Kapitulo 9

Ang Hingpit nga Kalipay sa Misyonaryo nga Buhat

Kita adunay dakong kaakohan sa pagsangyaw sa ebanghelyo ni Jesukristo. Ang katumanan niini nga katungdanan makahatag og hingpit nga kalipay ug kalinaw sa atong mga kasingkasing.

Gikan sa Kinabuhi ni Heber J. Grant

Si Presidente Heber J. Grant misalmot sa misyonaryo nga buhat sa tibuok panahon sa iyang pagkahamtong, mipaambit sa ebanghelyo ngadto sa mga sakop sa pamilya, mga higala, ug mga kauban sa negosyo. Ang iyang unang kahigayunan sa pag-alagad og full-time nga misyon miabut niadtong 1901, sa dihang gitawag siya sa pagdumala sa unang misyon sa Japan.

Si Presidente Grant mibuhat sa iyang tawag ngadto sa Japan nga malaumon ug madasigon. Siya misulat: “Ako adunay malungtaron nga pagtuo nga kini mamahimong usa sa labing malampuson nga mga misyon nga sukad gipasiugdahan sa Simbahan. Magsugod ang gimbuhaton sa hinayhinay apan ang ting-ani magmabungahon kaayo ug makapahingangha sa kalibutan sa mga katuigan nga moabut.”¹

Kuyog sa laing tulo ka mga misyonaryo, si Presidente Heber J. Grant mipahinungod sa Japan alang sa pagsangyaw sa ebanghelyo niadtong Agosto 1901 ug dayon makugihong mitrabaho sa tinuod gayud nga “hinay nga gimbuhaton.” Dihang si Presidente Grant napaluwat gikan sa iyang balaang tawag niadtong Septyembre 1903, nakabunyag lang siya og duha ka tawo. Atol sa kinatibuk-ang komperensya niadtong Oktubre 1903, siya mihatag niini nga taho:

“Akong gikasubo nga dili ako makasulti kaninyo nga nakahimo kami og maanindot nga butang didto sa Japan. Mopranka lang gayud ako kaninyo, akong gidawat nga sa tinuoray gamay ra kaayo ako og nahimo, isip presidente niana nga misyon; ug gamay ra gayud tinuod ang nahimo—kon hisgutan ang mahitungod sa pagpangabig—pinaagi sa mga Elder nga gipadala didto, ug sa mga sister nga uban kanako. Sa samang higayon, ako adunay kasigurohan sa akong kasingkasing nga aduna pay moabut nga dako ug mahinungdanon nga buluhaton nga mahimo niana nga yuta. Ang mga lumulupyo maanindot kaayo nga mga tawo.”²

Baynte uno ka tuig ang milabay, gisira nila ni Presidente Grant ug sa iyang mga magtatambag sa Unang Kapangulohan ang misyon, ang labing dakong hinungdan mao ang “hapit walay kapuslanan nga resulta sa mga paningkamot sa mga misyonaryo” didto.³ Ang misyon giablihan pag-usab niadtong 1948.

Niadtong 18 sa Mayo 1996, 48 ka mga tuig gikan sa pag-abli pag-usab sa misyon, si Presidente Gordon B. Hinckley mibisita sa Japan ug namulong ngadto sa kapundokan nga nanagbarog tungod sa kadaghan atol sa usa ka fireside. Nianang panahona, ang Japan aduna nay templo, ug ang gidaghanon sa mga sakop sa Simbahan didto mikabat na og labaw sa 100, 000 ka mga sakop sulod sa 25 ka mga stakes ug 9 ka mga misyon. Si Presidente Hinckley nahinumdom sa pagsugod sa gimbuhaton sa Japan ug miingon: “Kon si Presidente Grant ania pa unta dinhi karon, makahilak siya sa pagpasalamat, ug mao kana ang akong gibati samtang ako nagsud-ong sa inyong mga panagway…. Akong nakita kana nga kalig-on nga wala gayud nako palangdonga niini nga yuta.”⁴

Mga Pagtulun-an ni Heber J. Grant

Atong katungdanan ug kahigayunan ang pagpaambit sa ebanghelyo.

Gusto nakong ipasabut pag-ayo nga kita isip katawhan adunay labing dako nga buluhaton, ug kana mao ang pagpahimangno sa kalibutan sa paghinulsol sa sala, sa pagduol sa Dios. Ug atong katungdanan labaw sa tanan ang pagpadayon ug pagsangyaw sa ebanghelyo ni Ginoong Jesukristo, ang pagpahiuli pag-usab dinhi sa kalibutan sa plano sa kinabuhi ug sa kaluwasan. Mga hangyo nangabot gikan sa tibuok kalibutan alang sa dugang nga mga misyonaryo. Ang mga Santos sa Ulahing mga Adlaw kinahanglan nga mopahiluna sa ilang mga kalihokan, ug mopahigayon sa ilang mga panalapi, sa paagi nga madugangan ang mamahimong andam ug mauyonon, ilabi na niadtong may pangidaron ug kasinatian, nga adunay pagpamatuod ug kahibalo sa kabalaan niini nga buhat, sa pag-adto [ngadto] sa mga misyon…. Ania kanato sa tinuoray ang perlas nga labing bililhon. Ania kanato kana nga mas bililhon pa kay sa tanang bahandi ug sa mga siyentipikong kasayuran nga gihuptan sa kalibutan. Ania kanato ang plano sa kinabuhi ug sa kaluwasan. Ang unang pinakadako nga sugo mao ang paghigugma sa Ginoo nga atong Dios sa tibuok natong kasingkasing, gahum, salabutan ug kusog; ug ang ikaduha susama ra, ang paghigugma sa atong silingan sama sa atong mga kaugalingon [tan-awa sa Mateo 22:37–39]. Ug ang labing maayo nga paagi dinhi sa kalibutan sa pagpakita sa atong gugma sa atong silingan mao ang paglakaw ug pagsangyaw sa ebanghelyo ni Ginoong Jesukristo.⁵

Ang pagluwas sa mga kalag, lakip na sa atong kaugalingong kalag, maoy usa ka mahinungdanong buluhaton nga labing bililhon sa tanan, ug nga modala kanato sa mga panalangin sa atong Amahan ug sa maayong kabubut-on sa atong Ginoo ug Magtutudlo, si Jesukristo.⁶

Kini mao ang misyon nga gisangon ngari kanato, ang pagpasidaan sa mga kanasuran sa umaabot nga paghusga, ang pagsangyaw sa Ebanghelyo sa Manunubos, … ug ang pagdapit sa tanan sa pagduol kang Kristo ug pagdawat sa tanang mga benepisyo sa Iyang mahimayaon nga pag-ula. “Ang Mormonismo, ” sigon sa nailhan, ania sa kalibutan alang sa kaayohan sa kalibutan. Ang sistema niini sa misyonaryo walay laing katuyoan gawas sa pagpanalangin ug pagbenepisyo. Kini wala makigbangi sa mga tinuohan ug mga sekta sa atong panahon. Kini nagtimaan sa kalinaw, ang kalinaw sa Dios “nga molabaw sa tanang pagpanabot.” [Tan-awa sa Mga Taga-Filipos 4:7.] Kini kanunay nga andam sa pagbuhat og maayo sa tanang posible nga pamaagi. Kini naghangyo sa pagbalik ngadto sa hugot nga pagtuo “nga sa makausa gitugyan ngadto sa mga Santos, ” [tan-awa sa Judas 1:3] nagatuo nga ang maong buhat makaluwas sa katawhan gikan sa mga kasal-anan sa kalibutan ug sa katapusan mohimaya sa mga tawo sa presensya sa Dios, ang Amahan, ug ni Jesukristo, ang Anak, “Kinsa mao ang Kahayag ug Kinabuhi sa Kalibutan.” [D&P 10:70.]⁷

Nasayud kita nga ang una ug ang labing mahinungdanon nato nga katungdanan mao ang paghigugma sa Ginoo nga atong Dios sa tibuok natong kasingkasing, gahum, salabutan ug kusog, ug ang ikaduha niana mao ang paghigugma sa atong isig katawo. Walay katawhan sa tanang kalibutan timbang sa ilang gidaghanon, nga nagpakita og timailhan sa gugma alang sa ilang isig katawo, ug sa tinguha alang sa ilang kaayohan, sama sa mga Santos sa Ulahing mga Adlaw. Ang atong misyonaryo nga buhat nagpahayag ngadto sa tibuok kalibutan sa atong kaandam sa pagsagubang sa pinansyal nga sakripisyo ug sa pagtrabaho nga dili magpaabot og kalibutanon nga ganti, alang sa kaluwasan sa mga kalag sa mga anak sa atong Amahan sa langit.⁸

Ang matag batan-on nga lalaki kinahanglan … nga magbaton og ambisyon nga mamahimong takus sa iyang kaugalingon alang sa pagbuhat sa tanan niya nga abilidad, aron siya molampus sa tanang posible niya nga mahimo sa lig-on nga pagpabarog sa sumbanan sa kamatuoran ibabaw sa yuta.⁹

Ang mga tawo moingon: “Dili namo masabtan ang kalig-on sa ‘Mormonismo, ’ dili namo masabtan ngano nga ang [liboan ka] batan-ong mga lalaki ug batan-ong mga babaye sa usa ka higayon, sa ilang kaugalingong gasto o sa gasto sa ilang mga pamilya, molakaw ngadto sa kalibutan, nga mohatag sa ilang panahon nga walay salapi ug walay kantidad, aron sa pagsangyaw sa ebanghelyo, nawad-an sa ilang mga kinitaan, naggasto sa ilang mga kaugalingon, sa pagsangyaw sa inyong pagtuo.” Ang matag Santos sa Ulahing mga Adlaw makasabot niini. Sila nakasabot niini tungod kay kadtong batan-ong mga lalaki ug batan-ong mga babaye nga nanglakaw aron sa pagsangyaw sa ebanghelyo, nagsunod niini, sila sa tinuoray nagtuman sa mga kinahanglanon nga gipahiluna sa Manluluwas “sa paghigugma sa Ginoo nga atong Dios sa tanan natong kasingkasing, salabutan, gahum ug kusog, ” ug sa sunod nga kinadak-ang sugo, “sa paghigugma sa atong silingan sama sa atong mga kaugalingon.”¹⁰

Kinahanglan atong hinumduman nga ang Ginoo nagsulti kanato nga atong katungdanan ang pagpasidaan sa atong mga silingan ug ang pagsangyaw sa Ebanghelyo—kana nga katungdanan anaa kanatong tanan—kinahanglan mga misyonaryo kita….

Kinahanglan makaamgo kita nga kini nga buluhaton alang sa matag usa ug alang kanatong tanan, ug atong buhaton sa tanan nato nga gahum ang pagpauswag niini.¹¹

Ang misyonaryo nga buhat makahatag og tim-us nga kalipay sa tawhanong kasingkasing.

Ako nagtuo nga ang matag Santos sa Ulahing mga Adlaw nga nakadawat og pagpamatuod sa kabalaan sa buhat nga atong giapilan [adunay] susamang pagbati nga gibatonan ni Alma—tinguha nga ang tibuok kalibutan unta makadungog sa pagpamatuod sa ebanghelyo ni Ginoong Jesukristo [tan-awa sa Alma 29:1–9]. Sa panahon nga ang mga kalalakin-an ug kababayenhan makadawat og pagpamatuod sa kabalaanon sa misyon ni Joseph Smith, sila matinguhaon nga ang tibuok kalibutan makaangkon og susama nga kahibalo ug pagtuo. Sila matinguhaon nga ang ebanghelyo moabut ngadto sa matag matinuoron nga kalag. Ug walay laing buluhaton sa tibuok kalibutan nga makadala ngadto sa tawhanong kasingkasing, sumala sa akong kaugalingong kasinatian, og dugang nga kalipay, kalinaw ug kahilum kay sa pagsangyaw sa ebanghelyo ni Ginoong Jesukristo.¹²

Walay laing bahin sa buluhaton sa Dios dinhi sa yuta karong panahona nga aduna niana nga pundok sa malipayon, kontento, malinawon nga mga katawhan sama niadtong nagabuhat sa misyonaryo nga pagpangalagad. Ang serbisyo mao ang tinuod nga yawe sa kalipay. Kon ang usa ka tawo naghatag og serbisyo alang sa kauswagan sa tawo, kon ang tawo nagtrabaho nga walay salapi ug walay kantidad, nga wala maglaum sa kalibutanon nga ganti, moabut ang tinuod, tim-us nga kalipay diha sa tawhanong kasingkasing.¹³

Kon kinahanglan, ang matag alagad sa Dios nga adunay kahibalo sa Ebanghelyo, kinahanglan nga andam nga mohatag sa iyang kinabuhi niini nga kawsa, nga sa pagkatinuod mao ang buluhaton sa Magtutudlo, ang plano sa kinabuhi ug kaluwasan, ang Ebanghelyo sa atong Ginoo ug Manluluwas, si Jesukristo. Sa panahon nga kita hingpit nga makaamgo sa kamatuoran nga sa tinuoray ania kanato ang Perlas nga Labing Bililhon, nga ang Ebanghelyo nga kinahanglan atong ihatag sa mga tawo sa kalibutan nangahulugan og kinabuhing dayon alang niadtong modawat ug matinud-anon nga mosunod niini; sa higayon nga kita makaamgo niini, ug kon kita mogahin og panahon sa pagpamalandong sa pagpadayag nga gihatag ngadto ni Propeta Joseph Smith ug ni Oliver Cowdery, diin ang Ginoo nag-ingon: “Ug kon kini mahimo nga ikaw manlimbasog sa tanan nimo nga mga adlaw sa pagsangyaw og paghinulsol ngadto niini nga mga katawhan, ug magdala, bisan usa ka kalag ngari kanako, unsa ka dako ang imong hingpit nga kalipay uban kaniya diha sa gingharian sa akong Amahan! Ug karon, kon ang imong hingpit nga kalipay dako tungod sa usa ka kalag nga imong gidala ngari kanako, unsa kaha kadako ang imong hingpit nga kalipay kon ikaw makadala og daghan nga mga kalag ngari kanako” [D&P 18:15–16]; dayon ikaw magsugod sa pagkaamgo ug pagtugkad ug pagsabut sa gidak-on niini nga buluhaton.¹⁴

Naluoy ako sa lalaki o babaye kinsa wala gayud makasinati sa tam-is nga kalipay nga bation sa misyonaryo nga nagsangyaw sa ebanghelyo ni Jesukristo, kinsa nagdala sa matinud-anon nga mga kalag ngadto sa kahibalo sa kamatuoran, ug kinsa nakadungog sa utang kabubut-on ug pagpasalamat nga nagagikan sa mga kasingkasing niadtong nadala pinaagi sa iyang paningkamot ngadto sa pagsabut sa kinabuhing dayon. Ug usab ako naluoy niadtong wala gayud makasinati sa tam-is nga kalipay nga nagagikan sa pagtunol sa ilang mga kamot ug pagtabang niadtong mga nanginahanglan. Sigurado gayud nga mas daghan ang panalangin nga moabut kanato tungod sa pagpanghatag kay sa pagtigum; wala akoy duda niana sa akong hunahuna. Usab adunay dugang nga panalangin [nga] moabut kanato sa pagpadayon sa pagsangyaw sa ebanghelyo ni Jesukristo, ug pagpanglimbasug alang sa kalu wasan sa mga kalag sa mga tawo, kay sa posibling moabut kanato pinaagi sa pagkat-on lamang sa kamatuoran sa atong relihiyon, ug dayon magpabilin sa atong dapit aron makigsandurot ug mobuhat sa kasagaran nga mga kalihokan sa kinabuhi, ug magtigum sa bahandi niini nga kalibutan nga mahanaw kon gamiton na. Usa sa dakong problema mao nga kita sa kasagaran mabutaan kon unsa gayud ang labing bililhon nga panglimbasug nga atong himoon, ang panglimbasug nga makapahimuot kaayo sa mata sa atong Langitnong Amahan.¹⁵

Pinaagi lamang sa gahum sa Espiritu nga kita makasangyaw sa ebanghelyo ug makatabang sa bag-ong mga kinabig sa pag-alima sa ilang mga pagpamatuod.

Gusto ko kamong sultihan nga kadtong tanan nga mga misyonaryo nga nanglakaw aron sa pagsangyaw sa ebanghelyo … nakadawat sa pagpandong sa mga kamot diha sa ilang mga ulo, sa mga kamot sa mga tinugyanan nga mga sulugoon sa Dios, mga tawo nga naghupot sa iyang katungod; ug sa tanang dapit sa halapad nga kalibutan, sa tibuok kayutaan ug sa tanang rehiyon, gikan sa nasud sa amihanan diin makita ang adlaw sa tungang gabii ngadto sa Habagatang Africa, bisan asang dapita sila miadto, ang espiritu sa buhi nga Dios nagauban kanila. Gikan sa tibuok kayutaan ug gikan sa tanang rehiyon ang mga lalaki ug mga babaye nakadawat og pagsaksi sa Espiritu Santo, ug midawat sa ebanghelyo.¹⁶

Miadto ko sa Grantsville, ang pinakadako nga ward sa stake sa Zion sa Tooele, ug ako nangamuyo sa Ginoo sa susama nga pagbati ni Oliver Cowdery sa dihang misulti siya sa Ginoo, “Gusto ko nga mohubad, ” ug ang Ginoo miingon ngadto kaniya nga mahimo siyang mohubad. Apan, napakyas, sa kaulahian siya gisultihan, nga siya wala magtuon niini sa iyang hunahuna, ug siya wala mag-ampo mahitungod niini, ug siya wala mohimo sa iyang bahin [tan-awa sa D&P 9:7–8].… Ako mibarug ug namulong sulod sa lima ka minutos, ug gisingot ako pag-ayo, sa akong paminaw, maora kog gikan nga gitugsaw sa sapa, ug ako nahutdan gayud sa tanang ideya. Nakahimo ako sa hingpit nga “kapakyasan”, maingon nato, sa akong pakigpulong, nga mahimo sa tawo….

Ako [pagkataudtaud] milakaw og pipila ka milya palayo niana nga balay tigumanan, ngadto sa mga kaumahan, taliwala sa nagtipun- og nga dagami ug kumpay, ug sa dihang miabut na ako sa igong gilay-on, aron makasiguro nga walay tawo nga makakita kanako, miluhod ako sa luyo sa usa niadtong mga pundok ug mipaagas og luha sa pagpaubos. Akong gihangyo ang Dios sa pagpasaylo kanako sa paghikalimot nga ang katawhan dili mahimong mosangyaw sa ebanghelyo ni Ginoong Jesukristo uban sa gahum, impluwensya, ug sa inspirasyon gawas lang kon sila panalanginan sa gahum nga nagagikan sa Dios; ug ako siyang gisultihan didto, isip usa ka batang lalaki, nga kon iya akong pasayloon sa akong garbo, kon iya akong pasayloon sa paghunahuna nga bisan wala ang Espiritu si bisan kinsang tawo makahimo sa pagsangyaw sa kamatuoran ug makakaplag og mga kasingkasing nga andam modawat niini, hangtud sa adlaw sa akong kamatayon akong paninguhaon ang paghinumdom kon asa magagikan ang inspirasyon, sa panahon nga kita magsangyaw sa ebanghelyo ni Ginoong Jesukristo, ang plano sa kinabuhi ug kaluwasan nga sa makausa pa gipadayag dinhi sa kalibutan.

Ako mapasalamaton nga mosulti nga sulod sa kwarenta ka mga tuig nga nangagi sukad niadtong panahona, wala gayud ako mapaulawi sama sa akong kaulawan niadtong adlawa; ug ngano? Tungod kay wala gayud ako, salamat sa Ginoo, mobarug nga naghunahuna nga ang usa ka tawo mahimong makatandog sa mga kasingkasing sa iyang mga tigpaminaw … gawas lang kon kanang tawhana makabaton sa Espiritu sa buhing Dios, ug busa mahimong takus sa paghatag og pagsaksi nga kini mao ang kamatuoran nga kamo ug ako may kalabutan.¹⁷

“Kita nagtuo sa gasa sa mga pinulongan, ” ug sa pagpanghubad niini [tan-awa sa Mga Artikulo sa Hugot nga Pagtuo 1:7]. Si Karl G. Maeser—kinsa usa ka matinud-anon kaayo nga Santos sa Ulahing mga Adlaw—misugid kanako gikan mismo sa iyang ba-ba sa ingon niini nga insidente…. Siya miingon: “Brother Grant, niadtong gabii nga ako gibunyagan mihangad ako sa langit og miingon: ‘O, Dios, akong nakaplagan, sigon sa akong gituohan, ang ebanghelyo sa imong Anak nga si Jesukristo. Akong gipakita ang pagkamasulundon niini pinaagi sa pag-ubog ngadto sa mga tubig sa bunyag. Hatagi ako og panghimatuod, hatagi ako og tino nga pagsaksi gikan sa espiritu nga akong nakaplagan ang kamatuoran, ug akong isaad kanimo kon kinahanglanon ang akong kinabuhi alang sa pagpauswag niini nga katuyoan.’ ”

Niadtong panahona si Brother Franklin D. Richards [sa Korum sa Napulog Duha ka mga Apostoles] maoy presidente sa misyon sa Uropa, nga adunay punoang buhatan didto sa Liverpool. Miadto siya sa Alemanya aron motambong sa bunyag sa unang mga kinabig sa ebanghelyo nianang bantugan nga kagamhanan. Naglakaw gikan sa dapit diin siya gibunyagan padulong sa iyang balay, pipila ka mga milya ang gilay-on, si Brother Maeser nagpadayag og tinguha sa paghisgot mahitungod sa lainlaing mga baruganan sa ebanghelyo, pinaagi sa tabang sa usa ka tighubad. Kadto nga tighubad mao si Brother William Budge…. Si Brother Maeser, nga dili makasabut og Iningles, nangutana sa pinulongan nga Aleman, ug si Brother Richards, nga dili makasabut og Aleman, mitubag niini sa Iningles; si Brother Budge naghubad sa mga pangutana ug mga tubag. Human mapangutana ang pipila ka mga pangutana ug natubag pinaagi sa tighubad, si Brother Richards miingon: “Ayaw na hubara kanang mga pangutanaha, ako kining nasabtan;” dayon si Brother Maeser miingon: “Ayaw na og hubara kanang mga tubag, nakasabut ako niana.” Nag-istoryahanay sila samtang naglakaw og pipila ka kilometro, ang mga pangutana gisulti sa pinulongang Aleman, ang mga tubag Iningles; silang duha pulos dili makasabot sa ilang tagsa tagsa ka pinulongan. Miabut sila sa River Elbe ug samtang sila mitabok sa taytayan sila nagkalagyo; sa pag-abot nila sa pikas nga bahin si Brother Maeser nangutana og laing pangutana, ug si Brother Richards miingon: “Hubara kana, Brother Budge.” Dihang gihatag ang tubag, si Brother Maeser miingon: “Hubara kana.” Ang iyang sunod nga pangutana mao: “Unsa mang hitaboa, Apostol Richards, nga nagkasinabtanay man kita sa usag-usag, ug karon wala na man kita magkasabut?” Si Brother Richards misulti kaniya nga ang usa sa mga bunga sa ebanghelyo ni Jesukristo mao ang gasa sa mga pinulongan ug ang pagpanghubad. Dayon siya miingon: “Ang Dios mihatag kanimo ug kanako karong gabhiona sa kahigayunan sa pag-ambit sa usa sa mga bunga sa ebanghelyo pinaagi sa pagpanghubad sa mga pinu longan. Brother Maeser, ikaw nakadawat og pagpamatuod gikan sa Dios nga imong nakaplagan ang kamatuoran.”

Si Brother Maeser misulti kanako: “Nangurog ako nga maorag dahon, ug akong gihangad pag-usab ang akong mga mata ngadto sa langit ug miingon: ‘O, Dios, akong nadawat ang pagpamatuod nga akong gipangayo, ug akong isaad kanimo ang akong kinabuhi, kon gikinahanglan, alang niini nga kawsa.’ ”¹⁸

Mga Sugyot alang sa Pagtuon ug Panaghisgutan

Unsa ang mga panalangin nga moabut kanato kon kita mopaambit sa ebanghelyo ni Jesukristo? Unsa may inyong gibati samtang inyong nakita ang mga sakop sa pamilya ug mga kahigalaan nga midawat sa ebanghelyo?
Unsa ang gilauman sa Ginoo sa Iyang mga Santos sa pagpahigayon sa pagdala sa Iyang mensahe ngadto sa kalibutan? Unsaon man nato pag-ugmad ang pagtuo ug ang kaisug sa pagpaambit sa ebanghelyo?
Unsaon man nato paghan-ay ang atong mga prayoridad aron kita makaangkon og mga kahigayunan sa pagpaambit sa ebanghelyo? Sa unsa kahang paagiha nga ang mga kahigayunan sa pagka misyonaryo mausab sa lainlaing mga ang-ang sa atong kinabuhi?
Nganong imposible man ang pagsangyaw sa ebanghelyo kon wala ang gahum sa Espiritu Santo? Sa unsang mga paagi nga ang Espiritu mitabang kaninyo sa pagpaambit sa ebanghelyo?
Si Karl G. Maeser nakadawat og lig-on nga pagpamatuod sa iyang bag-ong nakaplagan nga pagpamatuod sa dihang siya ug si Elder Franklin D. Richards gihatagan og gasa sa pagpanghubad sa mga pinulongan. Unsa ang ubang mga gasa sa Espiritu ang mahimo natong pangitaon samtang kita maningkamot sa pagpalig-on sa atong mga pagpamatuod ug sa mga pagpamatuod sa uban? (Tan-awa sa D&P 46:8–26.)
Unsa ang gihimo nila ni Brother Maeser ug ni Elder Richards nga misangpot ngadto sa pagkumpirma sa pagpamatuod ni Brother Maeser? Unsaon man nato pagtabang ang bag-ong mga kinabig sa pag-alima sa ilang mga pagpamatuod?

missionaries in Japan — Wala ngadto sa tuo: Goro Takahashi, kinsa higala sa unang mga misyonaryo sa Japan, ug sila si Elder Louis A. Kelsch, Horace S. Ensign, Heber J. Grant, ug Alma O. Taylor. Si Elder Grant nag-alagad isip unang presidente sa misyon sa Japan gikan niadtong 12 sa Agosto 1901 ngadto sa 8 sa Septyembre 1903.