Kapitulo 3

Ang Paglakaw diha sa Dalan Padulong ngadto sa Kinabuhing Dayon

Samtang kita matinguhaon nga maningkamot sa pagsunod sa ebanghelyo ug sa pagsentro sa atong mga kinabuhi diha sa mga butang sa Dios, kita nagpabilin nga luwas diha sa dalan padulong ngadto sa kinabuhing dayon.

Gikan sa Kinabuhi ni Heber J. Grant

Diha sa iyang mga pamulong sa komperensya, ni Presidente Heber J. Grant kanunayng nagsubli sa pag-awhag sa mga Santos nga magpabilin diha sa higpit ug pig-ot nga dalan padulong sa kinabuhi nga dayon. Siya nagpasidaan kanila sa mga kakuyaw sa sayop nga pagpahimutang sa ilang mga prayoridad ug madani sa pagpahilayo sa mga butang nga adunay labing dako nga bili. “Atong malikayan nga makadawat sa mga panalangin sa Ginoo pinaagi sa pagsalig og maayo sa mga butang niining kalibutan, ” siya miingon. “Atong masakripisyo ang mga mahangturon nga mga bahandi—sama sa pagbaylo sa dolyar sa tumbaga nga mga sinsilyo.”¹

Aron sa paghisgut mahitungod sa kamahinungdanon sa pag-ila ug pagpangita sa mga butang nga may mahangturong bili, si Presidente Grant kanunayng miasoy sa usa ka igsoon nga babaye matinud-anon nga Santos sa Ulahing mga Adlaw kinsa nagtuo nga si Presidente Grant nagdala og “bati tan-awon” nga bag. Siya nangandoy nga adunay makahatag kang Presidente Grant og “usa ka disente, dalaygon nga bag.” Ang butang nga wala niya mahibaloi mao nga ang bag ni Presidente Grant mahalon kaayo ug nga kini hinatag sa iyang kauban nga negosyante isip timaan sa pagtahud. “Siya wala masayud sa bili niini, ” si Presidente Grant mipasabut. Agig pagtandi, sa tepo sa porpolyo nga iyang giisip nga may talagsaon nga bati og kalidad. Si Presidente Grant mipahisama sa maayong igsoon nga “nasayop sa pagbanabana sa bili sa mga butang” sa ingon nga paagi ang kalibutan napakyas sa pag-ila sa kamtuoran sa gipahiuli nga ebanghelyo. “Sila wala masayud sa kamatuoran, ” siya miingon. “Wala sila masayud sa bili sa ebanghelyo ni Jesukristo”²

“Si Presidente Grant mitudlo: “Unsa ang ebanghelyo? Mao kini ang plano sa kinabuhi ug sa kaluwasan. Mao kana ang may mas dako nga bili kay sa kinabuhi mismo. Dili ikahibulong nga kita andam ug uyon sa paghimog mga sakripisyo alang sa ebanghelyo, sa higayon nga kita makamatngon sa unsay kahulogan niini kon kita nagsunod niini.”³ Mao kini ang naggiya nga baruganan niining kinabuhi. Bisan pa man sa daghan niyang mga abilidad ug mga kaikag, wala niya tugoti ang mga ginagmayang hunahuna nga makalubog sa iyang panglantaw sa mga butang nga labing mahinungdanon. Pananglitan, sa iyang kaeksperto sa patigayon nga midala kaniya ngadto sa pagkainila sa daghang propesyonal nga mga paningkamot. Siya malingaw sa pagsalmot diha sa paugnat sa kusog, ilabi na sa tennis ug golf. Hilig siya sa teatro ug opera. Ganahan siyang magbasa, mapasalamaton sa kinaiyahan, ug malingaw sa pakigkukabildo. Aktibo siya sa politika. Siya nagbiyahe sa kasagaran kalabut sa iyang mga responsibilidad sa pamatigayon ug sa Simbahan, ug siya ug ang iyang pamilya mahinangop sa bagong mga dapit ug mga kasinatian. Isip resulta sa iyang kamatinuoron ug pag-alagad, siya nakadawat ug nagkadaiyang mga pahalipay. Apan ang iyang mga kalihokan, kabantugan, ug kalampusan wala makabalda kaniya sa dalan padulong sa kinabuhing dayon.

Ang iyang tambag mahitungod sa paglakaw diha sa higpit ug pig-ot nga dalan nga nagpadayon sa unahan klaro kaayo. Siya yanong nagtudlo sa mga Santos sa pagbuhat sa ilang mga katungdanan— sa paghupot sa mga kasugoan. Siya namahayag: “Ako moingon ngadto sa tanan nga mga Santos sa Ulahing mga Adlaw: sunda ang mga kasugoan sa Dios. Kana ang akong mahinungdanong pulong—kining pipila lamang ka mga pulong: sunda ang mga kasugoan sa Dios!.”⁴

Mga Pagtulun-an ni Heber J. Grant

Kon kita nahigugma sa Ginoo, ang dakong katuyoan sa atong mga kinabuhi mao ang pag-alagad Kaniya ug ang paghupot sa Iyang mga kasugoan.

Atong makita sa ika 22 nga kapitulo sa San Mateo ang mosunod:

“Apan sa pagkadungog sa mga Fariseo nga napahilum niya ang mga Saduceo, sila nanagtapok.

“Ug usa kanila, nga batid sa kasugoan, may gipangutana kaniya aron sa pagsulay kaniya, ug miingon, ”

“Magtutudlo, unsa man ang dakong sugo sa mga kasugoan?

“Si Jesus miingon kaniya, Higugmaa ang Dios sa tibuok mong kasingkasing, sa tibuok mong kalag, ug sa tibuok mong salabutan.

“Mao kana ang dako ug unang sugo.

“Uga ang ikaduha susama ra, nga mao kini, Higugmaa ang imong silingan nga sama sa imong igsoon.

“Niining duha ka mga sugo nagasukad ang tibuok nga kasugoan ug ang mga propeta.” [Mateo 22:34–40.]

Magkadugay ang akong pagsunod, magkadugang ang akong pagtuon sa ebanghelyo, magkadaghan ang akong kahigayonan sa pakigistorya sa katawhan, magkalig-on ang akong hunahuna sa kamatuoran sa pagsulti sa mga panultihon sa Manluluwas diha sa pulong nga bag-o ko lang gibasa diha kaninyo. Kon akong nabuhat nga mohigugma sa Ginoo nga atong Dios sa matag buhat sa tibuok kong kasingkasing, sa tibuok kong salabutan, sa tibuok kong kalag, dili na unta kinahanglan pa nga awhagon ang mga tawo sa matag karon ug unya sa kamahinungdanon sa paghupot sa kasugoan sa Ginoo. Ilang ikalipay ang pag-alagad sa Dios ug ang paghupot sa Iyang mga sugo. Kita gisultihan na nga kon hain gani ang imong bahandi, atua usab didto ang imong kasingkasing [Mateo 6:21], ug kon kita naghigugma sa Ginoo sa tibuok natong kasingkasing, salabutan ug kalag, ang pag-alagad kaniya maoy mahimong dakong tumong sa atong mga kinabuhi, ug ang bahandi nga atong paningkamotan nga maangkon mao ang Iyang gugma. Kon atong sundon kanang ikaduhang sugo, higugmaon ang atong silingan sama sa atong kaugalingon, … ang atong mga kalisud tanan mahusay ra sa madaiton nga paagi.… Hapit dili na [kinahanglan] ang paghangyo ngadto sa mga tawo alang sa mga amot, sa pag-awhag kanila nga magmadagayaon, sa pagkamanggihatagon, sa pagpaningkamot alang sa ikaayo ug kaayohan sa ilang mga isigkatawo.⁵

Samtang kita maghupot sa mga sugo, ang Ginoo manalangin kanato ug motabang kanato sa atong mga kahago.

Kita gisultihan na nga ang pagtuo patay kon kini walay binuhatan; kay maingon nga patay ang lawas kon mahimulag sa espiritu [tan-awa sa Santiago 2:17, 26], ug subo nga isulti nga adunay daghang mga Santos sa Ulahing mga Adlaw kinsa mga patay sa espirituhanong butang.

Sa daghang higayon kita nangutana sa atong mga kaugalingon, nganong kining tawhana milambo man sa plano sa kinabuhi ug sa kaluwasan, samtang ang iyang silingan, sa sama nga kaalam ug abilidad, nga klaro kaayong mga managsama ang pagpamatuod ug gahum, ug tingali mas labaw pag gahum, wala man molambo? Sultihan ko kamo ngano. Ang usa naghupot sa kasugoan sa atong Langitnong Amahan, ug ang lain pakyas sa paghupot niini. Ang Manluluwas nag-ingon nga ang nagabaton sa akong mga sugo nagatuman niini, ug kini siya mao ang naghigugma kanako; ug ang nahigugma kanako paghigugmaon sa akong Amahan, ug ang Manluluwas moingon nga siya mohigugma kaniya ug magapadayag sa akong kaugalingon ngadto kaniya [tan-awa sa Juan 14:21].

Ang Ginoo nag-ingon usab kanato nga kadtong magapatalinghug niining Akong mga pulong ug magatuman niini, mahisama siya sa usa ka tawo nga but-an nga nagtukod sa iyang balay ibabaw sa bato; ug unya mibundak ang ulan, ug mibul-og ang mga baha, ug mihuros ang mga hangin, ug mihapak niadtong balaya, apan kadto wala mapukan kay natukod man sa mga bato. Sa laing bahin, kadtong magapatalinghug niining Akong mga pulong ug dili magatuman niini, mahisama siya sa usa ka tawong boang boang nga nagtukod sa iyang balay ibabaw sa balas; ug unya mibundak ang ulan, ug mibul-og ang mga baha, ug mihuros ang mga hangin, ug mihapak niadtong balaya, ug kadto napukan ug dako gayud ang iyang pagkapukan. [Tan-awa sa Mateo 7:24–27.] Adunay daghang mga Santos sa Ulahing mga Adlaw kinsa mitukod sa ilang mga balay sa ibabaw sa balas. Sila pakyas sa pagtuman sa mga sugo sa atong Langitnong Amahan nga moabut ngari kanato sa matag karon ug unya pinaagi sa Iyang mga dinasig nga mga sulugoon.

Karon, kon anaa kanato ang Ebanghelyo (ug kita nasayud nga kini ania kanato), ako moingon ngadto sa matag usa sa mga Santos sa Ulahing mga Adlaw, kinsa nagtinguha nga molambo ug modako diha sa Ebanghelyo, siya kinahanglan nga mohupot sa mga sugo sa Dios. Samtang kita naghupot sa mga sugo sa Dios ug magpuyo og diosnon nga mga kinabuhi, kita mapuno sa gugmang pulti, kamainantuson ug gugma alang sa atong isigkatawo, ug kita motubo ug mousbaw sa tanan nga mga butang nga makapahimo kanato nga halangdon ug diosnon. Kita makaangkon usab sa gugma ug pagsalig niadtong anaa sa atong palibut. Diha sa pagbuhat sa sayon, yano, nga inadlaw-adlaw nga katungdanan nga gihatag ngari kanato nga kita motubo diha sa espiritu sa Dios.⁶

Ako nalipay pag-ayo sa ebanghelyo ni Jesukristo nga gipadayag karong panahona, ug ako tim-os nga nagtinguha nga ako unta makahimo, lakip sa tanang mga Santos sa Ulahing mga Adlaw, sa paghan-ay sa akong kinabuhi nga ang akong salabutan dili malubog, nga unta dili gayud ako mobiya sa kamatuoran, o moguba sa akong mga pakigsaad nga akong gihimo uban sa Ginoo. Ako matinguhaon nga nangandoy sa salabutan ug kabubut-on sa akong Langitnong Amahan ug sa pag-angkon sa abilidad ug kalig- on sa kinaiya sa pagpatuman niini diha sa akong kinabuhi. Ako adunay susama nga tinguha alang sa tanang Santos sa Ulahing mga Adlaw. Mapasalamaton ako nga agig tugbag sa atong kakugi, kamatinud-anon ug kamapainubsanon sa paghupot sa mga sugo sa Dios, Siya mopanalangin kanato ug moabag kanato diha sa atong mga kahago; ug mao kini ang katungdanan sa matag usa nga matinguhaon nga mangita sa Ginoo sa pagkaton sa Iyang mga pamaagi.⁷

Diha sa maayong pag-atiman sa Ginoo ang matag tawo nga nagsunod sa ebanghelyo ni Jesukristo sa dili madugay o sa kaulahian makadawat nianang bilihon nga butang nga naila isip pagpamatuod mahitungod sa kabalaan sa buhat nga atong ginahimo.

Walay mga tawo nga nakahimo og mga sakripisyo nga atong gihimo, apan alang kanato kini dili sakripisyo kondili usa ka pribilihiyo— ang pribilehiyo sa pagkamasulundon, ang pribilehiyo sa pakig-alayon sa atong Amahan sa Langit ug pagdawat sa pinili nga gisaad nga mga panalangin niadtong naghigugma Kaniya ug naghupot sa Iyang mga sugo.⁸

Walay babag nga dili matangtang sa higayon nga ang Dios momando ug kita motuman.… Si Nephi [miingon]: “Kay ako nasayud nga ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila makatuman sa butang nga siya misugo kanila.” [1 Nephi 3:7.] Ato kining hunahunaon ug ang paghupot sa mga sugo sa Dios magdala kanato ngadto sa kahayag ug kadasig sa Iyang Espiritu. Dayon ang tinguha sa atong mga kasingkasing mao na ang pagkahibalo sa salabutan ug kabubut-on sa Ginoo, ug kita mag-ampo alang sa kalig- on ug abilidad sa pagpatuman niini, pinaagi nianang pagsunod sa mga lakang sa atong Ginoo ug Magtutudlo nga si Jesukristo.⁹

Sa higayon nga atong buhaton ang atong mga katungdanan ug motubo diha sa hugot nga pagtuo ug sa pagpamatuod, ang kalisdanan dili makapahisalaag kanato.

Ang yawa andam sa pagbuta sa atong mga mata pinaagi sa mga butang niini nga kalibutan, ug iyang ikahimuot ang paghikaw kanato sa kinabuhing dayon, ang labing mahinungdanon sa tanang gasa. Apan kini wala ihatag ngadto sa yawa, ug walay gahum nga sukad gihatag ngadto kaniya aron sa pagpukan ni bisan kinsang Santos sa Ulahing mga Adlaw nga naghupot sa mga kasugoan sa Dios. Walay gahum nga gihatag ngadto sa kaaway sa mga kalag sa tawo sa pagdaot kanato kon kita nagbuhat sa atong mga katungdanan. Kon kita dili hingpit nga magmatinud-anon sa Dios, kita mipakanaog sa mga bara, kita miguba sa bahin sa sagang diin kita gipanalipdan, ug ang yawa mahimong makasulod. Apan walay tawo nga nawad-an gayud sa pagpamatuod sa Ebanghelyo, walay tawo nga misimang sa tuo o sa wala, kinsa adunay kahibalo sa kamatuoran, kinsa nag-atiman sa iyang mga katungdanan, kinsa naghupot sa Pulong sa Kaalam, kinsa nagbayad sa iyang ikapulo, kinsa mitubag sa tawag ug katungdanan sa iyang buhatan ug balaang tawag diha sa Simbahan.

Adunay pipila kinsa nagsige lang og hangyo nga masayud kon unsa ang gusto sa Ginoo alang kanila, ug kinsa daw nagpanuko sa pagbuhat niini. Ako hingpit nga nakombinser nga ang tanang gusto sa Ginoo diha kanimo ug kanako o ni bisan kinsang lalaki ug babaye diha sa Simbahan mao nga kita mobuhat sa atong katungdanan sa hingpit ug mohupot sa mga kasugoan sa Dios.”¹⁰

Pakit-a kog usa ka tawo nga nagtambong og mga miting sa iyang korum, nga mihimo sa iyang mga katungdanan diha sa ward diin siya nagpuyo, nga matinud-anon nga nagbayad sa iyang ikapulo, ug pakit-on ko kamog tawo nga puno sa espiritu sa Dios ug nagtubo ug nag-usbaw sa pagpamatuod sa Ebanghelyo. Sa laing bahin, pakit-a kog usa ka tawo nga nakakita ug mga anghel, nga adunay maanindot nga gipakita, nga nagpakita ug pagpapahawa sa mga yawa, nga milibut sa tibuok kalibutan ug nagsangyaw sa Ebanghelyo, ug bisan pa niana napakyas sa paghupot sa mga sugo sa Dios, ug pakit-on ko kamog usa ka tawo nga nagsaway sa dinihugan sa Ginoo, ug nangitag sayop sa unsay buhat sa presidente, asa ang iyang padulngan, sa unsay iyang giapilan ug giunsa niya pagpangalad ang mga kalihokan sa Simbahan….

Inyong makita nga kadtong dili mobuhat sa ilang katungdanan, kanunay lamang nagmulo ngadto sa tawo nga nagbuhat niini, ug naghimog mga katarungan alang sa ilang mga kaugalingon. Wala ko makakitag usa ka tawo nga naghupot sa mga sugo sa Dios nga adunay bisan unsang pagpanaway nga gihatag mahitungod sa bisan unsa nga pagpahigayon sa mga kalihokan sa Simbahan. Ang pagpasagad sa katungdanan, pagkapakyas sa paghupot sa mga sugo sa Dios, makalubog sa hunahuna sa tawo ug ang Espiritu sa Ginoo mopahilayo. Ato kining makita sa natala nga Doktrina ug mga Pakigsaad “Kay bisan pa og ang usa ka tawo adunay daghan nga mga pagpadayag, ug adunay gahum sa pagbuhat sa daghan nga gamhanan nga mga buhat, apan kon siya manghambog sa iyang kaugalingon nga kusog ug mopahimutang sa walay kapuslanan sa mga tambag sa Dios, ug mosunod subay sa mga mando sa iyang kaugalingon nga kabubut-on ug kalibutanon nga mga tinguha, siya kinahanglan nga mapukan.” [D&C 3:4.]¹¹

Ako praktikal kaayo sa akong panabut nga sa higayon ang usa ka Santos sa Ulahing mga Adlaw mosulti kanako nga siya nasayud nga siya naapil sa buhat sa Dios, nga siya nasayud nga kini mao ang buhat sa Ginoo, nga siya nasayud nga si Joseph Smith mao ang dinasig nga Propeta, nga siya nasayud ang mga lalaki nga mibarug sa ulohan sa simbahan mga dinasig nga mga sulugoon sa Dios, ug ang ingon nga tawo dili manumbaling bisan unsa man kagamay ang mga katungdanan nga gitudlo kaniya sa adlaw-adlaw, sa bulan nga moabut ug sa bulan nga matapus, sugod ug tapos sa tuig—wala koy pagtuo sa ingon nianang klase sa tawo.¹²

Walay kakuyaw sa bisan kinsang lalaki o babaye nga mawad-an sa iyang pagtuo dinhi niining Simbahan kon siya mapainubsanon ug mainampoon ug masulundon ngadto sa iyang katungdanan. Wala pa koy nahibaloan nga tawo nga nawad-an sa iyang pagtuo sa ingon niana. Pinaagi sa pagbuhat sa atong mga katungdanan ang hugot nga pagtuo mousbaw hangtud nga kini mamahimong hingpit nga kahibalo.¹³

Ako nakakita og mga lalaki ug mga babaye nga mitalikod sa Simbahan ug hapit sa walay pagpihig akong nakita kanang apostasiya nga miabut kanila sa hinay hinay.

Sa higayon nga ikaw anaa sa pagbuhat sa imong katungdanan sama ra kini nga mibarug ka sa imong poste, ug matag poste nanaglinya. Apan sa usa lang ka bikang palayo niini, ang matag poste daw mawala sa linya. Magkalayo ang imong maabtan gikan sa tarung nga linya, daw magkahiwi tan-awon ang mga poste. Ang higpit ug pig-ot nga dalan sa katungdanan mao ang magtultol kanimo ug kanako balik ngadto sa atubangan sa Dios.¹⁴

Ang mga kasugoan motabang kanato nga maandam aron makapuyo uban sa atong Langitnong Amahan.

Ang Ginoo, nga nasayud kon unsay labing nindot alang kanimo ug kanako ug alang sa matag usa, naghatag kanato og mga balaod, nga kon atong sundon, makapahimo natong sama sa Dios, mopahiangay ug mopasarang ug moandam kanato sa pagbalik ug mopuyo sa atubangan sa atong Langitnong Amahan ug makadawat nianang pahalipay: “Maayong pagkabuhat maayo ug kasaligan nga ulipon.” [Mateo 25:21.]

Mao kanay Atong gihagoan.

Kita ania sa eskwelahan, nanagpahiangay, nanagpasarang, ug nanag-andam sa atong mga kaugalingon nga kita mamahimong takus ug angayan nga mobalik ug mopuyo sa atubangan sa Langitnong Amahan, ug ang lalaki kinsa moangkon nga siya nasayud nga ang ebanghelyo tinuod ug unya wala magsunod niini, wala maghupot sa mga sugo sa Dios. Ang ingon niana nga lalaki dili gayud makaangkon niana nga kalig-on, ngadto nianang gahum, ngadto nianang kinatas-an, ug ngadto nianang kapasidad diha sa Simbahan ug sa Gingharian sa Dios nga iyang maangkon kon siya mosunod sa mga balaod sa Dios.¹⁵

Ang labing maayong dalan nga subayon mao ang pagtuman sa inadlaw adlaw nga mga katungdanan nga moabut. Sa ingon niining paagiha ang usa ka lalaki magantihan samtang siya mopadayon, ug maglakaw sa dalan padulong sa kaluwasan.¹⁶

Ang kalampusan sa mata sa atong Tiglalang sa kasagaran gyud, masukwahi sa unsay pagsabutt sa tawo kon unsa ang kalampusan. Sa kalagmitan ang usa ka tawo moingon nga malampuson kadtong mga tawo nga sapian, apan walay pagtagad nga gihimo kon sa unsa nga paagi siya nasapian o unsay katuyoan sa paghimo niini. Mahimo niyang gun-ubon ang tanan nga maayong pagbati sa iyang kinaiyahan ug mohikaw sa iyang pribilihiyo sa pagpuyo uban sa iyang Tighimo sa kinabuhi nga moabut tungod sa iyang makanunayon nga pagtinguha sa mga butang niining kalibutana nga walay malungtarong bili….

Atong buhaton ang kabubut-on sa Amahan sa langit hangtud karon, ug kita mahimo nang andam alang sa atong katungdanan sa ugma, usab sa kahangturan nga umaabut. Ayaw gayud kalimut nga mao kini ang perlas nga labing bilihon—kinabuhing dayon— nga atong gitrabahoan. Siya lamang kansang kahago sa kinabuhi gigugol alang sa pag-angkon niini maoy mamahimong malampuson nga tawo.¹⁷

Kon atong tun-an pag-ayo ang plano sa kinabuhi ug sa kaluwasan, kon atong tun-an pag-ayo ang mga sugo nga gihatag kanato isip mga sakop sa Simbahan sa Dios, atong makita nga ang matag usa nianang mga sugo gihatag alang sa katuyoan nga makaayo kanato, nga kita maedukar, nga kita mahimong sarang ug andam sa pagbalik ug pagpuyo sa atubangan sa atong Langitnong Amahan. Kining mga katungdanan ug obligasyon giplano aron sa paghimo natong diosnon sa atong gawi. Kini giplano aron sa paghimo natong mga Dios, ug aron sa pagpahiangay ug pagpasarang kanato nga kita mamahimo, sumala sa nasaad nga kita mamahimo, nga manununod sa atong Ginoo ug Manluluwas nga si Jesukristo ug mopuyo uban Kaniya sa atubangan sa Dios ang Amahan sa Kahangturan hangtud sa dili maihap nga mga dispensasyon sa kahangturan.

Ang tumong sa atong pag-anhi niining yuta mao nga atong makab- ot ang atong kahimayaan, nga kita mahimong moandam sa atong kaugalingon sa pagbalik sa ug pagpuyo uban sa atong Langitnong Amahan; ug ang atong Amahan, bisan nasayud sa kasaypanan ug kapakyasan sa katawhan, siya naghatag kanato og piho nga mga sugo nga sundon, ug kon atong tun-an pag-ayo ang mga katungdanan nga gihatag kanato atong masayran nga kini alang ra usab sa atong tinagsa tagsa nga kaayohan ug kauswagan. Ang eskwelahan sa kinabuhi diin kita gipahimutang ug ang mga leksyon nga gihatag ngari kanato pinaagi sa atong Amahan makapahimo kanato sa eksakto Niyang gitinguha, aron nga kita maandam nga magpuyo uban Kaniya.¹⁸

Ania ang labing tinuod, mga Santos sa Ulahing mga Adlaw. Atong hunahunaon nga ang Dios maoy labing Gamhanan sa tibuok kalibutan. Atong hunahunaon nga kon kita magmatinud-anon sa paghupot sa mga sugo sa Dios ang Iyang mga saad matuman, matag usa niini. Kay Siya nag-ingon nga walay pagsayloan nga kasugoan bisan usa lamang ka kudlit o usa ka tulpok niini hangtud ang tanan matuman [Mateo 5:18]. Ang paroblema, ang kaaway sa kalag sa tawo nagbuta sa ilang mga hunahuna. Iyang abug abugan, ingnon talang, ang ilang mga mata, ug sila mabutaan sa mga butang sa kalibutan. Ang mga lalaki wala magtigum og mga bahandi sa langit, diin dili makutkot sa tangkob ug taya, diin ang mga kawatan dili makalungkab ug makakawat [tan-aw sa Mateo 6:19–20], apan sila nagpahimutang sa ilang mga kasingkasing diha sa mga butang niining kalibutan, ug ang kaaway nakaangkon og gahum ibabaw kanila.

Ingnon ko kamo, mga Santos sa Ulahing mga Adlaw, kana nga perlas nga labing bilihon mao ang kinabuhing dayon. Ang Dios nagsulti kanato nga ang labing mahinungdanon sa tanang mga gasa nga Iyang mahatag sa tawo mao ang kinabuhing dayon [tanawa sa D&P 14:7]. Kita naghago alang nianang mahinungdanon nga gasa, ug kini maato kon kita maghupot sa mga sugo sa Dios. Apan dili kini makahatag kanato og kaayohan kon igo lang kitang mopaila ug mosangyaw niini sa tibuok kalibutan nga mao kini ang ebanghelyo, apan ang mapuslanon kanato mao ang pagbuhat sa kabubut-on sa Dios.¹⁹

Ang mahinungdanon kaayo nga butang alang kanimo og kanako mao ang pagkaplag ko kita naglakaw ba diha sa higpit ug pig-ot nga dalan padulong sa kinabuhing dayon, ug kon kita wala, kon ato bang gitugutan ang kaaway nga mobuta sa atong mga hunahuna ug makapahilayo kanato sa dalan nga magtultol kanato balik ngadto sa atubangan sa Dios? Ang matag usa kinahanglan mosusi sa iyang kaugalingon nga kasingkasing aron sa pagsuta diin siya napakyas, ug dayon kinahanglan siyang mangita gayud sa atong Langitnong Amahan alang sa pag-abag sa Iyang Espiritu Santo, nga siya unta mahibalik sa higpit nga dalan.²⁰

Gikasulti na … nga wala nato buhata ang tanan natong mahimo. Dili ako motuo nga adunay tawo nga nakakab-ot sa iyang gusto, apan kon kita maningkamot, kon kita magtrabaho, kon kita mosulay, hangtud sa labing maayo natong abilidad, sa pag-uswag adlaw-adlaw, nan, kita nagbuhat sa atong katungdanan. Kon kita naningkamot sa pagtambal sa kaugalingon natong mga depekto, kon kita nanimuyo nga makapangayo kita sa Dios sa kahayag, sa kahibalo, sa kaalam, ug labaw sa tanan sa Iyang Espiritu, nga atong mabuntog ang atong mga kahuyang, busa, ako maksulti kaninyo, kita anaa sa higpit og pig-ot nga dalan padulong sa kinabuhing dayon, busa dili kita kinahanglan nga mahadlok.²¹

Adunay usa lamang ka dalan sa kahilwasan alang sa mga Santos sa Ulahing mga Adlaw, ug mao kana ang dalan sa katungdanan. Dili lamang pagpamatuod; dili ang kahibulongan nga mga pagpakita; dili ang pagkahibalo nga ang ebanghelyo ni Jesukristo tinuod, nga mao kini ang plano sa kaluwasan—dili gayud ang pagkahibalo nga ang Manluluwas mao ang Manunubos, ug nga si Joseph Smith usa ka Propeta, nga maoy makaluwas kanimo og kanako; apan ang paghupot sa mga sugo sa Dios, magpuyo sa kinabuhi sa usa ka Santos sa Ulahing mga Adlaw.²²

Mga Sugyot alang sa Pagtuon ug Panaghisgutan

Sa unsa nga mga pamaagi nga ang pagkamasulundon “dili usa ka sakripisyo apan usa ka pribilehiyo”? Sa unsa mga paagi nga ang atong mga kasingkasing nga mapuno sa gugma sa Dios makapahimo natong malipayon nga magsunod sa Iyang mga sugo?
Unsa nga mga kasinatian nga nagkomperma sa kamatuoran nga ang Dios mapugos sa pagtuman sa Iyang mga saad sa higayon nga kita mobuhat sa Iyang mga sugo? (Tan-awa usab D&P 82:10.)
Sa unsa nga paagi nga ang sayop nga paghukom sa kalampusan makapahilayo kanato sa dalan padulong sa kinabuhing dayon?
Unsa nga aspeto sa atong kinabuhi ang lagmit makasamok kanato gikan sa pagpukos sa mga butang sa Dios? Unsaon nato pagsanta niini nga mamahimong kasamok?
Ngano nga ang pagpasagad sa katungdanan usahay moabut kanato sa hinayhinay? Unsay atong mahimo nga makatabang kanato nga magpabilin nga makugihon ug magmaisugon sa pagtuman sa atong mga katungdanan?
Unsa ang inadlaw-adlaw nga mga katungdanan sa tanan nga mga sakop sa Simbahan? Unsay uban pang mga katungdanan nga piho diha inyong personal nga mga kahimtang?
Ngano nga ang katungdanan mao “lamang ang dalan sa kahilwasan alang sa mga Santos sa Ulahing mga Adlaw”?

Savior — Ang Manluluwas miingon, “Ang nagabaton sa akong mga sugo ug magatuman niini, kini siya mao ang naghigugma kanako: ug ang naghigugma kanako pagahigugmaon sa akong Amahan, ug ako maghigugma kaniya ug magapadayag kaniya sa akong kaugalingon”(Juan 14:21).