sa paggawas niana nga kalisud (ug ako namulong gikan sa personal nga kasinatian, tungod kay ako nagtuo nga labaw pa sa kausa sa akong kinabuhi nga nabutang ako sa grabe nga kalisud sa panalapi sama usab sa uban) mao ang hingpit nga magmatinuoron sa Ginoo, ug dili gayud motugot nga adunay kwarta nga moabut sa atong mga kamot nga dili mohatag ngadto sa Ginoo sa ikanapulong porsyento niini.

Ang Ginoo wala magkinahanglan sa inyong kwarta o sa ako. Ang pagtuman sa balaod sa ikapulo ug sa mga donasyon alang sa mga balay-tigumanan sa ward, mga gambalay sa stake, mga eskwelahan, mga templo, misyonaryo nga buhat ug kining mga nagkalainlaing mga panginahanglan, ang tanan alang sa atong kaayohan. Kini yanong mga leksyon nga atong makat-unan nga mopasarang ug moandam kanato nga mahimong mas diosnon ug aron mahimong angayan nga makabalik ngadto sa atubangan sa atong langitnong Amahan. Ang maong mga leksyon nga may kalabutan sa panalapi nga gihatag kanato pareho sa mga leksyon nga gihatag kanato diha sa usa ka eskwelahan ngadto sa usa ka batang lalaki o sa usa ka batang babaye; kini alang sa kaayohan sa batang lalaki; kini alang sa kaayohan sa batang babaye, alang sa ilang pag-uswag, alang sa ilang pagmaya ug kalipay didto sa sunod nga kinabuhi; tungod kay sa tanang kahibalo ug kasayuran nga atong maangkon, ug sa kalamboan nga atong nahimo, kita mismo ang maoy nabenepisyohan.

Ang Dios nga atong langitnong Amahan mipasiugda sa mga balaod aron sa pagpalambo sa iyang katawhan sa pisikal, espirituhanon, intelektwal nga paagi, ug usa sa labing maayo nga mga balaod sa tibuok kalibutan aron makahimo sa mga Santos sa Ulahing mga Adlaw nga mas maayo pa mao ang balaod sa ikapulo. Adunay daghang mga tawo kinsa nagtuo sa ebanghelyo ug tingali modawat niini, gawas lamang sa kamatuoran nga sila sama sa batan-ong lalaki nga atong mabasa diha sa Kasulatan, dihang ang Manluluwas misugo kaniya, human nga ang batan-ong lalaki namahayag nga “kanang tanan ako nang ginabantayan, ” sa pagbaligya sa unsay anaa kaniya ug sa paghatag ngadto sa mga kabus [tan-awa sa Mateo 19:16–22]. Daghang mga tawo dili makalahutay sa ebanghelyo tungod sa pinansyal nga mga gikinahanglan nga ilang himoon, ug sila mitugot sa mga butang niining kalibutana, diin ilang gikuptan sa lig-on ug makanunayon nga paagi, sa pagkuha gikan kanila sa labing mahinungdanon sa tanang mga gasa sa Dios, nga mao, ang kinabuhing dayon. Akong girekomendar ang balaod sa ikapulo ngadto sa mga Santos sa Ulahing mga Adlaw.⁹

Ang balaod sa pinansyal nga pag-uswag alang sa mga Santos sa Ulahing mga Adlaw, ubos sa pakigsaad uban sa Dios, mao nga mamahimong usa ka matinuoron nga tigbayad og ikapulo, ug dili mangawat sa Ginoo diha sa mga ikapulo ug mga halad [tan-awa sa Malaquias 3:8]. Ang pag-uswag moabut niadtong kinsa nagtuman sa balaod sa ikapulo. Kon moingon ko nga pag-uswag wala ko maghunahuna niini kabahin lamang sa kwarta…. Apan unsay akong giisip nga tinuod nga pag-uswag, ingon nga ang usa ka butang diha sa uban nga adunay dakong bili ngadto sa matag lalaki ug babaye nga buhi, mao ang paglambo diha sa usa ka kahibalo sa Dios, ug diha sa pagpamatuod, ug diha sa gahum sa pagtuman sa ebanghelyo ug sa pagdasig sa atong mga pamilya sa pagbuhat sa sama. Mao kana ang pag-uswag sa labing tinuod nga matang.¹⁰

Ako lig-on nga magtutuo nga ang hugot nga pagtuo nga walay binuhatan patay, ug ako lig-on nga magtutuo nga ang Ginoo motuman sa unsay Iyang gisulti dihang Siya misaad sa pag-abli sa mga bintana sa kalangitan ug mobu-bu og panalangin ngari kanato kon mobayad kita sa atong ikapulo [tan-awa sa Malaquias 3:10].¹¹

Ako nagtuo nga ang mga tawo napanalanginan angay sa ilang pagka manggihatagon. Wala ko moingon nga sila kanunay nga makakwarta, tingali, kay sa laing tawo. Apan kabahin sa paglambo sa hugot nga pagtuo ug sa pagpamatuod ug sa kahibalo sa kabalaan sa buhat nga diin kita nahiapil, ang mga tawo nga matinuoron ngadto sa Ginoo diha sa pagbayad sa ilang ikapulo mouswag ingon nga ang mga tawo dili gayud mouswag kinsa dili matinuoron. Walay duhaduha sa akong hunahuna. Dugang pa, buang gyud ko nga motuo nga ang Ginoo mopalambo niadtong kinsa nagbayad sa ilang ikapulo ug nga sila mas mauswagon, sa kasagaran, kay sa mga tawo kinsa wala mobayad. Ako nagtuo nga niadtong kinsa manggihatagon [sa ilang mga donasyon] ang Ginoo mohatag og mga ideya, ug sila molambo diha sa kapasidad ug abilidad nga mas paspas kay niadtong kinsa hakog. Ako aduna niana nga hugot nga pagtuo, ug anaa na kana kanako gikan pa sa gamay pa ko.¹²

Kon kita mohatag sumala sa atong kinitaan, kon kita mobayad sa atong ikapulo, bisan unsa pa ka gamay ang kita, … ang Dios nga atong Langitnong Amahan mopadako sa nahabiling siyam ka mga dolyar sa napulo, o sa nahabiling kwarentay singko sentimos sa matag singkwenta ug kamo makadawat og igong kaalam sa paggamit niini sa kaayohan aron walay mawala kaninyo diha sa pagka matinuoron.¹³

Ang mahinungdanong basihanan sa kalampusan dinhi sa kalibutan mao ang abilidad sa mga tawo sa pagpangita og kwarta. Apan gusto ko nga mosulti kaninyo mga Santos sa Ulahing mga Adlaw nga ang pagbuhat niini dili tinuod nga kalampusan. Samtang ang tawo nagtubo ug nagkadako diha sa mga butang niining kalibutan, kon siya dili mabinantayon, mawala kaniya ang Espiritu sa Ginoo, ug iyang ipahiluna ang iyang kasingkasing diha sa mga butang niining kalibutana. Ug kon mawala kaniya ang Espiritu sa Ginoo, ug mapakyas nga mahimong matinuoron ngadto sa Dios diha sa pagbayad sa iyang mga ikapulo ingon ka hingpit ug ka matinuoron sama sa iyang pagsubay ngadto sa usa ka kasosyo kon siya anaa sa negosyo, nga kanang tawhana mopahuyang sa iyang kalig-on, mopahuyang sa iyang gahum, mopahuyang sa pagpamatuod sa Espiritu sa Dios sulod sa iyang kalag. Walay duhaduha niana sa akong hunahuna.

Kinahanglan kita nga magmatinuoron ngadto sa Ginoo. Ang dakong problema mao nga adunay daghang mga tawo kinsa, samtang naglambo sila ug nagdako diha sa mga butang niining kalibutana, mibutang sa ilang mga kasingkasing ngadto niini ug nawad-an sa Epiritu sa Ginoo. Busa, kanang giisip sa kalibutan nga kalampusan usa ka kapakyasan; tungod kay kon ang tawo magsugod sa pagtinguha alang sa usa ka premyo ug napakyas siya sa pagkab-ot niini human nga naghago hapit sa tibuok niyang kinabuhi alang niana nga premyo, sa pagkatinuod ang iyang kinabuhi usa ka kapakyasan. Nakaila ko og daghang mga tawo kinsa, dihang nakakwarta sila og gamay, hingpit nga nagmatinuoron ngadto sa Ginoo, ug mibayad sa ikanapulong bahin niini. Apan dihang nakakwarta na og dako mibayad lamang sila sugod og balik sa usa ka porsyento, imbis nga dies, ngadto na sa dos o tres porsyento. Unsa may nahitabo? Ngano man, ang kahinam alang sa kwarta magtubo diha sa tawo, magkadako ug magkalig-on gawas kon siya mabinantayon, sama ra usab sa kahinam alang sa bino. Kini mao nay magdumala kaniya, ug iyang gihigugma ang kwarta imbis nga maghigugma lamang niini alang sa kaayohan nga iyang mahimo niini. Wala niya matimbangtimbang og maayo ang bili sa mga butang.¹⁴

Ang ikapulo usa ka balaod sa Dios ug ang pagbayad sa mga ikapulo makadala og kalinaw ug hingpit nga kalipay ngadto sa Santos sa Ulahing mga Adlaw kinsa nagbuhat niini. Adunay katagbawan nga moabut nganha sa kasingkasing sa tawo kinsa hingpit nga matinuoron ngadto sa Ginoo, sa pag-amot sa iyang tanang mahimo ngadto sa pagtukod sa Simbahan ni Kristo, ug ngadto sa kasingkasing sa matag matinuoron, hingpit nga magbabayad sa ikapulo. Matag panalangin nga inyo ug akong natagamtam nagagikan sa Dios. Kita anaa ubos sa mga obligasyon ngadto Kaniya alang sa gininhawa sa kinabuhi, ug Siya naghatag kanato sa tanan nga ania kanato. Siya nagsugo kanato sa pagpakita sa atong pasalamat ug ilhon ang Iyang kaayo, pinaagi sa pagbalik ngadto sa Simbahan alang sa kaayohan niini ug alang sa pagpakaylap sa ebanghelyo sa sulod ug gawas sa nasud, sa ikanapulo nga bahin nianang atong nadawat, diin tanan nagagikan Kaniya.

Usab ako moingon nga dili nako masabtan ngano nga bisan kinsa nga tawo nga hingpit nga matinuoron sa iyang mga binuhatan ngadto sa iyang mga isigkatawo ug wala maghunahuna sa pagbaliwala sa iyang bayranan sa tindahan kon iya kining mabayran, makahimo nga mobaliwala sa iyang mga obligasyon ngadto sa Dios….

Ako manawagan ngadto sa mga Santos sa Ulahing mga Adlaw nga magmatinuoron ngadto sa Ginoo ug ako mosaad nila nianang kalinaw, kauswagan, ug kalampusan sa panalapi modangat ngadto niadtong kinsa matinuoron sa atong Langitnong Amahan, tungod kay sila nagtuman sa balaod ug sa usa ka obligasyon. Siya mopanalangin kanila sa pagbuhat sa ingon. Ug ang hingpit nga pagkamatinuoron ngadto sa Ginoo mao ang labing nindot nga paagi sa pagtudlo sa inyong mga anak sa hugot nga pagtuo diha sa ebanghelyo ni Jesukristo. Kon atong ibutang ang atong mga kasingkasing diha sa mga butang niining kalibutana ug mapakyas nga mahimong hingpit nga matinuoron ngadto sa Ginoo, dili kita molambo diha sa kahayag ug gahum ug kalig-on sa ebanghelyo ingon nga angayan unta natong buhaton.¹⁵

Nagpasalamat ako sa Dios alang sa pribilehiyo nga makabayad sa ikapulo. Ako nagmaya sa pagbaton sa kahigayunan nga makapakita sa akong pasalamat ngadto sa akong Langitnong Amahan alang sa Iyang mga kalooy ngari kanako.¹⁶

Kinahanglan kita nga magmahinatagon diha sa paggamit sa atong mga panalangin sa panalapi aron sa pagtabang sa pagtukod sa gingharian sa Dios dinhi sa yuta.

Laing butang nga gusto natong makat-unan isip mga Santos sa Ulahing mga Adlaw––ug nagkugi ako nga makakat-on niini––mao ang … pagpugong sa atong mga kaugalingon nganha lamang sa mga gikinahanglan sa kinabuhi, ug dili magbaton og mga kinaiya sa pag-usik-usik. Kon kita adunay sobra, gamita kini sa unsay gitinguha sa Dios nga atong angayang gamitan niini––alang sa padayong pag-uswag sa Iyang Gingharian ug sa pagpakaylap sa Ebanghelyo….

Kutob sa unsa ang may kalabutan sa atong gipanag-iya kini wala gayuy bili alang kanato, gawas lamang kon kita andam ug matugtanon sa paggamit niini alang sa pag-uswag sa Gingharian sa Dios. Atong katungdanan ang pagsangkap alang sa atong mga pamilya; apan dili kini atong katungdanan nga magpuyo diha sa pag-usik-usik. Dili kini atong katungdanan ang pagtrabaho aron makabaton og kabtangan alang sa pagdayan-dayan sa atong pagkatawo….

Sa higayon nga kita makakat-on nga mahimong matugtanon sa paggamit sa mga butang nga gihatag sa Dios kanato alang sa padayon nga pag-uswag sa Iyang Gingharian, ang mga Santos sa Ulahing mga Adlaw dili makabaton og daghang kalisud sa panalapi; ang Ginoo mopanalangin kanila og daghan. Unsay angayan natong buhaton mao ang pagpangita sa kahayag ug pagdasig sa Iyang Espiritu aron sa paggiya kanato sa tanang higayon, ug Siya modugang sa uban pang mga butang nga gikinahanglan ngari kanato.¹⁷

Ang Ginoo naghigugma sa malipayong maghahatag. Walay tawo nga nagpakabuhi dinhi sa yuta ang makahatag og mga donasyon alang sa mga kabus, makahatag alang sa pagtukod og mga balay-tigumanan ug mga templo, … makagamit sa iyang kwarta ug makapadala sa iyang mga anak nga mga lalaki ug mga babaye aron sa pagsangyaw niini nga ebanghelyo, nga dili mokuha sa pagkahakog gikan sa iyang kalag, dili igsapayan kon unsa siya ka hakog dihang nagsugod pa siya. Kana mao ang usa sa labing nindot nga mga butang sa tibuok kalibutan alang sa mga tawo––nga moabut niana nga punto diin ang pagkahakog diha sa ilang kinaiya nabuntog. Kon kini makuha gikan sa ilang kinaiya, sila malipayon ug madasigon ug andam ug nagpangita sa kahigayunan sa pagbuhat og matarung uban sa mga butang nga gihatag sa Ginoo diha sa ilang mga kamot, imbis nga maningkamot sa pagbaton og mas daghan pa niini.¹⁸

Ang mga kwarta dili mga panalangin gikan sa Dios. Gawas lamang kon mapanalanginan kita sa salabutan, sa kaalam, ug sa Espiritu sa Dios sa paggamit niini sa maalamon ug husto nga paagi, ug sa pag-uswag sa gingharian sa Dios dinhi sa yuta nga ang kwarta maingon nga panalangin. Kon kita mapanalanginan sa ka buhong sa mga butang niining kalibutana ug kini mobuta kanato … dayon imbis nga mahimong usa ka panalangin gikan sa Dios kini [moabut] gikan sa dautan.¹⁹

Ang natural nga kinaiya sa tawo, sama sa kanunay nakong gipamulong, mao ang mamahimong hakog, ngil-ad, ug maakopakopon; ang paghunahuna sa kaugalingon, ug sa kaugalingon lamang, ug pagplano alang sa personal nga pag-uswag. Apan ang tanang mga pagtulun-an sa Ebanghelyo mao ang saktong katugbang niini. Atong makita nga ang mga gikinahanglan nga gipabuhat nato sa pagbayad og mga ikapulo ug mga donasyon sa pagpuasa … ug sa pag-amot sa atong mga katigayunan aron madala ang Ebanghelyo ngadto sa kanasuran sa yuta––kini nga mga gikinahanglan mopagawas gikan sa kasingkasing sa tawo sa matag hakog ug ngil-ad nga kinaiya. Imbis nga mahimong hakog, ang matinud-anon nga Santos sa Ulahing mga Adlaw mapuno sa gugma sa Ebanghelyo, mapuno sa tinguha sa pag-amot sa panahon ug mga butang alang sa padayon nga pag-uswag sa gingharian sa Dios. Ang Ebanghelyo, kon kita matinud-anon ngadto sa mga gikinahanglan nga atong buhaton sa pinansyal nga paagi, mokuha sa hakog, ngil-ad nga tawo, ug mohimo kaniya nga usa ka manggihatagon, dungganan, maayo nga tawo…. Ang Ebanghelyo mopuno kanato sa tinguha sa pagbiya sa mga butang sa kalibutan, kon gikinahanglang buhaton, sa pag-adto sa kinatumyan sa yuta, nga walay bisan usa ka dolyar nga ganti, alang sa kaayohan ug kaluwasan sa atong mga isigkatawo.²⁰

Mga Sugyot alang sa Pagtuon ug Panaghisgutan

Sa unsa nga mga paagi nga ang utang usa ka pag-ulipon? Unsa nga mga panalangin ang atong madawat kon mopuyo kita sigun sa atong kinitaan? Unsa nga mga butang nga makatabang nato aron makalingkawas sa utang o malikayan ang utang?
Sa unsang mga paagi nga kita napanalanginan sa pinansyal ug espirituhanong paagi kon mosunod kita sa balaod sa ikapulo? Unsaon sa mga ginikanan sa pagtudlo sa ilang mga anak sa mga baruganan sa mga ikapulo ug mga halad?
Nganong importante man nga mahimong matinuoron ngadto sa Ginoo ug mao usab ngadto sa atong mga isigkatawo? Sa unsa nga paagi nga panalangin alang sa mga anak ang makabaton og mga ginikanan kinsa hingpit nga matinuoron ngadto sa Ginoo?
Ngano nga ang kalibutanong kalampusan makapahimo man kanato nga mawad-an sa Espiritu sa Ginoo? Unsay atong mabuhat aron mapabilin ang kalampusan sa panalapi sa hustong lugar?
Unsa nga mga responsibilidad ang anaa kanato kon ang Dios mohatag kanato og materyal nga mga panalangin? Unsa nga mga kinaiya ang mahimong mopugong kanato gikan sa pagtuman niini nga mga responsibilidad?
Unsay mahimo sa kwarta, kon mabutang lang sa hustong lugar, nga makapahimo kanato sa pagbuhat?

couple managing finances — Ang mga bana ug mga asawa kinahanglan magtinabangay sa pagdumala sa ilang kinitaan. Si Presidente Heber J. Grant miingon, “Kon aduna may usa ka butang nga makadala og kalinaw ug katagbawan ngadto sa kasingkasing sa tawo, ug ngadto sa pamilya, kini mao ang pagpuyo sigun sa atong kinitaan.”