Kapitulo 7

Personal, Malungtaron nga Pagpamatuod

Samtang atong sundon ang ebanghelyo ni Jesukristo, kita motubo sa kahibalo mahitungod sa kamatuoran ug sa atong katakus sa pag-alagad sa Dios.

Gikan sa Kinabuhi ni Heber J. Grant

Ang pagpamatuod ni Heber J. Grant mahitungod sa gipahiuli nga ebanghelyo nagsugod sa paggamot sa bata pa siya. Sa kaulahiang bahin sa iyang kinabuhi, kanunay siya nga mopadayag og pasalamat sa mga magtutudlo ug sa mga pangulo nga nagmatuto sa iyang nagtubo pa lamang nga pagpamatuod. Mapasalamaton siya ilabi na gayud sa iyang inahan. “Ako nagbarug dinhi karong adlawa isip presidente sa Simbahan, ” miingon siya usa ka higayon niana, “tungod kay akong gisunod ang pahimangno ug tambag ug ang mainiton nga pagpamatuod mahitungod sa kabalaanon sa buhat sa Dios, nga akong naangkon tungod sa akong inahan.”¹

Samtang siya nagtubo, ang iyang pagpamatuod nagkadugang. Siya misulti bahin sa panghimatuod nga iyang nadawat samtang nagtuon siya sa Basahon ni Mormon: “Isip batang lalaki nga dulan sa kinse anyos akong gibasa, nga mainampingon ug mainampuon, ang Basahon ni Mormon, ug miabut sa akong kasingkasing ang usa ka malungtaron ug lig-on nga pagpamatuod sa balaanong pagkatinuod niini. Sukad niadtong adlawa hangtud karon ang maanindot kaayo nga pagtulun-an niini nahimo nga tighupay, panalangin, ug giya ngari kanako.”²

Si Presidente Grant nagpadayon sa pag-alima sa iyang pagpamatuod sa tibuok niyang kinabuhi, matinguhaong nag-ampo nga magpabilin siyang matinuoron sa hingpit nga pagtuo.³ Sa pagedad niya og 80 anyos siya namahayag: “Ako sa pagkatinuod ug sa tinuoray walay makaplagan nga pinulongan sa pagpadayag sa pagkamapasalamaton nga mipuno sa akong kasingkasing tungod sa malungtaron nga pagpamatuod, sulod mismo sa akong kalag, mahitungod sa kabalaan niini nga buhat. Sa nangaging mga katuigan, ako nakakaplag og mga kamatuoran, labihan ka daghan, labihan ka lig-on, labihan ka gamhanan, mahitungod sa kabalaan niini nga buhat, nga wala akoy pulong nga makapadayag sa akong pagpasalamat; ug wala akoy nakita nga nakapaminos sa akong pagtuo.”⁴

Mga Pagtulun-an ni Heber J. Grant

Ang pagpamatuod moabut isip usa ka personal nga pagpadayag gikan sa Dios pinaagi sa Espiritu Santo.

Ang Dios naghatag ngadto sa mga kalalakin-an ug kababayenhan sa tibuok kalibutan, nga nangita sa kahayag sa Iyang Espiritu, agig tubag sa mapaubsanong mga pag-ampo, og usa ka pagpamatuod ug kahibalo nga kining Ebanghelyo mao gayud kon unsa man ang gipahayag niini—nga kini mao ang kamatuoran, nga kini mobarug hangtud sa kahangturan, ug nga ang tanan nga mosunod niini mahimaya sa hangtud diha sa presensya sa atong langitnong Amahan, ug sa Iyang Anak, ang atong Manunubos.⁵

Gatusan, oo, liboan ang natandog sa ilang kasingkasing, ug pinaagi sa pagdasig sa Espiritu, ug sa mga pagpadayag sa Dios ngadto kanila, sila nakadawat og kahibalo mahitungod sa kabalaan niini nga buhat diin sila nalambigit. Sila nakadawat og pagsaksi sa Espiritu Santo ngadto kanila, naghatag og katagbawan sa ilang mga kalag, nagtagbaw sa ila gayud nga kaugalingon, nga nagtulod kanila sa pagsangyaw sa hingpit nga kalipay nga sila nasayud nga ang Dios buhi, nga sila nasayud nga si Jesus mao ang Kristo, nga sila nasayud nga si Joseph Smith usa ka propeta sa tinuod ug buhi nga Dios. Walay tawo sa kalibutan nga makasulti nga siya nasayud nga ang ilang gisulti dili tinuod. Mahimong dili siya motuo sa ilang pagpamatuod, apan dili niya mahimong kawaton ang kahibalo nga ilang gibatonan. Mahimong ipahayag nako nga akong gimahal ang akong pamilya, ug ang tawo mahimong moingon, “Dili ko motuo niana, ” apan dili kana makausab sa kahibalo nga akong naangkon nga tinuoray nako silang gimahal. Kon ang usa ka tawo makadawat sa pagsaksi sa Espiritu Santo, kon ang tawo makadawat sa kahibalo nga kining ebanghelyo tinuod, ug siya nasayud niini, ug iya kining isangyaw, ang tibuok kalibutan, nga dili motuo, dili makausab sa kahibalo nga anaa kaniya.⁶

Akong gipasalamatan ang Ginoo nga ang tanang mga Santos adunay katungod sa mga paghunghong sa Iyang espiritu santo. Akong gipasalamatan ang Dios nga walay usa kanato nga nagsalig sa ubang mga tawo sa pagpamatuod sa ebanghelyo. Ako Siyang gipasalamatan nga ang matag usa ug ang tanan makahimo sa pagbaton og pagpamatuod sa ilang kaugalingon.⁷

Mao kana ang personal nga kahibalo, kanang ligdong, gamay nga tingog sa pagpadayag nga moabut ngadto sa tanang matinud- anon, mainampuon nga kalag, agig tubag sa pag-ampo, nga naghatag og gahum niini nga Simbahan. Kon wala kining indibidwal nga pagpamatuod, nga moabut sama sa naandan ngadto sa mga kalalakin-an ug kababayenhan sa tibuok kalibutan sa dihang sila nakadungog sa ebanghelyo ug nangamuyo sa Dios alang sa iyang espiritu, dili unta kita maingon niini karon—naghiusa nga katawhan, usa sa kasingkasing ug kalag, nahiusa sa Dios ug nahiusa sa atong Manluluwas.⁸

Gusto nakong isulti dinhi gayud nga ang gahum sa Dios, nga ang Espiritu sa Sios mao ang makombinser sa mga tawo; nga dili ang pagkamaayong mosulti, dili ang edukasyon, dili ang maayong mga pulong, o ang maanindot nga pagpamulong niini, maoy makakaplag og dapit sa mga kasingkasing sa mga anak sa tawo aron sila makombinser sa Kamatuoran.⁹

Nakahimamat na ako og daghang mga tawo nga nagduhaduha sa akong pagpamatuod. Sila miingon, “Mr. Grant, dili ka mahimong masayud niining mga butanga.” Apan andam ako ug gusto nga mopaambit sa akong pagpamatuod nga nasayud ako niining mga butanga, ug ako nasayud niining mga butanga sama nga ako nasayud unsa ang kahayag itandi sa kangitngit, kainit itandi sa kabugnaw. Nasayud ako nga human mangamuyo sa Ginoo ako nakadawat og mga tubag sa akong mga pag-ampo. Busa, ako adunay kahibalo niining mga butanga, ug ako nasayud niini sama nga ako nasayud nga akong gimahal ang akong pamilya ug mga higala. Kini nga kahibalo miabot kanako sa pamaagi nga ako andam ug gusto nga mopaambit sa akong pagpamatuod sa tibuok kalibutan, ug ako nasayud nga kinahanglan akong atubangon ang pagpamatuod nga akong gihatag. Ako dili matinud-anon sa akong kaugalingon kon dili nako himoon, kon adunay higayon, ang paghatag og pagpamatuod sa mga butang nga akong nahibaloan.¹⁰

Kita, isip mga Santos sa Ulahing mga Adlaw, adunay dakung katarungan nga magpasalamat sa daghang mga pagpakita sa kaayo ug kalooy sa atong Dios. Maningkamot kita, sa tanan natong katakus, sa pag-angkon og igong kinaadman, kahayag ug kahibalo gikan sa atong langitnong Amahan aron kita makapadayon sa dalan sa katungdanan. Daghan kanato ang nagtuo nga kita lig-on na sa atong kahibalo sa Ebanghelyo, ug nga gamay ra kaayo ang atong kahadlok nga ang mga pagsulay mopahilayo kanato gikan sa kamatuoran. Sa samang higayon, kinahanglan nga atong masabtan pag-ayo nga walay adlaw o oras sa atong kinabuhi nga makahimo kita sa pagbarug nga mag-inusara ug magpadayon sa pagpamatuod mahitungod sa Ebanghelyo kon wala ang kahayag ug inspirasyon sa Espiritu sa Dios.¹¹

Atong madawat ug mapalig-on ang atong mga pagpamatuod pinaagi sa pag-ampo, pagtuon, ug pagkamasulundon sa Ginoo.

Ang pinakamahinungdanon nga pagpamatuod nga atong madawat mao kanang tingog sa pagpadayag—ang pagdasig sa Espiritu Santo. Walay tawo nga makaangkon niini kon dili siya magpakabuhi aron mamahimong angayan nga modawat niini.¹²

Dili nimo mahimong ihatag sa uban ang butang nga imong naangkon sa imong kaugalingon. Dili ako makahimo sa paghatag og pagpamatuod ngadto sa usa ka tawo sama nga dili ako mahimong mokaon para kaniya. Makasulti ko kaniya kon unsaon sa pag-angkon niini. Mahimo nako siyang sultihan sa mga panalangin sa Dios ngari kanako. Apan ang matag usa sa kada tawo kinahanglan gayud nga mosunod sa ebanghelyo kon nangandoy siya nga makaangkon og kinaugalingon nga pagpamatuod mahitungod sa kabalaan niini nga buhat.

Nasulayan na kini sa mga kalalakin-an ug kababayenhan sa tibuok kalibutan kinsa gikasilagan ug gipanamastamasan ug gigukod sa ilang kaugalingong unod ug dugo, tungod kay sila nagpasakop sa Simbahan; apan agig tubag sa mapaubsanon nga pag-ampo, ug pinaagi sa pagbuhat sa mga butang nga gisugo sa Dios nga ilang buhaton, sila nakadawat sa kahayag ug kahibalo ug sa pagpamatuod mahitungod sa kabalaan niini nga buhat.¹³

Akong mga kaigsoonan, kon atong tun-an ang mga kasulatan, ang plano sa kinabuhi ug sa kaluwasan, magsunod sa mga kasugoan sa Ginoo, ang tanang mga panaad nga gihimo matuman diha sa atong mga ulo. Ug kita motubo ug molambo diha sa kahayag, kahibalo ug kinaadman.¹⁴

Mosaad ako kaninyo, isip alagad sa buhi nga Dios, nga ang matag lalaki ug babaye nga mosunod sa mga kasugoan sa Dios molambo, nga ang matag panaad nga gihimo sa Dios matuman diha sa ilang mga ulo, ug nga sila motubo ug molambo diha sa kaalam, kahayag, kahibalo, kinaadman, ug labaw sa tanan, diha sa pagpamatuod ni Ginoong Jesukristo.¹⁵

Ang atong mga pagpamatuod magkalig-on samtang ato kining ipaambit.

Walay tawo nga makasangyaw sa ebanghelyo ubos sa pagdasig ug gahum sa Espiritu sa buhi nga Dios … gawas kon kana nga tawo mobati, masayud ug makasabut nga siya gipanalanginan sa Ginoong Makagagahum, ug siya makahimo sa pagpamatuod mahitungod sa gahum sa Dios nga moabut sa panahon nga kita mosangyaw niining ebanghelyo ni Ginoong Jesukristo.¹⁶

Nakadungog ko ni Presidente [Brigham] Young ug sa ubang mga tawo nga nag-ingon sa daghang mga higayon nga mas kasagaran ang mga batan-on makadawat og pagpamatuod, sulod sa ila gayud nga galamhan, mahitungod sa kabalaan niini nga buhat, samtang sila nagbarug sa ilang kaugalingong mga tiil sa [paghatag sa ilang pagpamatuod] kay sa panahon nga sila nagluhod ug nagampo alang niana nga pagpamatuod; nga ubos sa pagdasig sa Espiritu sa Dios miabot ngadto kanila, ang buhong nga pagbu-bu niana nga Espiritu, nga ang ilang mga kalag gisanapan sa kahayag ug sa kahibalo nga nagagikan sa Dios pinaagi sa Espiritu Santo. Kini nga pagsaksi miabot sa ilang kasingkasing nga sa maong paagi sila nakahimo sa pagpamatuod nga sila tinuod nga nasayud nga sila tinuoray nga nalambigit sa plano sa kinabuhi ug sa kaluwasan; nga sila nasayud sa tinuoray nga ang Dios buhi, nga si Jesus mao ang Kristo, nga si Joseph Smith propeta kaniadto ug karon sa tinuod ug buhi nga Dios.¹⁷

Samtang nagdumala sa misyon sa Uropa, nakahigayon ako sa daghang mga okasyon, sa paghatag og pahimangno sa batan-ong mga lalaki nga miadto didto aron sa pagsangyaw sa ebanghelyo— batan-ong mga lalaki kinsa wala gayuy edukasyon, wala gayuy kasinatian, ug daghan kanila mibarug sa unang higayon sa ilang kinabuhi ug mihatag sa ilang pagpamatuod sulod sa opisina sa Liverpool. Ako silang gisultihan sa pagtuon sa ebanghelyo ug sa pag-ampo alang sa pagdasig sa Espiritu sa Ginoo; ug gisaaran sila nga kon ila lamang nga bukhon ang ilang mga ba-ba ug mohatag og pagpamatuod nga si Jesukristo mao ang Manunubos sa kalibutan, ug nga si Joseph Smith iyang propeta, ang Dios mohatag kanila og igsusulti bisan kon ang ilang hunahuna blangko pa sa pagsugod. Dili lang kay baynte apan daghan ang mga elders nga mihatag og pagpamatuod ngari kanako nga kining panaad natuman, ug nga ang Dios sa tinuod gayud mipanalangin kanila sa matag higayon nga sila mihatag og pagsaksi sa kabalaan sa misyon ni Joseph Smith, ang nagtukod pag-usab, ubos sa kabubut- on sa Dios, sa Simbahan ni Kristo sa ibabaw sa yuta.¹⁸

Panahon sa akong kinabuhi, ginatus ug linibo ka pagpamatuod ang akong nadungog gikan sa batan-ong mga lalaki ug babaye kinsa milakaw aron sa pagsangyaw sa Ebanghelyo dayon mibalik gikan sa ilang misyon ug naghatag og pagsaksi nga mitubo ang ilang kahibalo sa kabalaan niini nga buhat, nga ang ilang pagpamatuod napalig-on.¹⁹

Ang paghunong sa paglambo wala dinhi sa simbahan sa Dios; dili kita mahimong magsalig sa pagpamatuod nga nadawat sa nanglabay nga mga katuigan. Atong …nadungog ang pagpamatuod sa usa ka tawo nga nag-edad og setentay nuebe, apan kon siya mohunong sa paghatag sa iyang pagpamatuod nga iyang nadawat ang espiritu sa Dios mobiya kaniya, kay walay gitakda nga pangidaron diin kita makahunong sa buluhaton ug sa ebanghelyo sa Dios.²⁰

Ang pagpamatuod mohatag kanato og abilidad ug kaisug sa pagtuman sa buluhaton sa Ginoo.

Kadtong mga masulundon sa mga kasugoan sa Ginoo, kadtong nagsubay sa mga kinahanglanon sa ebanghelyo, molambo sa matag adlaw nga molabay ug sa matag tuig nga molabay diha sa pagpamatuod ug sa kahibalo sa ebanghelyo, ug sa determinasyon sa pag-awhag sa ubang tawo sa pagpakisusi sa plano sa kinabuhi ug sa kaluwasan.²¹

Kita isip usa ka katawhan nakapakita nga ang pamahayag sa Manluluwas tinuod, nga nag-ingon, nga kon tuyoon ni bisan kinsa ang pagbuhat sa kabubut-on sa Amahan iyang mahibaloan ang doktrina [tan-awa sa Juan 7:17], ug nga kita [adunay] hingpit ug bug-os nga kahibalo; ug kana mao ang hinungdan nga kita [karon] andam nga mosakripisyo tungod ug alang sa kamatuoran.²²

Mapasalamaton kaayo ako nga ang mga Santos sa Ulahing mga Adlaw sa tibuok kalibutan adunay personal, kinaugalingon ug malungtaron nga pagpamatuod sa kabalaan sa buluhaton diin kita may kalabutan. Kon dili pa lang tungod niana nga pagpamatuod ang mga kalalakin-an, o mga kababayenhan, dili maghunahuna sa paghimo sa talagsaon nga mga sakripisyo nga ilang gihimo dinhi ug sa gawas sa nasud, alang sa pagpauswag sa buluhaton sa Ginoo….

… Ako mapasalamaton sa higayon nga ako maghunahuna sa mga kalalakin-an nga nagbarug sa kaulohan niini nga Simbahan ug sa mga opisyales nga nangulo niini, nga naghatag sa ilang panahon ug sa ilang mga talento, naghimo sa mga sakripisyo (kanang mga sakripisyo nga may kalabutan sa mga butang niini nga kalibutan), ug nagbaton og hingpit ug malungtaron nga kahibalo nga ang Dios buhi, nga siya modungog ug motubag sa atong mga pag-ampo; nagbaton sa kahibalo, sa wala gayuy pagduda nga ang Dios nagpakita kang Joseph Smith ug mipaila sa iyang Anak ngadto kaniya; nagbaton og hingpit nga kahibalo nga ang Aaronic ug ang Melchizedek Priesthood gipahiuli sa kalibutan pinaagi sa mga kalalakin-an nga naghupot sa mga yawe sa Tunga-tunga sa Panahon….

Walay laing butang nga makahatag kanato og kalampusan, bisag dili kaayo parehas sa atong kalampusan karon, gawas lang niining hingpit ug tinuod nga kahibalo nga atong gibatonan isip usa ka katawhan.²³

Kon akong nailhan ang akong kaugalingong kasingkasing, nagtuo ako nga kini nabug-os diha sa pagpauswag sa Simbahan ug gingharian sa Dios. Nasayud ako nga walay butang sa kalibutan nga akong gikalipay pag-ayo kay sa kamatuoran nga ako nakig- uban sa mga alagad sa Dios nga mga lalaki ug mga babaye dinhi sa Simbahan ni Jesukristo; ug wala ako magtuo nga adunay adlaw nga molabay nga wala ako magpasalamat sa Dios alang sa pagpahiuli og usab sa plano sa kinabuhi ug kaluwasan, ug nga ako gipanalanginan nga makaambit niini. Ako mangamuyo kaniya sa dakong tinguha nga ang akong hunahuna dili gayud mangitngitan, nga dili gayud ako mahimulag gikan sa kamatuoran; nga ako dili gayud malimot sa bisan hain nga pakigsaad nga akong nahimo, apan nga, samtang ako magtubo sa pangidaron ug mouswag sa salabutan, nga ako motubo sa usa ka pagpamatuod sa ebanghelyo ug sa tinguha—dili lamang tinguha, apan sa pagbuhat niini—nga molihok alang sa padayon nga pag-uswag sa gingharian sa Dios ibabaw sa yuta.²⁴

Mga Sugyot alang sa Pagtuon ug Panaghisgutan

Nganong tinuod man nga walay tawo nga makadawat og pagpamatuod “kon dili magpakabuhi nga mamahimong takus niini”?
Ngano nga ang pagpamatuod nanginahanglan man og makanunayon nga pagpalig-on? Unsaon nato nga mahimong maunongon ug walay pagkaluya sa atong mga paningkamot nga motubo diha sa atong pagpamatuod?
Sa unsa nga paagi nga ang atong mga pagpamatuod makatabang kanato sa panahon sa pagsulay o pagpanggukod? Sa unsang paagi nga ang atong mga pagpamatuod makatabang kanato sa panahon sa kaharuhay ug kabulahanan?
Ngano nga ang atong mga pagpamatuod malig-on man sa panahon nga ato kining ipakig-ambit? sa panahon nga kita maminaw sa mga pagpamatuod sa ubang tawo?
Sa unsa nga mga higayon gawas sa miting sa pagpamatuod nga makahimo kita sa pagpakig-ambit sa atong pagpamatuod?
Unsaon sa mga ginikanan pagtabang sa ilang mga anak nga makaugmad og pagpamatuod sa ebanghelyo?

man studying scriptures — Samtang magtuon kita sa mga kasulatan ug magpakabuhi sumala sa mga baruganan nga anaa niini, “motubo kita ug mouswag sa kahayag, kahibalo ug kinaadman.”